رواية لبوة على شفا الثار الفصل السادس والثلاثون 36 - بقلم Leo Alfatlawi

الدكتورة تحكي وأنا عيني بكرم اللي منتظر مني الجواب، انداريت باوعتلها گالت: "ها شقررتي؟ قلت: "وليش حتى يطلع مشوه وشنو خطر على حياتي؟ قالت: "مصابة بمرض السكر، نسبته مرتفعة للـ 450، وهاي النسبة كفيلة بعمى الطفل أو نقص بالنمو مما يؤدي إلى تشوه خلقي، بالإضافة إلى اكتشفنا من خلال السونار عندج عظم بالرحم ومستحيل الولادة الطبيعية، والعملية خطرة بالأخص أنو نسبة السكر ترتفع خلال الحمل." قلت:

"ماراح أنزله، مستحيل ابني ماتخلى عنه، كافي مرة بعته وتندمت ماراح أعيدها." قالت: "خطر راح يكون." قلت: "ميخالف، اكو منو اليربي غيري بس خلي يجي للدنيا، وأنا راح أتوقى ماراح أخلي السكر يرتفع." قالت: "أتوقعين على مسؤوليتج وتطلعين؟ قلت: "اي أوقع." قال كرم: "ناي دتگلج خطر على حياتج." قلت: "يلا من زين حياتي، وين غيث يجي يسمع؟ جنت أعيره كل يوم بالإدمان ومحملته مسؤولية ابنه يطلع مو كامل، تالي طلعت أنا المريضة." قال كرم:

"من اشوكت عندج سكر؟ قلت: "لا متفاجئة منين اجاني وأنا عايشة بحياة هادئة من غير صدمات ولا أكشن. گومنه لا يجلبون بينه وتعالي نزلي غصباً، وروح بابا ابتلي بيهم ودخل السجن." قال كرم: "تجين وياي؟ قلت: "ويين كرم وين أجي كل عقلك؟ لا طبعاً، أرجع للغرفة وشغلي هياتها، كتبت علاج راح استمر عليه ما عليه." قال كرم: "لعد گولي شنو معتازة حتى أجيبه الج." قلت: "فلوس أحجز، أروح أجيب لحن، فدوه دبرلي." قال كرم:

"عندي، نروح أنا وياج سوّه هم أريد أشوف أهلي، بس مو هذا الأسبوع، تگدرين أتانييني؟ قلت: "اي عادي، هم أحصل أسبوعيتي تفيدني أشتري كم شغلة ناقصتني." قال كرم: "لعد گومي وقعي وأنا أجيب لج الوصفة، أحسبهن من ضمن الطلب كونج بيج حظ وتغلسين." قلت: "ماغلس، دروح جيب يلا حتى أرجع للكافي، حرمات تروح عليه الأجرة مال اليوم." قال كرم: "كون ما مشوّه وما تتندمين أخذتي هيج قرار." قلت: "حتى لو مشوّه أبوه يعالجه بس ما أنزله." قال كرم:

"يعني هسه أنتي بعدج على ذمته؟ طلاقكم باطل؟ قلت: "حتى لو طلاقنه باطل ما أرجعله ولا راح يدري، ما يستاهل أباوع بوجهه بعد، هذا ابني وحدي ولازم أفكر منا وجاي بمستقبله." قال كرم: "الحمد لله خلصنا من سالفة الانتقام ودم أهلج." قلت: "لا ما خلصنه، آخذه بدل ما بأيدي، آخذه بالقانون بس كون أتعب على روحي شوية، آخذ الشهادة حتى أعرف أشتغلهم عدل. صح أتأخر بس وراح يكون العقاب مضاعف." قال كرم: "يله گومي والله يساعدج على عقلج وتفكيرج."

ما رديت، گمت طلعنا بعد ما اشترى الوصفة، جانن أُبر كبس مثل القلم، لأن نسبتي عالية. رديت للمطعم بگد ما فرحانة بگد ما خايفة، صدك أجيبه مشوّه وأكون أنا السبب. خليت أيدي على بطني غمضت، ابن غيث هنا بداخلي ديكبر، شنو شعورك لو جنت تدري بي؟ أكيد راح تفرح. مرّت الأيام والمرض تعبني أكثر من الحمل، أبهت بسرعة إذا اتعطلت الإبرة يغمى عليه ما أحس بعد.

الإبر غالية، فلوس شغلي يا دوب جانن يكفن علاج وإيجار، والأكل گمت أقتصر على وجبة وحدة. اضطريت أشتغل شفت ثاني بليل، صح تعب بس ساعدني هواي، گدرت أجمع كم فلس حتى أسافر بيهن. خلصت الشغل رجعت للغرفة، وصلت للباب دأفتحها لگيت علبة، شلتها مكتوب عمري على شكل شمعة. شنو هاي؟ معقولة كرم؟ طلعت فوني اتصلت وأنا أفتح الباب، دخلت رد: "هاا حاتتنا." قلت: "شنو هالهدية؟ قال: "يا هدية ولج أنا وياج بالنص." قلت: "مو أنت كرم؟ قال:

"مالت شنو هسه غير اتفهمني." قلت: "مال عيد ميلاد." قال: "هو مواليدي ما أذكرهن، تريديني أذكر مواليدج؟ اشكد فايخة، شنو داخلها ولج؟ قلت: "ما أعرف هسه أفتحها بس منو الدزها شتگول؟ قال: "تبين من المضمون، فتحيها دنشوف." خليتها بالگاع، قفلت الباب، ذبيت القمصلة، گعدت فتحتها لگيت قطعة گصت كيكة وياها شمعة ورقة مطبگة. يمها كارت شلته مكتوب: (كل عام وأنتِ حبيبي الذي ليس لي) شلت الورقة، اتبنجت بمكاني وأنا أقرأ. قال كرم:

"ناي شطلعت الهدية ولج وييينج؟ قلت: "هذا رقم دارنا القديم، أي أعرفه كرم، بيت أهلي متنازلي عنه شخص اسمه أحمد." قال: "غيث كاتله وماخذه خاوة، ما تقبل غلط." قلت: "ليش حتى يتنازلي على بيت بهذا السعر؟ قال: "منو يگول هو؟ أنطي مجال أصلاً بالعراق بعده ما جاي، شلون خلاها باب غرفتج؟ وين يندل مكانج؟ قلت: "يعني أنت اندليت وهو ما ندل؟ كررم، وعالعموم ما رايدة منه شي، راح أردها بس أرجع." قال:

"لعد رجعي ابنه هم، لو الشغلة التفيدج تكمشين بيها، تذكرين كرامتج بس بالمصالح؟ قلت: "هذا ابني مو ابنه." قال: "بعد يومين أروح، دزيلي صورة لجوازج حتى أحجز لج وها سيارة تره." قلت: "ميخالف بس باجر أروح آخذ إجازة، ما أظل أكثر من أسبوع." قال: "براحتج، اشكد ما تردين، أنا يومين وما أكثر وأرد. يلا ولي دا أشتغل." سديته، باوعت للكيكة ابتسمت تلقائي، أول مرة واحد يذكر عيد ميلادي وأول مرة أحتفل بي.

طلعت الگصة خليتها گدامي، حطيت الشمعة شعلتها. أتربعت گدامها أراقبها، تگول طفل بأول عمره فرحان بيها. غمضت شأطلب؟ أمنياتي هواي والوقت ضدي. ابني عوضني بي يا رب. راح أكون له سند وأم مثالية، راح أخليه يفتخر بكوني أمه. أضمه بروحي، راح أخليه يكون حنين مثل خاله وشجاع مثل أبوه. طفيت الشمعة. شلت الكيكة دخلت بنفسي بس خفت أكل منها، بس ضگتها. گمت طلعت لگيت جهال تلعب، أشرت لواحد أجه يركض، انطيتها راح يركض فرحان.

دخلت غيرت ملابسي ومثل كل يوم انطيت عهد أكون سند نفسي وراح أبدأ بتحقيق حلمي من أول خطوة. طلعت الدفاتر والأقلام، خليت حذائي ستاند وخليت الفون بي، دخلت على درس الإنجليزي، جان موضوع إنشاء الوحدة الأولى السگائر، ضليت للأذان الصبح أعيد وأكتب، لأن تاركة من زمان، عقلي أمحجر، كلما أشوف روحي مليت. أطلع صورة غيث وأتذكر شلون ظليت بيومها للصبح بالشارع أبجي لأن خايفة وأعرف ما عندي شي يحميني ويسندني، أرجع أقرأ لمن حفظته.

شمرت دفتري شفته أذان، اشكد أتمنيت أوقف أصلي بس لا المكان نظيف ولا أنا نظيفة بسبب الوضع والحمام المشترك. سحبت تيشيرته حضنته وتغطيت، ما أعرف ليش بس أحس بالأمان من أشم عطره. ***لحن*** صاحت سهيلة: "أركان الحگ! وأنا گلبي جمد بمكانه، شفته أجه قبل لا تحجي، نزلت دموعي. قال أركان: "شصاير يولي؟ قالت سهيلة: "دحگ حرمتك الشريفة شتعلم البت." قال أركان: "شكووو؟ لا تظلين تهترين الغي." قالت سهيلة:

"مطلعة صورة رجلها القديم واتگول للبت دحكي الفرق بينو وبين أبوج حظي الردي الجابني." قالت ريحانة: "بالقرآن أجذب يخوي، أنا واگفة البت گالتلها عش شكلج يختلف عن أهلنا، ردت أنه أشبه جدتي وطلعت الصورة حتى تراويها." هز راسه، أي بس شكله مطعون، باوعلي وهمس: "حذرتج يبت أنهار." طگ الجاهز بيده ورگعه براس سهيلة، أجه بنص وجهها، صرخت صوت كمزتنا. قال أركان: "مرررض! اسمعي لج هالمرة دحگت بيد البت موبايل، مرة ثانية راسج أفلعه."

