رواية قيود تعيقني الفصل الثالث وأربعون 43 - بقلم مريام

ياهو اليرجعلي عُمر ضيعته عَالـ مايسوه
ياهو اليعوضني صبر مرمر أيامي الحلوه
ياناس گلبي المنكسر مو مال اگولن فدوه 💔

///////////////////////////////////////////////////
( في الماضي)

فتحت عيوني بس ما اشوف زين غواش ع عيوني كلش قوي سمعت صوت ايمان

:- صحت صحت

حسيت بأيد لزمت ايدي

الحجيه :- بنيتي سوده عليه لو ما مخليتج ترحين

ايمان :- حبيبتي ليش هيج سويتي بنفسج مو تعرفين انت شلون زباله

وجع جسمي موتني ما داشوفهم زيين كلش غواش ع عيوني

نيار :- ماما عيوني مغوشه

برهم :-هسه شويه وتصفى 

نيار :- جسمي ديوجعني حيل

الحجيه :- سوده عليه يمه سوده عليه

نيار :- بردانه غطوني

ايمان :- اي هسه

نيار :- ارد اموت

الحجيه :- اسم الله عليج يومي قبل يومج يمه لتحجين هيج

ايمان :- اسم الله عليج نيارتي

نيار :- تعبانه

برهم :- محد يستاهل تتعبين علموده دمعه منج ما يستاهلها

ابتسمت يعني زين يعرف انو ما يستاهل كل هذا

نيار :- كتلكم بردانه غطوني

ايمان :- ترا هاي البطانيه الثالثه نيار حتى عركانه

يحجون بصوت عالي حيل ضجت

نيار :- شبيكم تصيحون أصواتكم حيل عاليه

ايمان :- يا ولج وين دنحجي اصلا صوتنا ناصي

نيار :- ايي اسكتو يلا ارد انام

غمضت عيوني شوفت طيف ابويا لابس دشداشته البنيه ويضحك اتقربتله حضنته وبجيت

:- مشتاقتلك بابا اهواي والله

بس مبتسم بسته من ايده ودموعي ينزلن

نيار :- ماريدك تروح بعد وتعوفني

:- حاس بيج يا روحه الابوج انت

نيار :- اخذني وياك بابا

اختفت ابتسامته ومدلي ايده داحط ايدي بأيده وندمت ايد غير ايدي ع ايده

انداريت وشفت ايمان كمشت ايد بابا

هزيت راسي بمعنى لا

نيار :- لا بابا اني تعبانه اخذني وياك بابا اني تعبانه اخذني وياك

ايمان مبتسمه ومشت ويا اركضلهم بس ماكدر اوصلهم

بقيت اعيط وراهم

نيار :- لا باباا لا تروححح بابا اخذني اني

فزيت كبل گلبي دكاته سريعه وامي تمسح ع راسي

الحجيه :- اسم الله رحمان ماكو شي هذا حلم نامي يمه

اتنفس سريع ودموعي ينزلن بغزاره

برهم :- نيار شبيج

ادور ع ايمان بلغرفه ماهي

نيار :- ايمان ايمان ويين

كمت بسرعه من الفراش برهم كمشني

برهم :- وين راييحه شبيج نيار

اتسهترت

نيار :- ايمانن ارد اروح الايماااان وييين

دخلت ايمان تركض واجت يمي

ايمان :- شبيج شبيج حبيبتي

ذبيت نفسي بحضنها كعدنا بلكاع حضنتها وابجي

نيار :-, لترحين وتعوفيني لترحيين حبابه ايمان لترحين

ايمان :- يمج يروحي انت يمج اني ما رايحه والله

نيار :- لتعوفيني اموت بدونج اني لتعوفيني

اسمع شهكاتها وثنينه حاضنات بعض ونشهك

اجه برهم كومني ويمسح بعيونه

برهم :- ارجع مددي ارتاحي كومي ايمان شو حبيبتي

كوم ايمان هم امشن نامن كافي

الحجيه :- اخخ يمه اخخ

نومتني ايمان بحضنها رغم هي جانت متعوبه اكثر مني

حضنتها وابجي بدون صوت غفيت واني بحضنها

حسيت صبح ايمان نايمه مسحت ع راسها وبستها وكمت مكسره

كمت رحت ع لمرايه وانصدمت من شفت وجهي مورم وكله ازرك شفتي مشكوكه خشمي مشكوك وزرك حيل

