رواية لأجل من احببت سأكون قوية الفصل الحادي والعشرون 21 - بقلم امل

نور اجت تركض ووراها الحريم كلهم من سمعوا الخبر
نور حضنته قبل ليوصله سلطان وحيدر:جوووود جوووود..(اجت حظنته)الله يخليك حاجيني ..انته مابيك شي مو ..حاجيني والله راح اموت وراك اذا صارلك شي
بس جود جان مغمه عليه وما يرد ع احد
سما وحالتها ما تقل عن نور:لا تفاولين ما راح يصير بيه شي هوة بخير
ام جود:يمه ولدي شصاير بيه
ابو جود والجد وابو احمد كلهم اجو
ابو جود وخر نور وكعد مكانه:ولدي شبيه..جود تسمعني جوود ابوي ايدك لتعوفني ..صح انا مو خوش ابو وولا مره كعدت وياك مثل كل اب وولا ساعدتك بطفولتك..بس صدكني احبك فلا تتركني ابوس راسك
الجد ودموعه بعيونه:دكافي الرجال تصفه دمه وانتوا ماخذين سره تنوحون عليه..يله سلطان وحيدر شيلوه بسرعه

وفعلا شالوه سلطان وحيدر

سلطان:مصطفى بسرعه انزل انا راح اسوق
صعد سلطان يسوق وحيدر كعد يم جود وابو جود من كدام
سلطان:حيدر ظل ضاغط ع جرحه حتى يوكف النزف
حيدر جان منهار ويبجي عمره ما اتخيل جود قدوته وبكل شموخه وكبريائه يصير بيه هيج ويشوفه بين الحياة والموت

سلطان بصوت عالي:حيييييدر ركز وياي شوي اضغط ع جرحه
حيدر اخيرا انتبه لسلطان وضغط ع الجرح
ابو جود كان يباوع ولده الي شاف وجهه صار اصفر ومايبشر بخير وماكدر يكض دموعه
سلطان:اهده عمي انشالله مابيه الا الخير..جود قوي واكيد ما راح يصيرله شي

ابو جود:بس لو اعرف منو الي سوه بيه هيج وليش..منو هذاا الحاقد ع ابني
سلطان:انشالله الشرطه راح تعرف كلشي بس خل يكوم جود بالسلامه وراح نحاسب الي سوه بيه هيج

*****

ابو علي:احمد اخذ امك وخواتك للبيت
بدور:بس نريد نروح وياكم نريد نطمن ع جود
ابو علي:شنو كلكم تروحون وتسدون المستشفى..لا روحوا انتوا واحنه انطمنكم
ام احمد:مثل ماتريد..يله  احمد خلينه نمشي
ابو علي:وانتي سما روحي وياهم
سما وهي تشهك من البجي:لا ارد اروح اشوفه..ارد اروح وياكم
ابو علي:شيوديج يبنيتي انتي وبدلتج روحي بدلي وتعاي
سما:ما اتحرك من هنا الا اروح للمستشفى..من اطمن عليه بخير ياله اروح ابدل
ابو علي:يا بنتي انا ما كتلج لا تجين بس بدلي هدومج وتعاي
سما:لا بس ولاشي انا رايحه يعني رايحه
ام جود:سما لا اطولينها نريد نروح ..تعاي ويانه نذبج ع الفندق وتبدلين ونروح للمستشفى
ابو علي:سوي مثل ما تكولج عمتج وبلا نقاش ..امشي يا ابو احمد وصلني
ابو احمد:اوكي يله
ام جود:يله يا محمد استعجل شوي

وراحوا نور وسما وام جود وي محمد ووصلوها للفندق ونزلت بسرعه ودخلت للجناح وتفاجات بالشموع والورد مسويه طريق لغررفه النوم دخلت للغرفه ولكت السرير متروس ورود وداير مداير السرير شموع

سما نزلت دمعتها:شفايده كل هذا وانته ما موجود (لازم استعجل حتى اطمن عليه)
مسحت دمعتها وراحت بسرعه طلعت جنطتها وطلعتلها لبس وطبعا ما وكفت عن البجي ولا عن التفكير يعيش ولا لا
دك تلفونها وطلعها من دوامه البجي والافكار
سما:(رقم غريب منو هذا..اخاف جدو او عمي داكين من المستشفى)
سما:الووو
عزيز:هلا بهالصوت ..توها ردتلي روحي من سمعته
سما بتعجب:عزيززز..شلون عرفت رقمي
عزيز:تدرين ماكو شي يصعب عليه..بس ليش صوتج جنج تبجين..ليكون جود مات ..جنت اظن بعده بالمستشفى
سما:انته شعرفك هوة توه انصاب..ليكون انته
عزيز:عفيه عليج انا..انتي ما التزمتي بوعدج ولازم ادفعين الثمن..انا مو ولد صغير كبالج حتى تاخذيني ع كد عقلي وتكليلي راح اطلك وبعدين تتزوجينه😠.

