لا صدّ قلبي صد من دون رجعة الفصل الثالث عشر 13 - بقلم sajeda🇹🇷

وصل للمستشفى وهو يركض مثل المجنون .. لدرجة انه يصدم

في اشخاص عصبوا منه .. وهو يصدمهم ..

أكيد ان اللي صار لها امس شي قوي .. مايمشي علي كذبتس

ياشويخان .. مخليتس على كيفي يالكذوب

حس بالغبن والقهر وهو يسمع من ابو عبدالعزيز انها فقدت الجنين

وانها في غرفة العمليات يسوون لها تنظيف

غمض عيونه بقهر .. ورفع راسه للسماء .. وفتح عينه بسرعه

وضرب الجدار بقوه .. خايف انه يرتكب فيها جريمه .. هالإنسانه

فقدته صوابه

ابو عبدالعزيز مسكه بقوه وهو يهديه - صقر اهدى اللي تسويه

ماهب زين .. الله يعوضكم بغيره

بيت ابومحمد \ الدور الثاني .. جناح صقر

جالسه وسرحانه .. يوم طلعت هند من الحمام .. وماصدقت

يوم شافتها وفرحت - صحيتي

هزت راسها وعيونها تناظر الفراغ

هند قربت منها وحبت كتفها وجلست جنبها - الحمدالله على سلامتس

صبيتي قلبي عليتس

ناظرتها هند .. بس واضح ان ساره ماهب معها - ساره فيتس شي

ساره اللي نزلت دمعتها .. وماقدرت تخبي أكثر .. وماتنفجر

حطت راسها على كتف هند وبكت

هند ارتاعت وبدت تدمع عيونها - ساره وش فيتس أمانه لاتبكين

ساره وهي تشهق - ليش تركنا مكانا وجينا هنا هند ابي ارجع هناك

ماابي احد هنا أنا ا ا انا تعبانه بالحيل بالحيل ياأختي

هند ضمتها بقوه - ساره حد قايلتس شي حد مسوي لتس شي

عمي وش يبي فيتس ويخليتس تفقدين وعيتس كذا وتبكين

ساره اصدمتها وهي تقول - فيه واحد خطبني .. وعمي حلف على

نايف ياخذني

هند اشهقت وفكتها عنها وناظرت فيها وابتسمت - وكل هالدموع من

فرحتس عشان نايف خطبتس ( ضحكت ) اكيد اغمى عليتس لانتس

ماصدقتي .. مسكينه ياأختي

مستحيل أحد يفهمها .. ويحس بالنار اللي شابه بين ضلوعها .. إنسان

تتمنى موته على يدينها .. إنسان تشتهي شوف الشيطان ولاتشوف وجهه

إنسان حطم كل حلم تحلم فيه وتبيه .. فقدها أعز ماتملك .. ورماها رمية

حد حقير في دربه .. وليته إكتفى بهالشي .. لا تعدى هالشي وحطم حتى

مشاعرها وكرامتها .. آآآآآآآآآآآه وين انا ووين انتـــي ياهنـــــــــــــد

تلمست الشي البارد اللي راقده عليه .. وفتحت عيونها.. وعرفت هي

وين نايمه عليه .. على صدره العاري

دزته بقوه عنها وبقرف ..بسرعه قامت ودورت على المفتاح

وقح وقح وقح إلى ابعد حد .. ماتنسى ليلتها البارح وهي تبكي وهو

يضربها ويأخذ منها اللي يبي .. وعقب ماخلص منها .. عشان يقهرها

ويهينها وهي توصفه بأبشع الأوصاف .. قفل الباب ورقد .. ورقدها

غصب عنها معه .. ماتنسى وش كثر بكت وبكت وبكت

وهو يتلذذ بتعذيبها ويستهزأ فيها ويضحك .. ويعايرها مره بعرجها

ومره بشكلها .. ومره بأصلها اللي مختلط بهندي

وكل مابكت .. كل ماجرح أكثر وأكثر .. لين سكتت وسكت عنها

والمفأجاه انها رقدت وهي تتوعد فيه .. وصحت وهذا هو قدامها راقد

بكل أريحيه ولا تقدر تسوي فيه شي

اجلست في زواية الغرفه وقعدت تبكي .. وهي تتمنى السقف اللي

فوق راسها يطيح ويأخذ روحها وترتاح منه

رجع من الجامعه وهو معصب .. الدكتور هاذا متوعد فيه

وكل مره يسمعه إهانه شكل

دخل البيت وشاف أمه تحط الغداء وهي زعلانه .. قرب منها

وحب راسها – يمه وش فيتس

منيره بحزن – شيخه ياحبة عيني سقطت

فارس انصدم – ومن خبرتس

منيره – صقر دق علي وعلمني وهي بالمستشفى هالحين

