رواية لبوة على شفا الثار الفصل الثاني والأربعون 42 - بقلم Leo Alfatlawi

دخل دنگ، شال الفون، وكمشني ودفعني گدامه، طلعني من الغرفة. وكفت يم الدرج، باوعتله بترجي، ردت أحجي، كمشني نزلني الدرج. وصلنه يم عمي، دفعني گدامه قبل لا أحد يسأله، گال: -أنت طالق. أبو أركان: -لااا يبوي شبلاك؟ -طالق. -أركااان! -ندور مثل الزمايل ومحتارين، وهيه تندلها. -صدگ يبوي؟ لا لحن ما تعملها بنيتنا. شمر الفون على غيث الجان گاعد منتجي يباوعلي بتعب: -رقمها يمك، طلعوا واعرف هيه وين. غيث:

-ههه غشيم لبالك مثلك غبية، تلگي ألف شفره خاله للتواصل. -هينه كومي لج اتصلي بيها. باوعتله وعيوني مليانة دموع، أشرت لا. -لحننننن! -ما أگول، شتريد تسوي؟ طلگتني مالك حق تضربني. -وحگ رب العباد أخلي جيلة براسج وأفصل أهلج، أحجي وينهاااااا؟ غيث: -بتركيا. -عجل عش ساكت؟ كام خله اديه وره راسه. أبو غيث: -لاااا زحمة والله ما تگدر تجتلها يبوي.

باوع لعمي عيونه تعبانه، ضحك وهز ايده، شال الفون راد يمشي، اختل توازنه، كمش الحايط، عدل وكفته وكمل مشيته، طلع بره. راح ورا أركان. صاح أبو غيث: -لمي غراضج. أبو أركان: -وين تريد بيهااا؟ -لهلها، مثل هاي حرام بيها العيشة. -دگينه صدرنه ورحنه اخذناها من نص أهلها، شنگلهم من تردها؟ -بتكم مو كفو الواحد يأمنها على بيتو. -ما يستگبلوها.

-زتها بالشارع أروح، أرد ما أريد أدحگ جهرتها هينااا. أشمرها باب أهلها يطبها ألف مرض الخذوها، وإن خلوها لا تردها، حرام أخلي طلقة براسها. سماهر: -وأختها هم يبوي، أغسل عارنه ورد هيبتنا بين العالم. -آاااخ أخوج گاضب ايدي ما عرف الولد شبي تسودن، لا يرضه يگول وينها ولا يرضه واحد يجيب طاريها، مطلع خبالو بالعالم ياهو اليگضبو يجتلو.

-ولا راح يجتلها، أكص ايدي إذا گضبها وعاقبها، حدو يسمعها كم چلمة ويرد ويتوسل بيها لخاطر ترد لحضنو. -تسودن الزلمة، بس آني أعرف شلون أعدلو، أغسل عارنا وأسد السالفة. كالها وطلع. باوعت لعمي أبو أركان، گال: -عش يبوي هيج گصرنه وياكم؟ -مالي دخل بالصار، هيه راحت. -وعش ما گلتيلنا بوكتها؟ چان لحگنه بوكتها وتلاحگنا الفضيحة. -تذبحوها. سماهر: -تستاهل الدفن الي توطي راس زلمتها، مجانها الگبر. أم أركان:

-موش گلتلكم من الأول عرفتهن ما وراهن بس الفضايح. أبو أركان: -إنتن تنكتمن، وإنت لو مرة حوك بيج حظ چان گضبتي بيتج وعرفتي شيدور بي، موش جهال مثلهن ورنه ور وإنت مثل الزمال تتصفنين وتزاگطين. -ياع دحگ هاي جاهلة تربية شوارع، ما عرف منين جبتوها وبليتوني وصار اللوم براسي، المفروض من إنهزمت من أهلها وطت روسهم ما تجيبوهن. سماهر: -العرگ دساس، أمهن منهزمة من أهلها، عليمن يطلعن؟ أبو أركان: -شرد عليج؟

حرمة چبيرة والشيب تارس راسج، بس حق شايلة عگل حيوان، إذا ما تربطين وينسحگ على راسج كل يوم تسرحين. -عمي أتركبنا الغلط لخاطر چلمة، ودحگ هاي گدامك حتى ما واحد منكم كلف روحو وطگها، أشوف ابنك حدو رمى اليمين وطلع يتزنح وره أخو، خاف أنگلو ردها لأهلها.