سما:ايا واطي انا وعدتك راح اطلك فليش تكتله يا غبي..الله ياخذك الله ياخذك..راح ادفعك الثمن غالي وشوف
عزيز:شسوين يعني
سما:راح اشتكي للشرطه وراح اكللهم ع كلشي وراح اعلم الكل
عزيز:تؤتؤ ما ضنيتج غبيه وما تتعلمين من الماضي..شنو نسيتي قبل شصار من شكيتيني للشرطه..طلعت مثل الشعره من العجين ..وترى انا مجهز روحي..وجوازي يدل اني مسافر ماليزيه وما راح ارجع الا بعد يومين..واذا تردين تكولين لجود فكولي..بالعكس راح تساعديني بكتله..لانه من العصبيه راح يهجم عليه وبهالحال راح املك عذر بكتله لاني جنت ادافع عن نفسي ..هههههههع شرايج بيه هههههه

سما:ايا النذل اذا مسيت شعره منه راح اكتلك
عزيز:هذا اذا طلع من المستشفى عايش هههههههع
سما شمرت النقال وظلت تصرخ وتبجي بهستيريه:الله ياخذك ..الله ينتقم منك ..ياربي ساعدني تعبت ..ما اكدر اتحمل..يارب ساعدني..لو صار شي بجود شي ما راح اسامح نفسي..انا السبب بكلشي انا الجبتله هالبلوه

نور بالسياره وي امها
نور ودموعها ما راضيه توكف:يمه تاخرت انا ما اكدر اتحمل ارد اشوف جود
ام جود وحالتها مو احسن من بنتها:هسه تنزل ونروح صبري
نور بصوت عالي:ما اكدر اصبر بله صار بجود شي وانا بعيده عنه..انا ارد اكون يمه
ام جود:انشالله مايصير بيه شي..انتي بس ادعيله

محمد:لا تفاولين عليه جود قوي وما راح تهزه رصاصه
نور:لا انته ما شفته الرصاصه اجت بصدره بله اجت بكلبه ما اكدر استحمل..اخخخخ يا جود حتى ما تهنيت بعرسك
محمد بعصبيه:ويجوز مو يم كلبه انتي بس لا تفاولين ولا تكولين كلام ماله معنى ترى محد مستحمل والكل كاعد ع اعصابه وخايف..عالاقل قدري حاله امج الي يمج

نور حطت ايدينها ع وجهها وظلت تبجي وتنحب :ما اكدر استحمل راح انزل اشوفها

نور دخلت وشافت سما مكوره نفسها بزاويه وحاضنه رجولها وتبجي وتهمس انا السبب
نور راحت بسرعه حظنت سما:سما حبيبتي شبيج
سما من شافت نور انهارت بالزايد وزاد بجيها:انا السبب انا السبب..شلون اسامح نفسي
نور ما فهمت شتقصد وما رادت تسالها لان ما رادت تطول ع اخوها:سما حبيبتي هسه مو وكت الانهيار كومي بدلي خل نروح لجود الله يخليج استعجلي

حاولت سما تلزم روحها وكامت بدلت ونزلت الهم

*****

ابو علي وصل للمستشفى:هااا بشروا انشالله بخير
سلطان:ما ندري ياحجي لهسة ما طلع احد من غرفه العمليات
ابو احمد:يارب سترك
راح ابو احمد وكعد يم اخوه ابو جود الي كان منهار
ابو احمد:راح يعيش لا تخاف
ابو جود:تصدك اول مره اندم ع سفرياتي ولاني ما انطيته من وقتي..اخاف يصير بيه شي ويموت وهوة ما مسامحني ع اني تركته بطفولته..يارب حط من عمري ع عمره بس خل يعيش ويسامحني..انا ولا مره طلبت منه يسامحني لاني كنت خايف ما يسامحني ولاني ماريد افتح جروحه لاني احسه نسه الموضوع مدري تناساه

ابو احمد حط ايده ع ايد ابو جود::ما ادري اذا نسه الموضوع او لا بس الاكيد انه سامحك..جود كلبه طيب وما يشيل بكلبه
ابو جود:ما اظن لان طفولته ماتنسي وهوة انجرح حيل
ابو علي:سدوا هالموضوع..جم مره كتلكم هالموضوع تنسونه ولا جنه صار..هذا ماضي وراح شذكرك بيه؟
ابو اجود:ما ادري بس من شفته بهالحاله ظليت افكر انا شسويتله من الطفوله لهسه..بس ما اذكر مره سويتله شي زين..ما اذكر مره حظنته او مدحته ع شي سواه ولعبت بشعره وشجعته..حتى التربيه مو انا ربيته..انته الي ربيته
ابو علي:راح يكوم بالسلامه وسويله كل الي تبيه(لمح البنات جايين)سدوا الموضوع ولا تحجون كبالهم شي

نور:هااا طلعوه..هوه بخير
الجد:لا ماطلعوا بعدهم .كعدوا علما يطلعون

نور كعدت يم حيدر وهي تبجي ومو كادره تمسك روحها..وحيدر كان ساكت وما تكلم ولا حرف..وكان يناظر ايدينه المتروسه بدم جود
حيدر:راح يموت
سما:جب لا تحجي هيج
حيدر وهوة يطالع ايده وما رفعها وكان هادئ كانه بحاله صدمه:ما شفتيه بالسياره من وصلنه للمستشفى وردنه انزله..كان بالكوه يجر النفس

نور وهي تهزه وتصرخ:اسكت ولك اسسسسكت راح يعيش
حيدر وبعده بصدمه:راح يموت راح يموت

سلطان تقدم يم حيدر وضربه كف وحط ايدينه ع جتوفه وهزه:اصحى ع نفسك..وشوف شجاي تحجي..انته واعي للجاي تكوله

