رواية لأجل من احببت سأكون قوية الفصل السابع والعشرون 27 - بقلم امل

‎ جود رجع للبيت علمود يعقم الجرح الي بده ينزف ..دخل للبيت وسما كانت كاعدة بالصالة راقبته الى ان دخل لغرفته وبدون ما يباوعلها

سما كانت رافعه شعرها باهمال ونازله بعض الخصل ع رگبتها بشكل حلو ولابسه بجامه طويله



سما باوعتله من تعده بطرف عينها:(وجهه اصفر ليكون بيه شي..اروح اشوفه اخاف بيه شي..انزين اروح شكله بعد كل هالحجي الحجيته..يووو اتحجج باي شي بس اشوفه شبيه)

سما بعد صراع بداخلها جازفت ودكت الباب ودخلت وكان منطيها ظهره وهوة نازع فانيلته وكان ينزع الضمادات من عليه
سما انصدمت من شافت الجروح الي بضهره وتذكرت حجي نور انه ظل اثر الضرب ع ضهره وتجمعت الدموع بعينها بس حاولت تضم دموعها وما تنزلهم كباله

جود حس احد وراه والتفت شاف سما وانتبه للدموع بعينها بس تكلم ببرود:رايده شي
سما:هااا ..اي انا جنت اريد..اريد اي اريد اسالك هدومي ليش ما جبتهم
جود:هدومج موجودات بغرفتج
سما:ها..ما انتبهت 😅(امداني ع هالسؤال الغبي..هذا اقوه شي فكرتي بيه)
باوعت لجرحه وانتبهت انه نازف خفيف وانتبهت للضماد ماله متروس دم
سما بخوف:😨شنو جرحك انفتح..امشي بسرعه خل نروح للمستشفى
جود:ماكو شي مجرد نزف خفيف..بس تعقيم ويرجع الجرح عادي
سما:تحتاج اساعدك
جود:لا هسه انا اسويه..روحي انتي
سما:لا ما راح تكدر تلف الضماد..وخصوصا انته ايدك اليسره تاذيك اذا تحركت هواي..لان الطلقه قريبه عليها
جود:شدراج
سما:انتبهت عليك..جنت تتاذة اذا حركتها
جود رفع حاجب:شنو جاي تراقبيني
سما:😅لا بس واضح هالشي
جود:لعد ليش محد لاحظ هالشي غيرج
سما:كل واحد ونباهته..المهم اكعد خل اسويلك الجرح
جود تقدم وكعد ع طرف السرير وهيه كعدت بصفه وقربت الطاوله وحطت الادويه كبالها ع الطاوله
جود جان يباوعلها وهيه تنظف الجرح ويفكر(ليش من اشوف وجهه عصبيتي كلها تختفي..حتى لو جنت ناوي اعصب عليها وارزلها او وحتى اضربها بس من اشوف وجها ما اكدر.. اول مره ما اكدر اعصب ع احد ..واذا عصبت عليها وضربتها..كلبي يظل ياذيني..ليكول ضارب كلبي مو ضاربها..اول مره اجرب هالمشاعر الغبيه..ياترى ليون راح توديني.. الله يستر..يجوز لازم ما امشي وره مشاعري..الا لمن اصفه ع بر وياها..واشوف هذا العزيز وشيريد)

سما كانت تنظف الجرح وهيه عافسه وجهها بالم ليكول هيه المجروحه والتتاذة
سما: يبووووي😣
جود لا اراديا ارتسمت ابتسامه ع وجهه: هسه انا المجروح لو انتي..شو جاي تعقمين جرحي وانتي العافسه وجهج وتتاذين

سما:شوف الجرح شكبره مبين ياذي..شوكت تفتح الخيوط
جود:نسيت..ما سالتهم
سما:😠شلون تطلع بدون ما تسال
جود:ما صار شي اسالهم بعدين
سما جانت مندمجه بالتعقيم وما انتبهت لصوت جود الي صار ناعم وهادي ولا انتبهت لنظراته ولا انتبهت انه وجهه يكرب شوي شوي وهو مندمج يتفحص كلشي بوجها ما حست بيه الا لمن قرب كلش ولفحت انفاسه وجها وحست الدم وكف بعروكها وايدها جمدت عن الجانت تسويه
لا اراديا رفعت راسها والتقت عينها بعينه وارتبكت من نظرته وقشعريريرة مشت بكل جسمها وايديها رجفت خافت من نظرته المبينه نيته وصارت حايرة تشرد وتترك جرحه هيج لو تكمل وبعدين تشرد
واكو صوت ضعيف يكلها ابقي ياه وعيشي اللحظه ورفسي شكو فكرة

سما تبلعمت وحاولت تكسر النظره بيناتهم وحجت بصوت يرجف:حط ايدك ع بدايه اللفاف علما الف..علمود لا يفتح
جود هز راسه وكض بدايه اللفاف ولمس طرف ايدها الجانت كاضه اللفاف
سما كزبر جسمها بهاللمسة وسحبت ايدها بنفس اللحظة كانها تكهربت (يارب صبرني وانطيني القوة علما اخلص واطلع منا احس روحي راح اضعف كدامه)

قوت نفسها وهيه تلفه داير مدايره بس لكت صعوبه توصله للجهه الثانيه بسبب ضخامه جسمه وبعد محاولات اضطرت تمد ايدها الثانيه وره ظهره حتى تمسك اللفاف .(يعني صارت كانه حضنته)
حست بالخجل من لامس وجهها صدره العريان
بس حاولت تخفي خجلها ونزلت راسها اكثر
جود كان يتابعها بنظره وحس بارتباكها ورجفتها وكان يبتسم لا شعوريا

ومن كررت اللفه مره ثانيه وصار وجهها ع صدره سمعت دكات كلبه المتسارعه فاستغربت ورفعت وجهه والتقت عينها بعينه اجتها نغزه بكلبها وحست معدتها صارت بيها مغص ونزلت نظرها بسرعه ولعنت روحها لان رفعت نظرها.. لان نظرته كلش ماتبشر بخير ماجنه راح يخليها تطلع من هالباب بسهولة
خصوصا من بدت ترجع تلف اللفاف داير مادايره حسته كلما تقرب منه يستنشق الهوة بقوه وكانه يستنشق عطرها وزاد خوفها من انتبهت لانفاسه بدت تثكل حسته مو طبيعي

حاولت تلف اللفاف بسرعه حتى تطلع وباخر لفه وهيه محاوطته باديها من حاولت تبتعد حست بادينه حاوطتها ورجعتها لحظنه شهكت من حركته وتمسكت بلفة اللفاف الي بايدها بقوه من حسته دفن راسه بركبتها وكانوا اذا هدت اللفاف راح ينتهي كلشي

حست جسمها نمل من انفاسه الحارة ع بشرتها.. تريد تحجي تريد تبعده بس حست روحها عاجزة عن الحركة

