رواية قصص رومانسيه الفصل السادس والعشرون 26 - بقلم الحساب مغلق

أول شي اعرفكم عن نفسي وعائلتي اني ساره الصغيره لأهلي وعندي اخت أكبر سما واثنين إخوان أكبر مني سيف وسامر ووالدي ووالدتي هسه ابديلكم قصتي احنه عائلتنه من النوع الملتزمة ومقيده ووالدي كلش عصبي ومايقبل اي غلط اني جنت ادرس ثاني متوسط وجنت مهتمة بدراستي وماعندي شي غير الدراسه جان شغل البيت كله ع اختي سما طبعا سما جانت اول كليه هندسه وسما هم جانت تهتم بس بدراسته وشغل البيت نرجع إليه هسه جنت اروح للمدرسه وارجع فد يوم حسيت ولد يمشي وراي كلت يجوز صدفه ويمشي هيج ثاني يوم هم شفته اني خفت وبقه ع هالحال يمكن أسبوعين المهم ضل يراقبني لحد مافد يوم شمر رقمه عليه بصراحه اني أخذته ورجعت للبيت ضليت بس اصفن وميجي بالي غير صورت هذا الولد ياربي شجاني شنو انعجبت بي شسوي ياربي زين أني حته تلفون ماعندي لأن اهلي ميخلون عندي تلفون ميقبلون بس جان عندي تلفون امي مرات اخذه منه العب بي ضليت الليل كله افكر اتصل لو لا طبعا وراها صادف يوم جمعه وللصبح ضليت منايمه افكر اتصل لو لا

ضليت افكر كلت أخاف اتصل وسما تسمعني لأن اني وياها نفس الغرفه كلت لاماتصل خليت ونمت ثاني يوم اجيت ادرس ياربي مجاي يدخل شي بالي مجاي أحفظ ضليت بس افكر بهذا الولد يجوز لأن أول مره ولد ينطيني رقمه وإني بعدني بعمر المراهقة ضليت يومين اني بحيرة لحد مااجه يوم الأحد وداومت طلعت الصبح رتبت نفسي وخليت عطر سما كلتلي ها شو اليوم ريحه العطر تعط كتله يعني ميصير اخلي عطر كالت لا عيني يصير ليش ميصير المهم طلعت واني متأمله راح اشوفه مثل كل يوم طلعت ومشيت بس مشفته ووصلت للمدرسه وماشفته ضليت افكر طول الدرس الأول ياربي وينه شو مااجه اليوم خاف لأن ماتصلت بعد مااجه والمدرسه تشرح وبالي ابد مو يمه بالي يم الولد وأريد بس يخلص الدوام حته اطلع بلكت الكاه موجود خلص الدوام وطلعت من المدرسه مشيت هم مشفته ضليت امشي لحد ماسمعت واحد يكلي ليش ماتصلتي يمه اني كلبي كام يدك سريع سريع وأحس بطني صار بيه مغص من الخوف مكدرت حته التفت واباوع ضليت امشي جان يكلي انتظرج اليوم تتصلين وحته اذا ماتصلتي اليوم راح ابقه منتظرج لحد ممتصلين بيه يمه شصار بيه رجعت للبيت كالتلي ماما يله ساره بدلي وتعاي تغدي كتله مااشتهي كالت ها شعجب انتي مافد يوم ضربتي الغده كتله اي اليوم مااشتهي وصدك اني من الخوف الي صار بيه كلشي مااشتهيت اكل وضليت افكر ياربي شلون اتصل وأهلي هنا

الضهر امي كالتلي ساره راح انروح اني وسما للمول سما تريد تشتري ملابس تجين ويانه كتله لا ماما عندي دراسه مااريد اجي بيني وبين نفسي كيفت كلت بلكت اكدر اتصل صدك ماما راحت وقبل لاتروح اني ضميت تلفونه بسكوت حته لاتاخذه وياها همه طلعو اني صعدت للغرفه وسديت الباب جانو اخواني طالعين وبس بابا نايم وره مسديت الباب طلعته للرقم وضليت متردده بين اتصل وبين مااتصل آخر شي كلت خل اتصل لأن يجوز بعد ماالكه فرصه حته اخابر وصدك دكيت ع تلفون وطلع صوت واحد كال الو يمه اني شصار بيه كلبي كام يرجف مجاوبت