حيدر نزلت دموعه اخيرا وحضن سلطان: بله ما عاش
سلطان الي كان يكابر وما يريد دموعه تنزل لان الكل منهار وما ناقصهم واحد ينهار وياهم:انجب هسه يطلع الدكتور ويطمنه فلا تستبق الاحداث

ابو علي الي كان واكف كعد بتعب
ابو احمد:يبه بيك شي
ابوعلي وهوة يبلع ريكه بتعب:لا بيه شي اطمن
سلطان:راح اجيبلك ماي ..اكيد تعبت بعد الي صار
ابو علي:مشكور يوليدي ما راح انسالك وكفتك
سلطان:ولووو حجي..انتوا اكثر من اهلي بالنسبه الي
ابوعلي:تسلم

راح سلطان يشتري ماي ودقايق وطلعت الممرضه
وكلهم وكفوا وراحولها ع امل انها اطمنهم

الممرضه:انا ما اكدر اكولكم اي شي الدكتور هوة يكوللكم..انا بس طلعت اجيبله دم
ابو علي:انتي جنتي داخل وشفتي وضعه الله يخليج طمنينه..احنه صارلنه ساعه كاعدين ع نار..حطي نفسج مكانه
ناظرت الممرضه الارض لمده دقيقه بتفكير:الصراحه هوة نزف هواي لذلك رايحه اجيبله دم

حيدر:يعني راح يعيش؟؟
الممرضه:حالته صعبه شوي بس انشالله يعيش اطمنوا..وهسة عن اذنكم تاخرت عليهم ارد روح اشوف الدم

ابو جود غمض عيونه براحه وفتحهم :الحمدلله ..والله يبشرج بالخير يا بنتي

ارتاح الكل من سمعوا كلام الممرضه
بس زاد خوفهم من شافوا الممرضه راجعه بعد دقايق ووجها ما يبشر بخير ومبين عليها الانزعاج ودخلت للعمليات

حيدر:وجها ما يطمن..شتتوقعون صاير
ابو جود:ما ادري..حتى ما حجت شي ولا كالت شصار..يارب سترك
الجد:انشالله خير

شوي وطلعت الممرضه:والله ما ادري شكولكم

طاح كلوب الكل من سمعوا كلامها

سما:دحجي تلفتي اعصابنه شصار

الممرضه:ما صار شي بس ماكو دم لزمره ابنكم وما ندري شنسوي لان زمرته نادره شوي محد بينكم دمه o- محتاجينه بسرعه وما نكدر نتاني علما ترسلنه المستشفى الثانيه الدم

واحد ظل يباوع للثاني ع امل الثاني عنده نفس الزمره
الجد:انا o+
الممرضه:ما ينفع ياحجي لان زمره o- يعطي لكل الفصايل بس ما ياخذ الا نفس فصيلته..يعني لازم نفس الفصيله

سما بخوف: لعد شراح يصير بجود اذا تاخر الدم عليه
الممرضه:راح تزود حالته اسوء ويجوز يدخل مرحله الخطر اذا ما نقلناله بسرعه

طلعت ممرضه ثانيه:وينج ليش تاخرتي المريض حالته خطره ليش تاخرتي بالدم
الممرضه١:شسوي ماكو مو بيدي

الاهل صارت وجوهم صفره من الخوف وهمه يسمعون الحجي
سما حست الدنيا دارت بيها وشي واحد يخطر ابالها (راح يموت بسببي)

وفجاءه ما حست باي شي ووكعت مغمى عليها
ركضت نور لها:سما سما حبيبتي حاجيني سمااااا
الممرضه:بسرعه شيلوها للغرفه الثانيه
شالتها نور وساعدتها الممرضه ودخلوها للغرفه الثانيه

سلطان اجه ع طيحه سما:شصاير شكو

حجاله ابوعلي كلشي وكان يتكلم بتعب
سلطان:انا هم نفس فصيلته ..اشرب ماي يا حجي وانا راح اتبرع
الجد:صدك..روح بسرعه الحك ع الممرضه ترى حاله جود ما تستحمل تاخير..الله يخليك استعجل

راح سلطان بسرعه للمرضه ودخلته غرفه للتبرع

الممرضه:بس المريض يحتاج هواي دم..يجوز نحتاج احد ثاني يتبرع هم
سلطان:اخذي الي تردينه مني..ماكو غيري عنده هالزمره هنا
الممرضه:بس ما يصير اخذ منك كل هالدم مايصير مو زين عليك
سلطان:وانتي شكو هوة دمي ولا دمج ..اكول سحبي الكميه المحتاجينها وانتي ساكته ترى اعصابي تلفانه ومابيه حيل اجادل

الممرضه:اوك راح اسحب بس اذا خلصنه اكل شي ولا تتحرك علمود تستعيد شوي من طاقتك مو زين عليك تتحرك لان راح تحس بدوخه

سلطان:يصير خير استعجلي بس

سحبت الدم ودخلت لغرفه العمليات تنطي الدكتور الدم وطلعت وسلطان رجع يمهم وكعد بالمقاعد لان ماكدر يظل واكف لان بده يحس بالدوخه لان ما اكل شي

وظلوا ع اعصابهم يتانون الخبر وما يكدرون يسوون شي غير الدعاء وحيدر ظل يروح ويرجع من توتره

