تحميل رواية قيد من الم بقلم تقي محمد pdf

قيدٌ من ألم

للكاتبه تقى محمد

الجزء الحادي عشر

💎💎💎💎💎💎💎

بقيت افكر كيف اكلم خالتو عاليه بي قراري دا مستحيل تسمح لي ارجع البلد لانو امي الله يرحمها كانت موصياها علي بس انا لو قعدت هنا أكتر م ح اقدر إتصرف لازم أكشف تغريد دي ويعرف رائد إنو غلط في حقي...

نمت صحيت الصباح قمت رتبت البيت مع خالتو عاليه قالت لي دقيقه بس طالعه هنا وجايه قلت ليها أخدي راحتك طلعت وانا قعدت متمحنه بقيت أفكر كيف وجن وحسن هسي جاتني فكره أمشي ليهم أكيد رائد بكون طلع الشغل لبست توبي ومشيت وصلت البيت سامعه صوت تغريد تكورك دقيت الباب بعد مسافه فتحت لي تغريد قالت لي اهلين يا حلوه نورتي بيتي مع إنو إنتي ضلمتيهو بس نحن دايما بنكسر تلج للضيوف😏 قلت ليها انا ما ضيفه على فكره مافي زول ضيف في بيتو فاهمه ضحكت مسافه وقالت لي يا حبيبتي إنتي وقعتي على راسك ولانمتي فقدتي الزاكره أمبارح رائد طلقك ولا ناسيه قلت ليها زحي لي عايزه اشوف اولادي قالت لي للأسف رائد موصيني عليهم وصيه قال لي ممنوع تشوفيهم نهائي وقفلت الباب في وشي سمعت صوت ضحكها بقيت إتحسبن

وقفت مسافه ورجعت البيت لقيت رهام في وشي قالت لي متين طلقوك قمت لي الصياعه واللفيف قلت ليها ما بخصك قالت لي على الاقل قضي يوم من العده برضو أخوي كان راجل ولا شنو حمرتا ليها مسافه ومشيت خليتا دخلت جوه لقيت خالتو عاليه لسه ما جات قعدتا كدا سمعت صوت تلفونا بتصل شلتو لقيتا مره مسجله بي خديجه في اللحظه ديك جاتني فكره إتصل لي عمتي تاني شلت الفكره من بالي بس لمن إتزكرت المعامله حقت رهام وتغريد لي كتبت رقمها وإتصلتا ليها بعد مسافه ردت قالت الو...عاليه كيفك...قلت ليها عمتو دي انا تقى قالت لي تقى الاخبار شنو لي زمن ما سمعت صوتك معقوله نسيتي إنو عندك عمه قلت ليها ما كدا يا عمتي بس كنت مشغوله قالت لي سمعت من عاليه إنك حامل كيف الحمل وإياك وكيف وجن وحسن أخبارهم شنو قلت ليها كويسين والله بس انا اجهضت قالت لي يا ساتر ليه في شنو أكيد قاعده تشتغلي شغل متعب صح قلت ليها لالا والله بس قدرو كدا قالت لي ربنا يعوضك يارب قلت ليها يا عمتو انا ممكن اجيك أقعد معاك كم يوم كدا قالت لي تنوريني والله تعالي طوالي إنتي بتستأذني لي بيت عمتك لو ما شالك البيت بشيلك في راسي قلت ليها نهاي ما قاعده تقصري معاي الله يديك العافيه يا عمتي❤️ قالت لي برسل ليك داؤد يجي يسوقك قلت ليها مافي داعي بجي براي قالت لي قفلي مستحيل أخليك تجي براك قلت ليها تمام قالت لي بكره يجيك؟ قلت ليها كويس قالت لي اها تاني الاخبار شنو ورائد كيف معاك قلت ليها كويس والله ما مقصر مني ...

