رواية لبوة على شفا الثار الفصل الخامس والعشرون 25 - بقلم Leo Alfatlawi

لبوة على شفا الثأر بقلمي: leo Alfatlawi بارت الرابع والعشرون ويبقى داخل الروح شيء لا يترجمه حبر ولا يستوعبه ورق. بعض الشعور لا بوح يكفيه ولا حرف يحكيه. فقط خُلق ليسكن داخلنا دون أن نخبر به أحد. قمت أحس رجليّ متعّبتين، جسمي كمشته الرجفة، صوتي راح، كوه حجيت: "منو الكتل أهلي؟ "عاشق، منو الذبحه؟ "ما أعرف، ناي."

"جذابة، تعرفي. لحن وروح الراحت جوه التراب، إذا ما تكولين أنتي مو أختي، وإلا أعرفج بعد، حتى عنواني أضيعه، وأحسب الله ما خالقج من الأساس." "ناي، ما عندي غيرج. بعد ما أتحمل. كافي الشفته. جانت لخاطر ماما كل ما أشوف دمعتها وخوفها عليج أتحمله وأكول ميخالف. بس هسه المن ضاله؟ بس للكتل والشغل والأهاين. ولج صار يومين شامريني بالغرفة بدون أكل، حتى جهازي كوه جابته بيبي إلي." "منو كتلهم؟ أحجي وأني أطلعج مناك." "والله ما أعرف."

"روحي لحن، لا تتصلين. دبري نفسج." "لا لا، انتظري ناي. ناي وروح عاشق ما أعرفهم. وحتى لو عرفت، مختطفات! أنتي ما تكدرين لهم ولا راح تسوين شي، بس اتضيعين نفسج. خلينه نعيش بعيد، نكمل باقي عمرنا براحة، كافي الشفناه." "شنو المختطفات؟ كولي." "ناي، والله ما راح نحصل شي ولا راح نرتاح. الراحوا ما يردون، واحنا شبعنا قهر ومذلة. كبرنا ألف سنة قبل عمرنا. أشوكت نرتاح؟ "لحن، راح أغلقه. أحجي شنو السمعتيه؟

"ما سمعت، بس من رجعنا من تركيا سمعتها تحجي ويه مرة خالو وتتعارك على موضوع. ومرة خالو هددتها يذبحوج أنتي بس توصلين للعراق، لأن تعرف محد يفتر وينبش هالشغلة غيرج. وهمه ما يريدون مشاكل. بس ويه منو؟ ما أعرف." "وبعدين؟ "ماكو. من رحت أتسنت سكتوا، لأن عرفن أني وره الباب. بس قبل لا أعقد على أخو مرت خالي، ماما جانت جايتها الحالة من شافته. قامت ملخت وجهها وضلت تصرخ: وخر عني راح يشوفك وياي." "وهو شنو رد عليها؟

"كاللها: أوف لسه النومة وياج ما نسيتها. كون بتج هيج راوية مثلج ونفس الطعم." "يعني جان وياهم وهو الي اغتصبها؟ "ما أدري بعد. نفس اليوم لو بعد ما اجينه هنا، لأن هم جان يتردد بيت خالي. وبعد نفسه بيها." "لا لو بيت خالي ما كالتله هالحجي."

"ما عندنا دليل ولا نكدر نسوي شي، أكيد مشترك ويه إرهابيين لو عنده جماعة. وحتى ما متأكدين، لأن شكله مو مال هيج شي جبان. يمكن وره ما رجعنا اغتصبها هنا، لأن ماما قامت حالتها تزود ودم تبجي وخايفة علينا. جانت بس رادت تزوجنه وتخلص." "وهذا الخيط الجنت أدور عليه." "وأني ناي وين أروح؟ والله أكتل نفسي وأخلص. وعلى شنو عايشة أضل وحدي؟ "ماما ما ماتت، ماما انكتلت وهمه الي كتلوها." "لا، اندعمت بسيارة." "شفتي بعينج؟

سمعتي من أحد غير خالي؟ راووج شي؟ "أصلاً حتى شهادة وفاتها ماكو ولا كالوا وين دفنها. عمو ما يرضه يخبر بس سمع الخبر من خالي وانتهت. كال هيه تابعة لهم وأخذوها، بعد لحد يسأل. وأنتي تابعتلنا، ممنوع تخابرين لو توصليهم، انسيهم." "تمام، هاي هيه. عرفت كلشي، ولو متأخر هالحجي وكلفنه روح ماما. بس الدم كثر وأروحهم وحدة. إذا ما وكلتهم لحمهم بيدهم وأذبحهم عكس القبلة، فلا أطلع بت أبوي." "ناي تعبانة والله لا تتركيني." "ليش اتزوجتي؟

شنو هالضعف البيج؟ ليش اتسمحيله يضربج؟ شنو الجابرج تسوين بروحج كل هذا؟ "والله بس زواج عالورق. ما لمسني حتى ورثهم لا يروح يضل لابنهم. أصلاً زواجنا باطل، جذب ما حول دينه، بس بالعقد بعد مسيحي." "لا خوش لاعبيها، عفية عليكم." "شراح تسوين ناي؟ "شسوي متكليلي؟ هو أني حياتي كلها خراب بخراب. ما أعرف شلون أوكف، كلما أنتجي على شغلة تنكسر بيدي وأرجع أوكع." "يعني راح تتركيني مو؟ "شتركج؟

أوف يالحن. كلما أكول خلصت من همج وأراح أكمل الباقي، تطلعيلي بشغلة تكسرين جنحي وتخليني محتارة بنص الطريق." "والله سويت الأكدر عليه، وروح بابا تحملت أشياء محد اتحملها. حتى العملية من سويتها جانت من كثر القهر. ما تحملت الراح أسوي بيج ولا كدرت أتخيل شوفت الكسرة بعيونج من تعرفين شلون غدرتج." "متأخر هذا الحجي لحن. كلفني هواي هذا حجيج. ليش سكتي؟ ليش وصلتينه لهنا؟

"حتى أبعدج، حتى أحميج. ماما اترجتني ليالي وهيه تتوسل وتبجي حتى أسوي هيج." "أكو شي صاير غير هذا الحجي؟ لأن جنت عايشة وياها ودوم تنسى العلاج، ما جانت تذكر شي. ليش وره ما رجعتوا خافت وحاولت تبعدني؟ "ما أعرف والله. بس لا سمعت شي ولا شفت. بس هيه كالتلج وره ما رجعنه اتخبلت عليج. ما أعرف شنو شافت لو عرفت، بكل الطرق رادت تبعدج."

"سوده عليه، راحت وأني ظالمتها. بس والله ما حقدت عليها لو كرهتها أبد. والله كل ليلة أنام وأتخيل روحي بعدني بحضنها وأشكيلها همي." "لا تتخلين عني، ما عندي غيرج." "أني أشوكت سويتها حتى هسه جايه تكولين هذا الحجي؟ هذا الكلب ليش حتى يضربج؟ شرايد؟ "يريد حقوقه الشرعية. أكله حرام، ما يصير. لازم تسلم. يكول لا أنتي ردي للمسيح." "يلا بالله استلم. شنو هالعقلية الشايلها؟ دين لعب جهال هذا. أستغفر الله ربي." "شنو راح تسوين ناي؟

أخذيني يمج فدوة أروحلج. والله صحتي صارت زينة، حتى شغل أني أشتغل مكانج." "يا شغل؟ إذا عالشغل سهلا. خلي أشوف وين تصفى ويه غيث." "ناي لا تتركيني فدوة." "لحن، أنتي متزوجة. ما أكدر أسوي شي ولا أكدر أخذج. تحملي أشوية وسايري. أنطي وعود، خدري بيها لحد ما أعرف شلون أخلصج." "ولج أخاف يغتصبني." "وين تنامين أنتي؟ "يم بيبي. من عمليتي لحد الآن يمها. بس كمل الغرفة وصار كم يوم ديلح أجي يمه."

"لحن، طلعي لج مكيدة، شغلي بيها. أنعل وجهج الفاهي. أنتي شلون محسوبة علينا؟ والله خزيتينه. ولا تخافين هذا فاهي الي لسه ما كدرلج. وأنتي جنّج دجاجة مصلحة، يعني مو رجال ما بي خير." "شسوي هسه كليلي؟ والله ثولة تعرفيني." "اتحجي بمرضج. كل اشويه كليله وديني للطبيب. سوي روحج مغمي عليج. أكيد ما راح يوديج أبو أفليس وراح يخاف يتقربلج أخاف تولين. ديري بالج تنطين روحج. أي شي يخطر على بالج سوي."

"لا يمعودة، هم حرام وهم أخاف يصير عندي طفل وأتورط بعد ما أخلص من مرت عمو." "والله اليشوفها بالمستشفى ولا يحكم هيج." "طبعاً خايفة عالورث. ذهب كومه طلعنا من حصة بيبي. هسه مو آمنت اشترت البيت لابنها. أنوب قامت تتحجج تريدني بس للخدمة وبنها يضرب بيه. ولج ناي ديأذوني وروح عاشق،" كالتها وبجت. أحسها خذت كلبي. نزلت الفون. إنداريت أشوف غيث شايل طفلة يلعب بيها، ويمّه سارة حاضنته من ضهره تضحك.

