رواية لأجل من احببت سأكون قوية الفصل الثامن عشر 18 - بقلم امل

#اليحبج
مايتركج؛
حتى لو بسوالفج
مرمرتي #كلبه

*****❤️❤️❤️❤️❤️*****

نزل محمد يشتري ماي وظلت نور تلعب بالنقال

وبسرعه اجت سياره سريعه كانه بسباق ع هالسرعه ولان سيارة نور بدايه لوفه منتبه ورادت تدعم بسيارتها بس لاف بسرعه باخر لحظه بس دحجت دحجه خفيفه

نور: ااااه يمه شهالخبل..جنت راح اموت(نزلت من السياره بسرعه من شافت السياره الي بغت تصدمها وقفت)

نور:هيووو انته يالخبل ما تشوف..يمه  راح نص عمري من وره هالخرعة

نزل من السياره ولد حلو ولابس بدله رسميه ومرجع شعره ليوره ولابس نظارات يعني بالمختصر المفيد شكله يوحي انه جنتل مان

****:لااا شوف شصار بسيارتي ..لا والحظ جانت احله وحده عندي

نور:هيووو انته كنت راح تموتني وانته كل الي هامك سيارتك العاويه
****:اسمي موسى مو هيووو اوكي.
نور: خل ينفعك اسمك..والله الا ارفع عليك قضيه واخليك تدفع تعويض عن الاضرار..شنو ما تشوف سياره واكفه وين عيونك
موسى:شكثر تكلف تصليح السياره انا ادفعه وما حاجه كل هالتهديدات..انتي ليش مكبره الموضوع
نور:لا والله كل ألي يهمك الماده..انزين والاضرار النفسيه الي سببتها الي...يمه ليهسه كلبي يركع
موسى:يجوز من الحب كلبج يركع 😉

نور:هاا شتقصد
موسى:اقصد يجوز انك وقعتي في حبي يا فتاة
نور: ويع مو لايگ عليك الفصحه مو كافي انك احول ومتهور هنوب مغرور..بعد ماكو مواصفات سيئه طلعها
موسى:ليش تردين تخطبيني حتى أطلعها الج
نور:وقح اصبر بس خل يجي محمد الا أخليه يسحلك من كفشتك للشرطه

موسى:حديثج حلو بس مع الأسف ما عندي وقت حتى اكمل وياج لان وراي اجتماع..(قدملها بطاقته وفيها رقمه) هاج هاي واكلمج بعدين
نور:هيوو انته شنو شايفني بنت طايحه حظ وأخذ ارقام..صدك انك ما تستحي وملطلط
موسى:والله انج عجيبة مو انتي كلتي تردين تعويض يعني شلون انطيج تعويض غير تأخذين رقمي ونتفق ع التعويض

نور استحت لان صدك هيه طلبت:اي بس مو تنطينياه انطيه للسايق
محمد انتبه للهوسة وشاف الناس ملتمه وخاف ع نور وراح ركض وشافها تتعارك وي ولد

محمد:خير شصاير
موسى:اخيراً اجه رجال اتفاهم وياه..النسوان يطلعون شيب بالراس
نور:لا والله فوك شينه كوات عينه..انته بدال لا تعتذر اطول لسانك
موسى:ماكو شي يستاهل الاعتذار
نور:محمد اتصل ع الشرطه هذا مو مال تفاهم
محمد(ما عجبه ان نور تتجادل وي ولد فحاجها بنبره شوي عصبيه):نووور صعدي بالسياره انا أتفاهم وياه
نور:ما اصعد..الا لمن....

محمد قاطعها بعصبيه:كتلللج صعدي بالسياره
نور انصدمت من طريقه كلامه وياها وزادت عصبيتها:انته منو حتى تكلمني هيج ..هيوووو انته لا تنسه نفسك اوكي..انته حيله سواق وراح اظل طول عمرك سواق وتاخذ اوامرك من عدنه..وظيفتك بس توصلنه للمكان الي نريده وبس فاااهم مو مسموحلك تناقش اي شي

محمد انصدم وحس كان واحد منطيه كف(معقول هاي نور التحجي هيج..لا هاي مو نور العرفتها بالطفوله)