رفع جود ايده ..فتح الشكاله(او القراصه) وشالها وخله شعرها يتناثر بطريقه حلوه بعضه ع وجهه والبعض الطويل ع السرير

~~~❤️❤️~~~

أنثري شعرک الططويلُ عَلْىٰ ظهرك 🌸💧
ليكتملَ حسنك 💜 💭
~~~❤️❤️~~~~
جود لمس بعض الشعرات وبعدها عن وجهها وبهالحركه لامس خد سما الناعم وهالشي خله سما ترجف ويورد خدودها من الخجل
وخر الشعره عن خدها واستمرت ايده تمشي ع شعرها وخذه خصله ظل يتلمسها

سما بالكوة تحجي وتحاول متخلي عينها تلتقي بعينه : ج ،جود
جود بصوت ناعم:عيونه
سما ارتبكت من نبرة صوته ورفعت اللفاف مرتبكه:خل اكمل
جود رد بنفس النبرة:كملي
سما تحاول توخر ايده من خصرها:وخر شوي حتى اكدر اكمل

ابتعد شوي عن جسمها بس ما وخر ايده عن خصرها وهيه غلست عن ايدة وكملت تضميد ورادت تبتعد وتكوم محست الا بالي يسحبها ويرجعها بحضنه

وباوع لعيونها وابتسم :شكرا ع التضميد
سما وهيه مصفنه فيه:😧هاااا.الحمدلله.اقصد العفو

جود زادت ابتسامته من شاف ارتباكها وتقرب منها ازيد وكض ذقنها بايده ورفع راسها
سما من رفعت راسها وشافت وجهها قريب من وجهه خافت وظلت ترجف:😳شتريد اسوي
جود ما رد عليها وبدون مقدمات راسا حط شفافه ع شفايفها وسما فتحت عيونها بصدمه وحاولت تقاوم وما حست الا هيه ع السرير وهوة فوقها
قاومته بالبدايه بس بعدين غمضت عينها واستسلمت لمشاعرها ولدقيقه نست كلشي ونست عزيز ووعدها
ومن نزل جود يقبل ركبتها وبنص الهدوء ماعدا صوت انفاسهم المتقطعه دك تلفونه وهذا الشي خله سما تحس ع نفسها وتدفع جود وتطلع ركض من الغرفه وتروح لغرفتها
جود جان ع السرير ويباوع للباب الطلعت منه بقلة صبر ورجع باوع للنقال الي بعدة يدك بازعاج شالة بعصبيه وكان سلطان
فتحه بعصبيه:طيح الله حظك صبغك ع هالتوقيت..ما لكيت ادك الا هالوقت😠
سلطان بمرح:شنو ليكون قاطعت عليك شي 😉..كافي عليك صارلك ساعات مكابل المره ما شبعت
جود(هوة شنو شفت شو كظيتها بالسياره ويوم ردت اسوي شي ما اتهنيت من وراك 😤): انا الك بس خل ارجع للشركه الا انطي بعض الموظفين اجازه واخلي الشغل كله عليك
سلطان:😰لا رحمه لابيك..يمعود اسفين..انته تسويها ونص.. ماعدك شي اسمه صداقه بالشغل
جود :المهم شرايد فضنه 😤
سلطان:اكو مشكله بالشغل باجر نريد نكعد وياك.
جود كعد بتركيز من سمع بالشغل:شكو شصاير
سلطان:باجر نكلك
جود:اوك باجر ارجع للشركه ونتناقش
سلطان:😏ما صدكت حتى ترجع للشركه..لا عيني ماكو رجعه..نلتقي ببيت جدك ابو علي ..وهناك نتناقش ونريد بس تطينه رايك ..ما نريدك ترجع للشغل
جود:😕اوك باجر نتفاهم..باي
سد التلفون وتمدد وحط ايده تحت راسه وباوع بصفة وين جانت سما قبل شوي وابتسم:اخخخخ منك يا سليطين خربت كلشي (🙂خوش ع اساس ما ردت اسوي شي علما اشوف عزيز واشوف شسوي وياه..اخخخ بس شفت خدودها وشعرها الطويل من تسرسح نسيت كلشي..راح تخبلني هالبنت بهالشعر)

*****
نزل سلطان وهوة مبتسم وشاف امه بالمطبخ وتوجه لها بعصبيه:يمه مو كتلج ما تكومين من الفراش😠
ام سلطان:يمه ردت اسوي عشه..جا شلون نموت من الجوع
سلطان:افااا عليج يمه..انا اسويلج..جا انا المن موجود
ام سلطان:بس يمه انته ما تعرف تطبخ..هوة انته جنت راس بصل اذا كصيت راسه تكلبها مناحه
سلطان:افااا يمه ترى جاي تهيني ..هذا قبل..وزمن اول تحول.
ام سلطان:والله يمه خوفي تلعب بالاكل لعب ..ونعمه الله حرام تنذب
سلطان:😒شنو يمه طايح من عينج..راح اطبخ وشوفي..اذا ما خليتج تاكلين اصابيعج وراها
ام سلطان:والله انا احساسي مو زين بهالتجربه..يمه خليني انا اسويه اخاف بعد هالطبخه تعفس المطبخ عليه..وبدال ما تكحلها تعميها

سلطان:معليج بالطبخ وروحي بالصاله كعدي باوعي تلفزيون وتغطي وانا اجيبه الج..واذا ع المطبخ انا انطفه الج
ام سلطان:خوش يا يمه ..دربالك لا تحرك شي..خليني يمك بس اباوع اخاف تخرب شي
سلطان بمرح وهوة ياشر ع الباب :يله يمه بره بلا مطرود علما اخلص
ام سلطان:صار واذا احتجت شي صيحلي

سلطان سوه بيض قروص وراد يسوي بصل وطماطه بس تورط بالبصل يكصله ثرمتين بصل ويكعد يدور بالمطبخ ويمسح بدموعه:خررررب الله يساعد النسوان..شلون كل يوم يكصونه ..يمه عيوني احتركت

واخيرا خلص كص البصل وعيونه حمر وحط البصل وعليه شوي دهن بالتاوه وهوة جاي يكلب بيه ومن راد يحط الطماطه طك يده التاوه وطاحت التاوه وهوة كمز

وامه سمعت الصوت واجت تركض:خير يمه شصار
سلطان:ماكو شي يمه روحي رجعي
ام سلطان:جان كلبي حاسني راح تخبص المطبخ عليه
سلطان:انا انظف يمه لا تخافين روحي انتي
ام سلطان:يمه انته شعرفك بشغل البيت خليني انا اشتغل ..هالخبصة كلها ع بيضتين

سلطان:يمه دكعدي يا حبج للكراب اكو احد حاصله احد يساعدة ويكول لا ..انتي مريضه يمه روحي ريحي ضهرج شوي علما اخلص
وحط ايدينه ع جتفها وسحبها لبره المطبخ
سلطان:اياني واياج ادخلين ..روحي ارتاحي