لازم أتخلى عن واحد منكم، وأدري اثنينكم ما وراكم غير وجع الكلب. شلت الفون، لكيته مغلق. مسحت وجهي. ضميت الفون بجيبي. ورحت أتمشى. وصلت يمهم وغيث بعده يلكف بالطفلة، يحجي وياها بلغتها ويضحك. شافني كال: "أشوكت تصير عندي مثلها؟ "مو تريد ولد؟ "دحكيلها جنها فلكة كمر. إذا اطلعت تشبها وعيونها عليج حظي بالسما." "وإذا اطلعت تشبهني شلون؟

"تك غمازة وشعرها دوم على وجهها وأسميها هيا. ول يابه غير ما أخليها توصل للكاع. بس إذا مثل رعونتج بالقرآن أهفها دفر منج للبحر عدل." سارة: "حبيبي راح تسجلها بأسمي؟ "عش يولي، أمها شهيدة." "صدك غيث؟ مو تعرف نفسي طفل منك وأنت المانعني؟ إذا هيج حسوي طفل." "كل عقلج تموتين يولي؟ سماهر: "إذا بنية الج، بس إذا ولد لا أخذه أني." باوعتلها. كالت: "شكو دحكين بوجهي؟ لازم عندج اعتراض حبيبتي؟

لا تنسين ماخذة ثمنه مقدماً نص جلمة مالج. عسى ما نزلتها بالشارع." غيث: "بس فضنها، الولد راح يرحون وأني أنطيها الج هي وأمها." رحنه للسيارة. صعدت وره كرسي غيث وهنه يمي، سماهر بالصدر. حركوا السيارات. الولد جانوا بتكسي كدامنا، طلعوا واحنا وراهم. عدل المراية، شفته عينه صارت بسارة. ابتسم وهيه ضحكت. درت وجهي للجامة، أحس كلبي يغلي. ناي اصحي، مو الج. دتشوفي شلون يحبها. ربي دخيلك طلعه من كلبي، والله ما بيه أتحمل بعد كسرة جديدة.

سماهر: "خويه سارة تجي ويانا تريد تسهر ويه رنو." "تمام." "أشوكت بحيل الله زواجكم؟ "قريباً." "عش ما تخليني أحضرها الك. أول ما ترجع نسوي عرسكم." "الله كريم. خلي أدحك شيصير وياي وبعدين نقرر." "ماكو تقرر. ما أرد للعراق إذا ما أزفك. وناي إذا اطلعت ما عدها طفل ما نريد. بطلنا نعالج سارة وهي تصير أم جهالك." "هينه." "تاخذني على كد عقلي ولك؟ "لا حشاك خويه. على أمرج، التردي اعتبريه تم." "اليجي برخص يرد برخص، معروفة."

هيه تحجي وما نشوف غير غيث شحط السيارة وصرخ: "نااااااااي! ما حسيت غير انضربت السيارة من جهتنا. ضميت وجهي بسرعة بالكشن مالته. وكفت. فتح الباب ونزل يركض. سحب الباب اليمي. راد يفتحها، ما انفتحت. دفرها حيل وجرها، انفتحت. سحبني ينفت. شافني ما بيه شي. أخذني لحضنه. غمض ونفخ. أحس جسمه يرجف وكلبه كثر ما يدك يريد يطلع. باسني من راسي، وخر. كمش راسه. راح كعد على جهة مدنك. اجوا كرم وجود يركضون يمنا. كالوا: "خو ما تأذى واحد؟

"لا بس غيث ما عرف شصارله." "ما بي شي. نزلوا من السيارة." نزلت سماهر، راحت يم غيث، دنكت عليه كالتله: شبيك يا خوي؟ ماكو شي بس ضغطي يمكن هبط. اشبلاك انخبصت، متقلي موش قوية الضربة؟ ابن الكلب طلع صفَحْ، لوما فَرّ السيارة جان رحنا بيها. عجل بس ناي بالسيارة وهيچ انّهبطت عليها؟ أهووو، شلون شغلة ما راح تفض. كرم، أخذ البنات ورجعهن للِعمارة. التَمّت العالم، خبروا الشرطة حتى يعرفون الغلط منين. قام غيث يفتر عالسيارة ويفرك براسه:

همزين مو قوية كلش. رجِعنا ويه كرم والطريق كله ما سكتت أدردم، لمن وصلنا نزلت ركض مالي خلگها. صعدت للشقة عدل لغرفتي، دخلت وقفلت الباب. أخذت ملابس رحت للحمام سبحت، جسمي ياكلني من الملح مال البحر. طلعت أسمعهن بعدهن يَلغَن وسارة تبچي، أتقلها يمها گاعدة، ما اهتم. أصلاً موا گلچ بعد ما يحبني هيچ مسايرني ويضحك عليه. والله يا يمه يموت عليچ بس مكسور خاطره، لباله تتكسر وهو ناوي يتركها. خالة عجّلي زواجنا.

هذا الأسبوع بس يرد أزَفكم وأرِد. خليه يطلّقها. أوووف ربي كون يعقل ويقنَع، وبالقرآن إذا ضلت على ذمته موش بس يخسر صديق عمره، حتى الورث ونفسه وهو ما داري. شتقصدين خالة؟ ماكو خالة، روحي سبحي ورتاحي، خلي أخبرهم أشوف اشصار وياهم. خليت راسي بالمخدة، كل عقلها بينا اني وجود شي. سمعت فوني وصل مسج، قمت فتحته، لگيت من لحن كاتبة: راح أطلب الطلاق. إطلبي، بلكي يصير آدمي لمرة وحدة ويطلّقچ. وإذا ما رِضَى شسوي؟

لحن والله ما أدري ولا بيدي شي، اتحملي بس هالأيام لحد ما أعرف شسوي. راح أنتظرك ناي، لا تتركيني بمعزة عاشق على قلبچ. لا تحچين هيچ، تعرفين أنطي روحي إلچ بدون لا أفكر، بس انطيني صبر، والله عاجزة هسه ما أگدر أتحرك ولا أفكر، كم يوم بس أعرف شراح يصير وياي. رجعت الفون، شتسوين ناي؟ بعد شنو عندچ تساومين بيه؟ ابنچ وبعتي نفسچ ورخّصتيها. انگلبت على وجهي، حضنت المخدة، أسمع الباب

تندگ وصوت سماهر گالت: ناي ملابس غيث جيبيهن، فتحت الغسالة. ما رديت، سويت روحي نايمة. دگت لمن مَلّت وراحت. ذكرتني بتشيرتات أخوها، إشگد مريحات باللبس. قمت فتحت الكنتور، ابن الأطعه إذنها أشكال وكلها ماركة. سحبت واحد، باوعتله مبتسمة، ناعم صح چبير بس راح يطلع حلو. شمرت تيشرتي لبسته، وصل شوية عن رگبتي ورداناته نازلات بس حلو.

رفعت شعري وشمرت نفسي عالجرباية، ما طلعت منا لمن سمعت صوته بالشقة يسولف. شوية ودگ الباب، قمت فتحته، دخل شافني مسح وجهه. اشبيك؟ ما درى، سحبني من الياخة ليفوگ، رفعت راسي أباوعله أشر: شنو هذا؟ ما عندي ملابس. ما عندچ؟ بس هذا، ما راح آخذ غيره، وبعدين عندك هواي ليش عينك ضيّقة؟ عصر وجهي گال: ملابسي لا توصليهن. هسه أنزعه وخر. ولي، حضّريلي الحمام أريد أسبح، وحضّريلي الجنطة أطلع الفجر. شحضر؟

أنت مسوي تركيا العراق باب الشرجي، جنطتك على حطتها بملابسها، روح للحمام هسه أجيبلك ملابسك. أشر أي ودنگ، شال الحذاء مالتي، فتح الكيشوانية شمرها وأشر: هاي هنا. هزيت راسي بأي. رد شال التيشيرت مالتي خلاه بالتعلاقة، وعلاقة سد الكنتور، دمغني وراح للحمام. طلعت لگيت سماهر بالمطبخ ترتب بالمسواگ، مبين راحت للماركت. سارة نايمة على بطنها بالشورت والكيمونة ورافعة رجليها يمها رنو يسولفن. رحت للثلاجة فتحتها. سماهر: وين غيث؟ نام.

شنهو نام؟ موش گال زهبيلي الزاد ضال بلا غدا؟ لا گال مو جوعان، ولحد يگعدني تعبان. سارة خالة قومي گعدي غيث. ويييين؟ لا تدخل غرفتي. شنهو غرفتچ ولچ؟ ما راح أگلچ لا ولا راح أحچي، بس إذا هي بيها حظ توصل غرفتي. طلعت رحت لشقة الولد دگيت، طلع كرم بيده خيارة وصمونة گال: شكو جاية؟ جوعانة، وخر دا أدخل. رجلچ وين؟ ما رد بعده برا، وسماهر طردتني وخر. ولي نريد ننام روحي. جوووود! مرض، محزوزة وملبوسة، دخلي. دخلت لگيت جود طالع من غرفته،

شافني ضحك گال: يابا الحمد لله على سلامتچ. الله يسلمك، جوعانة وتعبانة شنو عدكم؟ خير من الله، گعدي هسه أسويلچ أكل. مو هواي بس شوية حتى لا ياكلون ذولاك الناس وياي. انفتحت الباب دخل غيث، ركضت ورا جود، اندارلي أشر: شمسوية؟ كلشي ماكو، بس هو يتحجج بس يريد يضربني هيچ. غيث: خليچ هيچ خاتلة، لا تجين بس أگضبچ أطرج نصين. والنبي يا غيث إذا مديت إيدك ألم ملابسي وملابسك وبعد ما تشوف وجهي. كونچ مرة صدگ وتعمليها.

