رواية كسرة قلب الفصل الثاني والثلاثون 32 - بقلم نور الشمس

صگر..
وصلت قريب البيت اهلها وانه نار شفت ولد عمي متجمعين براس شارعهم دورت السياره وطلعت من شارع ثاني
نزلت دگيت الباب بقوه وانه كل مااتذكر الليله الاولى الي انطوه الي وشلون اتخلت عنه الدم يفور براسي
اول ماطلع ابوها
جان متفاجأ
بدون سلام گتله

..بنتك شتريد مني بعد كابوس صارتلي شوكت اخلص منها انتم عدكم ثار وياي اطلبوني بطلابه لو هوه حركان دم وخلص

..عيب عليك هذا الحجي وبنتي لاتجيب سيرتها طلعت من ذمتك وهسه هيه بذمة غيرك انت ابن عشاير وتعرف رجلها مايرضاها تصير بلسانك انت وغيرك عليها حشم هاي

..ضحكت بحركه لاوالله خاف مايرضا ويزعل رجلها يعرف الاصول هوه جا ماطبق هالحجي من چانت بذمتي
شووف واسمعني زين شفتوني سكتت وعبرت الها الصار اول وتالي هيه بنتك وانت تتكفل عارها مهما كان انه شلت ايدي لأن مو من حقي اذبح واهدد بس هذا مو معناها اسوي التردونه يمكن الخيير عدكم فقير وگلتوو خل ندوسه
خيرويتنه من طيب اصلنا مو عبالكم فقره وانتم اذكياء
ابني لو اخر يوم بعمري اخليها بحسرة شوفته والله والله لو تبچيلي دم ماتشوفه دعاء ولايصيرلها ابن شفتها هيه وامها واكفات وره الباب صحت سمعتن
مامنتبه لليمي الدنيا مگلوبه والشارع كله عالم
طلع من بينهن ولد نهاية العشرينات تقريبا جان يعلج ويمشي برهدنه اول ماطلع دفعني

..لك انت شنوو جاي وتعيط وتسب شنو سايبه هيه

..انت لاتدخل ولاتكلي ولك لا فچك اديره مشكله بيناتنه مني انت حته اسولف وياك

..اني نسيبهم ومن صوتك عرفتك انت الهمجي طليق زوجتي اذا مبتعدت منا انهيك والله

..شوف السالفه مو يمك اطلع منها لو انت تصير مسؤول عن مرتك ومااريد اسمع اسمها وكفيني شرها وكل ولد ماالها عندي يمها انت وبيك خير وخلف ولد وخل تنسى عدها ولد مني فاهمين الولد ماتشوفه والله تحلم بشوفته

..مو بكيفك غصبا عنك اني اهلي كلهم واصلين بالدوله واني ضابط اجرك جر والله منا لمن تتنازل الها

..دفعته حيل وصارو ناس بينه ..هيه وينها الدوله طاح حظها من صاروو امثالك بيها عرض ناس ماحفظته انت تحفظ امنها بيك خير وسوي اليطلع بأيدك وارد اشوفك هنا منهوو يحكم دولتكم وقانونها لو قوانين العشاير وانه ابنها
وحته بالدوله الي تخوفني بيها مالكم حگ مرتك متنازله ومحاميها خلص كلشي ابوها موجود
كفوني شركم واطلعوو من حياتي

..ياعشائر الي تهدد بيها همج افكاركم قبليه صوج خالي الي نطاكم من البدايه

..جنت داير وجهي اريد ارجع للبيت ومااريد اطولها من سمعته حچه هيج ركضت عليه هيه ركضه هيه طفره طكيته كله التها بخشمه الي نزل منه دم طب جوه
گلت الابوها فهمها مو كلشي تريده يصير الها انه مو ابوها انت ترضالها على كلشي انه غير من ذبت الولد مافكرت بي ليش ماحنت اذا سمعت الموضوع عهذا انفتح ماتخلصون مني والله