فارس – وصقر زعلان

منيره وهي تجلس على الارض – ماهب زعل إلا ماغير يصارخ

مسكت في يد فارس وهو واقف – فارس وانا امك لازم نفزع

للمسكينه

فارس – وش بيدينا نسوي السالفه بين رجل ومرته وش خصني

انا وإياتس يمه

منيره حطت جلالها على عينها وانتحبت – والله ان يذبحها انت

ماتعرف اخوك لاعصب .. كلمني وهو يتهدد ويتوعدها

المسكينه بتروح وطي في يده

فارس وهو يجلس جنبها – يخسي مايسويلها شي وجدي موجود

منيره ناظرته وهي تدمع – وانت خابر جدك يبغضها .. فارس

وانا امك صقر ولدي خبز يدي والله لو حتى جدك وابوك

بيفزعون لها ان مايفرقه عنها غير ذبحتها

فارس ناظر فوق – خواتها عرفن

منيره وهي تمش دموعها – لا واسكت لاتعلمهن .. وعقب

العصر ابيك توديني للمستشفى

فارس وقف وهو حزين لشيخه – بروح اغير لبسي واغسل .. إلا

بسالتس موضي وينهي وراها متعاونتس

منيره بحزن – ياحبة عيني راحت مع محمد يفك الجبس عنه

وهند المسيكينه توها كانت عندي وساعدتني ومبسوطه

فارس اللي كان بيمشي وقف يوم قالت مبسوطه – ليش مبسوطه

منيره وهي تبتسم – لان نايف بيخطب ساره ,, تبي العلم وانا امك

هالثنتين إن شاءالله ماهب طالعات من بيتي

فارس كمل طريقه وهو مبتسم ,, وتذكر غلاسته عليها امس

( قال في نفسه ) ثاريها فرحت .. حتى انا فرحت بعد

منيره وهي تلم الدله والفناجيل – وناد على بنات عمك خلهن

ينزلن للغداء

فارس هز راسه .. وهو يرقى الدرج ومبتسم

دخل البيت هو وجده وابوه اللي تكلموا معه .. وفهمهم

اللي صار اكثر عليه

لقى الجده اللي معصبه .. وعمشاء جالسه ورابطة راسها

وريم تجهز الغداء على السفره

ضاحي يوم شاف المنظر عصب .. مستحيل يفهمنه .. ناظر

بجده اللي هز راسه ومشى للسفره

قالت الجده – هافهيد يومنك عارفن ان ضاحي بيأخذ هالبنت

وراك ماعلمتنا ولا شاورتنا

عمشاء وهي تبكي وصوتها رايح من البكى – الله يسامحك

ياعمي ترميه هالرميه

الجد عصب – اقطعــــــــــــــن اقطعــــــــــــــــــن من متى أخذ

شورتسن يالحريم في اللي اسويه هاه

عمشاء قامت من الصاله .. ودخلت جناحها .. وضاحي

مشى يتبعها وهو زعلان عليها

ابو فهيد – ضاحــــــــــــي

ضاحي وقف وهو يحس بالقهر والغبن .. ربه مبتليه بالأمانه

اللي صارت فوق ظهره .. وأمه اللي من جهه وجدته

لف عينه لإبوه وجده وناظرهم .. وناظر جدته اللي لفت وجهها

عنه بمعنى انها زعلانه

ابو سعد – تعال تغد وامك بيطيح اللي في راسها

ضاحي طلع الدرج وهو يقول – بس مااشتهي منسده نفسي

ريم اللي جابت صحن السلطه .. ناظرت في أخوها اللي طلع

الدرج ونفسه حزينه .. وباين في عيونه الهم

وأمها زودتها عليه .. حطت السلطه على السفره .. ومشت

لجناح أمها

فتحت الباب ولقت امها منسدحه وتبكي .. قربت منها وحبت

راسها – دخيل غاليتس يمه لاتسوين هالصنع بضاحي

عمشاء عصبت – لاتجيبين سيرته المروح ماهب ولدي ولاني

بأمه

ريم اللي تحاول تهدي امها – وعشان ايش عشان تزوج وانتن

مادريتن .. طيب هي سعوديه .. وطيبه يايمه بالحيل .. لو تعرفينها

عمشاء عصبت – وانتي امداتس تعرفين عليها ايه مقيوله هذه

شي يعصبي بتسوونه ياعيالي تدورون اللي يذبحني

ريم حبت راسها – انتي قويليلي سبب واحد عشان ماتقبلينها

هما جدي يعرف وابوي يعني الروس الكبار عارفين معناته
ماسوى شين غلط يحمل تسون اللي تسونه

