رواية لأجل من احببت سأكون قوية الفصل الثامن والثلاثون 38 - بقلم امل

‏گودني لگلبك واخذني..
الناس مابيهم وطن❤️

~.~.~,~❤️❤️❤️~,~.~.~

مرت الايام ومحاولات سما باستفزاز جود نجحت لدرجه صار يحاول يتجنب البيت ويطلع من الصبح قبل لا تكعد سما وما يرجع لاخر الليل لمن تنام سما لحتى يتجنب المشاكل

وهالشي بده يستفز سما وانقلب الموضوع عليها لان صارت ما تروح حتى بيت جدها وكاعده بالبيت وحدها لان كل مره ياخذها جود من الصبح وترجع قبل الظهر بشوي يتغدون ومن يبي يرجع للشغل يذبها بيت جدها علمود لظل وحدها بس من يوم بدت تنكد عليه مصارت تلحك عليه قبل لا يطلع حتى يوديها وبدت تمل من الوحده لان ريوك وغده وعشه كل لوحدها وحست السحر انقلب ع الساحر وبدال لا تنكد عليه وتستفزه علمود يطلك بده هوة اليستفزها

وحتى من يروح للشغل تحرك النقال حرك حتى يجي يوديها وبالبدايه جان هالشي يستفزه لان تقاطعه عن شغله ويرد عليها ويرزلها بس ميفيد ترجع تتصل لمن اطلعه من طوره ونوبات بنص الاجتماع او احد موظفينه يمه بشغل وتشتغل رحمه الله بالاتصالات خو هيه كاعده وحدها وماعدها لا شغله ولا عمله ومستلمته اتصالات وتفرح من تستفزه ويرد عليها بعصبيه بس بالاخير عرفلها وكام يحط تلفونه دوم ع الصامت وخلاها تحرك بروحها وتفتر بالبيت جنها ذبانه من القهر

وحتى البنات بده دوامهم والتهوا عنها وكلما تتصل حتى يمرونها يتعذرون بدوامهم لو من يرجعونهم يكون عندهم دراسه وميكدرون يجولها وهالشي زيد قهرها ووحدتها

كعدت ع القنفه وظلت تفرفر بالتلفزيون لحد ما ملت وسدته وطكتها صفنه ولشوكت راح اظل هيج حالتها وبنص افكارها راح بالها لحنان وشراح يكون مصيرها وشراح اسوي صح لكتلها حل بس مؤقت وما تدري اذا عليوي راح يستسلم ويايس لو راح يطلع بدرب ثاني

تذكرت من سحبت حنان وكلتلها بسرعه بدلي وقنعي امج نروح السوك
حنان:ليش ؟؟ هسه وقت سوك كليلي شنو الحل فدوه !ترى والله كاعده ع اعصابي ومابيه حمل شي
سما:دكومي دكومي انقلعي بدلي وبعدين افهمج
حنان:اهووو خل افهم
سما:وجعوووا امشي افهمج بالطريق لضيعين وقت

بوكتها حنان بالكوه قنعت امها لان استغربت طلعه حنان وي سما وهيه تدري ولا وحده اطيق الثانيه وظلت تستجوبها بس اخيرا قنعتها وطلعوا

وبالطريق فهمتها ووصلوا للكافتريا ونزلوا

حنان:سما خايفه ..اخاف يفضحني وهذا مو حل
سما:صدكيني هذا نذل وجبان وميسويها وينشر صورج بس يسترجل عليج حتى تجين ويسوي الاكبر منها .. فلذلك سوي الكتلج عليه كسري الشريحه وتلفونج كسريه او بيعيه حرامات عليه وكولي لامج من ترجعين نباك نقالي .. وحتى لو سامح الله وما وصلج وصج نشر صورج ع الاقل عدج عذر ان نقالج نباك واكيد الي لكاه خذه صورج ونشرها وانتي اطلعين منها

حنان:مدري خايفه لان عنده محادثاتي وانا دازتله صور
سما:عادي نكري وكلبيها عليه كليله بايك التلفون ودزهم لنفسه ولوو اشك يسويها ويجي يراويهم المحادثه لان جبان ولو اجه فيبيع روحه لان اخوج وجود وحيدر يدفنونه بارضه قبل لا يكمل سالفته

حنان:قنعتيني بس بنفس الوقت خايفه لان هوة واحد نكس واخاف كلشي يسوي

سما:صح كلامج نكس بس المثله ماعدهم رجوله وما يواجهون ولو عده ذره رجوله جان ما ابتز بنات الناس هيج ..المهم يله بلا ما نضيع وقت وامشي كسري الشريحه وبيعي النقال كبالي ..وهاج نقاب خاف كلشي يصير واحد يشوفنه واحنه نبيع التلفون ولا شي..مع اني ما ظن بس الاحتياط واجب اخاف يوصل للاهل انوا جنه نبيع تلفون ويكتشفون لعبه ضياع التلفون

حنان كامت:اوك امري لله بس والله مرعوبه
سما وهي تمشي:صج مو تنسين من توصلين شوي تمثلين خوفج من ضياع التلفون كدام امج وخوفج ع صورج الي بالجهاز
حنان:حاضر عاد اذا كدرت امثل عدل وي هالرعب

سما:لا هالمره راح يفيدج رعبج راح يخليهم يصدكونج
حنان:الله يستر وكون تمشي عليهم

فزت سما من افكارها ع صوت الموبايل
وكان المتصل جوجو
سما:هلاااا والله بالكاطعه زين ذكرتيني
جوجو:هلا فيج والله اول ما طلعت الدوام اجيتي ابالي وكلت لازم اعزم نفسي ع الغده عندج..مشتاقتلج موت
سما:ياروحي والله..ياريت والله لان طاكه روحي لوحدي
جوجو:وييه لعد وين جود توقعتج راح اجحتيني وتستفردين فيه
سما:اي استفرد فيه الله يهداج عود ما تعرفين بعلاقتنه ولا ابشرج زاد حالتنه سوءا..بعد ما كام حتى يدخل البيت الا بنصاص الليالي

