رواية لأجل من احببت سأكون قوية الفصل العشرون 20 - بقلم امل

صار سنين #احسج كاعده#بكلبي😍!
غازلتج #غزل شيطان☺️
#وانــي انسان متربــي...😓

~~~~~❤️~❤️~❤️~❤️~~~~~~

بغرفه عزيز المحبوس بيها جان كاعد بهدوء ومن داخله يغلي
دخل ابراهيم عليه بهدوء
عزيز بتفاجأ:ابراهيم!! شلون دخلت ما معقوله ابوي سمحلك
ابراهيم:لا الحارس الحاطينه صديقي وقنعته بكلمتين ووعدته ما اتاخر عندك

عزيز:انزين سويت الكتلك عليه
ابراهيم:اي تكربت لعلاوي وخذت رقم صديقه حنان شسمها اعتقد سوسو..وقنعتها تروح تاخذ رقم سما بدون محد يدري

عزيز:عفيه عليك..انطيني تلفون ورقمها
ابراهيم:هاك هذا تلفوني الاضافي ما احتاجه
عزيز بضحكه جانبيه خبيثه:😏 اريدك بعد اسويلي شغله بس اريد كلبك قوي ولتخاف كلشي بفلوسه

ابراهيم:افااا عليك انا كدها
عزيز:*********
****

حنان تسحبت لبره القاعه حتى تكلم علاوي وطلعت بدون غطه
حنان:الووو علاوي وين جنت..صارلي يومين ادك عليك وماكو..قلقت عليك
علاوي:ع اساس يهمج امري
حنان:شنو بعدك زعلان
علاوي:شنو تضنين يعني
حنان:اسفه الله يخليك لا تزعل

علاوي:انزين ارد اشوفج
حنان:علاوي هسه مو وقتها ..اليوم عرس جود ولاهين..بعدين نتناقش(ظلت تمشي وهي تكلمه الى ان ابتعدت عن القاعه وهي مو حاسه)
علاوي:جاي للعرس هسه وراح اشوفج
حنان:😰انته مخبل..يشوفوني اهلي يا خبل
علاوي:ميهمني..اهم شي اشوفج حتى لو يذبحوني
حنان:لا حباب ..والله اطيح بورطه
علاوي:لا تخافين اشوفج من بعيد بس..يله باي جاي(سد التلفون)
حنان:لحظه ولك..خرررب بس لا يجي..والله شكلي راح اروح بيها

******

وصل جود وسلطان للقاعه ودخل جود بهيبته لجهه الرجال والكل كام يسلم عليه ويباركله وراح للحجي ابو علي وباس راسه وكعد يمه
ابو علي:ليش تاخرت ياوليدي
جود:اسف  يبه بس ازدحام والحريم جرجره
ابو علي:يله اهم شي وصلتوا..اخيرا شفتك معرس تصدك جنت خايف اموت قبل لا اشوفك معرس واشوف ذريتك
جود:طولت العمر لك يبه..انشالله تشوف جهالنه وتعرسهم بعد
الجد:لا شالقصه اخذ عمري وعمر غيري..كافي اني شفتك معرس..هذا يكفيني
سلطان:بعدك شاب يا حجي..اصلا يرادلك مره..وزواجك عليه بس اشر ع المره
ابو علي:انته زوج نفسك وبعدين احجي
سلطان:ما ازوج الا اذا تزوجت..فزوج حتى ازوج
جود:هههع اسكت لا تطلعلك الحجيه بالعوجيه..اذا كتلها ما ترحمك
سلطان:لا كلشي ولا ام علي..اصلا هيه نور البيت..مو عيب جود تحاول ازوج جدك وعنده وحده سنعه مثل ام علي..لو يلف العالم ما يلكه مثلها اثنين
جود:😒كلبتها عليه
الجد:يله سلطان ازوج انته هم كبرت..الي بعمرك عندهم اولاد طولهم
سلطان:شيبتنه يا حجي..بعدني شباب..بعد وكت ع الزواج
دخل حيدر وسلم عليهم:سمعت فيها زواج..شرايك يا جدي ازوجني انا بعد

الجد:انته اشتغل وبعدين احجي
حيدر:الي الله😢..الا اكول شهالهدوء ارد ادبج..ليش مو مشغلين الدي جي..ووين الفرقه ليش تاخرت
سلطان:منتظرينك..ما تحله الهوسه بدونك..عاد هذا زواج الغالي..نكضيها ردح للصبح
جود:حيدر البنات اجو
حيدر:اي اعتقد لان طلعوا قبلي
جود:وين نقالي..بس لا نسيته بالسياره..سلطان روح جيبه ظل بسيارتك
سلطان:امري لله مره مشغلني سواك مره مطراش..حتى نسيت شنو وضيفتي بس يلا عريس وتدلل
جود:بعد هذا الصديق دومه مكروف
سلطان:😒والله بس انا مكروف..مشتهيه اكرفك مره
جود:انشالله اكرفلك بعرسك
سلطان:لعد راح انتظر هواي
جود :ولك استعجل وجيبه..اخاف ايدكون الحريم
سلطان:رايح لا تجحت

******

دخلت سما والبنات للقاعه وبدت الهلاهل والهوسات
ام جود:كلللللوش طبت يالزهره تلكيها

نور:يمه لحظه لحظه لا تسوون هوسات بس خلوني بالاول انزع الغطا واتعدل واجي..ما ارد تفوتني ولا هوسه
جميلة:اكول ولي احنه نريد نردح ..وانتي خلصي وكملي ويانه
نور:لا عيوني ماريد شي يفوتني..وترى انا اخت المعرس الوحيده فلازم انا اول الحاظرين بالهوسات
ام جود:بدال هالهذره جان خلصتي ..ولي بسرعه كطعتي الهوسات

جميلة:وهذا لعبنه لا تكول استهتار
نور وهيه بطريقها لغرفه التبديل:انتظرووووني

ام جود:هاي الرادها وهاي التمناها..بنت الشيخ لابن الشيخ جبناها
جميلة:كللللللوش
وكملوا هوسات الى ان وصلوها للكوشه
نور:كللللوش..يله كملوا شبيكم سكتوا
جميلة:خلصنه 😜
نور:😢حلفوا بس..معليه كملوا
جميلة:خلصوا الهوسات شنسويلج
نور:معليه عودوهم
جميلة:شنعيد..امشي بس نشغل دي جي احلى..امشي بلكي اضعفين من تردحين..سمنانه هالايام
نور:😰حلفي ..مبين حيل سمنانه..