قالت سهيلة: "عجل حرمتك تسكت عنها؟ قال أركان: "سهيلة والي سماج بهالاسم أدفنج مكانج وأحسب الله ما خلقج، لعب جهال وحريم، بعدي عن طريقي إذا گضبتج جايبة طاري حرمتي جدام أهلج، موش أطلقج لا بالقرآن أذبحج سمعتييييي؟ قالت سهيلة: "أي أي ما أحجي وداعة جهالي أبد." قال أركان: "ما تكربين يمها ولا تتنفسين جدامها، بس تجيني تشكيج أكتم نفسج والخلق الكون وأسحگ راسج." قالت سهيلة:

"لا لا وروح أبو حسام إذا سمعت بيه تشكيني إلك حگ تعمل كلشي." دفعها عن وجهه وراح، انلطشت باب المطبخ، اندارت تفلت عليا. قالت ريحانة: "عش تفلين عليها؟ ما كفاج السويتي؟ خافي ربج، عندج بت وهم تفر الدنيا بيها." قالت سهيلة: "بتي مترباية ما دحگ عالحرام ولا توصل كربو." قالت ريحانة: "سهيلة لا تجذبين الجذبة وتصدقيها، أخاف حلفتي بكتاب الله جذب وصدگج أبوي، تراني أعرف السالفة، أروح أگلهم أخلي بدل ما يطگج يطلقج ويردج لبيت أهلج."

قالت سهيلة: "إذا تعرفين عش لسه ساكتة؟ قالت ريحانة: "لخاطر ولد المرحوم، أعرفن يتشتتون ويضيعون بيد أمج وتربيتهم تصير عوجة مثل تربيتج." قالت سهيلة: "يعني ما مترباية؟ قالت ريحانة: "أي الي تطعن بشرف يتيمة بالباطل ما تعرف التربية، والي تحلف بكتاب الله جذب وبراس وحيدها هاي مو ما مترباية لا حتى بت الشوارع ما تسويها، انطبي وركدي أحسن ما أروح لأركان وأحجي الصار." قالت سهيلة:

"ريحانة وداعة أبوي إذا طلعت كلمة وحدة، تعرفين شنهو گاضبة، أزتها بحلگ أمج وهيه تعرف شغلها، إذا ما خليتهم يستروج بفلاج بستانه ما أطع أنا أمو لحسام." راحت وريحانة تستغفر، اندارتلي. قالت ريحانة: "خوثة ما بيج حظ." قلت: "شنو خوثة ما دتشوفيها ستشوي؟ قالت ريحانة:

"لحن أنتي بدون حماية أركان، تراج تنتهين، أمي وسهيلة گاضبات لج الطريج، ألف شغلة عاطلة زتنها براسج، وحتى مصوراتج وأنتي مفرعة تحجين ويه وحسام وهو گاضب أيدج، وأنتي موافقته؟ لو ما صبروا ومنطي كلمة عهد لخيتج، جان دفنج عالدحگو." قلت: "عزة والله هو كمش أيدي والله." قالت ريحانة:

"خيه أعرفن تعلميني أنتي، بس أركان متسودن، الغيرة تنهش بي، عجل العملوا بحسام قليل، صار أسبوعين يعالجون بي ما گعد يشفى، وأنوب جدتي خالة شاهين يرفعوا فلقة." قلت: "بعده حاجزي؟ قالت ريحانة: "لا راح عمي وأمي وگعوا على رجلين جدتي وأقسمولها مية يمين ما يعيدها، وهيه الدزته ماكو هيج حجي بطلاع الروح حررته بس شضال بي آخر نفس." قلت: "أمج شلون تحلف جذب؟ قالت ريحانة:

"هذا الي مسودن أبوي وخال راسه يفر ما يعرف وين الصدگ من ناحية أمي الحاجة بيت الله تحلف، ومناحية أنتي مو هيج طنتج." قلت: "زين هيه ليش هيج اتسوي؟ والله ما أذيتها." قالت ريحانة: "ما تريد خيرنا للغرب، ما طولج مو من بنواتنا ما تريدج هينا، وأنتِ الله يحفظج حليوة وعين أركان بيج، خافت تاخذي وترحين يم أخيتج ويروح أركان مثل غيث." قلت: "راح أروح، خابرت ناي ما أظل كم يوم وتجي." قالت ريحانة: "اشوكت خبرتيها يمصخمة؟ شكال أركان؟

موش نبه ما تتصلين بأحد ولا تگضبين موبايل؟ قلت: "البارحة الصبح من." بس محد شافني، بسرعة غلقته. أختك ما تفيدك، سندك زلمتك، روحي صلحي البينكم وحاولي تحجين وياه بكل طريقة بلكي ترد علاقتكم مثل قبل. تراهن ما يتركنج لمن يوگعنج بمصيبة وهم أركان ما يهدج. هو گال أطلگج. عجل أنتي الخسرانة ما تحصلين مثله. خلصتي شغلك، أخذي عشاك وصعدي لغرفتك. أخاف اليوم يردون حسام لأن أبوي طالبه. ليش؟ أخاف هم يرد السالفة من جديد.

لا تربي، وأبوي ما راضي يضل بيت جده غادي لأن عمي رد أم عامر وهاي تلعب بعقله وهو مراهق تالي ينجتل بسببها. أشرت: اي. وحتى عشا مالي نفس. طلعت رحت لغرفتي، دخلت قفلت الباب، أخذت ملابسي ورحت للحمام سبحت. طلعت مشطت حتى ما نشفته، اتمددت لأن التعب ما يخليني حتى أباوع بوجهي. استوني أغفى واندقت الباب وصوت أركان يسولف ويه بنته. قمت حتى نسيت شنو لابسة من النعس. فتحت الباب، بعدني ما حاچية، دفعني حيل وجر الباب رده، ظل يسولف.

رجعت لفراشي اتمددت. شوية ودخل رگع الباب. يولي أنتي، الله خالقج غبية لو تتصنعين؟ شنو سويت؟ يبه، صبري خلص وياج ونعلتي أبو أصلي. ملابسج ذني ما دحگين عليهن هيج قبل تلبسيهن؟ غير أريد أنام وحدي بالغرفة. استغفر الله، هاي إذا ما تجلطني ما ترتاح. طلع فونه اتصل وشمره عليه. ما فهمت شنو، رفعته سمعت صوت بيبي تكول: ها يمه أركان. رف قلبي، خليته على أذاني رديت: بيبي. يبعد بيبيتج، شلون يا عمري؟ زينة بيبي. مرتاحة؟ اي كلش، أنتي شلونج؟

ما عندي شي گاعدة بس قلبي عليج. عاد اليوم اتصلت، گال من أرد أخليها أتخبرج بروح أريد لحن مرتاحة ما مضوجج. باوعت لأركان، دار وجهه، شمر مفتاحه، أخذ منشفة دخل للحمام. بجيت. عرفتج قلبي حسني. بيبي، اتندمت أريد أرجع الج، تعالي أخذيني. منو ينطيج وين أوديج؟ بيبي ما أگدر أعيش هنا والله ديضربوني، أشتغل من الصبح لليل وما راضين، وأركان تگول جايبتني من الشارع حتى أخاف أحجي ويا لا يموتني. مو گلتلج لا ترحين، ارضي بنصيبج.

ناي گالتلي خوش ولد وراح يحافظ عليج. بيبي اتندمت والله أتمنى ما طالعة ولا تاركتكم، أتمنى ما سمعت من ناي. منو ديضرب وحدة يتيمة؟ منو ما يخاف الله؟ عمتي كل يوم دتضربني. بيبي ديسوون شغلات ويهددوني إذا گلت لأركان يشوهون وجهي. بيبي خايفة. سودة عليه، ش بيدي عليج ولج؟ حتى سمار اتزوج، المن أجيبج وين أخليج؟ ما تگوليلي؟ مو جنتي على ذمته و گاعدة مرتاحة؟ ليش خليتي هالصايعة تلعب بعقلج؟

بيبي أختي مو صايعة، أكثر وحدة خايفة عليه وأكثر وحدة ضحت بروحها لخاطري هي. بس گولي ما تجي وياها عدلة تره ناي اتطلقت. أوف يا حظجن يا بنات أريد. منين تجيبنه؟ اني راح أجي أشوفج وبلكي أحجي ويا أبوهم يردج وياي، أخذج وأروح للشمال يم أخوي. استعجلي بيبي فدوة. وإذا ما رضوا شلون؟ عادي أنهزم. بعد ما أظل، نروح يم أخوج محد يندلنا لحد ما ترد ناي تاخذني. سمعت باب الحمام انفتح، مسحت دموعي وگلتلها: يلا بيبي ديري بالج على روحج.

سلمت وخليت الفون يم المخدة، تمددت أباوعله. نشف شعره، خلى المنشفة على متنه، راح للكنتور فتحه، طلع كم سلاح وياهن طلق وشي مثل الدهن. خلاهن بالگاع، گعد يمهن يكمش السلاح يفصخه كله يمسحه ويرد يركبه. لمن خلصّهن كلهن، عبّاهن طلق. شال واحد منهن، سحب أقسام وندار لي، خلاه على راسي. جمدت، حتى عيوني بعد ما ترمش. ضغطت زناد ترفرف روحج. ليش شنو سويت؟ رفع حاجبه. وروح بابا وداعة ناي أني ما أختنق. ناوية تنهزمين؟ لاااا.