وراسن سديته كلت عزه بعيني شسويت اني رجع هو اتصل مجاوبته ورجع اتصل مره ثانيه كلت خل اجاوبه أخاف يدك من آمي موجوده هسه يكله انتو دكيتو عليه المهم جاوبته كتله الو كلي عرفتج هو كلي عرفتج لو أني راد يغمى عليه كتله منين عرفتني كال من احساسي كتله انته شتريد مني وليش تلاحكني كلي والله راح احجيلج وأنتي بكيفج بعد كال اني اول مشفتج انعجبت بيج وضليت اراقبج وشفت كلشي ماعندج من البيت للمدرسه للمدرسه للبيت وخلال مااراقبج انعجبت بيج أكثر وهسه أريد أتعرف عليج حته اجي واخطبج كتله بس اني مااعرفك كال اتعرفي عليه من خلال اتصالاتنه كتله عود يصير خير ولاتتصل ع هذا الرقم لأن هذا رقم امي كال ميخالف انتظرج انتي تتصلين كتله عود يصير خير كلي بس ماسالتي عله اسمي كلي اسمي علاء كتله عاشت الاسامي وسديت التلفون وره مسديته كلت عزه اني شسويت والله ابويه لو يدري اله يذبحني ياربي شسويت اني مسحت رقمه من الهاتف ونزلت جوه وإني مو ع بعضي رجعت امي وسما ها ساره قريتي كتله ها كالت شبيج صافنه دااسالج قريتي كتله ها اي كالت خوش وإني وين بالي مو يم الدراسه ابد
رحت ثاني يوم للمدرسه بس مشفته وچانت من تشرح المدرسه بالي ابد مو يمه وين جنت قبل بالي كله يم الدرس وأشارك بي هسه كمت ابد ما انتبه خلص الدوام ورجعت للبيت صار الليل كلت خل احجي ويا ع فايبر خل اعرف شيريد صدك هم اخذت التلفون من امي بدون متدري وانتظرت سما تنام حته اتراسل ويا بديت محادثتنه كتله هلوو رأسن رد عليه كال اني دقيقة دقيقة منتظرج تردين كتله ها هيج اني مهمه بالنسبه إلك كال انتي ماتدرين شكد اني معجب بيج واتمنى بس احجي وياج وضلينه نسولف واتعرفنه واحد ع ثاني سولفلي عن حياته وعن دراسته هو جان سادس علمي وكلي اني ممصادق اي بنيه بس انتي عجبتيني كتله اممممم ليش شنو بيه سحر اني ضحك كال يمكن كتله يله اني اترخص عود باجر نكمل كلي تمام وهو راح وإني تمنيت يبقه يحجي وياي بس ثاني يوم عندي مدرسه وللاربعه الصبح اني كاعده اسولف ويه روحي ياربي الي سويته غلط لو صح زين اذا ابويه لكفني شيسوي بيه بقيت افكر لحد ماأخذتني النومه وماكدرت الصبح اداوم لأن الليل كله منايمه فمداومت كعدت تقريبا ب12 الضهر امي ها ساره شسالفه شو من عوايدج ماترحين للمدرسه شكد كعدتج الصبح حته اداومين مقبلتي ترحين كتله اي ماما صح اليوم ماعدنه شي بالمدرسه واحس روحي تعبانه ومرحت كالت ها خوش ارتاحي بنيتي ضليت اليوم كله افكر بعلاء ياربي شسوه بيه هذا اني مو ع بعضي والدراسة مجاي افتهمه اجه الليل دزيت رساله ع فايبر هو هم دزلي وضلينه نسولف تقريبا ساعتين شي يجر شي وراها كتله باچر عندي مدرسه راح اروح انام كلي تصبحين ع خير وإني هم كتله ومسحت محادثاتنه ونمت ضلينه ع هالحال تقريبا شهر وكمت اتعلق بي بالزايد ودراستي هملته امي كامت تحاسبني ع تلفون اتكلي اشوفج هواي تلعبين بي ومتقرين بعد متلزمي وخلتله رمز حته بعد ماالعب بي ياربي شلون شسوي هسه شلون احجي ويا ثاني يوم داومت هو ماكو مشفته ياربي شسوي شلون اوصله كمت جمعت فلوس واشتريت تلفون بدون علم اهلي