شكلي عبالك مشوهه نزلت ملابسي وكفت كدام المرايه اباوع ع جسمي العاري

جان عباره عن قطع بنفسجيه ايدي بطني صدري رجلي جانن عباره عن قطع بنفسجيه

دم بشعري لعبت نفسي بس ماكدر اغسل راسي وحدي وملفلوف كذالك

طلعت غسلت وجهي وفرشت اسناني كوه ورحت بصاله

برهم كاعد وجكارته بأيده شافني وابتسم وكلي تعاي يمي

رحت كعدت يمه ورجعت ضهري وره

نيار :- امي ماكو شو

برهم :- راحت للسوك

نيار :- اممم

برهم :- كلتلج ايمان ع مرضها

غمضت عيوني وهزيت راسي

برهم :- شتكولين راح تتعافى

نيار :- اي طبعاً ايمان قويه وراح تجاوز هلشي

برهم :- اموت لو صارلها شي

نيار :- إنشاء الله تتعالج

برهم :- اليوم العصر نروح للدكتور

نيار :- اممم

برهم :- انت شلونج

نيار :- شدتشوف انت

برهم :- حيل تعبانه وذبلانه

نيار :- اممم لعد ليش تسئل

برهم :- مشتاق صداقتنه اهواي وارد اشكيلج عن همي

نيار :- اسمعك احجي

برهم :- ههههه انت حيل متغيره

نيار :- الوجع يغير اكبر واحد

برهم :- تهون وداعتج

نيار :- اتمنيت اني البيه هلمرض مو ايمان

برهم :- كلمن وقسمته

نيار :- اي مو هي حتعرس

كل هذا ومغمضه عيوني ومرتجيه ع تخم يعني ما اشوفه

فتحت عيوني شفته خربان من ضحك

برهم :- حيل اشتاقيت الهاي تفاهتج

ابتسمتله حط ايده ع خدي ومسح علي

برهم :- بعمري مراح اكرهج لو راح ابتعد عنج حتى لو انت تشوفيني اني مبتعد عنج بس لا حتى من جنتي بيت دائماً جنت اسئل عليج

نيار :- اممم

برهم :- نيار لتعامليني هيج

نيار :- شوكت تكول الاهلك ع ايمان وانو انت خاطب

برهم :- مادري انتضر الفرصه اخويا اجرام هسه بلدوام صارله 4 اشهر واي خبر ماكو اله

نيار :- انت متخاف ع نفسك يوميه جاي البغداد ترا طريق مو أمان

برهم :- لا ما عليه شي

نيار :- مادري والله اهواي اسمع عالم كاعد تتذبح ع حدود البصره

برهم :- اني عار ميصيرلي شي

نيار :- ادري بيك عار

رفعت ارداني وضحكت

نيار :- اول مره انكتل هههههه

باوع عليه مبتسم

برهم :- اكو واحد يضحك ع شي يوجعه

نيار :- الوجع اهنا برهم اهنا

اشرتله ع گلبي

برهم :- يداوه بيوم وداعتج وتدرين نيار خايف

نيار :- من شنو ؟

برهم :- اول البارحه من دعيتي عليه وكتيلي الله يحرك گلبك برهم مثل ما حركت گلبي يدكن بگلبي هاي حجاياتج خايف لا صدك الله يحرك گلبي بشخص احبه حيل خايف

