رواية لأجل من احببت سأكون قوية الفصل الخامس عشر 15 - بقلم امل

اجاني طفل شايل بيده اثر #ونتي
اطاني رساله وكلي ذااااك #البيت
كلت يا ربي سترك بيت #صاحبتي
   رحتلهه وحجت من وره #الباب وياي
وكالت ....
#يلعشكتك عوف مشكلتي
راح اعتذر منك ولو عذري #اسهام
وادري يسيل #دمعك من تمر زفتي كلتلهه.... مو هينه وداعت
#العباس بس #الماخذج ياهوه ما گلتي‍‍ي ؟؟
سكتت واحس طلعت كلمه...
#ماتحجين گالت
#صاحبك گلتلها ها #اختي؟ 

ام احمد بغيض:اكيييد ماكو خراب الا وراه الست سما

الخدامه:انا ما اكدر انظف كل هذا..مكافي البيت شكبره ما اكدر ع هالشي..اذا يظل كل هالشغل علي فراح اترك البيت..ميصير لازم تحطون خدم ثانين

ام احمد:ياريت بس هالعجوز النحس ما يرضه..يريد يطلع روحنه ياله يرتاح..بس انا الج سما الا اخليج تنظفين كل هذا

طلعت ادور ع سما ومن وصلت للصاله انصدمت بالصاله والكشور بكل مكان

ام احمد:شنو هاي..شمسوين بالصاله..(وبعصبيه وجهت كلامها لسما) هاي اكيد انتي مو.

نور:هسه انا راح انظفها انا وبدور
ام احمد بعناد:لا هيه تنضفها..احنه مو خدم عدها حتى توصخ واحنه انظف من وراها..يله كومي ابدي بالمطبخ اول

سما جانت واكفه يم نور وجانت تريد تنضف وياهم بس من سمعت اسلوبها بعناد كعدت وحطت رجل ع رجل وكعدت تفلفص حب
ام احمد بعصبيه:احجي وي منو
سما:اندري عنج ..هالسوال سالي لنفسج
ام احمد:كتلج كومي نظفي لاتشوفين شي ماشايفته
سما:انا ما راح احرك صبع لو تنطين..وبعدين انتي شعندج روحي اشتغلي ترى انتي عجزتي واذا تعودتي ع الكعده مو زين راح يصير عدج المفاصل..فاشتغلي احسلج

ام احمد:عجوز بعينج..الحمدلله انا توني بال ٤٠ اسم الله عليه من العجز..وهذا لسانج اذا ماكصرتي اكصه الج..مو كافي انج طفشتي ابو احمد من كثر ما تذبين عليه كلام مثل السم الى ان سافر الرجال وما ندري وين ارضه..بعد الج عين تحجين

سما:والله لو ما مسوي شي جان ما اثر فيه كلامي..بس يدري بروحه غلطان..بس زين طلع عنده ضمير مو مثل بعض الناس ذلوا امي وهسة يردون يذلوني..ولا وبعد حتى لو سمعتهم كلام ما يتحرك ضميرهم ولو سانتيمتر صغير

ام احمد:والله انا امشي ع قانون الفات مات..وما يهمني الماضي مثل حضره جنابج عايشه بالماضي وتمشين وتحاسبين الي اذوا امج..المهم لا اطلعينه عن الموضوع وكومي نظفي

بدور:يمه لا تكبرونها..انا انظف محاجه كل هالصياح..وبعدين حتى احنه خبصنه المطبخ مو بس هيه
ام احمد:كلتلج لا هيه تنظف ورجلها فوك راسها

سما ناظرتها بطرف عينها وبتكبر:😒كتلج تنظيف ما راح انظف واذا ما يعجبج طكي راسج بالطوف

ام احمد:ايا وقحه اذا امج ما ربتج انا اربيج
كمشتها من شعرها وردات تجرها للمطبخ..وسما من الالم ما درت شسوي وبدون شعور دفعتها خفيف حتى تبعدها عنها وتفك شعرها منها

بس من دفعتها ام احمد تعثرت بالسجاده وطاحت..وبنفس اللحظه جان احمد نازل من غرفته لان سمع صوت هوسة واتفاجا من شاف سما تدفع امه واطيح..والغضب طلع من عيونه وطبعا سما لا تقل صدمه عنهم لان هيه مو قصدها تطيحها

احمد:سماااااا يالحقيييره

ونزل بسرعه البرق وعطاها كف طيحها بالكاع وكمشها من شعرها وظل يضربها بوكسيات وراشديات نسه نفسه ونسه الجوه ايده بنت مو ولد حتى تتحمل هالضرب

