رواية لأجل من احببت سأكون قوية الفصل العاشر 10 - بقلم امل

🎶 ❣

⠀ ⠀ ⠀⠀ ⠀ ⠀ ͟ ͟ ͟ ͟ ͟ ✩ ͟ ͟ ͟
شطالعه؟ من فدوه لله ام بيتي😻
فدوه للضحكات ياتربيتي😅
يالله فتره وتصبحين ام الجهال🙈
ويخبصوني روح يا بابا وتعال☝🏻️
وبوسه من امهم ترد عافيتي😍🙊
‪ ¸.••.¸¸.••() ••.¸¸.••.¸‬

كعدت سما ع صريخ نور

نور:ولج كومي شلون تكدرين تنامين واليوم حفلتج..والله لو انا بمكانج ما انام الليل كله

سما:اهووو بس شوي.. وخري عني
نور جرت البطانيه:كومي كبالي وهسة

سما كامت وهي تفرك عيونها:اوووف كمت كمت.. والله انتي ازعاج.. الله يعين الياخذج

نور: ويعين اخوي عليج..شكلج تكضينها نوم
سما باوعتلها ببرود ودخلت للحمام وهي ساكته

طلعت من الحمام ما لكت نور فنزلت للمطبخ تاكل

نور اجت تركض :ولج كومي مو وكت الاكل..همج بس ابطنج واربعه وعشرين ساعه تاكلين.. كومي ورانه شغل

سما:بسم الله الرحمن الرحيم.. توني باول لكمه.. وشبيج مستعجله بعد وقت خل اكل

نور:اووف منج شكد بارده.. دكومي خل نخلص من وقت.. والله لو نقصج شي جود يطير ركبتي..لان وصاني ميت وصيه علمود اطلعج ع سنكه عشره

سما(😏اي خايف ع مركزه الاجتماعي..خايف مني لا اخرب كلشي..هلكد انا بعينه صغيره وبالنسبه اله انا بنت فكر وما افهم شي)

<ليش دايما الواحد يشوف الجانب السلبي من الموضوع.. هسه سما انتبهت للجانب السلبي انوا يشوفها ما تفتهم وما يبيها تفشله..بس ما راحت للجانب الايجابي..بانوا امها مو يمها..وجان يريد يحسسها انوا اكو احد يمها..ما جان يريد تحس انها وحيده..وكان يريدها تطلع احلى وحده وما تحس بنقص وكان يبيها تفرح مثل باقي البنات..بس دائما الواحد يظن بالسوء..وما يباوع الايجابيات>

راحت حفت وشسورت وجود دز ع مصففه شعر تجي للبيت وتهتم بيها.. ولبست البدله والحذاء..بس المشكله انه الحذاء كعب عالي جدا.. وما كدرت تمشي بيه ورادت اطيح ع وجهها

سما: شنو هاي ليش ما جبتولي حذاء ناصي..هسه شلون امشي..جيبيلي غيره..اريد ناصي

نور: ماكو غيره سما.. وبعدين ترى قياسج صغير وحتى حذائي ما يكفيج ولا جان انطيتجياه

دخلت جوجو بهالوقت:كللللللللللوش.. ااااااه ما اصدددك خبلتي راح اتعرس ..كلللللوش

نور:هههههع هلا والله اخيرا حسيت اكو عرس بالموضوع.. مو مثل صديقتج عافسه وجهها ولا كانوا اليوم خطوبتها..

جوجو:شنو بكيفها..اليوم اكلبها الا طحين..كللللللوش.. ها وها وها وجيناك بهايه ها ها..واحنه الوفايا ها ها

سما:وجعا انشالله..امشي خل نكمل حوستنه ونحط مكياج ورانه ميت شغله بعدين ردحي ..ضمي ردحتج للحفله

جوجو: 😒مو صوجج صوج الفرحانلج..امشي كدامي بس

وراحوا يحطون مكياج

**عند ابو احمد

ابو احمد جان جاي يتحضر ويسوي الربطه مالت القاط
ابو احمد:اتصلي ع ولدج..ع الاقل خل يحضر عرس اخته وولد عمه ..عيب من الناس.. والله هالولد بس محسوب علينه ولد..لا نشوفه ولا يدخل البيت