جود: تركها يا خوي، صدگ خال عقلك وياها؟ يا عقل يول؟ لو عندي ألف عقل أطيرهن بتصرفاتها، دحگ شلابسة. كرم، حجزت؟ كرم: أي حجزت من أول البارحة، وحولتلك التيكيت على جهازك، أطلبلك تكسي. أي والله يا ريت كون قبل ساعة توصلني، وأنتي لچ أروح أرِد ما أسمع لچ نفس مشاكل، أطراكات حاولي تأجليهن لمن أرِد. أني مالي شغل بيهن، روح گللهن. بالقرآن إلا أربطچ يالله تركِدين، گالها وگعد. راح جود للمطبخ وكرم فتح الـTV، متابع مسلسل، اتربع گدامها.

رحت يم غيث، گعدت عدل گعدته، انتچيت على مَتنه ومددت رجليَّ، أگلّب بالفون منتظرة الأكل. همس: لمي رجليچ. محد يشوف، جود بالمطبخ. شيسوي بالمطبخ؟ ديسويلي أكل، ميتة جوع. يولي شبلاچ؟ عش مزحّمة الولد؟ عجل ما تقومين اتسوين لچ سم تزهرمي؟ ما بية حيل والله تعبانة، ومن البارحة ما أكلت، ما أگدر أوگف ولا گدرت أنام لأن جوعانة. عجل ما گتلِهم غادي؟ سكتت. كرم: هههههه انطردت. عش اشعملت حضرت جنابها؟

لا هالمرة مظلومة، أم رنود صارت كريمة انطت الأكل للعالم اليمنة وما ضل الها شي تاكله، شحتوها من السفرة. وأنتي شيبيچ لچ؟ عش صايرة مغوثة؟ الي يريد يضيف يضيف من زاده، حقچ أخذي من حلگ السبع، لا تضلين تتصفنين مثل الثولة. حاجيتها صرخت بوجهي، سكتت صرخت بوجهي، تره صدگ حتسَويني ثولة. لا تطفرين من تلغين، كم مرة نبهتچ بطلي رعونة، وإذا سمعت مرة ثانية ساكتة عن حقچ أفلّش چهرتچ. روح حاجيها لعد، خلي تشيلني من راسها.

موش دوم راح أكون حدچ، ولا على طول موجود بحياتچ، اتعلمي شلون اتخلين إيدچ بخوانيگ الي يفكر يشهگ نفس يمچ تاتكتمي الهوا عليه. أسوي أي شي ما تحاسبني؟ استخدمي ذكائج، لدغي واختفي بدون لا ترِكين أثر تاتجبرين المقابل ينكتم. يعني شلون؟ تمتلكين كل أنواع الدهاء والقوة بس گاعدة تستخدميهن غلط، راد لچ چثير يالله تتعلمين. قبل لا آخذك جنت أتصرف صح بدون خوف، بس من كثر ما ضاغط عليه قمت أحسب حساب لكلشي.

الضربة اللي ما توجع ما تقوي، لسه ما دحگتي من الضغط شي، بعده عظمچ طري، ما أتركچ لمن أتأكد قلبچ مات ما بيه نبض، وأقوى ضربة ما تخدشچ. هزيت راسي درت وجهي ورجعت انتچيت على متنه، أفكر بالي گوله صدگ رادلي هواي حتى أقوى، راح أتحمل كلشي بس حتى أگدر أوگف على رجليَّ وأكون مستعدة آخذ ثاري بدون لا يرفلي جفن. إجه جود خلى الصينية گدامي گال: اتفضلي عافيات. اتربعت أباوع مخلمة بطماطة ولحم، سحبت الخبزة، أول لقمة وگع عالتيشيرت، اندمغت.

على كيفچ لاحگة ما طاير. ما رديت، كملت أكل، انداريت ردت آخذ مي لگيت غيث يدخن متنجي وعينه بجود. أخذت المي بس حتى نفسي انسدت، قلبي انخطف لأن على طول ما أكل جود چان يباوعلي ويضحك على طريقة أكلي. قمت شلت الأكل للمطبخ إيدي على قلبي، ربي دخيلك بس لا سماهر خلته يشك. بس لا غيث يثق بصاحبه وهو مثل أخوي يعرف هذا الشي. غسلت المواعين عالسريع وطلعت، رجعت للشقة مالتنه، لگيتهن على گعدتهن ناثرات الحلويات ياكلن.

تركتهن ودخلت غرفتي، رحت لفراشي تمددت، قلبي يرجف وأدعي حتى لو ماكو شي، اكو خوف انزرع بقلبي من نضرته غصباً عني. مرت أكثر من ساعة، إشگد ما حاولت أنام ما گدرت، لمن انفتحت الباب، دخل غيث سويت روحي نايمة. شمر المفتاح، نزع قميصه، إجه يمي تمدد، سحبني لحضنه باس راسي وضمني إله حيل، همس: ناي گاعدة؟ ما رديت. وخر شعري عن وجهي وباس شفتي، مرر أصابيعه على خدي، فتحت عيوني. عش تمثلين بالنوم هيچ ما طايقتني؟

هئ جنت نايمة، صدگ هسه گعدت، مو عالأساس تبات هناك؟ لا أريد أطلع من وكت، ما أريد أزعجهم ومشتاگ لچ. والله بطني توجعني غيث فدوة. ههههه ما أقرب لچ بس تعالي بحضني. خليت راسي بحضنه، أخذ نفس طويل وذب حسرة. ضل يمرر إيده على ضهري وهو بغير عالم مو يمي صافن. غمضت أخذ له شوية، شال راسي خلاه عالمخدة، قام فتح الكنتور طلع حباية أخذها حتى بدون مي. سحب باكيت الچگاير وطلع للبالكون.

قمت ورا طلعت، لگيته متنجي عالجام يدخن، رحت يمه خليت إيدي على ضهره، انتبهلي عدل وگفته. عش گعدتي؟ راحت النومة، اشبيك ليش واگف هنا؟ ما أريد أنام، لازم أطلع ويه طر الفجر. تمام، أني هم مو نعسانة، خليني يمك، اشوكت ترجع؟ ما أطول چثير بس أكمل شغلي وأرِد، ناي لا ترحين لغادي بعد. وين قصدك؟ يم جود وكرم؟ ليش تره إخوتي ذوله.

أعرف أخوتچ، ولو ما واثق من هالشي ما أتركچ بينهم، بس ميصير يولي، مهما يكون شباب وأنتي ثولة بهيچ شي، ما تنتبهين لنفسچ. بس من أضوج أروح للمطعم من هسه دا أگلچ، مو تگول ليش طلعتي. لبسچ ما أوصيچ عليه، احتشمي رحمة لأهلچ، ناي أريد منچ وعد تحافظين على نفسچ بغيابي. هزيت راسي بأي. يلا امشي جوة، الجو برد وأنتي جسمچ حار. يمكن بردت شوية اليوم. أيقونة الرعونة! دخيل ربچ اشگد گلتلچ لا توصلين للبحر، يلا دخلي جوة.

دخلنا جوة، سد البالكون، اندگت الباب بسرعة، سد حلگي أشر: اشش. اندگت مرة اثنين وبطلوا، ما عرفت سماهر لو سارة. وخرت إيده، رجعت لفراشي على كيفي، إجه يمي اتمدد، خليت راسي على إيده همست: غيث اشوكت نسوي طفل؟ من أرجع قررت أتعالج، أخاف صدگ يطلع مشوه. گالوا سارة راح أتعالجها. سارة؟ منهو كلچ؟ ناس وگالوا خالچ سبير. سبير گُلتِ؟ مم، الوصلچ صدگ، بس ما گلتيلو هالسبير مطيحة حظ أبوه وكلشي ما مستفاد منو.

شلت راسي همس وعمة السادة راح أظل أقل شي أسبوع. شرايد يعني؟ انتي وكرمچ، الي يطلع من ايدچ أحمد عليه ربي. عالأساس من تروح لهناك ما راح تفرفر انت وأركان عالحبابات. لاااا افا، عطيتچ جلمة. يعني من اتزوجنه لسه اتفهمني ما خنتني؟ عش الجذب، من ابتعدنه رحت، بس بالقرآن من رجعتي ما وصلت لوحدة لغيرچ. حتى سارة؟ سارة شيليها من راسچ. موداتحلف ما واصل وحدة. بالقرآن ما وصلت، وسارة تراها حرمتي حالها من حالچ وتعرفين هذا الشي گبل لا نعقد.

يعني عقدتوا سيد؟ لا اكو ورقة اتحلل بينه. بطني دتوجعني. على كيفي وياچ ما أأذيچ. والله ما بيه حيل، تعبانة كلش، أصلاً كوه دا أحچي وياك. نامي نامي، لو عركة چان طفرتي حظچ وحظ الفگر يباوعلچ، وجه جرچوبة، منو يباوعلچ؟ مصدگة روحچ وچاية تتمندلين چنچ شاحنة خربانة. هاي اني؟ يولي أمچ شافت بحملچ طلعتي بهيچ چهرة؟ مو قانونية طاگچ كسوف إنتي. عزا مو بتك تريدها تشبهلي؟ منهو يا بت يولي؟ شنو خبل اجيبلي منغولية منچ واخرب النسل؟

منهو ياخذها مني تحمظ على گلبي تك غمازة؟ روحي بنتي سويلچ چارة لچهرتچ المصفحة. والله صوچي ضالة يمك. حمدي ربچ واحد مثلي نايم يمچ، المثلچ ينحنن حتى للبزون من يمر بس حتى يباوعلهن. والله راح أبچي. منهو انتي تبچين؟ ولچ أبوي يبچي وانتي لا؟ أزلمة وروح أخوي. يلا أريد ملابسي، نزعي وجهچ مال بالة، اترخبي بالماركة عش. كمت نزعت التيشيرت شمرته عليه. هاك الماركة مالتك، خليه على گبرك يفيدك يوم القيامة.