وحاولت بدور تبعده عنها: كافي حرام عليك
بس دفعها:وخري لا اكمل عليج
وكمل يضربها وام احمد ما حركت ساكن وكان الوضع عجبها وظلت تناضرها بشماته

الى ان دخل ابو علي بسبب هالصريخ ووياه ام علي وام جود
الجد:ااااحمممد ..ارفع ايدك عنها
احمد:بس يبه انت ما تدري شسوت..دفعت امي وطيحتها ..لازم اكسر اعضامها حتى تتعلم شلون تحترم الاكبر منها.قليله ادب ماتستحي
الجد ابو علي:مو انت الي تحاسبها عندها رجال هوة يحاسبها انته مالك دخل.. وانتي(وجهه حجيه لسما) ليش ادورين المشاكل دكافي عرايك
احمد:لانها قليله ادب وما مربايه هذا السبب

ام احمد:تقبلها يا يبه جاهل تدفعني واطيح هيبتي كبال جهالي

الجد:لا يا بنتي ما اقبلها بس مو انتوا تحاسبونها رجلها لو اجه هوة يحاسبها وانا متاكد جود ما راح يقصر

سما قرقرت عيونها بالدموع وسكتت مو خوف منهم..بس خافت اذا حجت فراح تبجي وهيه ما تريد تبجي كبالهم(ليش ولا واحد سال ليش سويت هيج..وولا واحد دافع عني وحجه..والله ما جان قصدي ادفعها..😏انتي شتحجين بس الاهل يدافعون عن بنتهم ويسالونها عن السبب حتى يطلعونها من المشكله وما يغلطونها فاما انتي فمجرد ورطه فقط وذبوها براس جود لان محد يريد يتحمل مسوليتج ..انتي فقط مجرد زياده عدد بالعائله..لو ما العادات والتقاليد وخايفين ع شرفهم يجوز جان رجعوا ذبوني بالشارع مثل ما خلوني انا وامي بالشارع وحدنه..والله لو ما نور وبدور مخففين عني شوي جان لو انتحر لو اهج من البيت)
الجده ام علي:وانتي ست خلود عود انتي الجبيره ليش ما وكفتي ابنج وهوة يضربها
ام احمد:ليش اوكفه خليه يربيها شوي
ام جود:مايصير هيج ..مو كلشي ينحل بالضرب..اكو شي اسمه تفاهم
الجده ام علي:هاي منين تعرف تفاهم
احمد:امي ماكالت غير الصح..وي هذي الاشكال ما ينفع غير الضرب
ابو علي:حتى لو كانت غلطانه ما اسمحلك تمد ايدك عليها عدك مشكله وياها كول لجود عليها

جود:خير سمعت اسمي بالموضع(شاف وجه سما وعقد حواجبه)شصاير
احمد:شوف اذا ما تلم مرتك ترى انا اعر(سكت من شاف نضره جود المعصبه من اسلوبه فبلع ريكه)
جود:انتقي الفاظك
احمد:قصدي مرتك قللت ادب وي امي ودفعتها..شوفلها حل ترى ما اكدر اتحمل

سما ناضرت بعيون جود وهيه كاضه دموعها بالكوه حتى لا اطيح:(اكيد راح يذب الصوج بيه مثلهم وهذا اذا ماكمل شغل احمد وضربني..اعرفه جود يكرهني واكيد راح يلكاها فرصه ويهزئني)

جود من شاف عيونها متروسه دموعه رق قلبه عليها :وليش شنو السبب
احمد:شنو شنو السبب
جود:ليش دفعت امك شنو سبب المشكله..مع احترامي لامك فمعروف السانها ومشاكلها..وبعدين سما صح لسانها طويل بعض الاحيان بس ما اطوله الا اذا احد نرفزها .. واما اذا دفعت امك فاكيد وراها سالفه وامك سوتلها شي

سما ناضرتله بتعجب لان اخر واحد توقعته يدافع عنها هوة جود..توقعت الكل يدافع الا هوه

ابو علي:مو مهم هسة منو الغلطان..المهم فضوا السالفه وكل واحد يروح لداره

وفعلا الكل سمع كلام ابو علي وصعد لداره ولمن رادت سما تروح جود كضها من معصمها وسحبها وياه لمكتبه
سما:شجاي اسوي انته..اريد اروح لداري..جاي احجي وي منو هد ايدي