محمد:فهمي هالشي علمودج يعني حلوه جاي تتعاركين وي ولد والنَّاس ملتمه عليج..شنو ما عندج رجال..طبي للسياره وانا اتفاهم وياه

نور:شوف اعرف مقامك احسلك..انته مو اخوي ولا احد تعودلي حتى تحاسبني اوكي..لذلك سوي شغلك روح اكعد بالسياره ولا تنطي أوامر اوكي

موسى:أسف ع قطع حواركم الجميل بس انا مستعجل فلذلك يا اخ السواق هاك اخذ بطاقتي واتصل عليه علمود الإصلاحات وانا جاهز
محمد خذه البطاقه:اوكي شكرا

مشى موسى ومحمد باوع لنور بنص عين وكل واحد يباوع بحقد للثاني
محمد:ممكن اصعدين هسة
نور صعدت السياره بدون نقاش

محمد شخط وطلع
نور:وجع سوق ع كيف
محمد:اكول سكتي عني احسلج ترى واصله عندي للستار
نور:ع نفسك..وبعدين انته ما سمعت الكلته مساع لازم تسوق مثل ما نريد لان هاي وضيفتك..احنه ع شنو ندفعلك فلوس
محمد:اوكي بعد ما احاجيج ولا تحاجيني بس اوصلج ع المكان الي تردينه ارتحتي
نور:لا ما ارتحت شنو انا اركوز حتى ما تحاجيني..احجي بس لا تنطي أوامر اوكي

محمد باوعلها بعصبيه من المرايه وشخط بالسياره وزاد السرعه
نور خافت من نظرته وسكتت(يمه نظرته تخوف شكله عصب..خل اسكت لا ينتقم مني ويدعمنه بشبه..بس معقوله عَصّب هسه انا شكلت.)

*****

ابو عزيز:هااا بشر
علاوي:صار مثل ما خططتله..وبديت انطيه جرعات خفيفه من المخدرات وي العصير ولهسه ما انتبه
ابو عزيز:وشصار ع ذاك الموضوع
علاوي:صار مثل ما تريد..انطيته جرعه وومرينه يم وحده خبله وسوه مثل ما نريد بدون ما يفكر..بعد جم يوم ويصير مثل المحبس بيدنه
ابو عزيز:برافووو ..يوم عن يوم جاي تكبر بعيني
علاوي:شكرا استاذ
ابو عزيز:اذا طلعت راح تلاكي الحارس وراح ينطيك المقسوم
علاوي بفرحه:شكرا..وانشالله ما أخيب ضنك بيه
ابو عزيز:وشصار ع اخت احمد..شصار من تطورات
علاوي:قصدك حنان.. خليتها تثق بيه وتموت بيه
ابو عزيز:لازم تستعجل ما عدنه الوقت كله ننتظرك..لان راح يجي الدور ع نور 😏

علاوي:انشالله استاذ

*****

نور طبت ع غرفه سما ولا احم ولا دستور

نور:كلللللوش وي فديت العروسه..يالخاينه بعد يومين عرسكم وما تكلولي..يعني لو ما اخوي داك عليه وكايلي ساعديها بالتسوگ للعرس ولا جان ما دريت..طبعا اتصلت ع جوجو وانا بالطريق وناويتلج ع كتله
سما ناظرتلها ببرود :خاب ما تولين من يمي
نور:شبيج ..لازم تكونين متحمسه او خايفه او اي شي..شنو سبب هالبرود
سما:😏ماكالج اخوج العزيز بعد اني طلبت الطلاك علمود هيج عجل بالعرس وما اهتم لرايي
نور:شنو طلاك..تتشاقين مو..انزين شصار فهميني
سما:لاتبدين انتي الثانيه..مابيه حيل احجي..تركيني بحالي وطلعي
نور:بس والمسواك..شكول لاخوي

سما :طلعي وتركيني بحالي ماريد اروح مكان

طلعت نور وهيه لازالت بحاله صدمه واتصلت باخوها وبس فتح التلفون تنهدت بيه
نور:انته ليش ما كلتلي إنّو سما طلبت الطلاك..وليش استعجلت بالزواج..وشنو السبب..شصار حتى اختلفتوا ..فهمني
جود:خلصتي
نور:اي
جود:يله روحي وي سما وأشتري التحتاجه ماكو وقت للعرس فلا تتاخرين
نور:المصيبه هيه ما راضيه تروح وياي.