اشتريت تلفون طبعا اشتريته من رجعت من المدرسه رجعت ويه صديقتي أكو محل مال موبايلات بطريقنه فتت اله واشتريت الموبايل من رجعت للبيت سيف اخويه كلي اليوم شفتج بمحل الموبايلات شسوين يمه اني وكف كلبي كتله ها اي صح صديقتي رادت بطارية مال تلفون وتوسلت بيه اروح وياها حته تشتري كال ها هيج ممنوع بعد ترحين اكسر رجلج اذا شفتج مره ثانيه كتلة التوبه بعد ماروح وإني التلفون ظميته من اهلي نامو بليل خليته ع شحن وانتظرته لحد مخلص شحن شغلته طبعا اخذت رمز الراوتر ونزلته بالتلفون وراها نزلت برامج للجهاز ومن ضمنه الفايبر ونزلت رقم علاء وراسلته كتله هلوو هو هم راسلني وضلينه نسولف لحد الخمسه الصبح وراها نمت ساعتين امي كعدتني بالسبعه يله ساره عندج مدرسه كتله ايي ايي هسة أكوم وبالكوه كمت امي كالت ساره اشوفج هالايام خامله مو مثل قبل جنتي نشطه كتله ماما من الدراسه كالت ها هيج كتله اي قابل شعندي غير الدراسه وراها بدلت ورحت للمدرسه راحت ايام اجت ايام واحنه ضلينه نتواصل أني وعلاء وحبيته أكثر من روحي وهو جان يسميني مشمشتي وإني اسمي خوخايتي هههه القابنه مال مراهقين هههه المهم بالكوات نجحت من الثاني ورحت للثالث هنا راح يبدي ضياع مستقبلي المهم هو علاء جان عنده محل مال اجباسه ونساتل وهيج شغلات وجان بصفه أكو معهد مال دراسات أيدرسون بي دروس خصوصية فإني علمود هو جان محله بصفه كلت لازم أسجل بهذا المعهد علمود كل مااروح اشوفه لعلاء المهم كتله لأمي ماما الثالث صعب وإني مجاي افتهم الرياضيات والإنكليزي لازم أسجل معهد علمود ادرس عفيه قنعي لابويه وصديقاتي نصهن مسجلات بي كالت ماشي أكله واشوف شيكول كتله اي فدوه يمه راحت كلتله وقنعته لابويه بطريقته الخاصه اجت كلتلي وافق يمه فدوه لقلبج كمت وبسته كالت ها هيج مكيفه ع دراسه كتلة لعد شون هيه لو تدري ع شنو مكيفه اني المهم رحت وسجلت وجان كل درس ب300 الف دخلت للمعهد وجنت كل مااروح اكشخ وابدل واتعطر حته اشوفه لحبيبي

جنت اروح للمعهد من وكت قبل الدرس حته اروح للمحل واشوفه لعلاء ونضل انسولف وكل ماادخله يكلي اجت رويحتي فدوه لقلبه وراها اروح للدرس ومن يحجي المدرس بالي مو يمه وكلشي ماافتهم راحت ايام اجت ايام احنه ع هالحال وإني دراستي صرت بيه زفت المهم فد يوم بليل طلعت التلفون وكاعد اراسل علاء جان صدفه سما كعدت وشافتني يبووو كامت سما ولج هذا شنو كتله هذا تلفون صديقتي وخلته اليوم يمي كالت باجر جيبي كلتلي وأنتي شعندج مخليته يمج وشعندج ليهسه كاعده كتله اهووو كتلج مال صديقتي وباجر ارجعه كلتلي خوش يصير خير طبعا حسيته مااقتنعت بكذبتي بس شسوي ملكيت غير هل كذبه من هنا سما كامت تشك بيه وبدت تراقبني لحد مكشفتني كالتلي ولج متستحين ولج متخافين من ابويه واخواني ولج لو يدرون بيج مو يموتوج كتله يكتلوني الي مو الج كالت ولج اني بهذا عمري دخلت للكليه ممباوعه بعين ولد ولج انتي بعدج زعطوطه وهيج اسوين ولج عزه بعينج اني ماهتميت لحجيه ابد ومن هنا بدت اختي تحاربني وأخذت التلفون مني اني كمت اكرهه كامت تنصحني أكثر من مره ولج عوفي ولج