جوجو:يووو اخاف صكيت ريلج المزيون عين..دوم اكول شلون مستحملها وبعده مكابلها لو انا منه اهج لو اطلكها😅ومكرود صدك هج
سما:اكول انطمي وتعاي بسرعه لان راح اطك من الملل
جوجو:بالطريق

****

حنان كاعده وطاكتها صفنه .. صح من يوم الي صار وماكدر يوصلها عليوي بس بعده كلبها كارصها
وامها لحد الحين ترزلها ع ضياع التلفون وللحين ما اشترتلها تلفون عقاب لها
لان جم مره تنصحهم لتخلون صور بالتلفون لان انتوا تلفوناتكم تمشون وتشمرونها
وجم مره كلتها اذا تبون دكوا صور بالكامره وحفظوهم بالحاسبه ولا تخلون بالتلفون

بس ع كل الرزايل بس حنان ارتاحت لان صدكتها وطبعا من دره احمد وابوها هم شبعت طن رزايل لمن ملت وحاولوا يدكون ع رقمها او يوصلون للتلفون بس كان دوم مغلق لمن ايسوا

بس كان داخلها خوف حتى جامعه تمشي وتتلفت اخاف يطلعلها باي وقت
واليوم حتى مداومت وكعدت يم سكينه
مع انها لاهيه وي الجهال لعب ومو يمها ..عقلها بعقل الجاهل.. صح تحسينها مو خبله بس تصرفاتها طفوليه كلش كلش

وراح تفكيرها يوم ثاني عكب ما راحوا اهل سكينه شلون اجه اخوها بالليل وكانت سكينه وحدها بغرفتها واستفرد فيها وطاح فيها طك ورزايل وغلط  لان حجت لامها ..وسوالها رعب خطيه ..بليلتها خلاها تمشي وتهز براسها وتكول محد طكني
لمن ادخل جدي وطرده من البيت وامه ظلت ادك وتلطم وتتحسب عليهم

نزلت حدر يم امها حتى تتهرب من افكارها ..صح امها راح تستلمها بس اهون من ما تستسلم بافكارها
مع ان امها ماعندها سيره غير ولدها من يوم انطرد

نزلت للصاله وشافت امها تخابر وعرفت انه احمد
ام احمد:اسمع الحين تجي ركض وتبوس راس جدك وايده وتستسمح منه...ولا نفس الحين تجي وتطلب السماح ..لا تشلع كلبي الله يخليك والله راح اموت من وراكم

كعدت تسمع امها تسكت دقيقه حتى تسمع رد احمد وترجع تكمل واخر شي كالت

ام احمد:اتانيك ع الغده تفهم..يلا مع السلامه (سدت التلفون وكعدت تتحلطم) كلت اربي واكبر بلكي ارتاح ويشيلوني بس العكس صحيج كلما تكبرون يزيد همكم

حنان:يمه ابي تلفون مليت
ام احمد:انتي جب ولا كلمه الج عين تحجين بعد تلفونج الضاع ..الله يستر بس لا طاح بيد ناس ما ترحم والله تنشر صورج وتنفضحين
حنان بلعت ريقها وتصنعت القوه:وانا شعلي ..هوة ضاع مدري نباك..واصلا يجوز حرامي ولد حلال فرمت الجهاز وباعه

ام احمد:😏حرامي ولد حلال وين لاكيتها هاي..اكول كومي انقلعي سويلي جاي صدعت..راح يرتفع ضغطي من وراكم
حنان:انشاء الله

****

بالجامعه

جانت اسراء بالكافتريا وي صديقاتها الي توها متعرفه عليهم بالكليه واجه زميل الها وطلب يحجي بانفراد بالبدايه رفضت بس هوة ترجه منها بادب انو يحاجيها بانفراد لان موضوع خاص انحرجت وكامت وياه بس طلبت يستعجل بالحجي لان عيب وكفتهم

وجان الولد كلش منحرج وهوة يحجي: طبعا انا مرحله ثالثه وجنت اشوفج كبالي دائما وجنتي بنت كلش مؤدبه...
اسراء(اهوو شكاعد يخربط هذا):شكرا ع المدح بس اختصر رجاءا ماعدي الوقت كله وبعدين المن هالاسطوانه....

بلعت الكلمات وانحشرت ببلعومها من شافت حيدر يباوعلهم بعصبيه (لا ياربي ع هالحظ😱..يبوووي عيونه شابه نار بس لا يسحلني بالجامعه واصير خبر موسم السنه)
ماتت رعب بس لا يفشلها وماسمعت للولد اصلا شكال عينها ع هذا الي تحرك واجه تجاهم وتيبست بمكانها تريد تتحرك..تريد تشرد ما تكدر

اجه حيدر وصار كبال الولد وتنفسه سريع وصدره يصعد وينزل ويحاول يتحكم بعصبيته:خييير محتاج شي
الولد رفع حاجب:ليش منو حضرتك
حيدر وعيونه راح تطلع من مكانه: بنت عمتي وخطيبها
الولد وجهه انطه الوان:هاااا..لا بس جيت اطلب المحاضرات حتى استنسخهم
حيدر ضغط ع فكه ويحاول يهدي حتى لا يفلش وجهه ..ما جان يريد يتعارك ويفشل اسراء
حيدر:سوري بس مستعجلين رايحين للبيت
حيدر من شاف اسراء متيبسه بمكانها سحب ايدها وجرها وراه بخفه

وهيه سكتت مع ان جان ضاغط ع ايدها بقوه بس ما حبت تحجي وياه بالجامعه وهوة هيج معصب لان تدري هيه الي راح تتفشل كدام الطلاب فسايرته ومشت وياه واول ما طلعوا من الجامعه وراحوا للكراج سحبت ايدها
اسراء:انته تخبلت شلون تسحب ايدي هيج كبال الطلاب ومنو انطاك الحق تكوله انته خطيبي..شراح يكولون عليه الطلاب

حيدر كضها من وسط ذراعها وسحبها:الي كل الحق ..وراح اجي اخطبج وراح توافقين فاهمه
ودفعها بخفه داخل السياره وسد الباب وهوة صعد هم

اسراء سكتت شوي وحرك السياره :نور بعدها مخلصت محاضرات
حيدر  تنهد وحاول يهدي ورفع التلفون:راح احاجي مصطفى ياخذها

