💭❤ شگد أكو بروحج ططفولہ❤🙊!! 💍😻 ᶳ ❥ ...
وبيــج جـنْ نكہــة عــرس؟😍
الـوردةّ من خصـرج تـغـار🌸😌
يـذۆب جسـمج باللــمس?🙀
دااخـت بــصوتـج بــلابــل😻🙉
هـــذاا صـوتج لو هـــمـس؟😘🍃
وبحسـرتج تطلــعع تـتراافـه😿🌸
جـاا شــگد وردي النـفـس !!😥🌹
*******❤️❤️❤️******
جود دخل للصاله ولكه سما ونور يلعبون بلي
جود:سما ممكن احاجيج شوي
سما:انااا
جود:ليش اكو غيرج اسمها سما
سما:خير شكو
جود وهو يحك راسه ميدري شلون يبدي:احم اليوم شسمه اريدج تتجهزين علمود علمود نطلع نتعشا
سما:الله صدك..من زمان ما طلعت بره .. خل اكول لنور وبدور اكيد راح يفرحون بالطلعه
جود:لحظه ..هسه انا جبت سيره نور وبدور..كاعده اكلج ارد اتعشى وياج يعني بس انا وياج
سما بفهاوى:هااا
جود:حضري روحج اخذج بالليل احم نتعشى ونروح السينما
سما:لحظه انا ويااااك؟؟؟يعني عشى رومانسي وفلم وياااك😳
جود:لا تحلمين بالرومنسيا هواي..راح نسوي كل هذا علمود ابوي الحجي بس لان بده يشك انوا احنه ع خلاف وما متفقين
سما:ماشالله عليه شلون عرف الحقيقه..هذا الشايب شكله عنده حاسه سادسه
جود:المهم حضري نفسج..
وطلع ورجعت سما لنور
نور:خير شبيه وجهج عليه علامات الاستغراب والصدمه
سما:تصدكين اخوج راح يطلعني اليوم نتعشى ونروح السنما..صح علمود جدج طلب بس لهسة متعجبه راح اطلع وياه
نور:حلفي اخوي كلج اطلعون سوه..الله بدت قصه الحب
سما:لا تحلمين هواي ترى لان جدج طلب منه هالشي
نور:خل اكلج معلومه جود محد يكدر يجبره ع شي ..فصدكيني من وافق ع الطلعه وياج معناها عاجبته الفكره ولا جان رفض
سما:بس جدكم كدر يجبره ع انه يزوجني فاكيد راح يكدر يجبره ع هالسالفه
نور:انا اعرف اخوي عدل مستحيل احد يجبره ع شي ..ومن وافق فلانه مقتنع بالشي..بس اخوي واعرفه حتى لو يحبج فما راح يعترف بهالشي..بس انا عندي قناعه تامه انه يحبج..صحيح ما اكتشفتها بكلامه..بس اخوي مكشوف بنظراته😉
سما:يحبني انا!!شبيج تخبلتي..لا ما معقوله هوة اصلا ما يطيقني مو هنوب يحبني..هوة خل يتقبلني بالاول وبعدين خل يحبني..وترى لا تنسين هوة كان يحب ريهام وما اتوقع نساها لهسة
نور:كالج ع ريهام😳
سما:اي وعن خيانتها وي حسن
نور:حلفي
سما:والله شبيج متفاجئه
نور:ولج هوة ميقبل واحد يفتح هالسيره ابد..واصلا قبل فتره صيح عليه لان ذكرتها بالغلط..اصلا حتى ما كلت اسمها بس لمحت بدون قصد وصيح عليه وانتي قاصلج القصه..امممم🤔هاي اثبات اخر ان اخوي بده يحبج
سما:معقوله..لالا مستحيل اخوج هذا ما يعرف يحب..احسه واحد معقد وعصبي ودوم ينرفزني احسه يستمتع من يعصبني ويتلف اعصابي..اي حب هذا يا شيخه الي تحجين عنه
نور:صدكيني اخوي مو معقد بس انتي ما فاهمته وبعدج ما مسكتي مفاتيحه..شوفي لكل رجال نقطه ضعف او مفتاح ماكو رجال معقد..انتي بس فهميه وراح تمتلكين مفاتيحه
سما:😒شهالكلام الجبير اليسمعج ليكول مزوجه..اكص ايدي اذا فاهمه حجيج ..كله فلسفه بفلسفه..اعترفي وين سامعته
نور:😁الصراحه سمعته ببرنامج بس ترى حقيقي هالكلام مو فلسفه..انتي تجنبي الطرق التي تودي الى المعارك وحاولي ان تتقربين اله وشوفي النتايج
سما:يا كبيره ..الله ع هالحجي ..شنو هالفلسفه ولا دافنشي
نور:😒دافنشي مو رسام..شجابه ع الفلسفه
سما:هااا غلسي غلسي..هسه انتي واكفتلي ع الوحده..لا ادققين بالكلام انظري لجوهر الكلام