سلطان كص راس بصل ثاني وع نفس المعاناة وذب عليه الطماطه وخلاه ع النار وراح يسوي جاي وكض النقال دقيقتين من سمع صوت الرسايل
سلطان وهوة يشم ريحه شي يحترك :شنو هالريحه..الطماطه😨
راح يركض وطفاها بسرعه ولكه الكاعيه شوي محككه وحط ورك الجاي وصب الماي بالترمزي وحظرهم بصينيه وراح لامه
سلطان:واحلى عشه لاحلى ام ..بس شوي الطماطه شويه استوت زياده ..بس يكولون الطماطه مفيده اذا استوت كلش..احسن من ما يظل بيها شوي ماي
نزل الصينيه يمها وشافت الطماطه

ام سلطان: يمه انته فحمتها ما ستويتها
سلطان:ميخالف يمه بيها فوايد
ام سلطان:اي فوايد..حتى فوايدها احتركت
سلطان:اهووو يمه..بعد هذا الاكدر عليه..انتي اكلي البيض وخلي الطماطه انا اكلها بعد شسوي
ام سلطان اخذت قموس من البيض وحست اكو شي يكرط طلعته والا اكو كشر بيض صغير :يمه شنو هاي..انته كالي حتى كشور البيض
سلطان: هااا..والله ما ادري..هوة حاولت اكسر البيضه واتفتت الكشر بس طلعته..يجوز اكو كشر صغير زرك وانا ما ادري ..😅يله ميخالف يمه كشر البيض هم بيه فوائد
ام سلطان:😒ما اريد شبعت..انته اكلهم..انته بعدك شباب وتحتاج هالفوائد
سلطان:😒ما اريد سديتي نفسي من التحبيط
ام سلطان:الا كول لاعت جبدك من طبخك
سلطان:راح اروح اجيب كعك وناكل كعك وجاي احسن من هالهوسه
ام سلطان:😪لو انته مزوج جان ما اظطريت لكل هالهوسه..بس شسويلك الله يهداك..كلما اكلك خل اخطبلك بنيه ..تكول مو هسه..بعد وكت
سلطان رجع كعد ونسه الكعك:اي صدك يمه ع هالطاري(بابتسامه فخر)انا قررت ازوج
ام سلطان بفرح:كلللوش باجر ادورلك احلى بنيه واخطبها الك
سلطان:لا محاجه ادورين موجوده البنيه😊
ام سلطان:منيه يمه
سلطان:بنت ابو احمد..تصير بنت عم جود
ام سلطان:والنعم يمه..ناس خوش اوادم ..من باجر اروح اخطبلك
سلطان:يمه دكي عليهم من هسه وكليلهم ارد ازوركم..حتى لا يطلعون ويروحون مكان ويتاجل الموضوع
ام سلطان بشك:ولك شعدك مستعجل..شنو انته شايفها
سلطان بارتباك:😅شفتها مره من بعيد وعجبتني
ام سلطان بابتسامه:تحبها؟؟
سلطان:هااا ما ادري..(حط ايده ع بطنه بجوع) خل اجيب الكعك لان ميت جوع ..ولا اكولج راح اطلب من المطعم كعك وجاي ميشبع

*****
<نسينه وسما وحالتها بعد الصار ..خل نشوف ردت فعلها😊>
سما اول ما دخلت للغرفه ما كدرت تكعد بعد الي صار
فجانت تروح وترد بالدار
سما وهيه رافعه شعرها بادينها بعصبيه وتنفسها بعده ما منتظم من الارتباك:انا شلون سويت هيج ..اصلا انا المن رحتله كله مني... هسه شفتيه ما لابس فانيله انسحبي وانطمي..(بانفعال وباسلوب منغاضه ) بس لااااا لازم اسوي فيها البنت الطيبه الخايفه عليه ..امدانييي.. جان خليته يعالج روحه بروحه..بالطكاك يطكه حتى لو ما يكدر يلف اللفاف انااااا شكوووو.. اخخخخ شكد انا غبيه راح اموت قهر راح انجلط من تصرفاتي الغبيه..مره اكوله ما اريدك وما احبك وبعدين اروحله برجولي حتى اعالجه..ااااه قهر..غبيه غبيه غبيه..مبينه السالفه ما تبشر بخير..واضحه من ما لابس فانيله..بس لا انا غبيه وما افتهم ..تعاي لحظه انا شلون دخلت وهوة ما لابس فانيله وباوعت لجسمه بدون ما استحي..يبووووي طلعت معندي دم .. صدك عود ليش ما استحيت وهوة عضلاته وجسمه المتناسق تخلي اي بنت تستحي من تباوعله

تذكرت تقسيمات جسمه وشلون باوعلها اول ما التفت الها ونظرته الحاده وحست الدم صعد لراسها من الخجل

جود👇🏻



وهالشي خلاها تعصب وظلت تضرب رجولها بالارض بعصبيه
سما:بعد وكت توج تستحين.. راح ابجي من الفشله 😫 <عادي مشاعر عطلانه تشتغل متاخر 😂>

توجهت للمرايه وشافت علامه ع رقبتها وتذكرت بوسته ع رقبتها ولمساته ع جسمها وهالشي خلاه وجهها يصير احمر من المستحه
سما كعدت بطرف السرير وبوجه تعبير باجي<بس بدون ما تبجي..بس وجهه يكسر الخاطر😅> : وين اودي وجهي بعد الي صار
دحست روحها جوة الفراش وانبطحت وغطت راسها حتى تنام بس رجعت اذكرت الموقف وشلون استسلمت اله
سما وهيه ترفس الفراش برجولها وبعدهي مغطيه وجهها:ليش سويت هيج..قهررررر ..يمكن لو ما دك التلفون جان.....(صار وجهها طماطه ورجعت ترفس بالفراش من العصبيه)
سما وهيه تكعد:كله منه 😤..هسه الا يباوع عليه بهذيج النظره..خلاني انثول عليه عيونه تثول اول مرة ادري عدة نظرة حنونه تذوب..وين راحت نظرته الي دوم يباوع بيها للكل ليكول كاتلين عشيرته..اصلا تخبل نظرته المعصبه ع الاقل تخليني احجي براحه وياه وتخليني حتى انا اعصب..احسن من هاي النظره الجديده الي مدري منين جايبها..تحسينها بيها سحر او فد شي..تثولج وتخليج مو ع طبيعتج..والله لو يباوعلي بهذيج النظره ويسالني عن اسمي يجوز هم انساه

سما حطت ايدها ع خدها وهيه عاقده حواجبها بعصبيه:لا وهنوب حتى نبره صوته تغيرت وصارت مدري شنو..(سرحت شوي) صارت حنونه وهاديه ..(هزت راسها بعصبيه حتى ترجع للواقع وهيه تمسك شعرها بعصبيه) 😠هوة من شوكت صار هادي..اربع وعشرين ساعه معصب عليه وصوته يهز البيت هز..والله من يعصب عليه اهون من هدوءة ونظرة الحنيه

سما وهيه تحاول تهدي نفسها وتربعت ع السرير وتحاول تقلد كعده اليوكا حتى تهدي روحها وغمضت عيونها<بس طبعا كعده فاشله>: شهيق وزفير ..اوووف هدي..كل هذا ما صار وراح انساه..ولازم ما اعيدها مره ثانيه .. جود مجرد شخص عادي عندي وما يهمني بشي..ولازم اركز ع الطلاك..لازم اطلك

جود كان مسند ع الباب ويراقب هالمسرحيه بابتسامه ما كدر يخفيها: خلصتي لو بعدج

سما كمزت من مكانها وشهكت من سمعت صوته وشبكت البطانيه بقوه وقربتها لصدرها وكانت عيونها راح تطلع من الخوف:انت ااانت انت
جود:اي انا..ما جنت ادري انج مخبله وتحاجين روحج هالكد قربي اثر بيج..