عفته ومشيت والعالم تتنوع
انداريت ع السياره اريد افتحها سمعت الناس صاحوو لا لا اوگف استهدي بالله
بس رفعت عيني سمعت الصوت وحسيت بدفعه قويه رجعت ليوره شويه اكو نار صارت بجهة صدري اليمنه من جهة صدري بس قريبه على رمانة جتفي
شويه وحسيت بوجع فضيع
الناس التمت شويه گتلهم فتحولي باب السياره كعدت بسيارتي وانه اريد اخابرهم بس مااگدر الوجع اخذمن حيلي وبعدني مصدوم ومااعرف شحجي وهم افكر بفهد خايف علي يدري
رجلها ضربني و ماادري وين اختفه ماشفته
شويه واسمع صوت سيارات وگفت قريبه الي سمعت
صوت اخواني صوت فهد اقربلي چان
من شافو الناس اخترعوو فتح السياره وهوه يعاين الأيدي الي تنزف وانه ضاغط عليها بخاولي السياره

..صگر بويه انت زين هذا ياهو. الرماك ليش اجيت الوحدك

.مابيه شي زين انه بس هذا رجلها ومدري وين وله خاف شرد

..لاتهتم لويصير ابطن الحوت اجيبه واوصله
صاح الولد عمي يلله امشونه

دگ عليه التليفون وهوه جاوب والرمي اشتغل رموو هواي گطع التليفون فهد كال هاي امك بالها يمك

صاح ولكم بكيفكم انتم ياهوو گالكم ترمون
حركوو سياراتكم وحسابكم بعدين

اخذني للمستشفى ودارني يمه وره
بديت اعرگ واوون بصوت ناصي كاتم الوجع بيه

محمد جان يسوق
كله شيخ ليش ماخليتنه انهججهم بهالليله

..مو هيج تنحل حسابهم بعدين بس نمشي حسب الاعراف مو كوتره هيه
ابنه هوه المتهجم عليهم وهمه اعتدوو الاجراء الأول
انگاومهم ننطيهم مهله تلث ايام اذا مامشوو اندگهم ونحرگ بيوتهم حرگ
وانه ماارضا بمشيه الا من الطرفين من ابو دعاء ومن اهل الولد ويمكن هوه من غير عشيره هم نفس الاجراء ناخذه وياهم
هذا كله بسبب التسرع انه گايل الكم لاتسوون شي بدون علمي گايل لو ماگايل ياهوو يسمع ياهو. ينفذ
اخخ اخخ

طول الطريق انه واعي بس نزفت هواي وحته ايد فهد ودشداشته انترست وهوه يحاول يضغط ع الجرح
غركت بالعرگ ماحچيت اي شي وجنت مرتاح نوعا ما الاصابه بعيده عن اعضاء الجسم يعني مابيها خطوره بس من شفت فهد يهزني بقوه وعيونه جانن خايفات وهوه يصيح ويضرب بخدي

..صگر صگر وياي ظل وياي لاتغيب انتبهلي
چان يهز بقوه شفت عيونه بيهن خوف اول مره اشوفه
لحظات حسيت بالخوف الخوف من المجهول انه شمتانيني
شنهي الشفته وشنهي الراح اشوفه
اريد صوتي يطلع كتله

..فهد شاهين

..اششش لاتتعب اسكت مابيك شي جرحك خفيف ان شاءالله بس النزف اذاك

..ميخالف شاهين امانتك موتنطي الها

..ماانطي ماانطي بس اسكت
وصلنه المستشفى اخذوني دخلوني صالة عمليات وماحسيت على شي الا لمن صحيت على الم قوي وراسي احسه ثگيل
جنت اشوف السگف يقرب عليه شويه ويبعد عليه افتح عيوني بقوه واغمضهن اريد استوعب انه وين
شويه وسمعت صوت فهد وفيصل يمي
فيصل گله شيخ انتبه