إتكلمنا مسافه وقفلت منها ومسحت المكالمه عشان خالتو عاليه ما تشوفا بعد مسافه كدا قمت عملت الفطور وجهزتو خالتو عاليه جات قالت لي لا حولا الحريم ديل نضامات قدر ما اقول إنسحب منهم يفتحوا معاي موضوع قعدت اضحك قالت لي عملتي الفطور ولا شنو قلت ليها اي قالت لي يابتي إرتاحي إنتي محتاجه راحه قلت ليها انا مرتاحه كدا والله يا خالتي ختيت الفطور فطرنا رفعتا العده عايزه اغسلى خالتو عاليه حلفت علي كان اغسلها مشت غسلتا هي قلت ليها طيب خليني امصمص ليك او ارصها قالت لي ولا حاجه امشي قلت ليها طيب بقعد اونسك قالت لي طيب اقعدي قلت ليها بالمناسبه قبيل في مره إسمها خديجه إتصلت ليك قالت لي خليها دي ما عندها موضوع تكون دايره قروش الصندوق قلت ليها يا خالتو عاليه انا عايزه ارجع البلد دايره اقعد مع عمتي كم يوم وأجي قالت لي يابتي مالك هنا ما مرتاحه؟ قلت ليها ما كدا بس عايزه اغير جو شويه قالت لي سمح بشوف ليك زول يوديك قلت ليها داؤد راجل عمتي جايني قالت لي متين قلت ليها بكره ختت الصحن من يدها وجاتني قالت لي متين إتفقتوا على الكلام دا قلت ليها طول كان قال جايني ح يسوقني وقبيل إتصل لي قال إنو جاييني بكره قالت لي يا تقى انا ما بحرمك من عمتك لكن يا بتي يشهد الله انا ما دايراها تسوقك مني إنتي وصية أختي انا عارفه بعد رائد طلقك بقى ما عندي سلطه عليك ولا حتى سبب يخليني امسكك معاي بس والله انا حبيتك زي بتي وأكتر عليك الله ما تمشي مني قلت ليها يا خالتو عاليه حتى انا بعتبرك أمي بس ما بقدر أكسر بي خاطر عمتو وح اجيك تاني بوعدك قالت لي سمح أمشي لي عمتك في النهايه هي عمتك الربتك بس ربنا يحفظك وين ما تقبلي يا بتي ويشهد ربي ح إشتاق ليك قمت ضميتا وقلت ليها يا خالتي حتى انا ح إشتاق ليك بس ما بي يدي قالت لي أعفي لي يابتي العملو ليك رائد اعفي لي دا كلو بي سببي انا لو عارفه بجي يوم يعاملك كدا مستحيل كان أعرسك ليهو والله إنتي ما بتستاهليهو يا بتي قلت ليها ما تقولي كدا يا خالتي إنتي ما عندك زنب نهائي والله بجازي الكان السبب....

الفصل

قيدٌ من ألم

للكاتبه تقى محمد

الجزء الثاني عشر

💎💎💎💎💎💎💎

صحيت بي صوت خالتو عاليه تصحي فيني قالت لي قومي يا تقى داؤد واقف ليك بره صحيت مشيت إستحميت سريع ولبست ملابسي واصلا كنت مجهزه شنطتي من أمبارح طلعت الصاله لقيت خالتو عاليه فضلتو قالت ليهو إلا تشرب معانا الشاي قال ليها شربتو قدام والله قالت ليهو مالو دبلو معانا كبت لينا الشاي بي بسكويت شربنا وبعدها طلعنا خالتو عاليه ضمتني مسافه عليها وقالت لي ربنا يكتب ليك الخير حيث كان يا بتي ويديك الفي مرادك خلي بالك من نفسك ،،سلمت عليها في راسا وقلت ليها حاضر ربنا يديك الصحه والعافيه يا أمي والله فرحت فرح لمن قلت ليها كدا تاني ضمتني عليها ،،ودعتها ومشيت ركبتا ما داؤد طبعا هو عندو بكسي مسافة الطريق فتحنا كم موضوع انا وهو وكان بسألني عن أحوالي وكدا وانا كنت برد بس على حسب السؤال لحدي ما وصلنا لقيت عمتي واقفه لينا جمب الباب قالت لي البلد نورت قلت ليها بي نور اهلها سلمت علي وفضلتني جوه يا الله من هوا البلد حسيت نفسي إرتاحت من جيت دخلت مع عمتي جوه كانت مفرشه في الحوش قعدنا وداؤد مشى الصالون قلت ليها وين ناس تسنيم وتسابيح طبعا ديل بناتا قالت لي مشو الحواشه رسلتهم يجيبوا لي حاجات هسي بجو قلت ليها كويس إشتقت ليهم والله قالت لي أحكي لي في حاجه حاصله معاك قلت ليها مافي اي حاجه ياهو حياتي ياها زي ما هي قالت لي يا تقى ما تكزبي علي انا واثقه إنو في حاجه قلت ليها حاجه زي شنو يا عمتي طبعا صدمتني بالسؤال قالت لي صوتك وملامحك حتى طريقه كلامك بتدل على إنو في حاجه إنتي ناسيه إني ربيتك احكي لي رائد مزعلك في حاجه قلت ليها لالا مافي كلام زي دا بس زعلانه عشان الاجهاض وكدا قالت لي ربنا يعوضك يا بتي قلت ليها ناس تسنيم إتأخروا قالت لي هسي بكونن قربن يجن وبالمناسبه ما كلمتك قلت ليها شنو قالت لي فتحوا مدرسه خاصه هنا ما شاء الله البنات كلهن إتعلمن طبعا مختصرين ليهم السنين عشان العمر وكدا هسي تتزكري سلمى صحبتك ديك قلت ليها اي متزكراها قالت لي قرت ما شاء الله إمتحنت تامن ومشت الثانوي قلت ليها ما شاء الله والله قالت لي إنتي زاتك يا تقى ما تقري هنا قلت ليها والله الفكره حلوه قالت لي يابت العلم دا حلو شديد وبقى سلاح البت شهاداتا هسي انا لو ما كبرتا كان مشيت قريت في كلامنا دا تسنيم وتسابيح جو داخلين من شافوني جن جارات علي قالن لي تقى! سلمنا على بعض بالاحضان كنت مشتاقه ليهم شوق...