نور:اكول امشي يا ام جوهر نروح للسوك نشتريلج هدوم ونخبل اخوي شوي😉
سما:اكول طيري..والله انج فاضيه اروح اشتري هدوم جدد واكشخ علمود طلعه عاديه
نور:لا عيوني هسه انتي صرتي مره مزوجه فهسة حياتج تختلف عن حياه العزوبيه..فلازم كل يوم الج لوك جديد وكلساع طلعي اشتري هدوم جديده..ترى الرجال اذا ما تكشخيله وتملين عينه ترى بسرعه يلوف ع مراه ثانيه وتلكينه بين يوم وليله مزوج عليج..عاد ماشالله البنات ما يصدكون يلكطون رجال مثل اخوي ماشالله عليه حلو ورزه وغني وشخصيه مرموقه بالمجتمع
سما:اي من يشهد للعريس..طبعا اخته وتمدحينه
نور:قابل مجذبه! هاي شخصيه اخوي بدون مبالغه..وبعدين تعاي انتي من انخطبتي حتى ما اشترتي هدوم مثل الاوادم بس كم قطعه وظاله ع هدومج القديمه..لا عيوني هسة نطلع وتغيرين هالهدوم كلهم
سما:اهووو يعني راح تفريني السوك كله وترجعيني مكسره
نور:لالا بس كم محل ونكمل يوم ثاني..واعتبريه جهازج..اكو وحده مخطوبه ما تتجهز..والله انتي بطرانه..اكو وحده يكللوها اشتري الي تردينه وترفض..اخخخ انا لو يخلوني جان عشت بالسوك وما اطلع منه
سما:امشي بس خل نتحضر لو نظلع سوالفجما نخلص
******
بدور كانت بالمطبخ وجاي تطبخ لحيدر
دخل حيدر وهوة يشمشم
حيدر:الله الله شنو هالريحه وانا فوك وطبت بخشمي وما كدرت اقاوم
بدور:هههع شوي ويجهز
حيدر:فديتج والله لو اكو مثلج ثنين جان ربحنه..ياريت نوروه تتعلم منج شوي الهداوه..مصركعه مدري منو عليه طالعه
سما:لا ابد مطالعه عليك ههههع
حيدر:بسم الله من وين طلعتي
سما:هههع اجيت بس اريد اشرب ماي واروح
حيدر:تعاي اكلي وياي شكل الاكل طيب وما يتفوت
سما:بالعافيه شبعانه
وشربت ماي وطلعت
حيدر كعد ع طاوله الاكل :يله ما استوه بطني ظلت تزقزق..تصدكين انا ما جنت كلش جوعان بس لعانه بس من شميت ريحه الاكل جعت
بدور:هههع هاي هوة استوه بس جاي احطه
قدمته كباله ع الطاوله
بدور:يله تفضل اكل وانطيني رايك
حيدر:يمه الريحه تكتل(اكل لكمه)اممم طيب..اول مره اضوك طبخج..لو ادري هيج طيب جان دوم كتلج اسويلي
وكعد ياكل وبدور حاطه ايدها ع خدها وصافنه بوجهه مع ابتسامه
بدور:(فديتك والله وشكثر فرحان لانك تاكل طبخي ..حاسه روحي كاني زوجتك وجاي اطبخلك ..يا رب خليه من نصيبي)
حيدر انتبهلها:خير اكو شي بوجهي..ليكون توصخ وجهي وانا اكل
بدور:😅لا بس احب اشوف تعابير وجه الي ياكلون طبخي..لان تعابير الوجه ما اجامل كنت اريد اشوف اذا صدك عجبك اكلي ولا جاي تجامل
حيدر:لا صدك ما اجاملج صدك طبخج يجنن..صراحه ياحظ الي ياخذج
بدور شوي ضتجت:عن اذنك(صدك انج غبيه هوة اصلا ما يفكر بيج وانتي كاعده تحلمين تاخذينه..بس بعدني عندي امل يصير شي ويحس بيه ويحبني..اكيد راح يجي هاليوم)
*****
نور:بعد وكت..جان تاخرتي شوي..بالله اذا هسة طالعين شوكت نرجع
سما:لا انشالله ما نطول ونرجع بسرعه وترى انا ما اتاخرت هواي..وامشي لا تاخرينه بحجيج الزايد
نور:هسة انا الي صرت ااخرج ما جني صارلي ساعه مرزوحه بالصاله انتظر
حنان:لحظه بروح وياكم..محتاجه كم شغله من السوك
نور:يمه منج منين دريتي نريد نروح السوك ....ما اجه عرسج الا وي عرسنه
سما:اااووف شكل الطلعه راح تخرب
حنان:والله انا مو ميته عليكم..بس مضطره اروح وياكم..تلفوني انكسر وما اكدر اعيش بدونه وامي ما ترضه اطلع لوحدي لازم اخذ وحده من البنات..عاد بدوروه ما تحب الطلعه دومها معزوله فماكو غيركم(لازم اتحملكم علمود النقال حتى اكلم علاوي حبيبي من البارحه ما حاجيته اشتقتله😍)