سكتت علما خلص مكالمه وبعدين التفتتله وحجت بهدوء وتحاول تفهمه وتفهم تفكيره:انته ليش مصر عليه
حيدر:لان احبج هالشي مو كافي
اسراء بعدم تصديق:انته تحجي صدك لو شنو فلمك
حيدر:وليش ممصدكه
اسراء:لان بصراحه من اول ما دخلت من المطار وانت مستلمني وكلساع تكول ازوجج وانته متعرف عني شي وصراحه انا ما اخذت الموضوع وانته تسوي هالشي حتى تغيظني وتستهزء
حيدر:وليش اغيضج..لا صدكي احبج ومن البدايه وانا جاد وما جنت اشاقه لا عبالج اضحك بس من جنتي تصديني جنت اضحك حتى اغطي ع خيبه املي

اسراء بشك:يعني تريد تقنعي انك تحبني من اول مشفتني بالمطار دكول شي معقول..شتعرف عني حتى تحبني..عشت كل حياتي خارج العراق

حيدر:لا عيني اعرفج من قبل الخارج..من جنتي كفشه والشمس صامطتج صمط وضروسج واكعه..صراحه مدري شحبيت بيج

اسراء باوعتله بخجل لان صدك جانت تفشل بالطفوله وما تخلي امها تواري صور طفولتها لاي شخص(معقوله حبني وانا بهالشكل؟؟ما اصدك):جاي تنصب عليه مو؟؟
حيدر ضحك بخفه:لا والله حبيتج صدك مع اني جنت بوكتها ما افهم شنو الحب بس جنت احب اتقربلج او العب وياج مع انج شابعتني دفر وكتل وكلما احاول اتقربلج اسحليني سحل..بربج يعني ما تسائلتي ليش انا ما اردلج الكتله مع اني جنت اكبر منج وجنت اكدر اردها اضعاف

اسراء:مدري جنت اضنك جبان
حيدر:لا وحياتج جنت مشبع ولاد المنطقه كتل واليشهد نور جنت مطلع عينها خطيه بس يمج جنت اذوب ..وحتى كتلج جان ع كلبي عسل

اسراء استحت ودارت وجهه ع الجامه وما حجت
حيدر ابتسم: اليوم اقنع ابوي واجي اخطبج

ومن ما سمع رد ابتسم بفرح لان مثل ميكولون السكوت علامه الرضا
وسكت هوة هم ما حب يحرجها..ما يريد يجازف ويحجي اي شي ويخرب اللحظه وهوة يعرفها مخبله وعنوديه
خاف يكول كلمه غلط ويخرب الوضعيه

شافت الطريق مو نفسه طريق بيتهم:وين موديني
حيدر بابتسامه شاكه الوجه:ابي اغديج ع احلى مطعم ..اليوم مستانس كلش وما بضيع هالمناسبه الحلوه

اسراء بخوف: لا والي يرحم والديك..والله امي تذبحني
حيدر:لا تخافين غده ع السريع..وعود راح اتصل واكولها السياره خربانه

اسراء سكتت ومردت
وحيدر زادت فرحته (بشاره خير صح مكالت انها تحبني لو لا .. بس تطور الوضع مكامت تلاسن مثل قبل ..ومن اكولها شي تسكت..يارب سكنهم مساكنهم وتكمل ع ما اخذها وبعدين خل اطلع خبالها وخل اطك فيوزاتها ع راحتها)

****

محمد جان يم مصطفى من دك عليه حيدر:ها شيردون
مصطفى:رايح اجيب نور من الجامعه ظاله وحده
محمد فز:لا بروح ابوك !!متاكد وحدها
مصطفى باوعلها باستغراب:اي وحدها..وشبيك فزيت هيج
محمد مسك ايد اخوه بتوسل:طلبتك كول تم
مصطفى:شنو براسك ولك
محمد:خلني انا اروح اوديها
مصطفى:انته تخبلت باي صفه تروح توديها..نسيت انك ماعدت سايق عندهم وجاي تشتغل بالشركه ..والله لو احد دره يشكون
محمد:يا اخي طلع اي حجه كلهم جنت بمنطقه بعيده من دك حيدر ودزيت اخوي او امي جانت مريضه وانا يمها واخوي وصلها..يا اخي جذب شوي لخاطري

مصطفى:محمد ما مرتاحلك..شنو براسك
محمد:ولك ما اسويلها شي بس اشوفها واحاجيها والله روحي تلوب من يوم الزعلتها..بس اصالحها والله راح اموووت..اخاف طحت من عينها وتتركني وتاخذ غيري..والعباس اموت بمكاني اذا احد خذها غيري

مصطفى: بس محمد تدري هالشي غلط ..تقبل انته احد يحاجي اختك هيج

محمد:صدكني اذا يحبها مثل حبي ماعدي مانع..حقك متدري شنو نور بالنسبه الي ..ولك هاي حلم الطفوله ولك درست وتعبت بس لخاطر عينها بس حتى اكدر اوصللها..ولك نظره منها تسوه عدي الدنيا كلها..والله اخاف عليها حتى من نفسي..دوافق بروح عزاز كلبك
مصطفى بتردد وهوة عافس وجهه انطاه سويج السياره:هاااك اخذ مع اني ما مقتنع وخايف عليك لا تنكسر ركبتك
محمد نط واكف وباس راس اخوه وطلع بسرعه

****

جوجو اول ما دخلت وشمت ريحه الطبخ:يمه دخيل كلبج شنو هالريحه والله اشتقت لطبخج ..بسرعه بسرعه صبيلي ميته جوووع
سما:وجع الناس اسلم وانتي همج كرشك..امشي انجبي وكعدي الاكل جاي يتسكر تعاي سولفيلي ع جامعتج علما يستوي

جوجو: والله يا محفوظه السلامه ع حطتي يدج..بس فاكه حلكي واباوع للصاكين وولا واحد مباوع جهرتي الخايسه.. ادري شبيه حظي مو يكولون الزركه حظها كاعد..هاي انا زركه لعد حظي وين مولي..امده وجهي لا حظ ولا جمال
سما:ههههههع لا شبيج تخبلين وسمارج يخبل
جوجو:اي اي ركعيلي بعد من يشهد للعروس.... المهم عوفج مني انتي شخبارج وي جود سولفيلي
سما تنهد وعلامات الحزن ع وجهها:كتلج من سيء الي اسوء
جوجو:ليش شكو دسولفيلي ولج