جود ما رد عليها ودخلها المكتب وكعدها ع الكرسي وناظر لشفتها المجروحه

سما انتبهتله يباوع لشفتها:نعم رايد شي..شوف اذا تفكر تسوي شي راح..راح..راح(كعدت تفكر بشنو تخوفه)
جود ناظرها باستهزاء:اي شنو راح تسوين

سما اول شي خطر ابالها كالته:راح اصرخ

جود:حلفي بس..هذا الي طلع عندج بعد هالتفكير..والله غبيه..صرخي عادي زوجتي ومن حقي اقربلها ومحد يكدر يحجي

سما مدت صبعها بتهديد:شوف..انته قرب وشوف شراح..

قاطعها جود :رجاءا ما بيه حيل ارد ع تهديداتج الفاضيه..ادري ما راح اسوين شي

كام وجاب قطن ومعقم وهالسوالف واجه
وسما فهمت انه ما يريد يسوي مجرد يريد يعالج الجرح فاطمنت

سما:شنو مو بعينك حتى ما اكدر اسوي شي
جود:😏اي واضح شفتج شسويتي قبل

سما(صحيح والله وكفت جني ثوله وما سويت شي..خل اغلس احسلي لان لو ظليت اناقشه بهالموضوع فانا الخسرانه.)

جود كعد بكرسي قريب ع سما وكض ذقنها بايد وبده يمرر القطنه المعقمه ع شفايفها بايده الثانيه

سما:هسه الا تكض وجهي ..ما تكدر تعقم الجرح بايد وحده
جود:ممكن تسدين حلكج شوي وتخليني اخلص بسرعه
سما:سديته

عقم الجرح و خلص وظل يناظر شفيفها
سما:(كلبي كارصني من هالنظره حاسه وراه شي)

حط ايده ع خدها ومرر صبعه ع شفايفها وخصوصا ع الجرح

سما:(حاسه عقلي جاي يصرخ خطر خطر..انتي في خطر..لازم اغير الموضوع حتى ينسى السالفه)

قرب وجهها من وجهها بس هيه قاطعت نيته
سما:اكو سوال يكركع بكلبي وبس انته تجاوبه

بعد وجهه عن وجهه بس ايده لازالت ع خدها
جود:سالي
سما:منو ريهام
جود وخر ايده وعقد حواجبه:منين سمعتيه هالاسم
سما:شنو نسيت منك انته كلته شكلك جنت تحلم وتردد باسمها

جود بانزعاج وشويه عصبيه:سدي الموضوع ما اريد احجي
سما:لا عيوني من حقي اعرف عن سوابقك..بعد انا ابتلشت بيك وكضيت فلازم اعرف تفاصيل حياتك وتجفيصاتك وي البنات..كول واعترف منو هيه واكو غيرها لو لا..ترى انا وحده متفهمه وما راح اشهرك واصرخ ومدري شسوي مثل بنات هالوقت

جود:لا تدخلين بشي ما يخصج فهمتي

سما:شنو ما يخصني ترى انا راح اصير زوجتك..طبعا انا يمكن اول وحده بالعالم تزوج واحد ما تعرف شي عن رجلها المستقبلي..الله يسامحج يمه بلشتيني وي واحد شكله راح يطلع نسونجي

سكت جود وكعد يفكر وهوة عاقد حواجبه :كل الي لازم تعرفينه اني ما عندي سوالف مكسره وريهام جانت خطيبتي وما صار نصيب

سما:😳شنو!!خطيبتك؟وليش انا ما عندي علم انك جنت مخطوب..وشنو السبب بانفصالكم..اكيد انته السبب وطفشتها..(بصوت ناصي)اعرفك عدل لسانك متبري منك😒
جود:😒كلتي شي
سما:لا سلامتك بس اريد اعرف السبب
جود:شي ما يخصج ويلا طلعي بره ولا تمصخينها..شكلج انتي ما تنطين وجه

سما:😒 شنو ما انطي وجه هذا حقي مدام تريد تزوجني..(عقدت ايدينها ع صدرها)وهاي كعده وطلعه ماراح اطلع
جود غمض عيونه فتحهم بملل:(ياربي شنو هذا الي بلشتني فيه..)