نور:امشي امرنه لله
الحارس:مساء الخير انسه نور
نور:مساء النور..وين السايق نريد نروح السوك
الحارس:لحظه..محمد محمد
محمد:نعم((محمد شافها ووكف مصدوم)اكيد هاي نور ..بس متغيره ١٨٠ درجه عرفتها من عيونها بس..ضعفانه وصايره حلوه..سبحان مغير الاحوال..بس يا ترى عرفتني لو لا ..بس كانها ما عرفتني ..اكيد نستك مرت كم سنه وهيه ما شافتك..اكيد تغيرت مثل ما هيه تغيرت)
نور:انته حارس جديد؟؟اول مره اشوفك(شبيه هذا يباوع هيج ومفهي)
محمد:هااا اي توني جديد
نور:اهااا يله امشينه(وجهه مو غريب عليه..يجوز مشبهه عليه..يخلق من الشبه اربعين)
وطلعوا بالسياره وكان محمد يباوع ل نور من المرايه ونور لاهيه وي سما وما منتبهتله
محمد وهو مبتسم(سبحان مغير الاشكال..رحت بيها يا محمد انته كانت دبدوبه ومو كلش حلوه وحبيتها لطيبتها وحنانها..وهسة صارت تجنن فشراح يصير بيك ..اووووف باع الغمازة مال عض😻دخيل الله ع هالخلقة حلقوم مو بنيه.. بس ياخوفي تطلع ما تحبني وتعتبرتي مجرد صديق طفوله وراح)
وطول الطريق ما نزل عينه من المرايه الى ان وصلوا
*****
جود:سلطان اريدك تروح عند الصايغ وتجيب شغله انا موصيه عليها ومر ع محل التلفونات واشتري احسن تلفون
سلطان:الله هديه..لمنو
جود:مو شغلك
سلطان :حاضر تامر ع شي ثاني
جود:سلامتك
وطلع سلطان من الشركه وخله جود بين اوراقه
نور:سما شوفي هذا يجنن
سما:امممم اي حلو بس انا ما رايحه حفله حتى البس هيج..ترى كلها طلعه عشى عاديه
نور:يالخبله هاي فرصه لا تتكرر حتى تتقربون من بعض
سما:ما اريدك اتقرب ولا شي..انتي تدرين هالوضع مو برغبتنه ثنينه .وواحد ما يطيك الثاني
نور:انتوا لشوكت تضلون هيج .. يعني انتي شنو تردين تطلكين..انزين واذا اطلكتي وين ترحين..يم ام احمد واحمد وحنان..علمود يتوحدون بيج ترى حاليا ساكتيلج احتراما وخوفا من جود فاذا اطلكتي يراوونج النبي عربي وخصوصا احمد تلكينه بداخله متوعدلج بس ساكت.. انزين عوفج من هالحجي ليش ما تفتحين صفحه جديده وي اخوي وتحاولين تتكربين منه ويصير عندكم جهال وتكونين العائله الي تردينها الخاصه بيج..الى متى بس عرايك..ترى هوة قدرج وزوجج هسة..بيدج انج تكونين عائله قويه متماسكه او عائله مفككه ومليانه عرايك وتخيلي جهالج شراح يصيرون
سما:بس اخوج هوة الي ينرفزني
نور:اكيد انتي سويتي شي يضوجه..وبعدين معليه ..اكسري ع خشمج بصله وتحملي شوي ..يا اختي تنازلي شوي ولو مره وشوفي شراح يصير..ترى الرجال تنرفزه المره الي تحط راسها براسه..جربي وتنازلي ترى ما راح تخسرين شي
سما (معاها حق الى متى تظل حياتي بس عرايك..حتى انا تعبت من العرايك)
سما:راح احاول بس ما اضمنلج
حنان رجعت بعد مشترت عصير:خلصت..امشوا ارد اشتري نقال وارجع تعبت
نور:امشي
مشوا ومن قربوا لمحل الاجهزة
سما:نور شوفي هالجنطه تجنن
نور:اي والله امشي نشتريها
حنان:هيوو وانا اريد اشتري نقال..امشوا بعدين رجعوا عليها
نور:حنان ما راح نتاخر بعدين محل الاجهزة يم محل الجنطه الي نريدها..انتي دخلي هالمحل واشتري واحنه اذا خلصنه نلحكج
حنان:😒امري لله
****
سلطان جان بمحل الاجهزه ويشتري نقال
صاحب المحل:هذا احسن جهاز عندي ولو تلف المحلات كلها ما تلكه احسن منه.
