رواية لأجل من احببت سأكون قوية الفصل الثاني عشر 12 - بقلم امل

مر بينه أوخذاك الموت وتعده😔
يا موت أعلى هونك سيفك شحده
احباب اوكعدنه اوكلنه ملتمين
طبيت واخذته وخربت الكعده
تطب دومك غفل يمفرق الاحباب
وتخلي الناس كلمن دمعته بخده
شاهر سيفك وتفجع بالولايات
ولا فد يوم سيفك بايت بغمده
ياموت أعلى هونك تدري بينه ضعاف
لو ماتنه واحد حيلنه يهده💔
وياموت البشر من عاطفه اوحساس
من دم ولحم مو من صخر جبده
ولوماتنه ميت مو سهل ننساه
تذوب أرواحنه وتتكطع الفكده😔😔

‿ٍ➶⁀➷‿➹⁀➷‿➹⁀➷‿➹ّ⁀ً➷

نور زاد قلقها وراحت اتصلت ع  جود
نور:الووو جود..تعال الوضع مدري شبيه
جود:خير شصاير
نور:عمي ابو احمد اجاه اتصال وظل يبجي ويصيح جذاب ما ماتت
جود فهم السالفه شوي:اوكي سديه وانا اعرف السالفه

جود غمض عيونه :يارب الي ابالي مو صحيح
اتصل ع عمه
ابو احمد وهوة يسوق: الحك عليه جود..هذا الموضف الغبي يكول ماتت..هيه ماتت انا قبل كم ساعه يمها وما بيها شي..شلون ماتت هسة
جود:اهده عمي..انا دقيقه واجي

ابو احمد وصل ونزل من السياره يركض:يارب ما ماتت..يارب تشابه اسماء

جود طلع من المكتب بسرعه وصاح عليه سلطان  ومارد وطلع

شخط بسيارته وطلع ودقايق ووصل للمستشفى
ووصل الخبر لابو علي وابو جود وكلهم اجتمعوا كبال الدكتور

ابو احمد:كول الخبر جذب..راح اسامحك اذا خبر كاذب والله ما راح اشتكي عليك
جود:عمي اهده خل نفهم
ابو علي:تكلم دكتور
الدكتور:صراحه الحاله غريبه..كانت بخير وماكو شي يدل ع موتها الغريب وماكو انتكاسه اصلا..فجاءه دخلت الممرضه لكتها ميته

الجد عقد حواجبه:غريبه
الدكتور:يجوز امر الله
الجد:والنعم بالله..جود روح جيب سما خل تشوف امها قبل لا ندفنها
جود:حاضر يبه

وراح جود لبيتهم والجد وابو احمد راحوا لجثه ام سما يستلمونها
وابو احمد انهار لمن شافها وظل يبجي بهستيريا
ابو احمد:ليش اتركيني هسة..جنت اتمنه اعوضج عن كلشي صار.. بعدني مالحكت اشبع من شوفتج..ما شفتي وياي الا العذاب ويوم ردت اعوضج رحتي ليشششش..انا انا اسسسف ع كلشي

الجد:اهده يوليدي هذا امر الله..وانا متاكد انها سامحتك فلاتعذب روحك
ابو احمد وهو يبجي :ادري سامحتني لان فاطمه واعرفها كلبها جبير..بس يا يبه شلون اسامح نفسي..كل ما اتذكر انوا خلود جانت تضايكها وتقسي عليها وبعض الاحيان تضربها وانا ساكت..احس كلبي يتكسر ويحترك..يبه جنت اتوقع اذا لكيتها راح اعوضها عن كلشي وراح اسامح نفسي..بس ماكدرت اعوضها.