ابوعلي:اركد ياولد دوختني وانت جنك زنبور بس تون ورايح وراد فوك راسي
جيدر:ما اكدر ياحجي
ابوعلي:انشالله بخير ..كلتلك الممرضه راح يكون بخيرفاهدة واكعد
حيدر:ما اكدر يا جدي خليني براحتي

رجعت الممرضه وشافت سلطان:انته ليش ما ظليت داخل حتى ترتاح..ترى سحبنه منك دم هواي اكثر من المسموح فلازم ترتاح وتاكل شي
سلطان:لا حول الله اكلج ماكو غيري هنا روحي شوفي المرضى احسلج..هسه وقت اكل وكت راحه والله انج بطرانه

الممرضه:ع راحتك بس كلت احذرك
الجد:لا ولدي لازم تاكل شي ع الاقل..حيدر روح جيبله شي ياكله
سلطان كض ايد حيدر:ما مشتهي والله..خل يطلع الدكتور واطمن ع جود ياله اكدر اكل..شلون اكل وجود داخل مرمي ع السرير وما اعرف شنو حالته

ابو علي : والله انك ونعم الصديق

ساعه وطلع الدكتور وراحوا له كلهم ماعد ابو علي الي تعب وبعد مابيه حيل يكوم يحس من الهبطة بعد رجوله متشيلع
الطبيب:هسة حالته مستقره وما عليه شر..بس جانت عمليه كلش خطره وحساسه لان الطلقه يم القلب كلش
ابو جود:نكدر نشوفه
الطبيب:لا ممنوع الزياره الى ان يصحى ونطمن هوة بخير وما عده مضاعفات
سلطان:الله ينطيك العافيه دكتور..شوكت نكدر نشوفه
الطبيب:هسة خل يصحى والله كريم .. روحوا ارتاحوا وباجر تعالوا لان كعدتكم ما منها فايده لان ما راح تكدرون تشوفونه

تركهم الدكتور وراح
سلطان:حجي روح للبيت وارتاح لانك تعبت هواي اليوم
ابو علي:اي وانتوا كلكم راح تجون وياي.
حيدر:لا انا راح اظل
سلطان:روح حيدر انا راح اظل

حيدر:لا ما روح واخلي اخوي لو ع كص ركبتي
اجت سما بعد ما صحت :هااا شكال الدكتور
ابو جود:بخير بس ما راح نكدر نزوره ع باجر انشالله وهسة امشوا نمشي
سما:انا ما راح اروح ..راح انتظره الى ان يصحه
نور:وانا هم ما اروح

ابو جود:شسوون ضالين هنا..امشوا ارتاحوا وباجر نجي..واذا صار شي المستشفى يدك علينه
الحجي تنهد بقله حيله:خلهم ع راحتهم
نور:مشكور جدي

ابو احمد كض ايد ابوه وساعده يكوم
وراحوا مشوا وظلو حيدر ونور وسما وسلطان
نزلوا الجد واولاده جوه ولكوا محمد ينتظرهم
محمد من شاف راح الهم بسرعه:شلون جود هسة
الجد:مدامك هنا ليش ما دخلت يمنه ..ليش ظليت بره لوحدك
محمد:ماكدرت امشي بدون ما اطمن عليه وما ردت ادخل وازعجكم وانتوا بهالحال
ابو احمد:لا ازعاج ولا شي يوليدي واطمن جود بخير

****

سلطان راح حاجه الممرضه ورجع
سلطان وعينه ع الارض :بنات طبوا بهالغرفه ارتاحوا واخذوا راحتكم ..حاجيت الممرضه وما كالت شي لان فاضيه وما محتاجينها..احسلكم من الوكفه بالممر
سما:مشكور اخوي

البنات دخلوا للغرفه وما غفت عينهم الا الفجر واما الولد فناموا ع كراسي الاستقبال ونومهم صار مكطع لانهم تكسروا من الكراسي وكلساع يفزون

اجه يوم ثاني وصحه جود اخيرا وفتح عيونه وانتبهتله الممرضه

الممرضه: انته بخير..تسمعني
جود هز راسه وهوة يبلع ريگه ويفتح عيونه ويسدهم وكانه بعده دايخ:اريد ماي

الممرضه:اوك(شربته ماي واطمنت عليه)راح اصيح للدكتور

وطلعت وكابلت سلطان الي توه كاعد وماسك ركبته بالم
الممرضه:استاذ جود صحه ورايحه اخبر الدكتور
سلطان بفرحه:صدك الله يبشرج بالخير مشكوره اختي
الممرضه:اسمي سها

سلطان:هااا..اي عاشت الاسامي
الممرضه:الصراحه عجبتني بتصرفك البارحه..ماكان هامك نفسك..كل همك صديقك..الا ما كلتلي شنو اسمك
سلطان(لا حول الله هسه وكت زحف..الواحد بيا حال وهاي تريد تتعرف)
سلطان:اسمي سلطان(وقبل لا تكول كلمه)اكول روحي للدكتور خل يشوف جود استعجلي شوي
سها:تامر امر

حيدر كتم ضحكته:مو عيب تتعرف وطايح حب وغرام واخوي بالمستشفى وحالته حاله
سلطان:بسم الله انته شوكت كعدت توك قبل شوي نايم
حيدر:انا كعدت من انا اسمي سها ونظرات الحب مدري سهام الحب تتراشقها عليك ههههه
سلطان:اكول جب ..جايه علمود تكول جود كعد
حيدر:صدكالحمدلله ريحتني..الا البنات وينهم خل نبشرهم

