رواية لأجل من احببت سأكون قوية الفصل الرابع عشر 14 - بقلم امل

ناظرها ببرود وبنبره سخريه:تحلميييين

سما باعصاب تلفانه:مو بكيفك ما اريدك ياولد الناس مو كوه

ابو احمد:اهدوا وخلينه نتفاهم ما ينفع الصراخ وسما صعدي جنطتج وخلينه نكعد ونحجي

دخل الجد ابو علي وابو جود بهاللحظه

ابو احمد ناظرهم بحزن:دفنتوها!!
الجد:اي الله يرحمها
سما بصدمه:لحظه لحظه دفنتوا منوا(ودموعها بدت تجمع بعينها)ليكون امي
ابو جود:اي يا بنتي..اكرام الميت دفنه..ومو زين ناخر دفنها هواي

سما ظلت تبجي وتصرخ : انتوا ليش تسوون بيه هيج..حرااام عليكم..ما كلتولي ع مرضها ولا خليتوني اشوفها ..وخليتها تموت وهي زعلانه(توقفت ثواني بسبب شهكاتها) وهسة ادفنونها بدون ما اشوفها واودعها..ليييش ..عالاقل جان خليتتتوني اااشوفها قبل لا ادفنونها..حرررام ع عليكم

تركتهم وركضت لغرفتها وهي تمسح دموعها بجف ايدها وتبجي ونور لحكتهم

ابو جود:وياها حگ..صارلها هواي ما شافت امها..واحنه رحنه دفناها بدون ما نحترم مشاعرها

الجد:بس هذا احسلها لو شافت امها بعد المرض شلون ذبلانه والمرض سالها سل وشلون شعرها طايح ..الله واعلم شلون جان راح تنصدم ..خليها تزعل يوم يومين وترضه

تنهد ابو احمد وكعد ع القنفه

بدور تحاجي حنان بس هيه تسمعه:ياااحرام كسرت خاطري
حنان:الله يساعدها وتتحمل هالشي..خل اروح اشوف امي مدري شبيها من الصبح

وراحت حنان دخلت بغرفه امها

حنان:يمه صارلج شكثر نايمه..يمه!!!

اقتربت منها وشافتها متمدده ع السرير وتنتفض تقدمت بخوف لامها وهي تتحسس حرارتها:اسم الله عليج يمه .بيج شي

ام احمد وهي تنتفض:مما بيه شي
حنان:الا بيج شي انتي من رديتي من بره وانتي مو ع بعضج
ام احمد:كتلج ما بيه شي طلعي بره

حنان بتردد:يمه سمعتي بموتت ام سما..خطيه سما مع انها لئيمه بس كسرت خاطري مساعه

ام احمد بلعت ريجها وصار وجها الوان وسكتت
وحنان تركتها وطلعت

سما دخلت وسدت ع روحها الباب وكعدت بزاويه وتبجي بغرفتها الظلمه وهي تحظن رجولها ودافنه وجهها بين رجولها وتجاهلت ظربات نور ع الباب حتى تفتحلها الباب (يمه معقوله تركتيني..شلون اجاج كلبج اتركيني..لا انا جاي احلم اكيد..لا هذا كابوس ..يمه اترجاج حظنيني مثل كل مره من احلم بكوابيس وكعديني..اترجااج)

نور تركتها ع راحتها وراحت للصاله ولكت بدور كاعده
تنهدت وكعدت:ما ادري شسوي وياها..اليوم كله ما اكلت شي
بدور:خليها ترتاح هسة وباجر انشالله تصير نفسيتها زينه
نور:انشالله

بدور:ابد ما توقعت امها مريضه بهالمرض..كانت مبينه قويه وما بيها اي مرض
نور:سمعت جدي وجدتي يحجون انها جانت تدعي القوه علمود لا تعذب سما وياها بمرضها
بدور:اي بس من حق سما تكعد وياها وتشبع منها  وتستعد لموتتها قبل لا تموت مو تبعدها عنها وتخليها تنصدم بهالشي..بالعكس هالشي خلاها تحزن اكثر

نور:سوت الي ضنته صحيح
دخل حيدر وكعد يمهم:شلونهم البنات الحلوين
نور:كلش مو وكتك
حيدر:😒هسه انا شكلت..المهم بدور..شلون سما
بدور:قفلت ع نفسها الغرفة وما ترضه تفتح لاحد..الله يساعدها ويطلعها من الحاله الي هي فيها
حيدر:مسكينه..انشالله الايام تنسيها
*****

بيوم جديد كعدت سما وهي تحس روحها مكسره وركبتها متشنجه من نومتها لان نامت ع نفس وضعها البارح وهي حاطه راسها بين ركبها