سما تحاول تستوعب الموقف:لحظه انته شنو الي سمعته بالضبط <اي مصيبه سمعتها بالضبط 😅>

جود:ما يهمني خبالج..انا جاي علمود شغله ثانيه
سما:شنو
جود:انطيني تلفونج
سما:ليش بالله تريدة
جود:انطينياه محتاجه اريده..اعتقد انا الجبته ومن حقي اخذه
سمع صوت تلفونه يدك بغرفته
سما:شنو تريد تذلني لان جبته اليه وهسه تراجعت
جود تنهد بملل:مالي خلك اناقشج..انطينياه حتى اروح
سما بعصبيه:هاك ومره ثانيه لا اجيبلي شي اذا تريد ترجع تاخذه اوك ..ما اريد اي شي منك
جود :فتره وارجعه ما راح اطول او راح اجيبلج غيره
ما ردت عليه
افتر حتى يطلع بس من وصل للباب التفتلها وباوعلها بابتسامه جانبيه جذابه:لعد عيوني تسحر وانا ما ادري ..شكرا ع هالمعلومه
وفر وجهه وطلع

سما باوعتله بسرعه وعيونها رادت تطلع من الصدمه(س س سمعني😱😱😱😱😱)
ذبت روحها ع الفراش كانوا انغمى عليها :اخخخ يالفشله

*****

نروح لنور ومحمد والظلام الخيم عليهم
نور كانت ميته خوف من هالظلمة بس ما حجت بس بدون ما تحس نور زاد تمسكها بقميص محمد
محمد كان يمشي والبسمه ما فاركت وجهه من اول ما كض ايد نور وحطها ع ركبته حس بقشعريره مرت بجسمه ووصلت لقلبه الي حس بيه راح يوكف
تمنه الوقت يوكف بهالوقت جان يحاول يخفي ابتسامته ما يكدر من فرحته..ما كان يصدك انوا نور حلم حياته..وحب طفولته هسة موجودة وشايلها .. وشي واحد خطر اباله شيصير لو هيه مرتي وتظل طول العمر يمي شيصير هااا؟؟

ومن تمسكت بيه بقوه حس بخوفها وهوة تعب من المشي وهوة شايلها وشاف كانوا اكوصخور شوي جبيره ونزل نور بتعب وسندها ع الصخره وكعد يمها بتعب
محمد وهوة ماسك ظهره:اخخخ ظهري انكسررر
نور طالعته بعصبيه:شقصدك يعني انا سمينه وكسرت ظهرك
محمد:شوكت كلت انتي سمينه
نور:اي هذا التقصده ..لعد ليش انكسر ظهرك
محمد:يمعوده من المشي..لو مطي ماشي هالمسافه جان فطس..فشحال وانا شايلج.. هاي بدال الشكرا معصبه عليه 😒

نور رجعت استحت من ذكر الشيل ..بس حمدت ربها انها ظلمه حتى ما يشوف وجها :اسفه مو قصدي ..بس انا عقدتي من السمن فبسرعه اتحسس
محمد ابتسم :لا عادي ..بس هسه انتي مو سمينه
نور:ادري..بس من احد يذكرني بالسمن تصير بيه خوفه اخاف رجعت سمنت وانا ما ادري
محمد:واذا سمنتي..ترى سمنج قبل جان يخبل..وما حاجه تصير بيج خوفه من السمن ..واذا سمنتي ما راح يتغير شي.. الشكل مو مهم.. المهم داخلج نفسه
نور:لا اكره السمن واكره نفسي اذا سمنت .. احس الكل تعايب عليه(انتبهت لكلامه)لحظه انته منين شايفني من جنت سمينه حتى تكول سمني حلو
محمد:قصدي يعني السمن حلو.. ومو شي عيب حتى الواحد يتعقد منه
نور:تحجي هيج لانك ولد وما يهم الولد السمن.. اما البنت تختلف..اهم شي عدها رشاقتها وجمالها

محمد ابتسم(احبج بكل حالاتج سواء اذا كنتي ضعيفه او سمينه): ما تفرق عندي
نور باوعت حواليها بخوف:اكلك احنه وين..شو ميبين شي من الظلمه..اخاف يطلع شي بهالضلمه واحنه ما ندري ..بله طلع دب او نمر او ناس متوحشه تقتلنه مثل الافلام
محمد:هههههع وين كاعدين بافريقا حتى يطلع دب او نمر..وبربج منين جايبه ناس متوحشه هههه مره ثانيه لا تباوعين فلم رعب وانتي مو كده
نور باوعتله بغرور مصطنع:😒اصلا انا ما اخاف
محمد:ههههع واضح واضح
نور:ما اتصلت ع اهلي اطمنهم
محمد:نقالي وكع مني وانا اسوق وبعد هالحادث والي صار نسيته..وانتي وين تلفونج خل نتصل عليهم بلكي يجينه احد
نور:😓لو عندي جان ما سالتك..اححح جنطتي كلها بكبرها ظلت بسيارتهم
محمد:اهم شي طلعتي انتي بسلامه وكلشي يتعوض
محمد جان يدور بجيوبه واخيرا طلع من جيبه مفتاح وبيه ميداليه معلك بيها لايت صغيره
ومن شغله نور نزلت راسها لان ما تريد تباوع بعيونه

بس بعد فتره نور حست شي يتحرك بين رجولها فصرخت وكمزت من مكانها وتشبثت بذراع محمد
نور:اكو شي حسيته بين رجولي😱😱بس لا حيه او عكرب ..يمه اكيد اكو شي سام
جانت تريد تكوم ونست رجلها فداست عليها ورادت توكع بس محمد كضها والتقت عينها بعينه فحست كلبها راد يطلع من مكانه وكان ضوه اللايت بينهم (متسلط عليهم) فكانوا كانهم ع مسرح كل المكان ظلام بس عليهم الضوه
نور ابتعدت بسرعه عنه بس رجلها جانت تاذيها فكعدت ع الصخره ورفعت رجلها خوفا من الشي الي حسته بين رجولها
محمد جان يباوعلها والبسمه شاكه وجهه شك..عمره بحياته ما تخيل يعيش هيج يوم ووي منو..وي نور حياته . باوع ع المكان الي جانت نور كاعده عليه وحاول يشوف شنو الشي الي حسته بين رجولها..وجان يشوف خنفسانه