..كمت من مكاني من دريت بي انتبه ..هلا صگر بويه الحمدلله على سلامتك

..الله يسلمك شاهين وين خو ماخذوه

..ياهوو يكدر ياخذه من بيتي ماياخذونه لاتخاف ارتاح شاهين بخير وامك جايه تشوفك شويه وتوصل
..ابتسمت من عرفت هوه زين وامي جايه ابتسمت وانه مرتاح
اصلا اهسه يلله استوعبت كلشي
غمضت والوجع ذبحني كتلهم اريد مسكن اريد انام
ثاني يوم طلعت من المستشفى الضربه بالعظم بس مو شي خطر
الي عرفته ماگايلين الكرم خاف يجي وهوه توه يريد يتعود ع الدوام كتلهم زين سويتوو
فهد مگاوم ابو دعاء وداز على معارف اله من العشيره ابغداد مگاومين اهل رجلها وهم قدمنه شكوه وفتحوو محظر
بعد الي صار مستحيل اخليها تشوف شاهين
اتذكرت حچاية رجلها همج هزيت بقهر وعلى وجهيي شبه ابتسامه تخفي احزاني
هوه ياهوو الهمج انه لو هوه الي جر اسلاحه بدون تفكير يامكثره عدنه بس احنه مانشيله الا للصعبات
ومانتصرف الا بتفكير لأن فهد كلشي حاچي ويانا
وشايف ناس هواي يمنه تتصرف بتسرع وترمي حته علمود حيوان
بس هذا مو صحيح نشوف شلون فهد يأدبهم
ومرن تلث ايام اول مااجو تخذ علگ احنه انسمي علگ يعني شدينالهم رايه مانتعرض الهم الغ تخلص عطوتهم يعني المهله الي حددناها

يوميه محمد يغيرلي الضماد ويعقم الجرح
دوامي اخذت اجازه وامتحاناتي امتحنهن بعدين
وبقيت على اتصال وي كرم بس وره ماصرت زين يلله حاچيته
شاهين اغلى من روحي صار اشوفه النفس اليصعد وينزل
امي مامفرقته عن لبوه ابد ولا فهد شيجيب يجيب الهم اثنينهم اشوف تربيته هنا احسن اله بهواي من امه وماافرط بي ابد
بيوم كلنه مجتمعين ونسولف بالمشيه لازم باچر تصير
گاعدين نضحك ونسولف وامي چانت تبدل اللبوه وشاهين
حاچاها فهد

..شيخه صعدي للغرفه اريد ارتاح تعبان

..ضحكت انه وماحچيت حچه علي ابنه

..بويه جا مترتاح روح اتمدد امي شكوو رايحه انه جوعان اريدها تسويلي اكل

فهد..شناقصك طول عرض وماتعرف تاكلك لگمه احتار بروحك مريتي اريدها يمي ولكم طلعتوها من ماعونها انه مالي وكت وياكم

شيخه ..ضحكت وانه اسمعهم گتله الوكت كله الك وعلاوي تلگه الأكل موجود احمي واكل

فهد..يلله حبيبه گدامي مااكوو امان ذوله يطلعولح مية سالفه

صگر..شمدريك شيخ تره يخبثون عليك بس انه عاقل واحبك حيل حته گلت الأمي عوفي لبوه وشاهين يمي
ضحكت امي وفتحت عينها على وسعهن خجلانه
ولك صگر هاي يمته انت هيج گلت وشماخذين منه همه انتم شبيكم
حته فهد من شافها هيج ارتبكت ضحك گلها ماتسوينها صدگ وتخلينهم يمه خل يحير بيهم بأيد وحده
اخذتهم امي وراحت وفهد ظل ساعه ناصب علينه ويقلد جي فشلنه امي شويه ولحگها
خابرني كرم

..الووو

..هلا صگر شلونك

..هلا بيك الحمدلله

..شخبار الدوام وياك

..والله بدت دراستنه وانه الحمدلله بس رايد ابوي وجهازه مغلق يمك هوه

..لا توه اخذ امك وصعد هههه

..لا عليك الله اريده بشغله مهمه الاقسام هيچ ماتفيدني تعرف طبعي انه هادئ وهمه يشوفوني عبالهم فقير وتعال لازم اسويلي طلابه طلابتين يلله اثبت روحي وانه جاي ادرس مو اتطالب اريد ابوي يأجرلي بيت قريب ع الجامعه انه موجموعة ولد نشترك

