رواية لأجل من احببت سأكون قوية الفصل الرابع والعشرون 24 - بقلم امل

ازوجت ام جود  وعاش ابو عزيز وياها بنفس البيت وكل ظنها راح ترتاح وتلكه رجال يحميها ويصونها ويدللها هيه وابنها.. بس الي صار العكس..جان يضربها هيه وابنها ع اتفه الاسباب.. ومرته القديمه طلبت الطلاك وابنه  عزيز بالبدايه جان عايش عنده بعد طلاك امه  بس صار يكره ام جود وابنها وكل يوم ظل يسوي عركه وي وجود وكل يوم يسوي مشكله ويذبها براس جود حتى ينضرب..ابوه بالاخير شبع من مشاكله وانطه الحضانه لامه..بس خلاه كل شهر يجي عنده اسبوع او يومين
بعد مده باع البيت لان صار ولي امر جود ..فباع البيت ونقلهم بمنطقه ابعد وبيت اصغر ما تدري ليش بس ما ارتاحت لهالمنطقه يمكن لان بعيده شوي عن المدينه وضجتها..

***
سلطان جان ساكت يباوع للطريق
جود:انته بعدك وياي لو وين راح بالك
سلطان:الصراحه ما ادري شكول..طفولتك صعبه
جود:الاصعب انك تشوف امك تنضرب كبالك وما تكدر تسوي شي او بالاحرى حتى لو سويت شي ما راح ينفع لانك ضعيف وما منك فايده..شفايده الواحد اذا ما يكدر يحمي امه بوقتها حسيت بنقص وكرهت نفسي وحسيت روحي صدك غلطه وصرت عاله ع امي لان بسبتي تنضرب وانا عاجز اسوي شي
سلطان:انته جنت طفل وما عليك عتب ..لو اي احد بمكانك هم ما جان كدر يسوي شي
جود:بعد كم سنه امي خلفت منه  بنت عمرها ٤سنوات  وولد عمره سنتين وانا صار عمري ١٢ سنه
حتى بعد ما صار لامي اولاد منه هم ما انعدل ..بس عالاقل اتحسن ما ظل يضربها كل يوم مثل قبل..صحيح معاملته ضل زفت بس ضربه شوي قل ..بس طبعا هالشي ما انطبق عليه..ظل يضربني مثل قبل وازيد..لان انا كبرت واعنادي زاد وظليت ارادده واذا حاول يضرب امي جنت احاول اوكف بوجهه حتى لو ما كنت اكدرله بس كنت افكر ع الاقل راح يضربني وينسه امي ..بس الحسنه الوحيده انه ما كان يضرب جهاله..اختي ايمان مع ان عمرها اربع سنوات بس جان عندها صعوبه بالنطق ..وما كانت تكدر تحجي الا بعض الكلمات وبصعوبه(ابتسم)بس كانت اجمل خلق ربي..وكنت متعلق بيها..كانت ضحكتها تسوه الدنيا كلها..ومن جانت تتلكاني بضحكتها من ارجع للمدرسه كانت تخفف من قهري من ابوها ومن الدنيا..وجان عندي اصدقاء بالمدرسه بس كان اقربهم يوسف وكنت تقريبا اكوله كلشي ومابينه اسرار

فلاش باك

جود توه راجع من المدرسه وشافته ايمان واجتله تركض
ايمان :جوووووو (جانت تسميه هيج لان اسهلها باللفظ)
جود بابتسامه وهوة يشيلها ويحضنها:امونتي حبيبتي..شوفي شنو جبتلج(وطلع من جيبه ككاو
ايمان حضنته وباسته من الفرحه

فجأه سمع صريخ ابو عزيز ع امه وراح يركض
وشاف ابو عزيز كالب الاكل ع الارض
ابو عزيز:جم مره كتلج لا تسوين الاكل مالح..اي تردين ترفعين ضغطي وتفتكين مني مو
ام جود:لا والله مو قصدي ..بس صار الملح هواي بالخطا..اصير هالاغلاط بالطبخ
ابو عزيزكضها من شعرها:بس هالاغلاط ماريدها تصير عندي