جميلة:اي خصوصا بالبدله مبين السمن
نور:اووووف كرهتيني بالبدله وبنفسي..يعني حيل مبين
بدور:ههههع معليج منها..فديتج وفديت سمنج..جسمج حلو معليج فيها
جميلة:امشوا نردح شكد تحجون

******

راح سلطان وبطريقه لمح احد يمشي فاستغرب منو جاي بهالطريق وخصوصا انوا هالمكان مابيه احد فراح يشوف منو هناك وانصدم من شاف حنان وصنم مكانه ونسه كلشي وما حس بروحه شكد المده الي وكف بيها يباوعلها

سلطان غمض عينه وفتحها(انا جاي احلم لو هذا صدك ..هاي مو نفسها ام لسان الي بمحل التلفون..هاي شجابها هنا..بس يا سبحان الخالق شنو هالجمال شنو هالطول..حليانه بنت اللذين.)

***
حنان جانت تحاول تتصل ب علاوي بس ما يرد:(اوووووف هذا ليش ما يرد..بس لا يسويها ويجي..لا اكيد يشاقه ويريد يخوفني..يارب شسوي..احسن شي ارجع للقاعه لا يكتشفون اختفائي وشيفكني..لحظه انا وين جيت..خرررب بعدت عن القاعه وانا ما ادري.)

تلفتت حنان حواليها باستغراب شلون اجت هنا وهي مو حاسه وطاحت عيونها ع عيون سلطان وحست بكلبها وكف وارجولها انشلت وصنمت بمكانها وظل واحد يطالع بالثاني باندهاش وما حسوا بالوقت الي مضى وهم يباوعون لبعض

اخيرا حنان استوعبت الوضع وراحت تركض للقاعه

سلطان:لحظه..(بس حنان ما سمعته وظلت تركض)
سلطان:خررررب هم ما عرفت هي بنت منو.. اخخخخ والله اني اثول ضيعت الفرصه..شبيه ظليت مصنم كاني ما شايف بنات بحياتي(هوه الصدك ما شايف هيج )بس مو لهدرجه اوكف وانا فاك حلكي جني غبي اخخخ بدت تاثر عليه سنين التحديق بيه.. بس وربي حتى المزوج تكفره شهالبياض تلك لك هنوب لابستلي هاي جنها بدله نوم استغفر الله مو جني فصلت البنيه تفصل والله عيب شبيه جنت هيج اباوع شوي وتطلع عيني عليها هسه شتكول عليه

حنان دخلت يم الحريم وهي حاطه ايدها ع كلبها وتلهث من الركض (انا شسويت..شصخمني ووداني مناك ..والله فشله ..والله لو دره اخوي انوا احد شافني بهالبدله الا ينتفني..خرررب هنوب فتحه الظهر شكبرهاااااا..وين اودي وجهي 😰..يجوز ما انتبه لها..يا ما انتبه لها فتحه اكبر من راسي..حتى الاعمى يشوفها..كافي من التفت اركض اكيد بينت..اخخخ شكد ثوله جان لازم ارجع ليوره الى ان اوصل لجهه الحريم..ليش التفت.....)

قطع افكارها بدور
بدور:شبيج حنان..ليش هيج وجهج اصفر..صاير وياج شي
حنان:هااا ..لا ولا شي..بس تعبت شوي من هوسه العرس
بدور:اوكي روحي استراحي شوي لا تتمرضين..وجهج ما يبشر بخير
حنان:ايييي

*****

حيدر:محمد وين جنت الله يهداك.. يعني الا نصيحلك ياله تجي يمنه..انته واحد منه ما تحتاج عزيمه حتى تشاركنه الفرح
محمد:😅مشكور متقصر..بس انشغلت شوي جنت مشغول اخابر الوالده شوي مريضه
حيدر:سلامتها..انتوا ليش ما تجيبونها تعيش وياكم هنا
محمد:ناوين انشالله..بس علما نستقر ..لان البيت الكاعدين بيه يريدج الماجر وما لاكين..فما نريد نجيبها وتتعب ويانه
جود:هيه وين كاعده
محمد:ببيت جدي ..بعيد عنه بالسياره ٥ ساعات..واختي مهتمه بيها
جود:جيبها والشقه عليه..ما يصير تبعد عن امك كل هالمده وخصوصا هيه مريضه وتحتاجكم
محمد:مشكور استاذ جود بس ما اريد اكلف عليك
جود:لا كلفه ولا شي..هيه الشقه فاضيه ومو لازمتني..فاكعد بيها احسن من ما اظل فارغه
محمد:والايجار اخذه من معاشاتنه ما حاجه كلساع نجي ندفع
جود:انا ما انطيتكياها حتى اخذ ايجار..لو اريد فلوس جان اجرتها من زمان..بس ما مهتم بيها..فاكعد بيها وانته ساكت ولا تتكلم عن الايجار ترى احنه حسبه اهل ،عشرة عمر وياكم مو يوم لو يومين

محمد:بس....