..سهله هاي باچر اگله

..لا ولك خاف يروح مساع شفناه اريده هسه حته اتفق باچر

..ردت احچي اگله مااكدر بس سكتت لأن هوه مايدري
صعدت وانه متردد شگد مااكبر يم امي وفهد وخاصتا اباب غرفتهم احس روحي طفل

دكيت الباب على كيف

فهد..ها سبع اليوم ذاكرنه

..ضحكت وجاوبته مو سبع شيخ انه صكر كرم رايدك بشغله

..هاا شيريد كرم جايك
طلعلي وسد الباب اخذ التليفون حاجاه

..ها يابه كروم شلونك

..الله يسلمك بخير مشتاقلكم والله

..وليدي الغالي احنه اكثر ..گول بويه شعندك احچي

..بويه انه اريد ادرس وماجاي اركز هنا لأن الأقسام مشتركه وكلشي علي عركه المغسله الحمام وانت تعرفني انه مااحب هيج هوسه
واريد اقره هم همه اقسامهم اسهل مني احنه قليل طبيه بينهم مخلصينها دگ ورگص ولعب ومااكدر اركز اريد بيت ايجار قريب ع الجامعه

..يجرالك حبييب غالي والطلب رخيص انطيني مهله يومين اجيك وانه اجرلكياه بس وليدي گلبي يظل يمك خو ماوحدك تكعد ولو كعد وياك كون نفس اخلاقك انه ردتك بقسم حته اكون مأمن عليك
من اجيك اشوف جماعتك الي وياك ويصير خير وسيارتك هم تجيك
واجبي هذا حبيبي دير بالك على روحك وخليك ادرس هاليومين حاول تركز لو ماعندي شغله مهمه اجيك والله باجر من غبشه
سديت التليفون وانطيته الصگر

..ولك انت شصعدك

..مو طلب مني وماكدرت اتعذره

..جا مخلي اعليوي ابو نفس يصعد حط عينه على صعدتنه خله كرم مناك يخابر

..ضحكت ونزلت واسمع ضحكته وصوته وهوه يكهكه وراي

فهد شگد ماهوه حازم بس اكو اوقات يصير النه صديق ويحاول يكسر الجوو بأي سالفه حته يضحكنه وهوه هم يضحك بس شي قليل
رجعت نزلت واتصلت على كرم

..ولك ليش ياظالم النفس مو گتلك توه اخذ امك دگيت لمن طلعته

..انه شعليه بهالسوالف المهم لحگت احاچي شلونك انت شعندك ماترجع لالدوامك راح تنفصل على اخر سنه

..راجع بعد يومين بس امتحن والفتره الجايه تطبيق
بلكي يذبوني بمدرسة بنات كون اعداديه

..لا والله وقبضنه خوش استاذ

..شعبالك كلش خوش مو خوش وحده

..حاميها حراميها اذا الاستاذ هيج يفكر الطالب شيگول

..الطالب ينچب ويسكت احسن اله شله بظوخة الراس

..ضحكت انت ماتصيرلك جاره ابد

..حاجيني انت ذول الي ضوجوك بعدهم وياك نفس الشي

..مايهموني اذا بعدهم او لا المهم انه اعرف روحي
بالبدايه انغثيت بس هسه لا شيحچون خل يحجون هواي جماعه عرفوني انه شنوو وكل همي اثبت نفسي

..الله يگويك ويوفقك

..امين

كرم..
سديت التليفون وانه بالي يم باچر
قتيبه وياي گال اطلع ونتقاسم الأيجار وانه متاكد ابوي مايخليهم يدفعون بس رايدلي بعد اثنين حته گعدتنه بالبيت ترهم

ثاني يوم گعدت من وكت رحت اسبح ماكو ازدحامات ع الحمامات بهالوقت
وگعدت اراجع وكل مصطلحاتنه انگلش ويراد مني اتفووق حته اثبت نفسي
صار وقت الدوام وداومت
مريت من يم نفس المجموعه عرفتهم همه عايدين من العام
واني چنت مستغرب شبسرعه صاروو گروب طلعوو من العام واحد يعرف الثاني مريت من يمهم وانه رايح للقاعه