جود:امونتي روحي للغرفه بسرعه
ايمان هزت راسها باي وراحت
جود:اترك امي
ابو عزيز التفتله وبتسامه سخريه:😏ماشالله صرت رجال وتريد ادافع عن امك
جود:كتلك اتركها
ام اجود:لا تدخل حبيبي جود..روح جوه يم اخوانك
ابو عزيز:اي روح يم البنات ولا تتمرجل
جود بغيض:يييمه لشوكت وانتي اظلين ضعيفه وخاضعتله..مو كافي كل يوم يضربج..وانتي ترجعين اطبخيله واسوين الييريده بابتسامه.. مو كافي ذل..انتي ما عندج كرامه
ابو عزيز ظل يضحك:جاوبيه ما عندج كرامه ههههههه

ام جود نزلت من عينه دمعه يتيمه ومسحتها وابتسمت:روح انزل جوه..انا وابو عزيز جاي نتفاهم ماكو شي
ابو عزيز شد ع شعر امه:انزل جوه ولا تقاطع نقاشنه
جود ماكدر يتحمل وتقدم بسرعه وكض ايد ابو عزيز بقوه ووخرها عن امه وناضرله بغضب :انا كتلك عوفها 😡
ابو عزيز والشياطين تنطط كدامه:شلون تتجرا ياحشره
وسحب ايده من جود وضربه راشدي لف وجه جود
جود رجع طالعله بنفس النظره
ابو عزيز بعصبيه:يوم اني احاجيك تنزل عينك ولا تتجراء ترفعها(وضربه راشدي ثاني)
جود ظل يناظرله بعصبيه وما رفله جفن
ابو عزيز راد يضربه راشدي ثاني بس ام جود كضت ايده:الله يخليك لا تحط راسك براسه ترى هوة بعد جاهل ..انا راح افهمه بطريقتي
ابوعزيز دفعها بقوه وطك ضهره بالكرسي:انجبي انتي زماله ولا تدخلين خليني اربيه من جديد
وما لحك يلف ع جود والا جود جمع كل شجاعته ودفعه وهوة فوكه وضربه بوكس وره بوكس:كتلك لا تضرب امي يا حيوان

ابوعزيز كدر يدفعه عنه بعيد وجود حاول يرجع يضربه بس ابو عزيز رفسه مره ثانيه..وظل نوبه بوكسيات ونوبه رفس

ابو عزيزوهو يضربه: يا كلب ياواطي..تتجراء وتضربني (كان هاي اول مره جود يمد ايده ع ابو عزيز..مع انه كان ابو عزيز بالنسبه اله كابوس..بس كان اهم شي عنده امه حتى لو ينضرب)

ام جود حاولت تكض ابو عزيز بس ما فاد وياه..كان مثل الثور الهايج
وبالاخير وخر عنه بتعب وطلع بره

ام جود راحت بسرعه لجود وخذت راسه بين احضانه وهي تبجي:مو كتلك روح لغرفتك..ليش ادخلت يمه
جود وهوو يمسح الدم من حلكه:يمه الله يخليج اطلكي منه ..واذا ع الفلوس انا اشتغل واصرف عليج..انا صرت رجال واكدر اصرف عليج
ام جود:ما اكدر واخوانك؟؟
جود بحماس:ناخذهم ويانه..ما نحتاج لابو عزيز
ام جود:صعبه يمه..ابو عزيز مع انه جحيم بس عالاقل محسوب علينه رجال وساتر علينه..وبعدين انا ما اكدر احرم جهالي من ابوهم..من حقهم يظلون تحت رعايه ابوهم
جود بخيبه امل:لعد ليش اطلكتي من ابوي..ليش ما فكرتي بيه هم ..ابوي عالاقل جان احسن من ابو عزيز..ليش ما تحملتيه علشاني

دخل ابو عزيز وبيده سوط وهو يضحك:لهسه ما فهمت لان انته غير..انته مجرد غلطه ومحد يريدك..انته اصلا دمرت حياتها..لو ما انت اجيت للدنيا جان هيه هسة عاشت غير عيشه..انته تختلف عن جهالي..انته ماتسوه الواحد يضحي علمودك

جان ابو عزيز يحجي بغل وكره دفين ومحد جان عارف شنو سر كرهه لجود ..ومحد جان عارف ليش يسوي هيج