سما:صارلك ساعه صافن بوجهي..خير اكو شي بوجهي

سكت جود وفقط فر وجهه
سما:هااا يله احجي
جود:استغفر الله العظيم ..كل السالفه جنت مخطوب لها وهيه تعودلنه تصير بنت خال حيدر ونور
سما:لحظه يعني ليش مو بنت خالك
جود:لان ام حيدر ونور تختلف عن امي
سما:لحظه يعني خاله ام جود مو امك..لعد ليش اصيحولها ام جود
جود:لان هيه ربتني من كنت صغير وهيه بمثابه امي وتقريبا الكل نسه امي الحقيقيه
سما:وانته؟؟
جود:انا شنو!!
سما:نسيتها لو تتذكرها بعدك
جود:اجذب عليج اذا كتلج نسيتها اصلا كل يوم اشوفها بالحلم

سما: اهااا كمل

جود:المهم ام ريهام ماتت هم وهيه طفله وابوها ما قبل يزوج بسرعه فخله بنته عند اخته حتى تربيها فضلت عدنه .. وحتى من ازوج بعد فتره ظلت عدنه لان ابوها ماجان يريدها تعيش تحت رحمه مرت الابو او بالاحرى مرت ابوها ما رادتها والصراحه كانت قريبه مني من الطفوله لان اثنينه عدنه نفس الالم (فقدان الام) صحيح امي ام حيدر ما قصرت بس يبقى مكان الام الحقيقيه غير..المهم انا ما فكرت بيها كزوجه حتى من كبرنه..بس من جنا بفترة الجامعه اجت صارحتني بحبها ووصل هالشي لجدي وقرر يزوجنه وبالبدايه فقط انخطبنه علما نخلص دراسه وانا بوكتها كنت سنه اخيره وهيه سنه اولى وبنهايه السنه شركات جدي بدت تفلس وحده وره الثانيه وسيطرتنه بالسوك بدت تقل وطبعا من يطيح الواحد تبده تطلع وجوه الناس الحقيقيه

اجتني بيوم وكلتلي
انا صح احبك بس ما اكدر اعيش وياك ع فقر..انا تعودت ع العز وابوي هم ما يقبل لبنته تعيش بالفقر لذلك لازم ننفصل لاني اريد اعيش حياتي وما اريد اندفن وياك بالفقر.. ومن تخرجت مسكت شركات جدي ورجعتها مثل قبل وخلصت السالفة

سما:انته كلت انها صارحتك بحبها..انزين وانته!!تحبها؟

جود:الصراحه ما ادري اذا كنت احبها هيه لو احب اهتمامها..بس الي اعرفه بعد ما اثق بمراة لان متقلبه المزاج وتمشي ع المصالح ..والفلوس اهم شي عدها حتى تتفيك بيهم يم صاحباتها

سما:بس مو شرط كل النسوان مثل بعض ..شوف انا هسة مثلا مع انك عندك فلوس بس ما حبيتك ولا حاولت اتقربلك علمود فلوسك..وهذا دليل ع انوا مو كلنه نفس بعض..وانته عاد لا تمصخها..علشان مراة رفضتك تعيش حيات ماساويه وتعقد الامور..ما تبيك هيه الخسرانه..معادله بسيطه

جود :انا ما جرحني تخليهاعني لان بنت ومن حقها تاخذ الي تريده وخصوصا هالايام اغلب البنات ادور ع الغني فبوكتها سامحتها بس (سكت شوي كانوا جان متردد يكلها بس كمل حجي ) بس الي ما اسامحها عليه علاقتها بصديقي..هسه ما لكت واحد تخوني وياه الا صديقي

سما:صديقك؟؟انزين شلون عرفت

جود:خانتني وي صديقي الي هوا ولد عمتي ..واكتشفت انوا بينهم علاقه حتى قبل لا نفصخ الخطوبه..حتى ما احترمت الرابط الي بينه..بس عرفت انوا عائلتي فلست حولت ع ثاني😏

سما:قليله تربيه😤..ما تستحي..انزين من واجهتم شسسوا

جود:😏هنا المشكله حتى ما استحوا واعتذروا بالعكس ..صديقي من واجهته يكلي

فلاش باك
جود بعصبيه :ما اصدك انته تخوني يا صديق طفولتي😏..وانتي ما لكيتي الا صديقي تخونيني وياه قله رجال يعني

حسن:اصلا عمري ما اعتبرتك صديق بالعكس جنت تنرفزني لان مسوي روحك السيد المثالي بكلشي وكلما سوينه شي كالوا شوفوا جود شسوه شوفوا جود طلع الاول صيروا مثل جود..جود جود..يا اخي كرهتك من كثر ما جانوا يستصغروني يمك