سلطان:اوكي راح اخذه
صاحب المحل:انته محظوظ..هذا اخر واحد من هالنوعيه
دك تلفون سلطان
سلطان:اسف لحظه واجي
دخلت بهاللحظه حنان وحاجت صاحب المحل وشافت التلفون ع الميز الي هوة نفسه الي يريده سلطان
حنان:اريد هذا
صاحب المحل:بس الاستاذ يريده
حنان:دفع فلوسه
صاحب المحل:لا بعده
حنان:لو يريده جان ما تركه..شكله راح ونساه..راح اخذه انا
صاحب المحل:بس
حنان:لا بس ولا شي كلت راح اخذه..ما اريد غير هالنوعيه
عطت الفلوس لصاحب المحل ودخل سلطان
سلطان:لحظه مو هذا الي ردت اشتريه
صاحب المحل:اي بس الانسه اصرت الا تشتريه
سلطان:مو شغلي انا اجيت قبل..يا انسه رجاءا رجعيه وبدون مشاكل
حنان:سوري دفعت فلوسه وخلصت..مع السلامه
سلطان:لحظه لحظه شنو بوك عيني عينك انا كلت باخذه قبل
حنان:الفاظك عدلها شنو بوك..انته ما اشترتيته فيعني مو مالك
سلطان:بس انتي تدرين اني ارد اشتريه وخذتيه..هذا شسمه
حنان:قسمه ونصيب..ونصيبي اخذه
سلطان:سمعي انا مو من النوع الي احب العرايك وخصوصا وي مراة..بس انا مضطر اشتري هالنقال لان مديري وصاني اشتري هالنوع واذا ما اشترته فراح اطيح بمشكله..فرجاءا رجعي اليه واشتري غيره
حنان هزت راسها باسف وتكلمت بسخريه:تؤتؤتؤ كسرت خاطري ..بس هاي مشكلتك انا مالي شغل..كل الي اكدر عليه ادعيلك انك تلكه نقال مثله بمحل ثاني وما تنطرد
سلطان انطه فلوس لصاحب المحل
صاحب المحل:هاي الفلوس لشنو
سلطان:للتلفون
صاحب المحل:بس انته ما اخذت تلفون
سلطان :هسه راح اخذ😇
سلطان خمط النقال منها وحنان وكفت مصدومه
سلطان:تكدرين تاخذين فلوسج من الرجال او تاخذين تلفون ثاني انتي حره
حنان:بس انا اريد هالنقال.. ما اريد غير نوعيه
سلطان يقلدها بنفس سخريتها:تؤتؤتؤ كسرتي خاطري بس هاي مشكلتج..كل الي اكدر عليه اني ادعيلج انج تلكين مثل هالنقال بغير محل
حنان حاولت تخمط النقال بس هوة كان اشطر منها وسحب ايده قبل لا توصله
سلطان بتحيه:جااااو وشكرا ع النقال
حنان ضربت رجلها بالكاع:قليل ادب ما تعرف شي اسمه النساء اولا..يعني انا الي لازم اشتريه وتتنازل غنه
سلطان:باحلامج بس
وتركها وراح
صاحب المحل:تردين تلفون غيره لو تاخذين فلوسج
حنان:انطيني فلوسي راح ادور ع غيره
****
سما:نور اريد اسالج انتي عدج صوره ل ريهام او حسن
نور:اعتقد عندي بس ما ادري وين حاطتها..بس شتردين بيها
سما:بعدين اكولج ومن نرجع ادورهم وياج
حنان:بنات امشوا لمحل ثاني للاجهزه
سما:ليش ما اشترتي لهسة..لعد شكنتي تسوين صارلج ساعه
حنان:مو شغلج..امشوا نروح غير محل
نور:امشي يلا فكينه
وخلصوا مسواك ورجعوا للبيت وتفاجئوا برجوع ابو احمد
حنان ركضت لابوها وحضنته:يبه اشتقتلك ..معقول تتركنه علمود بعض الناس الغثيثه..حتى بدون ما تودعنه قبل لا اسافر
ابو احمد:هلا ببنيتي..كنت محتاج اكعد لوحدي شوي
نور:شلونك عمي الحمدلله ع سلامتك
ابو احمد:الله يسلمج يا غاليه..شلونج سما..انشالله بخير
سما طالعته بطرف عينها ومشت بدون ما تكلمه
حنان:صدك وقحه وما عدها احترام
ابو اجمد:معليه يا بنتي..هيه بعدهي زعلانه وحقها
نور:صدكني يا عمي فترة وتعدي واكيد راح اسامحك بس تحتاج وقت..تعرف بعد دلع البنات
****
سلطان:استاذ هذا الي وصيتني عليه
جود:عاشت ايدك..راح اروح للبيت ارتاح اذا صار شي ضروري اتصل عليه
سلطان:خير ليكون تعبان..مو من عاداتك ترجع من وقت بالبيت
جود:لا ما فيني شي بس عندي شغله بالليل فاريد ارتاح شوي قبله
****
نور:سما شوفي لكيت صوره ريهام
سما خذت الصوره وكعدت ساعه تطالعها(ما توقعتها حلوه هيج..اكيد حلوه يا غبيه ولا كان ما تعارك حسن وي جود علمودها)
سما بغيره:هسه هيه هاي الي صارت الخبصه بسببها وصديق خان بصديقه علمودها..والله ما تسوه..مو حلوه حتى فتون احلى منها
نور:لا عاد شبيها شوفيها تجنن ياريت اكدر اصير مثلها
سما طالعتها بغيض وسكتت
******
طلع جود من الشركه وراح لكراج السيارات
سلطان:ممكن توصلني بطريقك
جود:روح خلص شغلك احسلك
سلطان:خلصت الشغل كله وخذت اجازه ساعتين علمود اطلع وياك
جود:اذا عندك وقت زايد فروح سويلك جم شغله ثانيه تفيد الشركه احسن من هالحجي الزايده
سلطان:يا اخي انته شبيك عليه..ما كافي انك بالشركه ما مخليني ارتاح ولا وهنوب تريدني احاجيك برسميه حتى برة الشركة يا اخي تعبت..يا اخي عمري بحياتي ما شفت واحد يعامل صديق طفولته مثلك.. ترى لو واحد ثاني جان حمد ربه على صديق مثلي ودللني وولا خلاني اشتغل شي
جود:خطات بالعنوان انا ما اعرف ادلل بالشغل.. وهاي مشكلتك محد كلك تشتغل وياي..وانته تعرف بالشغل لا اعرف امي وابوي..والكل عندي سواسيه وكلكم بنظري موضفين وبس..وانا هذا طبعي ما عاجبك بكيفي تكدر تتركني مثل...