بقينا نتونس ما خلينا موضوع ما فتحناهو طبعا لمن وصلت كان مواعيد الضهر كدا إنتظرنا العصر ومشينا الحواشات ياخ الجو والهواء عجبني شديد قعدنا هناك مسافه وجينا طالعين لمن وصلنا البيت المغرب أزن عمتي عملت لينا شاي بي لبن حليب يا سلام إتزكرت زمان شربت وتسنيم وتسابيح مشوا صلوا وجوا المهم مره اليوم على خير صحيت الصباح بي صوت تسابيح وتسنيم لقيتهم يلبسن ما شات المدرسه قلت ليهم إنتوا إتسجلتوا قالن لي اي تسنيم قالت لي ارح معانا ،،قربت اوافق بس إتزكرت إنو انا مفترض اكون في العده حاليا وما صح اطلع قلت ليهم امشوا بمشي معاكم في وقت تاني عمتي قالت ليهم اكيد تقى تعبانه من المشوار إنتوا أمشوا هسي عشان ما تتأخروا

مشن بعد ودعننا عمتي قالت لي يا تقى إنتي في حاجه داساها مني ؟ قلت ليها يا عمتي مافي حاجه أمبارح سألتيني السؤال دا قالت لي تقى بسألك بالواضح بالجد رائد طلقك....

الفصل

قيدٌ من ألم

للكاتبه تقى محمد

الجزء الثالث عشر

💎💎💎💎💎💎💎

إتصدمت قلت ليها عمتي ماف كلام زي دا قالت لي ما تكزبي علي انا وصلتني الاخبار من أمبارح كنت شاكه إنو في حاجه وإتصلت على عاليه ولمن واجهتها قالت لي إنو رائد طلقك قلت ليها اي يا عمتي كلام خالتو عاليه صح قالت لي طيب ليه ما كلمتيني قلت ليها يا عمتي خفت إنك تزعلى وتحصل مشاكل واساسا الموضوع ما مستاهل قالت لي يا بتي كوني عارفه إنو انا دايما في صفك ومستحيل أخزلك في يوم بس لمن تحصل حاجات زي دي لازم تكلميني يا تقى دي حاجات ما بتندسه فاهمه قلت ليها فاهمه قالت لي سبب الطلاق شنو حكيت ليها الموضوع كلو من طق طق لي السلام عليكم قالت لي معقوله أقسم بالله دي افكار شيطانيه عديل البت دي ما هينه يا بتي ما بعيد تكون بتتاجر بي المخدرات دي قلت ليها ما عارفه بس انا الشي المزعلني إنو رائد صدقا قالت لي والله يا بتي الحق حق وبيظهر لو بعد مية سنه مافي شي بيندسه إنتي بس اصبري...

💎💎💎💎💎💎💎

وفعلا صبرتا خلصتا العده ونزلت مدرسه مع تسنيم وتسابيح هدفي كان بس إتعلم كيف أكتب وأقرأ عشان مافي زول يقول لي جاهله تاني وسبحان الله إتعرفت لي على استازه صحبت عمتي شرحت لي المواد كلها ومن البدايه كمان الرياضيات بدت لي من جداول الضرب كانت بتجيني في البيت فترة العده والحمد لله ربنا وفقني وأمتحنت إمتحان قدرات طوالي نزلوني سابع بقيت أمشي المدرسه وبرضو ما نسيت اولادي عمتي مشت معاي المحكمه وبقيت اقاضي في رائد من حقي اشوف اولادي وما بيقدر يمنعني منهم الظروف علمتني القوه إتكلمت اي حاجه للمحكمه وقدام القاضى حتى صحبة تغريد رفعت فيها قضيه...