هذا البنطلون هم مشتري بفلوسي، نزعي. باوعتله. لا تدحكين عيونچ يول، نزعي يلا لا تخليني أگوم حتى جلدچ أصلخه، ذبيهن أحسن. راح أشمرهن، بس وروح أخوي يغيث إذا مديت ايدك لو بس فكرت تسوي شي أصرخ وأفضحك فضيحة، وهاا أخاف اتسد حلكي لو سوالفك ذني، لا تجرب حظك وياي. رفع حاجبه. أشرت اي، لباله ما أسويها اذا ما كلبت السحر ع الساحر ما اطلع ناي. نزعت البنطلون وشمرته عليه، بقيت بس بالداخليات.

شلت شعري لفيته كباية، شفت كام، صرخت طفر صاح اششش بطلت. اي هيج صير حباب، نام واحضن ملابسك عدل. لبالچ بحالچ تره شعرة متهزين من راسي. مم عود ميخالف، گلتها وكمت. ويين تريدين؟ دا أشرب مي، عندك اعتراض؟ لا تطلعين اني اجيبيلچ، ردي انطمري. ما أريد بطلت مو عطشانة، ولا تگول انطمري. اللهم صبرچ يا روح. اتمددت خليت رجل على رجل، دفع رجلي وگعها. رب الحلو حتى اغرائج مال أزلام، انوثتچ يولي تبچي بالزاوية.

بكيفي مزاجي أنام بالطريقة التعجبني، ولا تباوع هيج دير وهجك لا تخليني أعلي صوتي تره ديسمعون. اشتعل أبو أصلچ على أبو اليوم الشفتچ بي. لا تتتغلط حتى لا أتجاوز عليك. كام كال شنو لچ؟ رجعت ليورا. مو وياك دا أحچي، ويه الكنتور. ناي لسانچ اسحبو واربطچ بي سمعتي؟ لزمي حدچ تالا طگچ. اشرت اي، شمر ملابسي عليه، انطاني ضهره ونام. اتمددت، أخذله شوية واسمع حسرته رد. انكلب نام على ضهره، اتچتف، غمض عيونه.

سحبت المخدة حضنتها، اندار باوعلي ضايج، رد يغمض، حصرتني الضحكة ما سيطرت ضحكت. ضحك على ضحكتي. اشتعلو أهلك كرم. مد ايده سحبني يمه، ردت ادفعه گال بترجي: بعد بس ساعتين وعمة السادة ميت عليچ. ما عندي أي رغبة ليش تجبرني؟ يلا على راحتچ بس تعالي بحضني. خليت راسي بحضني، شفته صدگ بطل وغمض عيونه اكتفه بالحضن، كسر خاطري وخاصة بعد ما تأكدت ضال على كلمته ما متقرب لغيري.

رفعت راسي بسته من شفته فتح عيونه، عضيت شفتي، عصر خدودي وانكلب دنگ على شفتي سحبها -غيث صارت الأربعة كوم. ربع ساعة. حطير الطيارة ويروح الحجز، تره جود اتصل مرتين وفصلته. هسه گايم بس حضريلي الحمام واني جاي وراج. كمت حضرتله ملابسه وهو بعده نايم، اندگت الباب دخلت سماهر گالتله: شنهو بعده نايم؟ دا أصحي بي هذا گدامك ما يرضى يگعد. طبعا هادة حيله سودة عليه. مقتنعة خالة هذا شكل وحدة تگدر اتهد حيله؟

مصگوعة اتهدين سلف بكبرو، ولي يلا طلعي حضريله ريوگ -غييث يمه گوم صدگ تحچي راح الوقت. خلتهم وطلعت للمطبخ، عائلة شافطة. سويت چاي وگليت بيض عيون، كملت ترتيب الصينية. طلعت ردت أصيحله لكيته بالصالة يم سارة، واگف يلبس بساعته وهيه متخصرة تحچي بعصبية، ما لحگت عالبداية بس سمعته يگلها ما شفتوا. احلف وبعد وكت؟ هسه جاي الليلة كله انتظرك وانت بحضنها. حرمتي عسى ما العمر بطولو أضل بحضنها، مالچ حگ تحچين نص چلمة.

يعني شنو عود دتصالحني هيج بآخر دقايق؟ راد الأسبوع الجاي والتطلبي اني حاضر، تاخذيه من عيوني. سماهر: يلا يخويه اتريگ راح الوقت. ما ألحگ أتريگ بالمطار خويه، ما رادلچ وصية. لا يضل بالك ترجع بالسلامة، والله التحچي أمرعطها، بس هاي أم لسانين هم ضبها قبل لا تروح. اندارلي اتچتفت. نااي يولي هدي اشوي بروح أخيچ بين ما أرد. وليش دتحچي وياي؟ لو گدرتچ عليه لان فقيرة، هياتها گدامك الصفره گلها لا توصل يمي، اني مالي شغل بيها.

سارة: منو الصفره؟ اني ميتة قهر لان يحبني ويرگض وراي، خليچ بسمچ ما معبرچ. يلا هسه من زينة واكتل روحي وراه، والله ما متباهين بروحكم، بابا اصحوا تره ما موجودين انتم ولا واحد شايفكم من الأصل. من هيج ضالة هنا؟ ههههه ضالة مو لسواد عيونه، عندي مصلحة أخلصها وأطفر. سماهر: عمي شوگاحتچ هيج صلافة ما شايفه، وتحچيها بوجهنا، ولچ اشلون تحچين هيج گدام رجلچ؟ غيث: امسويتلي مونتاج ما حيّتني من يمها، إمكانية بالعرامة اتعجبچ.

والله يخويه ما أعرف شنهو الي مصبرك عليها وخالها. ماكو شي يضل على حالو، گالها ودار وجهه باوعلي رافع حاجبه. راحت سارة حضنته من بطنه. راح أشتاقلك، جيبلي الي وصيتك عليهن. من عيوني اعتبريهن يمچ. رنود: خالي فدوة الصاية مو تنساها جيبيها. تامرين. سماهر: هناء: بطريجك بلكي تگدر اتعقلها لخاطر هالبنات يخويه. غيث: سهلًا، وأنتِ ناي ما رايدة شي اجيبه وأني راد؟ درت وجهي عنه. ناي: عساك ما رديت، يريد يزيحني ويسألني شرايدة.

سلم وطلع، دخلن جوه. شلت دبة المي ورحت وراه. فتحت الباب لقيته يسلم على كرم وراها حضن جود. ناي: دير بالك على نفسك غيث، لا توجع قلوبنا عليك. غيث: ما عليّه يخوي، شايفلك عار يموت؟ ناي: تظل تقول عار لمن تكتلنا وراك. غيث: يول اكو عالم تتمنى ما أرد. ناي: جذابين، راح يظلون وراك يحسبون الثواني. غيث: يلا يخوي ما أوصيك على حلالي، عينك بيها. ناي: بعيوني لاتوصي. غيث: أي واحد يخبرك، عطِ لعثمان، لاتقرب، ابتعد، ميل عنهم.

ناي: كان وجهت الكلام لحضرتك، إذا هيج همّك، تراه ما نسوى شيء من دونك. غيث: الله كريم، الكاتبه الله يصير. جود خويه، أمانتي هاي يمك. جود: وعلي حالها حال أختي وأكثر، لا تخاف. لا سامح الله إذا صار شي، اعتبر الطلبته نافذ. ابتسم، دقدق على متنه، ونزل. شمرت مي وراه، همست: ربي يحفظك ويردك سالم. دخلت جوه، رحت سبحت عالسريع وطلعت تمددت جوه اللحاف حتى أدفى. شفت فوني يضوي. شلته لقيت مسج من غيث كاتب: "ربي يسلمج". ناي: شنو ما فهمت؟

غيث: سلامتج يولي، يلا ولي ما فارغلج. ناي: منو اللي حكى وياك أصلًا؟ أنتَ دتراسل. غيث: بالغلط وصلج المسج، احذفي من يمّج، لا تظلين تدورين سالفة بالقوة حتى بس تحجين وياي، بنتي ثقلي، الثقل حلو. ناي: هيج؟! لو أعرف بيك ميت ما راح أتصل، وما أشوف واصل شي منك. غيث: يلا عالأساس مقطعة روحج، أم المصلحة اذلفي قبل لا أبلكّج. ناي: هسه اتبلك، الله يرحم من كم ساعة اشلون جنت تتوسل.

غيث: هه، بحالج ضحكت عليج بكلمتين، استمتعت وأخذت اللي أريده. لحد متى تظلين هيج مضحكة وغبية؟ شمرت الفون، محترق قلبي، اشقد استفزازي وحيوان. سحبت غطاية، نمت. ما قعدت غير على صوت سماهر تتعارك ويا رنو تريد تمنعها من الطلعة، وسارة تقنع بيها تخليها. قمت غسلت وجهي، طلعت للمطبخ سويت لفة، لقيت الجاي عالطباخ، صبيت كوب، طلعت بالصالة وهن بعدهن على هوستهن. قعدت، اجت رنو ضايجة، دفرت الميز، وقع الجاي. رنو: كونج بالسم!

اكو زمال يخلي الجاي هين؟ ناي: لا، المفروض بحضني أخليه، الميز مخترعينه للدفرات. رنو: قومي نظفي المكان يلا. ناي: سهلًا، أنظف بس خلي أكمل ريوكي. رنو: يا ريوك؟ الساعة راح تصير العشرة. ناي: رنو نوم وما شبعانة بسبب خالج التحفة، وجوع قاتلني بسبب أمج الله يحفظها. خليني محافظة على مزاجي لأن إذا خرب ما أضمن سلامة وجهج. رنو: قومي إذا بيج حظ صدق أخاف وقف بعيني خالي وما حاسبتج عالصار، هسه أدوسج يالخدامة.