***

وصل جود للبيت بس ماكدر يدخل غرفتها ولا كدر يكولها فراح لاخته نور وكلها كل شي..وحزنت نور عليها هواي وراحت حتى تخبرها واول ما دخلت نور لغرفت سما

سما: همزين اجيتي انا محتاره شاكتب بالبطاقه..انا ابالي بيتين شعر بس محتاره ياهو احط سمعي وانتي كليلي شحط

سامحيني 😪
بداعة الله
خاف صوتي بيوم عليته عليج 😥
سامحيني...
بكثر مازعلتج اني 😔
بكثر ماصحتيلي وينج.. وآنه اتعاجز اجيج 😢
سامحيني •••
الجنه صعبه 😓
وما افوتلها اذا ما ابوس ايديج😍

لو هاي:

‎‫ارد اسولف ع امي..‬
‫👵‬
‫🏻‬
‎‫امي جنة الله يكول........‬
‫😌‬

‎‫امي علمتني الاصول........‬
‫❤‬

‎‫امي بيهة الخير اشوف......‬
‫😌‬

‎‫امي كعبة وبيهة اطوف.......🕋‬
‎‫امي دكتور ودوة......‬
‫😷‬

‎‫امي اعز من الهوة.......‬
‫😍‬

‎‫امي ماتعرف حقد......‬
‫☺‬

‎‫امي احلة من الورد........‬
‫🌺‬

‎‫كون احول عمري الهة........‬
‫☺‬

‎‫وكون اموت اني قبلهة‬
‫✋‬
‫🏻😐‬
‎‫امي من نجوع ناكل من اديهة......‬
‫😍‬
‫.‬
‎‫شكد احب سوالف امي.......‬
‫❤‬

‎‫من رحت فدوة الحجيهة‬
‫😍‬
‫😘‬

‫سما:انا رايي احط الاولى احلى لان لايكه بما اني مزعلتها..وانتي شرايج..فديت امي اكيد راح تفرح بيها😊..من هسة كاعد اتخيل ردت فعلها من تشوف الهديه وتقره البطاقه..اكيد اول شي راح تفرح وتحضني.. وراح تعاملني مثل قبل وما تبعدني عنها.تصدكين اتمنه اروحلها هسة بس اكتب البطاقه واروحلها‬

‫نور وعيونها انترست ادموع وطلعت وهي تبجي‬
‫وجان جود واكف يم الباب ويسمع كل شي‬
‫نور:ما اكدر اكولها ما اكدر..‬
‫جود:خلينه ناخذها هسة وبالطريق نكولها‬
‫نور:الله يستر بس..انا خايفه عليها..هيه متعلقه بامها هواي وعندها بالدنيا كلها..وهيه اصلا متحمله الكعده ويانه لخاطر امها..بس لايصير بيها شي لو درت‬

‫جود تنهد:اتانيكم بالسياره لا تتاخرون‬
‫نور:انشالله‬

‫***‬
‫ببيت مصطفى سايق جود‬
‫مصطفى:محمد صارلك سنتين وانته متخرج وكاعد متى ناوي تشتغل‬
‫محمد:يعني هوة بيدي ما خليت شركه ما دكيت بابها ومحد قبلني..مع انا طالب متخرج بامتياز بس محد يريدني لان ما عندي خبره..يعني بله اذا كل واحد ما رضة يشغلني شلون اصير عندي خبره..ماتسوه روحه الخارج علمود الدراسه والمصاريف‬

‫مصطفى:كلها هيج حالتها الا لمن تلكالك واسطه ياله تتوظف..حتى لو شهادتك احسن شهاده..انا راح احاول الكالك وضيفه..اذا سمعت اكو وضيفه شاغره راح اكلك‬

‫محمد:شالفايده هم ما راح يقبلوني‬
‫مصطفى:لا استاذنه خوش استاذ وما يمشي بالواسطه..صحيح عصبي وبسرعه ينفعل بس كلبه طيب‬
‫ محمد:ما اريد اتامل ع شي مايصير‬

‫**‬
‫وبدلوا وخلصوا وطلعوا‬
‫وطول الطريق كانوا ساكتين وسما حاضنه الهديه وتبتسم وكان جود يراقبها من المرايه وحزنان عليها وحاير شلون يفاتحها بالموضوع‬