عمشاء – انقلعي اذلفي مافيكم الفالح تدورون اللي يغثني ويضيق

صدري ( ودخلت في موجة هواش وصياح )

ريم حزنت على امها وهي تهاوش وبسرعه طلعت .. علها تهدى

من اللي تسويه .. امها عتبانه بالحيل وبالحيل بعد

شافت في وجهها فهيد نازل وهو يضحك .. اكيد غاث المسكينه

بعد .. امس تسمع صوت هواش وصياح ( ماأقول غير الله يعينتس

عليه ياوضحى )

ريم – وينهي وضحى

طنشها ومشى للغداء يأكل .. ناظرته صدق حقير .. فيه فرق

شاسع بينه وبين ضاحي في الحوار والأدب .. كبيرنا بس هبيلنا

طلعت فوق تبي تجمع وضحى بالجازي .. اللي أكيد بيحبن بعض

قالت في نفسها .. عسى امي تتقبلها هي وجدتي بس

دق الباب وسمع صوت هند وهي تقول – زين يمال المغثه

يهالشغاله كم مره تنادينا للغداء جايين

دق الباب مره ثانيه وهو يضحك عشان يطفشها .. بسرعه انفتح الباب

وهي مافيها غير الجلال وتصرخ – خيييييييييييير ازعـ

يوم شافته فارس اللي مبلم ويناظرها .. مطت عيونه وشهقت

وبسرعه سكرت الباب

حس بالفشيله وعظم اللي سواه .. تذكر الغداء ورفع صوته

وهو ينزل – امي تحتريكم على الغداء

نزل الدرج وهو يغمض عيونه بقوه ويفتحها .. وحاس بروده

في اطرافه .. ابد ابد ماتوقعها بهالصوره .. عكس لسانها

السليط طلعت صوره ثانيه باين في وجهها النعومه والبراءه

وهالشي هو اللي مغاب عن باله .. حتى وهو يأكل

يوم نزلت هي .. كان يأكل وهو منزل عينه .. كانت امه

جالسه في الصاله عند الدلال

يوم ابوه سألها – صدق شيخه في المستشفى

فارس تذكر هند وبسرعه دورها ولا حصلها .. أشر لإبوه

ان هند فيه

منيره – دخيلك اسكت لايسمعك احد

طلعت هند من المطبخ وفي يدها صحن أكل – عمه اسمحيلي

بودي هالغداء لساره فوق وبنزل لتس

منيره – ماعليه يابنتي نحن بناكل بعدهم .. إذا تبغين بزيد

لتس الغريفه من هنا واكلي معها فوق لان الغداء اللي بالقدر

لمحمد وموضي

هند – انا عارفه علمتني الشغاله وخذيت شوي لان ساره ماهب

أكله كثير .. وانا بنزل لتس

منيره – ماعليه ياحبيبتي انا بحتريتس اخذي راحتس وانا امتس

طلعت فوق .. ولقت ساره على سريرها ومنسدحه .. وعيونها

في السقف .. وتدمع

يوم حست فيها ساره جلست ومسحت دموعها – انا ماابي

ليش جبتي غداء

هند – لاني ابيتس تأكلين بسرعه وبطلي اللي تسوينه

جلست جنبها – تدرين عاد كل شوي طالعه لنا مصيبه ماتخلينا

نروح نوره والله اني اشتقت لها

ساره قامت ومشت للحمام – نصيبها بعد وش نسوي

هند ناظرت نفسها في المرايه وتعدلت .. وقربت من باب

الحمام – ساروه انا بنزل تحت اتغدى اكلي غداتس بسرعه

يمكن نروح لوضوح ولا نوره

ساره وهي تغسل وجهها – ليه حد قايل انا بنروح

هند – لا بس بقترح هالإقتراح على عمه منيره إن شاءالله

انها توافق

ساره – طيب

نزلت هند .. وشافت ماعلى السفره غير فارس .. لان عمها

قام

ويوم شافها فارس وقف

منيره – كمل غداك وانا امك

فارس وهو يتعداها للمغاسل – لا خلاص شبعت تغدن انتن

شافت عمها وفارس يغسلون .. وراحت لمغسلة المطبخ

غسلت يدينها وطلعت عند الباب .. صدمت في بطنه

من طوله مع انها مو قصيره

غمضت عيونها وقالت – ماتشوف

ناظرها بنص عين – لا طلعت عميان تصدقين ,, ويالله

ارجعي طريقتس وعطيني كاس مويه انا في الصاله