ام احمد:شبيك ع الولد..خل يتونس بشبابه بعده صغير..وبعدين هوة كلك انه رايح يسافر وي اصدقائه ويريد يتونس شوي..يعني ما راح بدون اذن حتى تدردم عليه

ابو احمد:اي ع اساس يسافر اسبوع مو شهر..والله محد خربه غيرج..يديح ع راحته ويدري وراه ام ادافع عنه وتركعله

ام احمد:اوووف انزين كافي هسه اتصل عليه..بس شالفايده ما راح يلحك على الخطوبه

ابو احمد:ميخالف المهم يجي ويتعرف ع اخته الجديده
ام احمد بصوت واطي: محد ذابحك غير اخته

ابو احمد:كلتي شي

ام احمد:لا بس انته ليش زوجت جود من سما..لو لان بنت حبيبه القلب..ليش ما زوجت حنان من جود احسن

ابو احمد:عيب عليج يا مره اليوم خطوبتهم وانتي تدردمين وراهم..هاي قسمه ونصيب

ام احمد:(انا اعلمكم بسيطه..وهاي عكرب الرمل مسويه روحها مريضه حتى تتمسكن وتتكرب من محمد وتزوج بنتها لجود..لان تعرفه خوش ولد وينشد فيه الظهر وفلوس فكالت اكوش ع كل شي..بس انا الج يا فاطموه اعلمج)

***نروح عند جود
فراح للشركه من الصبح

سلطان:جود شسوي بالشغل اليوم خطوبتك لازم تروح تجهز

جود:لاحك لاحك خلنه نكمل الشغل اول
سلطان كتف ادينه:اسف بس ابو علي وصانه ان اليوم ماكو شغل الك..

جود:لعد لا تكوله..هسه شوي واطلع بس لازم اخلص جم شغله ونروح سوه للحلاق

خلص شغل وراح هوة وسلطان للحلاق ..وحدد لحيته وطلع اشرد😍

وراحوا للبيت يتعدلون للعرس
واستقبلهم حيدر:هلا والله باخوي الغالي..شطالع اليوم.. ولك طالع تموت..والله اذا دخلت يم النسوان هيج..كلها راح تموع عليك

جود ببرود:اوووف والله انته فاضي..امشي خل نخلص من هاليوم حتى اكدر ارجع اشتغل

حيدر:وانته كل همك شغل.. يا اخي اليوم خطوبتك شبيك
جود:انا طالع ابدل
وتركهم وصعد

حيدر:هذا من كل عقله يحجي
سلطان:ترى هوة فرحان..بس التعابير ما تبين ع وجهه هههههع

حيدر يتنهد:هوة ليش هيج .. انا تعبت منه..مشتهي مره وحده ينسى الماضي ويفرح من كلب

سلطان: صدكني راح يفرح..وراح تغيره مرته وراح اذكرك.. ترى ما يغير الرجال الا المره

حيدر:الله يسمع منك.. امشي خل نروح نساعده

وكل واحد راح يحضر نفسه الى ان اجه وكت الحفله

سما متورطه بالكعب وما تعرف تمشي بيه..متعوده دوم ع الناصي وكان جود ينتظرهم بالصاله لحتى ينزلون ويوصلهم

سما:يبووووي شلون راح امشي بيه راح انصمط
جوجو:امشي شوي شوي الى ان تتعودين

نور:ههههع شوفي مشيتها جنها مشيه البطريق فاتحه ادينها وبالكوه تمشي
سما:عمه بعينج بدال ما تضحكين عليه ساعديني..والله شكلي راح انصمط كبال الناس..وافشلتي

جوجو:يله كضيني وامشي
سما:لحظه نور انطيني نقالج اتصل ع امي شوي..اليوم كله ما حاجيتها وبالي مشغول عليها

نور:غالي والطلب رخيص
اتصل ع المستشفى وطلبت تكلم امها وفعلا حولوا الاتصال لامها..بس كانت امها توها طالعه من مرحله العلاج وكانت كلش تعبانه وكان ما بيها حيل حتى تحجي..بس تصنعت القوه وردت ع بنتها