نيار :- حاله عصبيه اطمئن ما يستجاب

برهم :- بس جانت دعوه بگلب محروك ؟

نيار :- الله كريم برهم الله كريم

سحب شعري بأيده ع كيف

برهم :- طولان شعرج

نيار :- اي صح هو بسرعه يطول

برهم :- نيار

باوعت بعيونه گلبي دكاته سريعه مركز بعيوني ويحجي

برهم :- بالج ع ايمان اياج تخليها تعرف بأي شي

نيار :- اطمئن

هزلي راسه كعدت ايمان اجتنا دتنشف بوجهه وتضحك

ايمان :- الحبايب بعد غيبه انجمعو سوه

برهم :- ههههه اي والله صار اهواي

اجتي كعدت يم برهم باسها من خدها وحضنها

ابتسمت واني اشوف اختي شلون مبتسمه وتضحك رغم مرضها الخبيث

ايمان:- ربي يخليك الي حبيبي انت

برهم :- ويخليج الي يروحه البرهم انت

نيار :- اعوفكم براحتكم

كمت داروح وسحبنيي برهم من ايدي رجع كعدني وهمس يم أذني

لازم تحاربين الي يأذيج علمود تتجاوزي

باوعت علي وابتسمت ورجعت كعدت يمهم مبتسمه

ايمان :- اكوم اسوي ريوك

برهم :- امشي نروح اني وياج  نسوي شلون ريوك وغمزلها

ايمان ضحكت وكامت هي وبرهم

خربت من ضحك ليش مادري سمعت صوت قوي بصاله غمضت عيوني من قوته عبالي برهم مشغل

نيار :- برهمممممم كااااااافيييي طفيييي شمشغل انت راسي حيطك من صوت

سمعت صوته وفتحت عيوني

برهم :- يا صوت شبيج شمشغل اني مو كدامج رحت للمطبخ

ايمان :- اي صح ممشغل اي شي اصلا هدوء حتى شاشه مطفيه شوفي

باوعت ع شاشه صدك مطفيه

نيار :- لعد والله سمعت صوت قوي

برهم :- يتراوالج ماكو شي والله

استغربت وكمت رحت بلغرفه كعدت كدام المرايه اباوع ع وجهي شامات الي بوجهي نص مبين ونص لا

صرت اتلمسهن بأيدي عود صدك هن زايداتني جمال ابتسمت

وكمت طلعت بصاله كعدت واني مبتسمه اجه برهم شافني ابتسم

برهم :- ها طكن

هو كال هيج واني خربت من ضحك وهو ضحك ع ضحكتي

برهم :- ههههههه شبيج ولج

نيار :- ههههه مادري والله

دخلت ايمان وهي شايله صينيه الريوك

وكعدنا ثلاثتنه

نيار :- كثيرلي شكر بلجاي بربج

ايمان :- ههههه تدللين

برهم :- اول مره اشوف حلو يشرب حلو

نيار :- لتصير لوكي

ايمان :- ههههههههههههاي لا هاي قويه

برهم :- مو صوجج كبر

نيار :- كبر الي يكبرك

ايمان :- كافي اسكتو واكلو بدون صوت

اكلنا بدون صوت لان ايمان رزلتنا كملنا وشال برهم الصينيه وهو غسلهن اصلاً

ايمان :- طالع فلم يجنن شاروخان ع ام بي سي بوليود اشغله

نيار :- شاروخان الروح وريه طلعي خيه

شغلته ايمان وجبنا حب وطفينا ضوه وكعدنا

جان اسمه  (Kuch Kuch hota hai)

برهم :- اكللكم شو امكم اتأخرت

باوعتله وضحكت

نيار :- راحت تتعارك شبيك

برهم :- ويامن

نيار :- ويا خالي فراس هسه كاتلته

برهم :- كولي غيرها يمعوده

ايمان :- اي والله شبيك هسه تجي وتشوف

برهم :- زين شلون

نيار :- برهم باوع واسكت احب بدايت هلفلم

احس عايشه شعور هلفلم بدينا نباوع وعيوني مدمعه

اجت الحضه تريد تعترفله بحبها وكللها اني احب بوجا  مدري شسمها  برهم باوع عليه ابتسمتله