جود مسح ع جبينه بتفكير:آخذي اي وحده من البنات وشتري الي تحتاجه وبدله العرس خليها عليه.
نور:اوكي..بس ما كتلي شصار بينكم.
جود:مو فاضيلج عندي شغل..باي (وسد الخط)
نور:ليششش محد راضي يكولي شي😤

******

سما نزلت للمطبخ من الضوجه حتى تاكل وسمعت صوت حنان جاي تخابر

علاوي:ارد اشوفج مشتاقلج
حنان:ما اكدر والله
علاوي:اي بينت الحقيقه..انتي ما تحبيني لذلك ما تردين تشوفيني
حنان:ليش تكول هيج..اذا ما احبك فليش احاجيك
علاوي:لعد ليش ما تردين تشوفيني..صارلي يومين ألح عليج وقلبج ما رق الي
حنان:لأَنِّي اخاف احد يشوفني..افهمني عفيه
علاوي:لا انتي ما تثقين بيه ..لو تثقين جان طلعتي وياي بدون خوف..بس مدام ماكو ثقه فماكو حب.. فمبين ما تحبيني..
حنان:لا ليش تفهمني غلط انا...

علاوي قاطعها:لا كلشي انتهه..وبعد لا تحاجيني ولا احاجيج(وسد النقال
حنان:لا علاوي اسمعني..خرررب سده..شسوي هسة

التفتت تريد ترجع لدارها ولكت سما تباوعلها بعصبيه
سما:منو هذا الجاي تحجين وياه
حنان فزت:بِسْم الله منين طلعتي وبعدين انتي شعليج..لا تدخلين بشي ما يعنيج
سما:شنو ما يعنيني..ترى انتي محسوبه عليه اخت فلذلك دوري اني اضبج اذا امج ما تعرف اضبج
حنان مشت تريد تطلع:والله انا ما اعتبرج اختي فياريت تسوين نفسي ولا تعيشين دور الأخت الجبيره اوكي

سما مسكتها من أيدها ولفتها لجهتها:شوفي تبطلين تحجين وي هذا الصايع..لا والله اكول للكل..ترى مبين جاي يلعب عليج.. اليحب يجي يدك الباب مو يطلب تطلعين وياه..اليوم طلب طلعه عاديه باجر الله يستر وين يطلب يشوفج
حنان دفعت سما:كتلج لا تدخلين بيه..هاي حياتي وانا حره..فاهمه

سما:لا ما فاهمه..وراح تشوفين شسوي لو دريت تحاجينه
حنان طلعت لغرفتها بعصبيه

سما:(شنو هالعائله الصايعه الي الله ذبني بيها..واحد لاعب ع البنات لعب وهاي ملعوب عليها..بس لازم ما اخليها ع راحتها..مستحيل اخليها اضيع..صدك انها غبيه..اكو واحد يصدك بولد)

صعدت لغرفتها ولكت جميلة كاعده بغرفتها

سما:هاي شوكت اجيتي
جميلة:اجيت قبل شوي وجنت عند نور وكلتلي ع كلشي..وشوفي ما اطلع الا لمن تكليلي كل الاسباب
سما:جميلة الله يخليج مابيه حيل احجي..عادي انتوا كلكم تدرون ازوجته علمود امي..هسة ما ابيه
جميلة:شوفي هاي السوالف مشيها ع نور او بدور بس مو عليه..لو تردين تطلكين جان طلبتي الطلاك من يوم توفت امج مو هسه بشكل مفاجئ

سما كعدت ع السرير وناظرت الارض
جميلة:سما حبيبتي معقوله تضمين عني شي..مو ع اساس انا صديقه طفولتج وما تضمين عليه شي
سما:جوجو انا خايفه
جميلة:من شنو
سما:عزيز رجع وخايفه الماضي يرجع ينعاد
جوجو شهقت وحطت أيدها ع حلكها بصدمه:مستحيل شرجعه..لازم تكولين للكل وخصوصا جود
سما:ما اكدر اخاف..اخاف يصير مثل ما صار لمحمود..من دره ان عزيز يضايكني وراح حتى يوكفه عند حده ..شصار بالنهايه..محمود مات وانا لهسة احس بالذنب لأَنِّي السبب بكل الي صارله..لو ساكته وما كايلتله احسن..اخاف اكول لجود ويصيرله مثل ما صار لمحمود