ام جود هزت راسها بنفي:لا مو هيج..لا تسمع كلامه
ابو عزيز ما خلاها تكمل كلامها وسحبها وطلعها بره الغرفه
ام جود ضلت تضرب بباب الدار:شتريد تسوي..افتح الباب الله يخليك.. حرام عليك راح تعقد الولد

ابو عزيز وهويضرب السوط بالارض حتى يرعب جود بصوته:صرت رجال وكمت ترفع ايدك عليه مو !! انا هم راح اعاملك مثل الرجال وراح اضربك ضرب حتى الرجال ما يتحمله
جود تراجع ليوره بخوف الى ان وصل لزاويه الغرفه
ابو عزيز:وين راحت شجاعتك هسة .
ظل يضرب جود بالسوط وكان يضربه بدون وعي..وكانوا فقد اعصابه وعقله من عصبيته وكان جود يتلوى من الالم

جان هاي اول مره يضربه بسوط وجود عرف انه عصبه حيل..وانه ما راح يتركه بسهوله
ابو عزيز وهو يضربه ويصرخ بعصبيه:كل ما اشوف وجهك اذكر جدك وابوك..طالع عليهم قذر..لو تدري شكد اكرهك واكره عائلتك ..جان ما تجراءت ووكفت كبالي وتمد ايدك عليه..ياكلب.. انا بالكوة متحملك لان تشبه ابو علي النكس نفس نظرته نفس وكفته..هنوب توكف بوجهي

تركه وهو يتنفس بصعوبه من التعب وجان جود متكور ع نفسه ودافن راسهز بايدينه وصار الضرب كله ع ضهره

طلع ابو عزيز من الغرفة والسوط بايده وانرعبت ام جود من شافت السوط كله دم
ام جود وهي تبجي وبصدمه:الله ياخذك شسويت بالولد..شسويت بيه( راحت تركض للغرفه وشافت جود بعده متكور وما يتحرك راحتله ركض)يمه جود (حركته ولكته فاقد الوعي وظل تطك ع وجهه ع خفيف وهيه تصرخ وتبجي)  يمه جود رد عليه..جود تسمعني..ابو عزييييييييز
راحت تركض لابو عزيز ولكته بالصاله كاعد ويشرب جاي ولا على باله
طاحت ام جود ع رجوله:ابوس رجلك وديه لمستشفى لا يصير بيه شي..ما جاي يرد عليه
ابو عزيز وهو مكمل شرب الجاي:ما يهمني..عساه بهالحال وازود
ام جود:لا تكول هيج..الله يخليك هذا ولدي(مسحت ادموعها وتكلمت بجديه)وبعدين اذا صار بيه شي الشرطه ما راح تعوفك
ابو عزيز سكت وتملكه الخوف شوي لان شغله حساس ومو مال شرطه بس بسرعه اخفه خوفه:راح اوديه بس فكيني
ام جود راحت تركض جابت عباتها:راح اروح وياك
ابو عزيز شال جود بالكوة لان ماشالله كبر وجسمه ضخم اكبر من عمرة وصعده بالسياره بدون ميحجي
وبعد ساعتين بالمستشفى ردله وعيه بعد ما ضمدوه بس الطبيب كللهم اثار السوط صعبه تروح بالمستقبل وراح اظل اثار خفيفه
واول ما فتح عينه لكه كباله امه
ام جود بفرح:الحمدلله ع سلامتك حبيبي..انته بخير شتحس بيه..اذا اكو شي يوجعك كول اجيبلك الطبيب
جود فر وجهه للجهه الثانيه:مابيه شي
ابو عزيز:عظيم..مدام مابيه شي..خل ناخذه للبيت انا ماعندي اليوم بطوله حتى اضيعه علمود حضره جنابه
ام جود:حرام عليك بعده تعبان
ابو عزيز:باجر وراه مدرسه ووره المدرسه وراه شغل بالكراج يعني لازم يطلع
ام جود:شنو!!لا ما يداوم باجر اخذله اجازه
ابو عزيز:اذا مايريد يدام بالمدرسه فبالطكاك بس بالكراج غصبن عليه يداوم احتاجه بالشغل..وبلا هذره زايده راح اتانيكم بره
ام جود:روحه بلا رده(التفتت الى جود الي كان ملتزم الصمت) جود اوعدني بعد من يوم ورايح لا تدخل اذا ضربني ابو عزيز..هوة اذا راددته راح يزيد ..اما اذا جاريته فكلش كلش راح يضربني راشدي ويوخر
جود بعصبيه بالكوه كاتمها:لانج عودتيه هيج..لان يدري بيج لو يكسر ركبتج ما راح اسوين شي..لو انج مره واحده مسويه روحج قويه يمه..لو مره وحده زعلانه عليه وتاركته جان ما سوه هيج..الرجال من يشوف المره ضعيفه لهلدرجه يركب فوك راسها