‫وصلوا وقبل لا تنزل سما حاجاها جود: سما،لازم اكولج شي قبل لا ادخلين..(سكت دقايق ما يدري شلون يبدي) ‬
‫(هسه انا شلون اكللها بله بطريقه حلوه وبدون ما اصدمها..انا طول عمري دفش ودايما اجرحها بدون قصد..بس هسه لازم انتقي الفاظي..ولازم اواسيها..بس شلون اواسيها ما اعرف..عمري بحياتي ما واسيت احد)‬

‫نور انتبهت لسرحان اخوها وعرفت انه ما كادر يكولها فقررت هيه تكوللها: سما انتي وحده مؤمنه بقضاء الله وقدره..وتدرين كل واحد ويومه.. وامج ..‬
‫سما شهقت وبدت تفهم بس ما مصدكه والدموع بدت تتجمع بعيونها: ش ششتقصدين..(وكعت الهديه من ايدها) لا مو امي..‬

‫وعافتهم وركضت للمستشفى وهمه لحكوها‬
‫ دخلت للغرفه وما لكت احد بيها وزاد رعبها وراحت تركض للدكتور‬
‫سما وهيه مرعوبه:امي وين‬
‫الدكتور: اسف بس الاعمار بيد الله..وو‬
‫سما ووجها صار اصفر ودموعها ع خدها:انته جذاب ..اي اكيد جذاب ‬

‫وحست براسها يفتر وطاحت مغمى عليها وبسرعه الدكتور راح شالها وحطها ع السرير وبده يفحصها ‬
‫ودخل جود وشاف الدكتور من شالها وراح ركض لها :شبيها شصار‬
‫الدكتور:هيه بخير بس ما تحملت الصدمه..تحتاج شوي راحه‬

‫بعد ساعتين كعدت سما وشافت نور كاعده يمها
‫سما حاولت تذكر الي صار:يمه..عفيه كوليلي الي صار حلم وانا هسة صحيت‬
‫نور نزلت راسها بحزن:هذا امر الله..انا لله وانا اليه راجعون‬
‫سما ودموعها تصب وصوت شهقاتها علت: يمممممه لا يمممممه مو معقوله اتركيني لوحدي..شلون اعيش بدونج وانا ماعندي غيرج..ليش ما فكرتي بيه ..ياريت انا مت قبلها ولا اشوف هاليوم‬
‫نور ضمت سما لحظنها:لا تسوين هيج..انتي تعذبين امج بهالكلام ترحميلها احسن ‬
‫دخل الدكتور بهاللحظه : صح كلام الاخت ما يفيد البجي‬

‫سما وهي لازلت تبجي:انا بس اريد افهم هيه ما بيها شي شلون ماتت..انته كتلي  انها بخير‬

‫الدكتور:شكلهم بعدهم ما كلولج ان امج مريضه بمرض خبيث (شهقت سما وحطت ايدها ع حلكها واكمل الدكتور حجيه) ويجوز امج انصابت منه بسبب بروده الجو او الرطوبه ..يجوز بده مرضها باعراض كالافلونزه وكحه عاديه وبسبب عدم علاجها بالوقت المناسب زاد الوضع سوء‬

‫سما كانت فاتحه عيونها بصدمه وعدم تصديق ..امها كانت تعاني وتتالم وهيه كانت عايشه حياتها وفرحانه وما تدري عن شي..كعدت تلوم بنفسها وتسب بروحها‬

‫سما وهي تشهق من البجي وما تكدر تحجي:لااااااا  انتوا جذابين(حطيت يدينها ع ذانها وكورت نفسها)جذابين ..ههههع انا بحلم ااااي ا اكييد ح حللللم..اي هسه اصحه والكه امي كبالي‬
‫نور حضنتها:كافي اترجاج لا تسوين بروحج هيج‬
‫سما وهي تقطع بالكلام بسبب شهيقها:ا امي يا نور هذي امي ..ش شلون ..تر ترديني اهده.. انا مو خوش بنت..اممي كانت ت تعاني ووتتالم وانا ما ما ااادري عن شي..ااانا غبيه..ب بداال ما اوكف ويااها وادعمها ججنت فرحانه وووياكم..و ولا ببعد سسويت حفله ل لخطوبتي..اخخخخخخ يمه اخخخخخ سامحيني يمه..اااه