سلطان:شكلهم نايمين..خلهم يرتاحون خطيه تعبوا امس ..لان بعدهم ماسمحوا بالزياره ..خل الدكتور يفحصه ويخلص وبعدين نكللهم
حيدر:اوك ..خل ادك ع البيت اطمنهم اكيد كاعدين ع اعصابهم

وراح واتصل عليهم وخبرهم

****
ابو احمد توه نازل وشاف احمد يريد يطلع
ابو احمد:تعال تعال وين راح من صباح الله خير
احمد:رايح استانس وي صحباني ..انشالله تريدني اكعد مثل الحريم
ابو احمد:استحي ع وجهك ابن عمك بالمستشفى وانته رايح تستانس..ما كلفت ع عمرك امس حتى تمر المستشفى وتطمن عليه ..عيب عليك الرجال كلهم هناك بالمستشفى وانته كاعدلي يم الحريم..حتى سلطان الي هوة غريب ومجرد صديق وكف ويانه وكفه رجال واحسن منك

احمد:الحجي كلي روح وي الحريم
ابو احمد:كلك وصلهم ما كلك اكعد وياهم..جان وصلتهم ورجعت
ام احمد واكفه يم الدرج وسمعت كلشي: ع كيفك ع الولد شبيك عليه..يعني لو راح للمستشفى شراح يسوي احد كلك هوة دكتور لو بس ياخذ حظور
ابو احمد:محد خربه غيرج..بدال ما تفهمينه وتعلمينه علمود يصير رجال جاي تخربينه

ام احمد:هوة شاب ومن حقه يستانس لاحك ع الهم والنكد
ابو احمد:انتي طلعي منها..وانت كبالي ع المستشفى
احمد:اووووف يمه انا مواعداصدقائي ميصير اخلف بمواعيدي
ام احمد:خله يروح هسة ومن يفرغ يروح يزوره
ابو احمد:العايله اهم من كلشي هوة لازم يعرف هالشي..وانتي لو مره سنعه جان علمتيه هالشي بس مع الاسف عليج
ام احمد:من حلات عايلتك عاد..لو بيدي جان طالعه من زمان من هالبيت ولا اكابل وجوهم.. روح يمه احمد ومتى ما فضيت روح زوره..روح لا تتاخر <يا اخي الزكها كف..انته هم قاهرني😤>

احمد:مشكوره يمه
طلع وابو احمد ناظر مرته بقهر وراح لابوه

لاكاه ابو علي:ابشرك جود بخير..روح كول لاخوك وخل نروحله ..ومرتك والبنات خل يوصلهم احمد بعدين ورانه
ابو احمد بفشله:احم احمد طلع
الجد:وين طلع
ابو احمد:طلع وي اصحابه
الجد:ولد عمه بالمستشفى وهوة رايح وي شلته الصايعه يستانس..انته ليش ماعندك كلمه عليه
ابو احمد:شسوي كلما اكلمه امه تدخل..مدللته زياده عن اللزوم
الجد:اكبر غلطه بحياتي يوم زوجتك خلود..لا نافعه ولادها ولا نافعه نفسها..بس لسان طويل وما تعرف حتى تربي
ابو احمد:شسوي يابوي بعد طاح الفاس بالراس
الجد:وانته هم صوجك انطيها العين الحمره..ترى المره اذا تساهلت هواي وياها تركب فوك راسك
ابو احمد:الله كريم يبه خل نروح لا نتاخر
الجد:تغير الموضوع يعني ما راح تسوي شي..اعرفك من يوم وانت صغير وانته كلبك رجيج..ياولدي فوي كلبك وصير شوي قاسي..ترى القسوه بعض الاحيان مطلوبه
ابو احمد:انشالله يبه
الجد تنهد بخيبه امل:اكص ايدي اذا تسوي شي..ولدي واعرفك ما ينفع الكلام وياك

***

كعدت نور وحاجت بعض الممرضات وكلولها جود تحسن فراحت تركض لسما تكعدها

نور:سما ولج سما كعدي جود صحى
سما نطت وبعدم تصديق:حلفي 😳
نوربفرحه:والله
سما راحت بسرعه وبخطوات واسعه حتى تتاكد اذا هوة بخير

****

عند جود انتهه الدكتور من فحصه وتاكد من انه بخير وطلب منه يرتاح

جود جان يحاول يكعد وتاذه من الحركه وعقد حواجبه وغمض عيونه بالم
دخل سلطان وحيدر وياه لجود

سلطان:ولك انته خبل ظل متمدد بعدك مريض
جود:احس مكسر من النوم
سلطان:ميخالف ظل نايم لا انا اكسرك
جود:ما اريد ما احب الكعده..الا اكلك شخبار الشغل
حيدر:هسه وكت شغلك هسه ..اهتم بنفسك وما عليك بالشغل

دخلت سما بسرعه للغرفه وشافت جود كبالها وهو يسولف ويبتسم ومن فرحتها ركضت شبكته وظلت تبجي
سما:ما اصدك انته كبالي وعايش
جود ظل متسمر ومنصدم
اما سما فنست نفسها ومن حضنته حست براحه مو طبيعيه وكان كل المشاكل هينه اهم شي هو بخير