سما بفرحه: يمه حبيبتي اشتقتلج ..
ام سما:هلا حبيبتي شلونج

سما: يمه محتاجتج تمنيتج وياي بهاليوم.. انا مو عارفه شسوي

ام سما: نور وجميلة وياج وما راح يتركوج..واي شي تحتاجينه راح يجيبونه واكيد جود ما راح يقصر (ام سما حست روحها ما تكدر تكمل لان راح يبين ع نبره صوتها التعب)

سما بحزن:بس انا اريدج ....
ام سما:لازم اروح الحين اجه ابوج (مالكت غير هالحجه حتى تسد الخط)

سما حست بخيبه امل وحست امها جاي تبعد عنها(يمه ليش مو فاهمتني..انا اريدج انتي يمي..مو اي احد ثاني..انا خايفه ومحتاجتج يمي..انا راح ادخل مرحله جديده بحياتي ومحتاجه نصايحج.. ما اريد ملابس ومكياج.. ليش مو راضيه تفهميني..ليش تغيرتي عليه)

بهالمرحله اكثر شي تحتاجه البنت وقفت امها وياها..حتى لو ما سوت شي..كافي وگفتها يمها تمدها بالقوه وتحس وراها احد..بهاللحظه سما حست روحها فعلا وحيده..لان هيه حياتها كلها وكل ما تملك بهالدنيا هي امها والباقي بالنسبه لها غربه.. وحست امها تخلت عنها

نور حست بهالشي وحبت تغير جو: امشي بس ..الله يعين اخوي شلون راح يتحمل كل هالجمال

سما تمسكت بيد نور وبدت تنزل الدرج:شنو قصدج

نور غمزت لها:بعد شنو قصدي ..اكيد فاهمتني.. انا خايفه يشوفج هالشكل اخاف يتهور

سما فهمت قصدها ووجها انكلب طماطه:ايا حماره..انجبي
التفتت وطاحت عينها ع عيون جود البنيه..وحست بكلبها طاح ابطنها
يما(يمه هذا شجابه هنا..ياااا فشلتي بس لا سمع حجينه..وايا ارض انشكي وبلعيني.. يبوووي شوف شلون يباوع اكيد سمع..راح اسوي نفسي كانوا ماكو شي وامشي)

جود كان متفاجئ من شكلها لان اول مره يشوفها بلبس حلو ومكياج..العاده ما تحط اي مكياج ولبسها خلوها سكته😑

جود:(معقول هاي سما..لا مستحيل..بس الصوت نفسه..معقول هيج المكياج يغير..لعد يا ويل حالك يا جود اذا راح تزوج هاي..هسه انا بس شفتها ونسيت روحي..لعد شلون بعدين لو انسد عليكم باب واحد..لعد راح تروح قراراتك مال البارحه وطي..بانك ما راح تنطيها وجه وما راح تحبها..والله الحين حالتي ينطبق عليها هالشعر

ﻤن چمـاﺄلـج گلـههاﺂ وگكفـتٺْ 🙊💜
وﺄنـي گـا۶ـد مـسَتريـﺣح ! 🎼💎
مو لآنﮧ مآ منتـَبھلـجچ ') 👄☝️🏻
ﻶن بـسَ اﭑوگـف اﺂطيـحح 🌸😻

شكلي انجنيت انا اخر عمري اكول شعر لبنت..لا ما كلتلها..المهم سوي روحك ما مهتم وانطم)

نور باوعتلهم وانتبهت لنظراتهم وابتسمت بشر

نور: يله خل اوصلج للقنفه حتى اروح اجيب غطى الج والبس عباتي هم

وراحت سما تمشي ع اساس تريد تكعد ع القنفه الي يم جود بس فجأة يوم صارت قرب جود حست نور تركتها وراحت تركض داخل وهيه اختل توازنها وطاحت ع جود وكعدت بحضنه وخشمها لزك بخشمه من كد الكرب وسما صار وجهه طماطه من الفشله اما جود صفن بملامحها ثواني واستغل الفرصه ماكو احد ونسه روحه واتقرب منها وباسها واتعمق بيها اما سما فانصدمت بالبدايه وبعدين استوعبت وحاولت تكوم بس كعبها وما ادرك ما الكعب.. هم خلاها تفقد التوازن وترجع اطيح بحظنه

جود بابتسامه جانبيه حلوه:شكلج حلالج الموضوع 😉 وما صدكتي..