سلطان:كمل مثل حسن مو!!لا عيوني انا غير..كاعد ع كلبك كعده ..لو شما تسوي ما راح اهدك ..
جود:لزكه يعني
سلطان:😒هذا حجي بله بدال ما تكول مشكور يا ربي انك هديتني مثل هالصديق المثالي الي ما يتكرر بالدنيا..فديتني والله..وين تلكه مثلي
جود:انته ليش صرت هذرة ..شلون يعني اطردك وارتاح
سلطان:مو بكيفك شمسوي..ترى هسة احنه برى الشركه ..هسة انته مو مديري..انته مجرد صديق وبس
جود:لا حول الله..انا بس ارد اعرف شطكني ع عيني وخلاني اصادقك وانا طفل
سلطان:من حسن حظك هذا..امشي وصلني
جود:وليش ما تروح بسيارتك
سلطان:طريق بيتي ع طريقك فليش التبذير بالبانزين
جود:ما جنت ادري بيك بخيل
سلطان:هذا مو بخل بس ماكو ضروره للتبذير..وبعدين يا اخي مشتاقلك وارد احجي وياك صارلي هواي مكاعد وياك برة وقت الدوام ولا كاعدين نحجي سوه بسبب الظروف وبدال لا تاخذني بالاحضان تشحت بيه..ترى عيب عليك
جود:استغفر الله العلي العظيم..مو جاي اشوفني بالشركه
سلطان:شفت شفت لازم تحمد ربك عليه لان كلما ازعجك تذكر الله وتستغفره وتحصل حسنات..وبعدين انا مو مشتاق لخلقتك مشتاق احجي وياك عادي مثل الاوادم
جود:لانك ما تعرف تسكت..ازعاج..
سلطان:مو مهم الطريقه المهم الجوهر وانك بالاخير تذكر ربك بسببي
جود:ولي من كدامي .. ما ناقص الا انت حتى تذكرني بربي..الحمدلله ذاكر ربي قبل لا اشوفك
صعدوا بالسياره
سلطان:اكول شخبار الخطوبه..بس لا مطلع روح البنيه..ادري بيك ما عندك اسلوب
جود ابتسم(الا هيه الي مطلعه روحي):زينه
سلطان:امممم ابتسامه وزينه..شكلك معجب بيها مو..يله اعترف
جود:ذكرني بعدين انوا بعد ما اطلع وياك ابد طلعه اصدقاء..وعلاقتنه راح تقتصر ع الشغل وبس..واقطع صداقتي وياك..انته ما تنطي وجه
سلطان:افاااا ما هكيتها منك بس..الله يسامحك
جود:وصلت يله انزل وفكنه
سلطان:مدري ليش احساسي يكول هاي طرده بس ادري ما اسويها تموت عليه
جود:😒اكول لا تحمه وانزل
*****
عزيز:ابراهيم شنو اخر الاخبار
ابراهيم:اجتني معلومات ان جود حاجز بمطعم الليله هوة والمدام
عزيز:لازم اروح واشوفها..بس شلون بحارس ابوي
ابراهيم:خله عليه..انا اتصرف
عزيز:اوكي (اخيرا راح اشوفج يا سما مرت جم سنه ما شفتج..مشتاق اشوف عيونج..حتى لو شردتي مني بالاخير راح تردين الي..مصيرج تكونين يمي انا)
****
جود وصل للبيت ولاكته سما
سما:لكيت طريقه تنسيك كلشي وتخليك تشعر بالراحه
جود:شنووو؟؟شتحجين انتي!