-الطگ موش للبشر حتى الحيوان هم روح وحرام بيها الظلم، بس إنتن كلشي محلل عليجن سماهر، وروح ابني بكبرو إذا سمعتج واصلة صوبها لو بس مسمعة البت چلمة وحدة، أمدج بنص الوهاد وأخليها تدوس راسج. -ليششش عمي ليش هيج تذل بينه؟ تراني بت أخوك الچبيرة وصاحبة كل هذه من بعد جدتي. هيه گالتها وما نسمع غير ضربة عصا بالگاع، إنداريته لگينه بيبي واگفة يم الباب تباوعلها باستهزاء، خلت اديها على العصا، إنتجت عليها ورفعت راسها گالتها:

-كملي عش إنگتمتي؟ -بعد عمر طويل جدة. -أي. -ما جنت أقصد. -وإن قصدتي منهو يدحگ لو يسمع؟ ضربة مداس أبو أركان، خبرلي جسار گلو: جدتك طالبتك. -لا دخيلج جدة، وروح زلمتي هيج حجيت، لا يا عمي والله زحمة بهالعمر إنطگ، إنجعلني بالخرس إذا عدتها. أبو أركان: -دنگي على رجلين جدتج حبيهن واعتذري. إجت تركض دنگت، بيبي خلت العصا بصردها ودفعتها:

-بعدي لغاد، لا توسخيني، حدج توطين على مداسي موش صوب أرجولي، عبچن نگسات، لو يسبحوجن بمي زمزم ما راح تنظفن. -عش جدة موش آني حفيدتج العودة وحاملة اسمكم، ما ترفعين مگداري گدام السلف وتتباهين بيه تهينيني هيج؟ -تتخسى وحدة مثلج تحمل اسمنا، الاسم معروف منهو اليرفعو، والحلال إله أهلو يگضبو من بعدي. -بعدني شنهو؟ -الي براسج شيليه أحسن ما أخليهم يمحوج،

وإنت يمه خبر جسار گلو: خلي يهير المخزن ويكون مستعد، راح أدزلو الأزلام لخاطر يكمل الأمرتو بي. أبو أركان: -يمه لخاطر النبي بسج. -لا تخليني أردك يا الچبير، خليني محترمة مگامك، الأگولو يتنفذ. -لحد من يا الحچية؟ -لحد ما ترد صاحبة هالمچان وتگضب كلشي مچاني، وتدوس روس العبيد لخاطر يمشون عدل، ما تعبت كل هالتعب لخاطر أتركو بيد هوش إذا ما نربطو يسرحون ويضيعون كلشي. أم أركان: -منهو هاي عمة تحچين عنها؟

وشوكت اختارتي وحدة تكمش المچان بعدج؟ -موش آني الأختارتها، صاحب المچان أختارها عبنها دواجن ومداسها بروسجن، ما رضت على نفسها الذل، چازفت بالموت لخاطر تعيش حرة. -أم غيث؟ -الله يرحمها بس ما بعدتي چثير، نفسها التاخذ أرواحجن وحدة وحدة لخاطر ترد حق أم غيث، خبري أختج خلها ترد سهيلة وكلها: خلها تبطل تلعب بالنار، تراها گربت صوبها چثير وإذا گضبت بيها تحرگها هيه وبزرتها. سماهر: -منهو هاي التحچين عنها؟ من بنواتنا هيه؟

ما ردت، دفعتها بعصتها وإنداريت لعمي: -أخيك أبو حمزة خبرو، خلو يروح للبيت الچبير لحد ما نفرغلو ونعرف شنعلم ويه أهل المچتول. أبو أركان: -طلبنه عطوة منهم أسبوع. -حضروا الأزلام وطوقوا المچان زين، گضبوا المنافذ لخاطر تسيطرون عليهم، وخبر الشيخ الـ... گلو: الجدة بدعة طالبتك. -تأمرين مثل ما طلبتي. -نفس اسمع بالبيت أحركو. بيكم غيث وأركان إذا ردوا خلهم يجوني لغرفتي. أشروا أي، دگت العصا ودخلت. أبو أركان:

-كومي يبه، لمي غريضاتج حتى أوديج. -ما أريد شي، مثل ما إجيت أرد. -عجل تهيري وگولي المن رايدة أوصلج؟ -ما أدري، بس أروح ما أضل حتى لو بالشارع أنام. گمت صعدت غرفتي بسرعة، ما مستوعبة الصار. طلعت بنطلوني وبلوزتي، غيرت بدون وعي، جسمي يرجف، عقلي متبنج ما أعرف حتى أفكر، بس دموعي تنزل. باوعت بالمراية: على شنو تبچين؟ شنو شفتي وياه وهيج محترگة؟ حبيتي؟ هاي هيه. طلگچ يا الثولة، وهو يعرف ما عندچ. هيج هنت عليك أركان؟ لعد وين حبك؟

حتى لو غلطت تدري غصباً عني، لو بمكاني تسوي أكثر من هذا. آني شلون هيج سويت بروحي؟ وين إجيت والمن راح أروح؟ شكلهم إنهزمت ورحت تزوجت غصباً عنهم وهسه تعالوا استقبلوني؟ لعمي ما راح يستقبلني. خالي يكتلني بعد السواه بي أركان. حتى ناي أدري راح يراقبوني حتى يحصلوها. گعدت بالگاع، لميت رجليه لحضني، غمضت عيوني، خليت ايدي على گلبي. ربي إني مسني الضر وأنت أرحم الراحمين. إنفتحت الباب دخلت سماهر، شمرت جنطة: -لمي زبالتج بيها.

-ما آخذ شي، مثل ما إجيت أرجع. -راح تطلعين هيج من البيت؟ بالقرآن يذبحج أركان. -طلگني، بعد ماله حكم عليه. -يلّا گومي عمي مناطرج حتى يوصلج. -خلصت ما عندي شي. دنگت ألبس الحذاء، أريد أسيطر على رجفة جسمي ما أگدر. گمت طلعت، لبست جنطتي على ظهري، نزلت. رحت لغرفة بيبي أريد أودعها. لگيتها گاعدة منتجة وبيدها سبحتها وعمتي أم أركان خانسة جوه رجليها. دخلت باوعتلي بزعل، نزلت دموعي.

أخذت نفس وأشرت: تعالي. رحت شبكتها، خليت راسي بحضنها وشهگت. -عش يا جدة ضيعتي روحج بسبتها؟ -ضيعت روحي من طلعت من أهلي. -وين راح ترحين؟ -ما أدري، بس أروح منا. -شنهو الما تعرفي؟ يريد يوديج المن ياخذج؟ -بيت عمي يم بيبي. -أختج وين؟ -ما أدري. -أندل مجانها بعد ما يفيد تضمين الحچي. -وداعتج ما أدري، سافرت بس وين ما أدري، بس گالتلي من أوصل أراسلج. -عجل شنهو التعرفي؟

إطلگتي وإنت حتى روحج ما داريه عنها، شلون راح تعيشين يا جدة بهاي فطريتج؟ -مثل ما چنت عايشة قبل، أرد لبيت عمو. أم أركان: -بس تخلص العدة ياخذها ابن عمها. -أي وينو عنج؟ بلكي يسمعج حتى يطر راسج، يلّا جدة عمج بالباب. هيه تحچي ودخل عمي وجهه مگلوب، گال: -تندلين بيت عمج؟ -بغداد. -أي منطقتهم بأي شارع؟ -لا ما أندل. -عجل من إنهزمتي منهم ما دحگتي بأي منطقة گاعدين؟ دنّكت ما رديت. أم أركان:

-هاي كلكم طلعتوا تدرون چانت منهزمة وراضيها؟ بيبي: -إنجعل رضينا إندفنج حدر الخياس بدون چفن، گالتها ودفعتها برجها. أبو أركان: -يبه بيت عمج ما أندلو بس بيت خالج. بيبي: -اتصل بابنك الشفيه خلي يدلك المچان قبل لا يرد غيث ويسويلنا سالفة. أم أركان: -ما يحچي مو چان موجود من طلگها أركان؟ -موش صاحي يا الخوثة، شارب لمن طالع من أذانو، لو عندو شوية عگل چان علّگها من شعرها بالسكف وصلخ جلدها حتى يعرف حرمتو وين.

