رواية لأجل من احببت سأكون قوية الفصل الخامس والثلاثون 35 - بقلم امل

• أذا سألوك وين تعيش ، !؟
"دليهم على عيوني❤️"

🍃🌸🌸🌸❤️❤️🌸🌸🌸🍃

عزيز وهوة متمدد ومغمض عيونه بتفكير:سويت الكتلك عليه
ابراهيم:اي وطكيت صحبه وي علاوي وعرفت كلشي مخططله ويريد يسويه وي اخت احمد

عزيز وهوة ع نفس وضعيته مغمض عيونه:هممم ظل ماشي وياه واعرف كلشي اول باول وبلغني

ابراهيم:اوك ..بس ما كتلي شرايد بهالسالفه .. الي اعرفه انوا ابوك متكفل بهالسالفه وهوة متفق وي علاوي ع كلشي فليش انته مخلينه نراقبهم وانته تكدر بكل بساطه تسال ابوك وتعرف كلشي

عزيز فتح عيونه وكعد بسرعه:اياني واياك ابوي يدره بشي.. حتى الشباب الي وياك لا تكللهم انك تراقب علاوي.. سوي روحك صديقه وتمشي وياه صداقه لا تحجي بالمراقبه حتى وي نفسك

ابراهيم:اوك بس ليش

عزيز ناظره بعصبيه:وانته شكو..سوي الي كتلك عليه وانته منجب
ابراهيم:اوك عن اذنك

****

دخلت سما للصالون بعد ما وصلها محمد
سما:سلااام
اسراء:هاي وين جنتي..ليش تاخرتي
نور: اي لمن دكينه ع جود ياله جيتي
سما:وجع كلتوني بكشوري حتى مرديتوا السلام
الكل:وعليكم السلام
سما وهيه تباوع لشعر نور واسراء:هاااي شنوووو
اسراء وهيه تلعب بشعرها الي كصته لحد رقبتها وصابغته :شرايج حلوو مو
سما: واوو لونه يجننن بس شدعوه كاطمته هيج..بس اصدكين صاير تحفه عليج الشعر الكصير

شعر اسراء👆🏻

اسراء بغرور مصطنع: ادري ادري😌😌 كلت لنور كصي هم بس ما رضت
نور: استحيفت اكصه بس شرايج بصبغي
سما:يجنن الثلجي عليج تدرين مشتهيه اصبغ بس حواف شعري ثلجي..ليش ما خذتوني وياكم😭😭

لون شعر نور👆🏻

نور:انتي ما اجيتي .. يله ع الجايات
سما:الله كريم..ما خلصتوا مكياج وتسريحه
اسراء:انا خلصت وشعري راح  اسويله رفعه خفيفه تدرون ماكو تسريحه تصيرلي بهالشعر الكصير
نور وهيه كاعده ع الكرسي:انا قربت اخلص..وست حنان خلصت

حنان رفعت عينها عن التلفون وباوعتلهم بعدم اهتمام ورجعت تباوع لتلفونها

سما وهيه تكعد ع الكرسي الي يم نور :لعد اجه دوري

نور:انا تكسرت من الكعده 😩.. الا اكولج جود هوة جابج
سما:لا محمد
نور:احم انزين بالرجعه خلي جود يرجعنه
سما: ليش؟ محمد موجود
نور:اي بس جود ناخذ راحتنه اكثر
سما:احنه دقايق ونوصل للبيت خو ما راح انام بالسياره
نور:اهوو ابي ارجع وي جود
سما بعناد:وانا مابي ارجع وياه
نور :ليش ما تردين جود يوصلنه ليكون متعاركه وياه ومتزاعلين
سما غمضت عيونها بقوه وتنهدت :لا (ياريت متعاركين ولا هالموقف المحرج (غمضت عيونها باحراج) ليش كل مره اكرر نفس الخطا وما اكدر اسيطر ع روحي يمه .. مره وحده بحياتج صيري قويه وتحكمي بتصرفاتج كدامه ..بس شكول شكلي دومي راح اظل غبيه وما اعرف اتصرف)
نور:والله شكلج يدل صاير شي بينكم او متزاعلين
سما عقدت حواجبها وحاولت تغيير الموضوع وتلفه ع نور: الا انتي شعدج ما تردين محمد هاا
نور توترت:ولا شي ..هيج
سما وهيه تلعب بحواجبها باستفزاز:صاير شي بينكم من وراي