ايند فلاش باك

جود:بوكتها من الضرب حسيت طلعلي جلد جديد.. جنت مع اني اشتغل وي ابو عزيز بالكراج وره الدوام الا اني ظليت متفوق بدراستي واطلع الاول لاني جنت اسهر بالليل وكنت ادري السبيل الوحيد الي افتك من ابو عزيز وافك امي منه اني اتخرج واشتغل واخذ امي واطلع من بيت ابو عزيز.. هذي جانت خططي حتى افتك من ابو عزيز..بس ما جنت ادري ان للقدر خطط ثانيه..

في يوم جنت اشتغل بالكراج واكتشفت ان ابو عزيز متورط بتجاره المخدرات..جانوا مو بس يصلحون السيارات ..جانوا يفككون كراسي السيارات ويحطون مخدرات ويرجعونها وبهالشكل ما راح تكدر تكتشفه الشرطه.. وينقلونها باريحيه..وكانوا حاطين غرفه سريه يعبون فيها المخدرات بالسيارات وفهمت ان الكراج مو اكثر من واجهيه يخدعون بيها الشرطه ومسكني ابو عزيز وانا جاي اباوعلهم بالغرفه ..وضربني ضرب مال سنه بيوم..وحذرني او بالاحرى هددني اني ما اعلم احد لان الناس الي يشتغل وياهم ما يرحمون احد..واني لو كلت لاحد والشرطه اكتشفت هالشي واعتقلوهم راح اعرض حياة الكل لخطر واولهم امي واخواني..ومو بس انا اكتشفت سالفه المخدرت بنفس الوقت كان عزيز جايلنه للكراج وي ابوه وسمع كل الي صار..وطبعا اشمت يوم ضربني ابوه والفرحه مو سايعته..بس يجوز حقه يكرهنه لان خربنه حياته وعائلته تفككت بسببنه لان امي ازوجت ابوه..بس الي مو فاهمه ليش ابو عزيز يكرهنه
(جان ابو عزيز بهالوقت مجرد شخص عادي ينقل المخدرات فقط وتوه داخل للمجال ويشتغل جوة ايد ناس ويخاف منهم ..يعني مو شي مهم بهالمجال)

المهم وفعلا ما كلت لاحد وظميت السر بكلبي من خوفي على امي وقررت راح اسكت لمن استغل بذاتي وافضحه بس ابو عزيز ما اكتفه بسكوتي راد اكثر.. راد يستفاد مني ويشغلني ببيع المخدرات بين الشباب .. راد يدخلني بعالمه القذر
انا مع اني صغير بس افتهم واعرف كلشي من ابو عزيز مابيه خير وخفت يورطني وخصوصا من زاد ضغطه وتهديده

ومن خوفي شكيت همي لصاحبي يوسف..وهاي جانت اكبر غلطه بحياتي..لان اخوه شرطي..والافندي ماكض لسانه وكال لاخوه مع اني حذرته ووصيته وكتله لاتكول لاحد وهوة وعدني ما يكول لاخوه.. ومع ذلك راح حجه كلشي لاخوه

واخوه والشرطه الباقين ما تهجموا ع كراجنه بالعكس ظلوا ايراقبون واتبعوا السيارات علمود يوصلون للراس المدبر للسالفه وفعلا بحلول ايام قبضوا ع رئيس العصابه ..وابو عزيز شرد علمود لا تكضه الشرطه وشرد من العصابه هم لان ما راح ترحمه لان فشل بمهمته وتسبب بسجن رئيسهم