سما:تعال وياي
كضت ايده ودخلته للحمام
جود:ادري الحمام يسمونه بيت الراحه..بس مو هيج عاد..تستغبين انتي
راد يطلع بس سما كضته من ايده
سما:لحظه اسمعني
طلعت صوره ريهام وجداحه وقدمتهم اله
جود عقد حواجبه:شنو هاي
سما:احرك الصوره وذبها بالحمام
جود:وليش يعني
سما:شبيك انته ما شايف فلم شاهد كابور
جود:شاهد منو
سما:شاهد كابور انته شنو ما اتابع افلام هنديه
جود:شايفتني فاضي مثلج حتى اطالع هالافلام البايخه
سما:شوف شاهد كابور جان مثلك حزين لان تركته حبيبته وجان عنده شركات بس جان حزين وترك كل املاكه وراح صعد للقطار حتى يسافر بس ما يدري وين يروح بس يريد يبتعد..والتقه بالقطار كارينا كابور..وجانت تهذر هواي وساعدته يطلع من حزنه انه خلته يحرك صورة حبيبته وذب الصوره المحتركه بالحمام
جود:حلفي بس ..مجرجرتني للحمام علمود هالشي السخيف
سما:مو سخيف..اصلا اكو دراسات ع هالشي..انك اذا طلعت حركتك بشي فراح ترتاح..مثلا تكسر اكلاص او تسوي فد شي ..فهمت
جود:ياربي شهالبلوه..انا كمت اشك انج خبله..باي
سما:وين رايح احرك الصوره بالاول
جود:هسه من كل عقلج تأمنين بهالسخافات
سما:انزين جرب شراح تخسر
جود:انزين جيبي
خذه الصوره وحركها وذبها
جود:هاا ارتحتي
سما ناضرته بنظره امل ان الشي ينجح:مو مهم انا..المهم انته شحسيت اكيد ارتحت مو
جود كلب عيونه:ما حسيت بشي..ماكو شي تغير
سما:شلون لازم تحس..اكيد انته السبب عديم احساس..كل الي جرب هالطريقه ارتاح شمعنه انته
جود:ما ارتحت شلون بله
سما:لا لازم تحس بالارتياح..مو بكيفك..راح تخرب النظريه
جود:استغفر الله اكول روحي ارتاحي لان ورانه طلعه بعد شوي
سما:😒انزين رايحه..عديم احساس
جود:لحظه هاج(وانطاها باكيت التلفون)
سما:شنو هاي
جود:تلفون ما تشوفين..علمود اتصل عليج من نريد نطلع مالي خلك اطك طريق لغرفتج..وحفظت رقمي بالجهاز..اذا احتجتي اي شي دكي عليه
وطلع
سما ابتسمت:(بدايه جيده شكله بده يتحسن.. انا هم راح احاول اصير زينه وياه عاد الله يديم هالتحسن وما يكلب لوجهه الثاني)
*****
ابوعلي:الحمدلله انك رجعت..ضنيتك ما راح ترجع
ابو احمد:اسف ع التاخير بس كنت محتاج افكر بهدوء
الجد:يله مصار شي واختك راح ترجع هيه وجهالها وراح ينقلون املاكهم ويعيشون هنا بشكل دائم
ابو احمد:الحمدلله..بس
الجد:بس شنو
ابو احمد: جود شنو راح تكون ردت فعله من يرجع حسن
الجد:جود عاقل واكيد ما راح يسوي شي..وبعدين بيته جهز وما بقه شي ويعرس ويطلع..واكيد نسه سالفه ريهام وحسن..هسة هوة كون عائله جديده
ابو احمد:ليش جود راح يطلع من البيت
الجد:طبعا لان سما ومرتك لازم يتفرقون لان لو ظلوا بنفس البيت ما راح نشوف بس المشاكل
ابو احمد:معاك حگ
******
جود كان كاعد بالسياره ينتظر سما لحظات ووصلت
سما:تاخرت عليك
جود:لا مو وايد
انطلقوا للمطعم وطول الطريق ساكتين طبعا ما عدا بعض النظرات
جود نزل وفتحلها الباب:تفضلي
سما كاضه اطراف تنورتها وانحنت بادب مثل الاميرات:شكرا يا برنس جود..اليوم صاير كلك ذوق..اكلك اخاف طاك راسك بشي..شغيرك
جود:انا دوم عدي ذوقج..بس يعتمد ع اسلوب المقابيلي..المهم خلي هالليله تعدي ع خير
دخلوا للمطعم وانبهرت برقي اثاث المطعم وكبره
جود:سدي حلكج فشلتينه..شنو اول مره اطبين مطعم..تعاي حجزت طاوله خاصه للعوائل معزوله
طبوا كانها غرفه معزوله بس همه بيها ومتروسه شموع حمر ع شكل قلوب والجو رومانسي
سما كعدت ولازالت مندهشه:(معقوله سوه هذا علمود جدة كاله لو كلام نور صح..كلمالك وجاي تحيرني يا جود ما جاي افهمك..هسة انته طيب ورومانسي لو مغرور وغليض؟؟)
جود لازم القائمه ويمه الكرسون واخذ طلبه:وانتي شنو تردين اطلبين
سما:اممممم(خرررب كلشي مجاي افهم..هسه الا يسوون القائمه بالانكليزي يردون يصيرون مثقفين براسي..انا اعرف بس جم كلمه بالانكليزي بس شنو هالكلمات الصعبه اول مره اسمعها..خرررب هسه لو مكمله دراستي جان هسة متخرجه وصايره بلبل بالانكليزي..بس اخ يالحظ
جود:وين رحتي..يله طلبي الولد تعب وهوة واكف ينتظر طلبج
سما:احم صراحه احترت شطلب لان الاطباق محيره وكلها حلوه فاطلبلي انته ع ذوق(عاد الله يستر من ذوقك)
جود:اوكي (وكال طلبه للنادل وطلع)
سما:مدام انك طيب اليوم..ماشالله عيني عليك بارده ممكن اطلب طلب
جود:اكيد(لو تطلبين عيوني انطيجياها)
سما:ممكن بعد العشا نروح للشط
جود:هسة؟؟. بهالليل!!