ولل3 امي ماكو ايمان اتصلت عليها كلتلها اني بيت ام محمد

هاي تصير صديقت امي كلش

برهم :- ضل بالي عليها والله

نيار :- يلا شوكت ترحون للدكتور

ايمان :- هو هسه حكوم ابدل ونروح

بقيت كاعده يم برهم

برهم :- باجر ارجع للبصره الصبح

نيار :- برهم كول الاهلك ع ايمان ترا كافي

برهم :- ايي والله بس اروح افاتحهم بلموضوع

نيار :- خوش

برهم :- خليتي دهن لوجهج

نيار :- لا

برهم :- دائماً تجيبين الاذيه نفسج

نيار :- اوك

طلعت ايمان مبدله ودعيتلها راحو وامي اجتي

الحجيه :- ها يمه راحو

نيار :- اي من مساع

الحجيه :- اني راح اروح انام بغرفتجن مو تكعدينيو

نيار :- لا يمه روحي نامي

راحت نامت وبقيت كاعده طلعت دفتري اكتب بي كلشي شسويت اليوم ويامن حجيت كلشي اكتب بي

يمكن هذا دفتر الثالث من صغري اكتب كلشي يخصني بدفتر واضمه علمود ايمان متشوفه

كمت كلت خلي اسوي اني عشه صح بعدني مزوركه والكتله بعدها جديده بس لازم اقوي نفسي

لبست دشداشه قصيره وطلعت دجاجه من المجمده

صفنت افكر اسوي كيكه الايمان وازينها

رحت طلعت المواد مال الكيك وسويت ثنين لل٦ يلا كملتهن

زينتهن صارن عبالك من بره لان سبق واشتغلت بمحل مال كيك من هيج اعرف

ودجاجه جنت منكعتها بخل مال طرشي كملت وتبلتها وحطيتها بلفرن

وجبت تمن وطبخته ول٧ ونص وهم ماكو

كملت العشه كله حتى زلاطه كملتها ودزيت جهال من بره يجيبون ببسي

كعدت امي دخلت للمطبخ جان تنصدم

الحجيه :- معدله والله معدله

ابتسمتلها اتصلت ع ايمان كالت بطريق بس صوتها مبحبوح

ب8 دخلو ايمان عيونها حمر هي وبرهم

الحجيه :- ها يمه بشروني

نزلت دمعه من ايمان وبرهم حجه وصوته كلش مبحبوح

برهم :- صار اهواي بيها هلمرض وكال كل سبوع تجي تاخذ كيمياوي

شهكت واجتي ايمان حضنتني بجيت اتذكرت بابا شلون جان يتأذه من ياخذه وشعره كله وكع

ايمان :- ما يصيرلي شي والله وراح اطيب لتبجين يروحي

مسحت وجهي وضحكت

ايمان :- اشتم ريحه طيبه شمسوين

امي مسحت دموعها وحجت

:- نيار سوت اكل

ايمان :- اي والله صبو اكل بين ما ابدل واجي ميته من جوع والله

راحت بدلت دخلت للمطبخ بعدني اشهك دخل برهم اجه يمي

وعيونه مغوركه

برهم :- صيري قوي لازم تسنديها

نيار :- اضيع لو صار عليها شي

برهم :- ،مراح يصيرلها شي اني واثق بهل شي

نيار :- اتمنى

طلعت ماوعين وهو كعد يصب اخذت سفره وبدينا نودي بالاكل وايمان مبتسمه كلش ايجابيه

ايمان :- عاشت ايدج حبيبتي مبين طيب باع المنضر ضيم

نيار :- الف عافيات يروحي انت

برهم :- لا ولا طيب اصلا ريحته مطيبه

نيار :- دنجب

ايمان :- هههههه لتجذب برهم طيب

اتعيشنا وصدك جان طيب كلش ورها بشويه طلعت الكيك برهم باوع علي

برهم :- والله عمي بيج حيل تطلعين وتحجيبين كيك وتجين

باوعتله صفح وضحكت ايمان

ايمان :- لا عيني هاي هي تسوي ما نجيب من بره

برهم :- صدك تخبل باع المنضر يجنن

نيار :- هههه وطعم بعد اطيب

كصيتلهم من الكيك

برهم :- تجنن تجنن عاشت ايدج

نيار :- اني راح اروح انام كلش نعسانه

كعدت ثاني يوم برهم ماكو وماكو شي جديد رجعت صحتي ورجعت اشتغل وايمان كل مرات اني اخذها ومرات برهم يجي