نور تذكرت البوسه وتوردت خدودها وحاولت تباوع للجهه الثانيه حتى ما تكشفها سما: لا ..شنو ممكن يصير
سما وهيه اطل ع وجه نور:هه لعد ليش وجهج صار احمر هااا..احجي احجي شصاير
نور بعصبيه حاولت تغطي بيها ع خجلها:كتلج ولا شي فلا تلحين
سما :اوك اوك لا تعصبين جنت اشاقه وياج
نور: خلصت
سما وهيه تتلفت:الا وين بدور
اسراء:خلصت من وكت وراحت وي امها تساعدها
حنان: شوكت تخلصون ترى مليت اريد اروح للبيت ابدل وارتاح قبل لا يصير وكت العرس
نور:ما بقه شي بس سما تخلص ونروح
حنان:واحنه نظل مصطورين هنا علمود ست الحسن والدلال علما تخلص
سما: اعتقد انا ما كتلج تانيني..الي يريد يروح خل يروح
حنان: لعد انا رايحه
نور:اسراء روحي وياها وانا راح انتظر سما ونلحكم .. مابقه شي وتخلص
اسراء:اوك وياله الحك البس البدله وادور ع اكسسواراتي مدري وين جدعتهم 🤔
نور:دومج مهمهله
اسراء:جب معليج

****

في بيت جود

جود:يله احمد بدل وخلصنه
احمد: بعد وكت ع شنو مستعجلين
حيدر: اي علما تبدل وتتعدل والزفه بروحها يرادلها وقت ويجوز تتاخر ع العروسه
احمد:اي وشنو يعني اذا تاخرت عليها الي يسمعك ليكول بنت السلطان تنتظرني.. ترى نص عقل يعني طكه ونص خل تحمد ربها ماخذها.. اخخخخ منك يا حجي ابو علي ع هالورطه الي ورطتني فيها

جود كانه بركان وانفجر وخصوصا من ذكر جده: والله محد ورطك انته ورطت نفسك.. ماعندك شرف ولا غيره وما تخاف ع اعراض الناس والك عين تحجي وتعترض ع الزواج..احمد ربك ما كتلوك واكتفوا بزواج.. والله لو كاتلينك حتى ما نرفع قضيه ولا ناخذ ثارك.. لانك بلا شرف وما النه الشرف حتى نرفع راسنه ونكول هذا ولدنه

احمد بعصبيه خفيفه: لا تتجاوز اوك .. انا ما طكيتها ع ايدها هيه اجت وياي .. وساعه السوده الخذتها وياي .. واهلها لو بيهم حظ جان كظوا بنتهم المن مخلينها بالشارع

جود كض احمد من ياقة قميصه: سد بوزك احسلك.. عمري بحياتي ما شفت واحد واطي مثلك.. بعد سواتك الطايح حظها ع الاقل استحي او سوي روحك مستحي.. مو بعين صلفه اذب الصوج ع بنت عقلها ع كد حالها

حيدر وهوة يمسك ايد جود: جود هدي وخلي هالليله تمر ع خير .. علشان خاطري مو وكت عرايك
جود:ماتشوفه شجاي يحجي
كان احمد واكف وع وجهه ابتسامه ساخره وهوة يعدل ياخه قميصه خلت جود يعصب زياده
حيدر وهوة يسحب جود صفح: ادري انا هم ودي انطيه جم بوكس ع وجهه بس مشيها الحين.. اليوم عرسه وما نريد نتعارك وهنوب يهج ويفشلنه وي الوادم

جود وهوة يحاول يهدي نفسه:ماشي راح اطلع بره لان لو اظل وياه يجوز اتهور واكتله .. لان يا اخي سبحان الله بس اشوف وجهه اتنرفز فشحال لو يحجي

حيدر:اوك ودك ع سلطان يجي بسرعه ترى تاخر وانا اريد اروح للبيت  وصراحه ما اأمن اخليك انته ووياه وحدكم

جود وهوة يطلع : اوك

***

جوجو وهيه تكلم سما ع التلفون : وينج انتي
سما:شوي واخلص واروح لبيت ابوي
جوجو: اوك  من اخلص الحككم ع البيت هناك
سما: اوك

جوجو سدت التلفون والتفتت ع طلال
جوجو: خل ابدل ونروح نسويلها مفاجئه
طلال: اوك بس مو تنامين ..اختي واعرفج اذا دخلتي الدار بعد ما اطلعين
جوجو: لا ثواني

*****

حنان واسراء توهم واصلين  للبيت ولكوا بوجهم بدور
حنان: بعدج ما رحتي
بدور: بعد ما خلصنه كراف بالقاعه وجيكنه ع الاكل وكلشي رجعنه بدلنه وامي رجعت راحت للقاعه تستقبل الضيوف وانا تعبت فكلتلها راح اظل ارتاح علما تجون ونطلع

حنان:اوك راح اروح ابدل ونطلع
اسراء وهيه تباوع لبدله بدور: البدله عليج تحفه
بدور: تسلمين وانتي بعدج ما بدلتي
اسراء: لا كان اقتراح نور العوبه كالت لا تاخذون البدلات وياكم للصالون خلوهم بالبيت ونرجع نبدل ونتزين ع راحتنه
بدور: هم صح بعد وكت ع العرس نلحك
اسراء: يله عن اذنج اروح ابدل
بدور: اوك .. خل اروح اسويلي كهوة راسي راح ينفجر
اسراء: سلامتج.