في يوم كان عندي كتابه كتيره ما كتبتها شلت كراس وحده معانا وبديت أكتب تسنيم وتسابيح قالن لي الوقت إتأخر ارح البيت أكتبي بكره قلت ليهم انتوا اسبقوني انا قربت إنتهي هم مشوا وانا قعدت أكتب لمن إنتهيت طلعت ماشه كدا حسيت بي زول ماشي وراي اسرعت حسيت بالزول بسرع بقيت احصن في نفسي براحه وماشه لحدي ما شعرت بي زول مسك يدي إتهجمت وقبل ما أستوعب اي حاجه الزول خته لي منديل مخدر في وشي..وبعدها ما وعيت لي اي حاجه....

الفصل

قيدٌ من ألم

للكاتبه تقى محمد

الجزء الرابع عشر

💎💎💎💎💎💎💎

سهى: الو يا تغريد تعالي هسي منتظراك في مطعم***

تغريد:عايني يا سهى انا مصايبك دي ما تدخليني فيها ياخ هسي بي سببك إحتمال ادخل السجن والزفته الاسمها تقى دي ما كنت متخيلاها بالشجاعه دي اخر توقعاتي إنها تمشي تبلغ عننا ياخ طول حياتا تتكلم عن الستره ومابعرف شنو هسي كلاما دا مشى وين

سهى :اسمعيني من الاخر كدا البت دي بعدين ح تجي المحكمه وتسحب الشكوه كلها اصبري

تغريد:كيف ؟! معقوله تعمل كدا ولا إنتي عملتي ليها حاجه

سهى: ياخي يا تغريد ما بقدر إتكلم في التلفون إنتي عارفه اي غلطه ممكن توقعني تعالي المطعم منتظراك

تغريد: لالا ما عايزه اعرف يازوله خايفه توقعيني في مشكله جديده كمان انا اديتك قروش واي حاجه بعد دا حلي عني يا زوله

سهى:شوفي يا تغريد مافي حاجه إسمها حلي عني وبراك وقعتي نفسك في المكانه دي لو ما جيتي ح اعرف اجيبك فاهمه

تغريد: والله يا (توت توت) الوو الووو يالله انا الوقعني في المشاكل دي شنو ياخ

رجعت بي زاكرتا لي اليوم الاتعرفت فيهو على سهى...

كنت قاعده ومعاي وحده صحبتي في بيت ابوي قالت لي يا تغريد سمعت طلقوك الحاصل شنو يا صحبتي

قلت ليها والله دا كلو من امو دي ياخ مكرهاني في اي حاجه تخيلي فتنتنا عشان تعرسو لي بت اختها قالت لي وي يا الغبيه ما إنتي مسكينه وما عندك كيد ياخ هسي انا ام راجلي دي مسكتاها عديل كدا وكان مره بس الله يقدرا تفتح خشمها قلت ليها كيف عملتي ليها شنو قالت لي هئ عندي صحبتي كلمتها بيها يا بت ضحويه بس إتصرفت لي يابت المره بقت مسكينه خشمها عندها قلت ليها طيب ما توديني لي صحبتك دي انا والله هسي بنات الحله كلهم شغالات فيني مغارز ياخ أمي قالت لي كان كنتي نافعه ما كان رجعوك لي هسي انا مالي بالله اخلاق وجمال وتعليم بت خالتو دي تكون احسن مني في شنو قالت لي ولا حاجه بس بكون شيخها قوي لكن والله يا تغريد يا صحبتي كان مشيتي معاي لي صحبتي دي بتجيهك تب تبقيك سيده وتخلي راجلك دا زي الخاتم في يدك اصبري بس قلت ليها خلاص نمشي ليها

💎💎💎💎💎💎💎

وللأسف من يوم عرفت سهى ودربها عرفت الحقد والحسد ودروب سيئه شديد وكنت متخيله إذا إتقربت منها اموري كلها بتظبط بس لمن قربت منها أكتشفت اسوأ عالم عالم المخدرات💔

لبست لي عبايه وطلعت لاقاني عبد الرحمن في وشي قال لي ماشه وين يا امي قلت ليهو يا عبد الرحمن كم مره قلت ليك امشي وين اجي من وين دي حاجه ما تخصك زح لي من وشي دا