سارة: حبيبتي تركيها، هي كم يوم ضالة هنا، تحمليها. رنو: صدق ما دريتي؟ خالي حدد زواجه بهذا الأسبوع أول ما يرد. ناي: امم، مبروك. رنو: وين تروحين بعد ما يطلقج؟ ناي: ما أتصور يهمج. سماهر: ردي للعراق يم أختج. ناي: أختي راح تنفصل. سماهر: كملتتتت. ناي: شكو خالة؟ كمزتيني. وإذا انفصلت تره راده عليّه مو عليج. سماهر: وعش تنفصل؟ ناي: عمتها صارخة بوجهها، قامت هي لبست القدر براسها سوته نصين، وهسه طلب الطلاق لأن زعجوها.

سماهر: وهذا عمجن هيج مسيبجن؟ تجن هينه بدون محرم شلون؟ ناي: شفنا العدهم محرم والبيت حارسهم شلونهم. سماهر: شقصدج لج؟ ناي: سلامتج خالة، ما أقصد شي. ضالة وياكم بس هالاسبوع، خلينا نكمله بخير، ليش نتخارب وتصير مو حلوة؟ سماهر: تبتعدين عن الولد، ما تظلين يمهم. ناي: تم بعد. سماهر: أنا أنطيكِ مبلغ زين تروحين غير محافظة.

ناي: ما معتازة فلوس أحد، أعرف أدبر نفسي، وفري فلوسج لجنتكم الجديدة. هواي راد لها شغل حتى تملي عين أخوج، لا تخليه يرجع للطريق الأعوج. سماهر: ناي انضبي وكضبي لسانج، لا أبتره لج. ناي: لا تبتري ولا تخلي، أنا قايمة، أخذي راحتج. سماهر: وين مولية؟ ناي: لشقتنا يم إخوتي. سماهر: نااااي، ذيج ممنوع توصليها.

ناي: تره ذوله اللي شاكة بيهم أكثر بشر حافظوا عليّ، اعتبروني أكثر من أختهم. لا تخلين إبليس يلعب براسج، تره مو كل حلاوة علاجية. سماهر: غيث يدري راح تروحين غادي؟ ما منعج؟ ناي: لا منعني ولا راح يمنعني، لأن يعرفهم شنو ويعرفني منو، وفري الكلام. رنو: أروح وياج غادي؟ ناي: ما أحتاج حراسة، المكان مأمن. رنو: ماما كدامكِ تغلط، لا تجين تقولين أنتِ اللي تبلشين.

سماهر: ما ظل كلها أيام، وأردها للشارع وأخلص من شرها. صدق غرفتج أريدها، فضيها، نامي بالصالة، الغرفة هاي ما مكفيتنا. رنو: وهم نريد نجهزها، هم يا الله منا لمن يرد خالو. سماهر: أي، خبري جود خلي يجي ياخذجن، تجيبن النواقص حتى نطلع باجر نجهز الفرشات، وأنتِ طلعي غراضج. يلا أريد أرتب ملابسنا. ناي: اتصلي بأخوج خلي يرمي اليمين عليّ، وأنا أطلعهن. ما طولني باسمه ما أتحرك منا. سماهر: ما عندكِ كرامة؟

ناي: عفيه بدون كرامة، تاركتها الكم، أنتم أهل الكرامة والسمعة، تركيني بحالي. رنو: ماما لا تتعبين روحج، هسه أشمر غراضها بالصالة. ما رديت، تركتهن ورحت لغرفتي. دخلت، شمرت حتى لفتي، انسدت نفسي. تمددت، صفنت على روحي: "اشوكت تخلص؟ هم يجي يوم أعيش براحة، بالي مرتاح بدون هالهوسة اللي براسي؟ ***لحن*** يومين محبوسة بالغرفة، حتى فوني أخذوه مني بعد ما سمعوني أخبر ناي. ظليت على قعدتي منتظرة رحمة ربي، ما عندي أحد أشكيله لو يوقفلي.

كل ألم وأصفن أقول: "معقولة ربي يدري بينا هيج قويات، وخلانا نتحمل كل هذا بدون سند؟ لو اكو أيام مخبيها لنا؟ انفتحت الباب، دخلت بيبي بيدها ماعون أكل، خلته يمي وقعدت. رادت تحجي، قلت لها: لحن: كافي بيبي لا تحجين، سمار ما راح يكون زوجي. بيبي: ليش يبيبي؟ والله الولد حباب ويحبج. لحن: يا حب بيبي؟ تره بسببه وجعت قلب أختي، وبسببه خليت أختي تبيع روحها. ما كفاكم دمارنا؟ ارحمونا، ليش هيج دتسون بينا؟

بيبي: يبيبي حتى لو انوجع قلبها وضاجت منكم، المهم هي عايشة. لو ما مسوية السويتي كان هسه ميتة، تعرفين ناي وخبالها. لحن: بيبي، كرهتني أختي، كرهتني وأنا ما عندي غيرها، هاي كل روحي وكل اللي بقتلي. بيبي: شوفي، أنتِ قلتيها البقت. لو ما كارهتج كان هسه ميتة هي. يبيبي يموتها خالج، ما عنده رحمة ولا واحد قادر له. أعمامك ما بيهم خير، لو يذبحها قدامهم ما يحجون. لحن: بيبي خلصيني منا. بيبي: وين أروح بيج؟

ارضي بسمار وصرّي له مرة، نطلع بيت وحدنا ونعيش. لحن: لو يموت بعد ما ضربني وهاني ما صرّي له مرة. بيبي: ضربج لأن عندتي ويا، رايدج وأنتِ ما ترضين. لحن: لا، ضربني لأن قالي: "خبري غيث خلي يحول لي فلوس" وأنا رفضت. راد يكسر عيني ويغتصبني حتى يخليني مذلولة يمه بس للخدمة والإهانة. بيبي: لعد هيج أحسن لج من حابسج صار يومين.

لحن: لو عمري كله أظل هيج ولا أرجع أكسر ناي من جديد. والله قمت أخاف أنام حتى لا أشوفها بالحلم تبكي. اتركوها تعيش بسلام، كافي، خافوا ربكم بيها. بيبي: لعد ارضي صرّي له مرة. لحن: ولا راح أسلمه نفسي بيبي، حرام. أنا مسلمة، زواجنا باطل. لا يصدق التمثيلية اللي سويناها. مو رادوا الورث؟ هذا خذوه، بعد ليش هيج ديسون بيّه؟ بيبي: يلا شنو اللي بيدي وأسوي لج؟ لحن: جيبي لي فوني.

بيبي: وتخبرين ناي وراح تجي وتصير هوسة، يبيبي أختكِ صغيرة ما تقدر لهم، وزوجها مو اجا وهدد؟ قال بعد لحد يخبرها، اتركوها. ليش دتلحين؟ لحن: ما أخبرها بس ردوا لي فوني. إحنا نحكي ودخل سمار، قال: سمار: شتسوين بالفون؟ تردين تخبرين نسيبج الساقط حتى يجي؟ لا بالبالج خايف منه وراح يهمني، مكالمة وحدة أضيعه. لحن: إذا هيج سبع ليش أخذت فوني؟ رجعه.

سمار: أخذته حتى تتأدبين ولا تظلين ورا كلام أختج، تمشّيج. وحدة ساقطة راح تسحبج وياها وتخليج نفسها. لحن: هسه ساقطة! من جنت تخبرها وتسحب فلوس جانت خوش آدمية. من أشهر وأنتم عايشين عليها، ورثها اللي أخذتوه من غير سحب من زوجها المستمر. بعتوها إله بيع. هسه من انقطع المصرف صارت ساقطة؟ سمار: ساقطة وبت شوارع. لحن: روح احجي هيج قدامها، لا تحجي بالختلات. بعدني أحجي واجتني الدفرة بصدري، أحسه قطع النفس.

بيبي صارت قدامه، دفعته، وخرها واجى جرني من شعري. سمار: أختج أكبر ساقطة هي وأمج، وأنتِ إذا ما ربيتكِ ما أطلع رجال. لميت روحي، قام تفل عليّ وطلع. اجت بيبي تريد تحضني، دفعتها. لحن: ليش يبيبي هيج تحجين؟ لحن: وخرّي عني، الله ياخذني ويخلصني منكم. لحد متى أظل هيج متحملة؟ بيبي: شبيدي عليج يبيبي؟ ما أقدر لهم، هذا مخبل يريدج وأنا تسمعيني حكي. لحن: ما أسمع حكي بيبي، ما رايدني. يحب بنت خالته بس خايف أتركه، ومنين يحصل فلوس بعد؟

هذا مرة عايش على فلوس ناي ورجلها. إذا رحت ما يحصل بعد. بيبي: لا، يحبج إلكِ. لحن: من اشوكت؟ من جان ياخذ الفون مني وما ينطيني إياه لمن يقعد قدامي ويجبرني أخبر ناي حتى تحول فلوس؟ لو يشمر ماما بالمصح؟ لو من يهددني يغتصبني إذا حجيت لناي شي؟ بيبي: ما يسويها، بس حكي. لحن: شنو ما يسويها؟ كم مرة حاول وياي وأنا جنت مريضة ويعرف أموت بس لأن جنت ما أرضى أطلب منها. بيبي: جانت أمج مريضة وتعتازون، غصبًا عنه يسوي هيج حتى يعالج أمج.