جود:العصابه حبت تنتقم لرئيسها وخصوصا للي كان السبب بالقبض عليه بالبدايه جانوا يدورون ع عبد العديز حسبالهم هو خبر ..بس ما ادري شلون وصل للعصابه خبر اني انا الخبرت عليهم .. (غمض عيونه من حس انها انملت دموع ما حبها تنزل) بليله ضلمه اجو لبيتنه وما حسيت الا واحد فوك راسي يكعدني ..جانت اطول ليله بحياتي وعمري ما انساها .. وخلوني اندم لاني اجيت لهلدنيا وعشت هالعيشه الغبرة
جود فر وجهه للجهه الثانيه من حس دمعته راح تخونه وكمل بصوت مرتجف حس بيه سلطان بس احترم رغبته وما حب يحسسه انوا حس بشي: ما احب احجي بالتفاصيل بس كتلوهم كبالي واحد واحد حتى الطفل عمره سنتين ما رحموه (حس بغصه ببلعومه) جنت اظن بالبدايه جايين بس علمودي من كالوا جايين لان خبرت عليهم وحلفت الهم مو انا الخبرت بس محد صدكني وضربوني ضرب عمري بحياتي مشايفه صرت اترحم ع ضرب ابو عزيز

مع كل هالضرب كلت نعمه انا ولا امي واخواني اهم شي همه مينجاسون (سكت شوي حتى يبلع الغصه الي بكلبه) بس من بدوا يكتلونهم واحد واحد حسيت روحي تطلع جنت ارد اصرخ استنجد باحد بس جانوا سادين حلكي صرت اصرخ من كلب جنت ارافس اريد بس تنفك هالحبال واسوي شي تمنيت اني اكبر تمنيت اني اقوه تمنيت تصير معجزة ويطلع كل هذا كابوس  تمنيت يكتلوني انا اول ولا اشوفهم ينكتلون كبالي تمنيت هواي اشياء الا الجاي يصير
جنت عاجز ومصدوم وانا جاي اشوف اختي امون بالكوه اتحرك ايدها تجاهي وحركتها بدت تقل ودمعه اخيرة نزلت من عينها وبعدها فقدت عيونها لمحت الحياة وهية تباوعلي حسيت عينها بعدها تستنجد بيه

ومن خلصوا منهم اجوني وضربوني طلقه وجنت اظن راح ارتاح من هالمنظر وهالعيشه بس وانا جنت افقد الوعي جنت اسال روحي ليش اجيت لهلدنيا شنو الهدف من حياتي بس عذاب بعذاب ششفت من حياتي من جيت لين راح اموت شنو شفت شي حلو واخر فكرة اجت ابالي ربي ليش خلقتني

*****

سما وعيونها دمعت:ااااااه يعني شافهم ينقتلون كبال عينه
نور:اي خطيه اخوي
سما مسحت دمعتها:نوروه ليكون جاي تجذبين عليه..شو قصتج مو مقنعه احسها فلم هندي بس بلهجه عربيه
نور:لا والله هذا الي صار
سما:بس تدرين انا عبالي العصابات وتجار المخدرات بس بالافلام..ماعدالي اكو بالواقع هيج
نور:لا اكو واكوهواي..بس كلها بالخفاء ولان احنه بنات واربعه وعشرين ساعه كاعدين بالبيت فعدالنه الواقع غير..والجريمه بس بالافلام..بس نسينه ان الافلام مستوحينها من الواقع

سما:انزين كمليلي شصار باخوج
نور:ودوه المستشفى وضل اسبوعين بالمستشفى بغيبوبه ومن كعد ما يكدر يتحرك..وما كان احد يمه..لان جدي ما وصله خبر بسرعه..والشرطه ما تدري شلون يوصلون لاقاربه لان جود كان بحاله صدمه وجان يكعد من النوم وهو يصارخ ويضربونه ابره مهدئ ويرجع ينام..كان بعمر ما يكدر يستوعب كل الي صار..وبيوم دره جدو راح بسرعه للمستشفى بس ابوي كان كالعاده مسافر بس سبق جدوو ابو عزيز ووصل قبله..ومن وصل جدي لكه ابو عزيز يصارخ ويضرب جود والممرضين يحاولون يوخرونه عنه