بدله بدور👆🏻 وتسريحتها👇🏻

****

سما: اخيررا خلصت
نور: كلللوش يراد اطش جكليت
سما:يله امشي ياله ناحك نبدل ما بقه شي
نور:جبتي بدلتج
سما: اي بسياره محمد..اكيد هسه ينتظرنه
نور: مو كتلج خلي جود يوصلنه..شكد نحيسه
سما:😒كيفي.. يله كدامي

نور طلعت وحاولت تتجنب محمد ولو حتى بنظرات
سما: شلونك محمد
محمد:بخير..شلونج نور..شدعوه السلام لله
نور باوعتله بطرف عينها: الحمدلله
محمد( اروح فدوه لهلصوت.. اخخ لو اكدر اكلمج لوحدنه واعتذر.. ع الاقل نرجع مثل قبل واشوف عيونج مو مثل هسه ما تحطين عينج بعيني )

حرك السياره مشوا وهوة يباوع ع نور من المرايه الاماميه وهيه  بعض المرات خانها كلبها ورفعت نظرها اله كذا مره ومن تشوف ابتسامته راسا تلف وجهها ع الزجاج وما تباوعله

****

نزلت اسراء وراحت لمطبخ بيت ام احمد يم بدور

بدور: واووو طالعه خطيره

بدله اسراء👆🏻

اسراء بخجل: ثانكيو ☺️.. الا اكلج اكو احد بيت خالي ابو جود
بدور: لا ما اظن.. عمي وعمتي اكيد راحوا للقاعه واما جود وحيدر فاخذوا احمد وطلعوا من زمان
اسراء: امم خوش راح اجيب اكسسواراتي امس نسيتهم عد نور
بدور وهيه تشرب الكهوة: اوك مو تتاخرين

اسراء راحت لبيت ابو جود ودخلت لغرفه نور وكانت مخبوصه خبص
اسواء:هاي شنو .. ليش خابصه الدار هيج.. والها عين تكولي مهمله..هاي اكيد جانت ادور ع شي باخر لحظه وعفست كلشي.. اهووو هسه وين الكه اكسسواراتي بهاي العفسه

بنفس الوقت وصل حيدر للبيت وهوة صاعد الغرفته سمع صوت بغرفه نور: غريبه جنت اظن ماكو احد.. معقول نور رجعت علمود شي

اتجه لغرفه نور وشافها معطيته ضهره (هاي شنو شوكت كصت شعرها الخبله..توها صابغته ثلجي شنو رجعت غيرت.. تسويها الخبله )

راح راسا وحاوط رقبتها بذراعه وقربها الها : هاي ولج شطالعه .. وليش كاصه شعرج هيج هااا .. بس

اسراء التفتت اله بفزع اول ما حط ايده ع رقبتها وقربها اله وحست رجولها ماعادت تحملها والسانها نربط ومن التفتلها وانفه اله شعره ويلامس انفها وعينه طاحت بعينه حست كلبها راح يطلع من مكانه ما تدري خوف او شي ثاني

اما حيدر الي ما كمل كلامه من المفاجئه وعقله بعده مو مستوعب الموقف ولا مستوعب منو هاي بس طلعه من شروده وصفنته بوجهها صوت اسراء المتقطع وباين عليه الخوف والارتباك: ب ب بعد

حيدر فك حلكه خفيف بصدمه:اسراء
بعد ما استوعب الموقف نزل عينه ع فستانها وجسمها وهوة يباوع عليه بكل جرئه
اسراء كرد فعل حطت ايدها ع صدرها حتى تغطي الفتحه:شجاي تباوع 😡
حيدر وهوة يلعب بحواجبه: حلالي قريبا ماحاجه تغطينه
اسراء اخيرا انطت ردت فعل وحاولت تدفعه وتوخر بس ذراعه الي تحاوط رقبتها رجعتها مكانها وخلتها اقرب زياده
حطت ايدها ع ذراعه الي تحاوط رقبتها بنيه توخرها بس هوة زاد تمسكه
التفتتله بعصبيه بس بسبب القرب انفها لامس انفه وهالشي خله ابتسامه حيدر تزيد وهوة يقرب  منها وباخر لحظه قبل لا شفايفه توصل لشفايفها اسراء بسرعه دارت وجهها عنه وصارت البوسه ع خدها

اسراء دفعته بقوه ونجحت بالاخير وحطت ايدها ع خدها وتكلمت بانفعال تغطي ع خجلها: انته وقح وما تستحي 😠
حيدر بابتسامه مستفزه:بعد شسوين لازم تستحملين .. قدرج تصيرين زوجه المايستحي
اسراء : تحلم اني ازوجك
حيدر: ههه لا راح اصير وبموافقتج يا حلوه
اسراء: نشوف يا حيدر
حيدر:فدووه يا حلو اسمي ع حلكج
اسراء: تدري انك واحد مستفزززز هواي😠
حيدر: هههه والله مو اول وحده تكلي هيج.. عادي نص الاعرفهم يكولون هيج
اسراء بقهر:اي اكيد راكض وره بنات هواي ومستفزهم بهالاسلوب المستفز