لحن: جذذذذب، ثلاثة أرباع الفلوس إله. جانت ماما بالحكومي تتعالج وهمه يقولون لها بالخاص، يسحبون منها أضعاف. ضيعوا أختي. بيبي: أمج جانت راضية. لحن: لأن تعرف راح تجي، وإذا جت ماما حالتها جانت تعبانة وتحجي أشكال. خافت تفلت شي قدامها، فضلت ناي تتعب ولا تموت. قالت: "كلها كم يوم وأموت، تخلص مني وترتاح". وأنا تحملت كل هذا بس حتى أخليهن قدامي. هسه صفيت وحدي، لمن ضالة بعد؟

بيبي: استغفر الله ربي، أوووف يا أرزيد، تعال شوف بناتك شلون حالهن بعدك. لحن: بيبي أريد فوني، فدوة جيبي لي. والله ناي راح تظل قلقة. بيبي: ما تقلق، تعودت تقطعين الاتصال. لحن: لا، ببالها تاركيها قبل وما مهتمين لها. ما تعرف ياخذ منه، هسه عرفت أنا محبوسة راح تظل قلقة. بيبي: ما ينطيني إياه بيبي. لحن: انطيني فونج أنا أخبرها منه بس أمنّها. بيبي: لحن، صح أنتن بنات ابني وعزاز، بس سمار أعز، ذوله ولدي. لحن: يعني شنو؟

بيبي: يعني تخبرين أختج راح تدز رجلها الساقط يأذي ولدي. صيري عاقلة وارضي بزوجج، وإذا على عيشتج أنا أتكفل بيج. لحن: وأظل أخدم وأتحمل قتل ليش؟ وإلى متى؟ بيبي: يجي يوم ويعقل، بعده صغير طايش. بس يصير عدكم طفل راح يلتفت لبيتكم وحياتكم، يترك هالسوالف. لحن: بيبي، يا طفل؟ أنا مسلمة، حرام اللي دتحجيه. بيبي: ردي للمسيح، دين أبوج وأهلج. لحن: بيبي صدق دتحجين؟ ما يصير، دين هذا مو لعب جهال.

بيبي: لعد ما بيدي شي. ابتعدي عن ناي وزوجها، إحنا مو حمل هيج ناس، ماشين أعوج، لا يعرفون الخوف ولا القانون شنو. يروحون ولدي بيها علمودجن. قامت طلعت وسدت الباب وراها. عضيت أصبعي حيل: "أنا اللي قبلت بكل هذا. أنا اللي رضيت وسكتت من البداية. أقول لناي وأكشف لعبهم، ليش سكتت؟

أووف يا ماما الله يرحمج، كله بسببج أنتِ والوقفتي بعيني وخليتيني أسوي كل هذا. دمرتينا ودمرتي روحج ويانا. ردتي تستريننا وتأمنين علينا كل وحدة ببيت. هاي كل وحدة مشمّرة بمكان وما تعرف مصيرها شنو. دفعت الماعون، خليت راسي بالقاع. استوني أغمض واندفرت الباب. ***ناي*** فوني يرن، ما بيه أقوم أشيله. خلص الاتصال، رد مرة ثانية. قمت شلته، لقيت جود. رديت، قال: جود: وينج يمعودة؟ قلقتيني. ناي: قاعدة بالغرفة أصفن، قابل وين أوّلي؟

جود: تعالي للمطعم، ليش وحدج قاعدة؟ ناي: مالي خلق والله، والوقت هم تأخر. جود: بنتي تعالي لا تظلين وحدج، وإحنا هم خلصنا شغل، ننظف، نسولف. تعالي تتسلين، ما نشغلج، لا تخافين. ناي: يلا هسه أجي. خبرت غيث؟ جود: أي، بعد ساعة ويطلعون للشغل. يلا لا تتأخرين. سديت الفون، غيرت ملابسي، لبست جنز وبلوزة خفيفة. شلت شعري بخربطة، لبست جنطتي صفح وحذاء سبورت. أخذت كارت غيث لأن ما عندي رصيد بكارتي. طلعت صارت بوجهي سماهر، قالت:

سماهر: خير على وين؟ ناي: صاير خربطة بحساب المطعم، لازم أروح. سماهر: ومن اشوكت تعرفين هيج شغل؟ ناي: من زمان علمني عليه غيث، أخاف ما موجود حتى أسد مكانه. ما أتأخر بسرعة أرد. رنو: أجي وياج؟ ناي: شغل بنتي مو ونسة. رنو: ميخالف ضايجة، وهذا الشغل حلالنا اللي تحجين عنه، محد يخاف عليه قدنا. شعرفنا ما تلعبين بكيفج وتبوقين؟ ناي: أمداي إذا مدّيت إيدي على فلوس حرام. سماهر: هسه فلوس حرام!

من جنتِ تاخذين لأهلج جانن حلال، شبعتي وتذمرتي. روحي يمه رنو وخليج نبيه وياها. وأنتِ غراضج راح أطلعهن بره لأن غيث غرفته مرتبة، يضوج واحد يلعب بيهن. أشرت أي. راحت رنو غيرت ملابسها وحطت طن مكياج، اجت بالجبهة تسحل لو أفصلها بيها ست قلبيات. رحنا للموقف، رادت تكسي. درت وجهي وظليت واقفة لمن اجى الدلمش. صعدت ركض لأن مزدحم. وقفت يم الجام، اتجتفت أباوع لها تسحل بالبشت مالتها اللي ما ظل واحد ما سحك عليه.

صعدت، ماكو مكان، اندحست يم الباب بين الزلم. تباوع لي بغضب. درت وجهي، خليت الهيتفون بأذني. لمن وصلنا نزلت بسرعة، طفرت من السيارة، تركتها تسحل بروحها وتتعارك حتى يتأنوها تنزل. دخلت للمطعم، لقيت جود قاعد وماد رجليه عالميز القدامه يشرب قهوة. قدامه رويدة قاعدة. كرم يمسح بالأرضية وغسق ويا تمسح الميوزة. سلمت رحت يم جود، قعدت عالميز القدامه، اتربعت عليه، صحت: ناي: كرررم قهوة! اجى يمي صرخ: كرم: سمممم! ما تشوفيني أمسح بوجهج؟

قومي أنتِ! ناي: مو خطار جاية. كرم: خطار بيت أبوي؟ غير مطعم رجلج. ناي: حظك وحظ رجلي بنفس الساعة، روح قول لجود خلي يسوي لي قهوة. غسق: هم الخطار هيج يسوون بي، دتشوفين شنو شغلوني؟ ناي: أنتِ منو ضحك عليج وخلاج تجين؟ غسق: هاي رويدة خبرتني، قالت تعالي قاعدين خوش قعدة تفوتج. خلتني أترك الكورس وأجي ركض، كربوني كرب. كرم: صدق منين أنتِ؟ ما عرفتنا عليج. غسق: صديقة ناي. كرم: حلفي! صديقتها؟

اتشرفت بيج، وأنا صديق ناي. امشي يلا قدامي، هي ناي شتجيب غير شاطات مثلها. ناي: من هيج صاحبتك كرررم. كرم: عيونه، غسلتي ملابسي؟ تركتهن عالقنفة يمج. تره صار أسبوع حضرتكِ ما غاسلة. ناي: وأنا شنو طالعة عالة بيك؟ كرم: غصبًا عنج، لا بالبالج أنا غيث وتسكتي براجدي. صدق تركج من هالجبينة ما تنطينا ملابسه نلبس وياج وهيج ما راح نوسخ ملابسنا. ناي: ماكو، هم يا الله يكفيني. كرم: محزوزة وملبوسة. قالها وراد يروح، ضربته على ظهره وصحت:

ناي: جووووود ضربني! كرم: اشتعل أبوج غيث! اشوكت ضربتج؟ جود: ليش لكِ تضربها؟ خبل أنتَ؟ كرم: والحمزة جذب، هي ضربتني. جود: كرم، تصرفات جهال، بطلها. شقّاك ما تتحملها يا أخي، شبيك وياها؟ وين ضربج؟ ناي: بخدي حيل، شوفي شلون صار. كرم: جذابة! جذابة! ناي: جود، صدق أنا أجذب؟ يا ربي إذا صدق أنا أجذب، كون كرم تنكسر رجله. كرم: بعد، وإذاناته أطول وحلكه يعوج. أنتِ مو وليتي للعراق؟ منو ردج؟ ناي: شوف جود،

يقول لي: "اطلعي منا ما نريدج، أنتِ لزقة". كرم: وبلا كرامة وشكلج مرعبل، وأنعل أبو غيث اللي مكمش بيج، اطلعي لج. قالها وسحلني من بلوزي، نزلني الميز، أخذني للباب. للباب. صارت بوجهنا رنو تبكي. تركني، قال: جود: اشبيها سماهر؟ رنو: يا سماهر؟ حضرت هالكلبة تركتني بالباص وطفرت، خلته ياخذني للموقف الثاني. اجيت مشي زين ما ضعت. جود: دخلي تعالي، اكو خبل يامن روحه بيد هاي. رنو: بس يجي خالي وأنا أعلمها.

جود: غيث ما يرد. ضحك عليجن، جابجن، حبسجن ويه ناي وطفر. دتعالي دخلي. دخلت جوه تمسح بوجهه. عدّل قعدته جود ودنق على فونه. قعدت يم رويدة، وأنا رديت لمكاني قعدت. اجت غسق صبت قهوة، خلتها قدامنا. رنو: شتسوين هينه أنتِ؟ جود: شهالحكي بنتي؟ عيب. رنو: لا قصدي إنه ما تشتغل هينه، عش اجت؟ جود: زميلتنا، أنا عزمتها وهذا مكانها مثل ما هو مكانها. اشوكت ما تريد تجي هلا بيها. خليت الصينية غسق وشلت جنطتها طلعت قام. وجود طلع يركض وراها.

