رواية لأجل من احببت سأكون قوية الفصل الثاني والعشرون 22 - بقلم امل

😕  مٌـا نَـادم لان وافـيت
بـس مقهــور غـدرونـي💦🔇
‏⠀
~~~~💔~💔💔~💔~~~~

دخل ابو عزيز بعصبيه ع غرفه عزيز
ابو عزيز:انته الي وره صواب جود مو
عزيز ببراءاه:انته حابسني فشلون اسوي شي مثل هيج
ابو عزيز:لا تلف ولا ادور ادري انك هوه فلا تتذاكه علي
عزيز بنفس العصبيه:بس ارد اعرف شوكت كمت تحب جود وتخاف عليه..مو انته الي جنت تضربه كل يوم من جان صغير ومن امه جانت تحميه جنت تضربها وياه.. منين نزلت المحبه ه.. لو انته بس تبي تعاندني وتبعدني عن كل شي..عدوك عندك احب الك مني..صراحه نوبات انا اشك انك تحبني..انته لهسة تكرهني لانك ما تحب امي مو
ابو عزيز تنهد وحجه بهدوء:مو هيج بس
عزيز:لا بس ولا غيره..ادري بيك ما تحبني..انته تحب جود لان يذكرك بامه انته تحب امه اكثر منه كلنه..لهسة اذكر من جبت جود وامه للبيت بعد ما اطلكت من ابو جود واهلها رفضوا يتحملون مسوليتها لان ازوجت من وراهم وذبوه لاول واحد طلب ايدها وهو انت وطلكت امي بسبتهم لان اعترضت ع زواجكم..ومن ظليت وياكم وسببت مشاكل لجود وامه لان جنت اكرهها..بعدتني عنك وانطيت حظانتي لامي

ابو عزيز:انا بالبدايه ازوجت من ام جود لاني جنت ابي ذل ولده واسويه صايع بس الي صار العكس هوة خرب كلشي عليه
عزيز:😏قصدك حبيت امه وخلفت منها مو وتمنيت تعيش بسعاده وياهم
ابو عزيز:تدري هذا مو الصدك تدري حتى بعد ما استقريت وي امه ما ظليت احبه وهم ظليت اعامله بقسوه..انته كنت معزز عند امك وادزلك مصروفك كل شهر بس جود خليته يشتغل بالكراج وياي بعد المدرسه..وبعد كل هذا تكول احبه اكثر منك

عزيز:لعد ليش خايف ع حياته وما تريدني اقربله
ابو عزيز كعد ع القنفه وحجه بهدوء:لاني ما اريدك تدنالهم قبل لا اكمل خططي
عزيز:وشنو خططك فهمني ..ليش ما تشاركني باي شي

ابو عزيز:انا اكدر اكتلهم كلهم قبل سنين بس تدري ليش ما قتلتهم
عزيز عقد حواجبه:شنو السبب
ابو عزيز:لان الموت راحه بالنسبه لهم..انا اريد اخليهم يعيشون ويتعذبون مثل ما انا عشت..اكثر شي يفتخرون بيه عائله ابو علي ومغرورين بسببه هو فلوسهم وشرفهم..اسمهم مثل نار ع علم بالسوك..بس اصبرلي اذا ما طيحت شرفهم بالارض وخليتهم يجدون ما اطلع ابو عزيز

عزيز بتفكير:واذا مخططك فشلت

ابو عزيز:انته ما راح تخسر شي بس اصبر..اذا فشلت سوي الي تريده واكتل جود اما اذا نجحت هم راح تسوي الي تريده وسما راح تكون الك بس كل الاريده منك شوي صبر
عزيز:(صح ما راح اخسر شي اذا تانيته..وسما خايفه مني راح اوهمها اني اتفقت وياها وبهالشي راح اضمن ان جود ما راح يلمسها لمده شهرين وبعدين راح اخذها اذا اطلكت وراح اكتل جود..وحتى اذا ما اطلكت هم راح اكتل جود بكلا الحالتين راح اكتله علمود لا يصدع راسي ويعترض طريقي😏)

عزيز:اوكي راح اوعدك ما اقربله بس الك مهله شهرين اذا فشلت بالمهمه فراح اتصرف
ابو عزيز:اوكي هالمده كافيه

******

ابو جود بابتسامه وهو يتامل ولده الي نايم:مدام نام جود خلنه نروح وبعدين نرجع