سما تنرفزت ونزعت الكعب وكامت : انا لو انته الي ماصدكت..يعني انا فقدت التوازن بسبب الكعب وطحت..ما تعرف تكومني وانت ساكت..ترى عيب تستغل الفرص وتاخذ بوسه

جود:شدراني يجوز انتي طحتي متعمده علمود هالشي..ترى اعرف سوالف النسوان اذب روحها ع الرجال وتسوي روحها ما تدري.. وترى مو عيب اذا خذت بوسه..اعتقد هذا احد حقوقي.. ولازم تتعودين..خو انا ما مزوجج حتى اطالع لوجهج البهي😏

جود جان يحجي هيج بس بداخله صراع هل الجاي يسويه صح مو المفروض يتقربلها لعد ليش يحب ينرفزها

سما:😠لو تنط ما تحصل شي..انا ازوجتك علمود امي وبس فاهم..وانا اصلا ما احبك

جود:😏هسه يعني انا الاحبج..ترى مو مهم الحب بالموضوع..اصلا انا ما اؤمن بشي اسمه حب ولا ناوي احب فلا تعيشين دور الافلام واتانيني احبج.. وترى الزواج ميعتمد ع الحب هواي مزوجين ومرتاحين وبدون حب

سما(الحيوان الخسيس..بعدين انتي شمتوقعه من هالبارد اكيد ما راح يحب..اخخ شورطني بواحد مثله..اللهم صبرني عليه)
وشالت كعبها وراحت لنور

سما:ياااااحيوانه وينج..والله اليوم ما اهدج
نور:هههههههههع شبيج ردت اخلق جو حلو بينكم😉

سما وهي تحاول تضربها:اي جو اي بطيخ
نور وهي تتجنب ضرباتها:ولج ركدي..ع الاقل بس يوم خطوبتج صيري عاقله او تصنعي العقل

سما:انا اعلمج بعدين😤..الوضعيه محتاجه ككاو
نور:ولج ككاو هسه
يما:لان عصبتيني..انا من اعصب احط حرتي بالاكل

نور:اخخخ لا اجوعيني سكتي..اليوم كله ما اكلت عدل علمود الفستان يدخل عليه..لان بس اكل بطني تمشي كدامي واصير جني وحده حامل
سما:ههههع فديت جسمج يخبل احسن مني عصله..عالاقل انتي جسمج لا سمين ولا ضعيف حلو يعجبني
نور:الله يجبر بخاطرج فرحتيني يله امشي لا نتاخر

نور غطت سما ولبست عباتها وطلعوا للقاعه

وصلوا للقاعه واستقبلوا العروسه بالهلاهل ودخلوها للكوشه
واول ما خلصت نور زينتها راستا توجهت ل دي جي وشغلت اغنيتها المفضله وخذت جميلة وبدور وظلوا يركصون وذبوا لحم
سما تباوعلهم ومتحسره تريد تركص بخبال مثلهم بس تستحي لان اليوم خطوبتها ولازم تثكل
سما(شنو هاي ممل..منو كال العرس حلو..شو بس اظلين كاعده وساكته والناس تردح وتتونس وانتي اظلين تتحسرين..اففففف مدري ليش البنات متصركعين ع العرس..وشنو اذا لبست بدله ما جاي اشوف فيها وناسه)

اما جود فراح لجهه الرجال ودخل بهيبه والكل دخل يباركله
جود:هلا والله بسلطان..شخبار الشغل كون مشيته عدل
سلطان:استغفر الله هسه وكت شغل..انا بس اريد اعرف مخك شلون يشتغل
جود:تدري مخلي كلبي وي الشغل
ابو علي:يله لازم هسة تدخل للحريم