جوجو:حبيبتي محمود هذا يومه وانتي مالج ذنب
سما طاحت دمعتها:لا الي ذنب انا السبب وما راح أسامح روحي
جوجو:بس لازم تكولين لجود حتى يعرف شراح يواجه
سما:لا ما راح اكوله وراح اطلك وانتي لا تكوليلن لاحد وعديني
جوجو:بس
سما:لا بس ولا شي..انا وثقت بيج وكتلج فلا تخليني اتندم
جوجو:اوكي..بس شلون راح تطلكين وزواجج ما بقه شي عليه.
سما:زواجنه بس للاهل يعني الخبر ما راح ينتشر بسرعه..لذلك قبل لا ينتشر راح أخليه يطلكني
جميله:ما ادري اذا جاي السوينه صح لو غلط

سما:انشالله صح
جوجو:انزين ليش ما قبلتي ترحين للسوك..هسة انا تورطت بجهازج لان نور تريدني اروح وياها اشتريهم
سما:ما ادري بس احس بالخوف..تصدكين جاي اتخيل عزيز واكفلي بالباب..اخاف اطلع ولاكي بالسوك
جميلة:اوكي ارتاحي انتي وانا راح اتكفل بكلشي

سما:صدك شخبار طلال صار هواي ما سامعه اخباره..شوكت يرجع
جوجو:مابيه شي ويجي بس يمتحن دور ثاني
سما:صاير كسلان هالايام
جوجو:الله يساعده حقه يطيح دور ثاني اذا هوة المسكين يدرس ويشتغل

سما:محد كله يشتغل امج كلتله هيه ادزله فلوس بس هوة عنيد
جوجو:لانه ما يريد امي تنقص على روحها علموده..وتردين الصدك الفلوس الي تجي من الايجار ياله تكفي مصروف البيت وجامعتي..ولو راضي انه يأخذ فلوس من امي جان ظلينه ناكل خبز يابس
سما:ههههههه شالقضيه..الفلوس تكفي بس انتي تردين الفلوس كلها الج لانج ما تشبعين من الهدوم
جوجو:شسوي اذا الله خالقني بنت ..وطبيعه البنات تحب الهدوم فهالشي مو بيدي 🤗

سما:هم حاسبه روحج ع البنات
جوجو:😒شنو كلتي
سما:لا ولاشي..اكلج انطيني رقم طلال خل احاجيه
جوجو:واوووووو نقال اخر موديل..متى اشترتيه
سما:جود اشترالياه من رحنه للمطعم
جوجو: فديته..اكلج ماكو نسخه مثله..يا اخي رجلج سو كيوت.. اكلج يصير اخمطه من تطلكين منه

سما:😒اكول روحي ولي احسلج لا اطكج رفسه اطيرج منا..روحي نور تنتظرج
جوجو:يووو نسيتها..هسه تذبحني

******

حنان بغرفه بدور

حنان:هااااي سما مدخله خشمها بكلشي ..لا اسوين هيج وسوي هيج..مصدكه روحها انها اختنه الجبيره
بدور جاي تاكل تفاح وعينها بالروايه:اي وهذا الصدك هيه اختنه الجبيره
حنان:لا عيوني مو اختنه..ما صارلنه حتى سنه من تعرفنه عليها حتى اصير اختنه
بدور:امممم
حنان:ممكن تهدين هالكتاب وتحاجيني
بدور:يعني شترديني اسوي
حنان:اوووف ماكو فايده منج..ما اصدك انتي اختي ماكو شبه لو ذره
بدور:من حسن حظي ما نتشابه
حنان:انا شجابني هنا..ما اصدك اجيت اشكيلج..وين جان عقلي