ابو احمد:اي خطيه بعده تعبان من العمليه فراح نخليه يرتاح شوي

ابوعلي:اي يله..حتى انتوا تعبتوا
التقوا بالبنات وهم طالعين
ابو جود:يله نور وسما امشوا ويانه بدلوا وارتاحوا واكلولكم لكمه  بعدين رجعوا

سما:بس ما اكدر اترك جود اخاف يكعد ويريد شي
ابوعلي:اذا كعد اكو ممرضات تهتم بيه..وانتي ما راح اطولين شوي وترجعين
سما:اوك (ما ادري ليش ما مرتاحه اني اتركه وحده)

سمعتهم الممرضه الي اتفقت وي ابراهيم
الممرضه ابتسمت(هاي فرصتي محد موجود وهوة نايم راح ادخل احط الابره بالمغذي واطلع ولا احد يدري )

دخلت الممرضه بهدوء بدون مايحس عليها احد ووكفت يم راس جود

الممرضه(والله حرام هالحلو يموت بس يله موتك راح يخليني اطك واعيش حياتي  واشوف العالم ..شبعت وانا بس اكرف ضاع عمري وانا بس اشتغل وما شفت يوم حلو .. يله بقت عليك هوة الحلوين اغلبهم ماتوا بالتفجير او بسبب ثارات العشاير بقه وين الاجكم ظال ع كلبنه.. ما كاسر خاطري الا مرتك ما تهنت بهالزواج.. الله يرحمك)

****
سما وكفت يم باب السياره وما صعدت(كلبي كارصني من السالفه..شلون اتركه وانا مطمنه؟؟ وعزيز الكلب ما انطاني وعد انه ما راح يتعرضله..هوة كال بس افكر بله رفض فكرتي وسواله شي!!.لا ما اكدر اتركه لوحده قبل لا اسمع موافقه عزيز)

نور:سما شبيج..صعدي صارلنه ساعه ننتظرج
سما:ما اكدر اروح كلبي ما مرتاح..نور عفيه انتي جيبي وياج الي ملابس..ما اكدر اترك جود وحده
نور:يمه فديت الحب 😉
سما:دطيري كلشي ما فاهمه
وراحت بسرعه لغرفه جود
****

الممرضه كانت ماخذه راحتها لان مطمنه محد موجود  وحطت الابره بالمغذي وذبت السم بيه

وبهاللحظه دخلت سما وشافت الممرضه وهي تحط الابره بالمغذي

سما:شجاي اسوين

الممرضه تفاجات بسما وكمزت وطاحت الابره من ايدها وبسرعه خذتها من الارض وحطتها وره ظهرها

الممرضه بارتباك:ووو ولا ولاشي
سما:(هاي شنو حطت بالمغذي ما معقوله مجرد دوه..اكيد حطت شي مو زين والا ليش ارتبكت وخافت)

راحت سما بسرعه ودفعت الممرضه وجرت ايد جود وسحبت من ايده ابره المغذي وجود صحه ع حركتها

سما:😠انتي شنو حطيتي بالمغذي
الممرضه:ما حطيت شي
جود:شكو شصاير
سما:هاي مدري شنو حطت بالمغذي
جود:يجوز دوه من الدكتور اتركيها
الممرضه:اي اي دوه صح دوه

سما:اذا دوه فليش خايفه هالكثر
الممرضه:ما خايفه
سما:لعد خل نسال الدكتور اذا ع هالحال😏
الممرضه بلعت رقها:انتي ليش مو مصدكتني ترى جاي تهينيني ع هالحال
سما :هسه نتاكد ونطمن
راحت سما وضغطت ع زر يم السرير واجت ممرضه ثانيه
اجت الممرضه بسرعه

سما:صيحيلي الدكتور حالا
الممرضه:اترجاج لا تكبرين الموضوع
سما:انطمي علما يجون
الممرضه خافت وحاولت تطلع بسرعه بس سما مسكتها
سما:😏ع وين يا حلوه..هوة دخول الحمام زي خروكو

وصل الدكتور وتاكدت ان ما طلب منها تحط اي دوه
سما:لازم نطلب الشرطه علمود يسوون فحص للمغذي ونشوف شحاطه بيه
الدكتور:اصلا الشرطه موجودين بالطابق الجوه من ساعه علمود يحققون بسالفه اصابته بس اخرتهم لان هوة بعده تعبان ونايم
الممرضه الثانيه:هسه اصيحلهم

التفتت سما لجود لكته ساكت وصافن جنه يفكر بشي