رادت رويدا تقوم، أشرت لها لا. ردت قعدت. أقل من عشر دقايق دخلوا يسولفون ويضحكون. أباوع لرنو تاكل بشفتها، تريد تشلعها من القهر. شمرت جنطتها وتربعت يمي عالميز، سدينا المكان. رنو: تره قعدتكن موش حلوة، والميز راح ينكسر. جود: فدوة إلهن، خليهن براحتهن. أي، أمرن شتطلبن عشاء حتى أوصي. رنو: عش توصي؟ موش هذا المطعم خير من الله بي؟ جود: ناي ما تحب الأكل التركي. رنو: من اشوكت؟ الله يرحم شجانت تاكل؟

ولا تطلب. ماما جاي تطبخ، مجهّزة الزاد. ردت أرد بس شدني كرم شلون فاتح حلكه صافن عليّ. ندسته، نزه. همس: كرم: كم سن شالعة منها ولج؟ بالقوة كتمت ضحكتي. غسق: ناي، شمري لها كلمة خلي ترد تحجي. خربطت بالحساب بت الأطعة. أذنها تحجي سريع ما ألحق أحسب كم واحد باقي. غسق. "شنو راح نظل نتناكر؟ تره كعدتكم مو حلوة." جود: "وين تردن آخذجن؟ كولن آمرني." قلت له: "ما بيه حيل أطلع، لهنا كوه اجيت. دبروا لكم شغلة تتسلون بيها."

غسق: "مو بكيفج، نطلع." : "ولج، عدهم شغل خطية، المطعم لازم يتنظف." : "تمام حلو، تعالوا نلعب لعبة كنا قبل نلعبها، واللي يخسر يا ينظف المطعم كله يا يعزمنا على... كرم: "عرنوص! : "يلا عرنوص عليها، عدكم أقلام وأوراق؟ جود: "موجود يمج على ميز المحاسبة، بس شنو لعبتج؟ خو مو تفريها علينا؟ : "إنسان، حيوان." كرم: "يعني آني وناي." جود: "انجب يا الأرنب، وكوم جيب الأوراق، أحب هال لعبة."

جابت الأوراق غسق ووزعته، وبدت تقول الأحرف ونطت التوقيت. بلشنا بالكتابة وكرم يمي متربع، أعرفه ديغش بس تركته. قبل التوقيت، سحب جود الأوراق وبدأ يفرز منو الفائز. باوع للورقة صاح: "كررررم! شاسمك أنت؟ : "طبعًا كرم راد لها ذكاء." : "لعد من اسمك نعال، كاتب ناي ليش؟ : "لا يا غبية، اسمج كاتبته ويه الأجوبة." : "هيج غباء ما شايف بحياتي، غاش حتى الاسم بدون لا تقراه! ولك أنت واصل مرحلة تنحسد عليها، كوم العرنوص عليك." : "منين؟

ما عندي فلوس." : "لعد رويدا تقوم تغسل المطعم." رويدا: "وأنا شكو؟ كرم: "كوموا أوكلكم سم زمهري، عساكم بالمرض، أنا منيلي فلوس وتخسروني! اشتعل أصلج غسق، هاي لعبة ناي زاعليها، خلي تولي ما نريدها بالتيم ويانا." غسق: "هاي كلها على كم عرنوصة؟ : "لعد شعبالج! تدرين العرنوصاية الوحدة بيها اثنين منج ومن ناي! كوموا الله بلاني بشلة نحس وقصاصة." قمنا طلعنا قفلنا المطعم ورحنا عالساحل، الجو حلو بداية برد. قعدنا اشترالنا عرنوص شوي

ورزعلنا كل اللي ينطي يكله: "سم ماماكل أبيت أبوك، كاتلك الجوع مفجوع." رنو: "خيرنا يسد إسطنبول." غسق: "اتركج من خيركم، شلون راح تاكلين؟ كرم: "اتمثه مث... جود: "كررررم! غسق: "ليش دتصيح عليه؟ تره صدق العرنوصة غالية، فوك ما أخسر على ناس ما تسوى." : "بنتي ما يصير هالحجي، مو كل اللي يحجي أنرد عليه." رنو: "اتركها، ما اهتم أصلًا، تلقاها مستها الكلمة." : "ههه، مستني. صح أنا ما أحب أحجي، وأصلًا بس الما شايف يتباهى بالفلوس،

بس دوني معلومة: بابا من أشهر وأغنى محامين بغداد، وأنا بنته الوحيدة، وفهمج كفاية." : "من هيج جاية تشتغلين هينه؟ : "أدرس لغة ما أشتغل، وهم دأفكر أشتغل ويه جود من سولفت لي روشة عن ناي عجبني أكون نسخة مثلها." : "ما نشغل ياهو الجان بمطعمنا." : "من يكون المطعم مال أبوك ذاك الوقت تحجين الحجي، يم ناي لأن مال زوجها، وجود الكامشة." : "جود ما يشغل بكيفه." : "صدق جود ما تشغلني؟

جود: "ما طولج صديقة ناي أسلمج حتى مكاني إذا طلبتي، بس لا تضوجين روحج." : "فديت ناي، انطيني رقمه." ضحك، دنج خجلان، دحجته برجلي، باوع لي. : "لا تقلق صديقتي، بت عالم، أضمنها إلك ما تضحك عليك وتتركك." : "كولي والله." : "وداعت كرم، بس أنت للأمان لا تفتح كام وياها قبل لا تخلي الحلقة بيدك." : "مفهوم، الحياة مقلوبة يمكن." غسق: "والله أنا خوش بنية، حتى شوف ناي صادقتني أول ما شفتني."

رنو: "أي عجل، غير صنفها تزتن روحجن عالزلمة، ما تعرفن الحشمة ولا المستحة شنهو." : "بس على كيفج، الصراحة ما افتهمت غير الثثثث." جود: "غسق خويه." هو قالها وهي دمغتني، باوعت لها وفركت براسي. : "سمعتي! : "مو قلت لج خجول، صبري عليه، لازم يبيع ثقل بالبداية، شكد أظل أعلمج بيج." : "آهاا، نسيت. آسفة حبيبتي، وجعتج." : "لا عادي، ضلت عليج، أخذي راحتج." : "صدق رجلج ماكو، تعالي سهري ويانا."

جود: "لا غسق شوفي، والله مو قصدي شي، وأنت حالج حال ناي وواثقين بيج، بس زوجها ما يرضى. أنت شوكت ما حبيتي تعالي، أترك لكن الشقة، اسهرن براحتكن." رنو: "خالي ما يرضى تسهر بشقتك." غسق: "صدق ناي اللي تحجي هاي؟ شنو هي حجت؟ والله ما منتبهة جنت ويه كرم نحسب. رنو: "شت حسبون؟ صدق انتو ما تخجلون؟ : "بنتي منو وصل يمج؟ دنحسب عدد الكلاب اللي تعوي، صدق جود ليش ما ملقحيهن ذني، تاركيهن ينبحن هيج؟

: "أنا أقول خلي نقوم قبل لا تعلق، وأنت غسق إذا تردين شغل تعالي، اعتبري المطعم وصاحبه تحت أمرج." : "لا والله دأت شاقه، غير بابا يرجعني لبغداد، بس صدق إذا ناي اشتغلت أنا وياها عالواهس، هم حلو، أقلها أحس روحي لي قيمتي، مو عايشة وأتباهى بفلوس الأجداد." : "شوكت ما قررتن خبرني، وأنت رنو هم وياهن، مو شغل بس خلصن وقت، راح تشوفين الحياة غير من تستلمين فلوس تعبج وتشترين بيهن شي للتحبي." رنو: "أناااا أشتغل!

عش عيني هاي، وأنت تعرف بت منهو أنا، وعشيرتي ياهو، خلينا الشغل للما عندهم خبز نتصدق بي عليهم." كرم: "من هيج غيث تركهم، واجه لهنا يركض ورا ناي حتى يوكلها، شوف وأنا ظلمته. سودة بوجهي." جود: "كوم لا يرد يعدل وجهك، يله يابه قومن تأخر الوقت." : "فلوس العرنوصصص وين؟ : "انننعل خرب ذل أبهاتنا بي كرم، هاي عزيمة ما يصير تاخذ فلوسها." : "كل من ورا هالقزمة صديقة ناي، شتصاحب غير مثلها، أنا جابني للعزايم."

جر جود دفعة قدامنا وإحنا قمنا نمشي ورا. غسق كانت عفوية تتصرف بميانة وأخذت علينا بسرعة رغم ما صار هواي من التقينا. عكس رويدا اللي تمشي مدنجة خجولة وهادئة. كل ما صارت رنو يمها ابتعدت عنها حتى لا تسمع حجي لأن تفشلها وما تعرف ترد عليها.