جود:يالله ساعدني
حيدر:انته طاب تلبس حلقه لو رايح تجاهد
جود:الله وكيلك الجهاد ارحم من اطب عد وكر الحريم
حيدر:ههههع مو لهدرجه
جود:لهدرجه ونص..نسوان ما تجي الا دوخه الراس منهم

حيدر:يصير ادخل بدالك اروح ادور فارسه احلامي اخخخخ مدري شوكت الكاها
سلطان:اسمع فارسه احلام مره وحده دكعد ولك

جود:يمعود منين اكو فارسه احلام مثل الخيال..همه هذول البنات الله وكيلك كله تصنع بتصنع والواقع مالهم غير عن اليضهرونه لك..كلهم جذابين

حيدر: رجاءا عقدك لا اطلعها عليه..خليني عايش بخيالي..شاب ومن حقي احط مواصفات للي اريدها
ابو جود:يالله يا رجال..الحريم يتانونك ياله لا تتاخر
جود:انشالله يبه هاي انا رايح

دخل جود وكل الانظار عليه واتوجه للكوشه وعيونه ع سما الي منزله راسها ومستحيه بعد الي صار وما تريد تحط عينها بعينه من شافها هيج راستا ابتسم لا اراديا

وطبعا كل دخله معرس لا تخلو من حجي البنات اذا مو حلو ينتقدونه واذا حلو يتغزلون بيه ليكول زوجهم

بنت١:شوفيه يجنن..فديته
بنت٢اروح فدوه للحيته..شوف شلون محددها..تذوب
بنت:اي والله صدگتي

حجيهم كان مسموع وسمعه وابتسم ابتسامه جانبيه سخريه من كلامهم وتفكيرهم المحدود بالمظاهر فقط.. ولعدم خجلهم وهم يتغزلون برجال غريب وما يعرفون شي اسمه مستحه

ام جود: يمه نور وين شبكه اخوج
نور:يمه اخر مره كانت عند حجيه ام علي.. وين هيه
ام جود تلفتت يمين وشمال:ما ادري يجوز بالغرف روحي شوفيها

جود كان كلساع يسرق النظرات ويباوعلها ويتصنع البرود..اما سما فكانت خايفه من الجاي..وزاد خوفها نظرات جود البارده الموجهه لها

نور لكت جدتها نايمه باحد الغرف من التعب

نور:هههههع يا حجيه يا ام علاوي..فديتج كومي
الجده:هاا شصار
نور:شمنومج هنا ..اكو واحد ينام وعدهم عرس..دشوفي الردح..امشي بيبي خل نركص جوبي انا وياج
الجده:ولج استحي..انا رجلي والكبر منين بيه حيل اكمز..كمزه وحده واموت

نور:ههههع لا اسم الله عليج بيبي بس شويه فدوه..انا وياج للذكرى..معقول بيبي اول حفيد الج يعرس وانتي ما تركصين
بيبي:يله بس شوي لخاطر جود
رادت تروح لصاله العرس بس نور وكفتها

نور:لحظه بيبي وين الشبكه
الجده:اي شبكه
نور:بيبي شبكه جود وين
الجده:هااا ما ادري نسيت
نور:خرررب حظي..شنو جتج حاله النسيان..اخخخ منج بيبي الناس جاي تنتظر

ام جود:نووور ولج يله تاخرنه..وين الشبكه
نور:يمه شوفي المصيبه بيبي نست وين حاطه الشبكه..شكول عليج يا بيبي

ام جود ضربتها:والله كله صوجج شعندج مخليته عندها
نور:يووو يمه اريد اركص شلون اكض الشبكه واكعد يعني..خليتها عدها ورحت شوي
ام جود:بلا حجي زايده ودوري اكيد هنا وين تروح يعني

دقايق ولكوا الشبكه وراحوا لجود وسما ولبسوا الحلقات والعقد وبدت تعلى الهلاهل وكامت الجده لخاطر جود تركص هيه وعصتها شوي وكعدت