سما خافت عليه اخاف وصله شي من الماده قبل لا تشلع الابرة:بيك شي..انته بخير..تحس باي شي
جود ما انتبه لكلامها:هااا كلتي شي؟؟
سما:بشنو جاي تفكر
جود:صراحه محيرتني الشغله..منو الي يريد يكتلني لهلدرجه..انا ما عندي اعداء..يعني تكدرين تكولين اكو ناس يكرهوني يجوز طردت واحد او عاملت احد باستهزاء..بس ما توصل للكتل..حاس بالسالفه انه

سما سكتت(شكولك بس!!..اكولك انا السبب بكل الي صارلك..انا جاي اجيبلك المشاكل واعرض حياتك للخطر..يا ترى لو دريت بسالفه عزيز راح تكرهني لو لا..هسه يجوز انته اصلا ما تحبني..فاذا كتلك شراح يصير..انا خايفه احسن شي اواجه كلشي بنفسي..انا مو ضعيفه حتى احتاج احد..(تمتمت اخر مقطع بعقلها اكثر من مره ع امل انها تكون صدك مو ضعيفه))
جابت الممرضه مغذي جديد وركبته

دخل ضابط ومعاه شرطيين وامرهم ياخذون الممرضه

الضابط:الحمدلله ع السلامه جود
جود:الله يسلمك(جود صفن فيه لحظات)العفو بس انا اعرفك قبل!! وجهك مو غريب عليه
الضابط بابتسامه:ماشالله ذاكرتك بعدهي قويه
جود بادله الابتسامه:انا طبعي اذا شفت وجه احد وحجيت وياه ما انساه بسرعه..فاذا ملامحك بعدهي ابالي فمعناتها اني كنت اعرفك عن قرب..بس ما اذكر جان عندي شغل وي الشرطه

الضابط وارتسم ع وجهه خيال حزن: هسة ما عندك صله بالشرطه بس بالطفوله كان عندك صله بالشرطه او بالاحرى لازم اكول صله باخو شرطي

جود كان وجهه متفاجأ ع صدمه ع عصبيه:منو انته؟؟
كان يسال ويعرف الجواب بس كان يدعي بكلبه انه يكون غلطان ومو هوه الي اباله
الضابط نزل راسه:معقوله نسيت يوسف

جود كور ايده وعروقه بانت من العصبيه وضغط ع فكه وبهدوء: شجابك هنا
يوسف تكلم بسرعه:انا من دريت انك المتصوب اصريت اشوفك حتى اصلح كلشي صار ..اناجننت مجرد طفل بوكتها وما افتهم شي..جانت مجرد غلطه وجنت طفل مجنت ادري الكلمه الي راح تطلع من حلكي هيج راح تسوي

سلطان جان توه داخل وتفاجا بالجو:شصاير

جود تجاهل سلطان او الاصح ما انتبهله من العصبيه بس كان يحاول يكتم عصبيته ويتكلم بسخريه:غلطه !!! غلطططه؟؟ ههههههههع وجايلي بكل وقاحه وتكلي جاهل وغلطه..هاي الغلطه يا استاذ كلفتني حياه عائلتي..شفت اهلي يموتون كبال عيني بسبتك مدري بسبتي لان وثقت بواحد مثلك وكتلك اسراري ..وجاي بكل وقاحه واكف كبالي وتكلي غلطه..لو كاض لسانك وما رحت كلت لاخوك كلشي جان ما صار الي صار..انا كتلك هذا الشي بيه خراب عائلتي ووعدتني انك ما تكوله لاحد بس انته يجوز طمعت بترقيه اخوك..وانا خسرت كلشي وماتت امي وانته احتفلت بترقيه اخوك ههههههع ماشالله خوش عدل..بس تدري هيه صح غلطه..غلطه يوم صاحبتك ووثقت بيك

سما تفاجات وانصدمت وسلطان لا تقل صدمته عن سما صحيح هوة صديقه بس ما يعرف عن ماضيه قبل لا يتعرف عليه وتذكر اول يوم تعرف بيه ع جود بالمدرسه جان دوم عصبي ويتعارك وما يحجي وي اي احد وكانه شايل الهم ع راسه او يمكن تحسه شايل غضب العالم بكلبه وما عنده اصدقاء وحياته بس دراسته والانعزال وهالشي جذبه لجود لان حسه ع كل عصبيته وغروره الا انه وحيد ومحتاج صديق حتى لو ما اعترف بهالشي.. وحاول يتقربله بس طبعا جود جان دوم يحاول يبعده عنه بس هالشي ما خله سلطان يياس وخلاه يصر ع صداقه جود وجان عنده فضول شنو سر هالعصبيه الي تنط من عيونه