حيدر:لا بس ولا شي..مدام اخوي كال شي فما يتراجع..فلا اتعب نفسك..وبعدين يا اخي انته ليش تحب شلعه الكلب والاجار..اعتبرها هديه واجتك من اخوي
محمد:مشكور..وراح اعتبره دين بركبتي طول عمري وما راح ارتاح الا لمن ارد دينك
جود:يا كثر ما تتشكر

دخل سلطان لجهه الرجال وكعد يم حيدر وهو صافن ومو حاس بحواليه وع وجهه ابتسامه
حيدر:والله انك بطران..هسه سلطان لو اجتك شقه ابلاش هم تصر انك تدفع فلوس..لو تاخذها وانت منطم
سلطان:اريد اتزوج بعد ما اكدر..طك كلبي..احححححح
حيدر:هااااا ..بيك شي..م
محمد:لا لا هاي الاعراض اعرفها..ابتسامه ثوله بدون سبب وصفنه وتنهيده..اكيد سالفه حب او اعجاب
جود:شنو ..سلطان يحب ما معقوله
حيدر:شنو طايح من عينك الرجال هم هوة عده كلب يحب
جود:بس شغير رايه مساعه يكول بعد وكت ع الزواج
محمد:لحظه يعني اكو وحده ابالك
سلطان بنفس البسمه الغبيه ويباوع كدامه كانه يشوف شي غير الشايفينه:اويلي عليها كارثه..خبلتني وراحت
جود:لا الولد خلصان

حيدر:سكتوا شوي خل نفهم..وانت خلك من هالصفنه والابتسامه الثوله وكولي منو هيه ..يعني بنت منو
سلطان:هيه لو اعرف هيه بنت منو جان كابلتك..جان رحت لامي تخطبها
جود:انزين شلون شفتها ووين؟
سلطان حط ايده ع خده وظل يذكر شكلها :😌 مثل الجنيه طلعت فجأه واختفت فجأة ..هسه لو تاركتلي حذاء مثل السندريلا هم بيها مجال..قصدي يعني دليل اعرف هيه منو

حيدر:انزين هيه حلوه
سلطان انتبه لروحه:وانته شكو..وخروا بس عني شبيكم ملتمين هيج
محمد:نريد نعرف كلشي
سلطان:مو شغلكم
جود:انزين وين تلفوني

سلطان:هاااا..اي تلفون..اي تذكرت تلفونك..نسيته 😅
جود:برافو عليك..بنيه طيرتلك عقلك مع الاسف عليك..رجال ومشورب وبس شفت بنيه سحت
سلطان:😒يعني ع اساس انته من تشوف زوجتك ما تسيح
جود:لا عيوني انا مو مثلك..ما نولدت المره الي اطير عقل جود
سلطان:اي الصفنات الي اطكها بالمكتب..تفكر بامي مثلا
جود:😒افكر بالشغل بس انته شفهمك لان عقلك مو وي الشغل..حيدر انطيني نقالك حتى اخابر نور..لو اظل ع الاخو راح انام هنا
حيدر:اوووف عسى ما الواحد بده يهوس الا كاطعتونه شالقصه..هاك النقال وخليه عندك
سلطان:رايح اجيبه
جود:😒دربالك لا اطكلك صفنه بالطريق وتنسه روحك

*******

جميلة:حنانوه غيري الاغنيه مليت منها..حطي دكني دكني
نور وهي تنزع الحذاء:وووويع وييييع ويييع ع هالذوق..شنو دكني دكني..شنو هالذوق المعفن
جميلة:والله انتي الي ذوقج معفن امداج..انا ارد دكني راح اغيرها
نور: غيريها علمود اكص ايدج
بدور:شبيكم هديتوا الركص وتتهاوشون
نور:كله من هاي الماعدها ذوق..تعاي انتي ليش ما تركصين وكاعده وي العجايز
بدور:ماريد اركص مالي خلك
نور:امداج انتي الثانيه..احنه ياله يصير عدنه عرس حتى نفرح وانتي مالج خلك
جميلة:وهسة شلون اريد دكني
نور :بدور خلي حذائي يمج تعبني بالركص..اريد اركص بحريه
جميلة:هوة انتي بحذائج ومتخبله شراح اسوين بدون حذاء
نور:معليج انتي

وراحت نور تركص هيه وجميلة وراحت بدور يم حنان الي كانت كاعده وكاضه النقال وخايفه من علاوي لا يسويها ويجي

بدور: حنان شبيج..كلساع مباوعة بالنقال..تنتظرين مكالمه انتي
حنان:شبية..مابيه شي
بدور:لعد ليش معزوله عن الكل..كلهم يركصون ومستانسين الا انتي