سما:وهاي كلشي
جوجو:تدرين انج ثوله ومدمغه بعد..ليش تخلين واحد مثل عزيزوه يخرب حياتج
سما:لعد ترديني اعيش حياتي ع حساب جود
جوجو سكتت شوي:سما انتي تحبين جود؟
سما وهيه مغبونه:وشالفايده احبه لو لا..النهايه وحده
جوجو:اكو فرق اذا تحبينه حاربي علمود حبج مو تستسلمين بسرعه..وترى جود مو هين واكيد لو كلتيله مراح يسكتله وهوة راح يتصرف..فليش تسوين تصرفات غبيه تخلي جود يكرهج ترى هذا غباء
سما والدمعه بطرف عينها:مو غباء بس هذا الافضل
جوجو بعصبيه خفيفه:لااا غباااء وشنو الافضل بله وانتي معيشه الرجال بجحيم..خليه لمن يتركج وياخذ غيرج وبعدين ظلي لطمي وتندمي بروحج

سما دمعت عينها:لعد ترديني اشوفه يموت احسن..انتي متحسين بالي احس وولا واحد راح يحس لانكم ما عايشين حياتي وتكعدون تتفلسفون..بس لو عشتوها جان سويتوا مثلي وازود..انتي ما حاسه شلون جان شعوري يوم شفت جود بليله عرسي سابح بدمه كرهت روحي وكرهت عيشتي وتمنيت هالرصاصه جايه بكلبي بالغلط ومرتاحه من هالعيشه
جوجو:تحبينه مو
سما وهي تبجي :اي احبه ارتحتي الحين..والله احبه بس بنفس الوكت خايفه والله خايفه ..ما تدرين شحس هني من اقهره(حجت وهيه دك ع كلبها بايد وتمسح دمعها بالايد الثانيه) احس كلبي ينمرد مرد من اشوفه مقهور مني او احس مجرد احساس انه بده يكرهني..انا قبل لا اجرحه جرح بسيط احس جاي اجرح روحي ميت جرح واتمنى اروح اركض بحضنه واضمه واكله اسفه مو قصدي والله مو قصدي..بس بنفس الوقت بداخلي خوف..جميله افهميني والله احس روحي بين نارين واي طريق راح اسلكه راح اخسر جود..احس الطريقين مقفلين بوجهي..احس روحي محتاره شسوي.. تدرين نوبات افكر بانانيه واكول خل اعيش وياه واتقربله وادفن روحي بصدره وخل الي يصير يصير ونوبات اصحه ع نفسي وابتعد..جميله والله احبه ووصلت فيني الحاله اسوي روحي نايمه بس حتى يحظني واحس بالامان..انتي ما تدرين من يقربلي شحس..احس روحي بعالم ثاني وانسه كلشي..انسه عزيز وطوايفه وانسه روحي وهلي وما اشوف بس جود كبالي بس فجاءة اصحى ع نفسي واصده وارجع لكابوسي

━━━━━━
- ٵحبـههـۂ هههــﯝايي✨😻 "
ۈربي الفۈڰهۃ والفوڱاي 💜🍿.

------🍃🍃
جوجو دمعت عينها وهي تشوف حال صديقتها وتقربتلها وحضنتها وسما تشهك وهي تبجي وكطعت كلب جميله
جوجو وهيه تمسح ع شعر سما:اهدي ياروحي لكلشي اكو حل بس اهدي

سكتوا شوي وانتظرت جوجو علما تهده سما وبعدين تكلمت:انزين الى متى تستمرون جذيه..ترى انا ادري وانتي تدرين ان جود راسه يابس وما راح يطلكج..لو يبي يطلكج جان ما صبر عليج كل هالفتره..بس هذا دليل انه متمسك فيج
سما:راح يجيه يوم ويمل
جوجو:واذا ما مل
سما بضياع:مدري مدري
جوجو:انزين ليش متبدين وي جود صفحه جديده وتفهمينه
سما:مدري اخاف
جوجو:جربتي طريقتج..هالمره جربي طريقتي ترى مابقه شي ع الشهرين
سما: انزين شسوي
جوجو:تعاي وي جود باللين وابدي صفحه جديده وفتحيله كلبج وكل مخاوفج (شافتها متردده)بطلي خوووف.. محد كوه راس عزيز الا خوفج وخلاه يستكوي عليج..خلي جود يوكف بوجهه ويراويه ان الله حق
سما:مدري احاول
جوجو طكطكت بالتلفون وبعدين ظلت تفر بالتلفون بيدها:اي مو بكيفج..ترى سجلت كلشي عندي وانطيج مهله بس يومين اذا ظليتوا ع عنادكم الا افضحج😜

سما فتحت عيونها: ايا النذله جيبيه

حاولت تسحب التلفون منها بس جوجو اشطر وسحبته:لا تحاولين وحتى لو مسحتيه ترى دزيته لطلال يعني مافيه فايده من المسح
سما كعدت بتعب:ليششش اسوين جذيه ..صوجي فضفضتلج
جوجو كعدت يمها:اشاقه وياج صدكيني ما راح ادزه والله..بس طلالوه راد يطمن عليج وكليلي سجليلي كلشي هذا كل الموضوع ..المهم خلينه بموضوعنه خل اكلج شراح اسوين ..بس اول حطي غده بطني ظلت تصوصو

****

عليوي يحاجي سوسو:😡😡نفذت منها بنت الكلب..بس شلون خطر ابالها اسوي هالحركه وتضيع تلفونها..والله ماهي هينه
سوسو:اتركها بحالها خلص
عليوي:انا الها اذا ما جبت راسها ما اطلع ابن ابوي..عبالها تخلص مني هههاااي حلم ابليس بالجنه
سوسو:شراح تسوي
عليوي:😏راح تجيج الاخبار
سوسو:😰المهم شوكت راح تمسح صوري الله يخليك
عليوي:بعدني ما خلصت منج
سوسو وهي تبجي: كافي والي يرحم والديك مو كافي ضيعتوني الله يخليك لا تفضحني وتنشر الصور
عليوي:😈بعده ما خلص دورج..وانتي الي راح اجيبين حنان بيدج لفراشي
وسد التفون بوجها