سلطان:(اخيرا عرفت السبب وره هالجمود بشخصيتك..مع اني ما فهمت شلون هالضابط السبب بموت امك..بس كافي انك شفت امك تموت كبال عينك..يجوز لو انا بمكانك وافقد اهلي يجوز يصير بيه حاله نفسيه وخصوصا جنت طفل..زين منك ظليت متماسك..يعني هسة هذا غدرك بالطفوله وما ادري شلون ومحسن غدرك بالكبر..يا اخي حقك تتعقد وما تثق باحد)

يوسف:انا ادري ان الموضوع مو سهل عليك وادري انا يجوز دمرت حياتك بس والله انا ما جان قصدي..انا جنت صغير وما جنت ادري بعواقب افعالي..والله ما كنت ادري باخوي راح يسوي هيج ما جنت ادري راح يفضحك.. وما كنت ادري راح يصير كل هذا..انا.......
جود:اطلع بره
يوسف:جود انطيني فرصه ثانيه
جود بصوت عالي وعيونه صاروا حمر من العصبيه:كتلك اطلع بره
سلطان حط ايده ع كتف يوسف:اتركه هسة لان معصب وما راح يتفاهم جود واعرفه اذا عصب يقفل

يوسف هز راسه بتفهم وباوع لجود بخيبه امل وطلع

رجع شعر ليوره بادينه الاثنين بعصبيه وجر ابره المغذي بقوه وانجرحت ايده
سما شهقت وكضت ايده:شجاي اسوي..انته بعدك مريض مايصير تتحرك
جود نفض ايده بقوه ووخر ايدها بعصبيه:مو شغلج ولا تسوين روحج الزوجه الحنونه وانتي اصلا ما تواطنيني ولا تبيني اقربلج اوك
سما باوعت لسلطان بخجل ورجعت باوعتله وحاولت تنصي صوتها:اذا انته معصب من صاحبك فلا اطلع حركتك بيه وعيب تحجي مواضيعنه الخاصه كبال سلطان

جود وهو ضاغط ع فكه :خليج بعيده عني وما راح اطلع حركتي بيج.
دفعها ع الخفيف حتى يوصل للكبت الصغير الي وراها وطلع ملابسه ودخل بدل بالحمام
سما تفاجات من تبدل مزاجه حتى من كالتله لا تقربلي من نزوج ما عصب هيج
طلع جود من الحمام وراد يطلع من الغرفة بس سلطان وكف كباله

سلطان:ع وين انشالله
جود:لا تحاول تمنعني وتسويها درامه لان انا طالع يعني طالع لان انخنكت هنا
سلطان:لا ما امنعك..اصلا ليش اتعب نفسي..لان ادري بيك مثل ما كلت طالع يعني طالع..انا بس ردت اعرف وين تريد تروح حتى اوصلك

جود:ارد اظل لوحدي فلو سمحت ولي عن وجهي
سلطان:لا اتعب نفسك اذا انته عنيد فانا اعند منك( قلد جود) واوصلك يعني اوصلك
جود طلع من المستشفى وسلطان اخذ تلفونه ع الطاوله ولحكه

جود:وين مفاتيح السياره..انطينياهم
سلطان صعد بمقعد السايق:يلا اصعد
جود باوعله وهو ساكت
سلطان:يا اخي احسبني سواق شالفرق..احسبني ما موجود..(تنهد)اذا ما اجيت وياك بالي راح يظل وياك واهلك هم راح ينشغل بالهم لانك بعدك مريض بس اذا جيت وياك الكل راح يطمن

جود تنهد وصعد بالسياره:ارد اروح المزرعه
سلطان عفس وجهه باستغراب:هسة وانت بهالحال شعندك
جود:انلصم وسوق..انا بس ارد اعرف انته شرجعك  مو ع اساس دايخ ودكيت اليتيمه علمود الاجازه..توقعتك تنام يوم كامل
سلطان بدراما:اشتقت لك وكلبي ما طاوعني اظل بعيده عن عيونك السود الجميله الساحره
جود:تنعدل لا اعدلك براشدي.