جود:(ضحك بسخريه)ههههه يعني كل صداقتنه هاي السنين جذب هه
حسن:والله انته اوهمت نفسك بهالصداقه ..انته بالنسبه الي انته بس ابن خالي وبس وتعاملت وياك ع هالاساس

ريهام: جود انا اسفه ع كل شي بس لا تزعل الدنيا قسمه ونصيب وانا مو نصيبك فلا تتعارك وي حسن بسببي

جود:😏هههع شكلج عايشه الدور ..مو جود اليزعل علشان مره..ومنو انتي اصلا حتى اتعارك علمودج..وبعدين لا تنسين ترى انته الي اجيتي بنفسج تحت رجولي واعترفتي بحبج مو انا.. ولو ما جدي جان ما اخذتج..بس الحمدلله ربي كشفج انتي والاخ قبل لا اتورط بيج

< َ:
ربي شافي كل شخص شاف الخيانة😔
ربي ما اوصيك اول واحد انة😢
ربي بية جروح متروسه ملح😖
ربي والمجروح يسهر لصبح💔>

****

علاوي:الوو انتي وياي..شبيج ما تحجين
حنان:اي وياك..بس شوي استحي اول مره اكلم ولد بالتلفون وما ادري شكول

علاوي:تصدكين اول ما شفتج كلت بس هاي هيه البنت الي ادور عليها من اربع سنين وكلت لازم اتعرف عليها

حنان:عاد اربع سنين..مو جنه هواي
علاوي:مو هواي يا بعد روحي..انا سنين صارلي انتظرج..اخخخ يا حنان شسويتي بكلبي..من يوم شافج وهوة ينبض بالحياه

حنان:لا تبالغ عاد
علاوي:حقج ما تحسين بالي احسه..ولج اموت عليج<ابو دروب بدقيقتين حبيتها😒>

حنان: كافي عاد استحي لا تكول هالكلام..مو من البدايه هيج ..لازم

قاطع كلامها دخول احمد لغرفتها وسدت التلفون بسرعه

احمد:هاي سموه راح اكسرها ياله ارتاح..اخخخ لو ما ابوي الحجي جان عرفت شلون اصرف

حنان:بسم الله الرحمن الرحيم..شبيك اطب جنك داخل حرب..دك الباب قبل
احمد:وانتي شبيج خايفه هاا..ما يخاف بس الي يسوي جريمه

حنان:اا انا ل لااا ما مسويه شي بس خوفتني بطبتك..بس شمسويه سما بعد

احمد:لازم اعلمها درس واخليها تتربه واخليها تجي تحت رجول امي وتعتذر بس شلون

حنان:لا تستخف بسما ترى مو سهله وما راح تجي بسهوله وتعتذر

احمد:معاج حق بس لازم نفكر بشي نكسر خشمها

****

سما:انزين سوال ..شصار ب ريهام وحسن
جود حط ايده ع عيونه بانزعاج ومررها ع وجهه:انتي ملاحظه انوا اسالتج كثرانه..راح اجاوبج بس ع هالسوال واطلعين..الصراحه انا بعد ما فصخت الخطبه سافرت وما حبيت اضل واشهد خيانتهم بس من رجعت سمعت انوا ابوي الحجي ابو علي رفض زواجهم وصارت بينهم مشاكل وكل واحد راح بحاله..وريهام ابوها سفرها تكمل دراستها وحسن عائلته كلها سافرت علمود شغل اخوهم وشركاتهم وسافر وياهم وما سمعت عنهم شي

سما:هذا يفسر مزاجك المنفس  لان خانوك اعز ناسك وما كمت تثق باحد
جود:😒صرتي محلله نفسيه من وراي..وبعدين شنو منفس احترمي نفسج..بس اصدكين مو صوجج صوجي انا الي انطيتج وجه..يله طلعي وبدون مطرود

سما:هوة انته خليت بيها بدون مطرود..المهم اخر سوال عندك صوره لحسن وريهام

جود:اللهم طولج يا روح..لا ما عندي ما احب احتفظ يالصور..واصلا شسوين بصورهم

سما:حرامات ردت اجرب شغله

جود:يله بره صدعتي راسي..وصج قبل لا اطلعين اذا تعاركتي وي ام احمد راح تشوفين..