سوسو زاد بجيها وظلت تندب حظها ضيعت روحها وراح اضيع صديقه عمرها وياها

*****

محمد وكف بالجامعه ينتظرها وهوة ياخذ شهيق وزفير يخفف من توتره
طول الطريق وهوة يحاول يرتب افكاره  والحجي الي راح يكوله بس من شافها طالعه من باب الجامعه حس روحه نسه كلشي رتبله
نزل بسرعه من شافها ارتبكت من شافته
فتحلها الباب حتى تصعد بس هيه باوعتله بارتباك واضح وهيه تبعد نظرها عنه:ليش انته هنا
محمد:حيدر واسراء رجعوا للبيت ودكوا ع مصطفى يجي ياخذج
نور بتوتر وتباوع لكلشي ماعداه:ووين مصطفى وليش جيت بداله
محمد:نظل نحجي بالشارع ..صعدي واكلج

ارتبكت وخافت تصعد وياه عكب الي صار
محمد حس بخيبه امل من شاف خوفها منه وضاج من نفسه كلش..تمناها تخاف من العالم كله وما تخاف منه رادها تتخبه من الدنيا بحضنه مو العكس:نور باوعيلي
نور ترددت بس باوعت بعينه
محمد بصدق وحب:صدكيني ما راح اسويلج شي والي صار غلطه وما تتكرر
نور حست بعيونه الصدق ومحمد ايام زمان فنزلت راسها وبعدين قررت وركبت

محمد ابتسم ومشه يسوق وهوة يباوعلها من الجامه الاماميه:نوررر
نور رفعت عينها وطاحت بعينه وتحس كلبها من يوم صعدت بالسياره ما وكف دك سريع بس من طاحت بعيونه حسته وكف دقيقه ورجع يدك اسرع
محمد:سامحيني يالغاليه.. ادري زودتها بس والله من سمعت راشد خطبج والله ما ظل عقل فيني..كلت اكيد تقبلين فيه جمال واخلاق وسمعته تنحلف فيها الناس وما يتفوت غير اهله ماشالله مرتاحين ماديا ومافيه عيب وكلت اكيد راح ترحين من ايدي والله بغيت انجن الا شوي ..بغيت ادخل لاهلج واكلهم نور بس الي والله اذبحه اليكرب منها..نور ردي عليه وريحيني..كولي اي شي

نور منزله راسها وحرارتها صعدت:اناا  (اخخخ شكولك ..اكولك شبعت من امي حنه وكركه وكل يوم تعيد اسطوانه مواصفات راشد ومحاسنه ومن ايست مني كعدت ترزل فيني واني ما افهم مصلحه نفسي وغبيه  ولو بيدها جان غصبتني بس ابوي وجود وكفوا بوجها وكعدوا يفهموها.. بس كل هذا ما همني جانت صورتك دوم كبال عيني وما تخيلت اخذ غيرك.. صح قهرتني بسوايتك بالمزرعه ولهسه قاهرني بس احبك موبيدي )
تمنت تحجيله كل هذا 👆🏻تمنت تحجيله كل هذا بس ما حست عدها الشجاعه الكافيه
محمد:اي احجي انتي شنو
نور احتارت شتكول بالبدايه بعدين قررت:انا بدون تصرفك جنت راح ارفض صح راشد كامل والكامل الله بس مو هوة الي ابالي ولا فكرت ارتبط فيه والفلوس مو كلشي

محمد حس كلبه راح يطلع ابتسم بفرحه :ومنو الي تفكرين فيه
نور خدودها صارت حمر من الخجل وما عرفت ترد
ومحمد من شاف وجهه شلون حمر نسه اهله وطوايفه والشارع وصفن بوجهها ولو لا ستر الا جان دعم بس باخر دقيقه كدر يلوف السياره بسرعه ويصيطر عليها وصفط ع صفح ووكف السياره

نور:يمه كلبي راد يوكف ..ليش ماتشوف الشارع
محمد:سلامت كلبج..انشالله بكلبي كولي امين..وبعدين شلون تبيني اشوف الشارع وانتي يمي

نور استحت بس ما رادت تنطيه وجه لا يزودها:ممكن تحرك حتى لا نتاخر..وبعدين لا ادك ميانه وايد وترى للحين مناسيه الك السويته وهذا مو عذر ..
محمد حرك السياره وهوة يسمعها
نور:حسستني اني وحده رخيصه بتصرفك
محمد:حشاج والله مو بقصدي ..بشنو احلفلج حتى تصدكيني والله طلعت مني لا اراديا بدون ما افكر صار هالشي..سامحيني تكفين
نور:راح اعتبر مصار شي بس مره ثانيه لا تكرب مني اصلا وابقه بعيد مسافه احسن
محمد:تامرين بس انتي هم لا توافقين ع احد لمن اجي اخطبج انشالله بس شهر او اقل بس ادبر اموري واجي اخطبج
نور منزله راسها واصابعها تلعب باطراف الدفتر بخجل وما حجت شي
وصل محمد لبيتهم وقبل لا تنزل صاحها:نورر
نور باوعتله بدون ما تحجي
محمد:راح توافقين علي اذا خطبتج
نور رجع وجهها انصبغ احمر:تعال لاهلي ويصير خير
ونزلت بسرعه وابتسمت من سمعت محمد يحجي بفرح:يبعد طوايفي والله..استعدي يجوز استعجل بترتيباتي واجي بسرعه
دخلت نور والفرحه مو سايعتها اخيررا بعد سنين راح يتحرك ويصير الي (يارب تممها ع خير)

راحت لغرفتها بدلت وصلت وراحت للصاله الكبيره التتجمع فيها العايله ولكت حنان حاطه ايدها ع خدها ومصفنه وبدور كاضه الكتاب وتقره وزينب تسكت بنتها ودمعتها بطرف عينها ومتتحاجه