حنان:لا يتراوالج بس شوي تعبت وكعدت
بدور:اوكي ع راحتج

اجت ام جود:بدور وين نور..هذا حيدر يدك عليها..وديلها التلفون
بدور:انشالله خاله (اذا حيدوري داك شلون ما اوديه..فديته)

بدور:نوروه ..نونو ..صخااااام..ولج نوره
نور:هااااااا شكوووو
بدور:هاج اخوج يدك عليج

نور:اهووو شيريد...نعم شتريد مكاطعني..ما تدري ان الواحد مشغول بالركص هسة
جود:ههههع اسف اذا كاطعتج عن شغلج
نور:هلا والله بحبيب كلبي..انته ادك وقت ما تريدحتى لو مواعيدي مزدحمه
جود:لا ماريد اخذ من وقتج الثمين ..بس شوكت ندك صور
نور:دكيت عليك علمود هالشي وما رديت
جود:نقالي نسيته بالسياره..المهم شوي واجي

نور:اوكي انتظرك
سدت النقال
نور:اووووف بعدني ما شبعت ركص
بدور:صارلج ساعتين تركصين وما شبعتي..لعد شكد تردين
نور:حلاتها ردح للصبح..هذا عرس الغالي حرامات يخلص بسرعه

****

اتصل علاوي ع حنان
علاوي:تعالي بره القاعه انتظرج
حنان:انته مخبل..فدوه روح اهلي كلهم هنا لا تفضحني
علاوي:بس دقيقه واروح يله طلعي..ترى والله ادخل واسال اي واحد كبالي عنج واشوفج
حنان بخوف:ليش تسوي هيج..والله خايفه
علاوي:غير مشتاق اشوفج..يعني صارلنه شكثر نحجي وولامره ملتقين تصير هيج
حنان:اوكي بس دقيقه مو
علاوي:اي يلا

راحت حنان ولبست كابها وحجابها وتسحبت وطلعت ولمحت علاوي من بعيد واشرتله
حنان:علاوي تعال هنا..ياربي راح تفضحنه
علاوي:هلا والله..فديتج شكثر جنت احلم بشوفتج فديت هالجهرة كل هالجمال حارمتني منه..بس ليش لابسه غطه خليني اشوفج بدون غطه خل اتمتع بشوفه جمالج

حنان بعصبيه:علللي لا تتماده اوكي..شنو شايفني وحده صايعه
علاوي:شبيج هدي هسه انا شكلت
حنان:😡لا عيوني هالحجي ميفيد وياي..يا اما تحترم نفسك لو كل واحد بطريق..اذا جنت اظن اني مثل هالبنات الطايشات فانته غلطان..انا صح حجيت وياك بس هذا الشي مو معناتها اني راح اتماده وياك

رادت تمشي بس علاوي مسكها
علاوي:شبيج هدي..انا اسف مو قصدي وانتي لا تفهميني غلط ما كان قصدي شي(اهووو شكلها راح تبيع ثكل عليه وتصعب الامور..لازم اجاريها هسة لان شكلها عصبت وكافي اني شفتها راح امشي وياها شوي شوي الى ان تثق بيه ثقه عميه..بسيطه يا حنان راح اجيب راسج يعني راح اجيبه)
حنان:😠اترك ايدي واياني واياك تكضها مره ثانيه (تركها بسرعه ) وترى قصدك واضح ولا شنو تشوفني بدون غطه وانا ما احلك..
علاوي:واذا حبيبتي انا مو غريب انا راح اصير زوجج بالمستقبل
حنان:اي عود من تجي تخطب واصير زوجي يصير عندك حق تشوفني بدون غطه اما بدون زواج فلا تحلم

علاوي:اوكي ماشي مثل ما تردين اهم شي لزعلين
حنان:وهسة امشي طولت هواي
علاوي:بس حبيبتي ما شبعت منج
حنان بنرفزه:كتلك امشي
علاوي:ما راح اكدر امشي وانتي معصبه مني
حنان حاولت تهدي:ما معصبه
علاوي:اكيد
حنان:اكيد
علاوي :بس ما هاين عليه اتركج
سمعوا صوت خطوات وسيطر الخوف ع حنان
حنان:امشي امشي بسرعه 😰
بسرعه اختفه علاوي عن انظار حنان والتفتت تعرف مصدر الصوت واذا هوة سلطان..تفاجات من هالصدف الي دوم اذبه بطريقها

وسلطان مو اقل صدمه:انتي..شسوين هنا..ووي منو جنتي تحجين..وشعندج كلساع طالعه من القاعه