محمد:ههههههع خبصتي الامه علمود خنفسانه
نور نزلت راسها اكثر من الفشله وبصوت ناصي:وانا شدراني..وبعدين الخنفسانه هم مقرفه
محمد:هههههع دربالج لا تتخيلين شي ثاني مره ثانيه..بعد شوي تتخيلين ديناصور وانا ما ادري
نور كانت كاضه رجلها بالم ومنغاضه: مو لهدرجه عادي.😒..وترى الحياي والعقارب موجودين بكل مكان فشدخل الخيال..المهم عوفك من خيالك..وكولي احنه وين وشكثر ونوصل البيت😥
محمد:😒صار خيالي هسة
نور:اي خيالك لانك تخيلت اني اتخيل..خلك من الخيال وجاوبني
محمد:تردين الصدك..ما ادري
نور ناظرته بخوف :😱شنو يعني ما تدري
محمد:صراحه من جنت الاحكهم جنت خايف عليج وما انتبهت للطريق وماانتبهت اذا كان موجود اي لافته تدل ع هالمكان
نور:خايف عليه😳..انا؟؟؟
محمد ما راد يحسسها بشي:اي انتي امانه عندي ولازم اخاف
نور:اهاا..انزين شلون نعرف الطريق
محمد:راح نمشي ع الطريق العام ولا بد تمر سياره..بس يا خوفي هالمكان يكون اراضي بور
نور:شنو يعني
محمد:يعني اراضي غير صالحه للزراعه..وهالشي خله الناس تتركها ماعدا البعض..وهالشي راح يصعب احد يمر منا
نور:😰شلون لعد
محمد:ربج كريم
نور :والنعم بالله
محمد انتبه انوا هيه كاضه رجلها بقوه ومغطيتها بملابسها:رجلج بيها شي
نور:😓بس شوي تاذيني 😖
محمد:خل اشوفها
نور:😨هااا
محمد:شبيج خفتي..بس اشوفها..اخاف ورمت او لا
نور:لا ما اريد
محمد:نور باوعيلي
نور فرت وجهها للجها الثانيه
محمد:نورر باوعيلي
نور باوعتله بس ما باوعت عيونه حاولت تتجنبها
محمد:باوعي بعيوني
نور(😩😩انا بروحي متفشله من الموقف وهذا الغبي يكلي باوعي بعيوني ..يارب ساعدني ..وخلصني من هالمشكله باقرب وقت..والله اذا استمر الحال هيج لو راح انجلط لو راح انجلط 😑)
نور باوعت بعينه بارتباك
محمد:كتلج مدام انتي بره البيت فانتي مثل اختي..صدكيني ما راح اسويلج شي. ثقي بيه <😒صدئتك يخويه..طب والفلم الهندي الي فوئ معناتوا ايه 😑..اخوه بردوا>

محمد من شاف ماكو ردت فعل فاخذ بمبدأ السكوت علامه الرضا فكعد يم الصخره الكاعده عليها نور بطريقه رافع رجل ومنزل رجل مد ايده وجر رجلها وحطها ع رجله الرافعها ورفع الملابس شوي للكاحل وبانت رجلها البيضه والصغيره.. بس الي لفت نظر محمد تاتو نجوم ع رجلها ورجع بذاكرته لزمن ماضي ..لاحلى ايام ..لايام طفولته
نور جانت كاعده بالحديقه وتباوع للنجوم ومبتسمه ومحمد طلعلها من وره
محمد:ام خدود شتسوي بهاليل
نور بعبوس ومدت بوزها بزعل بشكل طفولي:لا تكولي ام خدود..لا تذكرني اني سمينه..اصبر وشوف بس اكبر اصير رشقيه واخبل وكل الي يعايبون عليه يظلون يموتون ع رشاقتي
محمد:هههههع ولج شبيج ظلي سمينه تخبلين فديت خدودج بس
نور بخجل:شكرا..والله بس انته الرافع معنويات خدودي
محمد كرص خدها :ههههع اروح فدوه لهلخد
نور بانزعاج:اخخخ لا تصير مثل صديقات ماما..اصلا محد نفخ خدي غيرهن..اول ما يشوفني يظلوني يكرصون بخدودي..لحد ما يورمن..وبعدين يكولون سمينه..اي غير من وراجن

محمد:ههههه اي اي ذبي الصوج بغيرج..المهم شعدج طالعه بره بهالبرد وكاعده تباوعين للسما
نور:اسكت عني..مطنكره تعاركت وي حويدر والمصيبه امي واكفه وياه وخلتني انقهر زياده

محمد:ليش شنو كال وضوجج
نورتفخت خدودها بطفوليه:يكلي يدبدوبه يالجنج سطل روبه 😠
محمد:ههههههههههههع
نور دفعته ومدت بوزها بزعل :عابت لا تضحك عليه..حتى انته مثلهم
محمد وهوة يحاول يكتم ضحكته بفشل:ههه اوك راح اسكت ههه اسف
نور:😡عابتلك لعد ليش تضحك..كوم ولي منا خليني لوحدي اباوع للنجوم احسن من وجوهكم
محمد:شتسوين تباوعين للنجوم كلساع شو همه نفسهم ما تغيروا..شعدج كلساع مكابلتهم وتباوعين
نور بحالميه طفوليه:يخبلووون شوفهم شلون يلمعون بهالضلمه شكلهم احلى من اللؤلؤ ياريت انا مثلهم..ياريت اكدر اصعد يمهم
محمد صفن بوجهها وهيه ما منتبهه وكال بلاوعي:وانتي احلى من هالنجوم واللؤلؤ
نور التفتتله وهوة وخر عينه وابتسمت بخفه:مو كتلك محد رافع معنوياتي غيرك 😃.. تصدك بس اكبر الا ادك وشم مال نجوم..لان هسه امي ما تقبل تكول زعطوطه 😑

محمد:امممم شعندج ع النجوم..هسه عالاقل وشمي قلوب او شي ثاني..ماشالله اشكال زخرفه التتاتوا اشكال والوان
نور:لا الا نجوم بس محتاره وين ادكهم يجوز بجف ايدي او بالضهر
محمد رجع صفن بيها:لا دكيها برجلج احسن
نور باوعتله باستغراب:ليش بالرجل يعني
محمد:علمود تبين كانج تمشين ع النجوم..لانج احلى من النجوم وحرام تتساوين وي النجوم
نور:هههههههه حستتني اني ملكه جمال..ما جنه وجهي ع كوله حيدر سطل روبه
محمد بأبتسامه:وشبيها الروبه اصلا تخبل..شو انتي وجهج مدور وبيضه وكل بنت تحلم بالبياض والوجه المدور..فليش مستهانه بروحج

نور:امممم شكلك بس انته شايف هالجمال بيه..شو لا انا شايفته ولا احد ثاني..وهذا يدل ع انك افضل صديق🙂

محمد:يعني ما راح ادكينه برجلج
نور:تؤ. ما اريد..يجوز افكر بغير مكان
محمد:لعد زعلت..لو برجلج لو ازعل
نور:اهووو لا تصير كلش..ترى هوة تاتو المن كبرت الموضوع..واحنه جاي نتناقش بالمكان ليكول امي راح تقبل واسويه صدك هههههه شو هوة بس حجي