حيدر:هههه ليش تغارين
اسراء: انااااا اغار ومنو عليك..هه 😏 احلامك جبيره
حيدر:😂😂😂فديتج تدرين تصيرين تخبلين من تعصبين
اسراء خجلت من حجيه بس حاولت ما تبين: ع شنو تضحك احر ما عندي ابرد ما عندك

حيدر باوعلها بتفحص لدقيقه: الا اكلج انتي ليش ما رحتي ليكون البوسه الي خربت ترديني اسويها ومستحيه.. عاد انتي وهاللبس يجوز اسويها اكثر من بوسه لان صراحه اللبس طالع عليج خطيرر👌🏻 ( ختمها بتصفيره خفيفه)
اسراء توردت خدودها:قليل ادب و
ما كملت حجيها من شافت حيدر فتح ايدينه وهوة يتقدم

حيدر: تعاي ياروح حيدر انتي تعاي
اسراء وهيه تحط ايدينه كدامه: هيه انت تخبلت

من شافته يتقدم اكثر ..بسرعه طلعت من الغرفه وهيه تحاول تركض بس بسبب ضيق البدله من تحت خلتها اطيح جم مره وتكوم
وحيدر يباوعلها ويضحك:😂😂😂😂اذا ما خبلتج يا سريو وخليتج تمشين وتهذين باسمي ما اطلع انا حيدر.. (تذكر لبسها وجسمها من جانت قريب يمه) بس بنت اللذين عليها جسمم ( عض ع شفته بخفه) خطيرره .

اما اسراء الي جانت تهرول وتحاول ما توكع فاول ما وصلت الدرج فطلعت فجاءه كبالها نور وارتعبت منها وصرخت

نور تباوعلها بفزع: ووجع ليش اصرخين
اسراء وايدها ع كلبها: خرعتيني.. اكوا احد يطلع هيج فجاءه
نور: ليش انشالله تردين احمحم وانا امشي.. وبعدين انتي الي جنتي تركضين وطلعتي فجاءه( لاحظت ملامحها المرتبكه) وبعدين تعاي انتي ليش جنتي تركضين وليش وجهج احمر وليش متوتره .. وشجابج هنا اصلا ليش مو بدارج.. وليش وجهج ليكول شايفه شبح..هااا ردي

اسراء بارتباك واضح: انا انا  كنت كنت ( حاولت ادور جذبه بس ما لكت فكالت بنفسها احسن طريقه للدفاع هيه الهجوم فتكلمت بعصبيه مصطنعه) وانتي شعليج هاااا..سالتيني ميت سوال شنو كاعده بتحقيق وانا ما ادري.. (بدون ما اتاني ردها تكلمت بهدوء )تصبحين ع خير

وراحت بسرعه تركض لغرفتها حتى لا تسالها شي
نور ناظرتها بتعجب:هاي شبيها .. حشى مو صاحيه.. شنو تصبحين ع خير..رايحه تنام لو رايحه عرس
كملت طريقها وقبل لا توصل للدار شافت حيدر طالع من دارها
نور عقدت حواجبها بتعجب وهيه توكف كباله بسرعه :حيدر!! شعدك بداري هاا (تذكرت ارتباك اسراء وهسه شوفه حيدر وحاولت تربط الاحداث فعقدت ادينها كبال صدرها وتكلمت بعصبيه خفيفه) واسراء شبيها جانت تركض ومرتبكه هااا..😒😒شسويت للبنيه ها اعترف

حيدر وهوة يبعد نور ببرود: وخري وخري.. ومالج دخل بيه
نور باوعتله بغيظ: وعمه .. اثنينكم نفس الطكه.. مو صوجكم صوج اليسالكم