*******

سما بدلع ورقه:الووووو
طلال:هلا..منو وياي
سما برقه:معجبه
طلال:نعم؟؟ منو حضرتج
سمابنفس الدلع:تؤ تؤ معقوله ما عرفتني
طلال عرفها:هلا بهالصوت..يا بعد طوايفي انتي..اذا ما اعرفج اتعرف عليج ولا يهمج

سما رجعت لطبيعتها وبعصبيه مصطنعه: ايا ابو سوالف مكسره..وانا اكول خطيه اخوي اكيد متاخر بالرجعه علمود الدراسه تاعبته..اثاريك تركض وره البنات..من كثر البنات حتى نسيت صوتي

طلال:ههههههع والله انا شكيت كلت الصوت صوت سما..بس الرقه والدلع منين اجو..انتي الدلع يشرد منج

سما:امداك عود هاي انته اخوي وهيج تحش بيه شخليت للغريب..زعلت ما احاجيك

طلال:لا كلشي ولا ازعلج..بس اجي اجيبلج هديه اراضيج بيها
سما بحزن:انته بس تعال وما اريد هديه..انته احلى هديه..محتاجتك هنا 😓

طلال بقلق:ليش صاير شي وياج..احد ضايكج
سما:(ما لازم اكوله واخليه يقلق عليه..هوة بغربه وما حاجه اضوجه بمشاكلي)
سما:هااا لا ولا شي..بس ..بس
طلال:بس شنو
سما:لا ماكو شي بس عرسي بعد يومين وتمنيتك وياي
طلال:شنو راح تعرسين؟؟ وليش محد كالي

سما:اي صارت بسرعه
طلال:اسف والله ما جنت ادري وانا هم جنت اتمنه ازفج بيدي لرجلج .. شكلي راح اترك الامتحانات واجيج
سما:لا يا اثول تترك دراستك علمود عرس يطول ساعات..علمود اذبحك.. تدري شكثر احنه ننتظر تخرجك وانته حضره جنابك تريد تخرب كلشي وتجي.

طلال:شسوي صارلي شكد انتظر عرسج..حرامات افوته..وتردين الصدك ارد اشوف المسكين الي راح ياخذج..هوة لو امه داعيه عليه لو هسه يطلع سمين وما منه فايده وكاعد ع كلب امه فمالكوا غيرج ياخذه

سما:الا من حسن حظه😎..واصلا جود طول بعرض وجمال وكل بنت تتمناه..وطبعا زاد حظه يوم راح ازوجه

*****

صعدوا جميلة ونور للسياره
محمد:شلونج انسه جميلة
جميلة:الحمدلله..الا اكول محمد انته شنو مخلص
نور:شهالسؤال الغبي اكيد ما مخلص وتارك ولا جان ما اشتغل سواق

محمد:انا مخلص اداره اعمال
نور تفاجات وسكتت(معقوله ممبين عليه..وشفيه عافس وجهه عليه من اول ما صعدنه السياره..حتى ما باوعلي من المرايه مثل كل مره.. معقول معصب من مساع..احسن خل يتادب لا يباوع..بس انا ما احب ازعل احد مني..وشكله زعلان من صدك مو شقه)

جميلة:لعد شعجب ما توضفت واشتغلت سايق

وكعدت جميلة ادردش وي محمد ونور اذا حجت منطنشها وهذا زاد قهرها

****^

حنان تكلم صديقتها سوسو
حنان:شسوي هسة زعل وانا ما اكدر اطلع
سوسو:انتي ليش مكبره الموضوع ..ترى عادي واذا طلعتي وياه..هوة حبيبج ولازم تثقين بيه..شوفيني انا طلعت وي حبيبي وما صار شي.. ولا من شاف ولا من دره

حنان:صدك تحجين!اطلعين وياه..والله انتي جريئه..ما خفتي واحد من اهلج يشوفج

سوسو:الحب يرادله جرئه..اذا انتي مو كده فليش حبيتي..اصلا اليحب يصير مجنون وما يفكر بشي غير يسعد اليحبه..فسمعي مني وطلعي وياه ولا ازعلينه

حنان:ما ادري خايفه خليني افكر..هنوب هاي اختي الحشريه شكت بيه فلازم ما احسسها بشي هالايام وما اتكلم الا بداري..لازم اخذ احتياطاتي
سوسو:خل تولي ماعليج منها..الحين لازم اروح..اتصل عليج بعدين