سلطان نزل عينه عنهم وضرب حيدر بكتفه واشرله امشي نطلع
سما انتبهت لنفسها ووخرت بسرعه ومن شافت حيدر وسلطان يطلعون استحت
نور كانت واكفه بالباب:عادي كملوا كملوا لا تستحون 😉 انا مو غريبه شفتكم بوضعيه اخس من هيج
سما ودموعها بعدهي بعينها:انجبي
جود:انزين ليش تبجين
سما وبعدهي تبجي: ما ادري
نور:هههع هاي دموع الفرح يا اخوي..بس صراحه ما توقعت مرتك ام دميعه وتبجي بسرعه..الي يشوفها تعارك ولسانها شطوله ما يتوقعها تبجي

جود:مو شرط طولت لسان دليل ع القوه..اكو ناس تبين قوتها بالصريخ والعرايك حتى تغطى ع ضعفها..لان من داخلهم يدرون انهم ضعاف بس ما تريد الناس تعرف ضعفهم..لان بظنهم اكو ناس لو عرفوا نقطه ضعف غيرهم فراح يستغلونهم

سما ناظرلته بتعجب لان حسته يقصدها لان حست هالحجي ينطبق عليها..هيه تبين انها قويه بس من داخلها تدري انها ضعيفه وما تكدر تسوي شي..تساءلت اذا كان صدك فهمها..معقوله فهمها بهالفتره ولا مجرد كلام كاله ومايقصدها بيه

جود باوعلها لكاها تباوعله وهيه ساهيه وتفكر (يا ترى بشنو تفكرين؟؟)

نور وكفت مثل الاطرش بالزفه وظلت مره تباوع لجود ومره تباوع لسما وتشوف واحد صافن بالثاني
نور حطت ايدها ع خدها مع ابتسامه☺️: حاسه روحي بفلم مكسيكي ع هالنظرات..اكلكم ما تردوني بعد اشغلكم اغنيه ع هالجو..احسن شي اطلع لان قلبي الصغير لا يتحمل

كلام نور صحاهم من تفكيرهم
سما استحت(غبيه ليش جنت اباوعله هسه يظن اني احب او فد شي..يعني انتي ما تحبينه ؟؟مصدكه هالكلام انتي؟؟ ..اي ما احبه اصلا انا ما اريده وما جاي اكدر اتقبله كزوج ..انتي ماكادره تتقبلين كزوج لانج ما تحبينه لو لان عزيز يضغط عليج وخايفه منه؟؟ ما ادري يجوز اثنينهم ..اذا صدك ما تحبينه فليش امس من صار بيه شي حسيتي روحج راح تطلع وحسيت روحي اختنك وكلبي جان راح يطلع من مكانه؟؟..لان لاني احس بالذنب لان الي صارله بسببي اي احس بالذنب بس..وبعدين هوة ابن عمي ولو واحد من العائله صارله شي جان هم خفت عليه..
ليش انا مامقتنعه بالاجوبه الي جاي اجاوبها ع الاسئله الي بمخي..)

جود شاف صفنتها طولت ومندمجه بتفكيرها (ليش صافنه هيج..معقول صاير وياها شي وجاي تفكر بيه)
جود:بيج شي
سما انتبهت من تفكيرها او بالاحرى من الصراع الي بداخلها:هااا لا
جود:حاس اكو شي شاغل بالج..كوليلي بلكي اكدر اساعدج
سما(انا ليش ما اصارحه بسالفه عزيز بلكي يكدر يساعدني)
سما بتردد:انا انا بكولك شي
جود:كولي
سما بخوف:انا خايفه
جود عقد حواجبه بتفكير:من شنو
سما:لانوا اكو واحد....

قاطع كلامهادخول العائله كلها
ابو جود:الحمدلله ع سلامتك ابو الشباب
جود:الله يسلمك يبه
وسلموا عليه كلهم وكعدوا يسولفون

سما رادت تنسحب وجود كض ايدها
جود:وين رايحه
سما:رايحه اشوف نور
جود:بعدين نكمل كلامنه لا تظنين راح انسه
سما هزت راسها وطلعت
جود:(يا ترى شنو الي مخوفها..اكيد مو شي عادي..اكيد صاير وياها شي)

ابو علي:جود ليش ما ترد وين عقلك
جود:هاا يبه
ابو علي:الماخذ عقلك يتهنا بيه
جود:لا وياك..امرني شنو كلت

****

ابراهيم:استاذ هذا عاش وما مات
عزيز بعصبيه:صوجي انا اعتمدت عليك مو ع اساس هذاقناص عالمي وما يخطئ الهدف مو هذا حجيك
ابراهيم:اي هذا السمعته عنه..بس ما توقعته راح يخطئ الهدف
عزيز:مايسوه الفلوس الذبيتها ع جيته..بسرعه سفره ع اقرب طياره ماريد دليل يظل عليه
ابراهيم:حاظر استاذ..واوعدك استاذ راح اعوض الي صار واكتله قبل لا يطلع من المستشفى
عزيز:نشوف

***

سما طلعت ولكت نور كاعده وي الممرضات وطاكه ميانه وتضحك
سما:ماشالله بسرعه توالمتي
نور:اي تعالي حليوات
سما:ماريد..الا ما تدرين ليش بدور ما اجت
نور:العصر يجون كالت

دك تلفون سما وشافت رقم عزيز ورجفت ايدها وانتبهتلها نور
نور:بيج شي
سما:لا ولاشي عن اذنج