وتركته وراحت تبدل

****

سلطان ترك احمد بالغرفه يبدل وطلع يم جود بالصاله وكعد يمه

سلطان: الا اكول انته طالب شي من النت
جود عقد حواجبه: امم ما اعتقد
سلطان: تذكر اخاف ناسي
جود:😒احجي مالي خلك افكر
سلطان:مثلا محبس نسائي .. طلبيه من الخارج.. ما تذكرك بشي
جود: احم اي تذكرت.. صارلي جم يوم طالبه.. شنو توه ياله وصل
سلطان: اي اليوم ياله باخر لحظات الدوام..بس صراحه ذوقك جنان.. بس محيرني شي واحد ليش انطيتهم عنوان الشركه مو البيت
جود: خفت يوصل للبيت وانا ما موجود فكلت اوديه للشركه دوم انا موجود بيها
سلطان: اممم يعني تبي اسويها مفاجئه.. والله طلعت مو هين 😉
جود: انجب احسلك
سلطان: انزين كولي شنو مخطط لهلمفاجئه
جود: ما مخطط لشي
سلطان:😒 يعني شنو تروح تجدعه بوجهها ( عفس وجهه وحاول يقلد جود بطريقه مضحكه) وتكوللها هذا حكج
جود ابتسم: يعني شترديني اسوي ادكلها موسيقة
سلطان: لا بس سوي شي رومانسي ..حركه جديده.. حتى لو شي بسبط
جود بتفكير: امممم ما ادري اشوف بعدين .. المهم انا لعد شوي راح اروح اوصل المدام وخواتي للصاله وانته اخذ احمد لصاله الرجال
سلطان:انشالله

******

بعد ساعتين

نزلت بدور وعباتها بايدها ولكت نور واسراء بالصاله يتناقشون
نور: بعدج ما ناويه تكوليلي شصاير
اسراء دارت وجهها عنها:كتلج مصار شي لتلحين
نور:عنيده 😑كيفج لا تكولين عابتلج
بدور:بعدهم ما نزلوا
نور: نووو ..هاي شنو حتى انتي كاشخه يعني بس انا لابسه بدله عاديه 😭 كله من امي كلتلي اشتري شي عادي وحلو لان الحفله محفوفه بس اهلنه واهلهم.. انتوا شدعوه هيج كاشخين😢

بدور: لا تباوعيلي هيج .. هذا عرس اخوي الوحيد حتى لو بيناتنه لازم اكون ع سنكه عشره
اسراء: وانا هذا اول عرس احضره بعد مده طويله.. يا اختي مشتاقه للكشخه والردح.. اخر عرس حضرته عرس راكان

نور:عمه بعينكم جان كتولي.. (باوعت لتلفونها)صدك لبسوا عباياتكم ..راح يجي جود
بدور:ليش مو ع اساس هوة راح يروح وي احمد
نور:اي بس انا دكيت عليه يجي يوصلنه..انا وسما راح نروح وياه وانتوا روحوا وي محمد
اسراء:😏وانتي شوكت تكليلي ليش ما تحبين تصعدين وي محمد هاا ..شصاير

نور بغيض:تردينها الي يعني..مالت عليج بس

بدله نور👆🏻 وتسريحتها 👇🏻

سما توها طالعه من غرفتها القديمه بعد ما بدلت فيها ولكت حنان الي كانت واكفه بنص الطريق قبل الدرج بخطوات ومعطيه سما ظهرها وبعيده عنها بمترات حاولت تتجاهلها وتمشي بس جذبها صوت شهقه حنان ووكع من عدها التلفون

خل نرجع الوضع شوي من جهه حنان

حنان كانت بدارها تبدل وتحط بعض اللمسات وكان علاوي يدك عليها بالحاح بس هيه مطنشه
حنان بتافف:اووف والله ازعاج .. ما مل هذا ونساني..وانا الي كلت اخيرا افتكيت منه وما ظل يدك..شرجعه

خلصت اخيرا وخذت عباتها وشالها حطتها ع ايدها وطلعت من الغرفه ومشت عن غرفتها ولمن قاربت توصل يم الدرجه جذبتها عده رسايل من علاوي
اول رساله كانت فيديو
والثانيه " بما انوا عرس اخوج اليوم فحبيت ادز هديه..عيب صاحبي وما ادز شي"
الثالثه" شوفي الفيديو ومتاكد راح يعجبج مثل ما راح يعجب اخوج😏"
الرابعه" وبما انج ما ترديني اتصل ولا تردين ع اتصالاتي فلعيونح اليوم راح اسد التلفون بكبره  😉"

فتحت الرسايل وبعد ما حمل الفيديو فتحته وهنا كانت الصدمه كان فيديو خالع اعوذ بالله والمصيبه انه بعد فبركه الفيديو حاط وجهه ع بنيه ثانيه بوضع مو زين

اول ما فتحت الفيديو وشافت وجهها وشافت الوضع شهقت وطاح التلفون من عدها وكانت سما ترقب بهاللحظه
حنان كعدت بصدمه يم التلفون وتباوع للتلفون بصدمه وعدم تصديق

حنان بانهيار: لالا اكيد جاي احلم  ( ظلت تضرب خدها ودموعها ظلت تنزل بدون ما تحس) اصحي اصحي اكيد هذا كابوس .. لا ياربي ما معقوله اصلا منين جاب صوري..اي اكيد حلم

سما تقدمت ببطئ وهيه تناظر بحنان بتعجب ونزلت لمستوى حنان واول ما حطت ايدها ع كتف حنان شهقت بقوة وباوعتلها بفزع