سلطان:يمعود نشاقه شبيك..كل الموضوع اخذتلي غفوه وكعدت وما لكيت نقالي وطلعت ناسيه عندك..عاد انته تعرف انا ما استغنى عن النقال..ما اكدر انقطع عن معجبيني بالانستا والفيس
جود:سويتها قصه عنتر كول نسيت النقال وهاي هيه..وبعدين انته منيلك معجبين
سلطان:اوووه تعال شوف البرامج البنات اغلبهم طاكينها زحف لان محد يعرفهم وحاطين اسماء وهميه فماخذين راحتهم من وره الاهل.

جود:😒هسه تطلع وحده حاطتلك لايك وانته طرت من الفرح وعبالك معجبه
سلطان:لا عيوني ادخل صفحتي وشوف البنات شيعلقون..شافوني حلو البنات ظلوا يتغزلون بيه
جود:يجاملونك

سلطان:اي مقهور لان معجبيني هواي
جود:😏ع شنو انقهر..هاي مجرد اشياء تافهه
سلطان:(اي يا اخي غير جو واطلع من هالعصبيه واضحك مع انها ابتسامه عوجه بس يله ولا ماكو شي)

*****

سما اتصلت ع نور وهمه توهم داخلين البيت
نور بتفاجا:شنو طلع من المستشفى..(وتحولت لعصبيه)شنو هذا خبل ..اي هسه اكول لمحمد يجي ياخذج..واشوفه وين راح وهوة بهالحال

ابو جود كان واكف يمها وسمع الحجي:منو طلع من المستشفى
نور بعصبيه وهي تحاول تتصل بيه:ابنك المحترم جود طلع من المستشفى

ابوجود:بسم الله هستونه عفناه نايم ومابيه شي..شصارله وقرر يطلع
نور بخوف:المصيبه ميرد
ابو جود: راح احاول اتصل
نور:اوك وانا راح اكول للسايق  يجيب سما لان ضلت هناك
ابو جود وهو مشغول بالتلفون:اوك

نور راحت للحارس:وين السايق
الحارس:مصطفى راح يجيب طلبات البيت ومحمد اعتقد بالكراج يصلح السياره
نور:اوك شكرا

راحت نور للكراج وما لكت احد
نور:اووووف وين راح حضره جنابه الثاني
فجاه طلع محمد راسه من جوه السياره:منو تقصدين
نور:ااااه  خرعتني وجع منين طلعت
محمد طلع من جوه السياره  ولابس بس شورت وعضلات جسمه باينه ومتلف شوي من زيت السياره:التوجعج انا من البدايه هنا بس انتي حوله
نور:بله شلون اشوفك وانت جوة السياره احد كالك انا باتمان حتى اكدر اشوفك من خلال السياره
محمد راح واخذ تاير وراح يريد يبدل تايرات السياره:امممممم يجوز ،انتي عيونج شكدهم بس ما منهم فايده
نور انتبهتله اخيرا انه مالابس تيشيرت وبعدت عيونها عنه بسرعه:ممكن تلبس شي وبعدين تكمل هالنقاش البايخ قصدي المشوق
محمد:اوووف الدنيا حاره مابيه البس..ماتشوفين الشمس تصمط وانا جاي اتحرك واشتغل فاحتر زياده

نور:انته ما تستحي تمشي هيج كبال بنيه برئيه
محمد:لا ما استحي..وبعدين منيه البريئه ليكون انتي..شجاب البرائه الج انتي لسانج شطوله ومتنكدرين

نور ضحكت بخفه و بصدمه وبسخريه وبسرعه حولت للوجه المعصب:الصراحه كلساع جاي تفاجاني بقدرتك ع انك تخليني اعصب بكل مره نلتقي
محمد ببرود وهو يلبس تيشيرته:امممم يمكن الخلل بيج او بلسانج..وبعدين انتي شجابج ونزلتي من مقامج الرفيع وحاجيتي سواق
نور:ليش تحاجيني كاني وحده مغروره ورافعه خشمها
محمد:لانج من كبرتي ،تغيرتي وصرتي مغرور
نور ما دققت ع حجيه وما انتبهت لكلمه من كبرتي:انا مو مغروره بس بوكتها انا معصبه وانته بدال ما توكف وياي ظليت تسكتني..وبعدين انته شكد حقود حتى لهسه مذكر السالفه