وراح وخلاها

انقهرت منه .. شافت الشغاله وعلمتها وطلعت

يوم دخلت الصاله سمعته يقول – وين الكاس

جلست على الغداء وهي مطنشته

انقهر .. وسمع اللي تقول – خد فارس

فارس ناظرها وكشر – كم مره قلت لتس لاتجيبيلي مويه

( ناظر هند ) كله من تحت راسها

منيره – اعوذ بالله من الشيطان ,, هماك وانا امك تغديت اشرب

واسكت الله يخليك إلي

هند تحس انها مستحيه تأكل قدامه ,, مافي وجهه حيا .. يروح

ويخليها تأخذ راحتها

هند ازفرت وسكتت

فارس وهو يشرب فنجال قهوه – اقول يمه متى تبونا نسافر مكه

منيره – صعبه سفرة مكه هالحين وانت عارف ليش

هند ناظرت عمتها – ليش عمه

منيره ماتدري وش تقول – ضاحي راد من السفر ومتزوج

وفيه مشكله عندهم

هند بإقتراح – خلاص ماهب لازم نسافر إبهم

فارس ناظرها وعجبه رايها .. وهو ناسي شيخه – صادقه يمه

منيره تنهد – لا مايصير انت ماتوحي

تذكر وسكت

منيره اللي منسده نفسها وتأكل عشان هند ماتستحي .. ويوم قالت

خذيلتس معها لانه نفسها مسدوده – بروح اجيب بشتي واجيك شغل

السياره وانا امك

هند ناظرتها كانت تبي تتكلم توديها عند وحده من خواتها – وين

بتروحين عمه

منيره بحنان – قريب ياحبيبتي إذا سأل عني احد قوليله مشوير

صغير وراجعه

هند هزت راسها وقامت عن الأكل .. لايمسكها هالحين طنازه

عليها ويقول ماتشبع

في المستشفى

طلعت من العمليات وودوها غرفه خاصه .. جته الممرضه

تعلمه برقم الغرفه

بسرعه مشى معها وهو يحس بنار ماتنطفي غير بذبحتها .. فتح

الباب ودخل لقاها راقده وباين فيها التعب

كشر في وجهها وطلع .. شاف الدكتوره اللي تتكلم عن حالتها

عند الممرضات وتعطيهم وصايا .. بسرعه قرب منها

صقر – السلام عليكم

الدكتوره لفت راسها – وعليكم السلام

صقر – انا زوج شيخه بنت ناصر اللي طلعت من العمليات

كيف حالتها

الدكتوره – الله يعوضكم بغيره .. نزفت كثير قبل تجينا اصلا

الجنين ميت في بطنها له اكثر من 12 ساعه والحمدالله هي

بخير هالحين بس نايمه من أثر البنج

صقر هز راسه ومشى تاركها .. جلس في الممر اللي عند غرفتها

ماله نفس يقوم ويشوف وجهها

من بعيد شاف امه وفارس اللي مقبلين عليه

حب راسها يوم قربت ويدها – ليش جيتي بيكتبون لها خروج

في الليل

منيره مسكت يده وبكت – تكفى وانا امك داخلت على الله ثم عليك

تفكها من شرك لاتنسى انها يتيمه

صقر معصب – وكل يتيم يسوي سواتها ونقول يتيم ,, يمه هاذي

ماهب صاحيه تركض في الشوارع مثل المجنونه فضحتني

وكم مره محرص عليها .. بس هي ماتبيه ,, والله ان ذبحتها

ماتبرد اللي في خاطري

فارس – افا عليك بو ضاحي

منيره حبت راسه وهو وخر راسه عن امه – يمه وش تسوين

منيره – تكفى وانا امك فكها شرك المسكينه ضعيفه

صقر عصب – تخسي ماهب ضعيفه يايمه فضحتنا فضحتنا

تعدي في الشوارع وجهها ماأكلها .. والله اني مارقدت ولا دخلت

معها البيت اخاف اني اذبحها وهي حامل ,, مأمن نفسي

لو أشوفها قدامي .. هالحين اللي خايف عليه مات راح وهالسلقه

هي اللي ذبحته ليتها ماتت معه

منيره وفارس انصدموا ,, وراح وخلاهم

منيره ناظرت فارس – شفت وانا امك يويل قلبتس يامنيره انا

هالولد بيذبحني يافارس بيذبحني وانا امك

فارس حب يدها – خلاص اهدي يايمه انتي ادخلي لها انا بنتظرتس