سما اول ما شافت دموع حنان خافت: شبيج ولج..صاير شي ..احد صارله شي

حنان وهيه تحاول تمسح دموعها وتمسك نفسها واخدت التلفون وكامت:مابيه شي
وتركتها ودخلت لغرفتها

سما وهيه تباوع لغرفه حنان بشك: هالبنيه وراها شي..متاكده بيها شي .. بس الاكيد ما راح تكلي شي لو جنت اخر وحده بالدنيا.. لانها ما اطيكني .. بس شلون اعرف

****

بهاللحظه وصل جود للبيت ودخل يم نور

نور:اوكف اوكف شوي قبل لا تكعد خل ادكلك صوره
جود: ولج انتي ما تشبعين من الصور
نور وهيه ادك جم صوره:يمه فديتك صاك..لحظه خل اندك سلفي انا وياك
وهيه ادك السلفي نزلت سما ع الدرج وجود تعلكت عيونه عليها
نور وهيه مندمجه بالسلفي: جود باوع للسلفي حتى ادك..جود الوو
التفتت تشوف شنو يباوع
نور بابتسامه خبيثه: هنا الحجي.. ( نكزته بكوعها بخفه) بربك مو جنها سندريلا وهيه جاي تنزل ع الدرج وجايه تقابل الامير
ما رد عليها جود وهوة يتاملها وسما الي تفاجات بوجوده وبنفس الوقت خجلت من نظراته
نور :مطولين انتوا..دكعدرا اريح ( بعد مده لعدم ردهم عفست وجهها)اصلا عادي لحد يرد عليه.. اصلا كلش مو فشله

لبس سما 👆🏻 وتسريحتها👇🏻

نور بعد مده تقدمت يم سما: طالعه تجننين

سما بهمس:جود شيسوي هنا
نور:انا دكيت عليه يوصلنه خخخخخ
سما: وعمه ليش تتنيدرين مو كتلج ما اريد اروح وياه
نور: انا ابي اروح وياه والله حلوه..اذا ماتبين ترحين ويانه كيفج
سما: اووف منج
نور وهيه تسحب سما: تعاي تعاي اوكفي يم اخوي خل ادكلج صوره
سما باوعتله بارتباك ونزلت عينها

جود قرب منها ومسكها من خصرها وقربها اله وعيونه مركزه عليه( يا حليلج يا سما وانتي مستحيه هيج.. معقوله كل هالخجل وما تكدرين تحطين عينج بعيني من وره سالفه امس ولا اكو شي ثاني)

سما بخبث:كافي مبحلك بيها هيج ترى ندري حلوه بس كافي ركز بالصوره خل ندك

شوي ودخلت جوجو :سلااام
الكل رد السلام
جوجو:نور بسرعه روحي لبسي ترى وياي ضيف اريده يدخل
رادت سما تروح هم
جوجو: لالا انتي ظلي .. اصلا مو غريب عليج
سما:منو
جوجو:هسه تعرفين ( فتحت الباب ومدت راسها)يلا خش يا بشمهندس

دخل طلال واول ما شافته سما شهقت وحطت ايدها ع حلكها من الفرحه
سما:ما اصدك هاي شوكت اجيت
طلال فتح ادينه:معقوله ماكو حظنه الي واظلين هيج مصنمه من بعيد

سما راحت ركض ومن قربت توصله نطتله وحاوطته رقبته بادينها وهوة ضمها اله ورفعها بحيث رجولها ما تلامس الارض:اشتقت لك يالخايس
طلال بشقه: لاه لاه لا اطيرين هيبتي كبال البنات
سما بفرح:اصلا من زمان طايره بس انته ما تدري
طلال بعبوس مصطنع:اي اذا امشي وياج شلون ما اطير
سما بعدت شوي عنه وهيه بعدهي مجلبه بركبته:شتقصد هااا.. نزلني انته مو مال حضنه مال بوكس
طلال بعبوس خفيف:واهون عليج
سما باسته ع خده وهيه تضحك: لا والله متهون

فجاءه ما حست الا بالي يسحبها من حضن طلال وتصير بحضنه
جود:ممكن افهم منو انته وشسوي هنا
طلال مد ايده:اسف ما عرفتك بنفسي..انا طلال ما اذكرتني..اتصلت عليه مره

جود وهوة يصافحه:اه اهلا وسهلا
سما تكلمت قبل لا يكملون وهيه تسحب ايد طلال: الا ما كتلي شوكت اجيت
جود سحب سما:قبل لا تحجون اتمنه تلبسين عبايتج قبل
سما باوعتله بعدم فهم: ليش
جود: ما احب مرتي توكف يم ولد وهيه لابسه هيج لبس
سما:بس هوة اخوي
جود:ولوو..بس لبسج قصير ومو حلوه شابكته وانتي بهيج لبس
سما:واذا هوة اخوي
جود: لا تناقشين واطولينها ..روحي لبسي وفضيها
سما باوعتله بغيض وتوجهت للداخل ( ما يكدر لازم ينكد ويطلعله شي حرام يظل هادي وكيوت دوم .. هسه يعني ميشوفني فرحانه ومستانسه الا يطلع شي يطير فرحتي )

