رواية لأجل من احببت سأكون قوية الفصل السابع عشر 17 - بقلم امل

اي اريدگ
مثل واحد راد جنة
وهوه يدري بروحةة گافر
ومثل واحد راد خلفة
وهوه يدري بمرته عاگر !!
وين رايح ؟
هجرگ يضيع گشختي
وبيمن اگشخ لو مشيت !!😔

*****❤️❤️❤️*****

سما بخوف:ااانت
عزيز بابتسامه خبث:اي ما اشتقتيلي

سما رادت تشرد وتروح ل جود

عزيز:روحيله علمود اسوي بيه مثل ما سويت بمحمود
سما وكفت وحست رجولها نشلت
سما والدموع بعينها:انته شتريد مني..ليش رجعت

عزيز :انا عمري ما تركتج حتى ارجع..انتي الي دوم تشردين مني..بس هسة راح ادفعين الثمن..تركتيني ورحتي وخليتيني أتعذب ببعدج وما خليت مكان ما دورتج بيه وانتي مرتاحه وعايشه حياتج..وطايحه حب وغرام مع الاستاذ جود😠

عزيز وجه مسدسه لجود الي كان معطيهم ظهره وجاي يشتري:شكلج ما تبتي من اخر حادثه صارت..وانا حذرتج تُحبين واحد غيري.. اعتقد وقت التحذير خلص

سما وكفت كبال مسدسه:لا اسمعني اول انته فاهم غلط
عزيز بعصبيه:اي غلط وانتي مخطوبه اله..وتتمشون ع الشط أيد بايد..اي غلط ما تكوليلي..شنو تكصين عليه انتي

سما بخوف وارتباك:لا مو هيج انته فاهم غلط صدكني..كلشي صار لان امي رادت هالشي قبل لا تموت..وانا قبلت ازوجه علمود امي بس..صدكني ما نحب بعض..السالفه كلها ان احنه حققنه اخر رغبه لامي قبل لا تموت..وجود ما يحبني جده جبره ع الزواج

عزيز: بس امج ماتت وانتي كملتي وياه..ليش ما تركتيه

سما:هاااا ..لا لا انا كنت اريد اطلك وكتلهم بس محد رضه

عزيز:اي خل اكتله ونخلص منه وما تحتاجين رضه احد

سما:لالا لا صدكني انا ناويه اطلك..اترجاك لا تكتله..الله يخليك
عزيز:شيضمنلي اني لو تركته راح تطلكين
سما:اوعدك وعد راح اطلك..صدكني

عزيز:علمود معزتج بكلبي راح انطيج فرصه..بس والله لو ما اطلكتي منه الا اكتله ..انتي الي فاهمه..ولو ما صرتي الي فما راح تكونين لغيري

سما ناظرت لجود ع امل انه يجي بس شافته يحجي وي واحد

****
جود خلص مشترى وراد يرجع بس ابراهيم صدم فيه ووكعت الموطه بالارض

ابراهيم:أسف خويه
جود:لا عادي ولا يهمك..هسه اشتري غيرهم
ابراهيم:خليني انا اشتريلك

جود:لا مشكور ما حاجه
ابراهيم:لا انا الوكعتهم فأنا الي اشتري
جودي:مشكور متقصر بس انا اشتري

*****

عزيز وهو يقرب:انتي ما تكصين عليه مو..راح تطلكين وتكونين الي مو
سمارجعت ليوره:اسمع لا تقرب تفهم..

عزيز:انتي ليش ما تحبيني..ليش ما تتمشين ع الشط وياي مثله..انا سويت كلشي علمودج..كلشي يسعدج سويته فليش ما حبيتيني
سما:لأنك واحد مجرم..وقتلت نفس بدون ما يرفلك جفن

عزيز بعصبيه:قتلت علمود منو؟ ..مو علمودج..ليش ما تفهمين اني احبج..وراح اسوي اي شي حتى تحبيني حتى لو اقتل
سما:وتظن انك لو قتلت شخص كبالي راح احبك..انته شلون تفكر بس ارد افهم

عزيز:يعني ما راح تحبيني مو..والله العظيم لو ظليتي وياه الا اكتله واكتلج وياه واكتل نفسي وراج فهمتي

سما(اهدي سما لا تعصبينه..هذا واحد مجرم لا تتهورين وتخلينه يعصب..اخذيه ع كد عقله علما الكه حل..يارب ساعدني)

سما:كتلك راح اتركه فلا تتهور أترجاك..لو قتلته ما راح تستفاد شي.. بس راح اتخليني اكرهك زياده
عزيز:يعني تكرهيني هسة
سما:هااا لا منو كال ..بس جود حتى لو ما احبه بس يظل ابن عمي .. ومحد يحب الي يكتل كرايبه

عزيز:اوكي يا سما راح اتركه وراح اروح بس راح اظل اراقبج..ولو ثبت لي انج تجذبين عليه يا ويلج.. وتعرفين انا شسوي

راح وتركها وسما انهارت وكعدت بالكاع وظلت تبجي (يارب ليش يصيربيه هيج..بعدما اخيرا بديت أتقبل جود وهوة تقبلني وردت أبدي حياتي وياه من جديد..ليش يطلعلي عزيز مره ثاني..معقول ما مكتوبلي ارتاح..لازم اعيش بمشاكل طول عمري..هسه شسوي معقوله اطلك منه..بس انا ما اريد اطلك..بس جود خوش ولد وطيب وحباب حتى لو بعض الاحيان يحاول يبين العكس..جود يستاهل بنت احسن مني..اذا ظل وياي راح تجيه المشاكل من كل صوب..وهوة مايستاهل هالشي...)