نور:فديتك جود اخيراً اجه اليوم وشفتك معرس قبل لا اموت
جود:لا يا شيخه شكلج بايكه دور امي
نور:شسوي امي ما حجت فكلت خل احجيها..امي اليوم ذابتها صامت
ام جود ضربت نور:وجع انتي ما تسكتين وما تنطين مجال الواحد يحجي..لو تنطمين شوي جان حجينه

ام جود سلمت ع ولدها وواحد وره الثاني بده يسلم عليهم..ماعدا ام احمد مختفيه وحنان سلمت من وره خشمها ع اختها

نور:يله خل اشغلكم اغنيه رومانسيه وراح تركصون
سما:هاا منو يوكص
نور:انتوا..يله اخوي يحب الركص الكلاسيكي..ما يحب ركص المخابيل
سما:(يا ويلي ما اعرف اركص )
سما:نور عفيه ما لازم انا بالكوه واكفه فشلون اركص
نور:ما عليه اخوي راح يكضج ويساعدج بالركص

سما:(😰وهذا انا الي خايفه منه..معناتها راح اصير قريبه منه..يارب انا ليش كمت اخاف منه .. يمكن لان راح اصير تحت رحمته.. انا قبل ما احله ولسانه شطوله علي..فالحين شلون من صرت احل عليه..يارب انا شلون وافقت عليه)
وشغلوا موسيقى رومانسيه  وخفضوا الاضائه حتى يطبع جو رومانسي وكام جود وكض ايد سما وكومها ووكفوا بنص القاعه وايده تسللت لخصرها وقربها اله وبدوا يركصون وسما حاولت تجاري حركات بس ما عرفت لان اول مره تركص هيج جانت متعوده تركص ركص المخابيل وي جميله من تجيهم حاله الخبال والضوجه بس هيج ركص مال اودام ورمانسيه متعرفله ..
جود قرب اكثر منها وهمس باذنها :شبعتي رجلي دوس..اذا ما تعرفين تركصين مثل الاوادم فحطي رجلج ع رجلي وانا راح اتحرك واحركج وياي

وسما تقربت حطت رجلها ع رجله بدون ما تحجي شي وهوة بده يركص

سما ارتبكت من حست بانفاسه ع ركبتها وحست بكهربه بجسمها ضربتها من راسها الى رجولها

سما:(يمه احس راح اموت..تنفسي ولج تنفسي..شهيق زفير..شوكت تخلص هالركصه..احس راح يوكف كلبي قبل لا توكف هالموسيقى)

نور:جوجو شوفيهم يخبشون..يموتون احسهم طالعين من فلم
جوجو:اي بس سما ما تعرف تركص
نور:بس جود حلها😉
بدور:بس شوفو سما احسها متشنجه وكان راح يوكف قلبها

جوجو:حقها اول مره تصير بهالقرب من رجال..لو انا بمكانها جان مدري شصار بيه

الجده:ايه الله يرحم ايام زمان..جنه بس يلبسنه الحلقه ويجحتونه..وبعد ما يشوفها الا بالعرس
بدور:اي بيبي كلشي تغير هسة لازم ركص وصور وكعده..والا يصير بايخ العرس

جوجو:اكلج نور شوي وجحتي اخوج..ما اكدر اتحمل بيه ركصه وبالكوه كاضه روحي..ترى اذا ما طلع اتخبل واكوم اركص ومعلي باخوج

نور:ههع ركدي شوي هسه راح يخلص ركص

وكفت الموسيقى وسما تنفست الصعداء..بس مسكها من كتفها ورجعها لكرسيها

نور:يله كافي اطلع خل نردح شوي مو طمعت
جود سكت وباوعلها بنص عين وطلع بهدوء

وظل يركصون البنات الى وقت متاخر

نور:يمه رجولي بعد مابيه اتحرك
بدور كعدت يمها وانسدحت عليها:حتى انا ما بيه حيل احرك ولا عضله..شوفي جوجو ولا تعبت بنت اللذين