مايفيدج هذا متفيدج غير دراستج كتله معليج انتي بيه هاي حياتي وإني أقرر كالتلي اشوفين بعدين اذا ماتندمتي اخذت التلفون وبعد منطتيالي من رحت للمعهد مريت ع علاء وكتله اختي آخذت التلفون مني وماكدرت اتصل عليك كلي فدوه الج هسه اجيبلج الي احسن منه وصدك ثاني يوم جابلي واحد جديد هم أخذته وضليت اتراسل ويا بالسر وكمت اتجنب سما أخاف تكشفني طبعا سما وره مكشفتني كالتلي اني مراح أكله لامي ع هاي سالفتج انطيج فرصه اما تمشين بالطريق الصحيح لو أكله لامي عليج وبعد تعرفين امي شسويلج كتله اي عود ميخالف كامت سما تابعني بكل خطوه اخطيه وإني كمت كلش أخاف منه أخاف تلكفني

سما ضلت تنطيني نصائح وإني اسمع حجيه منا اطلعه منا مااهتمله وهيه عباله تبت وعفته لعلاء علاء صار بالنسبه الي هو النفس الي اتنفسه وسما تريدني اعوفه بكل سهولة هاي والله مصدكه راح اعوفه بهاي نصايحه وإني أكله اي ميخالف المهم ضلينه اني وعلاء نتواصل ومن اروح للمعهد اروحله ودراستي زفت بزفت امتحاناتي كله راسبه بيه ضليت طول السنه ملتهيه ويه علاء لحد مااجه وقت دخول البكلوريا نطوني نتيجتي اني مداخله بكلوريا عزه العزاني هسه ابويه شيسوي بيه صخام الصخمني زين شلون وشكله وشلون شكله ع معهد الي دفعلي بي كوم فلوس ياربي شهل مصيبة رجعت للبيت واني عيوني محومره من البجي امي ها ساره شبيج مو ع بعضج ماما أحس روحي مريضه راح اروح انام واني ميته قهر اتصلت ع علاء علاء جان فرحان كلي تفاحتي اني دخلت بكلوريا لأن هو جان سادس علمي كتله الف مبروك كلي شبيج مو ع بعضج كتله علاء اني مدخلت بكلوريا وأهلي اذا يدرون ايلعبون بيه طوبه كلي يله ميخالف اتعوضيه ع السنه الجايه ومن هل حجي سديت التلفون ياربي شلون اكلهم لأهلي شلون راح اواجهم راحت ايام اجت ايام عطلنه الثالث علمود ندرس امي كالتلي شو مدرسين كتله يمه راح أكلج شي يمه اني مدخلت بكلوريا امي عزه العزاج صخام الصخمج ولج ليش ولج بيش قصرنه وياج ولج كلتي أريد اروح ادرس بالمعهد دخلناج وكوه دبرنالج فلوس المعهد ولچ ليش هيج وإني ابجي كتله يمه والله هو صعب الثالث ومن هل حجي كالت اني مالي دخل بيج يجي ابوج هو يحاسبج وره مدره ابويه بالموظوع لزمني كتلني كتله زينه لأن ابويه جان ميتفاهم بالدراسة ولج اني بيش قصرت وياج ولج ليش هيج وبسط بسط ذيج اللحظه كرهته لابويه وبالكوات يله فكوني منه وودوني للغرفه اجت سما كلتلي شكد نصحتج مفاد وياج تستاهلين الي صارلج كتله مالج دخل بيه طلعي بره وكرهت كل اهلي بذيج اللحظه راحت ايام اجت أيام رجعت اتواصل ويه علاء طبعا علاء دخل بكلوريا وطلع معدل زين دخل بي علوم حاسبات ودخل للكليه علاء وراها اني عدت سنه ثالث بس هالمره مخلوني بالمعهد بقيت بس بالتلفون اتواصل ويا ومرات يجي للمدرسه يشوفني واشوفه من بعيد علاء حته بعد دخوله للكليه متغير عليه وضل نفس حبه إليه المهم هاي السنه هم ماهتميت للدراسة مهتمه بس بعلاء وحبي لعلاء وبس افكر بي علاء جان مواعدني بالزواج كلي انتي الي انتي حلالي شسوين بالدراسة وإني هم ضليت ع حجيه مامهتمه لدراسته بس افكر بي.