حنان بلعت ريقها وتملكها الخوف وسكتت لعده دقايق حتى تفكر شتكول بس ما لكت عذر لطلعتها: وانت شكو حتى تسال ..ترى انته مو ولي امري حتى تحاسبني..يجوز جنت احجي وي اخوي او ابوي بس انته ما دخلك

سلطان:اوكي بس لا تعصبين..بس ظنيت انج اشتكتيلي علمود هيج رجعتي ع نفس المكان

حنان انتبهت ع المكان نفسه الي مساع شافها وصار وجهها طماطه من اذكرت شافها بالبدله

سلطان:تصدكين طالعه تخبلين بالكوه عرفتج انج نفسها ام النقال..صايره جنج سندريلا الي اجتها جنيه وحولتها من خادمه الى اميره

حنان:هيووو مو عيب عليك تباوع ببنات الناس..لا وهنوب فوك عمات عينك بعد تتغزل..وبعدين شنو خدامه وصرت اميره..شقصدك يعني انا جان شكلي خدامه ..صدك انك وقح 😠

سلطان:لحظه ليش معصبه انظري للكاس المليان..عالاقل شبهتج باميره
حنان:لا تشبهني بشي محد طلب منك..ولفت تريد تروح

سلطان:لحظه بس كوليلي انتي بنت منو..جود يقربلج لو بس عرف

حنان(يمه طلع يعرف جود بس لا يكله شفتها هنا تحجي وي واحد او يكله شافتي بدون غطه..يمه لو وصلهم خبر يطيرون ركبتي)
حنان بخوف:😰لا ما اقربله شي
سلطان:لعد بنت منو انتي
حنان :مو شغلك
وراحت ركض
سلطان صاح:انزين شنو اسمج ع الاقل
وراحت جنان بدون مترد عليه

سلطان:هسه راح ينقص منج ايد اذا كلتي منو بنته اووووف..هسه شلون ازوج

*****

بدور اجت تركض يم جميلة وحنان
بدور:بنات بناااات
جميلة:شصاير
بدور:تعال شوفوا الولد جايبين فرقه وطلعوا وي جود من قاعتهم وجايين بجهه قاعه النسوان و طكطه ووناسه

نور:حلفي..الواطي حويدر..كتله خل نجيب فرقه النه كال المن تجيبون والدي جي موجود كلشي بيه
جوجو:امشوا خل نشوفهم اكو فتحه مثل الشباك تطل ع بره
نور:يله
وراحوا وشافوا دك وركص ..جود يمشي بالمقدمه وحيدر ومحمد لاعبين جوله ويركصون ع هالاغنيه الفوك👆🏻

نور بقهر:شوف النذذل جايب فرقه الهم شحلاتها طبول وطيران خيعونهم
بدور:اي والله الواحد لا اراديا من يسمع طكطكتهم يشتهي يركص

نور ما كدرت تقاوم وظلت تركص:رووووح شعررر شعرررر 💃💃💃💃 اويلي
بدور:ولج لا تفضحينه هسه وكت ركصج..لا ينتبهولنه
نور وهي مستمر:سكتي عني ما اكدر اتحكم بروحي..شدددد رووووح 💃💃💃
جميلة:والله ما يعطيني كلبي اخليج تركصين وحدج
وكابلتها وظلت تركص

بدور:والله انكم مخابيل
نور:انتي خليج بعقدج معليج بينه

اما بجهه الرجال فكان حيدر متحمس بالركص ومن كثر حماسه فقد توازنه ودعم بمحمد وخلاه يوكع بالطين والكل ظل يضحك ع شكله

محمد:ايا النذل اذا ما لغمطت وجهك ما اطلع انا وركض وره حيدر
حيدر مسك ايده:لالا والله ما اقصد وهذا راسك احبه
احمد:وشكو تحب راسه ..هوة الي لازم يحب راسك لانك ولي نعمته..فلا تكبر راسه
حيدر:سكت دهرا ونطق كفرا..صارلك اليوم كله ساكت ومكابل نقالك لو ظال ساكت مو احسن(حس حيدر بانزعاج محمد)لا تزعل..اعتبرني اخوك وامسحها بوجهي

محمد:لا مصار شي

نور شافت محمد من طاح وظلت تضحك عليه
جميلك:طبعا محمد خوش ولد ودمه خفيف احسه كيوت
بدور:اي والله ومؤدب
جميلة:نور ليش ساكته مو عادتج ما تعلقين ع شي نحجيه
نور:لا ولا شي بس ماحسيت اني لازم اعلق

***
محمد اخذ الطبل من احد رجال الفرقه وظل يطبل
حيدر:غني اغنيه محمد
محمد:شنو!!لا ما اعرف..اصلا ما حافظ اغنيه بهالمناسبه
حيدر:يلا اي شي لخاطر جود
محمد:اوكي بس مو تعايب عليه اذا مو حلوه ترى اذبحك.