بعدني أحجي وأشوف إيده اتحركت بخفة وصوت الطلقة ثارت. ضميت راسي بسرعة، حسيت البوشة إجت يم عيني جانت حارة، غمضت روحي رايحة. المرة الثانية بنص راسج. فتحت عيوني حتى النفس كاتمته. شال الأسلحة دخلهن كنتوره قفله. اندقت الباب، صوت ريحانة گالت: شكووو أركان؟ مشي يا خوي ماكو شي، سلاح جان مايل عدلته. أبوي رايدك. يولي ماكو شي بالغلط ثارت طلقة. أركان لا تسودن البت. التدحگ غير زلمتها وناوية تنهزم، حقها الدفن.

ظل هيج لمن تخبلها وتخلي تنهزم صدق. وهذا الي مترجيه من ربي كونها صدق تعملها. هي استغفرت وهو دفعني. اندنيت ليورة والشهقة تطلع من قلبي بخوف. تمدد، باوعلي. ثواني إذا سمعتج تتنفسين أطرج بالنص، انطمررري. مسحت عيوني بسرعة، جسمي يرجف، خليت راسي عالمخدة. وجهي قريب من وجهه لأن نفس المخدة. دموعي تنزل غصبًا عني بدون صوت. رفع إيده مسحهن. همس: لحن لا تجربين حظج وياي. رديت بتلعثم شفايفي ترجف، كوه تطلع الكلمة: ما...

ما سويت شي والله. عيونج أقلعهن الج وحق الخلق الكون، بس ألمحهن رايحات غير كتر. باوعتله ونزلت دمعتي بخوف. مشى إصبعه على رمشي، وخر الدمع نزل على خدودي. عصرهن. الي تفكر بغير حضن زلمتها شنو مصيرها؟ شهقت. احجيييي. الموت. عفية. ترك خدودي نزل وصل لشفتي عصرها حيل. والي تجيب طاري أحد ثاني على لسانها؟ كمشت إيده، مرد شفتي حسيتها انفطرت، بجيت بصوت. مسحها بطرف إصبعه، وخر شعري عن وجهي. تريدين تنهزمين لحن؟ لا. متندمة؟ لالا.

ما أذبحج ولا أحرقج، الموت السريع رحمة وهذا مو طبعي. أشرحج تشريح وأزتج للجلال تنهش بيج، وكلما أدحگ روحج خلصت أسحبج بس تاخذين نفس أزتج الهن، أخليج تتوسلين بالخالقج يرحمج وياخذج أسرع. هزيت راسي: اي. مسح شفتي ودنگ أخذها بين أسنونه. خليت أيديه على صدره أريده يتركني لأن حسّيته شلعها. سحبها حيل وباوعلي. جانت مبينة نظرته مال واحد متلهف وبنفس الوقت الدنيا طالعة من عينه لأن عارفني كارهة قربه.

مسح دموعي، باس راسي واندار انطاني ظهره اتجتف. أريد أسيطر على رجفتي ما أگدر. لميت رجلي لحضني أباوع لظهره وأهدأ بروحي. أقنع بنفسي ما يسويها ويذبحج لأن ضايج هيج حجه. لا هو حلف. جان يريد يخوفني، هو ضرب ما يضربني مو أنوب يقتلني. خليت إيدي على قلبي، غمضت. حسيت هوية ثلجت جسمي، ما أعرف خوف لو صدق برد. فتحت عيوني شفت الغطة يم رجلي. ردت بس شي يقلل الرجفة. مديت إيدي دا أسحبه، اندحجت بظهره. إيدك شيليها. بالغلط والله.

الغلط مرات يكلف عمر، خليها براسك. ادنيت بحاشية الدوشگ من الخوف حتى الغطة تركته. غمضت هدوء بس صوت رجفة جسمي. أسمع الشباج انشخط، رجعت لميت رجلي لحضني. شوية وانضرب حيل، ببالي انفتح. انتظرت يكوم بس ولا تحرك من مكانه. ربي ما رايدة شي بس طلعني منا بالسلامة لو تاخذ روحي بدون تعذيب. غمضت حيل وخليت راسي يم المخدة بهدوء أخاف يحس ويگوملي. ما أعرف شوكت نمت بيه. عيوني تعبت هالكد ما ضغطت عليهن ونزلت دموع.

ضحكت: هاي كتبي وهاي اني دا أكتب درسي. باوعت للساعة راح تصير التسعة، وقت المسلسل. خلي أستعجل أكمل عالسريع. انفتحت الباب دخلت ناي شمرت دفترها صاحت: هييي، تركي دفترج وكتبيلي. مااا! عاشق يكتلني گال بعد لا تكتبين لناي. ما يدري. يعرف خطج ناي. يا عمري، لا يا عمري وجهج لحن. راح أباوع الطوبة، إذا إجه عاشق وشاف دفتري بدون كتابة أويلي على الله شسوي بيج؟ أموتج هذا شعرج الجنه شعر صخلة صفرة أسحل بيه البيت.

هسه أكتبه بس إذا كشفج مالي شغل تره يضربج. دا أگلج يا عمري بنت العمورة. عزه، دتغلطين على ماما. ديلا شلونها أمج وما راضية بالجعمورة؟ كتبييي، يلا حيجي عاشق. تركت دفتري وأخذت دفترها أنقللها الواجب. طلعت واني أكتب وعيني بالساعة، فرحت كملته بسرعة. دا أسحب الدفتر وانفتحت الباب عالسريع ودخلت ناي تتعثر. جرتني حيل، دفعتني ووقعتني يم الجرباية. أسمع هوسة.

أشرت: أششش. دخلتني جوه الجرباية، دخلت يمي، ردت الجرجف وخلت مكان صغير تباوع منه. ردت أحجي، سدت حلگي أشرت لا. صوت عاشق يعيط وبابا ينضرب، هذا صوت ماما دتبجي. لا لا مو همه، أششش. بس أشوف فدوة، وين ماماااا؟ ليش دتبجي؟ سدت عيوني بأيديها همست يم أذني: لحن لا تتحركين يكتلونه. ما أسمع بس عياط وتوسل ترجى ماما وبابا يگلهم: أبني دخيلكم. عيوني ضاغطة عليهن حيل ناي. صوت عاشق وهو يگلهم: أمروتكم لا تذبحوني. فهت إيدها.

سحبتها على الكيف أباوعلها صافنة عالبرى. باوعت من نفس المكان، هذا عاشق بالكاع مذبوح. هذا بابا عينه بناي يبتسم. خلو السجينة على رقبته، غمضت. حسيت دمعة ناي وقعت على وجهي. قمت شهقت بصوت، فز على صوتي أركان گال: ش بلاج يا يولي؟ ذبحوهم أركان، ذبحوهم. گولي يا الله يبه. بابا بابا أركان ما شفته، ما أعرف إيش سووله. عاشق شلعوا راسه. استغفر الله، اهدي يبه. ذبحوهم أركان، عاشق يترجاهم. سحبني لحضنه ضغط عليه. شهداء بالجنة.

جانوا يتوسلون حتى يتركوهم. گلتها وبجيت من قلبي. ضم راس دنگ باسه. اهدي يبه. ما لحگنا نشبع منهم ليش تركونه؟ ما تركوكن، عينهم بيجن ويه كل خطوة تخطنها. شهقت بقهر حسيت هسه راحوا الدموع الما طلعت وقتها، هسه طلعت وأضعاف. ما جنت حاسة بفقدهم ولا جنت أعرف الراح يصير بعدهم. بجيت لمن أحس قلبي تعب. گومني أخذني للحمام غسل وجهي. دنگ باس راسي.

وحق رب العباد مثل ما نزلوا دمعتج راح تنزل أضعافها. شاربي مو عليه إذا ما خليتهم يتمنون الموت. ما خلتني أشوف ناي. شافتك مكانك وحملت مكان أمك. ما خلتهم يكتلونه، كله منها هي ضمتني. بنت بألف زلمة الي تشيل كل هذا بقلبها ولحد الان واقفة وتطالب بحقها وحقك، هاي تتخلى تاج عالراس. راح تاخذ بحقهم؟ أسويها گدها. شنو جانوا يحجون؟ ما سمعت لأن همه بالصالة وناي جانت عاصرة راسي بحضنها ما خلتني بس هي شافت كلشي وسمعت. شنو أخذوا منكم؟

كلشي ماكو أصلاً ما دوروا بالبيت. أمج ما گالت شي ما حجت وياهم؟ لا جانت اتعيط گاعدة يم عاشق. أنتن شوكت طلعتن؟ من أجوا العالم يا الله خلتني ناي أطلع. هذا جاي مخصوص لثار. خذوا وراح. منو ذكرهم گدامك اليوم عش حلمتي بيهم؟ محد. طگتج وجابت طاري ذبحهم گدامك؟ هاا لااا. أركان تعبانة دا أحس روحي رايحة. كمشني رجعني للفراش. گعدت وخر شعري لمه من وراي لفه، وخره عن رقبتي. باوعتله، أخذ نفس: ارتاحي يولي. هم يجي يوم وناي تتركني؟

ما تخلج بروحك لا تخافين. مثل الإعصار تاخذ شكو شي گدامها ما تخلي عزيز وراها. إن شاء الله كون ربي ياخذ عمري قبل عمرها. ما أگدر أظل وحدي حتى لو جانت بعيدة بس مأمنة اكو من الي يسأل عني ويخاف عليه ويخاطر بروحه حتى يحميني. نامي بنيتي. خايفة. بالقرآن الي يفكر يگرب صوبج أحركه وهو عايش. خليت راسي عالمخدة، سحبني لحضنه، دخل إيده بشعري يحرك على الكيف. غمضت دمعتي تنزل بكتمة ما أريد أفكر بشي ولا أحس بس ردت أنام وأخلص من الوجع. ...