ابتعدت عن نور وظلت تناظر للنقال وخايفه ترد وبالاخير سمت بالله وردت
سما بجفا:نعم
عزيز:الحمدلله ع السلامه سمعت جود كام بالسلامه ..بس ياترى لشوكت راح يظل بالسلامه..انا اتوقع ما راح يطول ويرجع للمستشفى
سما:انته شتريد والله تعبتني
عزيز:عيب هوة هذا سؤال..يعني ما تعرفين اكيد انتي
سما:لعد لا ادخل جود بالنص
عزيز:جود خذه شي ملكي وانا ما ارحم احد ياخذ شي الي
سما(كطيعه تكطعك ليش انا حيوان لو قطعه ارض حتى ملكك):جود ماخذه شي..هوة انجبر ع الزواج..واحنه اتفقنه راح نطلك بعد شهرين..لان اذا طلك بسرعه فراح يحجون عليه الناس..لذلك احسلك لا تدنه لجود..لان اذا صارله شي فراح تحلم تسمع صوتي
عزيز:شنو الي يضمنلي ان حجيج صحيح
سما:كافي كلامي هوة الضمان..شنو ما تثق بيه؟؟لعد شلون حب بدون ثقه😏
عزيز:افكر واردلج خبر

سد النقال وسما رمت نفسها ع الكراسي بتعب كانوا طاقتها خلصت بتمثيل القوه
سما:يارب ساعدني..انا جذبت جذبه مو كدها..شلون راح اطلك بشهرين.

****

سها الممرضه اجت يم الممرضات ونور تحجي رياهم
سها:اكلج نور تعرفين سلطان
نور:اي صديق اخوي
سها:انزين عندج رقمه
نور:وانا منيلي رقمه ..ترى كلت صديق اخوي مو اخوي..انا ماعدي احتكاك بيهم فشعرفني بارقامهم
سها:انزين ممكن اساعديني وتجيبين رقمه من تلفون اخوج
نور:انجنيني انتي..اكيد لا..شنو انتي شافطه
سها:انزين انطيني رقمج خل نتواصل
نور استحت منها واعطتها رقمها
شوي وتعده محمد وشاف نور واجه لجهتها
محمد:هلا نور وين غرفه جود

تليكفت ممرضه :تعال انا ادليك
ممرضه ٢:لا انا ادليك
نور :شبيكم ترى هاي هيه الغرفه محاجه وحده تروح وياه ..حسستوني كانها بكوكب ثاني
محمد ابتسم وتركهم واتجه للغرفه
ممرضه١:واي يجنن كافي عيونه تسحر..يمه فديتهم رصاصيات
ممرضه٢:هنوب اسمراني ومعضل اويلي 😍😍 وابتسامته اويلي
ممرضه١:نور منين تعرفينه
ممرضه٢:اي عرفينه عليه
نور:يبووي شبيكم كلتوني بكشوري انطوني مجال احجي..وشبيكم هيج تخبلتوا عليه ترى هوة حيله سواق ترى مو شخصيه مهمه
ممرضه١:والله لو مجدي هم قابله بيه
نوربانزعاج:مالت عليكم مو صوجكم صوج اليحجي وياكم (كامت من يمهم وهي تدردم وراحت يم سما)
نور:واي شنو هاي اول مره اشوف بنات ملطلطات..العاده الولد تزحف ع البنات..شو بهالزمن صارت بالمكلوب

***

محمد:خوفتنه عليك
سلطان من وراه:انا كتلهم لا تخافون هذا مثل البزون بسبع ارواح مايصير بيه شي بس محد صدكني وظلو ينوحون
جود:بزون بعينك عاد ما شبهتني الا بالبزون..اكول انته شعندك كاعد هنا ليش ما وليت للشغل..يله امشي كبالي..لا والله اخصم من راتبك

سلطان:لا انا اليوم ماخذ اجازه تعبان
جود:لا والله..اجازتك مو مقبوله..اذا انا ما داومت وانته ما داومت لعد منو يمشي الشغل..يله وبدون مطرود اعطينه مكفاك وروح دربك للشغل

سلطان بدراما زايده:هذا جزات المعروف تبرعتلك بدمي ونشف دمي بسببك وحتى ما كليت شي حتى اعوض هالدم من خوفي عليك وبالاخير تجازيني بكراب..اخخخ يازمن الي خله الصديق يقسى ع صديقه وما يحن عليه

جود:يبوووي ليش خليتوا يتبرع لي لو مخليني ميت احسن..هسه يذل امي بهالتبرع وكلساع يعيد هالاسطوانه
سلطان:هسه انا شطلبت بس اجازه..يا اخي من قلقي عليك حتى ما نمت عدل
جود:لا يالحساس
سلطان:بربك حجي ما استاهل اجازه
ابو علي:تستاهل ومني الك هديه لمده اسبوع
سلطان:كفوو .يعيش الحجي
جود:يبه لاتدخل بالشغل انته متقاعد..وبعدين لا تدلله..ترى الدلال الزايد يخربه
الجد:ميخالف وانا ابوك..علشاني انطيه اجازه..معقول تكسر بخاطري
جود:لخاطرك لو تريد انطيه اجازه شهر مو اسبوع..كلشي ولا خاطرك
سلطان:والله محد يعرفلك غير الحجي
ابو علي:الله يوفقك ياولدي ويرفع راسك مثل ما رافع راسي بيك..وبالنسبه للشغل خلي حيدر يكابله شوي الى ان تكوم بالسلامه