ومرات اسمع صوت قويي يخليني اعيط من قوته يكوم يدك براسي بس يحلفون ما مشغلين شي بقت كل فتره تتكرر عندي حتى نزف يصير بعيوني من قوة الصوت

وايمان شعرها كل وكع وحيل ذبلت ومن اشوفها ما اتحمل واصعد بسطح ابجي ماريدها تشوفني وتضعف

24 ساعه لافه شال ع راسها شعر ابد ما عدها كمت ماكدر افتح شعري كدامها وكمت الف راسي مثلها

بيوم كاعدين دنباوع فلم

ايمان :- انزعي هاي خلشوف شعرج

اتوترت وحجيت وكوه تطلع لكلمه مني

نيار :- خيولي شلج بي أصلاً لو مو انت تزعلين جان كصيته بس انت متقبلين

ايمان :- طبعاً ما اقبل اموتج غير

غلست ما فتحته وبرهم اخر مره اجانه قبل 3 اشهر

كال اخوي استشهد وكتها حيل انقهرنا وره شهرين كال طلع مابي شي وعبالنه استشهد

خربت من ضحك

ايمان يوم عن يوم تذبل اكثر وجهه اصفر كركم بيوم اجه برهم كال اريد اتزوج ايمان زواج كامل

اني عطت بي حتى ضرب ضربته اتعاركت وي حتى كلام كطعته ويا وهو وايمان راحو عقدو عقد محكمه وصارت مرته شرعاً وقانوناً

اتخبلت بيومها ضغطي صغد وخشمي طك دم

هسه تكولون لان تحبه وراح يتقرب من اختها لا غلطانين كل سعاده اتمنى الهم بس ما ردت زواج اختي سري ومحد يعرف بي من اهله

صادفت الزفه مالتهم روحي تعبانه وايمان كذالك جانت تعبانه حيل من غير شي مرضها ما صارت هوسه اهواي واني برهم ما احجي ويا

الخاطر ايمان بدلت ورحت وياهم اخذها للفندق اكثر يوم تعبت بي امي ما قبلت تبات بلبيت راحت بيت صديقتها اني رفضت اطلع من البيت

وجع بكلبي و بجيت اهواي حسيت روحي تطلع واني دابجي اتكرر هلصوت سديت اذانيي وعطت

متت من وره راسي احسه حيطك استمر 3 دقايق وراح

حتى خشمي طك دم رحت جبت دفتر والقلم كعدت بلكاع وارتجيت ع تخم ودموعي ينزلن بيدي القلم وايدي ترعش اكتب شصار وشسويت من اول ما كعدت

وصلت الحد زفينه اختي وبرهم نزل دم ع الورقه مسحت خشمي شمرتهن ورجعت راسي وره غمضت عيوني

اتصل فوني شفتها ايمان جاوبتها واحس صوتي كوه يطلع

نيار :- ها عمري

ايمان :-, ها نيره شبيج

نيار :- شبيه

ايمان :- مادري حسيت بيج شي وخابرتج

نيار :- لا مابيه شي انت شلونج خوما تعبانه

ايمان :- لا حبيبتي كلش زينه اني

سديته منها وخابرتني امي

الحجيه :-, ها يمه ليش بقيتي وحدج بلبيت جان اجيتي وياي

ايمان :- لا يمه اني ردت اخذ راحتي شويه

الحجيه :- ايي هسه خابرتني ايمان و

دتحجي وسكتت

نيار :- اي يمه اعرف بدون ما تحجين يلا باي

سديته منها وعيوني ما وكفت من دمع نمت بلكاع وصافنه بلسكف دم يابس ع وجهي  مادري بس غمضت حسيت ع ايد تمسح ع راسي

فتحت عيوني ماكو احد يمي

كبل كمت ساعه ب7 رحت بلغرفه نمت سمعت صوت هلاهل بلصاله حتى ما اتحركت بقيت نايمه

اجتي امي

الحجيه :- كومي اختج ورجلها اجويي ميصير تبقن نايمه كومي عيب ولج منهم

نيار :- اي هسه اكوم

امي طلعت كمت مسحت وجهي بكلينس مرطب وطلعت غسلت وجهي وفرشت وابتسمت ودخلتلهم بست ايمان