گعدت الصبح على صوت جوه ما أعرف منو الجاي. قمت غسلت وجهي، عيوني منفخة هالكد ما باجية. غيرت ملابسي، لفيت الربطة من وره وطلعت دا أنزل. لگيت عمي گاعد ويمه عمتي تشرب جاي. رحت سلمت عليه، گعدت. صبتلي ريحانة جاي ونطتني خبزة. بعدني أول لگمة قامت سهيلة بدت تنقل بالأكل. خجلت لأن نازلة متأخرة، بطلت بسرعة وقمت وياهن أشيل. خليتهن عالسنك. إجت ريحانة يمي همست: لحن روحي على غرفتي. ليش؟ جبتلج نفنوف وكم شغلة تلوگ لهالوجه.

عندي هواي، ليش زحمتي روحج؟ مو لخاطرك بس اكو ناس حارين قلبي أريد أعل قلبهم بيج. منو سهيلة؟ لا حبيبتي، سهيلة اليوم من الصبح طايرة بلعبة جديدة. شنو؟ نزلت شاكة حالها تگول شاكة حامل وأمي بعد الگاع ما تشيلها. عزه، ش بسرعة وشوكت حبلت؟ الحجي يم أركان شعرفني، وأنتي ظلي تعززي لحد ما تنزتين. أدعي كون أنزت ولا يكتلني أخوج البارحة من كثر الرعب العيشني اتشاهدت.

لحن لا تورين قلبي. أمشي لغرفتي بساع لا أهفج بالمنجاسة. ولج هاي اليوم ناوية نية وجاي غيث تنسند بيه حتى لا تنطگ. عزه، بس لا هم اني بالسالفة. عجل أبوي طبعًا أنتي ما تعود تطلعج من هنا اليوم قبل باجر بس دحگي شراح أسوي بيها إذا ما قلبت السحر عالساحر وأخليها بدل ما تنطگين تنطرد هنا.

غسلت أيديه رحت للغرفة. دخلنا طلعت الفستان أخذته لبسته دلعته، جانت جبيرة وأعرف أركان مخبل. بس هي لطشت گعدت سوتلي مكياج خفيف، ترستني عطر. كوه كمشت روحي أتقيأ، معدتي قلبت. حتى شعري ما خليتها تمشطه، شلته بإهمال وطلعت بره ألبس الحجاب. لگيت عمي گاعد يگرض بأظافيره. رحت يمه أباوعله كوه يسيطر، ضحكني. شال راسه باوعلي گال: بدل لا تضحكين، حدرى هنا گرضيهن. هسه عمو بس دا أربط الحجاب. وهذا حجاب يبه تسميه؟

حدرى يمي هاج گضبي المگراضة وكونج تگصين إصبعي تا أگص راسج. لعد هيج دتخوفني عمو حتى لو أعرف راح أگص إيدك. ههههههه، لا سباعية يلا قبل لا يجي المسودن ويدحگج هيج. لعد خلي أغير وأجي صدق راح يضربني. اشحد وكونه زلمة ويمد إيده. بالقرآن أكسرها وألبسها براسه. يلا يبه. گعدت يمه، لفيت الربطة من وره شلون ما كان. أخذت المكراضة أگرض على الكيف أخاف صدق يتعور. ش بيهن عيونج حمر باجية؟ هاا. احجي يبه، طگج الحرمة؟

لا بس خوفني، جان يريد يموتني. عش هيج عمل؟ گلت شي غلط بس والله اعتذرت منه وحلفت بعد ما أسويها. إذا سمعت لا تزعل عمو فدوة. أنتي بنيتي وماكو أب يزعل من رويحته. كملي يبه وحق دمعتج أطلعها من بين عيونه، هذا استسبع لأن سكتت عنه. هين يتربص بدعة. خلصت إيد بلشت بالثانية. وصلت نصها ودخل أركان. ركضت سهيلة اتلگته باسته من متنه گالتها: أبشرك يا ابن عمي. خير إن شاء الله. جايج اليشيل اسمك. رفع حاجبه. قصدي يعني يمكن حامل.

ممم، روحي سويلي جاي وحضري ملابسي عندي طلعة. غيث وصل؟ اي البارحة. اليوم يجي عالغدا هو وجدتي بدعة. يا بعد روحي جية الهلا، فدوة لطوله. إجه يمنا سلم على أبوه، دنگ باس راسه. بالمبارك يا أبوي إن شاء الله يتربى بعزكم. يربى بسطعش وجع بس كونه يكفي شر العالم عني. شر منو ولك شتلغث أنت؟ سلامتك يبه. أم أركان. -أي هيج من البداية فرحني يمه، هسه ارتاح قلبي. -الحمد لله، عجل ركّدي يا أم أزهر وبسّج أذية. -شقصدك يمه؟

وهاي اشوكت تردها لأهلها؟ ترى العالم كلّت وجوهنا. -من تتشافى جروحها. البت خذتها خدش ما بيها عيبة، بحقّي أردها هيج؟ -محد يصل يمها، وإذا على التنور تبطل ما تخبز بعد. -من تكون صافية مثل المري ذاك الوكت تعالي اطلبي مني أردها. غير هالكلام ما لك نص كلمة يمي. قالها وكعد، باوعلي بسرعة دنّكت سويت روحي منسجمة ويا الأظافير. أبو أركان: شخبار ابن عمك؟ -بخير. -إن شاء الله اشوكت التسليم؟

-باجر بليل نطلع أنا وشاهين والولد غادي يستقبلون الشاحنة. -عجل تروحون بحدّكم بدون زلمة؟ -شقصدك يا لجبير؟ -ما قصدي بس الزلمة بكلمته. -والكلمة تكص أركاب، اتحچي يبه منهو الأغاثك لنجيب راسه؟ -حميد آل سلمان متكاون ويا عمامه، رايحين متشكّين والزلمة نخانا. -نسحب الشكوى. -أها؟ وإذا كريم سبك لك قبضك من لوزتك؟ -ولو جبيرة بحقّي هالكلمة، بس هينه يا لجبير اسمع. طلع فونه ما عرف لمن خبر، أول ما رد كاله:

"ادحگ يول الك نص ساعة، الشكوى مسحوبة ومتنازل عن حقّك. اسمعععع لك، ورب الكائنات أعبر ليك وأزين شاربك، اقبض لسانك لا أقصّه يلااا. كونك زلمة وضل على كلمتك. ساعة مو أكثر أنا والولد يمك، حضّر چايك لو راسك يلا ولي." سد الفون وباوع لأبوه رفع حاجبه. -عجل من هيج حاسب روحك زلمة ما تنفّذ كلمتك؟ -واللي هيّ؟ -البت عبر عليها وكت ونست السالفة، ليش ما تطلّقها؟ باوع لعمي بس تحسه بركان، دنّك. -أطلّق بس موش هسه. -عجل اشوكت؟

لمن تكبر وبعد محد يدحگ بجهرتها؟ خلي البت تروح بفالها حدثها وبداية عمرها، وإذا تقول ما عندها أحد هاي أنا أتكفّل بها، تضل تحت حماي لحد ما يجي نصيبها وياخذها بالمهنا عليّ. -يبببه، الحرمة باسمي وهذا الحجي ما يصير. -علمني شلون أحچي. -كل الحشيمة لك، وإذا عالطلاق تجي أختها وأطلقها هينه. -يبه لحن جدتك بدعة راح تجي، زهّبي الغرفة، نقلي أفريشج وخلّج يمها أخاف تعتاز شي. أشرت إي ودنّكت أكمل أظافيري.

اسمع جدحة الجداحة عرفته اشتعل، شلت راسي لقيته منتجي عالحايط، طابگ رجل خال إيده عليها، يباوعلي بحرگة ويسحب النفس بخبال، رجله تنهز من كثر التوتر. عينه تتنقل من رقبتي لدلعة فستاني، صغّر عيونه أشرلي بتوعد. خفت دنّكت، نزل شعري على وجهي وخر عمي خلاه ورا أذني كال: "بسم الله ما شاء الله خيوط الشمس." -شنو عمو؟ -إنه جميل ويحب الجمال، متعّن الباري بتصويرج خلقج بهيئة ملاك ونزّلج عالأرض. -يعني شلون؟

-من يدحگ جمال وإبداع الخالق بوجهج يصير له واهس للعبادة بس حتى ينول الجنة ليلتقي حور العين اللي يشبهوج. ضحكت. -يندار السلف فدوة لضحكتج، ربي يحرسج ويرزقج باللي يقدّرج. -آمين يارب. أنا قلتها وطفر أركان كال: "من ياخذج الرب بت السطل آمين على شنو؟ زمال جدامج كاعددددد! أبو أركان: مرض، انكتم لا أقوم أسحگ راسك. ضغط على سنونه حيل، دفر ترمس الجاي وطلع ما شاف الباب لمن ردمه. -عزززه عمو! هذا نطح الباب.

غص عمي بالضحك، عدّل كعدته قام يكح، ركضت جبتله مي أخذ وشرب. -الله يحفظج يبه، صدك نطح الباب بس يولّي ما يصير تحجين هيج، هذا زلمتج. -آسفة بس هو راح يطلقني. -بالقرآن من أفرغ الشاجور براسه ما راح يعملها، تربات بدعة كعدي خلي أحجي وياج. كعدت يمه باوعتله. -دحگي يبه، أنا ما أريد أغصبج ولا أجبرج على شي، بس لأن عزيزة ما أقولج حسبتج بمقام بنواتنا، لا يشهد عليّ الخالق بمعزة ريحانة، وهاي أعز من روحي. -والله عمو حتى أنا أحبك.