صاحني حسن

..ابو الشباب شلونك

..الله يسلمك بخير

..تعال اگعد يمنه نريد نتعرف عليك

..جاي اراجع هسه غير مره تدلل
متقصد عفتهم وكملت طريقي وخلص هاليوم بدون شي بنهاية الدوام نريد نطلع وشفنه هوسه بالگراج
وملتمين تلث شباب على واحد
احنه عدنه الفزعه معروفه الي اعرفه والمااعرفه افزعله من اشوفه بهيچ موقف استغربت من شفت الشبباب كلها متجتفه وحته بحچايه ماادخلوو
وبيهم مشغولين بالتصوير صدگ ضجت ذبيت الملازم من ايدي والكتب ورحت صرت بنصهم طلعت طلعتهم وحاولت اهديهم ماطگيت احد بس ردت اطلعه من ايدهم الولد مااعرفه اصلا
انطيته بطل ماي غسل وجهه
وهمه هم ماادري ليش ماقاوموو يمكن اكتفوو بالضرب الخذاه ماصدوني من طلعته ولاحاولو يكملون
تشكرني وهوه تعبان گال انت شنو اسمك

..انه كرم

..واني براق من بغداد مبيين انت مو منايه

..انه من اهل الجنوب

..ع الراس اهل نخوه .مادامك وگفتلي بمحنتي اني وانت متعرفني اصلا اني وانت اخوه من اليوم

..اتشرف بيك ولو مااعرفك انه

..اني براق من عائله معروفه اسكن منطقة شعبيه بس راقيه نوعا ما اسكن منطقة الحريه وكذلك عدنه غيره وغيرتنه متسمحلنه نشوف الغلط ونغلس
ذولي الي تعاركت وياهم كان واحد قبل يومين حاول يعتدي على زميله وياي اعتده عليها بالكلام وجرحها هواي وسببلها احراج ابيناتنه احنه الشباب تعاركت ويته بوقتها واليوم هوه رجعها الي هوه ويا اثنين جبان چان مواجهني الوحده ليش هالغدر هذا

..حبيبي اتشرف بيك انه هيه هاي دنيتنا كلشي بيها الشريف والغدار والنشمي الشهم الي مثلك والدوني المثل هذا التحچي عنه مجبورين نتعرف عليهم كلهم وواجبنه نثبت نفسنه احنه وين وويامن ننعد

..ضربت على رجله وطببطتها بأيدي
تشوف ذولي الواگفين على جهه ماخذيلهم ركون
ذولي ع اساس اصدقائي ويعرفوني من بداية الدوام واني وهمه نفس الخط وبيناته زاد وملح
الحمدلله المواقف الصعبه مهما كانت صعبه تظهرلك معدن ناسك

..الحمدلله
من هذا اليوم وانه وبراق وقتيبه صرنه اصدقاء كلش
بعد يومين اجه ابوي وفهمني موضوع صگر واهل دعاء ونسيبهم فاصلين زعلت على صگر لأن ماگالي بعدين فهمني علمودي هيج اتصرف
واكيد انه هم مااكدر ازعل عليه
اجرلي ابوي بيت وگعدنه بي انه وقتيبه وحسن ولد من اهل البصره
وبراق يوميه يجي يدرس ويانه
ضحكت من خابرني صگر وهوه يگلي خليت خشمك ارتاحيت خلوني اطبق على مدرسة ولد نسبة الرسوب عدهم مو طبيعيه بحيث الطالب اطول مني
ضحكت وانه اتذكر حلمه يطبق بمدرسة بنات

..كتله غير الله يدري بنيتك

مرت الأيام والأشهر وصگر اتخرج ةانه رحت مرحله ثانيه بتفووق
صارت عطله ورجعنه للبيت
جنت مشتاق للولد كلش وره عشرين يوم اكثر كلت البراق انه جايكم هم اشوفك وهم ازور واتعودت على جوو بغداد اخذلي يومين وارجع
فرح هوه وگلي هالمره ابيتي تگعد مو عبالك تأجر فندق

يتبع ..

اسفه ع التاخير بس مجبوره والله