سما:شنو!!انته بلسانك كلت انوا لسانها طويل وهيه السبب انا شعلي

جود:صحيح بس هذا ما ينفي حقيقه ان لسانج اطول وما تسكتين ..بس انا محبيت احجي هيج يمهم وابينلهم انتي غلطانه هم،  حتى ليستقوون عليج
سما:😒ما تكدر لازم تكلب وانا اكول شعجب وكف وياي..بس عالعموم هم مشكور

طلعت واتصل جود بمصطفى حتى يطلع للشركه

وسما التقت ب احمد وهيه صاعده لغرفتها وسمعته يتكلم بالتلفون

احمد:عليوي اليوم جايكم..اريد استانس..اريد حفله ولا احسن

علاوي:انته بس تعال وتلكه اليسرك..
احمد:اهم شي البنات اذا ماكو ما اجي
علاوي:انته بس تعال ومضبطلك وحده ع كيف كيفك

احمد:جايك ركض..لعيون البنات الحلوين
عليوي:اي وشخبار البنت التكلمها..
احمد:بعدني جاي اضبطها بس ما بقه شي يومين وتجي للشقه😉

سما بصوت ناصي وبقرف:واحد ما عنده شرف
احمد سد لتلفون من سمعها:نعم كلتي شي
سما من بين سنونها:كلت ووواحد ماعنده شرف..لو عندك شرف جان ما تلعب ع بنات الناس علمود تتسلى فيهم

احمد:نصى صوتج لحد يسمعج..اذا دريت انج كايله لاحد يا ويلج..وبعدين ياهو راح يصدكج..انا راح انكر كل شي

سما:انته ما تخاف من ربك..اذا ما تخاف من ربك عالاقل خاف ع شرفك انته هم عندك خوات..لا تطلع حوبت هالبنات بخواتك ويصير بيهم مثل ما تسوي بهالبنات

احمد:الحمدلله خواتي متربين وما عدهم هالسوالف..بس اصدكين معاج حق هسة كمت اخاف لان عندي اخت مثلج..الله واعلم شمغبره قبل لا تجينه..واتوقع منج كلشي ما راح اتفاجئ اذا لكيتج يوم باحضان رجال وتطيحين شرف العايله بالارض

سما حاولت تضربه بس كض ايدها وضغط بايده ع ذقنها بقوه وثبتها ع الجايط
سما:يااا واطي انا اشرف منك يا كلب..عوفني يا حمار تتريجل ع مراة ..عوفني حتى اعلمك شلون الرجوله يا كلب..ما ناقص الا انته تحاجيني عن الرجوله

احمد:سدي حلكج احسلج لا امرمط وجهج بالارض يا حقيره
سما:انته عار ع جنس الرجال

احمد ضربها راشدي :كتلج سدي حلكج لا ابتلي بيج

جود كان مار يريد يطلع وشافها:اااااحمد

احمد من سمع جود تركها
جود:سما صعدي لغرفتج
سما ناظرت احمد بقرف من طرف عينها وصعدت

جود قرب ع احمد وضربه بدون سابق انذار:هاي لانك ضربتها كبال الكل..مساع ما كدرت ارد عليك احتراما لابوي الحجي
احمد:اخخخ شبيك تخبلت
جود رجع ضربه:هاي علمود توك تجرات ومديت ايدك عليها
احمد:اه كافي تضربني علمود هالواطيه
ورجع ضربه مره ثانيه:وهاي علمود لا اطول لسانك عليها

وكان يبي يروح ورجع لكه احمد توه كايم من الارض ورجع ضربه مره ثانيه وطاح ع الارض

احمد:وهاي ليش
جود بابتسامه مستفزه:هاي علمود لا تفكر تمد ايدك عليها

وراد يطلع وقاطعته نور
نور:ماشالله ماشالله اخوي العزيز الهادئ يتعارك لا وهنوب وي واحد من العائله لالا اكيد صاير شي
جود:لا حول الله شلون يعني ما نطلع اليوم

نور:كله علمود الحب سما..اااي الله يرزقنه
جود:اي حب اي بطيخ..كل الموضوع انها مرتي وكرامتها من كرامتي..وما اسمح لاحد يهينها او ياذيها

نور:🤔اممممم وجهه نظر مقبوله بس هم بيها حب لان بسبب الاوضاع الاشوفكم بيها كلبي يكلي اثنينكم بادين تحبون بعض بس كل واحد مراضي يتنازل ويعترف بهالشي يلا شورانه كاعدين ونشوف شوكت اطيح الحواجز

جود:ماكو فايده بالحجي وياج وراي شغل وانتي شكلج فاضيه وما تخلصين جدال..مع السلامه
نور:لحظه جدووو يريدك
جود:شكل اليوم راح يخلص وانا هنا