مشيت سريع ركبت لي ركشه قبل رائد ما يجي وصلت المطعم دخلت لقيت قاعده قلت ليها اها مالك في شنو قالت لي براحه براحه شنو هو قلت ليها ياخ يا سهى خارجيني من موضوع تقى دا بس تاني انا ما دايره إشتغل معاك قعدت تضحك قالت لي إنتي هبله تقى اصلا موضوعا منتهي و ح اشغلا معاي بس بعد ما إشتغل فيها اول قلت ليها قصدك شنو ؟ قالت لي ح اديها حاجه تظبط ليها راسا بس😏 عشان تعرفي انو اي زول بجي في طريقي ما بشوف حاجه بتعجبو والكلام دا ليك برضو....

الفصل

قيدٌ من ألم

للكاتبه تقى محمد

الجزء الخامس عشر

💎💎💎💎💎💎💎

قلت ليها قصدك شنو يا سهى ليكن في معلوماتك انا دخلت نفسي في الموضوع دا وبقدر انهيهو قالت لي ما إنتي قايلاها بالساهل إنتي غبيه ولا غبيه هو المخدرات دي بتدخل بالساهل لمن يخلوك إنتي وحده عارفه سرهم ومدخلهم ومخرجهم تعيشي ساي كدا قلت ليها كيف يعني؟ قالت لي يابت انا وراي كيان كبير ما بتقدري عليهو ولا تحاولي اصلا لانو ح تخسري روحك ،،شوفي وراك إتلفت لقيت المطعم كلو رجال لابسين لبس اسود ومقنعين يا دوب خفت سمح ديل جو من وين إتلفت عليها لقيت واحد واقف وراها وشايل مسدس

💎💎💎💎💎💎💎

فتحت عيوني كنت بعاين طشاش طشاش لقيت نفسي في مكان زي المستودع كدا وريحتو تخلي الزول يغمى عليهو من شدة ما قويه وكريهه حاولت إتزكر اخر حاجه إتزكرتها إني كنت راجعه من المدرسه وفي زول مسك يدي وتاني ما وعيت بي حاجه حاولت اقوم جسمي كان مكسر ولساني تقيل ما قدرت اكورك زي الاتعرضت لي شلل كامل كل ما احاول إتكلم ما بقدر بعد مسافه الباب فتح جاء راجل شكلو مخيف شديد ووشو كلو جروح طلع حبوب من جيبو وطلع من الظرف حبوب كتار و جاء علي خفت شديد وما عرفتا إتصرف كيف ..

💎💎💎💎💎💎💎

سهى قالت لي اها تجي بالتي هي احسن ولا إتصرف قلت ليها بجي والله بجي بس خليهم يمشوا قالت لي كل ما تحاولي تعملي حاجه غلط إتزكري الموقف دا فاهمه قلت ليها فاهمه فاهمه والله هسي المطلوب مني شنو هسي بنفذ قعدت تضحك قالت لي هسي ما مطلوب منك حاجه اول شي خلينا نتخلص من ضرتك دي وبعدها نبدأ الشغل تقدري تمشي بس إتزكري إنك مراقبه...

طلعت من المطعم ورجولي ما شايلاني بقيت افكر انا ح اعمل شنو لو مشيت بلغت اكيد قبل ما ابلغ ح يكتلوني ولو بقيت معاهم اكيد برضو ح اضيع ياخ يلعن سهى ويلعن نور العرفتني عليها💔 رجعتا البيت وانا برجف لاقاني رائد في وشي قال لي إنتي مشيتي وين حاولت أخترع لي كزبه قلت ليهو مشيت الدكتور حاسه نفسي عيانه مشيت افحص قال لي غريبه الصباح كنتي كويسه مالك فجأه قلت ليهو حسيت بي فتور وحمه بعدين شنو يا رائد تحقيق هو قال لي بطمن عليك اصلا المعامله السمحه معاك ما بتنفع ومشي خلاني دخلت غرفتي بقيت افكر ح اعمل شنو رائد جاني داخل قال لي تغريد اعملي لي شاي انا مصدع مشيت ختيت الشاي في النار جاتني البت الما بتتسمه دي قالت لي يا حالتو امي وين عاينت ليها كدا قلت ليها امك ببح مشت تاني ما جايه ويلا امشي من وشي عاينت لي مسافه كانها بتحاول تستوعب كلامي خليتا ومشيت افتش في الشاي الحب لقيتو لمن جيت اكب منو لفتت إنتباهي لقيتا قاعده في باب المطبخ تعاين لي وتبكي بهدوء وكانها بتقول لي إنتي السبب مشيت عليها وقلت ليها ياخ انا ناقصه تعزيب ضمير مسكتها ضميتا وقلت ليها ماما ح ترجع قالت لي متين قلت ليها ما عارفه لكن ح ترجع قالت لي انا إشتقت ليها شديد قلت ليها ما خلاص قلنا ح تجي يلا امشي العبي بره طلعت وانا مشيت كبيت الشاي الحب إنتظرتو يفور وكبيتو في كبايه وديتو لي رائد