سما اي عفيه فدوه
جود:بس الشط شوي بعيد من هنا واذا رحنه للشط ما راح نلحك ع الفلم
سما:عادي الايام هواي ونروح غير مره للفلم
جود:اوكي مثل ما تردين (ياربي شلون اقدملها الكلاده..احس روحي مسوي جريمه..هاي كلاده وصاربيه هيج لعد شلون راح اوديها لبيت امها واكلها اشترته الج..انزين واذا سالتني ليش سويت هيج شرد اكلها..طلعتنه تحججت بجدي..بس هذول شكول..هم اذبها براس جدي وبس؟؟ لا اكيد ما راح اطوفها..خل تخلص اكل واقدملها الكلاده)
***^
عزيز:يا غبي ليش ما كتلي انهم طالبين جناح خاص
ابراهيم:ما ادري استاذ ..انا ادري انه بس طلب فعدالي طلب عادي فما سالت زياده
عزيز:لااانك غبي..ادعي لربك انهم يطلعون غير مكان حتى اشوفها..والا اقره ع روحك الفاتحه
*****
جود:ليش وگفتي اكل..ما اكلتي شي
سما:الحمدلله شبعت
جود:اكلج قليل
سما(لا والله مو قليل بس جبست بطني وي بدور ماخلينه شي ما كلناه العصر ..والاكل بعده ما انهظم..بس حرامات الاكل طيب..والله قهر)
جود(هسة الوقت المناسب انطيها ..انزين مو لازم اكول شي من انطيهياه..خررب ما جاي يخطر ابالي شي اكوله..يمعود انطيهياه وانته ساكت والي يصير يصير)
جود:احم هاي الج
سما:الي؟؟
فتحتها ولكت كلاده ع شكل قلب ومنقوش عليه اسمها بطريقة كلش حلوه ونازكه ومزين بعده كرستالات صغيره
سما:واوو حلوه
جود متكتف اليدين:القلب يفتح..فكرت انج يجوز تحبين تحتفضين بصوره امج دايمه وياج فوصيتهم انوا يخلون القلب يفتح
سما:صدك؟؟القلب مسطح الي يشوفه ما يظن انه يفتح
جود:اي انا وصيتهم يتراولي المسطح احلى من العريض
سما:ماشالله ذوقك حلو
جود:انطينياه البسجياها
سما:اوكي
انطتهياها وكام وكف وراها ولبسهياه
جود:هواي حلوه عليج🙂
سما:تصدك من لبستها حسيت باحساس غريب
جود:شنو
سما:حسيت روحي مثل جلب بوليسي وحاطينله طوك باسمه حتى لا يضيع
جود:😒بربج..هاي احاسيس بني ادم..وتكولين عني عديم احساس..يمعوده احمد ربي ما عدي احساس..ولا يصير احساسي حيواني
سما:شنو حيواني..ترى عيب..جاي احسه غلط
جود:جا بربج تشبهين روحج بجلب
سما:ما كلت انا جلب كلت احساس فقط..
جود:امشي نروح للبحر لا هنوب نرجع نتعارك
سما:خوش راي..بس اصبر خل نطك سلفي احرك كلب نوروه..بعد هيه مره بالعمر يصير هيج جو حلو وي الشموع(دورت ع تلفونها بس طلعت ناسيته) اوووف نسيته..ممكن تنطيني تلفونك ادك بيه صوره وادزها لنور
جود انطاها التلفون وهو ساكت
اجت وكعدت بكرسي قربه..