قاطع افكارها صوت جود
جود:أسف ع التأخير بس وكعت الموطه وجبت وحده جديده

سما مسحت دموعها قبل لايشوفها وكامت:لا عادي

جود انتبه انها كانت تبجي:بيج شي..انتي جنتي تبجين!!

سما:لا ما جنت ابجي..بس دخل غبار بعيني
جود عقد حواجبه بتفكير(ليش حاسني كلبي صاير وياها شي..مبين عليها كانت تبجي لعد ليش تنكر..خليها ع راحتها اكيد لو تريد تحجي فراح تجي من نفسها وتكولي)

جود بابتسامه:اوكي(كض ايدها)امشي نتمشى وبعدين ارد اوديج مكان

سما سحبت أيدها بسرعه:ما اريد اروح مكان..اريد ارجع للبيت(يا خوفي عزيز بعده هنا وجاي يشوفنه)
جود:بس ارد اوديج مكان تشوفينه ما نطول بس نشوفه ونرجع(اكيد راح تفرح من تعرف اني اشتريت البيت وكتبته باسمها..اكيد الها ذكريات حلوه بيه)
سما بجفا:كتلك ما ارد اروح..رجعني للبيت

جود(لا هاي اكيد صار وياها شي بس شنو..تغيرت طريقه كلامها ١٨٠ درجه..قبل لا اروح اشتري كانت شحلاتها..شغيرها ..يجوز انا ابالغ والبنيه صدك بس تعبانه..خل اوديها ترتاح وباجر احجي وياها)

جود:اوكي يلأ امشي

******

ابراهيم وعزيز بالسياره

ابراهيم وهوة يسوق:انا بس ارد افهم سويت هالمجازفه كلها وحبسنه الرجال الحاطه ابوك يراقبك علمود شنو..ليش ما سويت شي..ليش ما قتلت جود وخذت سما

عزيز:انته ما تفهم شي ..القتل ما ينفع وي سما
ابراهيم:فهمني شلون ما ينفع
عزيز:انا جربت القتل قبل..وقتلت شخص عزيز عليها كبالها..بس شنو كانت النتيجه انها شردت وما كدرت اوصلها..فأحسن شي..استخدم جود حتى اضغط عليها..وراح اخليها تتركه واخذها انا..وهم اكو سبب ثاني ما خلاني اكتل جود

ابراهيم:والله انك داهيه.. وشنو هالسبب
عزيز:ابوي
ابراهيم:اي صح حذرك..بس لو كتلته راح ينحط امام الامر الواقع وما يسوي شي
عزيز:😒😏بعدك ما تعرف ابوي..والله لو قربت لجود جان كتلني وراه

ابراهيم:بس انته ولده وهاي مجرد تهديدات ..لو صار الصدك ما راح يسويها..مجرد تحصل بس كم كف
عزيز:😏مو اكلك ما تعرف ابوي..ابوي مجنون
ابراهيم:شتقصد
عزيز:والله مجنون..من كنت صغير صارت عدت حوادث وخلت ابوي يدخل مصح عقلي..والفضل بدخول ابوي المصح عائله ابو علي وأحفاده..علمود هيج ابوي يريد ينتقم منهم..تصدك بعض الأحيان احس روحي راح اصير خبل مثله من كثر ما يخوفني..تخيل طفل صغير يتربى ع أيد خبل شيطلع مثلا وزير لو دكتور ههههههه

ابراهيم:ممكن اسأل شنو سووا عائله ابو علي بابوك
عزيز:من كان ابوي صغير كان ابوه الي هوة جدي يشتغل عند الحجي ابو علي..وصفقه من صفقات الشركه فشلت واكتشفوا وره هالشي انوا اكو اختلاسات وما عرفوا منو..وعلمود واجهه شركتهم ذبوا الاختلاس براس جدي وسجنوه ..وعاش ابوي وجدتي بحاله ما يعلم بيها الا الله..عاشوا بحاله فكر وأبوي كان صغير ومحد رضه يشغله ..وبعد فتره سمعوا ان جدي مات بالسجن بسكته قلبيه..وجدتي ظلت ما تاكل ولا تشرب من سمعت بالخبر وعاشت بحالت صدمه وما ظلت هواي ولحكت برجلها..وصار ابوي يتيم وما عنده احد..وتعرف ع مجموعه مجرمين يتاجرون بالمخدرات واشتغل وياهم..وهيج دخل بالاجرام.. هذا الي سمعته منه ..ومن حظي الردي صرت ولده..هسه شيصير لو كنت ولد عائله محترمه مثل جود..جان هسه سما حبتني وعشت حياة سعيده مو مثل هالحاله الطايح حظها العايشها

ابراهيم:انزين جود ليش تكرهونه..هم اله قصه وياكم لو لانه بس حفيد ابو علي
عزيز:لا اله قصه ..وقصه جبيره..اممم وصلنه..يلأ نشوف الرجال الحاطه ابوي حارس عليه
ابراهيم:انزين شنو قصه جود..إجاني الفضول
عزيز:الفضول يكتل صاحبه..فدير بالك..وع فكره لو دره ابوي انك تدري عن ماضيه المعفن يجوز يكتلك..لذلك سد حلكك🤐 اذا تحب حياتك هههههههههع

طلع من السياره وخله ابراهيم خايف
ابراهيم(شنو هالعائله شكلها كلها فاصله من الرئيسي ومخبله والادهى من هيج مجرمين)