الفصل

قيدٌ من ألم

للكاتبه تقى محمد

الجزء السادس عشر

💎💎💎💎💎💎💎

يا حضرة القاضي انا عايز اسأل الاستاذه تقى سؤال واحد بس لو سمحت

=اتفضل

إنتي قلتي إنو سهى ادتك حبوب خلينا نقول مخدرات إنتي عندك دليل واضح يثبت صحة كلامك دا

تقى: لأ ما عندي دليل

يبقى كيف نضمن إنك قاعده تقولي الحقيقه

تقى(ببرود) انا قلتها وخلاص سهى يمكن بريئه بس انا م ح اخليها

يا حضرة القاضي المدعيه أعترفت إنو سهى بريئه وهي رفعت الدعوه دي ضدها عشان مشكله قديمه بينهم المد...

_دقيقه!! إتلفتوا كلهم كانت دي تغريد

_يا حضرة القاضي انا عندي كلام عايزه اقولوا

تغريد الراويه...

وقفت وكنت متأكده نهايتي الليله بس لازم انهي الموضوع دا لازم قلت ليهو يا حضرة القاضي سهى دي اكبر تاجرة مخدرات وانا بعرفها من زمان وعندي ادله كافيه تثبت الموضوع دا...

كان في صوت رصاص عنيف أحتل القاعه الشرطه إتحركوا سريع ومسكوهم بس في منهم احتموا بي ناس ابرياء والشرطه ما قدرت تعمل حاجه نزلو اسلحتهم وفتحو ممر حسب كلام الجماعه الارهابيه سهى طلعت وبعدها الجماعه طلعوا بس لسوء حظهم الشرطه حاوطوا المكان وقدروا يمسكوا سهى وجماعتها...

وساقوهم في نفس الوقت تقى وقعت مغمى عليها طبعا الكلام دا وسط صدمة الناس كلها عاليه جرت على تقى ورفعوها ودوها المستشفى دخلوها غرفة العنايه رائد قال لي دا شنو دا انا ما فاهم حاجه دا شنو الحصل قبل شويه دا قلت ليهو يا رائد مافي وقت للاسئله لازم نرجع البيت الاولاد ح يكونوا في خطر قال لي انا ما فاهم حاجه قلت ليهو ارح بس جرينا سريع البيت الحمد لله ما كان في زول سقناهم وجينا المستشفى جاء شرطي وبقى يستجوب فيني حكيت ليهو الكلام كلو كيف إتعرفت على سهى وقبل كدا كان ساقتني مقرهم وريتو العنوان واي حاجه هو سجل اي شي في دفترو وطلع بقينا منتظرين الدكتور يطلع بعد مسافه طلعت الممرضه رائد مشى سالها قالت ليهو والله المريض في جسمها كميه كبيره شديد من المخدرات قاعدين نعمل قصار جهدنا لو إتجاوزت الاربعه وعشرين ساعه دي بخير تاني إن شاء الله بتكون كويسه قال ليها نسبه إنها تكون كويسه كم من ميه قالت ليهو والله ما أكزب عليك ٢٠ بالميه بس ومشت مع إني بكره تقى دي ولسه بكرها بس ما كنت دايره اكون سبب في الحاله دي كل الكنت عايزاهو ابعدا من طريقي عاينت لي اولادا والله حسيت بي تأنيب ضمير طلعت بره بقيت ادعي إنها تبقى كويسه ما عارفه زاتو بعد العملتو دا ربنا ح يغفر لي إتزكرت حاجه طلعت مشيت البيت حفرت جمب الباب طلعت الصندوق دا العمل العملتو لي رائد بقيت ابكي ياريت لو ما عملت كدا ياريت شلتو ودخلتو في كيس اجرت ركشه ومشيت لي شيخ دقيت الباب مسافه فتح لي ولد قلت ليهو شيخ عبد الله في قال لي اي دخلت سلمت عليهم وقعدتا بعد مسافه جاني قعد قال لي السلام عليكم قلت ليهو وعليكم السلام يا شيخ عبد الله انا لقيت العمل دا جمب بيتنا وطبعا انا ما بعرف في الحاجات دي دايراك تفكو لي قال لي لاحولا ولاقوة إلا بالله الناس ما بترحم يا بتي مشى جاب مويه وختا العمل وبقى يفك فيهو ويقرأ قران بعد مسافه قال لي إنتهيت قلت ليهو طيب انا لازم امشي حسابك كم يا شيخنا قال لي يا بتي انا بعمل الحاجات لي وجه الله وعيب عليك تقولي لي كدا قلت ليهو كتر خيرك والله قال لي دقيقه مشى جاب لي ورقه قال لي الورقه دي مكتوب فيها ايات تحصين كل يوم اقروها في مويه واشربوها السحر دا سحر تعطيل وسحر مشاكل يا بتي قلت ليهو تعطيل كيف يعني قال لي تعطيل إنجاب وسحر مشاكل بين الازواج وطاعه وكلام كتير إنصدمت تعطيل إنجاب دا لي؟! حسبي الله ونعم الوكيل شلت منو الورقه وطلعتا بقيت إتحسبن وانا ماشه لمن وصلتا المستشفى رائد بقى يكورك فيني قال لي إنتي مشيتي وين؟ والطلاسم القبيل حصلت دي تقولي لي الحاصل شنو هسي وسريع