حيدر:اوك
محمد:لحظه خل اذكر وحده

ظل محمد يفكر ورفع نظره صدفه وطاحت ع مكان نور وبدور وانتبه لنور
نور راستا ختلت هيه والبنات
نور:تعتقدون شافنه
بدور:لا ما اعتقد لان عندهم اضوه من عندنه فما ينشاف عدل
جميلة:صح يجوز وهو صدفه رفع عينه مو لانه شافنه

محمد:(هاي نور والبنات لو لا ..اي اكيد همه)
محمد بابتسامه جانبيه حلوه:عرفت شراح اغني

وظل يغني محمد بصوته العذب والكل تعجب انه عنده هالصوت الحلو واولهم نور

عندك حبيب منك قريب
بس انته ما تدري بحبه

ميت عليك حظنه باديك
ظمك ترى حسره بكلبه

لالا ببختك #حبيبي
ذنبي بركبتك #حبيبي

لك عيني حس دفهمني بس
حنـو علـي حتى الغربـه

كلشي مافاد افهمها عاد
كل يوم اجيك انا بحجه

الساعه بيش وما ادري ايش
عاد اليحبك تحرجه

كلي دخيلك #حبيبي
بيا حيله اجيلك #حبيبي

فدوه افتهم لا هسه الم
الكل واسويها فرجه

كافي صدك مالي خلك
لهنا وبعد خلص صبري

بس راح اموت كلما تفوت
كلبي يوكع من صدري

متعذب انا #حبيبي
سير بمكاني #حبيبي

اي انا نار اسهر واغار
وبين اديك وما تدري

<ترى الاغنيه حماسيه وحلوه بس ما حطيتها لان هاي الفوك 👆🏻عجبتني هم واحترت ياهي احط>

خلص الاغنيه وكان الجو هادئ والكل تباوعله وفجاءة بده التصفير
حيدر:ولكككك وين جنت ظام هالصوت والله غنيت هالاغنيه احلى من المغني نفسه..والله لو يسمعك المغني يعتزل الصوت
جود:اي والله انعجبت بهالاغنيه من وره صوتك عاش لسانك
محمد مرر ايده بشعره باحراج:لا مو لهدرجه ..صوتي عادي(عاد اتمنى توصل معنى هالكلمات لنور..مع اني اشك انها توصل لانها شوي عدها تحجر بفهم المواضيع)
سلطان:الا صوتك يخبل..اذا ازوجت محد راح يغني بعرسي غيرك
حيدر:ورطت الرجال بسرعه
جود:انته وين جنت حظره جنابك
سلطان:اخخخخخ اسكت راح اخبل
حيدر:انته مخبل من زمان وبلا حجي زايد وخلي جود يروح يم الحريم..يلا ياخوي روح

جميله:وووواي صوته يجنن..حبيته..خلاص حجزته الي
نور:وانتي بكيفج اتحجزين..شنو الرجال ماله راي ..بعد ما ناقص الا تخطبينه
بدور:بسرعه راح يدخل جود..ما وديتي سما يم التصوير
نور:امي راح توديها بس امشي بسرعه نروح يمها قبل لا يشوفنه جود هنا ويصلخنه

عند سما توها كومتها ام جود وهيه مكسره من الكعده

سما:يبوووي تكسرت..هاي اخر مره اعرس
نور اجت بسرعه ووراها بدور وجميلة
نور:لا اترجاج عرسي مره ثانيه..عيوني انتي ادبستي بهالعرس بعد ماكو غيره
سما:حظره جنابكم وين جنتوا.. جنه نتانيكم..لمن ملينه وكلنه نروح
بدور:هااا لا بس تعبنه من الركص وكلنه نكعد شوي نرتاح
سما بعدم تصديق ونظرات شك:اهااا
جميلة:يله امشوا يم المصوره حتى ندك جم صوره لوحدج قبل لا يوصل جود
سما:يله امشوا

دخلوا للمصوره وتفاجات نور انها نفسها المصوره الي بخطوبتها
سما:هاي شسوي هنا
المصوره بابتسامه:اهلين ست سما..جبتلج هالمره لقطات تخبل واتمنى تتفاعلين وياي مو مثل هذيج المره شلعتي كلبي..والكل يطلع اريد بس المعرس والعروس
وتركوا سما وطلعوا
سما:والله اذا لقطات محترمه فعادي اما اذا لقطات مدري شلون صايره وبيها بوس ومدري شنو فاسمحيلي راح اشلع كلبج هواي

دخل جود بس التزم السكوت وظل يستمع لحجيهم واقترب منها وهيه معطيته ظهرها
المصوره:والله انتوا اغرب مزوجين شفتهم بحياتي.. هواي صورت لمزوجين بس عادي يتقبلون هيج لقطات واكو بالعكس همه يطلبونها ويردون بعد ازيد
سما:لا عيوني ما تمشي عندي...