******

وصل جود وسما للبيت وسما نزلت بسرعه وبدون ما تكلمه ودخلت للبيت ولاكتها نور

نور:هلا بالعاشكه..هلا بخاينه الصداقة

سما:عن اذنج بروح داري
نور:شبيج سما صاير شي
سما:لا ماكو شي
نور:ليكون بدور طكتكم عين وتعاركتوا..جنت ادري اني ما لازم اكولها ..عينها حاره
بدور::😒عمه بعينج..تنتظريني اروح حتى تحشين بيه يا نوروه
نور:😅بِسْم الله متى جيتي انتي

سما:تصبحون ع خير

وطلعت غرفتها بدون ما تسمع ردهم
بدور:شبيها
نور:سوال محير بس اكيد الرد عند اخوي..خل يجي واساله

شوي ودخل جود
نور:وين جنت
جود:جنت اصفط السياره
نور:شبيها سما ليكون تعاركتوا..كولي كلشي صار
جود:ما صار شي
نور:لعد شبيها فهمني
جود:خل افهم بالاول وبعدين افهمج(وتركهم وصعد لغرفته)

نور:هذول شبيهم..معقوله صدك طكيناهم عين واحنه ما ندري
بدور:😒احجي عن نفسج

*****

سلمان:احمد معقوله توصل فيك المواصيل تعتدي ع بنت فقيره
احمد:لا تكبر الموضوع هيه اجت من نفسها..وبعدين انا كنت معصب وهيه اجت كبالي

سلمان:اول شي انته تدري البنت نص عقل ومو صاحيه..وثاني شي واذا معصب شنو اطلع حركتك بالبنت شنو ذنبها..لو اطلع مراجل ع البنات
احمد:اكول جب ولا تتجاوز اوكي..ع اساس انته ما تلعب ع البنات..فلا تصير رجال شريف براسي

سلمان:صح انا هم عندي سوالف مكسره..بس ما اكرب ع البنت الشريفه..انا مو واطي مثلك
علاوي وصل وشافهم يتعاركون:هيووو شبيكم..انتوا اصدقاء لا ادخلون الشيطان بينكم

سلمان:هذا الشيطان بشحمه ولحمه ما حاجه يدخل
احمد:شوف ترى انا ساكتلك لأنك صديقي..والله لو ما صداقتنه جان دفنتك هنا
علاوي:فهموني شصاير
احمد:كل الموضوع دره عن موضوع البنت الخبله

علاوي:هااا الخبله..انزين وين المشكله
سلمان:انتوا شنو ماعدكم غيره..حتى لو البنت خبله بس هاي شرف ناس
علاوي:اهووو صار براسنه شيخ..اكول اذلف عن وجهي مالي خلك تفلسفك..ولمعلوماتك انا شفته من راد يسوي هيج وما منعته..يا اخي الولد حر انته منو حتى تتحكم فيه

سلمان:ترى الصديق ينصح صديقه اذا طاح بالغلط بس انته مو صديق انته عدوا لأنك تشجعه ع الغلط..هسة ياله اتفتحت عيني وانا ندمان كد شعر راسي لان صادقت ناس امثالكم..وبعدين اي حريه هاي التحجي عنها.. هسة ترضون الواحد يلعب ع خواتكم ويلطخ شرفكم

احمد:اكول جب واطلع بره انته مو مال احترام
سلمان:طالع بس صدكني راح تذكر كلامي وتندم ع السويته
علاوي:الله ومحمد وعلي وياك...احمد معليك منه انته ما سويت شي غلط..شاب ومن حقك تتمتع بشبابك
احمد:تلفلي أعصابي
علاوي:امشي خل نتونس بس وأنساه خليولي
احمد:بس اصدك معاه حق ببعض الامور..صح انا العب ع البنات بس يستاهلون لان همه اغبياء ويسلمون نفسهم لمجرد كلمتين حلوين.. بس هاي خبله وما عليها عتب انا شلون قربتلها ولطخت شرفها..مدري ليش احس بالذنب

علاوي:ياحبيبي معاك حگ بشغله وحده هيه خبله وما عليها عتب..يعني لو راح شرفها محد راح يلومها او يحجي عليها لان خبله ومعذوره..وصدقني لو دروا اهلها ما راح يسوون شي.. فخلي عنك هالافكار بعدين صوج اهلها بنت مو صاحيه المن اخليها تطلع بره البيت

احمد:يمكن معاك حق(بس ليش احس بتأنيب الضمير اذا معاه حق..حاس روحي مسوي غلطه جبيره..انا اصلا شلون سويت هيج..وين جان عقلي..ما حسّيت أبروحي الا بعد ما سويت المصيبه)

علاوي:(😏والله انك واحد غبي وبسرعه ينكص عليك..اصبرلي بعد..الا اخلي بعد فتره يوصل خبر لأهل الخبله انك اعتديت عليها وشوف شراح يصير بيك..خليه شهر احسن ياله اكللهم لان كل ما زادت عصبيتهم وهمه يدورون منو السواها كلما كان احسن..اكيد ابو عبد العزيز راح يكافئني لو دره)

*****

سما وكانت بغرفتها (شراح اسوي..شهالمصيبه..فكري سما فكري..انزين لو اطلكت من جود..شلون اخذ عزيز!! انا مستحيل اخذ هالمجرم..واذا ما اطلكت راح يموت جود..هسة خل اركز ع الطلاك علمود ابعد جود عن المشاكل ويظل عايش وبعدين الكه حل لعزيز..حتى لو اضطريت اشرد او اسافر ل طلال ولا اخذه..بس انا لو طلبت الطلاك كلها راح توكف ضدي ..اخخخ كافي تفكير وخل انام باجر راح افتح نار جهنم عليه)