*****

جود اجه لغرفت سما
سما من وره خشمها:نعم رايد شي..ليش جاي هنا
جود:عدلي اسلوبج لا  بكف اعدل وجهج..ترى انا واصل حدي منج
سما باستهزاء:امر يا جلالة السلطان..هل تامر ع شي
جود حط رجل ع رجل:راح اغلس وادخل بالموضوع..شوفي انا وياج راح نزوج يعني رح نزوج ومستحيل اكو شي يغير رايي..فلذلك ماله داعي تمشين وتحجين انج تردين تطلكين ..ترى مو حلوه بحقنه

سما:مو حلوه بحقك مو بحقي..وبعدين ترى هذا الصدك ارد اطلك
جود:سمعي الكلام وخل الناس تظن انوا احنه مخطوبين سعيدين..احسن من ما استخدم غير اسلوب
سما:شتريد اسوي يعني

جود راد يخوفها وقربلها وهيه رجعت الى ان انحشرت بالزاويه ورادت توخر وتطلع بس هوة حاوطها بايدينها
سما: شجاي اسوي

جود قرب وجهه من وجها وما يفرق بينهم الا انش
جود:اكدر اسوي هواي اشياء..مثلا هسة انتي زوجتي واكدر اسوي الي اريده هسة ومحد يكدر يمنعني..اكدر اخذج بدون عرس وزفه وهالخرابيط..بس انا محترم التقاليد..ولاني ماريد احرمج من حقج بانج تلبسين البدله البيضه حالج حال اي بنت فلا تجبريني اني اكسر التقاليد وكل شي

سما من شافته قرب خافت:جود الله يخليك لا تسوي شي تندم عليه

جود قرب اكثر لدرجه التصق انفه بانفها وقرب لشفايفها وسما غمضت عيونها بخوف بس باخر لحظه تراجع

سما:(يمه كلبي همزين وخر جان وكف كلبي..بس معقوله يكدر يسوي الي يريده وياخذني بدون عرس..😒طبعا يكدر يعني منو يوكف بوجهه ..ابوج الي كلمه تجيبه وكلمه توديه..وكلمه جدهم تمشي عليه..خل اجاريه بس لازم احط شروطي حتى ابينله اني قويه ومو ضعيفه)

جود غمض عيونه وعاتب نفسه:(انا ع اساس بس بقيت اخوفها شبيه ردت انجرف بالموضوع..لا يا جود مو انته الي اذب روحك ع وحده..مدام هيه ما تحبك ما راح اقربلها لمن تحبني..الا هالشي ميصير بالغصب)

جود وصل للباب ووقفته سما

سما:لحظه..راح اوافق ع الكلته بس بشرط
جود: شنو
سما:حتى لو راح نزوج فما راح يصير شي بينه
جود:🤔امممممم وشنو الي يخليني ارضه بهالشي
سما:اذا ما رضيت..ما اخلي واحد بالبلد ما يدري اني نجبرت ع هالزواج مع شويه مبالغه ..مثلا كتلوني وحطوا السجين ع ركبتي حتى ازوج علمود الفلوس ما تطلع لغريب..اخخخ عائلتي شكد طماعه 😢 اهئ اهئ..وجود كل يوم يضربني شنو هالعيشه انتحر احسلي

جود:اي فلوس؟؟وانتي منيلج فلوس ترى حتى لو ورثتي بعد عمر طويل لجدي..ترى عندج اخو واكثر الورث راح يروح اله..وشوكت ضربتج

سما:😏مو كتلك شويه مبالغه..وطبعا المجتمع دوم يصدك المرأة المضلومه
جود:سوالف الجهال بطليها .. وخل هاليوم يمر ع خير

سما:😒

*****

نور وجميلة خلصوا مشتره وكل وحده بالكوه تمشي من الاغراض ولاكاهم محمد بابتسامه

محمد:اكيد تعبتي جيبي اشيلهم عنج
نور مدت الاغراض بسرعه:اي والله تعبت حاسه روحي راح اطيح ع وجهي
محمد طنشها وتعداها وراح لجميلة وخذه اغراضها