سكتت يوم شمت عطره(هذا عطره اي عطره..فديت شكد احب هالعطر اول شي راح اسوي عكب الزواج اني اخمط هالعطر..اي بعد لازم استفيد من هالزواج المؤقت بشي)

التفتت حتى تشوف جود اذا وصل وتفاجأت من شافته قريب حيل وحست بكلبها راد يوكف(صارلي يومين ما شفتك.حسيتها دهور..وهالكلب ظل يدك مره ثانيه كانه اول مره يشوفك..(هزت راسها بخفيف كانها تبعد هالافكار عنها) شبيج تخبلتي لا تفكرين بهيج اشياء انتي ما راح تحبينه لان هوة مو الج..تدرين ان عزيز ما راح يخليج تعيشين بسلام وياه فاحسلي ابعد عنه)

صحت من افكارها وشرودها وصحت جود وياها الي كان منبهر بشكلها صحيح هوة اختار البدله بس ما كان يعتقد راح تطلع عليها هلكد حلوه

سما:بسم الله انته ما تعرف تتحمحم قبل لا اطب ..وليش  لازك بيه هيج
جود تجاهل كلامها:طالعه حلوه
سما صار وجهها احمر وردت بكبرياء حتى تضيع خجلها:اصلا انا دوم حلوه وهسة زاد حلاي
جود:طبعا بفضل البدله الي جبتها انا
سما:😒لا عيوني انا زدت البدله حلات
جود:😏وتكولين عني مغرور؟ والله الغرور كله عندج

سما:لا عيوني هاي مو غرور هاي ثقه بالنفس
جود:😏حلفي بس..الا غرور..لان محد يمدح بنفسه الا المغرور
المصوره دكتلهم صوره وهمه قراب وكانت سما رافع حاجب وحاطه ايدها ع خصرهاوهوة مبتسم ومتكتف وكانت اللقطه حلوه
سما:انتي ليش ادكين
المصوره:عجبتني اللقطه ويله امشي نصور انته جود اكعد ع ركبك ورجع راسك ليوره وانتي سما دنكي عليه جنج تردين تبوسينه
سما:انا بس بعرف انا مو كلت بالخطوبه بعد مستحيل اصور وي هاي ليش جبتوها

جود بابتسامه:انا اصريت اجيبها لان صراحه حبيتها وتعجبني لقطاتها
المصوره بخجل:مشكور استاذ
سما بنرفزه:وتبتسم بعد وفخور بنفسك وانت تتغزل بيها شرايك بعد ادك صور وياها
جود:انا قصدي ع الصور حبيتها..انتي وين راح تفكيرج
سما:😒ولا مكان
جود كعد وسوه مثل اللقطه:يله انكسرت ركبتي فضيها

وهيه قربت منه مثل هالصوره👇🏻

دكت الصوره وطلبت منها تقربله اكثر وقربتله
المصوره:بعد اكثر شبيج مستحيه
سما:مو قربت بعد شكد

ودكوا جم صوره وسما شلعت كلبهم
المصوره:هاي اخر صوره ددكيها وفضينه شلعتي كلبي..سما انتي غمضي عيونج..وانته جود قربلها وحط ايدك جوه حنجها وقرب وجهك من وجهها وغمض عيونك
مثل هاللقطه👇🏻

سما كانت كاعده ع اعصابها لان وترها قربهم وانفاسهم صارت مختلطه وحست ان الوقت وكف

المصوره:لا سما رجعي راسج شوي ليوره
سما من بين اسنانها:راح اذبحها بعد ما اتحمل..دخلصينه..صارلنه ساعه متصنمين
جود مسك ضحكته : ليش خليها ع راحتها..عاجبني الوضع
سما ناظرته بعصبيه وسكتت
واخيرا وكفوا مثل ما تريد ودكوا الصوره..
المصوره كانت عينها بالكامره:اي هاي عدله

جود شاف المصوره لاهيه وخذه بوسه ع السريع قبل لا توخر سما:هاي غرامه لان صارلي يومين ما شفتج بسببج

سما صنمت بالبدايه بس من شافت اثر حمره خفيفه طبعت ع شفايفه ما كدرت تكض روحها وطكتها ضحكه وجود استغرب توقعها تعصب او تستحي بس كلش ما توقعها تضحك
جود:شبيج
سما:هههههع شوف وجهك بالجامه طالع كيوت..الله لو تطلع هيج يم الرجال الا ينصبون عليك
جود راح شاف روحه بالجامه ومسحها بسرعه وتنرفز منها ليش تضحك عليه
جود:ترى ماكو شي يضحك
سما:ههههع صرت جوده مو جود ههههع..هاي غرامه تبوك بوسه من مره وهيه ما راضيه هههه
جود عصب زياده ومسك ايدها بقوه:لا تعصبيني احسلج خليني رايگ ومزاجي عدل ..فلا تعصبيني وتخليني اخرب العرس
سما بابتسامه منرفزه:خربه وهو المطلوب

جود غمض عيونه وحاول يهدي(هدي يا جود ولا تنولها مرادها):انا اعلمج بعدين بسيطه

طلعت المصوره وطلعوا وراها واستقبلتهم نور
نور:يله ياخوي هسة لازم نكعدكم شوي يم الحريم
جود:اوووووف هسه يعني ضروري نكعد يم الحريم..ما جاي اشوف لها داعي
نور:لا لها داعي بعد هاي الاصول المعرس يزفونه ويجيبونه للحريم طول عمرنه هيج
سما:والله حتى انا صراحه ما جاي اشوف لها داعي
نور:اي حقكم مستعجلين ع الروحه😉
سما:جب يا حماره
نور:هسه شكلنه

دخلوا واستقبلتهم ام جود وام علي
ام جود:كلللوش هم عريس هم نشمي هم ربعه يزفونه
نور:اجه العريس والكذله تهفيله ..مدري شكالج وانتي غمزتيله
ام جود:والحاكم كال هذا العرس منين
نور:اليوم يومك يا بطل العب ع الجربايه كللللوش..