****

جود جان يصفح بالصور بتلفونه وشاف صورهم بالمطعم وابتسم..(اليوم شحلاته واحنه هادين وبلا مشاكل..اتمنى نبقه هيج دوم لان تعبت من المشاكل وارد استقر ..لشوكت اظل ساد كلبي ومبتعد عن الحب ..لشوكت اظل عايش بهالحياة الروتينيه بس شغل وبيت..كافي خل اعيش حالي حال باقي الشباب  ..خل افتح صفحه جديده وي سما وخل احب وانحب ..سما خوش بنيه وحلوه ومناقصها شي ولتنكر بديت تميل الها فليش تخلي الخوف يبعدك عنها ويحط حواجز .. صح هو حقي اخاف لا انلجم مرة لاخ. بس هية هاي الحياة اذا مجازف متعيش.. راح امشي وره احساسي والله كريم مدري ليش بداخلي انا مقتنع انوا سما هيه الراح تسعدني وتنسيني كلشي واتمنه احساسي صدك)

وهو يصفح بالصور شاف صور سما وهيه ماده لسانها😜..داكتها بدون ما يدري جود:ههه خبله هالبنت

رسلها كم صوره من صورهم سوه وكتب"اليوم كان احلى يوم بالنسبه الي"

جود:شبيه انا شلون دزيت هيج..أحسها حركه سخيفه..لا ليش سخيفه..مو كلت راح اتغير..😩اي بس مو هيج..ما ادري ليش عندي احساس بالسخافه..وهيه ما ردت اكيد شافت الموضوع سخيف خل ادزهلها تصبحين ع خير وانام احسلي بدال هالافكار السخيفه

****
سما كانت تريد تنام وسمعت صوت رساله وشافتها من جود.. ودمعت عيونها:ليش دزيت هالرساله حتى تزيد عذابي والله مناقصني ..بس ما اصدك جود يدز هيج معقوله تغير..اسفه بس انته حاولت تصير زين بالوقت الغلط وهسة فات الوكت.. ليش احس بتأنيب الضمير اني اكسر كلبه.. تكصين ع منو هوة ما يحبج حتى تكسرين كلبه فعادي يجوز يفرح انه يفتك منج..انزين ليش حاسه بخوف من باجر وشلون اوجهه

****

يوم جديد

نور كعدت وتوجهت للصاله وهي تتمغط ونعسانه

ولاكت حيدر طالع من المطبخ
حيدر:بسم الله الرحمن الرحيم.. عدلي شكلج قبل لا اطلعين من غرفتج ترى اكو ناس قلوبهم ضعيفه وما تتحمل خرعة..الناس اصبح بوجوه حلوه وانا اصبح بوجهج المخبوص

نور:وشبيه شكلي
حيدر:شوفي وجهج بالمراية جنج زومبي

نور:هاي لان امي خبصتني خبص وكعدتني من احله نومه..خرررب بعدني نعسانه

توجهت للصاله وذبت روحها ع القنفه

حيدر:هيووو كومي شنو ناويه تنامين هنا..طلعي بغرفتج اذا بيج نومه

نور:اهووو امي ما تخليني انام..تصدك وكفت فوك راسي وما خلتني الا لمن شافتني طلعت من الغرفه

حيدر:شعجب شتريد امي
نور:اخخخخ لو تدري..عدها جمعه وي صاحباتها ع غده ..وتريد تاخذني نروح السوك من صباحيه ربنه ونشتري هدوم ونروح الصالون حتى تعرضني كبال صاحباتها بلكي وحده تخطبني

حيدر:حلفي امي تفكر هيج
نور:شفت بله عليك..هاي انا الوحيده عدها وتريد تفتك مني شلون لو عدها درزن..جان يجوز فتحت محل بالسوك وتعرضنه بيه..اخخخ يالقهر

حيدر:انزين وين معزومه
نور:ما ادري اعتقد ام جابر عازمتها
حيدر:والنعم منهم والله..خوش نسب
نور:هيووو انته شو خطبتني اله من هسة..اكول ولي اطلع صوجي الي احجي وياك

حيدر:هههع مدام امي حطتهم براسها فارضي بالامر الواقع وماشالله عليهم ناس مشهورين

نور:اكول اطلع بره لا اجرك من كفشتك واطلعك
حيدر:لا انا بروح ارجع انام..مو مثل بعض الناس راح يطيح حظهم

نور:امداني ما اشكي الا لعدوي وللشمات
حيدر:تؤ تؤ تؤ انا عدو..يله مقبوله اختي وتمونين.. الله يسامحج

نور:مو وكت درامتك روح راسي مصدع

*****

سما نزلت وهي تفكر(تمنيت اكعد والكه كل هذا حلم.. الله ياخذك يا عزيز بسببك رجعت الكوابيس الي مره ثانيه..خايفه شلون راح اكول للكل..اول شي لازم اكعد وي جود واكله..لا اول شي لازم اكول لاحد متفهم حتى يوكف وياي..بس جود لازم يعرف مني علمود لا ينصدم.. خرررب ليش خايفه وكلبي يركع.. يجوز خايفه من الي راح يصيرلي لو اطلكت..لازم اصير قويه انا راح اسوي هالشي لمصلحه جود..لان لو ظل وياي راح يضرر.)