السنه الثانيه الي بالثالث هم مااهتميت لدراستي وهملته طبعا خلال هاي السنه سما هم كشفتني أكثر من مره وهم حجت وياي مفاد لحد ماملت مني وعافتني طبعا اني من كد ماتحجي كرهته وكمت أكله انتي لأن ماعندج حبيب تغارين مني هيه ترد عليه ولج اني مو مثلج انزل راس اهلي اني اضحك كتله ههههه انتي تغارين مني طبعا سما صارت ثاني كليه هندسه وخلصت عمره ملتهيه بس بالدراسة وبالبيت ماله شغل بسوالف الحب المهم سما ملت مني وعافتني ومتكدر تكله لابويه عليه لان تعرف يموتني خلاص اذا دره بيه وراها خلصت اني السنه كله كسلانه نفس العام طبعا سما عرفت علاء واندلت عنوانه وعرفت كلشي عنه اجه موعد دخول البكلوريا وإني هم طلعت مداخلة كلت خوش راح انبسط يمكن هل مره ابويه يموتني خلاص اتصلت ع علاء وكتله علاء لازم تجي تخطبني حته اخلص كلي ها عود يصير خير المهم وره مدره ابويه انطاني بسطة معدله وهل مره محد خلصني منه كلولي تستاهلين الي صارلج وابويه معافني اله لمن فقدت الوعي فتحت عيني لكيت روحي بالغرفه من هاي اللحظه اهلي حبسوني ومخلوني بعد اطلع ومدرسة بطلوني منه كالو هاهيه اخذتي نصيبج من الدراسه بعد ماكو اني كيفت كلت هسه شسوي بالدراسة هسه علاء يزوجني ويعيشني بحب مثل التركيات شسوي بالدراسه علاء حبيبي شوكت تخطبني كال راح افاتح امي بهل موظوع كتله اوك تمام انتظر رد منك

علاء نجح صار ثاني كليه كل يوم أكله علاء يله شوكت تفاتح أمك بموضوعنه علاء تره سما كلشي تعرف عنك وتندل عنوانك تره والله تكل لإخواني عنك وتعرف اخواني ميرحمون أحد ضليت ازن برأسه واخوفه حته أخاف يتراجع عن الزواج كال راح افاتح امي راح كله يمه أريد ازوج كلتله اي يمه هاي الساعه المباركه ومن هل حجي وإني من الباجر اروح ادورلك عله احسن بنيه كله لا يمه بصراحه اني شفت بنيه وجنت مراقبه وطلعت خوش بنيه وإني أريدج ترحين تخطبيلياها كلتله اي ليش لا بس انطيني مواصفات البنيه وشمخلصه دراسة كله يوم اني شفته للبنيه وعجبتني وهيه ممخلصه ثالث كلتله وانته من كل عقلك اروح اخطبلك وحده ثالث ممخلصه ليش يمه شبيك انته اشو ثاني علوم حاسبات وألف بنيه تتمناك شناقصك حته تأخذ وحده ممخلصه دراسه طبعا أبو علاء متوفي وكل الحكم بيد أمه كلتله لا مااخطبلك كله يمه اني لو هاي لو ماازوح أمه عاندت ويا كلتله شكل للعالم ابني ماخذ وحده ماعده شهاده ليش يمه ليش متاخذ وحده من مستواك علاء كله يمه والله اعوف البيت واطلع اذا مزوجيني هاي وبالفعل طلع من البيت أمه انتظرته لليل مااجه علاء أدك عليه ميجاوب دزله رساله كله يمه اني حلفت مارجع البيت اذا مزوجيني هاي ضل أسبوع مااجه للبيت أمه اضطرت اتوافق ع ساره حته يرجع علاء دزتله رساله كلتله اني موافقه بس ارجع ورجع علاء للبيت گله يمه الجمعه ترحين تخطبيه أمه من وره خشمه أن شاءالله راح علاء واتصل بساره ساره حبي ها حياتي انطيني البشاره شنو كول امي وافقت تجي تخطبج صدك اني ماصدكت وطرت من الفرحه وشيجيبه الجمعه اجت الجمعه وإني بدلت وكشخت وتعطرت اجت أمه وضلت اسولف ويه امي وكلتله والله سمعنه عدكم بنيه وبصراحة اني أريد اخطب لابني اني سويت روحي ماادري هيه جايه عود رحت اقدمله عصير ومي جان اشوفني وعوجت خشمه لأن هيه جايه غصب جان تكله لامي تنطونه هاي البنيه امي كالتله اني مو بيدي لازم أسأل ابوه كلتله اي سالي ورجعيلي خبر وراحت وإني طرت من الفرحه امي فاتحت ابويه بالموظوع ابويه كال لا بعده صغيره امي كلتله يارجال هيه بالمدرسه وموزينه وبطلناها خل نزوجه احسن عادينه أمي قنعته لابويه بالزواج وراح وسأل ع الولد وأهله وطلعو خوش ناس ووافق ابويه ع زواج والحمد لله تمت خطبتنه شهرين وراها