سما:يله ناخذ صوره
جود:لحظه حتى انا
سما:اي طبعا شنو انا جني كاعده لوحدي بهالمكان..خل يشوفونه سوه..وحتى جدك اذا شاف الصوره يطمن<والله هالجد بكلشي لزكوه بحججهم>
جود:اوكي
سما:اهوو ابتسم شوي..شبيك دوم معبس
جود:مافيني ابتسامه شسوي
سما:سوي ابتسامه حتى لو من وره خشمك..(طالعته بنظره بريئه)عفيه يله..لا تردني
جود ناظرها شوي وبعدين رضخ للامر الواقع وابتسم
مِنْ تسولف 😻💎 ؟
تخدر الشَمس وتِنآم ✨🍃
ولو أنتَ تضحكگ 🙊💞
يبتسم وجه الكمر⭐☺
✌✌
سما:صلوات ع محمد اخيررا..يله 1 2 3(وطكت الصوره.) شوفها حلوه
جود:اي
سما:هالمره انته دك السلفي
جود:نعم؟؟
سما:اي عفيه شنو كله انا بالواجهه..ما احب اصير بالواجهه ويكبر خشمي ..الي يصير وره يصير احلى يله دك
اخذ التلفون منها وسما حطت ايدها ع كتفه
وناظرها جود باستغراب..سما انتبهت لنظراته وسحبت ايدها بسرعه
سما:سوري بس حبيت اسوي حركه..احسن من ما واكفين اصنام
جود اخذ ايدها وحطها ع كتفه:خوش حركه
سما طكت الكشره ووكفت وياه وهوة حط ايده ع خصرها وكربها اله وسما ارتبكت ونزلت راسها واختفت ابتسامتها
جود مسك ذقنها بايده ورفع وجهها اله :هسة منو الي لازم يبتسم
سما سكتت وابتسمت بخجل
وطكوا جم صوره ودزوهم لنور
جود:يله نروح للشط لا نتاخر
****
بدور:شتتوقعين جود وسما شجاي يسوون
نور:والله ما ادري..لو اثنين غيرهم جان كتلج رومانسيه وحب.. بس جود وسما مزاجهم متقلب..وما تكدرين تتوقعين شيصير بينهم
بدور:يا خوفي يتعاركون..
نور:الله يستر بس
اجت رساله لتلفون نور وانصدمت
نور:بدوروه انطيني راشدي
بدور:ليش شكو
نور:ما اصدك اكيد احلم
بدور:خرعتيني شكو
نور:شوفي اخوي وسمووه ..شوف الشموع ..لا وهني اخوي طاك السلفي..لا يالظالم وانا بطلعه الروح يخليني اطك سلفي وياه ..اي انا الربيت ولغيري صفيت..انا اعلمكم
بدور:هههع تقلدين امج ..شربيتي يا عيني..ترى هوة اليربيج مو انتي
نور:اهووو لا توكيفيلي عالوحده وانجبي..وشوفي سموه شكاتبه...."احلى طلعه واحله عشه بدونكم..همزين ما اجيتوا جان خربتوا الطلعه خههههع"
بدور:ايا البذاته ..شافت الشموع وباعتنه
نور:اي هاي مو مال دلال الخاينه..اصلا لو مو انا نصحتها ولمحت لاخوي بحكمي المبدعه جان ما انعدلوا بس ميفيد
بدور:ليش انتي حاجيتي جود
نور:لا بس هيج تلميحات ع جم نصيحه..تعرفين بعض الاحيان لساني ينكط درر
بدور:من مدح نفسه يبيله رفسه
نور:جب
*****
جود وسما وصلوا للشط
سما وهي تشم اكبر كميه من الهوى:الله والله احب اشوف الشط بالليل..بس امي ما جانت تخليني اروح بالليل لانها تخاف عليه..بس اصدك الليل احلى بهواي
جود:امشي خل نكعد بالكراسي..او نروح لمطعم هناك
سما كضت ايده وسحبته وياها:لا امشي خل نتمشى احلى..المطعم بعيد عن الشط..وانا اريد اتمشى يم الشط
رادت توخر ايدها بس جود تمسك بايدها بقوه وناظرته والتقت عيونهم ببعض وسما استحت والتفتت للشط
وكعدوا يتمشون يم الشط
سما:شنو سر تغيرك ..مع انك جنت ما تحبني وتكرهني ودوم تتعارك وياي.. شنو التغير
جود(منو كال اني ما احبج):تردين الصدك لو اخوه
سما:اكيد الصدك
جود:ما اكرهج بس انا شوي عصبي بعض الاحيان..وانتي تمصخينها فما اتحمل..وبعدين ماكو فايده من هالعرايك.. فكلت خل اغير اسلوبي واحاول اضبط اعصابي..بس انتي هم لا تنرفزيني(مو حقيقه كامله..بس ع الاقل جزء من الحقيقه..الصدك اني داخلي صراع بين احبج او لا..اخاف احبج واتكربلج وتصدميني مثل البقيه)
سما:خوش وعد ما انرفزك اذا ما نرفزتني..وخل نبده بدايه جديده
جود:اوكي اعتبرها اتفاق
سما:اتفاق اتفاق..انزين اخوه شنو
جود:امممم اني سويت كل هذا علمود جدي
سما:ههههع خوش اخو....امممم تصدك الجو مال موطه..ما يبيعون هنا
جود:اي يبيعون بالمطعم..تجين وياي نشتري لو اروح لوحدي
سما:لا روح انته مشتهيه اكعد يم الشط شوي
جود:اوكي
سما راحت وكعدت ع الصخره ومسكت كلادتها وابتسمت
عزيز:الله يديم هالابتسامه ..اخخخ لو تدرين شكثر اشتاقيت لهلابتسامه
سما شهقت وكمزت من الصخره:اا اانت
عزيز:اي ما اشتقتيلي
.
.
.
.
انتهى البارت
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!