كعدت يم بدور:هذول شفيهم
بدور سدت الكتاب وتباوع ع حنان:هاي من يوم طلعت وي سما وهذي حالتها مافي شي جديد
نور تاشر ع زينب بعيونها: والمسعده الثانيه
بدور:هذي جني سمعتها متعاركه وي رجلها بالتلفون ع شنو ما ادري ..وحطت حرتها بعيلانها نعلت سلفه سلفاهم وبغرفهم يبجون
نور:اوووف البيت صاير نفسيه كل واحد عافس وجهه بجهه (باوعت لبدور) وانتي شفيج
بدور:شفيني بعد انا
نور:شفيج دوم مكابله كتب وكلما اجيت لكيتلج كاضتلج روايه وتقرين
بدور:عادي من قبل اقره
نور:بس مو جذيه جنتي بالشهر تقريلج روايه واذا صارت عندج مدرسه متكضينها اصلا..وهسه مشالله مستلمه روايه وره روايه وحتى بده الدوام وانتي مو يمه بس حاطه راسج بهالروايه

بدور بعدت عينها عن نور وباوعت لبعيد بحزن:بعض الاحيان الروايات تعيشج بعالم ثاني وتبعدج عن الواقع الكئيب والمتروس خيبات..ياريت حياتنه روايه ونكتبها مثل مانبي وتنتهي نهايه سعيده دوم
نور حطت ايدها ع ايد بدور:بدور لا تكسرج تجربه..بعدج زغيره والحياة كدامج تعيشينها بطولها وبعرضها..ليش تحجين كان عمرج ميت سنه وما راح تلحكين تعيشين مغامره..صدكيني ربج ما ينساج اكيد راح يجي شخص يحبج ويقدرج وينسيج كلشي انتي بس صبري و....

طبوا بهاللحظه حيدر واسراء وقطعت كلامها ولمحتهم نور من باب الصاله:تعالوا تعالووا..صدتكم..وين جنتوا هاااااا مو ع اساس مخلصين كبلي وطالعين😒😤
اسراء باوعت لحيدر جنه تكله رد
حيدر:وانتي شكو هااا يله انقلعي داخل ..ولا ترفعين صوتج ع اخوج الجبير و (رجع شعره ليوره ورفع خشمه بغرور) والمعرس قريبا انشالله
نور ضيقت عيونها:شتقصد
زينب قاطعتها:اسراء وين جنتي
اسراء: انا..انااا
رجعت باوعت لحيدر جنها تطلب المساعده
حيدر:تعطلت السياره وصدفتااااااا تعطلت يم المطعم فتغدينه علما يصلح الولد السياره فرجاءا راح انام ولحد يزعجنه
نور:😏صدفتااااااا
حيدر:اي صدفتاااا😉
نور:ماشي يخوي ماشي..كون زغنبوت ع كلبك ما يومممم فكرت تعزم توؤمك حبيبتك حتى لو ع جاي وكعك صدفتااااااا

حيدر طكها ضحكه:لا الصدفتا مو لكل ناس😂 (باوع لاسراء بطرف عينه)بس للناس الاعزاز
اسراء استحت وما كدرت تحجي خصوصا رينب موجوده فتركتهم وصعدت لدارها
نور نكزته بكتفه:اكول الغده الصدفتااااا عاد غزر لو لا
حيدر حط ايده ع قلبه:لا جنه غزر يبوووي شوكت ازوج
نور:اثكل شوي اثكل البنت متحب الخفيف..تحب الرزن والعاقل
حيدر:هيه خلت بيه عقل..خبلتني ولج
نور:هوة ناقصك انته..ولي عن وجهي اروح ازقنب ميته جوع..( طلعت ورجعت مدت راسها)كون ما تتهنه بهالغده ويكعد ع معدتك
حيدر:دولي دولي اصلا تهنيت واسرسح على معدتي تسرسح..اصلا احلى غده بحياتي😇
نور عفست وجهها:ماتستحون
وفرت وجهها ومشت
حيدر راح يم بدور:مرحبااا بدور
بدور وهيه كاضتها العبره من سمعتهم:مراحب
حيدر:شلونج شو هالايام ما اشوفج ما جنه تقريبا نفس البيت ما يفصلنه بس باب..قبل جنتي دوم بجهه بيتنه هسه ما اشوفج بس بصاله جدي

بدور صفنت بوجهه(قبل جان عدي امل اذا ظليت كبال وجهك راح تنتبهلي وتنعجب بيه بس هسه غسلت ايدي )
بلعت ريقها وتحاول تكتم دمعتها:زينه بس مشغوله بالتحضير للمدرسه وبعدين لهيت بالدروس..يله عن اذنك اروح احط الغده وياهم

~~~💔💔~~~

• ‏باردة عيونك عليـةه ؛😢
• ﺂنـةه حارگ روحي ليش ؛🔥

~~~💔💔~~~

حيدر:لحظه بدوره..وين جدي
بدور وهيه تتوجه للباب:بغرفته

حيدر:شكرا
وراح لجده واتفق وياه وره الغده ينزل يقنع ابو يخطبله

*****

عزيز وهوة يشرب:هااا ابراهيم شنو الجديد
ابراهيم:عليوي ناوي ع نيه كشره لحنان..وميه بالميه جايبها لشقته
عزيز ابتسم ابتسامه جانبيه:اعرفلي شوكت وكلشي بالتفصيل حتى وين ويا يوم وحتى بيش الساعه..ابي تفاصيل دقيقه

ابراهيم:شتريد تسوي..لا تخرب السالفه ترى والله ابوك يذبحك..ياله رضه عليك هوة
عزيز يهز الكاس والثلج يطكطك بالكاس :ميهمني ابوي وكل خططه الفاشله اهم شي عدي سما
ابراهيم:شدخل سما بسالفه حنان
عزيز:لا الها دخل ونص لان بهاليوم سما الي راح تنتهي مو حنان..انطيتها مهله تطلك بس الظاهر تماطلني ومجاي اسوي شي..بس بعدهي متعرف عزيز عدل ..راح تتركه برضاها لو غصبا عنها😈