‫جود جان واكف يم الغرفه وسمع بجيها  وعرف انها كعدت بس ما كدر يدخل ما يكدر يشوفها بهالحال رجع راسه لوره وسنده ع الحايط وغمض عينه وظل يسمع بجيها ..جان يريد يروح يواسيها ويحاجيها بس جان اكو شي يمنعه

بعد نص ساعه دخل جود لغرفه سما وشافها وهي بحظن نور وبحاله لا
يحسد عليها‬

‫جود تنهد:امشوا نرجع للبيت سما هسة صارت زينه وماكو فايده من ظلتنه هنا..وبعدين العزا بده ولازم نحضر‬

‫سما ناظرته بغضب:انته السبب‬
‫جود رفع حواجبه باستغراب:هااا‬
‫سما:انته جذاب..وانا صوجي صدكتك‬
‫جود عقد حواجبه :شنو قصدج‬
‫سما ونبره صوتها مهزوزه من البجي:انا جم مره سالتك عن مرض امي وانته جذبت عليه .انا جان كلبي حاسني بيها شي بس انا الغبيه صدكتك..لو كايلي انها مريضه..جان جان عالاقل ما تركتها .. او ج جان م مازعلتها قبل ما تتمووت‬

‫تقدم جود وصار كبالها:لو دريتي يعني شراح يفرق..بس راح تعيشين بحزن وكابه ودموع‬
‫سما عصبت من برود اعصابه ودفعته من صدره:انته شنو! ما عندك احساس..انته واحد بارد وماتقدر مشاعر الاخرين..واحد مغرووور..(بصريخ) اكرهك اكرهك واكرهكم كلكم..كلكم جذابين‬

‫وظلت تضربه ع صدره وتدفعه  وحاول جود يهديها ويمسكها وبالاخير حضنها لصدره‬
‫جود:اهدي .. ‬
‫حاولت تبعده عنها بس هوة ضمها بقوه وبالاخير استسلمت وضلت تبجي بحظنه..هيه جانت بحاجه هالحظن حتى يحسسها بالامان..مع ذلك ظل الخوف يلازمها لان من وجهه نظرها هسه ظلت بهالحياه بدون عائله ..لان هيه لهسه ما تقبلت انها صارت عدها عائله غير امها‬

‫ووصلهم جود للبيت واول ما دخلت سما شافت ابوها كاعد ع القنفه وهموم الدنيا ع راسه..من شافها تقدملها حتى يحظنها ويواسيها..بس هيه حطت ايدها كباله ومنعته انه يحظنها وناظرته من طرف عينها  نظره ما فهم معناها هل هي لوم لو كره لو احتقار..وحز بخاطره ان بنته لهسه تكرهه وتلومه ع كل الي صار..بس هو كان فاهمها وعاذرها لان هوة هم يلوم نفسه ع الي صار‬

‫ابو احمد نزل راسه بحزن: انا ادري اني انا السبب بكلشي..بس والله ندمان ع كل شي..وكلبي يتكطع مثل كلبج ع فاطمه..والله لو بيدي جان سفرتها للخارج وعالجتها بس كان الوقت متاخر ع علاجها‬

‫سما:ومنو السبب بمرضها اصلا..لو انت ما تخليت عنها جان ما صار الي صار..لو دورت عليها لمن طلعت جان لكيتها..بس انت لكيتها فرصه حتى تفتك منه وتتفرغ لست الحسن والدلال..لو ما طالع كبالي احسن..لو ظاله ع فكري انك ميت جان احسن..ياريتك ميت ولا....‬

‫قاطع حديثها لمن كض جود ايدها ولفها اله وعطاها كف.. توسعت عيونها وظلت واكفه تستوعب الي صار‬
‫جود:انتي شنو حسبالج بس انتي تتالمين شوفي ابوج وشوفي حالته..مو كافي الم فقدان مرته هنوب بنته تجرحه..انته شنو ما عندج احساس‬