محمد:لا والله يعني لو واحد يهينج تنسين السالفه وتحاجينه ولا كانوا شي صار
نور:يمعود انا اسفه مو قصدي بس فكني..انته ما تمل من النقاش ..وتكول عليه لساني طويل 😏
محمد:ماريد اعتذارج اذا من وره خشمج
نور:يمعود اسفه ومن كدام خشمي ..خرررب نسيتني روح جيب سما من المستشفى خطيه ظلت وحدها بالمستشفى
محمد: اوك بس اغسل واروح
نور:روح هسه كاعد اكلك وحدها بالمستشفى
محمد:ليش وين جود
نور:طلع شكل طباكاته طبكت
محمد:اوك بس ابدل واروح

هذا محمد👆🏻
******

احمد:ما ادري ليش هالايام راسي دوم مصدع
علاوي:اشرب كاس وراح تصير بخير

***:لازم هسة تحجيله الصدك؟؟..مو كافي صارلنه جم يوم ننطيه ابلاش
علاوي:حمد اسكت
احمد:شقصدك ع شنو ابلاش انا كلشي جاي ادفع مقدما
حمد:😏عيوني هاي الي جاي تشربه وي المشروب خالطين بيه مخدرات..فلذلك من يوم ورايح اذا تريد مخدرات لازم تكركش فليساتك
احمد:😳شنو؟؟مخدرات!! ايا انذال يا واطين انا كتلكم ما اشرب مخدرات
وكض حمد من ركبته وطاح بوكسيات بيه:يا كلاب يا حيوانات
علاوي حاول يكضه :اهده احمد ..دقيقه خل نتفاهم
احمد دفع علاوي:وخر عني يا كلب
علاوي:والله انا مالي دخل اول مره ادري هسة.. انا حالي حالك
احمد كض راسه بالم:اخخخخ يا كلاب صوجي صاحبت شله زباله مثلكم
حمد:😏اتمنى لو تنتقي الفاظك عدل لان ماعندك غيرنا يزودونك بالمخدرات هسة..ولانك صاحبي فراح اخليك تشرب هالكاس ابلاش هالمره
علاوي:احمد اخذه ما راح تكدر تتحمل هالالم
احمد اخذ الكاس وشربه وما حس بشي وراح بعالم ثاني

*****

دخلت نور ع غرفه ابوها:هااا يبه رد عليك
ابو جود:لا ما جاي يرد..اخاف النقال مو يمه لا تخافين عليه
نور:انا اراويه والله اذا رجع ولا احاجيه بعد
ابو جود:اجت سما لو بعدها
نور:لا بعدها قبل شوي راح محمد عليها
ابو جود:والله كاسره خاطري هالبنت ما تهنت بخطوبتها وماتت امها وهسه بعرسها صار الي صار..شكل هالبنت مالها حظ تفرح مثل باقي البنات
نور:كلشي مقدر ومكتوب ومابيدنه شي

****

سما كانت واكفه بره المستشفى اتاني محمد ووكفت سياره يمها

الشاب:تحتاجين توصيله 😉
سما:😒وعمه ،روح الله يستر ع اهلك
الشاب:شدعوه كل الي ردته اني اوصلج لان شكلج لوحدج وتحتاجين احد يوصلج😉 ..كل الموضوع خفت احد يتحرش بيج وانتي بنت لوحدج وضعيفه والدنيا تخوف
سما: والله ما يخوف غيرك..روح ولي معليك
الشاب:😒هذا جزات اليساعدج
سما:محد طلب مساعدتك فلا تحشر نفسك
وصل محمد وراح يمها بسرعه:شنو صاير شي..ليكون هذا مضايكج
الشاب:وانته منو حتى تدخل ..هذا شي بيني وبينها
محمد عقد حواجبه وبعصبيه خفيفه:هاي اختي يا افندي  فاذا عندك كلام وياها فوجهه الي
سما:واحد حشري معليك منه
الشاب:😅هااا اسف مو قصدي بس حبيت اساعد
محمد:ما محتاجين مساعده يلا توكل
سما بابتسامه:شكرا محمد
محمد:ولوو ما سويت شي..يله مشينه
سما:اوك

****

حنان كانت بعالم ثاني وما تدري بالي حواليها وصارت حياتها فقط مراسله علاوي