الفصل

ما عرفت اقول شنو كزبت قلت ليهو انو كلام تقى صح وانا إكتشفت الاعيب سهى دي متأخره المهم صدقني ،، الاربعه وعشرين ساعه دي مرت علينا زي السنوات لمن الدكتور طلع كلنا مشينا عليهو خالتو عاليه بقت شغاله ليهو يا دكتور بت اختي كيف ،،إتكلم يا دكتور رائد قال ليها اصبري يا أمي اظي فرصه يتكلم قال لينا المريضه دخلت في حالة غيبوبه حالتا شويه بقت مستقره ننتظر الاحسن بس لمن قال كدا كلنا إطمنا شويه وبقينا ندعي إنها تصحى

رائد رجعنا البيت ورجع المستشفى خالتو عاليه قالت لي شفتي بت أختي كان حصل ليها حاجه في رقبتك فاهمه في رقبتك لي يوم الدين انا عارفه إنو إنتي السبب ياخ حرام عليك البت يتيمه ياخ

ومشت خلتني رهام قالت لي ما تشيلي في خاطرك منها اصلا هي زعلانه على بت اختها وبتفلت كلام ساي قلت ليها لالا ماشلت في خاطري مشيت بيتي رقدتا تلفوني إتصل رديت سمعت صوتا الما بتتسمه قالت لي ما تظني نفسك خلصتي مني انا وريتك ما تلعبي معاي اصبري بس وشوفي ح اعمل فيك شنو قلت ليها إنتي تقولي حاجه وربنا يقول حاجه والكاتبها ربنا في الحجر بتقوم انا ما خايفه منك ولا من اتباعك وقفلت فيها الخط...