نور:خررررب حظها راكوصه اصليه
جوجو اجت يمهم:اكيد انتوا حشيتوني رجلي كامت تحكني
بدور:والله من التعب تحكج مو من حشنه..بس ارد اعرف امج متنسيه بركص
جوجو:لا بس احنه دوم نركص جوبي انا وهالخبله سما فما نتعب متعودين..اتحداكم هسه سما كاعده تحرك بروحها وهي تسمع هالاغاني الحماسيه وما تكدر تكوم تركص بخبال ..وتلكونها مو مستحيه ما تركص بس الكعب سامط جد جدها السابع عشر

نور:اي والله خطيه..انا مع اني تعبت بس من اسمع هالاغاني تجيني الركصه بالكوه
بدور:انا راح اكوم ما اكدر اقاوم هالاغنيه..جاو
جوجو:اخذيني وياج

نور:خرررب حظكم انا ما اكدر اكوم احس روحي انشليت..شنو هالقهر تعالو شيلوني وياكم ع الواهس كمزوا بيه

بدور:يمعوده والله بطرانه الواحد بالكوه شايل روحه..وركصي خل تضعفين..من هاللحم ما تكدرين تكومين

نور:اكلي تبن حماره..روحي ولي ركصي..انا راح اخابر جود يجي علمود الصور

خابرت جود وتوجه هوة وسما للتصوير وبده التصوير مع بعض اللقطات الجريئه

المصوره:استاذ جود هسة امسك ست سما من خصرها ولازم سما تنحني ليوره شوي وانته تبوسها ع ركبتها

سما:😳نعم؟؟ شنو هالقله ادب..لالا ما اريد هيج صور
نور:شبيج سما هاي الصور راح اظل ذكره فلا تفوتين عليج اي لقطه وترى مو عيب هالشي هسة هوة زوجج ومن حقه يسوي هالشي😈

سما بصوت متقطع ما تدري شتكول: اي بس انا.... يعني..ما يصير هيج كبالكم..
نور:الراي راي جود..شرايك يا اخوي..نسوي هاللقطه لو لا

جود بابتسامه جانبيه : انا ما عندي مانع

ما انتظرها تتكلم وسحبها من خصرها اله وتقرب لها وهي لا شعوريا رجعت ليوره خافت يبوسها فباسها ع ركبتها كما هو مقرر بالصوره ودكت الصور المصوره

وكانت سما متشنجه وحاسه بكلبها راح يوكف بس ما تكدر اسوي شي بسبب خوفها من جود اولا وبسبب وجود نور والمصوره ثانيا..

المصوره:وهسة قربها الك اكثر وبوسها

سما:لا عاد مصختيها كلش..سكتلج بالاولى بس هاي ما اقبل( انعل يومج من بنت منحرفه وما تستحي.. وبكل جرأه تكله بوسها..باسوج اربع حيايه ام اربع روس😤)

المصوره:استاذ جود..هيه هاي اللقطات الرائجه واذا ما عاجبتكم فليش جايبيني للتصوير كل المزوجين هيج يصورون فليش المدام معاجبها

سما:هيوو انا جاي احاجيج فليش توجهيله الحجي..انا كتلج ماكو يعني ماكو..وهسه لو لقطات منحرفه لو ماكو غيرهم..اكو هواي لقطات حلوه شمعنات هاي

المصوره:ما كلت رايك استاذ جود

جود اتقرب من سما وهمس باذانها: اول شي لازم اسوين كلشي تريده وماله داعي تحسسين نور والبقيه انوا احنه ما نحب بعض اوكي..حاولي تمثلين انوا كلشي بخير صار شكلنه كلش مو حلو..وثاني شي..مدام هالشي ما يعجبج فاكيد راح اسويه😏.. ومو انتي الي تقررين اسوين اللقطه او لا..انا بس الي اقرر وانتي تنفذين اوكي

سما: مو...
جود قاطعها وجذبها اله وباسها وهي كانت في حاله صدمه والمصور ابتسمت بنصر وبدت ادك الصور

وسووا اكثر من لقطه مع دردمه سما واعتراضاتها عليها بس جود اجبرها عليها بحجه انوا عناد فيها ومو هيه التقرر بس بقراره نفسه كان يريد هالشي ومستمتع بيه
وخلصوا اللقطات ورجعوا للبيت