اول ما تكعد لحد ما تنام كله تحاجيه وصار كل حياتها وكل ظنها يحبها ويموت عليها
لان الكلام بفلس ومشبعها كلام حب لدرجه ما تلاحظ جذباته واوهمها ان ابوه غني ومن عائله نفوذها قوي وعمه ضابط ومن هالدروب الي يغشمر الشاب ع البنات ..طبعا حنان اكيد مصدكته. وما تدري ان الطريق الي بدايته خطأ فنهايته ندم

علاوي:حبيبيتي ممكن طلب
حنان:اكيد حبيبي
علاوي:ممكن ادزيلي صورتج
حنان:😡علاوي شبيك ..انا كتلك انا مو من هالنوع فليش تحسسني اني رخيصه
علاوي:ليش شكلت..يعني انا مو شايفج بالحقيقه فشنو المشكله بالصوره..انا بس ردت كلما اشتاقلج اشوف صورتج كبالي..يعني انتي لا طلعه تردين اطلعين وياي ولا ادزيلي صوره يعني شسوي
حنان: مو شفتني بعرس جود بعد شتريد
علاوي:ارد اشوفج كل يوم حبيبتي
حنان:😏اي عود من نزوج تشوفني كل يوم كبالك
علاوي:هااا!!.. اي انشالله نزوج بس شيصبرني علما نزوج
حنان:اوك اشوف يوم ونطلع بس صور لا
علاوي:اوك حبيبتي راح اروح شوي امي تصيحلي باي
حنان بابتسامه:بايات
بسرعه اختفت ابتسامتها وبدت الافكار تدور ابالها(ياترى اكدر اثق بيه..هالايام الشباب تخوف ..بس هوة غير ويحبني وانا هم احبه ما اعتقد هوة من هالنوع من الشباب..انزين واذا طلع يلعب عليه ..لا الله ليكولها انا احبه ع كل سيئاته  ما معقول يلعب عليه..احسن شي اظل وياه بس اخذ حذري..الحذر واجب مالازم اثق بيه ثقه عميه..بس هم ما اكدر اتركه لان صدك حبيته من كلبي واتمنه هو هم يحبني من كلبه)

*****

سما وصلت ولكت نور وابو جود كاعدين بالصاله
نور:هلا تعاي فهميني شصار وخله اخوي اطك طباكاته ويطلع
سما:ما ادري اجه الضابط يحقق وياه ع حادثته بس طلع يعرفه من جان صغير الي عرفته انه اسمه يوسف والظاهر بينهم شي وخله جود يعصب
ابو جود:منو؟؟؟يوووسف؟؟سامع بهالاسم من قبل
نور:يا ترى شسالفتهم
سما:اي صح نسيت اكلكم جود كله انته السبب بموتت اهلي كبال عيني.. لان وثق بيه وكلاله سره وهوة فضحه..بس انا ما فهمت شلون سر خله اهله يموتون ومنو يقصد باهله..ليكون امه..انزين ليش ما كاله انته السبب بموتت امي ليش كال اهلي🤔
ابو جود وكف بسرعه:لازم احاجي ابوي..لازم يعرف
سما:شكل ابوج يعرف السالفه..وانتي نور تعرفين(نور جانت صافنه)هيووو نور احجي وي منو انا؟؟
نور:هااا

سما:فهميني شنو القصه اذا تعرفين

انتهى البارت
.
.
.

‏تحسبوني اختفي بدون سبب "̮

  قاعد أتوسط لكم يطولون الاجازة
   وابشركم ما وافقوا 😂😂

لا جد والله بهالشهر طاح حظ حظ جدي
شهر كامل محبوسه ولا طلعه ولا طبه وحتى العيد ما طلعته😭😭
وماكو تلفزيون وحتى نوم ما متهنيه فيه اربعه وعشرين ساعه حاطه صماخي بالكتاب وادرس وياريت مجاوبه 😭😭
ادعولي عفيه فدوه 😭😭 امس ياله خلصت امتحاناتي

وترى بالنسبه للي كالوا نسينه القصه ترى حتى انا نسيت تفاصيلها 😂
كتب هالبارت ع الي اذكره والله يا خوفي يصير تناقض بالقصه 😁عاد انتوا غلسوا

والبارت الجاي تانوني علما ارجع اقره القصه واكتبه 😅

بس اصدكون التاخير خلاني اشوف وجوه ناس جديده😂 لعد وين جنتوا لاتعلقون ولا فوت