حيدر:هاااا انا تعبان ومريض وانا هم ما نمت الليل عدل
سلطان:ظل يدك اليتيمه..ترى هذا العذر استخدمته انا فما يفيد التكرار استخدم شي جديد
حيدر:انا ويني وين الشغل خل اتخرج بالاول
الجد:ميخالف تتعلم ولا عاجبتك الكعدك واكل ونوم ولعب ..اتعلم تعتمد ع نفسك
حيدر:اي خل اتخرج وبعدين اعتمد ع نفسي
الجد:هذا اخوك جان يشتغل ويدرس وما فك حلكه ولا ادردم مثلك..اتعلم من اخوك بس اكله شي يكول حاظر وتم وانته عسى ما طلبت شي الا كعدت تدردم..وبعدين انته معطل وكاعد وساكت فشتغل بس علما يكوم بالسلامه وارجع لكسلك
حيدر وهوة عافس وجهه:انشالله..راح اروح للبيت ابدل وارتاح واجي العصر.
محمد:تعال وياي اوصلك لانك ما جيت بسيارتك
حيدر:مشكور
سلطان:اخذوني وياكم مابيه حيل اسوق

****

نور:سما شبيج صارلي ساعه احجي فوك راسج وانتي ساكته
سما:تعبانه شوي
نور:امشي ندخل يمهم..شكل الولد راحوا
سما:يله

دخلوا ولكوا ابو علي وابو احمد وابو جود
نور:ع البجي البجيته عليك لازم تعوضنه من تكوم بالسلامه واطلعنه طلعه حلوه
جود ابتسم:والله محد طلبج حتى تبجين..بس تددلين اطلعج جم نور عندي
نور:واكو وحده هم لازم تعوضها لان بجت بجي يكسر الخاطر
جود:شقصدج
سما فهمت عليها الحجي وضربت نور بكوعها حتى تسكت بس نور حبت تلعب باعصابها
نور:خطيه كانت بتعييييط ومئطعه روحها بالعياط
سما بصوت ناصي:انجبي
نور استمرت ولا هامها:تصدك من طلعت الممرضه وكالت حالتك صعبه انغمى عليها..مسكينه..الحب وما يفعل
جود ابتسم من شاف سما تحاول تسكت نور وعرف عليها: ع هالحال لازم اشكر الي صوبني..لان عرفت معزتي بكلب بعض الناس
نور:اي معزه ومعزه جبيره..بس بعض الناس ما تحب تكول
ابو احمد:كافي تلفتي اعصاب بنتي
سما من سمعت كلمه بنتي ناظرته باستهزاء وتحججت تريد تشرب ماي وطلعت
ابو جود:لا حول الله..بعدهي ما تحاجيك
ابو احمد نزل راسه بخيبه امل:اي الله يهديها
الجد:يجي يوم وتنسى كلشي

جود راقب سما الى ان طلعت من الباب وظل نظره ع الباب وهو محتار شلون يتصرف وياها حاس انوا اكو شي وراها..ومحتار هم شلون يخليها تسامح ابوها لان سالفتهم طولت

وفي دقايق باقات الورد بدت توصل للمستشفى
الجد:شكل الخبر انتشر
سما:بس شدعوه كل هالورد
نور:بعدج ما تعرفين معارف اخوي هواي..كافي موضفينه شكثرهم وعنده علاقات وي اصحاب الشركات الثانيه بسبب الشغل فمعارفه ما ينعدون..وانتظري وشوفي هسه يجيج ورد اكثر

******
ابرهيم:هيه ما يرادلها شي بس ضربي هالابره بالمغذي ماله وانا اترسج فلوس لحد ما تشبعين
الممرضه:بس خايفه احد يشوفني او الشرطه تكتشف كل شي واروح بيها
ابراهيم:وعدا عليه قبل لا احد يكتشف شي انا اسفرج انتي وعايلتج ومحد يكدر يمس شعره منج شكلتي
الممرضه بتردد:اوك
****

حيدر وصل للبيت ولكه كباله بدور

بدور:حيدر شلون جود
حيدر:بخير وما عليه شر..بس انا الي مو بخير ميت جوع وتعبان
بدور:سويتلك دولمه حامضه ادري بيك تحبها
حيدر:صدك..فديتج والله يا حظ الياخذج..دقيقه بس ابدل واجي
بدور بخجل:اوكي راح احضر الغده واحطه ع الطاوله علما تجي( فديتك انا وعشيرتي..ماكو غيرك المحظوظ..لو انته الي لو ما اريد غيرك..بس لو تحس بيه شوي وتنتبهلي ولحبي)

هم تحس..؟
لو ما تحس..!
اشلون اوصف حالتي..؟
انت مترهي اعله وکتک..!!
اشویه حس بیه اعله بختک..!!
ردت اگلک آنه احبک..!!
گمت اغص بحچایتي 😔 😔

~~~~❤️~❤️~❤️~~~~

هلو شلونكم شخباركم
انا هالايام ع اساس جاي ادرس لذلك اتاخر بالتنزيل

اكلكم شرايكم كل بارت انزل صوره شخصيه من القصه لو تحبون انتوا تتخيلون شكل الشخصيه من كيفكم؟؟؟