بدور حطت ايدها ع كتف سما:سما..شبيج صارلي ساعه احاجيج وانتي بالج مو يمي

سما:هااا جنت افكر
بدور:انتي بيج شي..انتي من امس مو ع بعضج..بيج شي فضفضي بلكي ترتاحين

سما:لا ما بيه شي.. بس جود تعتقدينه نايم هسة
بدور:لا ما اعتقد..اكيد كاعد..هسة لو راح للشركه لو جاي يتحضر يريد يروح الشركه

سما:اوكي شكرا(لازم اكلمه..قبل لا اسوي شي)

راحت اتصلت عليه ورد بعد دقايق

سما:هلو..اريد احجي وياك بموضوع
جود:بس هسة اروح الشركه عندي شغل ضروري
سما:بس الموضوع الي اريدك بيه اهم من الشغل

جود:احجي اسمعج
سما:ما ينفع بالتلفون ممكن اشوفك
جود:اوكي تعاي لمكتبي
سما:اوكي جايه

***

ام جود:بعدج ما بدلتي
نور:يووو يمه خل نتريك
ام جود:ما لازم تتريكين هنوب تطلعلج كرش..عاد انتي بسرعه تسمنين..ما صدكنه ع الله ضعفتي..هالايام يحبون الضعيفه
نور:يييماه
ام جود:وجعا امشي كبالي يله

نور:اووووف ..شنو هالحاله

***^

سما دكت باب المكتب ودخلت

سما:اسفه اني راح ااخرك بس لازم احاجيك
جود:لا عادي وانا هم ارد احاجيج.. بمناسبه بدايتنه الجديده انا باخذج مكان..حضري روحج.. ولا تسالين وين..راح اسويها مفاجاة

سما:اسفه بس ما اريد ابده من جديد
جود:ليش
سما:انا ما اريد انسه كلشي..انا ارد انهي كلشي
جود عقد جواجبه:شقصدج
سما:قصدي طلكني

جود ناضرها بصدمه
سما:(خرررب لا تباوع هيج..كلبي يعورني من اشوف نظرتك هاي)
جود:تشاقين انتي
سما:لا انا جاده طلكني
جود:امس كلشي مابيج شنو الي غيرج
سما:ماغيرني شي..انا من البدايه ما اريدك وجنت اريد اطلك

جود:لعد ليش طلعتي وياي..وخليتيني افكر بحياة جديده وياج..ليش زرعتي هالفكره وهسة تردين تشيلينها.

سما:هيج كلتها لمجرد التسليه
جود:😏تسليه(مسكها من ذراعها بقوه) انا صرت تسليه..هههع مو جود الي تتسله فيه مره..ما عاشت بعدهي التلعب عليه.. راح اخليج ادفعين الثمن..وطلاك ماكو😠

سما:انا اكرهك وعمري ما فكرت اعطيك فرصه ثانيه..شلون ترضى تاخذ وحده تلعب بمشاعرك وتكرهك..اصلا اذا ازوجتني حياتك راح اصير جحيم لان راح تنكلب مشاكل وبس

جود:ادري وما راح اطلك
وراد يطلع
سما(لازم اخليه يطلكني..لازم اخليه يكرهني اكثر):واذا دريت اني احب واحد غيرك..كرامتك راح تسمحلك تزوج وحده تحب غيرك

جود وكف وناظرها بصدمه:شنو
سما:الي سمعته..احب واحد ثاني فطلكني وخليني اروح بحال سبيلي

جود وكف بصدمه وبعد لحظات تحولت ملامحه للعصبيه: تحلمين ..والله لازوجج واخليج معلكه لا وياي ولا وياه .. راح اعلمج منو جود ..لعبتي ع الرجال الغلط..بعدج ما تعرفين جود😏...وحضري روحج بعد يومين زواجنه وبدون عرس ولا طكطكه..فحضري روحج

راد يطلع كضت جود من ذراعه

سما بخوف:لا ما يصير تزوجني..اترجاك اطلكني..انته مو فاهم شي.. والله راح تندم بعدين اذا ازوجتني.. هذا الشي لمصلحتك ومصلحتي

جود سحب ايده بقوه وطلع وهوة معصب

سما كعدت ع الكرسي وهي تبجي:انته كلشي مافاهم..بعنادك هذا راح تموت نفسك..يارب شسوي..ماكو غير حل واحد حتى لو ما احجي وياه بس لازم اكسر ع خشمي بصله واحاجيه..لان محد يوكف ويه البنت الا ابوها..لازم اكلم ابوي لازم..عالاقل محاوله وبلكي تنجح

*****

جود:يبه ممكن احجي وياك ع انفراد
الجده ام علي:خير يمه بيك شي..جنك معصب..ليكون صاير شي

جود:لا ماكو شي بس اريد الحجي بموضوع مهم
الجد:امشي للمكتب

*****

سما راحت لابوها

سما:ممكن احجي وياك شوي
ابو احمدبفرحه لان حجت وياه:اكيد بنتي..تفضلي

سما:انا اتخذت قرار واريدك توكف وياي..ولوو مره وحده سوي دور الاب الصالح وادعمني بالي راح اسويه

ابو احمد:انتي بنتي واكيد راح اوكف وياج بدون ما تكولين
سما:خوش لعد راح توكف وياي بطلاكي
ابو احمد وكف من كرسيه بتفاجأ:طلااااك..ليش..شسوالج جود حتى تردين تطلكين منه

سما:ما سوالي شي..بس ما اريده هيه مو كوه

ابو احمد:هيج منا والدرب
سما:اي ما حبيته
ابو احمد:بس وين تلكين مثل جود اخلاق وشخصيه..
قاطعته سما:اعرف اعرف هالكليشه ..كالوها قبلك وادري هوة اخلاق وحلو وشخصيه وذكي والى اخره..بس ما يناسبني