سما وجود واحد باوع للثاني باحراج
سما صار وجهها احمر(الله ياخذج يا نوروه ع هالهوسات..فشلتيني الله يفشلج)
جود مسح جبينه باحراج وتحمحم

نور تقربت ع جميلة:شبيهم كلهم يباوعولي هيج
جوجو:بله هاي هم هوسه احرجتي اخوج
نور:وشبيها عادي..وهاي مو من لسته الهوسات الي امس حظرناها
جوجو:اي نكولها يم سما حتى نحرجها مو يم اخوج وكبال النسوان
نور:يلا خل اكمل هوسات وياهم امي ما وكفت
نور:ام المعرس خوش كليجايه تدحرب حدر الجربايه
ام جود:ههههههع شنو شايفتني دبه حتى ادحرب
نور:يمه فوكاتها جاي امدحج.. حبها ولك حبها ولا تخاف من امها
سكتت يوم اذكرت ان امها ماتت
سما غرغرت عيونها يوم ذكرت امها وحاولت تكبت ادموعها(اخخخ يا يمه ياريتج هنا..وافضفلج بالي جاي يصير جان ساعدتيني ع الاقل وشرتي عليه شسوي)

نور:سوري ما قصدي
سما بابتسامه باهته:لا عادي ما صار شي

كملوا هوسات وطكطه
سما بهمس من بين اسنونها:اكلك انته جاي فاتحه لو عرس حتى جاي لابس اسود
جود:والله هذا لبسي وما راح اتغير واذا ما عجبج فانتي حره
سما:(والله حلو عليك الاسود تطلع بيه انيق ) مو سالفه ما عاجبني بس التغيير حلو
جود:وعلمود منو اتغير علمودج مثلا😏..
سما:بل هسه انا شكلت حتى كلبتها عليه..تغير علمود نفسك مو علمود احد..نفسيه انته ما تتحاجه
جود بنرفزه:صبري بعدين الا اعلمج شلون اضبين لسانج..بسيطه مابقه شي ونروح الفندق

سما بخوف:اكلك احنه بعدنه ع اتفاقنه مو
جود:اي اتفاق
سما:اتفاق انوا كل واحد بدار
جود:بس انا ما اتفقت ع شي وما وعدت بشي😌
سما بخوف:😰شنو !! لا اتفقنه فلا تتراجع ما....
اجت ام جود:يله هسة تكدرون ترحون

سما:لاااا ليش الكعده حلوه اصلا هنا ليش نروح..بعد وكت
نور:مساعه تلطمين من تكسيره الكعده وهم كلتي ماله داعي هالكعده كله
سما:انا كلت هيج ؟؟؟اصلا انا ما افتهم شي..اصلا الكعده ترد الروح
جود كض من ايدها وكومها:رايحين يعني رايحين فلا تسوين هالدراما

نزلوا من الكوشه وطلعوا بره القاعه والكل وراهم ويهلهلون
سما:اكلك انته تشاقه وياي مو..ما راح يصير شي مو..احنه اتفقنه مايصير شي
جود حب يلعب باعصابها:افكر 😌
سما وقفت:(اويلي شراح اسوي انا وعدت عزيز ما راح يصير شي وراح اطلك..والله لو يدري الا يذبح جود ويجوز يذبحني هم..ساعدني ياربي شراح اسوي)
راحوا الباقين ظلوا بس جود وسما ومصطفى بالسياره ينتظرهم حتى يوصلهم للسياره

جود:امشي شبيج
سما ناظرته بخوف وهيه تمشي وياه:اوعدني اول قبل لنوصل
جود عقد حواجبه:سما شبيج بس ارد افهم ليش رافضه يصير شي بينه
سما نزلت راسها:عندي اسبابي ولا تسالني شنو
جود وكف يم الكراج ورفع راسها:احنه هسه متزوجين ولازم ماكو اسرار بينه..بس (سمعوا صوت طلقه مكتومه وي صرخه جود) اخخخخخخخ
غمض عيونه بالم وحط ايده ع صدره وصار وجهه اصفر وثقلت انفاسه

سما تملكها الخوف:شبيك ؟؟شنو شصار ..فهمني شبيك
كضت ايده الي ع صدره وشافتها كلها دم وظلت ترجف من الخوف وهوة طاح عليها وهيه حظنته وبعدين كعد وسندته عليها<يعني ظهره متسند ع صدرها وهمه كاعدين وبعدين حطت راسه ع رجلها..اتمنى فهمتوا اللقطه)
سما:لاااا جووووود ..شنو هذا منين اجه.(حاولت تضغط ع الجرح) ما راح يصيرلك شي...ساعدووووني
وظلت دموعها تنزل لا اردايا:لااااا ما راح تموت
جود كض ايدها الي ع صدره والايد الثانيه مسح دمعها:لا تبجين..لاني من اشوف دموعج كلبي يتكطع من داخل..

اجه حيدر وسلطان والكل من سمعوا صوت سما
حيدر:جوووود شصار منو ضربه
سلطان:جووود جوووود تسمعني
جود وصوته بالكوه يطلع وعيونه بده تثكل:اناا...بخير..لا تتخافون
حيدر بده يبجي:سمااا كلميني منو السوه فيه هيج..سماااااا
سما وهي منصدمه:هااا ما ادري ماادري..احنه جنه واكفين وهوة طاح ما ادري شصار ما فهمت شي
سلطان فتح قميص جود:هاي اثر طلقه..بس ما سمعنه صوت..يجوز لان الصوت الاغاني عالي  بس هم جان سمعنه صوتها
حيدر: مو وكته راح ادك ع الاسعاف
سلطان:ماكو وقت شيله

*****

ابراهيم دك ع عزيز
ابراهيم:احسب جود مات..سويت مثل ماتريد ودفعت لقناص حتى يكتل جود وهسه العرس انخبص ويجوز راح يودونه للمستشفى ع امل يعيش
جود:روح وراهم للمستشفى ما اريده يظل عايش

ابراهيم:اوكي استاذ

*****

٠
٠
٠
انتهى البارت