-ما طولج تحبيني أريدج تقبضين حجابج، حلوة البت المتسترة وصاينة نفسها، وهم زلمتج مسودن، دحكتي من عندي وأنا أبوه قام يزاقط، عجل لو قبض واحد واصلج بالقرآن يذبحو ويضيع روحه. -عمو محد هنا بس أنت، ومن يجي أحد أنا ما أنزل. -أنا أبيح لك حلال أدحگ شعرج، بس غيري ما يصير، وليش تنحبسين فوق؟ راح أجيبلج عبايات إسلامية وتتخطّين ملكة بيتج. أشرت إي. -تحبين أبوك وأخوك؟ -طبعًا. -عجل تريدين الرحمة الهم؟ -أكيد.

-ضبطي صلاتج وادعيلهم بيها، راح ترحيهم بقبرهم، وفوق هذا كله أي واحد يدحگج راح يترحملهم على ما ربّوا وعلّموا. -ما عندي جادر. -اليوم يمك المحرم والسجادة لا تفوتين فرض أبد، كلما تصلين أكثر ربك يرحج ويفتحها بوجهج أكثر. -ما أريد كل شي بس ربي يحفظلي ناي وأرد أعيش وياها. -ربك إن قاسم تردّن سوه لو توقف جبال بينجن راح تنجمعن، أنت قولي ربي سوّي لي اللي بيه خير، وراح تدحجين شلون تنفتح أبواب الجنة بوجهج. -ما راح أفوت فرض أبد.

-البت من تعتاز شي لو تتضايق لمن تروح؟ -لأبوها لو أمها. -عجل تجيني يولي، وداعت المسودن ابني إذا سمعت بيج رايحة لواحد غيري وطالبة منه أزعل منج ولساني ما يخاطب لسانج. -لا عمو والله أصلاً كلهم أخاف أحجي وياهم بس أنت. -أنا أبوك من يوم اللي دخلتي بيتي صرتي بحمايتي. -أقوم أرتب الغرفة لبيبي. -بس فريشها يبه، هذا خبل زلمتج ما عنده مانع يخلّص جيله براسج ووحدة براسي على ضربة البارحة، غسلت إيدي من حظّه.

-إي والله عمو صدك راد يكتلني. -موش أقولك خبل، يكتلج ويكتل روحه وراج، يلا زهّبيلي ملابسي عندي طلعة. حضرتله ملابسه، لبس وطلع وأنا رحت للغرفة حضرت للعجوز. خلصت، أردت أروح لغرفتي صارت سهيلة بوجهي كالت: "وين؟ -خلصت شغل. -عجل اصعدي غرفتي نظّفيها قبل لا يوصل أركان يريد يرتاح، وأنا تعبانة مثل ما تشوفين حبلى. -ما أروح لغرفتج، أنا دا اشتغل البيت كله وحدي، هي بس غرفتج عليج؟

-أركان كال منا وجاي حتى ملابسج لحن تغسلهن لأن حبيبي يخاف عليّ. -لعد لا توسخون غرفتكم حتى لا يتعبج. -عممممه تعاللي سمعي! طلعت عمتي من الغرفة صاحت: "شنو؟ أنجعل المرض نصيبجن." -تقولها اصعدي غرفتي نظّفيها أخاف أصعد وأنزل وأنا بداية حملي، كلتني وشربتني. -شنو عجل ما سحقتي راسها؟ -وتركض لعمي تقوله طكوني. -دحگي لج، وروح ابني إذا سمعت بيج رادة سهيلة لو خالتها تقبض حاجة حلقج أفركه بالنعال. أشرت إي.

-حالج حال الخدامة هينه، نفس ما نسمع لج سمعتي. -إي عمة. -يلا اصعدي غرفتها كون تخليها تلمع أكثر من جهّرتج المعفنة. رحت أخذت المكنسة والوصلة، صعدت دخلت غرفتها بيضة جبيرة وحلوة. الكنتور كله مري والميز أشكال عطور ومكياج عليه. الجرباية ملكية والفرشة ما تنعرف شنو، تقول مال عرايس. الزاوية أشكال ملابس نوم معلقة بيها وكلها ألوان فاتحة، من هيج كل ما ينزل سابح أثاري الأجواء تسوي واهس. دخلت وراي كالت: "بعدج؟

-نظيفة تلمع شنو أنظّف؟ -مسّحي وعطّري، عجّلي حبيب قلبي على وصول، خطية يرد تعبان. شلت الوصلة وبلشت أمسح. راحت أخذت ثوب نوم ودخلت للحمام، بعدني أمسح طلعت. -تركي اللي بيدك ودخلي الحمام نظّفي. شمرت الوصلة ودخلت للحمام، يفوح من العطر مو حمام، أتقول متحف، ما توقعت هيج شي بهذا البيت. لقيتها تارسة البانيو شامبو، ضحكت: "تعالي ناي شوفي وين تسبح هاي وأنتِ حسرة عليج غسلتي وجهج. هم يجي يوم ويصير عندنا مكان خاص ونعيش براحة؟

كذب والله ربي ما نريد شي بس غرفة." رحت للبانيو فتحت السدادة خليته يتفرّغ بين ما نظفت الباقي ومسحته. خلص الماي شطفته أخذت المناشف حتى أنزلهن. طلعت أتفاجأ أركان وواقف يم المراية ينزع بساعته وسهيلة تمشي إيدها على ظهره وتبوس بمتنه. دنّكت بسرعة انتبهلي، اندار. -شنو هنا؟ ما رديت، دنّكت شلت الوصلة والمكنسة وطلعت بسرعة، نزلت رحت للمطبخ، شمرت الأغراض أحس روحي تسعر اشقد استحقرت نفسي، هو ينام بحضنها وأنا أخدمهم.

دخلت ريحانة كالت: "شنو صاير؟ -كل يوم دا أكره نفسي أكثر، كل يوم دا أتندم عاللي سويته. -أركان يم سهيلة؟ -أنا شنو؟ -حرمته. -لا خدامة بلاش، خاليني هنا بس حتى تذلّون بيّ. -شبيج لحن؟ -الله يأخذه مثل ما ديسوي بيّ. سكتت ما رديت، خليت إيدي على قلبي ليش هيج دا أحس؟ -تحبين أركان؟ -لا. -عجل ليش تبجين؟ مسحت دموعي. -ما أبجي لخاطره، دا أبجي لأن ما هانت نفسي عليّ.

قمت غسلت وجهي، لهّيت روحي بالمواعين، بس غصبًا عني تجي صورته كدامي هو وياها وترجع تنزل دموعي وحدهن. من الحرقة نظفت المطبخ مرة ثانية لمن صاحت ريحانة: "مو كافي؟ -شنو؟ -المطبخ انصلخ جلده، ترى هو بالمزرعة نزل. -منو؟ -اللي نزل هالدموع، سحل سهيلة زتها من فوق، نعل سلفاها، وتكاونوا ويا أمي لو ما أبوي يكف بوجهه وطرده جان عمل مصيبة، وطلع يضرب جكاير. -وليش حتى يتعارك؟

-ما أعرف شنو تقولين أنتِ، يمكن دحقتي شي ما رادج تعرفيه، أو يمكن خاف بعد منظره راح ينركن أكثر ما هو مركون. -هنّ كم يوم وراح أروح لأختي. -هو هينه الحجي، عجل لعبتها صح الصجيجة، جعلها بالمرض ما تقوم منه. -لا تدعين حرام. -يمه قلبيييي لحن، روحي من هنا جدتي بدعة تنده رايدتج. -اشوكت إجت؟ -قبل شوي كاعدة بالثنية، يلا أخذي المي بطريجج.

أخذت مي وطلعت، لقيتها كاعدة شكلها هيبة، متروسة وعيونها حادة، منتجية وسبحتها بيدها ما شايفه واحد كدامها. ويمها سهيلة وعمتي خانسات بس يباوعن، رحت سلمت دنّكت بست راسها. -شلونج بالعثرة؟ -بخير بيبي. -شبلاه وجهج أصفر؟ سهيلة. -هيه كلها صفرة! ههههههههه -جنها فلقة كمر. كعدي يجده. كعدت يمها، وسهيلة تباوعلي وتعض شفتها، فرحانة لبالها متأثرة بالشفته. اي متأثرة، راح تموتين لحن لا تضحكين على روحج.

شالت ايدي بيبي فتحتها وسدتها، سحبت عيني من جوه، وخرت راسي ابتسمت دكدكت على رجلي. سهيلة: جده ماباركتيلي؟ -انعجل مباركتج بالجفن، اي زتي الي بحجرج يالمسمومة، انجعل زتج حدر التراب. -حبله. -منين حبله؟ -هاي واني ماخذة زينة الشباب وتكولين منين. -عجل ماعرفتي زين الشباب تربية ايدي. -شقصدك؟ -حضنوا وبزروا منشنهن عدل، كمي سويلي جاي، وانتي يجده تهون والخير كلو بحضنج صبري. ام اركان: حتى احرك روحي.

-عجل كمي حركيها من هسه، جاي حفيدنا وصاحب الحلال. -عمه صح اركان هم ابني، بس خافي ربج تره ازهر هم عنده ولد والو حصته. -حصته من هلو، اني ماعندي غير اركان وغيث وشاهين، فارجني من انعل ابو شكلج لابو اليوم الجبتج وخليتج باسم ابني. دارت عاصرة وجهها، وسهيلة قامت وجهها يتلاطم، ريحانة تباوعلي وكوه كامشه ضحكتها. من هيج كاتله روحها اتريد سهيلة اتخلف من اركان.