محمد:ميهم بس اذا قبلت امج دكيه برجلج(بعصبيه مصطنعه) لو رأي صديقج ما يهمج

نور:هههههع دكوم بس خل نروح ناكل احسن..وتعال اشتريلي ككاوات ..من زمان ما اكلت ككاو مسويه رجيم..بس بعد ما اكدر اريد اكل شوي
محمد:جم مره كتلج لا اسوين رجيم

محمد رجع للواقع وهوة بعد يباوع للوشم وبدون وعي لامس الوشم ومرر صبعه ع طول الوشم

نور كانت مستغربه من صفنت محمد ومن انتبهت انه يباوع للوشم استحت واستغربت بنفس الوقت وفجأه حست بايده تلمس الوشم وحست بكهربه سرت بكل جسمه فسحبت رجلها بسرعه
محمد انتبه لروحه :اسف مكان قصدي(شنو معنى هالشي..وشمت مثل ما كتلها معقوله تذكرني لو شنو..معقوله صدفه لو وشمت بهالمكان لان انا كتلها؟؟)

محمد عاد تايسفه:اسف مو قصدي بس استغربت مكان الوشم هنا
نور:وشنو الغريب
محمد(يله دكولي ليش دكيتيه برجلج):يعني العاده يحطونه بالايد بالجتف..بس اول مره اشوف بالرجل..ليش وشمتيه هنا
نور:😒ليش انته وين شايف وشم بالجتف..طلعت ابو نسوان مو
محمد:لالا لا تفهمين غلط بس سامع يعني
نور:امممم مع اني ما اقتنعت بس راح ارضي فضولك..صديق مقرب كنت اعرفه قبل اقترح عليه اوشمه هنا..ارتحت 😒
محمد وازدادت ابتسامته لدرجه بانت اسنانه:اي ارتحت (يعني تذكرني..امممم بدايه خير..(احتفت ابتسامته بسرعه) بس هذا ما يعني انها تحمل مشاعر تجاهك)
نور:😒لعد انته شكد فضولي
محمد جر رجل نور مره ثانيه ولمسها مره الثانيه بس هالمره حتى يشوف مقدار الالم
نور حاولت تسحب رجلها من الالم بس محمد كض رجلها بقوه وهالشي خله نور تنزل راسها من الخجل..حاولت ما تبين خجلها بس ما كدرت لان محمد لاحظه بس ماحب يحرجها وبعد نظره عنها
محمد نزع قميصه ونور باوعتله بصدمه(هذا شجاي يسوي..وحمدت ربها لان لابسه حدر قميصه فانيله نص ردن)
محمد:شكل رجلج مخلوعه مدري مكسوره..والله ما افهم بهالسوالف ..بس راح الفها بالقميص بلكي تتحسن بهالشي..
التفت يدور ع شي..وجاب غصنين صغار وحط كل غصن بجهه من رجلها ولف القميص ع رجلها والاغصان
نور:شنو هاي
محمد:حطيت اغصان حتى يصير مثل التجبير وما تكدرين تحركين رجلج يمين او يسار(حك ركبته بخجل ومرر ايده ع ركبته اكثر من مره) ادري مو كد المقام بس تفي بالغرض

شافوا نور سياره من بعيد
محمد:سياره جايه اخيرا..تعاي بسرعه(وتذكر ما تكدر تمشي)
فشالها بين احضانه وركض بيها للطريق العام
نور خافت من حركته وخجلت بس الي ريحها انه ما باوع لوجهها والا كان زاد خجلها ومن ركض خافت توكع فحوطت ايدينها ركبته لا اردايا وهالشي خله محمد يباوعلها وهيه فرت وجهها بغير جهه بخجل
محمد بابتسامه(الظاهر اليوم ربي راضي عليه حتى خلاني اشوف هالوجه الخجول اكثر من مره )

ابعد هالافكار عنه وخله تركيزه ع السياره والحمدلله كان الطريق قريب عليهم لان هوة تعمد يمشي قريب من الطريق العام حتى ينتبه اذا اكو سيارات
وصلوا بسرعه ونزل نور يمه بس كان يسندها بايده وبايده الثانيه ياشر للسياره

****
جود من رد ع التلفون وجان ابوه وكله ع اختفاء نور طلع بسرعه وبدون ما يكول شي
وسما انتبهت اله (توه جاي المن طالع مره ثانيه )
رفعت كتوفها بعدم اهتمام:وانا شكو ..خل اروح احضرلي شي اكله احسن وراحت للثلاجه وحضرت ثلاث بيضات وجبن وزيتون وكعدت تاكل
ومن خلصت اكل راحت فتحت الجنطه وتريد ادور ع بجامه ثانيه كصيره ومريحه..لان وقت النوم ما تحب تلبس شي طويل
وانزعجت من شافت اغلب الملابس بدلات نوم وبعد بحث طويل لكت بجامه تيشيرت علاك وشورت نص يعني لنص الفخذ

سما:راح يفي هذا بالغرض..والحمدلله جود بغير غرفه فراح البس ع راحتي بغرفتي..راح احتشم بس بره

****
جود ساق باقصى سرعه عنده ووصل لبيت ابوه ودخل بسرعه وكان الكل مجتمع حتى الجد وام احمد وبناتها وولدها
جود:ما رجعت
ام جود وهيه تبجي:لا ما رجعت
ابو جود:كافي تبجين..ترى البنت ما ماتت حتى كل هالبجي
ابو احمد:خلونه نبلغ الشرطه
الجد:لا ما نريد فضايح..الناس لو سمعت تكعد تألف ع البنيه شغلات..واكيد صارلها شي مدام لهلوقت بره البيت وكلام ما يخلص
ام جود:شعلينه من كلام الناس اهم شي بنتي

جود:خلونه نخلي كل الحراس ادور عليها
ابو جود:خوش فكره
جود:اوك راح اتصل عليهم وانا هم راح ادور وياهم
حيدر:اخذني وياك هم انا ارد ادور
جود :اوك تعال..هيه يا مجمع رادت تروح
ام جود:لمجمع****
جود:اوك راح اتصل عليهم حتى يستعدون

ام احمد بصوت ناصي تكلم ولدها:روح وياهم
احمد:مالي خلك..توني جاي من السهره وتعبان..حمدي ربج كعدت وياكم
ام احمد:لا تصير غبي روح وياهم بلكي تكبر بعين جدك ويكتبلك شي
احمد:😏ما لكيتي الا ابوي الحجي يكتبلي شي..اصلا ما يطيقني
ام احمد:اي كله منك ..اتقربله وروح اشتغل وياه ..هوة اهم شي عنده الشغل
احمد:عندي دراسه ما الحك
ام احمد:😠الله والدراسه كل سنه كاعدلي سنتين بيها
احمد:اهووو يمه لا تخليني اكوم هسة
ام احمد:لا ظل عالاقل واجهه كبالهم انك وكفت وياهم