طلعت جابت العبايه وهيه نازله سمعت صوت بجي حنان
سما:يوو هاي نسيتها.. ع اساس ناويه اكول لبدور تكلمها ونسيت

نزلت بسرعه ولكت طلال وجود كاعدين بجهه والبنات بجهه  راحت لجهه بدور

سما:بدور تعاي شوي ابي اكلمج
خذت بدور ع صفح
طلال باوع لبدور وبعدين حول نظره لسما:ولج سموه طاك الطريق كله وبالاخير كله ما كعدتي وياي ولا دردشتي..هنوب شوي وتكليلي ابي اروح العرس وبعدين ترحين بيتكم وما اشوفج
سما:ههههع فديتك انته بس اكللها شغله وجايتك

سما تهمس لبدور: ابيج ترحين لحنان وتشوفين شبيها..وضعها مدري شلونه
بدور:شقصدج ما فهمت
سما: ما ادري بس شفتها تبجي..وادري ما راح تحجيلي شي لانها ما اطيقني فلذلك كلميها انتي وشوفي شبيها
بدور: خوفتيني عليها..راح اروح اشوف شبيها
سما هزت براسها وراحت لطلال وكعدت يمه وحضنته
سما:لو تدري شكد مشتاقتلك

*****

اما من جهه حنان فكانت مكضيتها بجي وهيه ادك ع علاوي وتلكاه مغلق بس مع ذلك ما ملت وظلت ادك ع امل يفتح

حنان وهيه تعض باضافيرها ( ياربي شسوي..بس لا يراويه لاحمد (ضربت ع خدودها) مصيبه صابتني اذا صدك.. والله يذبحني بدون ما يسمعني.. يارب انته اعلم بحالي والله ما سويت شي..ساعه السوده الي كلمتك يا عليوي الكلب )

ظلت تمشي بالغرفه روحه ورده وهيه تتصل : رد رد يا كلب.. والله الكلب اشرف منك
بعد دقايق من التوتر ودموع حنان ازيد واعصابها تتلف اكثر

دخلت بدور الدار وشافت حاله حنان التعبانه فراحت لجهتها بسرعه: حنون شبيج حبيبتي .. ليش تبجين

حنان وهيه تمسح دموعها وتتكلم بعصبيه: متعرفين ادكين الباب
بدور: اسفه بس احجيلي شبيج
حنان:  مابيه شي
بدور: حنان حبيبيتي انتي.. لا تخوفيني عليج.. فضفضيلي اذا صاير شي يجوز ترتاحين او اكدر ...
حنان وهيه ترفع شعرها ليفوك وخربت تسريحتها: تركيني بحالي وطلعي بره
بدور: انزين مثل ما تردين بس ترى الكل ينتظرج تحت .. وترى اذا طلعت فغيري راح يجي يسال ليش تاخرتي فالافضل تمسحين دموعج وتهدين وتنزلين ومن نرجع من العرس نتفاهم

حنان هزت راسها بنعم: هسه انزل
تركتها بدور وطلعت وحنان دموعها رجعت تنزل وتوجهت للميز وهيه تفك تسريحتها الي خبصتها بدون ما تحس من التوتر واطلع الماشات ودبابيس الزينه ومشطت شعرها وخلته مفتوح عادي
وحاولت توكف دموعها وعدلت مكياجها وولبست عبايتها وشالها ونزلت

لبس حنان👆🏻

والكل توجه للقاعه

وبعد ساعات من الركص والوناسه
كان الكل فرحان ماعدا حنان الي كانت بعالم ثاني
كانت كاعده ع الكرسي وهيه تهز رجلها بتوتر واضح وكانت سما تباوعلها وخايفه عليها كلبها حاسها بيها شي مو هين بس شلون تعرف وحنان اخر وحده ممكن تصارحها وتفك كلبها الها هيه سما

حنان حست بالخنكه وراحت للحمامات وسما لحكتها بس وكفت يم الحمام  وسمعت صوت شهقات مقموته طالعه من الحمام

سما(شنو سالفتج يا حنان.. ياخوفي متورطه بشغله.. اخاف الي ابالي يصدك وتكونين متورطه وي هذا الي سمعتج مره تكلمينه .. لا مو معقوله حنان غبيه لهلدرجه .. هيه صح ما ابلعها وغثيثه بس ما اعتقد هيه راعيه هالسوالف ولا هيه بهالغباء حتى توصل نفسها لهلمرحله ..يارب استر عليها واحفظها مهمها يكون هيه اختي حتى لو ما اطيكها ولا اطيكني )