ابراهيم بخوف: لا تدخل بسالفه حنان ..اخاف تخرب وشيفكك من ابوك و
عزيز بعصبيه:كتلك ميهمني فلا تلطش وروح سوي الكتلك عليه ..بعدين انا لا راح اروح ولا شي مجرد جم تلفون وانا بمكاني وتخلص السالفه

****

خلصوا غده وتجمعوا بالصاله يشربون جاي بيهم المرتاح واليضحك واليسولف وبيهم المهموم ومو يمهم وسارح بفكره

وحيدر كاعد وكلساع غمز لجده وياشر ع ابوه يريد يفتح الموضوع والجد مغلس
حيدر:حجيييي ابو علي توكل
ام جود:شرايد من جدك
حيدر:هوة يعرف..يله حبيب كلبي شمنتظر مو روحي طلعت
الجد ضحك بخفه:وشبيك مفلفل
حيدر:وبعد مسلوك جد جدي مو بس مفلفل
الجد ضحك وباوع لابو جود:ما ناوي ازوج الولد
ابو جود:لا يبه بعد صغير ..خل يكمل دراسته
حيدر:عادي يبه والله ادرس واشتغل
ابو جود:وين تلحك انته بدون شغل وبالدفرات تنجح
حيدر:اهووو والله حرت وياك..لعد اصرف عليه وع مرتي
ابو جود:انجب ولك لعد شدورك انته
حيدر:يببببه عفيه ابي ازوج ليش مو حاس فيني
الجد:يولدي زوجه هوة يشوف حتى الاصغر منه ازوجوا حتى هوة يغاااار
حيدر يباوع بنص عين لابوه:اي والله اغااار يبه كل واحد مرته بحضنه وما حاس بالعزوبيه😒

ابو جود:😒شبيك تباوع هيج
حيدر:😒هسه تقبل امنعك تزوج امي..جان انسلكت سلك لو بعدت عنك دقيقه لعد ليش ما تحس بيه
ابو جود:انته ليش صاير قليل ادب وطالعه عينك
حيدر:الله واكبر صار اليبي يكمل نص دينه يطلع قليل ادب

الجد:يا اخي هذا احمد ازغر منه وازوج
ابو جود:احمد حاله خاصه ولو ما سواته جان ما زوجناه
حيدر كام وكعد يم ابوه ويتكلم بغيض:يعني شلون يعني لازم اسوي مكسرات مثل حجي احمد واخطف البنيه ياله تقبل
ابو جود:ايااا قليل ادب انقلع عن وجهي
باوع لاسراء صار وجهها ما يتفسر وركع السالفه:اشاقه اشاقه جدي احجي فدوه

الجد:ياولدي ترى الزواج ستر للبنيه والولد هم ومدام شايف روحه محتاج يزوج ويريد شي بالحلال ليش ما نزوجه!!احسن من ما يروح للحرام
ابو جود:مدري افكر

حيدر كام ع ركبه وهوة شابك ابوه صفح ويبوووس بصلعه ابوه :يبه اروح فدوه لصلعتك وافقر
ابو جود يحاول يدفعه:وخر عمه بعينك
حدر وهوة يبوس صلعه ابوه بخبال ويطلع اصوات وهوة يبوسها بقوه:تكفى يبه كول تم..عساني فدوه للمعه صلعتك بس
ابو جود:انزين وخر
حيدر كعد والبسمه شاكه الشكر:يعني وافقت
ابو جود:اي بسس
حيدر:الله يستر كمل شنو بس
ابو جود:بس خطوبه ماكو عرس لمن تتخرج
حيدر:يبببه وااايد
ابو جود:هذا العندي عجبك عجبك ما عجبك بطل
حيدر:لا فديتك خطوبه خطوبه ولا ماكو شي ع الاقل نمزمز لمن يفرجها الله
ابو جود:ايا ماتسحتي وكبالي بعد..لعد ماكو طلعه وطبه بالخطوبه كلشي كبال عيني
حيدر:لااا يبههههه تكفى ..مو جذيه عاد اسف والله جاي اشاقه
التفتت من شاف اسراء مستحيه وشردت من المكان وابتسم(يمه فديت الخجلان..اخخخ بس صيري حلالي وانا اعلمج اطلع ظيم كلبي كله )

التفت لابوه وهوة ما انتبهله شحجه وتكلم بصوت ناصي :يببببه فديتك دك الحديده وهيه حاميه
ابو جود عقد حواجبه:شتقصد
حيدر ياشر ع عمته:اخطبها من عمتي عفيه
ابو جود:عيب يولدي بعدين نخطبها باصول
حيدر:يبه شيصبرني والله كلبي موجر ترى ارتكب جريمه ومعلي
ابو جود:انته شفيك مشفوح وجنك مشايف بنات
حيدر:وهذا الصج يبه وين شايف انااا.. يله يببببه
ابو جود:اللهم طولك ياروح
حيدر:عمممه ابوي يخطبني لبنتج ومستحي قصدي يخطب بنتج الي..تكفين عمه لا تردينه
ضحكت عمته ع خباله: لا والله الغالي مينرد
حيدر بفرح:صلوات ع محمد ..اجل نقره الفاتحه..(كفخ نور اليمه)هلهلي يمال الوجع انتي هم منحسبه عليه اخت
نور: وجع متعرف تطلب بادب بس لخاطر العيش والملح راح اهلهل كلللللوش
ابوجود:عمه بعينك اي والله تخطب لروحك لعد انا مالي لزوم المن جاي تقنعني جان خطبت وبعدين كلتلي
حيدر كام باس راس ابوه:فديت لمعه صلعتك اسف والله بس مستعجل يبه ..تكفى فديت هالشارب مشيها واقره الفاتحه

خل نترك الكبار يتكلمون ونشوف الواكفه يم الباب وطايره من الفرح ما توقعت حيدر جذيه يحبها وتعلقت فيه بسبب تمسكه فيها صح جانت معجبه فيه وبروحه المرحه بس جان كبريائه يمنعها تعترف بهالشي بس تمسكه فيها خل الاعجاب يتحول لغير شي

****

سما قررت صح تبدي صفحه جديده وي جود وتسمع نصيحه جوجو..لان صدك تعبت لشوكت اظل بهالرعب والترقب