ازوجنه اني وعلاء ماجذب عليكم اول شهر عشنا بحب وراها صار زواج روتيني يعني عادي مو مثل قبل اهتمامنه قل واحد بالثاني ومرت سنتين ع زواجنه وصار عندي طفلين وعلاء اتخرج وتعين طبعا مااحجيلكم عن أمه ابد ماحبتني وكل مره تكلي انتي مو من مستوى ثقافة ابني انتي ثالث ماعندج كل مره هيج تكلي حته كمت أحس علاء كام يستحي من يكلوله مرتك شمخلصه دراسه علاء وره متعين تغير عليه وكل مره يكلي اني لو ماخذ وحده عده شهاده مو احسن المهم علاء كلش تغير وراها عرفت هو مصادق وحده ويا بالدوام هم خريجه حاسبات راحت ايام اجت إيام علاء كلي أريد ازوج وحده عده شهاده انتي متفيدني اني كمت استحي اكلهم مرتي ممكمله ثالث كتله هسه اني هيج صرت كتله وإني وين اروح وين انطي وجهي والجهال شلون بيهم كلي انتي تبقين يم امي وإني اشتري بيت لمرتي الجديده وبس تحجين اطلكج ياربي اذا اطلك وين اروح لأهلي الي مافتخرو بيه شلون ارجعلهم ندمانه وابويه اذا رجعت ميخليني ارجع أطفالي وياي يرجعهم لابوهم ضليت بحسرتي وبقيت يم عمتي وعلاء ازوج وإني صارت حسره عليه الفلس واشوف مرت علاء تلعب بالفلوس لعب من راتبه الي جانت تحصله واشوف سما اختي هم عده راتب لأن هيه هم تخرجت وتعينت وشتريد تشتري من راتبه حته اشترت سياره وإني بقيت بحسرتي كاعده اشتغل مثل الخدامه لعمتي وعمتي بس تعير بيه هنا تندمت ع كل لحظة عفت بيه الدراسه وفكرت بالحب علاء كام ميحبني ومن يجي يمي من وره خشمه صارت حياتي عباره عن شغل البيت وتربيه الاطفال هنا اذكرت شكد نصحتني سما وماخذت بنصايحه هنا اذكرت شكد رادت هيه مصلحتي وإني بوكته كرهته لأن جانت تنصح هواي هنا عرفت بهذا الزمن محد يفيدني غير دراستي وحته كمت افكر باجر عكبه جهالي من يكبرون ايجوز ايخجلون مني لأن ماعندي شهاده أخ ياربي ضيعت مستقبلي ضيعت شبابي بسوالف الحب والخرابيط شورطني ليش مسمعت نصايح اهلي بعدين ارجع اكول لنفسي استاهل كل الي صارلي كله من ايدي اني الي ضيعت حياتي ومستقبلي وهنا عرفت كلشي ميدوم لا الحب ولا غيره الي يدوم شهادتج ووظيفتج ليش حسره عليه الفلس بينما سما ومرت علاء شيردون يرحون يشترون من مالهم الخاص واني علاء ينطيني عود كل شهر 25 الي وللجهال بس استاهل اني رسمت طريقي بيدي اني الي تخليت عن الدراسه علمود علاء ووينه هسه علاء كام يستحي مني وكل طباته وطلعاته ويه مرته الجديده اني صرت كخه وتندمت بكد شعر رأسي..بس بعد شيفيد من الندم ضاع مستقبلي بيدي اني ضيعته من حب المراهقة كل الي صارلي استاهل صرت مثل الخدامه وضيفتي أخدم وبس فوك الجهال أخدم عمتي هم بس هاهيه هو هذا نصيبي من الحياه اني رسمته بيدي بنات نصيحتي الكم والله محد يفيدكم غير دراستكم أهم شي للبنيه بهذا الزمن هو شهادته هيه سلاحه بهذا الزمن لاضيعوه مثل مااني ضيعته وتندمت واسمعو نصائح الأكبر منكم لأن عدهم خبره بالحياه أكثر
النهايه..