جود صعد لابو علي

جود:طلبتني يبه
الجد:اي تفضل..انا ما راح الف ولا ادور لان ادري وراك شغل
جود:ع راحتك يبه
الجد:انا ملاحظ انوا انته ما تكعد هواي وي خطيبتك وولا مره شفتك طلعت وياها مشور..ليش!! الامور بينكم مو زينه

جود:لا كلشي بخير بس تدري وفات امها اثرت عليها وهسه كلشي بخير
الجد:الحمدلله انا بس ردت اطمن عليكم..بس طلعها مشوار اذا فرغت..خطيه كله محبوسه..وبعدين احلى ايام ايام الخطوبه فطلعوا وستانسوا وتعرفوا ع اطباع بعض

جود:تامر امر انشالله اليوم نطلع
الجد:ما يامر عليك عدوا يوليدي..والله بس انته الي مبرد كلبي..ولا باقي اولادي واحفادي خرطي..حتى بالشغل ما يعتمد عليهم..لو ما انته جان ما ادري شصار في الشركات

جود:لا تكول هيج حجي عمي وابوي بيهم الخير
الجد:اي خير هذا ابوك اهم شي عنده السفر حتى اهم من اولاده ..ما يكعد بالبيت وعمك كلشي ما يفتهم بالشغل..من قسمت الشركات بينهم لان ردت اتقاعد شسووا ..ابوك هد الشغل واعتمد ع اغراب باداره الشركه وسافر الى ان فلست شركاته بسبب البوك وهوة يا غافلين لكم الله

اما عمك فهذا كلشي ما يفهم ويدخل نفسه بصفقات خسرانه بدون ما يدرسها..والله لو ما انته كضيت الشركات ورجعتها لمجدها جان هسة مفلسين وكاعدين ع الحديدة..اشكر ربي الدزك اليه.. لان انته موجود اكدر اموت وانا مطمن

جود كام وباس ايده جده:لا تكول هيج حجي طولت العمرك الك..انته الخير والبركه..لو ما انته وكفت وياي جان ما كدرت اسوي شي

الجد:الله يرضه عليك يوليدي
جود:يله استاذن يبه وراي شغل مع السلامه
الجد:الله يحفضك ويوفقك

****

نور:بدور شرايج نلعب بليستيشن
بدور:ما اريد..اريد اكمل روايتي
نور:اوووف هدي الكتاب مو وكته..انا ضايجه امشي نلعب
بدور:ما اريد كولي ل سما تلعب وياج
نور:مالت عليج..سماااا سماااا
سما:وجعه شتردين
نور:تعاي لعبي بليستيشن..عفيه ضايجه
غسما:يله امشي الا اسحلج سحل
نور:تسحلين منو يا حبيبتي..لعبي لعبي خل اعلمج السحل العدل

****

عزيز:وينك يبه..يبه
ابو عزيز كان جاي ينطف مسدسه:شرايد
عزيز:لشوكت هذا راح تخلي وراي..انا مو صغير حتى تحطلي جاسوس يفتر وراي ويمنعني وين اروح

ابو عزيز:اعتبره ما موجود وروح وين ما تريد..وظيفته بس يمنعك تقرب لعائله ابو علي وخصوصا من جود وسما

عزيز:ليش يبه بس اريد اعرف شمتاني ..خليني اخذ سما اترجاك

ابو عزيز:من اخلص الي جاي اخططله اخذها واشبع بيها متهمني(وجه المسدس البيده لولده)بس صدكني اذا خربت الي اخططله صدكني راح اكتلك وما راح يرفلي جفن

عزيز:يبه توجه المسدس الي..انا ولدك تكتلني..لا ما معقول..يبه متاكد انا ولدك..اخاف لاكيني بالشارع وما ادري ..ليش تعاملني هيج

ابو عزيز:لان ادري بيك غبي وعندك كلشي بالقوه وما تفكر بالشي قبل لا تسويه

عزيز:مشكور يبه..يجي منك اكثر..بس انته صارلك سنين تخطط وما جاي اسوي شي..كلي شي واحد سويته بهالتفكير

ابو عزيز:ضرغام دخل الضيف(دخل الشخص المطلوب)اقدملك علاوي..هذا الي راح يضربلي عصفورين بحجر واحد