فدخلت سبحت ولبست سيت نوم قصير وقررت تفاجأة وخل شما يصير يصير
لكن جود ما رجع صار ب ١٠ بالليل وهوة بعده لان متعود يرجع متاخر من وره نكد سما
سما(يوووه راح انعس وهوة بعده. ماكو الا اني اتصل فيه)

عند جود جان يفر بالسياره ويمه سلطان
سلطان:يا اخي ترى نعست..هذي ماهي حاله كل يوم ساحبني معاك تفر فيني ليكول جيس طماط ..ترى انا عندي ام تبيني
ظرب ع جبينه :ع طاري امي وصتني اجيب مسواك للبيت (يتلمس جيوبه)وين حطيت الورقه

طلع غراضه من جيوبه واخيرا لكاها ببطن الجوزدان وخله الجوزدان ع حافه مقدمه السياره
سلطان:اكول بدال هالفره المالها داعي ودني مول او دكان او اي شاي فاتح الحين

جود مسح ع جبينه:شكد تكرك انته..صدعت راسي
سلطان:يا اخي شجابرك فيني ودني لامي
جود:مالت عليك شنو ودني لامي دلوع امك انته صير رجال واسكت
سلطان:يعني ما اصير رجال الا لما اتاخر ع البيت..اكول طير امي مريضه واخاف عليها
جود:انزين انطم هسه ارجعك..ما تنعطه وجه وواحد يطلعك ويرزك
سلطان:هسه انته طافش من مرتك انا شعلي مفرفرني وياك
جود التفتله بسرعه:شدراك طافش من مرتي
سلطان:سهله ما يطفش الرجال من بيته الا المره..والله انها كفوا تشوفها نتفه وضعيفه بس بيدها تنكد ع ام ام الجابتك واطفشك من ثيابك هم وما تكدرلها
جود:سد بوزك احسن مطافش من احد😒بس ضايك خلكي

سلطان:اكول شوف تلفونك صارله ساعه يلمظ وانته حاطه صامت..بله احد احتاجك بالبيت ولا صار شي شلون تعرف

شاف رقم سما وتافف (هاي اكيد جاي تلوب اليوم كله ما تعاركت..امس تاخرت وما رجعت الا بالوحده والله ياخذ عدوها ما لكيتها الا بوجهي تنافخ وحكرتها ولحكتني لغرفتي همزين سديت الباب بوجها وافتكيت ..اوووف منها اعرف روحي اذا رديت عليها وطولت لسانها راح اعطيها كف الف وجهها بس ادري بعدين راح اكعد اتندم وكلبي يعورني عليها فاحسن اسلوب وياها هوة التطنيش..هه بس والله حلو وجهها وانا احكرها احسها تحترك حرك)

رجعه للواقع صوت سلطان:رد اخاف شي مهم..وهيه ابحدها بالبيت
جود:(هم صح واذا طلعت جاي تخبث وتتعارك اسدها بوجها)
صفط السياره وكل لسلطان ينزل حتى ياخذ راحته بالحجي..صح سلطان صديقه بس مايبيه يطلع ع كل مشاكله وخصوصياته

نزل سلطان واتجه ع خلفيه السياره
وجود رد بدون نفس:نعمممم
سما بصوت هادي وناعم:شلونك
جود:هااا
سما:كلت شلونك
جود عقد حواجبه ورد بصوت مبين فيه التعجب:الحمدلله (من شوكت هاي تسال ع اخباري)
سما:وينك
جود:جاي افتر وي صديقي
سما:هااا سلطان وشوكت ترجع
جود:مدري ليش تسالين
سما بدلع:لا جذيه بس اشتكتلك
جود ميت علامه استفهام ع وجهه:هااا؟؟العفو منو انتي
بعد التلفون عن اذنه شك ان وحده ثانيه تحاجيه وتاكد من الاسم ورجع يكلم
سما:شفيك اكو غيري انا مرتك حبيبتك تحاجيك
جود رفع حواجبه بصدمه:انتي شاربه شي..اخاف جابوا شي للبيت بالغلط وانتي شربتي
سما ضحكت بدلع:لا بس مشتاكه لرجلي حبيبي..فيها شي
جود فهها :هاااا
سما:شفيك راح انتظرك ع احر من الجمر

سدت التلفون وهوة ظل فاتح حلكك ويباوع للتلفون بصدمه (لو انا جاي اتوهم لو هاي لعبه جديده منها لان تعودت ع لعباتها بهالايام حتى اطلكها تاملني وبعدين تبتعد وتستهزء...اي ماكو تفسير الا هالشي ولا هالدلع ما يطلع من سما..مستحييييل....سكت شوي يفكر....🤔انزين واذا صج وجاي اتانيني ..خل اروح شراح اخسر واذا لعبه انعل خيرها غييير)
حرك السويج وشفط بالسياره وطلع بسرعه ونسه المكرود الوراه
سلطان علما استوعب حاول يصيحله بس ماكو ابتعد:من كل عقله هذا😦..اخخخ يالقهر فوك ما مضيع وقتي وافتر وراه علمود حضره جنابه ترتاح نفسيته يجدعني بنص الشارع ..(عض ع ايده) انا صوجي الاثول الامشي وياه ومتحمل مغثته...اخخخ المصيبه ع كل ثكل دمه بس احبه..ليييش؟؟؟ما ادري
راح وكف ع الرصيف يتاني تكسي وتوه يريد يوكف تكسي تذكر الجوزدان بالسياره ضرب ع جبينه:لااا والقسمه..شهاليوم المصخم بيا وجه مصبح ياربي ..اوووف شيرجعني للبيت مشي

****
هلووو
شلووونكم يالربع✋🏻
رمضان كريم عليكم وينعاد عليكم بصحه وسلامه

بعدها احد متابعني لو طفرتوا😂😂
طبعا انا ما جنت اريد انشر برمضان بس كلت خل انشر هالبارت مابيه شي قوي
والبارت الوراه كاتبته ومخلصه بس صراحه واكفه انشره برمضان وبيه شوي عيب🙈
لذلك راح انشره بالعيد انشالله