ضلينا كاعدين لليل تسولف واحنا نسمع، بس اشكد حلو اسوالفها، اكثرها تغلط وتسب بيهن وهنه ساكتات يخافن يردن. الضحكة تطلع من كلبي واني اشوفهن اشلون خانسات، حتى ما صخرني ضالات بس للرزايل. دخلوا اركان وغيث، ركضت سهيلة حضنته وباسته من متنه. -مشتاكيلك يخوي، بطيت هالمرة فكدناك. مارد، باس راسها، واجه شافني ابتسم. -اشلونج يخوي؟ اشرت زينة ودرت وجهي. كعد يم بيبي، فرك راسه. -بعد يوجعك يجده؟ -اي والله فركي الي.

-تمدد خلي راسك بحضني، شبلاك يجده متكلي من مرض لمرض بعد ماتصحي؟ -لاتخافين مايصيبني قز القرط، ضغطي حيل جده ابروح اهلج. اباوعله بحضن بيبي مغمض، مو ذاك غيث تعبان، جوه عيونه سود ضعفان. كفلتله بيبي. راسي وجعني يمه، كومي شدي شد الغريبة مانفع. اخذ حسرة طويلة، وخر ايدها وفتح عيونه جانن حمر، مبين بيهن الحزن. -تهون وتنسى يجده. -ماكو شي بالي حتى انساه. -واضح بعد جدتج اشعملت على شغلتكم.

-باجر ويه طر الفجر ادز الشباب يأمنون المكان. -مايفيد، مكانكم انكشف وهذا الناقص عضيدكم مراقبكم. -مامراقبنا جده، بس اكو من اليوصله الاخبار اول بأول. اركان: هذا دباره يمي، بس اكضبه بالقران اكصه لراسه. بيبي: عجل شمنتظر ماتكضبه لولمن تطير روسكم؟ -لاتخافين على روسنا، بس خلي اتأكد اعلكه بالباب واصلخ جلده. -ولكم لاتسودنوني، وماضل على شغلكم جثير. -والتسليم بوكته لاتخافين الج الصافي.

-اخر تسليم يجد، موش انت وخيك ترحون فد روحه بالقران انجلط. اركان: هينه يكولون الشيطان يعتازلو شيطان مثلو تايفشل خططه، خلينة نتصل ببليس وندحك شتكول. كعد غيث انتجه عالحايط، طلع جكارته ورثها، اخذ نفس ودنك يباوع للكاع. اركان طلع فونه اتصل وفتح مايك، اجه صوت ناي تعبان. كالت ها اركانو، ذاكرني اليوم مصيبة لازم. -المصايب لعبتج يالهتره، شخبارج يولي؟

-هههههه اكيد بخير. كالتها وكحت اخذت نفس كالت اشتعل اهلكم متكوليلي اشلون ادخنون. -ويامن لج؟ -لا والله موياك، داعمر النركيلة لزبون خنكتني اسماعييل كا اااال بووو -اي اركان امر. -عدنا شغلة وحبيت ادحك ذكائج بي. -حالياً الذكاء مصفر ومتحول لغباء vip شصاير احجي. -يكولون تفكير الحرمة ماتجيبه غير حرمها مثلها. -انكشف مكانكم مو؟ -ذيبة بالقران. -هههههههه اهل غيث ابعد اخته عنكم، شايف حضيرة الخنزير والله انظف منهم.

بيبي: كضبي لسانج يالصكعة. -هلووو بدعة اشلونج. كالتها وصاحت صير زلمة يوووول وصوت ضربة. اركان: اللزكة هفته اطراك. ابتسم غيث وسحب نفس من الجكارة. بيبي: لايالهتره المن طكيتيه؟ -هههههههه ماطكيته بس عدلته شوية. -كون يكضبوج ويفلشون سنونج داخل حلكج. -افا وانه اخت عاشق انضرب، اي بدعة ماتبتي بعدج بالممنوعات؟ -ولكم ماكو ازلمه بيكم يكضبها ويجيبها ليه؟ -هههههه لاتعبين نفسج، المرض دياكل بيه راح اخلص وحدي.

غيث شال راسه واني كمت بسرعة اخذت الفون من اركان كلتلها اشبيج ناي؟ -هلو حبيبتي مابيه شي. -ابروح عاشق يامرض دتحجين عنه؟ -داتشاقه اشبيج؟ -جذابة ناااي جذابة. -اوو اشلون شغله بنتي، اجه ابو الكولا، ولي يلا، لازم اروح ويه الشباب انزله. -انتظرك اتخلصين واتصل. -مارد من وكت عندي شفت ثاني من ارد اني اتصل. -جذابة البارحة هم هيج وماتصلتي. -رحت للبحر جنت تعبانة. -والتعبان يروح للبحر بهالبرد؟

-عادة سخيفة من انسان اسخف منها لحن، بروح اهلج لاتلحين والله روحي خالصة. كالتها ونبرة صوتها اتغيرت. سدت الفون حتى بدون سلام. صارت عيني على غيث، همست الله ياخذك. رجعت الفون لاركان، كلتله وانت هم الله ياخذك. ابتسم غيث بكسرة واركان هز ايده. صعدت لغرفتي، كلبي يم ناي ادري بيها تعبانة وماتحجي حتى لايقلق عليها احد. اتوضيت صليت، ضليت عالسجادة اندعي وابجي ربي يشافيها الي لمن تعبت.

ردت الم السجادة صارت التربة كدامي اشتهيتها، شلتها لبالي بس اذوكها ماشفت روحي غير اكل منها ومااشبع، لمن خلصت منها جزء جبير خفت تخلص وهنا ماعدهم ترب. رجعتها ولفيت السجادة، كمت الوقت تأخر، وهمه بعدهم، غيرت ملابسي وسديت الباب مبين اركان ينام يمها اليوم. خليت راسي رحت بالنوم، كعدت على نفس بركبتي وايد على بطني، عرفته من عطره. سويت روحي نايمة، وخر شعري عن وجهي ودنك على خدي يشتم بي ويطبع بوسات خفيفة حتى لااكعد.

احس بانفاسه الحارة وخشونة لحيته. وصل لشفتي حرك شفايفه عليهن، دكات كلبي طلعت من صدري بلحظة ضعفت ردت اتجاوب ويا، اتذكرت سهيلة بحضنه الضهر، دفعته درت وجهي اتحسر وعدل نومته. عطره دخل بكلبي، مع العلم نفسه ودوم يخلي منه بس هسه احس اول مرة اشتمه، اتمنيته شي واكله مو عطر، ماعرف شديصير وياي اشياء غريبة. اشكد ردت اكمش روحي ماكدرت، احس لهفانة عليه. اندريت خليت راسي قريب من صدره، سويت روحي نايمة اعرفه راح يسحبني لحضنه.

اخذله دقايق اتاكد نايمة، مد ايده خلاها على خصري يمشيها عالكيف وسحبني اله، خليت راسي بحضنه. حضني حيل ولفني بالغطه لباله بردانه. ماصدكت دخلت راسي بصدره، رحت بالنوم للصبح مادري بنفسي. ***ناي*** شلت جنطتي ورديت عالفون كال ها حاته وينج؟ -طلعت من الغرفة جاية بالطريق وين التقي بيك؟ -تعالي للعماره مال غيث دااسلم المفاتيح للبواب هناك نلتقي. -تمام اقل من نص ساعة واني يمك.

سديت الفون ورحت للعماره، وصلت يمها لكيت الباب مفتوح وكرم يم البواب، سلمت كلتله يلا تره اتاخرته. -بس اخذ كم شغلة ضالات بالشقة حتى مارد بعد. -انتظرك. -لاتعالي وياي حتى انزلهن سوة. صعدت ويا، فتح شقتهم ودخل، ضليت بره اباوع، اول مره التقي بغيث هنا، جانوا يركضون ورا الشرطة شالني ودخلني جوه. ضحكت، انداريت لشقتنا هنا واكفه معصبة لان متاخر وهو يضحك ويخربط بوجهي حتى يسكتني. كرم. اخذي هاي الجنطة نزليها.

دخلت لقيت قمصلة غيث مشمورة عالقنفة وايباد جود ع الميز. درت وجهي بسرعة اخذت الجنطة ونزلت ماريد اذكر شي. نزل كرم قفل الشقة وسلم المفتاح كال للبواب: سلملي على غيث من يرد. البواب: الشقة تردوها لو أجرها؟ كرم: لا أجرها لا تخليها فارغة هيج هم حلاله هذا. البواب: سارة جابت مستأجر وكالتلي فرغها بس كلت اسألك اول لان استاذ غيث ماهو. كرم: العمارة الهم سوي اليريد لا تسأل احد يلا مع السلامة واعذرنه اذا يوم ضوجناك. البواب:

الله وياكم تردون بالسلامة. أخذنه تكسي للسيارة النرجع بيها لكيناها مقبطة، احنه اخر ناس ركضنه دفعنه فلوس وصعدنا. الطريق بعيد واني تنساتي صعبه كلش كوه كامشة روحي، الطريق كله ملثمة لا اشتم شي وتقيأ. ابتله كرم خطيه، وقت الاستراحة ينزل يجيبلي واني افتر لان ما اگدر ادخل لمطعم وبالسيارة على متنه نايمة. مغمضة ما غافية كلش هز راسي: حاته. ناي: شكو كرم؟ كرم: جابوا سم تشربين؟ ناي: ابن اخوك كرهني حتى بأهلي ما اگدر. كرم:

انجبي لا تحجين عليه ام الوجه المزروف، هذا عاشق حبيب خاله يسواج انتي ورجلج الغثيث. ناي نرجع ناخذ شقة بغير محافظة مثل ما اتفقنه. ناي: خلي ارد بلحن والباقي سهل. كرم: راح ينطيها أركان. ناي: مو بكيفه اخذها من عيونه خالها خدامة لأمه ومرته ابن السطل. كرم: تراه أبو خوش رجال. ناي: من هيج خلف أركان الناقص وشغلهم هيج شغل تريدني اخلي اختي يم واحد مثله؟ كرم: حقج بس تره ماكو عدهم واحد ينطي مراته بسهولة. ناي:

اخذها بالغصب اذا رفض واذا كلش انهزم بيها. كرم: لعبتج هاي، بس يحلوه يفلعون راسج اذا كمشوج. ناي: ماراح يكمشوني اطلع كبل غير محافظة واضيع وجهي. كرم: واني؟ ناي: طبعًا ويانه غير اخونه يلا احسبنا مكان جود وغيث. كرم: خلقة واخلاق والحمزة ماراح يتغير عليه شي بس چانوا يصگعون بيه، هسه اني ادمغ بيجن. ناي: كرم لا تتحرك تره قلقتني. كرم: خو متني ما يوجع راسج؟ ناي: بس اكوم اتقيأ. كرم: لا خليج ما ضل شي ونوصل، صدگ تندلين وينهم؟ ناي:

لابس اخابر أركان قبل لا نوصل بكم ساعة حتى ينتظرني داسوي مفاجأة لحن. كرم: لا والله مفاجأة لأركان راح تاخذين مرته، نحجز على سامسون شتگولين؟ ناي: لا سامسون مكشوفة انروح لأنطاليا شغل هناك لان سياحية. كرم: أجار غالي ما نگدر. ناي: نشتغل كلنا سوى راح نتقاسم، يكفي كرم دخت. كرم: وين ابرتج ولج؟ ناي: بالجنطة يمك. خليت راسي عالكشن افرك بيه لان بدت حتى افقد الوعي. كرم طلع الابرة هم زين استعمالها سريع بس ضغط دگمة.

ضربتها ورجعت راسي على متن كرم، قبل لا نوصل اتصلت بأركان ونطيته المكان والساعة. اول ما وصلنه نزلت لكيته واكف يم سيارته، شافني ضحك واشرلي، سلمت على كرم. ورحت يمه گال: هلا بالذيبة الحمد الله على سلامتج يولي. ناي: الله يسلمك خو لحن ما تدري؟ أركان: لا لحن ولا ذولاك الناس بس هذا لبسج ماراهم ابد. ناي: لا ذولاك الناس ماريدهم يدرون ابد هنه يومين وارد ولبسي ما اتصور الك دخل بي. أركان:

يولي ما اختلفنه بس المكان الكاعدين بيه يختلف عن مكان غيث، احنه بنص الريف. ناي: أركان گوه واكفة تره تاخذني لو أجر تكسي. أركان: گوية ورعنه وهتره ومصگوعة والله بلانه بيج. ناي: أركانووو. أركان: ومرض، شلون ادخلج بهيج لبس؟ ما رديت فتحت الباب شمرت جنطتي وصعدت، هز ايده وصعد شغلها. بس بلوزتج أقلها غيريها. ناي: بنص السيارة اغير؟ أركان: انزلي وهيه مظللة محد راح يدحگ على جهرتج. ناي:

ما اغير أركان، عود دخل السيارة بالبيت بس لا هيج مكره لحن بالعيشة. أركان: لحن فرگها عنج مثل السما والگاع يبه بالقرآن ما اعرف شلون چان متحملج. ناي: متشوف شمرني بالشارع؟ صدك كملت جواز لحن؟ أركان: كملتو بس شرايده منو؟ ناي: اتصور امانة واجه راعيها لازم ترجع. ما رد بس اشوفه ضغط عالاستيرن وجهه احتقن. خليت راسي عالكشن حسيت الدنيا افترت بس ما صار هواي من اخذت الابرة ما اگدر اخذ بعد.

ما جايبة وياي غير جنطة عالظهر بيها علاجاتي وقمصلتي. جريت ابلوزي اضم بطني لان خجلت منه من صارت عينه عليها وشفته اتضايق بس ما حجه. أجر منا يطفر منا تركته يلا هو بعد شاف. تقريبًا وصلنه عدلت كعدتي. دخلنا داخل مزرعة دگ هورن يم باب فتحها حسام، عيونه اتلاصص باوعلنا وضحك. لعبتي اويييلي يابه اجيت والله جابك غير اطلع ضيم اهلك بيك.

رفعت بلوزتي من فوگ حتى بطني تبين عدل، وعدلت بنطلوني من جوه سلت شعري ذيل حصان خليت الزايد على وجهي ما رجعته وره. وكفت السيارة قبل لا يحجي أركان ويگول انتظري خلي اجيبلج عباية فتحت الباب ونزلت اسمعه يسب وراي. شلت جنطتي على متني وقمصلتي بيدي ودخلت، وكف حسام گصني من فوگ ليجوه، ضحكت اشرتله هاي. حسام: هايات يولي شجابج؟ انداريت لقيت أركان بعده يقفل بالسيارة همست: جاية اعيد تربيتك يول. حسام: شنو لج؟ ناي:

ولجلاجة التلجلج ضلوعك احجي ويا تاج راسك عدل لا اعدل فجك. أركان: ناي فوتي اختج جوه بغرفة جدتي. ناي: شنو بدعة يمكم؟ أركان: استلم انوب ما تحترم لا صغير ولا جبير، مرت اخوي گضبي لسانج. ناي: واذا ما گضبته شتسوي يول؟ حسام: هاي ناي الخبصتونه بيها. ناي: وتاج راسك يول انعدل من تجيب طاري اسمي لا اعيد ترتيب جهرتك. أركان: لا بالقرآن ناويتها بت نهار لحننننن. حسام: لا تخاف عمي اورها واربيها الك وروح ابوي. شمرت جنطتي

ورحت يمه جرته من ياخته: اتربي منو ولك؟ حسام: ايدج لا اجسرها. غيث: كونك ازلمه وتعملها. مجرد صوته بنجني تركت حسام وانداريت لكيته واكف اديه بجيوبه يباوعلي بتعب ابتسم. احس روحي ضاعت اتمنيت اركض لحضنه. اجت لحن تركض شبكتني تبجي. حضنتها حيل وعيني بغيث الي دنّگ وطلع اخذ كلبي ويا. وخرتها مسحت دموعها. لحن: ناي رجعتي صدگ گدامي وداحضن بيج. ناي: شفتي الدنيا اشكد فرت بينا وبعدتنا. لحن: بس رجعنا ناااي هياتج بحضني.

ضحكت ورجعت حضنتها همست: اجيت اخذج. تحولت بچيتها لضحكة عصرتها بحضني حيل اخذت نفس طويل ااوف يريحة امي. مسحت دموعها اتعده أركان. أركان: لا تسرحن زايد بخيالجن. ناي: للأسف اني ما افكر انفذ. أركان: عجل سوي التگدرين، لحن اخذي اخيتج وفوتن جوه انطيها شي تغير الابسته. اجت ريحانة سلمت باستني. ريحانة: واخيرًا رجعتي اختج اكلت راسي بيج تكوم وتگعد تسولفلي بيج حفظتج حفظ. ناي: چان هفيتها طراك تنكتم وحدها لو صدك امج ما مقصرة. ريحانة:

فوتي خيه هاي سهيلة وراج تريد تسلم عليج. ناي: هلا. سهيلة. بالمهلي يبعد جبدي، عجل جيتي وحدچ؟ لابوي طلع من گبره جابني ورد. شمالهن هدومچ ملخة؟ اوو نسيت ما عندچ تشترين. عفيه وهم حسبت حساب الحر، إذا احتريت ما أبرد إلا إذا أكتل واحد، سويت تهوية من يم بطني حتى أتعادل الحماوة. ترى عدنا شباب هنا، ما راهم لبسچ. گولي لأختچ إذا عدها زايد خلي تسترج. أوف زايد وتسترني! لا هواي هاي، بس عاشت أيدچ خوش مخلفة خلفة. شقصدچ؟

ما قصدي، بس دخل مزاجي وحب هالاعمار من الولد يكونون طراوة عگل مشنگل، كلتها وغمزتلها. احتقن وجهها، باوعتلي بكره، ضحكت ريحانة: د فوتي سلمي على جدتي. دخلت ولحن كامشة جنطتي وعاصرة أيدي، ما مصدقة دخلت، لكيت بدعة على هيبتها گاعدة ماخذة الصدارة، وجوة رجليها مرة عرفتها أم أركان من نظرتها السكط مثل حفيدها الأعوج. سلمت. بدعة: هلا بالهترة، شجابچ يولي؟ مشتاقتلك بدعة. يالرعنة عدلي لسانچ، تراج هينة بينا يگضبوج يطروج بالنص.

أفا بدعة لا تتحديني. ضحكت وأشرتلي، رحت حضنتها. أشلونچ يجده؟ نزلت دموعي. تركج الناقص. شمرني بالشارع. غبي، خله يطحل مثل الحايلة وماخذين وحيدها. أني الي انكسرت بيبي. انجعلو العملها بالجدري وتغربل جدام الغرب. گعدت يمها مسحت دموعي، ضحكت. وروح عزيز گلبي للصبح ما ينام، يناطر الفجر، يناطر كلبه يمج موجر يعرفچ تخافين بحدچ. خلص بدعة طلكني. خسر يجده، جسر روحه قبل لا يجسرج، رد مسودن، رواح يسودن الحولو يجده نوى على الموت هالمرة.

ما غلطت بحقه. غلطوا بحكم النگسين وفروها بيچ بس لخاطر يردو لشغلهم، طمعهم للجفن. لحن: ناي ليش هيج صفرة وشفايفچ بيض؟ دايخة من السفر. كومي وياي لغرفتي نامي ارتاحي. استأذنت وطلعت وياها، صعدنه فوك قبل لا ندخل انفتحت غرفة طلعت سهيلة لابسة كلبية حمرة وكيلوين ذهب تكول مفجوعة. دخلت للغرفة خالية بس كم شغلة بيها، باوعتلي لحن وابتسمت: لا تضوجين راضية أني. يلا ضلت على هاي، وين أنام هنا؟ أي. إذا بيها عطر فدوة غيري لأن روحي طالعة.