💎💎💎💎💎💎💎

مرت خمسه سنه كامله وتقى لسه زي ما هي وجن كبرت وبقى عمرها ١٠ سنه وحسن كبر وبقى عمرو ٧ سنه وعبد الرحمن دخل الجامعه وانا كل يوم شايله تأنيب الضمير في قلبي راعيت اولاد تقى زي كأنهم اولادي ورجتا لي ربنا دخلت ندوات تحفيظ قران ولسه شايفه إنو فيني زنوب طبعا سهى إتحكم عليها بالسجن مدى الحياة والمنظمه إتقبض كل افرادا مشيت المستشفى قعدت جمب تقى قلت ليها والله يا تقى لسه مشاعري تجاهك ما إتغيرت بس احسن تصحي وتبقي قدامي ونتشاكل العمر كلو ولا ترقدي كدا وتبقي لي قيد من الالم اصحي ياخ خلاص دي خمسه سنه كفايه ما دايره تشوفي اولادك يا تقى ما دايره تشوفي وجن بقت هسي رابع داخله على خامس وحسن في تانيه ماشي تالت حسن الصغيروني داك كبر ياتقى قومي شوفي اولادك بس عليك الله لمن تصحي ما تكلمي رائد بالعملتو ليك خليهو سر والله ما بكرر الغلط دا تاني يا تقى انا هسي بكفر عن زنبي ما بقدر اعوضك اللحظات الما حضرتيها مع اولادك بس أعتنيت بيهم زي اولادي وما حوجتهم لي حاجه يا تقى عارفه،، حسن بقي يقول لي أمي بس انا شاكلتو ووريتو صورتك لحدي ما بقي ينطق امي ليك هسي إنتي قومي يا تقى...مسحت دموعي وبقيت قاعده جمبها سمعت زول قال لي انا عافيه ليك عاينت كدا لقيتا تقي اي والله فتحت كانت الهالات ماليه عيونا وصوتا ضعيف قلت ليها متين صحيتي قالت لي من جيتي داخله سمعت كلامك كلو قلت ليها ط طيب انادي الدكتور قالت لي مافي داعي الدكتور قبل شويه كان معاي صحيت وشفت الممرضين واقفين فوقي كلهم مشو خلوني صح قلت ليها لالا والله كلهم منتظرنك تصحي بي فارق الصبر قالت لي يا ريتني مته يا تغريد قلت ليها عليك الله يا تقى ما تقولي كدا والله ما شايفه تأنيب الضمير العايشه فيهو انا قالت لي يا تغريد مافي زول بحبني انا ازيت اولادي بي جهلي كلهم شايفين إني جاهله وما بفهم قلت ليها ما تقولي كدا إنتي عارفه الايام اثبتت لي إنو الجاهل ما إلا يكون ما قاري هسي شوفيني انا قاريه ومتعلمه لكن اقسم بالله كنت جاهله يا تقى انا عملت حاجات كتيره كعبه في حياتي ما عارفه سبب لي إني عملت كدا شنو بس الشيطان كان لاعب بي عقلي عليك الله يا تقى اعفي لي اعفي لي اي حاجه عملتها ليك انا مستعده اعمل اي حاجه عشان اكفر عن زنبي قالت لي والله عافيه ليك مع إنو عملتي حاجات ما بتتغفر بس عافيه ليك وإنتي كمان اعفي لي قلت ليها على شنو بس إنتي ما عملتي حاجه قالت لي كنت قاعده اقطع فيك طوالي وكنت مسمياك بيني وبين نفسي المشعوزه وقعدت تضحك.. قلت ليها دقيقه إتصل بي ديل اكلمهم إنك صحيتي ح يفرحو فرح إتصلت كلمتهم وفي اقل من نص ساعه جو كلهم خالتو عاليه زغردت إلا رائد سكتا قال ليها نحن في مستشفى شفت الفرحه في عيونهم كلهم حتى وجن وحسن حتى عبد الرحمن ولدي

💎💎💎💎💎💎💎

بعد مرور سنه

يابت إنتي غسلي العده دي سريع جايننا ضيوف

_ياخ دقيقه يا ماما تغريد قاعده إتكلم مع عبودي

عبودي منو كمان يا بت ؟

_ماما تغريد دا عبودي ولدك

قلت ليها سمح اسرعي لي ولا انادي ليك امك تجي تتصرف معاك قالت لي لالا الا أمي قلت ليها ناس ما بتجي الا بالعين الحمراء ،،كبيت القهوه في الكبابي وشلتها مشيت الجنينه لقيت تقى براها تحاول تتمرن على الوقوف قلت ليها ديل مشو وين قالت لي رائد طلع وخالتو عاليه مشت بيتا قالت بتجي بعدين لمن الضيوف يجو قلت ليها المشكله كبيت الجبنه قالت لي ختيها تعالي ساعديني بقيت اسند فيها قلت ليها على فكره بقيتي ثمينه قالت لي ولسه احلا منك قلت ليها منو دي ههاي إنتي اصلا ما ح تحصلي جمالي قالت لي بالله إنتي بتغاري بس وينو الجمال دا انا ما شايفاهو قلت ليها اسكتي وامشي هسي افكك قالت لي ما بتقدري تتزكري وعدك إنك ح تساعديني لحدي ما أمشي قلت ليها غايتو انا جنيت على نفسي لكن أخير من تأنيب الضمير أخير من تبقى لي قصتك قيد مؤلم قالت لي وين ح يفوتك قيد الالم دا ح تبقي كدا لحدي انا ما أمشي سمعتي وبعدها نشوف منو احلا من منو؟ قعدنا الاتنين نضحك...

ضرتين بقينا وفي بيت واحد واولادنا جمبنا بقيت ما دايره من الحياة حاجه غير نبقى كدا وبس نتقاسم الافراح فرح فرح وما يخيم في قلوبنا الحزن

نزرع من الالام امل وندفن احزان الزمن