ابو جود:ما اكدر راح اتصل بالشرطه اخاف صارلهم شي
احمد:اي يجوز هذا محمد مدري منين جايبينه هوة مسويلها شي..اشتكوا عليه قبل لا يسويلها شي
حيدر بعصبيه:اكول اكل تبن احسلك.. محمد اأمنه ع نفسي.. اأمن بيه اكثر منك
احمد :وانته وين تعرفه حتى واثق منه لهالدرجه
حيدر:اي اعرفه وصديقي من زمان
جود وهوة طالع:امشي وخليك منه..ان الرد ع السفيه لسفاهه
احمد عقد حواجبه :شتقصد
جود رفع حاجبه وهوةيباوعله بعصبيه:الي فهمته..احنه بيا حال وانته كاعد تخمنلي وتزيد عليهم خوفهم..احساس ماكو..امشي حيدر لو اروح عنك
طلع جود ووراه حيدر
وخلوا احمد ورهم ينافخ ويدردم

*****

وكفت السياره لمحمد وكان الظاهر سياره بيكم مالت مزرعه لان صاحب المزرعه كاعد كدام والعمال كاعدين وره
محمد:ممكن تاخذنه وياك..سيارتنه تعطلت
السائق:اوك بس ماكو مكان بس وي العمال .
محمد:ميخالف اي مكان بس نريد نوصل لاهلنه
السائق:اوك روح اصعد
محمد راح لورة ولكه المكان متروس عمال ما عدا مكان صغير ياله يكفي لشخص وبالطرف
محمد بابتسامه:ممكن تدنون شوي حتى يكفي نكعد اثنينه
العامل الاول ونظره ع نور ويبوعلها من فوك لتحت:ماكو مكان بس راح نحاول ..بس منو هاي ..زوجتك؟
محمد ما عجبه نظراتهم لها بس مسك اعصابه:اي زوجتي
نور التفتتله بسرعه (اي زوجه..ليش كللهم هيج ..التفتت للعمال وشافت نظراتهم وتملكها الخوف ..فهمت الحين..وحاولت تتجنب تباوعلهم)

سووا مجال العمال بس مع ذلك المكان ما يكفي..واذا كعد فراح يضطر يحظن نور ويكعد
فصعد اول شي ومد ايده لنور حتى يساعدها
نور باوعتله بخوف وتردد
محمد بابتسامه:يله
تشجعت ورفعت ايدها بارتباك وخوف ومحمد اختصر عليها الطريق وهوة كض ايدها وسحبها

كعدي هنا بالطرف
نور بخجل:وانته وين تكعد
محمد خاف يحرجها :راح اوكف يمج ما راح اكعد
نور:اوك

نور كعدت وهوة وكف يمها حتى يصير حاجز بينها وبين العمال واول ما تحركت السياره خافت اطيح لان باب البيكم بالطرف يصير ناصي فتمسكت برجله بس بسرعه وخرت ايدها بخجل
ومن مشت السياره صار الجو ثلج بسبب سرعه السياره فضمت رجولها لصدرها لطلب الدفو وبسبب خوفها من نظرات واحد كاعد بعيد عنها بس بنفس السطر الكاعده بيه فحاولت تخفي وجهه برجول محمد فحاولت ترجع راسها ليوره حتى مايشوف وجهها بسبب رجول محمد وهيه هم ترتاح من وجهه

محمد الي كان متجمد من البرد لان كان لابس فقط فانيله نص ومع انشغاله بالبرد بس كان نظره ع نور وانتبه للي كان يباوع لها وماحب يتعارك ويسوي مشكله وهمه بحاجه هالسياره فباوعله بنظره عصبيه بمعنه خير شكو تباوعلها

والثاني فهم الي قصده وبعد نظره عن نور
نور تذكرت محمد وانه بس بفانيله فرفعت نظرها اله وكان عاقد ايدينه ع صدره وكان فكه يطكطك من البرد(كله مني الولد راح يجمد..الله يجزاه كل خير لولاه كان الله واعلم بحالي..حتى لو فكيت من هذولاك بدون مساعدته فما راح اكدر اصعد بهالسياره بدونه..يجوز جان انجلطت من الخوف من نظرات هالولد بس وجوده وياي محسسني بالامان ومخفف عني هالخوف)

وبعد طول انتظار بهالبرد اخيرا دخلنه للمدينه وحسيت بفرحه ليكول داخله باريس..اخخخ اول مره احس بنعمه بيتنه..بعد ولا اطلع من البيت لوحدي حتى لو اظل محبوسه طول عمري

السايق وكف :هذا اقصى حد اكدر اوصلكم اله انتوا اخذوا تكسي بعد
محمد:اوك مشكور حبيبي ما قصرت
السايق:العفو عيني
محمد نزل اول وفتح ادينه الي حتى انزل
نور(هسه ليش ما يحطون درج..صحيح المسافه مو كلش بعيده بس ما يدرون رجلي مكسوره😭 شينزلني..استحي هوة ينزلني..النزله اصعب من الصعده..ياربي شنو هالفشله..والمصيبه عكب كل فشله ما اكدر انحاش لمكان واضم وجهي بيه..شنو هالاحراج)
حاولت انزل وفقط امسك ايده بس ما كدرت فهوة حط ايدينه ع خصري ورفعني وصرت قريبه حيل منه ونزلني بهدوء وعينه كان حاطها بعيني بس انا من الارتباك كنت احاول اباوع لكلشي ماعدا عيونه
نور(تدرون شكد هالاشياء كانت احراج..تدرون شكد محرج من تستحون وما تكدرون تشردون لغرفتكم وتضمون راسكم بالمخده.. انا عمري بحياتي ما احتكيت بولد غير اخواني..حتى بالجامعه ماعدي اصدقاء ولد .. ففجاءة تصير كل هالاشياء الي وكل هالاحتكاك وي محمد ولمسات ايده ..فما تدرون شكد اثرت هالاشياء عليه وشنو الي احسه..لان انا ما ادري شنو الي احسه)