راحت للحمام وغسلت وتوضت وصلت الفاتها وصلت ركعتين لروح امها وقرت قران
وظلت ع هالحال حابسه روحها بغرفتها شهر كامل بس تطلع تغسل وتقضي حاجاتها وترجع تنعزل حتى العزه ما حضرته وما تطلع الا للضروره واجت لها ام طلال وجميلة وظلوا يبجون وياها وام طلال شرحت مرضها لسما وشلون امها تحملت المرض علمود ما تكدرها او تضغط عليها بالمصاريف وهذا زاد معانات سما وحست بضعفها مع انها حاولت تكون قويه وفشلت وهذا الشي خلاها يزيد بجيها وانعزالها

وبيوم كعدت الصبح ولبست شالها وكابها وطلعت بدون متكول لاحد وعند الباب وكفها الحراس حتى يجيبولها السياره ويروح وياها احد بس هي رفضت

الحارس:اسف بس الاستاذ منعنه نخلي احد يطلع بدون سايق
سما:مو شغلي انا مو مسجونه هنا ..اريد اطلع
الحارس:لحظه ..
وراح اتصل ع جود

**عند جود بالسياره

مصطفى يباوع للاستاذ من المرايه:احممم

جود وعيونه ع اللابتواب:اخلص شتريد
مصطفى بصدمه:شلون عرفت ارد اكول شي

جود ومارفع عينه:صارلي سنين مكابلك وحفظتك اكثر من اهلي

مصطفى بتردد:اممم لا ولا شي
جود:ع راحتك ..صح نسيت اكلك سايق البيت راح يترك الشغل..فدورلي واحد وما اوصيك اريده عضلات وينفع يكون بوديكارد وسايق بنفس الوقت ..ولا يشيل هم الراتب

مصطفى بفرحه:حاضر استاذ
جود باستغراب:شنو سر هالفرحه
رن تلفونه ورد وكان الحارس يكوله عن موضوع سما
جود:خليها تروح بس خلي احد وراها بدون ما تحس
الحارس:حاضر استاذ
وجه الحارس نظره لسما:بامكانج ترحين
سما طلعت  وخذت تكسي وتوجهت لبيتهم القديم ولكت صاحب البيت جايب مؤجرين جدد وجاي ينقلون غراضهم

سما بصدمه:لااا هذا بيتنه منو سمحلكم تكعدون بيه
سدت طريقهم لداخل البيت:مستحيل اسمحلكم ادخلون هذا بيتنه..وانته (تحاجي صاحب البيت) ما صدكت تاخرنه بدفع البيت يومين واجرته
صاحب البيت:مو يومين صارلكم شهر وبعدين انتوا مو لكيتوا اهلكم وماشالله اغنياء بعد شتردون
سما:مهما يكون انا ادفعلك الايجار بس لا ادخل احد بيه

المؤجر معصب:هسه صار بيتنه فرجاءا وابتعدي بالطيب لا ابعدج غصب عنج..مو فاضيلج انا اكعد انتظر مزاجج وراي شغل
ولمن رفضت توخر حاول يدفعها
بس تدخل الحارس الي تبع سما ووخره عنها وحاول يهديه وتكلم شوي وياه والتفت يشوف سما بس ما لكاها تملكه الخوف والرعب من الي راح يسويه جود بيه لو دره

حاول يدورها بس ماكو امل ولمن فقد الامل اتصل بجود

جود:يااااغبي شلون تتركها تروح لوحدها..انته حمار..صوجي انا اعتمدت ع واحد مثلك

راد يطلع
سلطان:بس استاذ الاجتماع بعد نص ساعه
جود:الغيه
سلطان:بس استاذ هالاجتماع مهم
جود وهو يكمل طريقه:كلت الغيه ولااا تناقش
سلطان:اوووف ياربي شكل للناس كلشي ع راس سلطان

شخط بسيارته واتصل ع نور ع امل انها رجعت للبيت بس خابت ضنونه لان ما لكاها
وراح لبيت ام طلال وهم ماكو..انجن وظل يفكر وين ممكن تروح
جود:(معقوله تكون راحت هناك.. لا منعقول مكان بعيد..بس ليش لا خبله وتسويها)
شخط بسيارته وطلع

***
عند سما كانت رايحه لقبر امها راحت سالت الدفان ودلها ع قبرها وذبت روحها عالقبر وظلت تبجي

سما:

گوميلي ييمه بگلبي تسعر نار
محتاج لحنانچ فدوه ضميني
گوميلي ييمه عيوني اجت خطار
تشكيلچ عذابي وغربة سنيني
اسمعيني اسمعيني اسمعيني
اريد بگبرج اغفه ،، وياچ خليني
****
من يوم الدفنتچ يمه مامرتاح
شلت الهم ييمه منهد عشريني
وطلگت الفرح يايمه ثلث ايمان
وربطت الحزن شديته بيميني
لان ماأگدر انسه وداعتچ معذور
اسمچ هو دمي وكل شراييني
****
گوميلي ييمه وداعتچ تعبان
بس بشوفچ ابره وتبتسم عيني
بس انتي الوحيده القادره بهالكون
بتراب الچفن يحبيبه تشريني
اسمعيني ييمه وگومي اترجاچ
مامرجيه منچ هيچي تاذيني
گوميلي آنه جيتچ ماأريد اعذار
طشرني الوكت يايمه لميني
****
طبعچ وآنه اعرفچ ملگه للخطار
خطارچ عزيز وماتفشليني
انفضي تراب گبرج كسري السرداب
وبطيبت كلامچ يمه حاچيني
محتاج النصيحه وداعتچ محتار
شوريني ياأمي ارجوچ انصحيني
اعرفچ انتي دومچ ماطبگتي الباب
شنهو الغيرچ يحبيبه فهميني ؟
مو چنت آنه أأمر وحدي بهالكون
ولوخلص حليبچ ، دم ترضعيني
ولو مرني الكدر والآه والاحزان
بعيونچ ييمه انتي التشافيني
اسمعيني ياأمي ارجوچ اسمعيني
اريد اليوم اوفي شويه من ديني
****
معذوره ياامي وادري ملك الموت
مايعرف رحم لافرصه ينطيني
اخذ مني الحبيبه الحتى رب الكون
ضل طول العمر بيها يوصيني
اعذرچ والله يمه وماعليچ قصور
لوما باللحد چا والله شلتيني
احبچ وابقى احبچ لآخر الانفاس
چي من نور وجهچ كملت ديني

سما ومن بين دموعها:يمه حبيبتي انا جيت..مشتاكتلج هواي..ياترى انته مفتقدتني مثل ما انا مفتقدتج
تصدكين يمه هالايام ما اكدر انام..(حطت راسها ع الكبر) تذكرين من جنت ما اكدر انام جنتي تحطين راسي بحظنج واكلج قصيلي قصه وانتي تكليلي صرتي شكدج وبعدج تردين اقصلج قصه(ابتسمت بحزن)هسة انا ما اريد قصه بس اريد انام بحظنج(غمضت عيونها وما حست بنفسها ونامت)

وبعد لحظات وصل جود وشافها وغمض عيونه وتنفس براحه
راحلها وجان بداخله نار تسعر جان يتمنه يرزلها يضربها اي شي المهم يطلع حركه كلبه تمنه يحسسها بالخوف والرعب الحس بيه من مالكاها ... من جان بالسياره وهو بالطريق جان يعد ويصف شراح يسوي بيها اذا لكاها وهيه جايه طريق شبعده وحدها بدون متخاف شنو هالجسارة العدها  
بس من شافها بهيج حاله نايمه ودموعها يبست ع خدها  نسه كلشي جان متوعدلها بيه ،، وكعد كبالها وكعد يتاملها وضيق عيونه بحزن وظل شي واحد يرن بتفكيره شلون بيها شلون راح اتعامل وياها وتطلع من هالحالة
تنهد من مالكه جواب وشالها وصعدها بالكرسي الامامي يمه وانطلق للبيت
شالها ودخل للبيت وتعجب شنو هالنوم ولا حست بيه ابد شافنه نور وبدور واجن يركضن
بدور:سما شبيها
نور:بس لا صار شي
جود:لا مصار شي بس لكيتها نايمه

صعد وداها لغرفتها وحطها ع السرير وكعد يمها ع الجربايه ويتامل وجهها الي نحف وعلامات الحزن تخط ملامحها
جود(عركاتج ولسانج الطويل اهون عليه من أني اشوفج هيج..شسوي حتى اطلعج من هالحزن ما ادري..اول مره اكره روحي لان ما اعرف اتصرف وي بنت)
مرر ايده بشعره وتنهد

سما حست بأحد يمها بس جانت تحس بثقل ع عيونها وما تريد تفتحهم بس ضغطت ع روحها وفتحت عيونها وشافت جود كبالها وانتفضت
(هذا شجابه هنا..تذكرت الي صار ..اكيد لكأني وجابني هنا)
جود ظل ساكت كان يتامل بلكي تعصب لان شالها او تسوي اي شي بس لا اظل بهالهدوء
تنهد بخيبه:انتي لشوكت ناويه اظلين هيج..شوفي حال البيت كله حزنان عليج والبيت صاير كأيب(سكت يتأني ردها بس ما نطقت بكلمه)صارلج شهر ع هالحال..يعني اذا سويتي بروحج هيج يعني راح ترد لو راح يتغير شي..انتي بس جاي تعذبين نفسج والحواليج..هيه ماتت والله يرحمها..راحت لمكان احسن من هنا..هاي سنه الحياة