هنيا

منيره وهي تهز راسها – لالا رح رجلي على رجلها .. والله ماينفرد

إبها والله ان يذبحها ,, رح لبنات عمك ماعندهن احد ابوك راح

لإبيعره ومحمد وموضي بيرحون بيت عمك وراهم

فارس – خلاص اجل بأخذ بنات عمي وبنروح لبيت عمي بسلم

على ضاحي وهن يشوفن اختهن

منيره هزت راسها ودخلت وهي حزينه .. يوم شافتها راقده

وباين التعب فيها .. حبت جبهتها – الله يهديتس وانا امتس

في صالة بيت سعد بن فهيد

جالسه وضحى وعمشاء والجده وريم .. يوم نزل ضاحي ومعه

الجازي

اللي ماتغدت معهم .. وضاحي شجعها تنزل يتعرفون عليها أهله

أكثر

شاف امه صدت يوم شافتها تألم بس سكت – السلآم عليكم

الجميع – عليكم السلام

وضحى وقفت للجازي اللي لابسه برقع عطتها إياه ريم وجلال

استانست الجازي وبسرعه راحت تسلم عليها

وضحى اللي ارتاحت لها – وش اخبارتس

الجازي – بخير انتي كيفك

وضحى اللي مستغربه لهجتها مو منهم – بخير

جلست وضحى مكانها ,, والجازي مالقت لها مكان إلا جنب ضاحي

اللي قرب من الدله يصب له فنجان .. خذت الدله منه وصبت له

فنجان وانتثر على يدها من ربكتها

صاحت وعمشاء والجده ناظرنها .. ضاحي خاف .. وريم وقفت

فازعه لها – صارلتس شي

مسكت اصبعها وهي متألمه – آآآآآآح يعور

وضحى وقفت – خلتس بجيب لتس كريم

هي وقفت – لالالا بغسل هو مو مره قوي

راحت تغسل يوم انفتح الباب ودخل فارس ومعه ساره وهند

وضحى يوم شافتهن استانست .. ومشت بسرعه لهم وهي تسلم

على خواتها .. وفارس يناظرهن ويضحك

سلمن عقب على الجميع .. وجلسوا

وضحى – وين عمتي ليش ماجت

عمشاء اللي مكلمتها منيره وماعلمتها بس منبهتها لاحد يدري

قالت – لا منيره عندها شغيل بسيط بتقضيه

ضاحي اللي وقف وسلم على فارس – عساها بس بتحضر العشاء

ريم – أي عشاء

ضاحي – عشاء بيسويه ابوي لي

كشرت عمشاء وصدت

فارس مشى لجدته وحب راسها – يالله ان تحيي بنت خزام

الجده- اذلف اذلف يالنخله مكن لك جده يالمخنز تنشد عني

ضحك فارس – والله انكم بلشه يهالكبار ان جيناكم قلتوا اذلف

وان ماجيناكم ضقتوا وحربتونا

دغدغها وهو يضحك ,, وهي تدزه وتضحك – الله يقطع شرك اذلف

اذلف رضيت خلاص

ضحك وبعد عنها .. وجلس جنبها ,, ومايفرق بينه وبين هند غير

المركى

عمشاء – وشلونتس هالحين يابنتي ياساره

وضحى ألفتفتت عليها بخوف – ليش وش فيتس

ساره – لا تعب بسيط دوخه بس هالحين بخير

فارس – دوخه تفقدتس وعيتس عاد

وضحى – يويلي اغمى عليتس محد علمني

هند – هذاتس عرفتي خلاص مصار شي

ريم – انتي كنتي مو يمنا مدري شعندتس لاصقه في هالغرفه

فارس يضحك ويعلق عليها – تدلع رجلها وتباريه ماهب مثلتس

يالهايته

ضاحي فقد الجازي ووقف يدورها ,, لقاها جالسه في الصاله الثانيه

ناداها – الجازي

ناظرته وهي فازه – كنت بجيكم بس عندكم رجال

ابتسم وبانت غمازته وذابت فيها – عاد تعدين فارس غريب تعالي

هذه بكره تمونون على بعض وضجكم واصل اخر الشارع

امشي بس امشي

مسك يدها وهي انبسطت يومه مسك يدها .. وقامت معه

صحت من البنج .. وبسرعه تلمست بطنها .. وقعدت تبكي

منيره اللي صحت على صوت بكاها – شيخه يابنتي علامتس

شيخه وهي تبكي – راح راح ولدي راح

في هاللحظه انفتح الباب ,, ودخل صقر ووجهه مايبشر بخير ابد