نيار :- ايي ع لخير شايفين كل الخير يارب

ايمان :- تسلمين حبيبي يوم للج

باوعت ع برهم مبتسمه ومديتله ايدي بادلني

نيار :- ع لخير صديقي شايف كل الخير انشاءالله

باوع بعيوني جرتني ايمان بلغرفه وتحجي متحمسه

ايمان :- للجج نيار احلا يوم بحياتييي والله احلا يوم

ضحكت

نيار :- إنشاء الله كل الايام حلوه الج حبيبتي

ايمان :- عمرييي انت حضنتني

باوعت عليها رغم مرضها وماعدها شعر بي حلوه حيل صح اني وياها نتشابه كلش بس هي احلا صايره مني بهواي

بدلت وشفت اثار بركبتها نزلت عيني بسرعه وعصرت ع ايدي واستغفرت طلعت من الغرفه

برهم وايمان ما بقو يمنه راحو بيت برهم الي بغداد او بيت اخو هو برهم كاعد بي

وره 7 اجتي ايمان يمنه لا برهم رجع للبصره عرس اخو

نمت قبلها هي بقت تعزل بلكنتور مادري شلون حسيت

وشفتها واكعه بلكاع ودم ينزل من خشمها وصفره كركم  ودفاتري بلكاع الي اكتب بيها

حطيت رأسها بحضني ماعرف شسوي احس صوتي اختفه

كوه طلعت عيطه مني

نيار :- ماماااا الحكينيييي يمممه

اجتي امي تركض طلعت بشارع اركض مثل المخبله بسرعه جبت تكسي وشلنا ايمان وتوجهنه للمستشفى

حيلي يرجف ارد احجي ما اكدر من شفت اختي بهل منضر اتذكرت بابا من اتخربط وجان هذا اخر يوم

اخذوها للطوارئ إمي ضغطها صعد واتخربطت ماعرف وين اروح

اجه بالي برهم اتصلت علي صوتي كوه يطلع

نيار :- برهم .... برهم تعال

برهم :- شبيج نيار وين اجي

نيار :- ايمان ..... ايمان بلمستشفى وكعت تعال برهم

جانت ساعه ب1 بليل ب 5 الفجر برهم يمنه

اجاني يركض

برهم :- ها ها شلونهاا وينها احجييي نيار

نيار :- دكتور كال حالتها تعبانه ويمكن تروح

كملت كلامي وكعت بلكاع ارجف ودموعي ينزلن

كعد بمستواي رفع وجهي بايده ثنينهن

برهم :- تشاقييين مووووت احجيييي نيار احجييي

هزيتله راسي

برهم :- لالا ايمان متروح وتعوفني لا متروح ايمان تحبني متعوفني

كمت اباوع علي دموعه ينزلن ويهز براسه

باوعت علي

نيار :- بسببي اني وصلت الهاي المرحله

باوع عليها ودموعه يجرن قرب مني ولزم ايدي قوي

صك ع سنونه ويحجي وياي بعصبيه

برهم :- كتيلهااااا مووو كتيلهاااا ما تحملتي تشوفييين اختج مرتاحه وكتيلها علمود تموتت وتاخذيني الج مو

جانت المستشفى مابيها اهواي عالم وخاصتن يمنه لان جناح مالتنه بس للمرضى سرطان وايمان بلغرفه كبالنا ومحد يدخللها

هو هيج كال وضربته راشديات ثنين وغلطت علي

نيار :-* تنجب وتاكلل تبنن وما تحجيي هيج انت نو شفت نفسك نذل عبالك كلهم مثلك انذال يا حيوان
وايمان مو اني الكتلها قرت دفاتري يمكن الاكتب بيهم