لا عطر أركان كلش طيب هسه تحبيه. خرب بيچ وبأركان جاية أخطبه، شحب بت إنهار أكلچ معدتي تكلب. لا تعيطين هسه أبدله. شالت الجرجف وفرشت غيره، شمرت حذائي وتمددت، هيه يمي كاعدة تلعب بشعري كل شوية ومدنكة بايستني. من شوكت غيث هنا؟ صار يومين لأن عدهم تسليم بس ناي ما ينام بليل يضل للصبح گاعد عالدرج يدخن. أشلون علاقته بأركان؟ ما يتحاجون قليل، جاي لأن بيبي هنا وشغلهم يمكن هم هنا ما أعرف، بس عمو أبو غيث أجه وبيبي طردته. ليش؟

كالتله سويت الي براسك وراح تزت ولدي بحلگ الموت، بس وحگ كتاب الله إذا صار لواحد من أحفادي شي أحرمك حتى من البس. شنو التغير ليش بطلت تشتغل هيه؟ لا يكولون هالمرة التسليم صعب وهيه ما ترضى يرحون تكلهم كافي بطلوا، لا تذبون روحكم بالموت، بس عمي أبو غيث اتعارك وكال أني وأبو حمزة نروح لأن ذابين أفلوسنا كلهن بيها. سماهر شنو دورها من كل هذا؟

ما أجت بس النهار كله تخابر وتتوسل بغيث تريده يرد لبيت أهلها لو تجي تشوفه بس هو كالها بس المكفخ أدفنچ ما أريد أشوف وجهچ. أركان أشلونه وياچ؟ معصب بس يعيط، لبسچ شعرچ لا تطلعين لا تضحكين گدام أحد، بس بليل غير. أشلون غير؟ ما ينام إذا ما أغفه ويتاكد حتى يخليني بحضنه، كل ما أفز ألكي گاعد يلعب بشعري لو مم يعني يبوسني عالكيف لو خال راسه بركبتي يتنفس. كلچ أحبچ. من سألته كال لا ما أحبچ. أمداچ تسألي! أشلون لچ أشكد ثولة أنتي!

ومرته أشلونها وياها؟ يروحلها الظهر. كل يوم؟ أي كل يوم، ومن يطلع سابح ولا يوم فوت يعني يحبها. اليوم هم؟ أي. غبي وأهله أغبى منه. ليش؟ ما حاسبها عدل، يريد يقنع أهله أنو حياته ماشية طبيعية ويزيد غيرتچ بس الأثول ناسي شغلة الشهرية وأنتي بدون أحساس. ترى هيه حامل. هههههههههه من الطگعة الصايرة بنهاية ظهره. عزة يعني دتجذب، بس لا ترى تكول لعمتي إذا ما تقربلها.

مو يم أركان هاي والله يفلع راسها تلكيه مهددها يردها لهلها إذا ما مشت على مزاجه وكالتلك بلكي أرضي وأسحبه الي. شعرفچ عزة بعينچ صدگ، مرة سمعته يكلها إذا سمعت حرف واحد واصل لأمي أدفنچ، صدگ من گال عليچ أبليس. غيث ينام وين؟ يم بيبي دوم ناي، تحبيه. ابتسمت وغمضت. اتمددت يمي حضنتني، دخلت بحضنها أول مرة أنام براحة بعد هذا التعب والهم. گعدت تالي اليل البيت هدوء ولحن شامرة روحها بالگاع، ضحكت وسحلتها من هيج أركان يضل كاعد.

انگلبت ونامت مثل الطفل گعورت روحها، وخرت شعرها وبستها من راسها، زايدة جمال بت إنهار لعد هواي تركچ أركان. غطيتها وكمت جوعانة ودايخة علاجي ما ماخذته، الساعة ٤ الصبح. رحت غسلت وجهي طلعت، استوني أنزل لكيت غيث گاعد عالدرج. گعدت على أول درجة فوگ، غمضت أشكد مشتاقتله، فززني وهو يهمس. شوكت تطلعين من راسي؟ تكدر تطلعني مثل ما طلعتني من بيتك؟ ما عشت بعدچ. ولا راح تعيش. كرهتك. أني أصلاً ما حبيتك حتى أكرهك. غدرتيني. أنطيتك روحي.

خسرتيني رفيج عمري. خسرتني گلبي. عمري ما راح أسامحك، كل يوم يمر ألعن الساعة الشفتك بيها ألف مرة. ندمت على شكو ثانية مرت بينه وأني بحضنك، على كل دقيقة دگ گلبي لك بيها. أشكد أذوني ما دعيت عليهم، بس أنت كل ما ينبض گلبي أدعي عليك. رخصت دمعتي الي ما جانت تنزل على أحد. فتحتي جرح گلبي بعد ما لحمته بجمر، أنتي ما رجعتيني للبدايه لا رديتيني ذاك الطفل الما ينام، يناطر الفجر بلكي أمه تحن وترد لحضنه.

ما راح تنام ولا راح ترتاح الله ياخذك. كافي تدعين لا يصيرلچ شي، إذا عالموت أني رايحله برجلي. وأني أروح أكمل طريقي، راح أتزوج ويصير عندي بيت وأطفال وأكمل حلمنا بس ويه غيرك. الله يوفقچ. كالها وكام. نزلت بسرعة ضربته بظهره بكل قوتي: هيج ما هامتك؟ هز راسه أي. أحقر أنسان شفته. ما كرهت أحد بگد ما كرهتك. راح أخليك تندم، راح أبچيك أضعاف البچيته. تركني وطلع. رجعت گعدت ضميت وجهي، أجت ريحانة تركض كمشتني كالت: بيچ شي خيه؟

گلبي يوجعني. كلتها وبچيت. وروح أخوي يحبچ أضعاف ما تحبيه. وين حبه شوفي شديسوي بيه. حگه خيه تراه موش گليلة عليه يفقد ارفيجه وحرمته بنفس اليوم. والله ما بينا شي. حتى هو يدري بس ما يگدر، أخيوه نفسه بحرمته وجانت أصلاً حبيبته گبل لا ياخذها، بس من كلت الفلوس تنازل عنها، أحسن قرار بعدكم عنه صح وجع گلبه بس الصح هذا. يا موت يسولف عنه؟ أوف ذاك الطريق الي أخذ أزلامنا كلهم.

رايحله هالمرة برجله، أشكد أتوسل أبوي ومنعه بس ماكو أحد يگدرله، مصمم يروح وحده هالمرة. تسليم ممنوعات؟ موش ممنوعات بس خطر هالمرة متحارش ويه الروس الكبار ويدري ناصبيله كمين ويعرف ما يرد منها، بس ويامن تحچين واحد بايع روحه ومسلم للموت. يمه اسم الله على گلبه، لعد أركان أشلون راضي؟ معوگ أركان يتركه، أكيد وياه رايح البارحة يوصيني بلحن إذا ما رد أخذها وأروح لبيت رجلي غادي نعيش لحد ما تردين تاخذيها. مخابيل.

ههههههه من صحتي بدعة عرفت لسانچ متبري، وين أركان هسه يعددهن أسوالفچ. أبليس، رعنة صاحبة مشاكل تقفل مثل الزمال. ههههه لا حشاچ بس صدگ هذا الگاله وكال مرة حوك وچلمته حد السيف تسوة أزلام چثيرة. هم ما أخلي أختي يمه لا يضل يصبغ. عجل أخذيني وياچ والله فت گلبي من العيشة هينه. ما انحلت شغلت أنتي وشاهين؟ هههه من غيث ياخذ أسماء. يعني بسببنا؟

لا بالقرآن گبل لا تجن أصلاً أنتن نعمة من دخلتن، چانو گاظيها سهر ونسوان، غيث ما عرف عنه بس أركان من يوم خشت لحن هينه ما حرج روحه وسهر بره، محتار أشلون يحميها من عيون الباگين، كل عقله يغار حتى من أبوي. أركان أصعب من غيث. لأن غيث عاش بره اتعلم شوية بس هم دمه حار، من دخلتي بگد ما متلهف الچ بگد من النار تطلع من عينه، الله يهديچ جاية بطنچ طالعة وتتماطلين ويه حسام. حسام رادله تربية. أهل أمه مخربين مخه، والله هو خوش ولد.

أركان خبل وهذا مراهق ما يهمه شي ممكن يسوي شي وتالي أختي تروح بيها. أني وياچ بالقرآن يكتلهم ويكتل روحه، بس هو ينام بليل يمها وبالنهار يأمنها يمي. شنو هالحرب النفسية؟ عجل شيسوي متگليلي، هم أبن أخيوه بس كون الله يخلصنه من سهيلة أحنه بخير، گومي وياي أزهبلچ شي تاكلي. گمنا رحنه للمطبخ وكفت تگلي بيض وتسوي چاي، دخلت سهيلة صاحت ريحانة: سوي الريوگ وسويلي وياچ خبز طابگ مشتهيته لا يطلع بأبن أخوچ. ضحكت.

خير أشوتضحكين، بدل ما تباركيلي. بس اتحفضي زين حتى تكملين الجذب بالسلامة. باوعت لريحانة كالتها هيج الحچي صار. ريحانة: شنهو ما حچيت شي وروح أخوي. ردت استرج بس چنچ مشتهية الموت. أم حسام دخل الله ودخلچ أني شذنبي. ذنبچ حبلتي بنغل وتردين توطين راس أهلچ، ما طول انفضحت السالفة حضري روحچ للذبح. هيه تحچي ودخل أركان…