نور:يله انا راح انام وانته جود اخذ خطيبتك واكعد وياها شوي😉

سما:بس انا تعبانه كلش اجليها غير وقت
ورادت سما تروح تصعد لغرفتها بس جود كض ايدها وسحبها وراه للغرفه
جود:انتي روحي نامي واحنه راح نكعد شوي وبعدين انام

دخلها للغرفه وسد الباب وذبها ع القنفه وعقد حاجبه بعصبيه
جود:انتي لهسة ما تعرفيني.. انا ما احب احد يعاندني من كتلج سوي روحج نحب بعض ولا تجادلين المصوره ليش طنشتي حجي وكملتي اصيحين عليها ..تتعمدين تكسرين كلامي لو شنو😡 ترى انتي المفروض عروس وخجلانه برايج حلو لسانج شطوله وتراديين وصوتج واصل لبره الغرفه..ترى اذا انتي ميهمج منظرج كبال الناس ترى انا يهمني

سما كانت خايفه من عصبيته ونظره عيونه وكانت تباوعله بخوف وهيه ساكته اول شي بسبب صوته العالي وثاني شي لان وحدهم

جود:ومو من حقج تقررين شي باي شي..اذا كلولج شي..كليلهم اخذ راي جود..والحركات هاي الي بالتصوير ما اريد اتعيدينها..ولسانج الطويل كصريه..لا اكصه ما احب الي لسانها طويل وصوتها عالي..هالمره راح اعديها لان ما تعرفين اسلوبي..بس مره ثانيه راح تشوفين شي ثاني

سما: لا والله مو بكيفك..انته ما مزوج حايط حتى اسكت وانته تقرر بس اوكي..وشتريد تسوي سوي..بس مره ثانيه ما راح اسكتلك..هالمره سكتت لان ما ردت افشلك كبال الكل..( وقلدته) بس مره ثانيه اذا انعادت راح تشوف😏

جود عصب لان كلشي ولا واحد يتحداه ويعانده..لان يركبونه ميت جني بس احد يعانده ويتحول من طيب الى قاسي

تقدم بسرعه والشراره يطاير من عيونه ولوه ايدها

سما:اخخخخ راح تكسر ايدي يحمار
جود زاد الضغط ع ايدها وكض فجها بقوه بايده الثانيه: منو حمار هاااااا..اذا ما ربيتج من جده وجديد واعلمج منو تحاجينه هيج
سما وهي تحاول تدفعه عنها :انا مربايه واحسن منك يا حمار يا غبي.وخررر عني
ترك ايدها وضربها كف طيحها ع القنفه
جود:الايام بينه يا سما وراح اعلمج منو جود
وتركها وطلع

بس شافته طلع طاحت دموعها الظامتها بسبب كبريائها.. وراحت بدون وعي وحاولت تتصل ع امها بالمستشفى لان محتاجه حنيتها..محتاجه حنانها بس امها رفضت ترد ع اتصالها بسبب حالتها السيئه..وهذا خله حزنها يزيد انوا امها ما تريدها
سما كومت روحها ع القنفه وهي تبجي( يمه وينج انا خايفه.. اترجاج ردي..احتاجج جنبي😭😭..ليش هيج يمه تبعديني عنج..ليششش..الكاها منج لو من جود..الي خرب ايام لازم تكون احلى ايام حياتي..بس شكلها راح تصير اتعس ايام حياتي..يمه اريدج يمي وتنصحيني وتكوليلي شسوي)

وظلت تبجي وتشاهگ بصوت واطي حتى لحد يسمعها..الى ان حست بروحها مكانها غلط..فسحبت روحها وراحت لغرفتها
.
.
.
.
طولته لخاطر عيونكم بسبب التاخير..بس عاد هم انتوا عوضوني واليقره يسوي فوت وكومنت ترى مو صعبه..علمود يصير عندي واهس للكتابه..من اشوف المشاهده هواي والفوت شوي احس انها مو حلوه القصه ويطير واهسي😓