فلاش باك

ابو عزيز وماسكينه الممرضين:انته السبب بموت امك وخواتك
ابو علي دخل ووخر جود من ادينه:شلون تمد ايدك ع ابني
جود بعيون دامعه وبانفعال:انا مالي دخل انته السبب ليش اشتغلت وي تجار مخدرات وورطتنه وياك..اوعدك راح اخليك تدفع الثمن غالي
ابو عزيز:لو ساد حلكك وما رايح كايل ليوسف واخوه عن المخدرات جان ما صار الي صار
جود:ليش شدخل يوسف
ابو عزيز:ليش ما تدري انوا اخو يوسف هوة الي كض رئيس العصابه وجاي يلاحكني وحاليا حصل ع ترقيه بفضلك

جود تذكر يوم كال ليوسف ع سالفه المخدرات ونزلت دمعه ع خده(معقوله يوسف يسويها ..هوه وعدني ما يكول لاحد حتى اخوه..لا مستحيل):انته جذاب
ابو عزيز بسخريه:😏جذاب؟؟شوف هاك اقره هالخبر..صار مشهور كل البرامج كتبت عن البطل المقداد الي مسك رئيس العصابه..انته السبب بموتتهم وما راح اسامحك ولا ارواحهم راح اسامحك
ابو علي:كافي..الولد مو ناقصك..اطلع بره
ابو عزيز باوعله بكره:راح يجي يوم واعلمكم منو ابوعزيز
جود وعيونه الدامعه ع الخبر:انا السبب
ابو علي ما سمعه عدل:شنو!!
جود وهو يمسح دموعه وتنزل غيرهم:هوة معاه حگ..انا السبب بالي صار..كله مني ماتوا
ابو علي حضنه وظل يمسح ع شعره:لا تكول هيج..هذا المقدر ومكتوب..هذا يومهم..ادعيلهم بس الله يرحمهم
جود حضن جده بقوه وظل يبجي
ايند فلاش باك

نور:للحين اتذكر يوم جابه جدو للبيت..كان عمري بوكتها حسب ما اذكر ٧ سنوات..ما اذكر عدل..بس اذكر من جابه جدو كان ع كرسي متحرك لان ايده ورجله مجبسين..وركبته حاطيلها مدري شسمها  ..المهم ما يكدر يحركها غير الطلقات الي بصدرة مدري شلون طلع عايش بهذا جسمه المابي مكان صاحي..وما كان ينطق ولا بحرف ..وكان يطالع للكل بنضرات عصبيه..كانه معصب من الكل

اذكر من جان يكعد من النوم ويصارخ باسم اخته وامه..جان كل يوم يحلم بكوابيس..واعتقد لهسة يحلم بيهم

سما:وشصار ع العصابه قبضوا عليهم؟؟
نور:لا طبعا ..بعد ما خلصوا نظفوا المكان من اي دليل وخبصوا البيت وسووا كان حرامي داخلي البيت يبوك وكاتلهم
سما:انزين وجود ما اعترف عليهم
نور: اعترف بس طلعوا مثل الشعرة من العجين

******

جود:لهسة اذكر من اجتني نور وع وجهها ابتسامه ذكرتني بامونه وهيه جايبتلي كلاص ماي..بس بوكتها دفعت ايدها وطاح الكلاص وباوعتلي بعيون دامعه وحلك مبوز ..كان كلشي فيها يذكرني بامونه وهذا الشي يخليني اعصب زياده ما ادري كنت معصب منهم لو من نفسي..كنت بعض الاحيان اذب اللوم عليهم ..كنت اكول لو ما ابوي طلك امي ما كان صار شي من هذا..كان ماعشت هالعيشه..لو واحد من اهلي منع امي تزوج من ابو عزيز وخذانه عنده ما كان صار هالشي.. وبعض الاحيان اعصب من نفسي ومن ضعفي..لو كنت اقوه لو كنت اكبر شوي..ماكان صار الي صار

بس مع الوقت وبفضل الحجي ابوعلي ونور وحيدر..اكتشفت انوا صح الله حرمني من امي واخواني..بس نفس الوقت انطاني جد واخوان وابو حتى لو ما اشوفه هواي..وعوضني بام مثل ام حيدر..الي ما رفضت يوم جدي طلب منها انوا ينادونها ام جود مو ام حيدر..حتى لا احس بالفرق عن اخواني..ويحسسني انها مثل ماهيه امهم هيه هم مثل امي..لهسة ما انسه فضلها..ربتني مع اخواني وما فرقت بينه وولامره حسستني اني مو ولدها مع اني بوكتها جنت نحس وحالتي النفسيه زباله وما انحمل بس تحملتني الله يجزاها كل خير واحتوت عصبيتي..وفتحت صفحه جديده..بس وعدت نفسي اكون اقوى وما خلي شي يمس عائلتي مره ثانيه