‫دفعت بعيد عنها:شوف منو يحجي عن الاحساس الاستاذ الكريم جود(ابتسمت بسخريه من قهرها ورجعت لتعابيرها المعصبه)انته اخر واحد تحجي عن الاحساس اوكي‬

‫ابو احمد بهدوء:يا بنتي انا..‬

‫قاطعته بانفعال وصراخ:لا تكول بنتي..انا مو بنتك.. ولا بنت احد وهذا مو بيتي .. انا بيتي هناك ببيتنه القديم انا وامي..لو ما اجيت انته جان عشنه بسعاده..بس انته خربت كلشي..انا اكرهك واكرهم كلكم..كلكم ما اريدكم انتوا مو اهلي‬
‫وجلست ع ركبها وهي تبجي وبصوت متقطع:انتوا م مو اهلي..ااااه يمه وينج اخذيني من هنا‬

‫جود جرها من ايدها ووكفها:تبين راشدي ثاني حتى تصحين..ترى انا ما عندي مانع اضربج واكسر اعضامج الى ان تصحين‬
‫سما:وخر عني‬
‫وراحت ركض لغرفتها‬

‫نور:ليش سويت هيج جود..صحيح هيه غلطت بس هيه بحاله صدمه ومو بوعيها..وهيه معذوره شما اسوي..وانته لازم تهديها مو تزيد الطين بله‬

‫جود:تستاهل.. الي بحالتها من الصدمه لازم ما تكدر تنطق بكلمه..اما هاي عكس الناس من تنصدم يطول لسانها‬

‫تنهد ابو احمد:مهما يكون ع كيفك وياها وتحملها..انته ر......‬

‫ما كمل كلامه من شاف سما نازله وتجر شنطتها وياها الكل ناظرها بصدمه‬

‫جود رافع حاجبه وكتف ايدينه ع صدره :ع وين انشالله‬
‫سما:انا مالي كعده هنا..اريد اروح بيت خالتي ام طلال..هسه همه  هلي‬ وبس

‫جود بابتسامه جانبيه:نعم عيني. عيدي ما سمعت .. اصحي يا بنت ، انتي هسة مرتي ع سنه الله ورسوله..وما اطلعين من هنا بدون شوري..فروحي بكرمتج ورجعي الجنطه لا انا اصعدج غصبن عليج ‬

‫نزلوا بهاللحظه حنان وبدور ومو فاهمين شي من هالصراخ‬

‫سما :بس..بس انا ما اريدك..شلون تقبل تظل وي واحد ما تريدك وكارهتك وما تواطن شوفتك‬

‫حز بخاطره الي كالته وكره نفسه لان هوة منجذب لوحده كارهته..ومع كل كلامها مو كادر يكرها(شجنت متوقع منها..كل البنات نفس الشي..صوجي انا الغبي ما اتعضت من قبل..ليش من احاول اكرها ما اكدر..معقوله احبها!!! لا مستحيل احب..الحب مجرد ضعف..وانا مو لازم اضعف..لازم اقسى)‬

‫جود تقدم منها وبصوت ناصي ما سمعته بس هيه وببرود:عادي اصلا انا ما ادور حب..لو ادور حب جان ما خذتج لان مستحيل راح احبج..بس تدرين يعني الواحد لازم يتزوج علمود يستمر النسل  لا اكثر‬

‫سما ناظرته بصدمه ومو مصدكه وقاحته( حتى بلحظات حزني يجرح فيني ويستهزء ويحجي عن نسله بكل وقاحه..عالاقل بس بهالفتره اوكف وياي وواسيني.. محتاجه احد يضمني ويطبط عليه ويظل يمي ويحاول يفرحني وويوخر حزني مو العكس..اذا زوجي ما سوه هالشي لعد منو يسوي(نزلت راسها للارض بحزن) انا ليش دوم هيج حظي..ما رزقني الله حتى زوج مثل الناس ..بس ما راح اظل وياه لو اموت)‬

‫رفعت راسها باصرار وناظرت بعيونه بتحدي : طلكني ما اريدك