جوجو:شكرا محمد..كلك ذوق
نور فكت حلكها من الصدمه:انزين واناااااا
محمد:والله السايق مو وظيفته يشيل اغراضج..انتي كلتي انا مجرد سايق وجاي اطبق هالشي وياج

نور:بس شدخل هاي بهاي..هذا من باب الذوق لازم تشيلهم شدخل السايق
محمد:اي ومن تعاركتي وي الولد ومن كتلج صعدي بالسياره ولا تتعاركين..كان من باب الغيره..الرجال لازم يصير غيور ع بنات الناس..وشنو حصلت منج بس رزايل

نور:اي بس انا ..شسمه جنت معصبه وم
محمد: امشي نروح تاخرنه
نور:انته ليش اطنش حجيي وتقاطعني دوم😤
مارد عليها وصعد الاغراض بالدبه وقبل لا يصعد بالسياره شاف طفل يبجي وراحله وجانت نور تراقبه

محمد:شنو اسمك يا بطل.
الطفل:كاظم
محمد:ليش تبجي
كاظم: جنت جاي العب انا وصديقتي ورحت اشتري لها واجوا اولاد خذوا لعبتها وانا وعدتها ارجعلها لعبتها..بس يوم اجيتلهم ردت اخذ اللعبه بالسر همه كضوني وضربوني😢.. ما كدرت اوفي بوعدي لها ولا احميها

محمد مسح دموعه:لا تبجي انته بطل..والبطل ميصير يبجي..ميخالف اذا ما كدرت تحميها مره..مره ثاني حاول تكون اقوى ودافع عنها..صير مثل زورو بعيونها وعاملها مثل اميرتك الصغيره

نور صفنت بيه واذكرت طفولتها من كان عمرها ١١ وكان وياها ولد عمره ١٣ وتذكرت اول لقاء الهم
كانت طالعه من المدرسه وهي تبجي ووكفت يم حديقه عامه ودخلت كعدت بزاويه يم الزهور وما وكفت بجي

وفجأة نط كبالها الولد وظل يسوي حركات سحريه وحركات مضحكه
نور ابتسمت

الولد:ابتسامتج حلوه فلا تضيعينها
نور رجعت عبست
الولد:شنو المزعلج ..ليش تبجين
نور: 😞البنات الي وياي بالمدرسه ضلوا يضحكون عليه لاني دبدوبه ..وظلوا يستهزئون بيع وسووني مضحكه المدرسه لاني مو حلوه

الولد:بالعكس انتي حلوه مثل الاميرات ..صدكيني يغارون منج
نور:لا تضحك عليه انا دبه ومو حلوه
الولد:دبه اي بس مو حلوه لا غلطانه..بالعكس حلوه..وخليج واثقه بنفسج ولا يهزج كلام الناس..صيري مثلي اسمع من اذن واطلع من الثانيه ولا اهتم لهم لو عيبوا عليه

نور:انته شبيك يعايبون عليك شو حلو وعيونك ملونه بعد شتريد
الولد:لاني فقير .. واقل من مستواهم
نور:بس هذا مو عيب
الولد:لا عدهم عيب .. بس ما يهمني كلامهم.. اهم شي القناعه مثل متكول امي..تاخرت لازم اروح..باي يا اميرتي الصغيره
نور:باي زورو😅

محمد كان يحاجي نور وهيه صافنه..فحتي يطلعها من صفنتها طك اصابع بصبع كبال وجهها
محمد:وين رحتي ..يله صعدي السياره اخرتينه
نور:انت ..انت (شجاب هالذكره ابالي..معقول محمد هوة نفسه الي جنت التقي فيه بالطفوله..لا يجوز صدفه هالكلام لعد ليش كال زورو مثل مجنت اكول ..يجوز مجرد تشابه)

محمد:شبيه انا
نور:هااا قصدي انت استعجل ما نريد نتاخر
محمد:حلفي منو المؤخرنه وصارله ساعه طاكله صفنه بوجهي
نور:لا تحلم اني اصفن بوجهك..بس شسوي الصافن ما ينتبه وين صافن
جميلة:اسكت عنها هاي لو ظليت تجادلها ما تخلص
محمد:معاج حق خيتي
نور:😒
.
.
.
انتهى البارت☺️