عافني وراح وكف يم الغرفه وامي اجتي ام محمد اخذتها لان اتخربطت

ب9 دكتور كال تريد تشوفكم بس لتتأخرون انطانه جفوف وكمامات

دخلنالها اني وبرهم باوعت علينه برهم نزل الكمامه وباسها من راسها

برهم :- لو ادري هيج حيصير ما اعوفج والله

ابتسمت وباوعت عليه

حجت بصوت تعبان حيل

ايمان :- تعاي نيار يمي

رحت يمها كمشت ايدها ودموعي ينزلن

ايمان :- انت قويه ما اريدج تضعفين بيوم

هزيتلها راسي

ايمان :- برهم

برهم :- روحه البرهم انت شبيج امي انت

ايمان :- نيار اتأذت اهواي دير بالك عليها

باوعلي ودموعه ينزلن

برهم :- اسكتي يروحي لتحجين مو زين عليج

ايمان :- محد يحبك بكد نيار ولا حتى اني احبك بكد ما تحبك نيار برهم نيار امانه بركبتك اذا اموت

برهم :- اششش اشش يروحي اسكتي اسم الله عليج انت متعوفيني

ابتسمت وعصرت ع ايدي قوي لزمتها

نيار :- كومي بسلامه علمود نروح نشتري ملابس سوه

ايمان :- ههههه برهم اهلي امانه بركبتك

برهم :- ايي والله بس اسكتي لتحجين باسها من حلكها كدامي نزلت عيوني وابوس بأيدها

برهم :- اليوم ع اساس اكول الاهلي واجيبهم واجي بغداد بس اوعدج ايمان بس ترجعين للبيت راح اجيبهم واسويلج عرس اله اخلي دنيا كلها تحجي بي

ما كدرنا نطلعها من المستشفى بقت يومين وبرهم رجع للبصره كال اجيب فلوس واجي

رحت جبت مي واجيت وامي عفتها كاعده يم ايمان رجعت

واشوف هوسه وكومه اطباء بالغرفه ركضت لكيت امي دتعيط وتخرمش بوجهه

بقيت واكفه احس دنيا وكفت بعيني غواش بعيوني مشيت للجربايتها اتوضحت الروئيه نايمه هزيتها بايدي ما تكعد

الدكتور :- البقاء في حياتكم

امي زادت بلعياط واني اتهسترت بقيت كامشه بيدها كامو يجرون بيها محد يكدرلي

امي وكعت اتخربطت

ما اتذكر شحجيت بس بسرعه لزمت الفون خابرت برهم

نيار :- ماتتت برهم ماتتت تعال

//////////////////////////
(في الوقت الحالي )

مسار :- برهم بربك خليها ضهر لان خلخابر دكتورتي باجر اشوف عادي اطلع طريق بعيد لو ميصير

برهم :- هاهيه عمري براحتكم

إجرام :- ادهم انت لتسوق اني جرحي بعده

ادهم :- صار

جابر :- خوش لعد اني اروح هسه اجيب ملابس من البيت واجي

سيرين :- اروح وياك وجهال يبقون اهنا لان متعرف شطلع انت

جابر :-, ماشي كومي يلا

راحو جابر وسيرين واحنه انخبصنا

صعدت فوك اطلع ملابس الباجر إجرام طلع جنطه

مسار :- إجرامي بربك روح الغرفت حمودي طلعله ملابس

إجرام :- راح برهم يطلعلهم هو وفهد

مسار :- ماشي حبيبي

طلعت ملابس الي والأجرام

اجرام :- مو اهواي طلعتيلج ملابس ؟

مسار :- اي حبيبي مو قبل كم يوم كتلك اروح يم جمال ابقى كم يوم

باوعلي صفح حسيته ضاج

رحت حضنته من وره

مسار :- حبيبي والله صار كومه مرايحه واني كتلك

اندار عليه وابتسم

إجرام :-  ما ضايج حبيبي بس راح اشتاقلكم والله

مسار :- هو اني هم راح اشتاقلك

قرب باسني وابتعد

إجرام :- لا خلي انكمل الملابس وابدي

غمزلي وراح ضحكت ورحت اشوف برهم شطلعلهم ملابس

دخلت الغرفتهن لكيت برهم كاعد وصافن

مسار :- ليش صافن عمري انت

باوع عليه وصاحني اكعد يمه

برهم :- حيره بداخلي

مسار :- لا حيره ع أم بي سي عراق

باوعلي مستغرب

ضحكتله

مسار :- اشاقه عمري احجيلي شمضوجك

برهم :- احب ايمان

مسار:- لعد ليش راح تزوج اختها

برهم :- لان اختها اني دمرتها وارد اصلح سويته

مسار:- شلون دمرتها ؟

برهم :- جانت صديقتي من زمان وجنت دائماً اتغزل بيها بحيث حتى شاماتها حافضهن كم وحده