رجعت من طريق ما اجت وهيه مصفنه واول ما وصلت لباب القاعه سمعت ضحك نور واسراء

سما:شبيكم اضحكون
نور:😂😂😂عروسه اخوج الخبله كامت تركص بطريقه تفطس ضحك
سما:حرام اضحكون عليها ترى هيه مو بيدها ان عقلها مو تمام
نور جرتها من ايدها ودخلتها:😂😂😂تعاي شوفي وبعدين حكمي.. والله مو قصدي اطنز عليها بس ركصها يضحك.. والله مبينه هالبنت تهبل
سما اول ما طاحت عينها عليها اجتها الضحكه حاولت تقمتها بس ما كدرت :😂😂😂😂خرررب
نور بسخريه: هااا مو حرام عليج 😂😂😂😂

اخيرا ام العروس جرتها وكعدتها ع الكوشه بس مع ذلك ما بطلت ركص حتى وهيه كاعده وكلساع امها تحاول تهديها

سما: الا اكلج هيه شسمها
نور:سكينه
اسراء:بس تدرون ترى هيه كلش حلووه..صدك الي كال الحلو ما يكمل
سما:هيه يعني خبله كلش لو طكه ونص لو شنو وضعها
اسراء وهيه تبلع ريقها: يعني معقوله اذا عصبت علينه تكفخنه او اطكنه بسجينه وهيه مو بعقلها

نور: شالقضيه ترى هيه مو خبله خبله بالمعنى الحرفي.. كل الموضوع انوا عقلها متوقف نموه عند عمر ١٠ سنوات
اسراء رمشت بعيونها عدت مرات : يعني شنو
نور: الي سمعته من امي انه صاير وياهم خادث من زمان وباثر هالحادث صار عدها توقف بنمو المخ.. يعني جسمها يكبر بس عقلها ما يكبر راح يظل عقل جاهل ..فهمتي هسه ..يعني حالها حال سلوم واخوه
اسراء:هاااا
سما:خطيه بس تدرين احسللها تظل بعقليه جاهل ومرتاحه ولا تعقيدات الحياة من تكبر
نور بشقه:استغفر الله العلي العظيم حتى المتخلف عقليا هم حسدتوه ..محد يفتك من عينكم
سما:ههههه وجع مجنت اقصد وبعدين انا ما احسد

******
بمكان ثاني هم جان اكو ركص بس من نوع ثاني كان ممزوج بالشرب والممنوعات

ابراهيم: هسه انا ابي اعرف انته ليش سديت نقالك وما اتصلت عليها وكتلها الي تبيه

علاوي: يالغبي خليها تستوي ياله اتصل عليها
ابراهيم: لا تغلط وتكلم بوضوح وكول شتقصد
علاوي: انا عارف بنات كد شعر راسي واعرفهم شلون يفكرون.. فانا ابي اخليها ع اعصابها طول الليل وتفكر يا ترى دز الفيديو لاخوها لو لا.. بحيث من ادك باجر الا هيه مستويه وتنفذ الي ابيه بسرعه

ابراهيم: والله انته تخوف
علاوي:هههههع خبره سنين

******

بالقاعه كل وحده لبست من سمعت صوت الزفه جايه ولحظات ودخل احمد وبدت الهلاهل والهوسات تشتغل وهوة عافس وجهه كانوا داخل فاتحه مو عرسه واول ما كعد ع الكوشه سكينه كامت بخوف وتوجهت لامها
امها:يمه هذا عريسج ليش خايفه
سكينه بخوف طفولي: يمه ما احبه غيريه .. هذا واحد شرير هوة مو زين .. هوة ضربني  و
امها قاطعتها: لا يمه ميصير تكولين هيج ع رجلج.. كعدي يمه ولا تفشلينه
سكينه مدت بوزها بطفوليه ونزلت دمعتها: ما ابي بطلت ما ابي العب العروسه

امها: يمه اذا كعدتي اليوم كله راح اشتريلج عروسه باربي الجديده
سكينه باوعتلها بفرح وظلت تصفك وتنط: صج والله.. اوك بس وعد ( مدت ايدها الخنصر)
امها بان عليها الحزن ع حال بنتها ومدت ايدها الخنصر وحطت ع صبع بنتها كوعد

وجلست بالكوشه بفرح
واحمد اصلا ما باوعلها ورافع خشمه وكانه مشمئز منها

سما:صراحه كسرت خاطري.. عبالها الموضوع كله لعبه وما تدري عن شي

نور: الله يعينها واخوج مبين من تكشيرته مراح يعديها ع خير ولا راح يهتم فيها

***
انتهى البارت

هلوو بنوتات
طبعا من البارحه وانا احاول انشر بس النت زباله والصور بالعركات ياله تتحمل.. يعني صدك تلف اعصابي ياله حمل 😤
المهم ادعولي بنات فدوه اليوم النتايج 😭😭😭 والله عايشه برعب ولحد هسه منايمه من الخوف