ابو احمد:بس
سما:لا بس ولا شي ..انا قررت وما راح اتراجع
ابو احمد:لازم احاجي ابوي واشوف شيكول

سما:بس لازم توكف وياي مو يغير رايك ابوك
ابو احمد:يصير خير

وراح لابوه ولكه جود وياه

ابو احمد:يبه ممكن احجي وياك
الجد:اذا بخصوص سما فدريت من جود
ابو احمد:وهسة شراح اسوي راح اطلكها
جود:ما راح اطلكها..وتوني جاي احجي وي الحجي وجاي اكوله اريد العرس بعد يومين

ابو احمد:بس هيه ما تريدك..شصار بينكم..سويتلها شي
جود:استغفر الله حتى انت..مو كافي الحجي سال هالسوال..والله ما سويت شي..هيه من كيفها كعدت الصبح تريد تطلك
ابو احمد:بس مايصير تجبرها ع الزواج
جود:هيه مرتي ع سنه الله ورسوله..وما اريد اطلكها ..واريدكم توكفون وياي

الجد:ما راح تطلك ما ادري شنو الي غير رايها ..بس الزواج راح يصير بعد يومين واذا ما رضت بالطيب فراح يكون بالغصب

ابو احمد:بس يبه ما يصير نغصبها هاي حياتها وهيه حره
الجد:نسيت وصيه امها..اخر مره شفناها بيها وهيه تكول زوجوهم بسرعه..هاي وصيتها ولازم تتحقق

ابو احمد نزل راسه وماكدر يسوي شي:سوي الي تردونه..بس انا ما راضي ع هالشي
وتركهم وطلع

جود:شكرا يبه..اهم شي انك وكفت وياي..وعمي انشالله اقنعه

الجد:خلي عمك عليه..وانت حظر للزواج..بس خل يكون بين الاهل بس
جود:هذا الي جنت ارد اكوله لك..انا هم جنت اريده بيناتنه..وجناحنه بالطابق الثاني بعده ما خلص فراح نكعد بفندق جم يوم

الجد:لا ..انا قررت انك تطلع من البيت وحظرتلك بيتك..بيت امك القديم..وما حاجه تسوي الجناح لانك ما راح تكعد بيه

جود:ليش ما ارد اطلع..وبيت امي ما اكعد بيه
الجد:مرتك ما راح تبطل مشاكل وي ام احمد.
جود:خلها عليه انا اتصرف..انته ما تثق بيه
الجد فكر دقيقه:اوكي راح اخليك تظل بس علما يخلص جناحك ظل ببيت امك احسن من الفنادق

جود:ما اريد اظل بيه..اذكر ذكرياتي السيئه العشتها بيه
الجد ابو علي:انا كلت كلمتي راح اظل فيه وانا حظرته حتى تكعد هناك
جود:بس يبه
ابو علي:لا بس ولا شي انا كلت كلمه وما ارد بيها
جود:اوكي مثل ماتريد

*****

بدور: وين طالعه من الصبح
نور:مو مهم هسة وين طالعه..المهم ابوي الحجي وعمي وجود بينهم شي.. واحد طاب وواحد طالع اكيد صاير شي..راقبيلي الاوضاع علما ارجع لان راح اطلع وي امي

بدور:😒ما احب سوالف التصنت مثلج
نور:اوووف منج صايرتلي البنت المثاليه.. يا اختي طلعي خبالج شويه ..ليش تضمينه ووتصنعين الهدوء
بدور:يا اختي انا هيج ما بيه خبال..شنو ترديني اتخبل مثلج بالكوه..روحي الله يخليج خل اشوف مسلسلي احسن

ام جود:نور يله تاخرنه
نور:انشالله يمه جاااايه..اجسسيلي مو تنسين..ارد اعرف شيصير من وراي
بدور:اششش خليني مندمنجه بالمسلسل..
نور:😒كطيعه ماكو امل منج..خل اروح وافكر شلون افلت من العزيمه المشئومه احسن

*****

جود راح لسيارته

جود:حرك للشط
مصطفى:بس استاذ والشركه
جود بعصبيه:مو شغلك كتلك روح للشط تروح وانته ساكت ولا تناقش
مصطفى:انشالله استاذ

*****
سما شافت ابوها جاي وراحتله ركض
سما:هااا شصار..قنعت جدي
ابو احمد:مع الاسف لا..واصلا لكيت عنده جود وقنعه ان زواجكم بعد يومين
سما:بس انته ع اساس ابوي وكلمتك هيه التمشي..مو صح

ابو احمد:اسف ما اكدر اعارض ابوي..بعدين جود شبيه حتى تردين تطلكين منه انطيني سبب مقنع

سما بغيض:انته ما عندك شخصيه كلشي يكوله ابوك تسويه..كلك ازوج ع امي وتزوجت واحتقرت امي هم علموده
ابو احمد:هذا اسمه احترام لان ابوي ومن حقوقه عليه اسمع كلامه..وترى لا تنسين وصيه امج زواجج من جود فليش تردين تكسرين برغبه امج

سما:انته مو فاهم شي وما راح تفهم
وتركته وطلعت وراحت لغرفتها وكعدت ع السرير بعصبيه

سما:الغبي ..انا احاول انقذ حياته وهوة يريد يموت..تريد تزوجني..خوش ازوجني وموت وانا شعلي..لا اسم الله عليه شجاي اكول..بس عمه بعينه احاول انقذ حياته وهوة سواني كاني عدوته..لو يدري بالحقيقه جان باس ايدي الغبي.. يارب شسوي ماكو ولا فكره براسي