مسار :- يعني جنت تحبها

برهم :- لا جانت صديقتي كلش وقريبه علي احبها حييل بس كا صديقه واخت

مسار :- بس سويته غلط انت

برهم :- اعرف وحيل متندم خطبت اختها واتزوجتها وهي عاشكتني وجنت استهزء بحبها الي تدري مسار مرتين انتحرت بسببي

باوعتله فاتحه عيوني وحلكي مدري شمر بحلكي

مسار :- هايي شذبيت بحلكي

طلعتها فستاقيه

برهم :- ادري فاتحه حلكج شنو

مسار :- شمدريني اتأثرت اي المهم كمل

برهم :- انتحرت وره موتت ايمان جانت محمله نفسها مسؤليت موتها

مسار :- شلون بلا

برهم :-, جانت تكتب كلشي عن يومها بدفاتر 

فا بيومها قرتهن ايمان واتخربطت ورها ماتت مباشر

مسار :- يعني ايمان ماتت زعلانه منها ؟

برهم :- لا وصتني عليها كلتلي بالك ع نيار وامانه بركبتك ومحد راح يحبك بكدها

مسار :- خطيه والله

برهم :- ايي

مسار :- زين انت وره موتت ايمان ابتعدت عنهم جنت دائماً يمنى ومن سافرت بقيت اهناك اهواي يعني ابتعدت عنهم

برهم :- اي صح لان نيار وره موتت ايمان امها زوجتها

مسار :- جذااااب يعني هسه نيار منفصله

برهم :- ايي

مسار :- وليش بعدت كل هلسنين هسه يلا راح تاخذها

برهم :- ارد اخلصها طليقها خبلهم يوميه جافت عليهم لو يهدد بيها ومن جانت متزوجته يوميه معذبها

مسار :- خطيه والله

برهم :- اي والله

مسار :- بعدها تحبك

باوعلي وابتسم وهز ايده

برهم :- بعدها مسار بعدها تحب الدمر حياتها بعدها

دخل علينه حمودي يهز

محمد :, هلا بعمي هلا وبتيته هلا
                                  ( وبجيته)

برهم :- ههههههههه تعال

راح يم برهم حضنه ويبوس بي

واني خربانه ضحك علي

محمد :- صدك حتتوج

برهم :- اي صدك حتزوج ههههه

محمد :- واو حيطر عرث عدنا
                 ( حيصير عرس)

دخل اجرام كعد يم برهم ودك ع جتفه

إجرام :- برهومي انت سبع

برهم هزله راسي وحضن اخو

شكد حلوه اخوتهم اول مره اشوف هيج اخوان حنين والله وما بينهم شك ابد ابد

برهم دائماً يكول ادهم وأجرام احبهم اكثر من امي وابويا

هما ربو رغم جانو صغار هم بس هم جانو يعلمو دائماً

جانت امه 24 ساعه طالعه ومتفكر بيهم ابد اكلهم سبحهم جان مرات اجرام يطبخ جده الله يرحمها من مات جدي الحد الان مشايفيها

لان كلهم انسحبو من عدنا وجان هلشي بطلب من إجرام

يعني هسه عايشين وحدنا مالنه علاقه بيهم ولا هم النا علاقه بينه من تطلكت ياسمين الحد الان غير بس بوفاة جدي اجتمعو 

اي نرجع الموضوعنا

كعدت صبح خابرت دكتورتي كالت مادام عديتي 20 يوم يعني ماكو اي خطر عليج

وطلعنا سيارتين ادهم وجابر الي يسوقون اتوجهنه البغداد

البيت جمال ومناك نعدل نفسنا ونطلع لان طريق يبهذل

______________________________________

حسابي الانستا :- mream_.98

ترا البارت طويل 🙂🙂😂
وشو لا تعليق لا شي متغيرين انتو 🙂💔

بس فالحييين تكوليلي طولي البارت 😒😒💔