سما(والدموع بدت تتجمع بعيونها):انته ما تفهم شنو احس بيه لان ما مريت بهالشي..اطلع بره ما اريد اسمع شي

جود وبنظره حزينه:يجوز انا اكثر واحد فاهمج واعرف الي جاي تمرين بيه..لذلك جاي اكلج مايفيد الي تسوينه بنفسج ولازم تكونين أقوى من هيج..لان بهالزمن ماكو مكان بس للقوي

تركها وطلع وسط نظرات استغرابها..اول مره تشوف هالنظره الحزينه(شيقصد بهالكلام وشنو هالنظره اول مره اشوف الحزن بعيونه..معقول أكون ظلمته من كلت انه بارد.. يجوز صاير شي وياه خلاه بهالبرود.. لا لا انا وين رحت بأفكاري مو معقوله هوة عايش احسن عيشه وتحت رعايه وحنان أمه وابوه .. بعد شيريد احسن من هيج اتمنه لو كنت بمكانه واعيش نفس وضعه الاسري..اكيد هالبرود وعدم الاحساس بسبب الدلال الزايد..(عفست وجهه)همه هيج كل الأغنياء من كثر الدلال يرفعون خشمهم)

***
في بيت اول مره نزوره

**:يبه يبه
**:نعم عزيز شرجعك من الشركه من وكت
عزير:صح السمعته انك لكيت جيهان
ابو عزيز:قصدك سما..لان غيرت اسمها من بعد ذاك الحادث
عزيز:مو مهم اسمها وينها هسة
ابو عزيز:عزيززز ركز ع شغلك احسن ولا تتهور وتخرب كل الي سويناه
عزيز:يبه عفيه كلي وينها
ابو عزيز:عرفت اَهلها منو ورجعتلهم وهيه هسه مخطوبه لولد عمها جود
عزيز بصدمه:شنو انخطبت..وانته ليش ماكتلي..لو كايلي من البدايه جان تصرفت
ابو عزيز:عزيز انسه هالبنت ولا تشوف شي ما شايفه..احنه وي اهلها عداوه وخصوصا وي جود..فشلون تريد بنت عدوك
عزيز:العداوه بصوب وهيه بصوب..ما اتركها لو اخر يوم بعمري..اذا مره شردت مني فالمره الجايه ما تشرد😏

ابو عزيز:ما عليه منك..والله لو تهورت ودمرت كلي الي خططتله صدكني اكتلك وما يهمني اذا انته ولدي فهمت..بعد كل الي سويته والجازفت بيه ما اتحمل تخرب كلشي هالمرة
عزيز:لا تخاف راح اكمل الخطه وبالاخير هم اخذها..بس بسيطه يا بيت حجي ابو علي انا الكم..والله لدمرهم واحد واحد واولهم جود😏..والله لدفعك الثمن غالي يا جود وهسة صار عندي دافعين بدال واحد..بسبب السويته بينه قبل وبسبب انك خذت جيهان مني😠

ابو عزيز:ما اريدك تظهر لهم هسة..اول شي بدمر شركتهم وانا حطيت بكل شركه جواسيس يجيبولي اخر التطورات..اصبرلي يا جود اذا ما خليتك تتوسلي علمود ارحمك ما اطلع ابو عزيز😏

*****

نزل جود للصاله ولكه جوجو اجت وكاعده وي نور وبدور..اول ما شافها نزل راسه وماناضرلها وسلم عليها

جميلة:شخبار سما
جود:ع نفس حالها والله..أتمنى لو تكعدون وياها وتحاولون اطلعونها من الي بيه
نور:حاولنه والله بس هيه حتى الحديقه ما راضيه تطلع ويانه

بدور:جوجو هيه شنو تحب اكثر شي بلكي نكدر نسويه وانطلعها من هالجو
جميلة: هيه تحب الككاوات وخصوصا نوتيلا والاجباس وافلام الرعب.. وبعد شنو..اي تموت ع الالعاب الناريه اتذكر مره شفناها ببدايه السنه وظلت تكمز من الفرحه

بدور:الككاوات والاجباس وفلم الرعب سهله حتى لو ندز السايق يجيبهم..ونكعد احلى كعده وياها
نور:وشرايكم نسوي كيك بعد
جميلة:اي بس خل انزلها ويانه..احسن من كعدتها فوك علما نسوي الكيك

كان جود واكف ويسمعهم وما كعد لان ما حب يكعد وجميله موجوده لان راح يقيدها بحركتها ويحرجها ومن سمع خططهم سحب نفسه وصعد لغرفته وتركهم ع راحتهم

جميلة دخلت غرفه ليكول داخله الحبشه

جميلة:شوفي تمشين كبالي للمطبخ وبدون نقاش يله كبالي
.
.
.
انتهى البارت..