سلطان كان يباوعله بشفقه
جود:لا تباوعلي بهالنظره..انا ماجكنت ارد اكول لاحد لاني ما احب هالنظره

سلطان تفهمه وحاول يغير الموضوع :هسة عرفت سر لزكتك بالنادي كل يوم تروحله وتدرب..والله اني ضلمتك..عبالي تدرب حتى تطلعلك عضلات وتنعجب بيك البنات..اثاريك حتى اصير قوي
جود ابتسم:ههه هسه هذا بس الفهمته من كلامي
سلطان:فهمنه سر العضلات بس شنو سر كرهك للبنات
جود:منو كالك اكره البنات
سلطان:لعد ليش ما تنطي وجه لوحده وولا فكرت بسوالف الحب مثل باقي الشباب
جود:ما اكرهم بس ما ادري ما فكرت اني احب لان كل الي شاغل بالي الشغل واهلي..ما كنت اظن الحب شي مهم
سلطان :اممممم ماكنت🤔 هاي فعل ماضي..لعد المضارع شنو..يعني الحين تظن الحب مهم

جود:ماكلت هيج..بس الحب مثل مايكولون مؤلم وخصوصا اذا كان المقابل يطلع ما يحبك..فلذلك جنت اتجنبه..جنت اخاف احب
سلطان:انته شتحجي البنات بالشركه كلها ميته عليك ..وتكول اخاف ما تحبك..انته لو بس تاشر بصبعك كلها تصف طابور يمك
جود باوع لكدامه بحزن:هذول ما يحبوني..يحبون فلوسي..يحبون مدير شركات ابو علي وبس ..البنات كل اليهمها الفلوس
سلطان:مو كلهم ..اكو تحب فعلا ولشخصيت الرجال
جود:يجوز ..بس البنات معروفات بتمثيلهم فما تكدر تعرف الي تحب صدك والي جاي تمثل الحب علمود الفلوس
سلطان:لا تظلم البنات..يجوز البنات معجبات بشخصيتك..وترى شخصيتك من النوع التعجب البنات..ما ادري ليش البنات يحبون الشخصيه المعقده والي ما تنطيهم وجه والي يكون كلامه قاسي مثلك
جود ناظرله باستغراب:انا معقد؟؟
سلطان:مو قصدي المهم مو علمود فلوسك
جود عقد حواجبه:لا علمود فلوسي والدليل ريهام..منو كان يظن انها تحبني علمود فلوسي..حتى ابوي ابوعلي الي عنده خبره بالحياه انخدع بيها..جانت مسويه بيها تحبني ومستعده حتى تنتحر علمودي..😏وبالاخير شنو!!!اول ما كربنه نفلس ما تانت حتى شهر ودورت ع واحد غيري

سلطان:هاي ريهام حاله شاذه من القاعده
جود:لا كلهم نفس الشي..يحبون الفلوس
سلطان:لا مو كلهم والدليل مرتك
جود تذكر انه كال كدامه لسما انها ما تريد يكربلها وسكت دقايق يفكر:هاي هم حاله شاذه..بس سما غير..احسها وراها شي.
سلطان:شي مثل شنو
جود:ما ادري بس احساسي يكول انها ضامه شي..ومع الوقت راح اعرف شنو(تذكر اخر مره قربلها يوم كان يريد يختبر مشاعرها وحط ايده ع صدرها حتى يشوف نبضها..تذكر نظرتها كانت غير ..كانت بيها شي ما شافه من يبتعد عنها..تذكر من ابتعد عنها وتشتتها وكانت تتجنب تباوعله ) اكيد اكو شي
سلطان:صارلي ساعه اهذر وانت كاعد تفكر وبالاخير كل الي كلته (حاول يقلد صوته) اكيد اكو شي

.
.
.
انتهى البارت