عزيز:منو هذا
ابو عزيز:هذا صديق احمد وحبيب الست حنان😏

عزيز:شنووو!!انزين شراح يسوي

ابو عزيز:كافي اسئله..علاوي شسويت بلي كلته الك

علاوي:انا هسة تقربت لحنان..انطيني فتره اخليها تتعلق بيه وبعدين اخذ الي اريده منها😏

ابو عزيز:حلوو..واحمد شصار وياه
علاوي:جريته لطريق النسوان والسهرات..وحاولت اعلمه ع المخدرات بس يرفض ياخذه لان يكول مايريد يصير مدمن ويفسد عقله

ابو عزيز:كدامك اسبوعين واريدة يصير مدمن
عزيز:معقول يبه..انزين شدخلهم بانتقامك انته تريد تنتقم من الجد ابو علي وجود هذول شدخلهم..شنو دنبهم

ابو عزيز:ذنبهم انهم احفاد ابو علي..الا اكسر خشم هالعايله واخلي كرامتهم بالارض..وما ادري هالعايله ع شنو شايفه نفسها

عزيز:بس يبه...
ابو عزيز:لا بس ولا شي ..اذا ادخلت بهالموضوع تعرف شراح يصير بيك

عزيز:انشالله يبه..عن اذنك

وطلع

ابو عزيز:علاوي اريد هالبنت صديقه حنان الي استخدمتها حتى تتقرب لحنان..اريدها تتقرب لنور وتسحبها لها

علاوي:انشالله استاذ

******

دخل حيدر ولكه البنات يلعبن بلي

سما:ايا حمار يالاثول ما يطك عدل
نور:لالالالا يبوووي جان متت الا شوي..بوكس يا اثول
سما:فززززززت
نور:😤اكيد غشيتي يالغشاشه
سما:شنو غشيت..وين اكو غش بالبلي ..شنو جاي نلعب اوراق حتى غشيت
نور:معليه غشيتي اكيد
سما:خلي روحج رياضيه وتقبلي الخساره بروح مرحه
نور:امشي نلعب كيم ثاني..الا انتقم
سما:يله شكلج حلتلج السحله

حيدر وهوة يهز بايده:تهي بهي..ولكم شخليتوا للولد..كاعدين تلعبون مصارعه وصريخكم واصل للشارع بسبب هاللعبه..(محد رد عليه )هيووو احجي وي منو

نور:هااا شتريد..خلي الواحد يلعب
حيدر:كومي سويلي شي خفيف مشتهي اكل
نور:مو فاضيه هسة..بعدين بعدين
حيدر:استغفر الله ..كومي لا اعلمج شسوي
نور:اووووف لا تخليني افقد تركيزي راح اخسر من وراك

بدور بخجل:تريد اسويلك اكل
حيدر:فديتج والله محد ينطيني وجه غيرج
بدور بابتسامه:تدلل
حيدر:وانتي اعلمج يا نوروه الا اراويج

راح وشلع راس البلستيشن من نقطه الكهربه وخرب لعبتهم وشرد

نور:حويدر اصبرلي بس خل اكض كفشتك الا انتفها الك شعره شعره واخليك اصلع..اخخخ شرد اخخ يالقهر ..الله ياخذك يا حويدر راح اطلع كرون براسي

بدور:اسم الله عليه..لا تدعين عليه

نور وسما ناظروا لبعض وناظرولها
سما:اممممم حاسه وره هالابتسامات والدفاع شي..حاستي لا تخيب
نور:انا هم جاي اتحسحس نفس تحسحسج
سما:يعني تحسحسنه مشترك..يله بدور كولي شنو السالفه

بدور:ش شنو شبيجن
نور:🤔امممم ارتباكها زاد تحسحسي
سما:مي تو
بدور:شبيجن كل هذا علمود كلت لا تدعين عليه..ترى عادي لان الدعاوي مو زينه حتى لو مو قصدج اخاف تتحقق

نور:والاكل شنو حجتج عليه..لو انا كايلتلج جان كلتي سوووري اريد اقره روايتي ما اكدر

بدور:عمى بعينكم لا تكعدون تتخيلون افكار من يمكم ترى كلها اكل شمسويه (حتى لو احبه شالفايده وهوة اصلا ما يطالعلي😔)

وتركتهم وطلعت حتى لا يسالون اكثر
.
.
.
.
انتهى البارت

سوري سوري سوري سوري الف سوري ع التاخير
والله جنت تعبانه من الامتحان وطايح حظ حظي وجنت محتاجه رست والصراحه ما جانت عدي افكار

انا صح راح اطول بفترات التنزيل بس راح احاول اطول البارتات