محمد كان صافن بيها وهيه بغير عالم..وكف سياره تكسي صارله عشر دقايق ويحاجيها وهيه صافنه:نوررر ..بيج شي
نور:هاا لا مابيه شي
محمد:يله امشي نصعد
نور(حاولت ما احجي وياه هواي..لان صراحه مفتشله منه هواي..ومجاي اكدر اباوع بعينه..اريد غرفتي 😭😭😭وخصوصا مخدتي العزيزه😢)
محمد:ودينه للمستشفى
نور:ليش خل نروح للبيت اكيد هسة قلقانين
محمد:لا رجلج لازم يشوفها طبيب..ومن نوصل للمستشفى انا ابلغ اهلج
نور سكتت وما حبت تزيد بشي
ومن وصلوا للمستشفى راح محمد ركض جاب كرسي متحرك واجه ساعد نور حتى تكعد بالكرسي ودخلها للطبيب وراح اتصل ع جود الي كان بالمجمع وجاي يشوف كامرات المراقبه وشاف اخته من نخطفت وزاد الخوف عنده
جود بعصبيه:شلون يتجرئون
حيدر:هذول مو اولاد ابو وائل..والله العظيم ذبحهم ع ايدي
جود:ما اصدك تطلع هالسالفه من اولاد هذا الرجال الطيب..صدك الناس بوجهين..بس عدي احساس وراهم سالفه
حيدر:لازم نبلغ الشرطه
جود:نخلص اختنه منهم بالاول وبعدين عدي تصرف ثاني وياهم
دك تلفونه وكان رقم غريب
جود:الوو
محمد:الووو هلا جود انا محمد
جود بسرعه:محمد!!اختي وينها خو ما صارلها شي..لحكت عليها لو سوولها شي
حيدر لزك باخوا من سمع باسم محمد وحط اذانه ع التلفون يحاول يسمع شي
محمد:لا تخاف ما صارلها شي..وهسه احنه بالمستشفى
جود بخوف:ليش بالمستشفى..مو كلت بالمستشفى
حيدر:شنو مستشفته ..احجي شصاير
محمد:لا بس وكعت انسه نور وجبتها للمستشفى..لا تخاف بسيطه يجوز كسر
جود وهوة يدفع حيدر عنه:اي مستشفى انتوا
محمد:مستشفى***
جود:اوك دقيقه وجايكم لا تتحرك
سد التلفون وجه كلامه لحيدر وهو يطلع ويتوجه للسياره:بسرعه اتصل ع الاهل وكللهم ع المستشفى خل يلحكونه
حيدر كعد بالصدر يم جود وهوة يتصل:اوك

*****
وائل وجعفر وغسان رجعوا لبيتهم ووجهم مايبشر بخير ولكوا بوجههم ابوهم الي انصدم من شكلهم المغبر ووجه غسان الي كان انفه احمر
ابو وائل بعصبيه:انتوا وين جنتوا لهلوقت..وليش هيج اشكالكم..شصاير
غسان:ماكو شي يبه بس مجرد تعاركنه وي شباب تعبانه
ابو وائل بعدم تصديق:وائل احجي الصدك وين جنتوا من الصبح لهسه
وائل:يبه راح اكلك الصدك وما اجذب
جعفر:وائل ..اسكت احسلك
ابو وائل:انته انطم وخلي اخوك يحجي
وائل حجه كلشي من يوم وصلتهم صوره احمد الى خطف نور وشردتها وابووائل جان مصدوم باولاده وما حس الا كف ع وجه وائل
ابو وائل:يا حسافه تربيتي بيكم..حتى لو نور اخت احمد..هذا مو معناتها تغتصبونها
غسان بعصبيه:ليش يبه..هوة ضيع شرفنه ويستحق الي نسويه بيهم
ابو وائل :اكل تبن.. اذا ولدهم صايع وما عنده اخلاق هذا مو معناتها ننزل لمستواه
جعفر:بس يبه
ابو وائل:اكتم ولا اسمع صوتكم..باجر نروح لبيتهم وتنزلون تبوسون رجولهم لمن يسامحونكم
غسان:ع جثتي

ابو وائل:والله اكتلك وما يرفلي جفن..هذا الي ناقص ع اخر عمري تنزلون راسي
جعفر وكز غسان حتى يسكت وبالفعل سكت وهوة ماراضي عن اليحجيه ابوه
طلع ابو وائل لداره وهوة معصب وناظروا لوائل بعصبيه
غسان:ارتحت هسة
وائل يمسح ع خده:😒اي ارتحت

******
جود وحيدر وصلوا اول شي ولكوا محمد واكف بره
جود:هااا وينها
محمد :جوه عند الطبيب
جود:كولي شصار بالتفصيل
محمد حجاله كلشي
حيدر حضن محمد:مشكور ع كلشي
محمد:ولوو هذا واجبي
جود حط ايده ع كتف محمد:ما ادري شلون اجازيك لانك رجعتها بالسلامه <زوجهيا الله يخليك وهاي احسن رد للمعروف 😂>
محمد:ليش محسسيني اني سويت معظله..ترى مسويت غير واجبي
محمد كان مربع ادينه ع صدره من البرد وانتبهله جود
جود:محمد روح ارتاح وبدل
محمد:لا ما حاجه..اكيد راح تحتاجون شي..وراح اردكم واروح ارتاح
جود:لا روح محاجه..كفيت ووفيت..وبعدين ترى مو حلوه وكفتك وانته بهالفانيله والدنيا بارده
محمد:اوك بس اذا احتجتوا شي دكوا عليه..قصدي دك ع مصطفى لان تلفوني راح..علما اشتري جديد

جود:تلفونك عليه
محمد :لا والله ما كتلك حتى تنطيني غيره..انا عندي ومستوره واكدر اشتري غيره
جود:تلفونك راح بسببنه وواجبنه نرجعه الك
محمد:لا عندي ومحاجه تحرجني
جود:روح هسه راح تجمد من البرد وبعدين نتفاهم
محمد:اوك

راح محمد وشوي وطلع الدكتور وطمنهم ع نور ودخلوا شافوها ونور اول مشافت جود وخوفه عليها رجعت ابالها ذكريات الخطف وكلشي وتجمعت دموعها بعيونها وطلعت كل الخوف والدموع الي كانت كاتمتهم
وجود راح بسرعه وحضنها وهيه ضمت راسها بصدره وظلت تبجي وهوة يمسح ع شعرها
جود:اششش اهدي مصار شي وانتي بينه..ومحد راح يلمسج..

حيدر من شافها هيج هوة هم نزلت دمعته بس مسحها بسرعه
وبهاللحظه دخل الكل وام جود راحت تركض لنور وحضنتها وظلت تبجي ونور من شافت امها بهالحال زاد بجيها
حيدر:والله الا ادفعهم الثمن غالي كلهم..واطين
جود:الصباح رباح.
الجد قاطع حديثهم:محد راح يسوي شي..وباجر تجي عمتكم وما اريد احد يحسسها بشي
جود:بس
الجد:هاي اخر كلام عندي وما راح اعيده
حيدر:والله ما اسكتلهم..شنو يخطفون اختي واسكت
الجد:اهم شي ردت بالسلامه وهذا اهم شي ..وابو وائل الي تفاهم وياه
حيدر:اي تفاهم حجي..والله ع السووه لو اكسر ايدينهم وارجولهم هم شوي
جود حط ايده ع كتف حيدر وهوة التفتله
وجود هز راسه بمعنه لا تناقش
وحيدر تنرفز وطلع من المستشفى

وجود شال نور وحطها ع الكرسي:الطبيب سمحلها تطلع ..ماكو شي خطير
نور كانت حاظنه قميص محمد من يوم فكه الدكتور وانطاهياه علمود يجبر رجلها وهيه مو حاسه وظل بايدها

وراح الكل لبيته بعد هاليوم الطويل والمتعب

.
.
.
انتهى البارت
اتمنه يعجبكم ☺️

وشكرا لبعض التعليقات الحلوه الي تخليني اتشجع وتنطيني واهس اكتب ❤️😍😍
ثانكس سو مج