راح كرم يوصلهن وإحنا رجعنا جود رجعنا لشقتنا. دخلت لقيت جنطة ملابسي بالصالة، سكتت لأن عرفتها تريد تفر سالفة وتسوي مشكلة ببالها، ما أعرف شي يدور براسها. رحت أخذت من بلوزات غيث غيرت ملابسي واتمددت عالقنفة، هم زين بيهن حالة ينامن من وقت. قلبي يم غيث بس كرامتي ما تسمح لي أتصل. قلبت بالفون دخلت عالرسائل مالات البارحة، قريتهن حسيت قلبي دق: "وين أنت هسه؟ رجعت بعدك؟ دخلت على رقم أركان اتصلت،

شوية ورد قال: "حيا الله بمرة العزيز." : "هلو أركان." : "هلوات يابا، أمريني." : "إذا غيث يمك لا تجيب طاري اسمي." : "عجل متصلة لخاطر أمي؟ : "لا بس أمن عليكم، كملتوا شغل؟ : "أي من ساعتين ردينا يم بدعة، قاعدين، معتازة شي؟ : "سلملي عليها وكلها العالم بلشوا يسحبون الخيط." : "هاا حلو لغز، انطريني دقيقة." اختفى صوته ثواني وقال: "تقول البكرة بيدي كاضبتها عدل، وما طولج هيج نبهة، عينج بالخيط لا يلتف حول ركبتج ويكتم نفسج."

: "أفاا عيب! وأنا أخت عاشق، ما تركتهم يسحلون إذا ما أمنت المقص بيدي." : "ذيبة." : "لا تغلط." : "ناي انقلعي." : "لا تقول اسمي حاف." : "ولي لج." : "لا تقول لج." : "اشتعل أصلك غيييث! سديت الفون، ضحكت، نفس الخبال ربي خالقهم، بسرعة يتنرفزون. خليته يم راسي، انقلبت حضنت المخدة، شوية ورن شلته لقيت غيث يتصل بس فيديو. رديت لقيته قاعد يدخن، منتجتي أخذ نفس ونفخه قال: "أي يولي قالوا متصلة." : "منو أنا؟ لا طبعًا، أصلًا ما ذكرتك."

: "هاا ما ذكرتيني؟ مع العلم أول شخص أجيتي على بالي." : "بشنو ذكرتني؟ : "والله واحد من زلمنا ما أجه، ظل عندنا نقص، اعتازيتج تسدين مكانه." أكلت شفتي من الحركة. : "آخ بويه، كونج يمي وأعلمج شلون تسوين هيج، كم مرة نبهتج يولي تبطلين هالحركة." : "روح غيث أريد أنام، ما فارغة لسوالفك، اتصل بالنعوصة أم الأنوثة مالتك." : "نايمة العشق، ما أحب أزعجها، تعرفيها رقيقة ما تتحمل السهر، أخاف أخدش مشاعرها بصوتي."

: "لا لازم تنطيها بروفات، بعد سبوع لزواجكم، دتجهز فرحانة، تالي تنصدم ومشاعرها الرقيقة تنخدش على قولتك." : "زواج منهو؟ شجهز؟ : "زواجكم، صدق قالت خالة راح يطلكج قبل الزفة." : "آهاا زواجنا، أي عش لا، بس خلي أحصل مومن بالأول وسهل الباقي. تعالي لج هذا يا تيشيرت لابسة؟ : "مو ملابسي كلها غسلتها، ما عندي كلشي، باجر حغسله وراده ما عليه." : "ممم عش بالصالة ضالة؟ : "وين أروح لعد، ما ترضى أروح لشقة الولد." : "عش موش بغرفتج."

: "سماهر أخذتها لأن سارة تريد غرفتها." : "قومي أنعل أبو سماهر لأبو سارة، روحي لغرفتي الجو بارد، لا تظلين بالصالة." : "لا دفيانة مو كلش باردة، والغرفة اللي طردتني منها ما أدخلها لو أموت." : "شلون تخليني أحجز وأرد أد فنها مكانها! ناااي، الج عشر دقايق أتصل أدحك كل أغراضهن زاتتهن ومطمورة بفرشتج." : "هسه أقوم بس دأقلك بالأول لحن اتصلت." : "ناااي، أختج طلعيها من راسي، عندي مشاكل تكفيني ألف سنة لقدام."

: "بس خطية والله ضاربها حيل." : "يطبها مرض، تتحمل زلمتها غصبًا عنها. ناي ما أحب أكسرج ولا راح يجي يوم أسويها، لا تطلبين لأهلج شي حتى لا تجبريني أردج." : "تمام، ما راح أجيب طاريهم. كافي اللي سويته والخسرته عليهم." : "بنتي ما جاي أذكرج ولا أحملج المنية، بس اللي يسوي الغدر مرة يسويها مية مرة، لا تثقين ببشر. بسج تنطين بنفسج لخاطرهم. بالمناسبة، بشري اعتازيتي علاج لا؟ سديت الفون بسرعة، شكد ساقط!

بس صدق ذكرني، أصلًا جنت ناسيه حتى الألم خفيف ولا حسيت بي. لعد شكد مقلب بنات هذا. خليت الفون عالميز، طبقت مخدتي سمعته يرن. أهووو اليوم مبين ما راح أنام، منو هذا النوب؟ قعدت على حيلي وشلته لقيت لحن تتصل، رديت أجاني صوت عمو تعبان. ***لحن*** استوني أنام، واندفرت الباب، دخل عمي، قعدت. إجه يمي، قال: "شوفي لچ، الچ حل من اثنين، يا تخلصين نفسچ يا تلحقين أمچ." "شنو عمو؟

"خالچ إجه يريد ناي، متخبل علينا، يقول لو تزرعها قدامي لو أوديكم ورا الشمس." "ليش شصاير وهيچ متخبل؟ "ابنه طالع عنده عجز بالكلية من كثر الضرب ورجله سقطت، يقول بيها وكله بسبب هالساقطة." "جذاب هذا، متورط بشي ويريد يسده بيها." "مالنا دخل، أني مو گد خالچ، واحد شراني وزايعته الگاع، وأني عندي جهال رجال فقير، كافي خيري شري، مو بسبب حضراتچن أتيه عائلتي." "ليششش عمو؟ دتسوي هيچ؟

مو طلب أنطيكم الذهب بس حتى تركوها تعيش وأنطيناكم، مو قلت أزوجي سمار حتى بعد خالچ ما يگدر يرجعها وتزوجت، شنو بعد تريد؟ حتى راتب بابا دتاخذه، كافييي! "هاي عار ديعيرونه بيها، حتى خالچ يقول قمت أستحي أطلع وين ما أروح، يقول هذا اللي شردت عرضه وراحت للملاهي تشتغل." "تعرف ما تسويها عمو، ناي بت أخوك." "لا متبري منها من يوم اللي انهزمت واتزوجت غصباً عنه، يلا هسه تخبريها تگليلها تعالي." "ما أسويها لو أموت."

"لعد قومي انتي، هسه يطلگچ سمار وروحي ويا." "وين أروح عمو؟ صدگ دتحچي؟ "أي صدگ، هددني يأذي ابني وهو هالواحد عندي، أني شورطني بيچن، ساقطات مثل أمچن، والله بلاني بيچن، مو چنت عايش بهدوء، أش چابچن عليه؟ "ما يگدر يسوي شي، بس يهدد هذا چبان." "أي تاليتي مثل أرزيد، يدخلون عليه، أني ابني يذبحونه ويغتصبون مرتي، قومي لچ، الله ياخذچن ويخلصني منچن."

"ما أروح دخيلك، والله اللي تريده أسوي، هذا راح يبيعني من واحد لواحد، عمو أني عرضك، شلون ترضاها؟ "يطبچ مرض حالچ حال أمچ وأختچ، أني شخصني بهالشلعان القلب، متردين ترحين خليچ، ما متعاجز منچ، بس أختچ تخبريها هسه تجي." "ما راح أخبرها لو أموت، وهااا حتى لو جبرتني ما راح تجي، لا تنسى عرفت كل چذبكم." "إذا قلتلها أختچ بين الحياة والموت راح تجي."

"زوجها ما راح يخليها، وحتى لو خلاها إذا واحد وصللها يحركه وهو عايش، مو بالبال سمار هذا غيث الأنباري." "مالنا شغل، هم قلتله، قال بس خلي توصل للمطار ومالكم شغل بالباقي، يلا هسه شقلتي؟ "راح يضربها بسيارة لو طلقة ويسقطها، ليش عمو خطية والله ما آذت أحد؟ "لعد قوميييي، يلا روحي لخالچ وفهمي هالحچي." "راح ياخذني مكانها؟ "يطبچ مرض خلصنييييي، شبلتني، خلي ياخذچ يبرد دمه بيچ مكان أختچ، ظلي خدمي يمه ما نريدچ بيتنا."

قالها وإجه جرني من بلوزتي، كمشت إيده أتوسل بي، دنكت على إيده بستها أبچي، دفعني طلعني من الباب، قال: "قدامييي يلا." "الله يخليك والله راح يبيعني هذا ما يخليني للخدمة أعرفه." "سمار طلقها وأنطيها لخالها." "لا لا سمار، أني زوجتك وعرضك، لا تسويها، ولك يبيعني هذا." سمار: "بابا خبر أختها خلي تجي، لحن ما تستاهل تروح بذنب ذيچ الساقطة." "ما ترضى حضرت مرتك المصونة." "لا ترضى، اتصل بيها مالك شغل بلحن."

"والنبي أنتحر ولا أخليكم تأذون ناي." "انتحري بيت خالچ، روح سمار صيّح خالها برا خلي يدخل يربطها وياخذها، مالي دخل بيهن بعد." طلع يصيحله وأني قعدت يم الحايط لامة رجليه، أحس قلبي يريد يوكف. شال فونه عمو اتصل، أباوع للباب متبنجة بس الرجفة كامشتني. إذا رفضت هسه يسلموني إله، وإذا سكتت أختي راح تنتهي حياتها. بثواني كون أخذ قرار اللي يحدد مصير وحدة منه. صوت ناي قالت: "خير لحن؟ وعمو رد: "ها بنيتي...