******

سلطان:شسوي هنا وتارك الشغل..بابا انته صاير كتير كتير مهمل في الشغول

جود:شجابك هنا..وشدراك اصلا اني هنا
سلطان:شفتك تاخرت فاتصلت بمصطفى وكالي عن حالتك العصبيه..كولي شصاير

جود تنهد:احححح شكولك بس
سلطان:اوووف مبين وره هالتنهيده سالفه جبيره ..كولي شصاير

جود وهو صافن بالماي:

‎اشگد #چـبـيـره
‎من #يـحـب انسان واحد..
‎بس حبيبه اختار #غـيـره
‎اشگد #چـبـيـره
‎من تحس كلشي بحياتك صار #ضـدك
‎حتى #گـلـبـك ... عافك لخاطر ظفيره
‎اشگد #چـبـيـره
‎من تحاول تطوي #صـفـحـه
‎وتكتشف هي #الاخـيـره......

سلطان:اوووف شعر بعد..لا حالتك شكلها صعبه

جود:اكول روح وراك شغل
سلطان:ما اروح رجلي ع رجلك..كولي شصاير
جود سكت
سلطان:شنو راح اطكلي صفنات..يله كول

جود:تريد تطلك..تكول تحب واحد ثاني
سلطان:منو
جود:خطيبتي بعد يا هيه

سلطان:ارد اعرف انته شسوي للبنات حتى يطفشون منك
جود:😒هم انته عدالك انا السبب..بس اصدك هالمره يجوز انا السبب لان انطيتها وجه..بس ما اطلع جود اذا ما ربيتها

سلطان: يا اخي اسلوبك وي البنات زفت فضنيت بك السوء .. المهم هسه يعني ما راح اطلكها
جود:طبعا لا
سلطان:انزين ليش ما اطلكها الي ما تريدك لا تريدها
جود:ما اكدر
سلطان:ليش ما تكدر
جود:لان لاني وعدت امها اي وعدت امها

سلطان:اي بس هسة اختلف الوضع وهيه ما تريدك..فاكيد امها لو عايشه جان عذرتك..يا اخي طلكها وافتك

جود:لا مستحيل
سلطان:اي فهمني ليش
جود:لاني
سلطان:لانك تحبها..ترى مو عيب اليحب فليش تخفي حبك

جود:😒وشنو الي خلاك تفكر بهالنظريه
سلطان:مبين..لان انته مو اول مره تخطب..وريهام يوم طلبت الطلاك..طلكتها عادي وسافرت ..ما تمسكت فيها مثل سما ..ليش يعني

جود:لان سما غير وريهام غير
سلطان:شلون غير
جود:شنو هوة تحقيق
سلطان:اوكي راح اسد الموضوع.. ادري بيك ما راح تعترف حتى لو تحبها
جود:اكول انته ما عندك غيري تزعجه
سلطان:لا والله ما عندي احد فاضيلك وكاعدلك كعده.. صدك جود ارد اسالك سوال

جود:كول
سلطان:انته تامن بالحب من اول نظره
جود تذكر اول يوم شاف فيه سما من دخلت غرفه الاستقبال الي يم غرفته وكان بينهم باب شفاف وشافها يوم فتحت شعرها وتناثر لاخر ظهرها

جود:لو سائلني هالشي قبل جم شهر جان كتلك لا ما اؤمن بهيج تفاهات

سلطان:وهسة تؤمن
جود:انته ليش تسال هالسؤال

سلطان:لان صاحبك طاح حظه من اول نظره..او بالاحرى من اول عركه

جود:ايباااه ومنو تعيسه الحظ
سلطان:المصيبه ما اعرف منو هيه..اصلا كله منك تعاركت وياها..لو ما انته جان تعرفت عليها مثل الاوادم وسحرتها بكلامي الجميل

جود:الله وكلامك المعفن..بس شلون بسببي
سلطان:كله من تلفونك الخبصتني بيه جانت تريده وتعاركنه عليه..خفت انطيها النقال وتشحتني من الوظيفه خو انته اعرفك ادور الزله حتى تجحتني ظاله بكلبك لان حجي ابو علي وظفني بدون رضاك وانت من يومها تحوس تريد تطردني

جود: طبعا اجحتك اذا ما جنت مفيد..اذا مجرد شغله بسيطه ما كدرت عليها فشلون راح اامن على شغلي عندك.. لو عليه ما وظفتك لان صديقي واعرفك انطيك السوالف والشقه اما بالشغل خرطي لو ما ضابك واهددك بالطرد ولا جان ما اشتغلت عدل..يبه شغل هذا شغل لا يعرف صديق ولا غيره

سلطان:مع الاسف عليك الشغل اهم من صديقك
جود:اكيد
سلطان:😒وهسة طارت البنت بسببك وبسبب مبايلك يالبزنس مان ،ارتحت!
جود:اوف كورس
سلطان:😒تدري كل يوم عن يوم جاي احقد عليك اكثر
جود:احقد بقت عليك

******

نور وامها بالعزيمه

ام جابر:ماشالله بنتج حلوه ومؤدبه وهاديه..صدك شلون دراستج يا حلوه
نور:الحمدلله زينه هسة معطلين حاليا ومرتاحين(تعاي لبيتنه وشوفي الهداوه ع اصولها)

ام جابر:اي افتكيتوا منها..بقالج جم سنه وتخلصين
نور:بعد سنه بس
ام جابر:الله يتمملج ع خير
نور:مشكوره
ام جود:عاد ماشالله ع نور دراستها ولا تاثر ع حياتها وشغلها بالبيت..ماشالله عليها نادره وتحب النظافه..وتكوم تنظف من الصبح قبل لا حتى احد يطلب منها

نور:(😳متى..امي جاي تحجي عليه لو وحده ثانيه.. خرررب اول مره اعرف نفسي..نفسي الي اعرفها جانت بالدفرات تكوم تنظف)

ام جابر:ماشالله عليها الله يحفظها..عاد بنات هالايام يموتون من شغل البيت ليكول راح ياكلهم

ام جود:لا بنتي الله يرضى عليها بكلشي نادره
نور(😒يمه بعد كوليلها تعاي خطبيها لولدج)

اتصل جود ع نور

نور:هلا بالغالي
جود:هلا بيج..اريدج هسة ترحين وي سما وتشترون كلشي تحتاجه وتشترين بدله العرس لان بعد يومين زواجنه
نور صرخت:شنوووو
ام جود ضربت نور ع خفيف وحاجتها بصوت ناصي:فضحتينه الله يفضحج ..هستوني جاي اكول هاديه وعاقله تكومين تصيحين

نور بنفس الصوت الناصي: يمه انا لو انتي الي فضحتينه شنو هالمواصفات الجذبيه الي كلتيها لام جابر..ما ناقص الا تكليلها تعاي خطيبيها
ام جود:اششش انتي شعرفج بهالسوالف..بس صبريلي بعدين احاسبج بالبيت

نور:اي نتحاسب ليش لا..يااا نسيت اخوي ع التلفون

نور:سوري امي لهتني
جود:😒توج اذكرتيني..المهم مثل ما كتلج روحي لسما واشتري البدله..وترى الحفله بس للاهل
نور:بس لحظه ليش هالاستعجال شصاير

جود:روحي وبعدين افهمج
نور: اوكي(سدت التلفون وراحت لامها)يمه انا لازم اروح اخوي جود دك عليه ويريدني بشغله
ام جود:شنو هالشغله
نور:يمه خلاص بعدين اكولج..مع السلامه خاله ام جابر ومشكوره ع الغده..عاشت ايدج ع هالطبخ (فديت اخوي فكني من هالعزيمه)
ام جابر:بعد وكت يا بنتي ما شربتي الجاي
نور:لا خاله مشكوره ما قصرتي..يمه ترحين وياي
ام جود:لا راح ابقه شوي يم ام جابر بعدني ما شبعت منها ..انتي روحي وي السايق

نور:اوكي
وطلعت

*****

الحارس:فكني ..انا الكم الا اكول لابوك ع السويته واكله التقيت وي سما
عزيز:هههههع كوله حتى يطير ركبتك
الحارس بشك:هااا ليش انته الي سويت كل هالشي فليش يطير ركبتي انا

عزيز:لان ابوي اذا احد فشل عنده بمهمه ما يخليه عايش..لان اليفشل عنده معناتها مامنه فايده..والي ما منه فايده ما يخليه يعيش..لان ما يحب يخلي عليه شهود

الحارس:😰انزين شسوي..انا وراي جهال اربيهم..ما ارد اموت
عزيز:الطريقه الوحيده انك تسد حلكك وما تكول لابوي الي صار
الحارس:اوكي اوكي ما راح احجي بس فكني خل اروح

*****

نور:انته وين جنت..صارلي ساعه انتظرك
محمد:رحت اتغده بس ماكو مطعم قريب فلذلك اتاخرت
نور:يله المهم وصلني للبيت بسرعه

محمد:اوكي بس وامج
نور:بعدين تجي
محمد:ممكن اسالج شي
نور:شنو
محمد:انا ما اذكرج باحد
نور:والله انك فاضي كاعد اكولك مستعجله امشي افتح السياره بس
دك تلفونها وردت
نور:هلا بدور
محمد:(😏جنت متامل تعرفك..انته منو حتى تعرفك..صح جنت صديقها بس راح اضل ابن حارس..يعني انته منو حتى تذكرك..صدك اني غبي واملت نفسي انها لهسه تذكرني .. وحتى لو اذكرتك يجوز كمجرد صديق مو مثل ما تفكر)

نور:سكتي امي ظلت تمدح بيه كبال ام جابر وحطت بيه صفات اول مره اعرفها وشكد طيرت فياله ..كله علمود تخطبني للمسعد جابر..امي واعرفها تريد تزوجني وتفتك مني..بس كاعده ع كلبها كعده وزواج مراح ازوج

بدور:ازوجي شتنتظرين..انتي مو صغيره بعدلج سنه وتتخرجين وتنحبسين بالبيت.. يا اختي تزوجي
نور:ما اريد..المهم سدي فد دقيقه واوصل البيت(سدت التلفون وناضرت بالمرايه وشافت محمد يباوعلها) ع شنو تباوع

محمد:لا ولاشي
نور:المهم انته شسمك
محمد:محمد(حتى اسمك نسته مع اني قبل يومين كايلها اسمي)

نور:عاشت الاسامي..محمد ممكن تشتريلي ماي لان نشف ريجي وانا احجي
محمد:الله يساعدج..مسويه مجهود جبار
نور:انته شبيك تحجي من وره خشمك
محمد:ولا شي يتهيالج(اخخخ قاهرتني..انا من يوم ما سافرت وي ابوي وانا ما ناسيها وهيه ولا حتى فكرت بيه)
نور:عبالي بعد