كعدت مسحت دموعي، خفت من الحچي صدك چان تصرفه مو طبيعي. عمي اتصل دقايق وإجه صوت أركان گله: -أمر يا الچبيرررر. -مرض صوتك. جدة: -تركو منتاطح هو وأخو. -وين بيت عمها؟ -شتسوي بي؟ -أريد أودي البت. -أتركها آني أوديها من أرد. -إنطم ونص چلمة ما تحچي، كافي صخام وجهج گدام العالم، طلعتنا جهال، ويييين بيت أهلهاااا؟ -يبه تيه مجانهم.

-وحگ كتاب الله يا أركان أجيج أسحگ على جهامتك وأنعل أبو الجابك عليه، إنضب وگول بيت أهلها وين، لازتها بنص الشارع وأنعل اليوم الي بلاني ربي بيكم. -بـ... يم... هسه أدزلك رقم عمها اتصل بيهم حتى تاخذها. -عندي رقمو لا تتعب روحك، وكونك تلعب لعبة من وتفر السالفة وروح ابني، أگضبك أطلع شكو أسوادين من راسك، يلّا إنقلع أنعل أبو شواربك. سد الجهاز وهز ايده گال: -خبل موش عاقل. -چانو معوزين شوية إجن بنوات أنهار كملنها.

طلع رقم عمي وطلع بره يخبر، ما سمعت شنو بس العرفته گله: نجي ونتفاهم مسافة الطريق. دخل للغرفة لبس عگاله وعباته، شال سلاحه خلاه بجيّبه ودنگ على سبحته، رن فونه. شاله باوع بي گال: -خير إن شاء الله. جدة: -منهو؟ -عم البنوات. گالها ورد: -هلا يخوي... لا هسه طالعين بس مسافة الطريق... خير... شنهو شبلاك اتحچى عدل خلّي أفهم. -يابه موش هسه اتصلت گلت بالبيت؟ شوداگ للشمال؟ ... أبو سمار گول يا الله عيب يخوي وإنت زلمة هذا چلام جهال...

تمام تمام شوكت تردون... خير إن شاء الله توصلون بالسلامة نضل على تواصل... الله وياك. الجدة: -شكو؟ -زلمة جاهل ما أعرف، أتصلت گال بالبيت هسه يگول بالشمال صار أسبوع من رحنه يم بيت أخوي. -خوش، خالها بعدو بالسجن؟ -لا طلع من كم يوم بكفالة. -عجل ودها ألو. -خلي أتصل، هسه يطلعون منتقلين للصين. -لا تگلو أريد أجيب البت. -هو هم هيج. دنگ طلع رقمهم واتصل، أول ما رد گله: -الحمد لله على سلامتك أبو سامر تنذكر ما تنعاد... هلا بيك...

ما يأمر عليك ظالم بالبيت إنتو؟ ... عجل وين؟ ... شنهو؟ ... أهااا خير توصل بالسلامة زيارة مقبولة... لا لا ما عندي شي... أركان شوكت اتصل بيك؟ ... گلت ما اتصل تمام أخذ راحتك الله وياك. -وينو؟ -ماخذ العيال وطالع عمرة. -أبو سامر؟ -عالأساس؟ -اشتعل أصلك أركان للعمرة! -هين لبالج، اتركوا هيج إذا ما كطمت أذانو وربيته من جديد. قومي يبوي روحي لغرفة ريحانة. -ليش عمو؟ -أهلج بقدرة قادر كلهم سافروا اليوم.

-عمو ديجذب، موجود لأن خربان ويه أخوه ما يروح للشمال. -اتبين ما تظل لليل، روحي لغرفة أخيتج وإني أوديج بالليل. أشرت إي وگمت، رحت لغرفة ريحانة. دخلت. جانت كاعدة ببدلتها لحد الآن وأم حمزة توكل بيها. شافتني كالت: -ها يا خالة بعدج؟ -راح يتأكد منهم موجودين لو ديجذبون حتى يوديني. -عجل إذا هيج، گارهيج إشلون راح تعيشين وياهم؟ -متعودة من زمان على الكره. -تعالي حدي يا الگمرية، عيني بارة عليج ضاوية يمه لا يطگنچ بعين. ضحكت.

-صدقة لمحمد، الله يشعل أركان على هاي عملتك. بردت عين كل من شافج ما صلّى عالنبي. شمرت جنطتي وگعدت يمها. دخلت أسماء، اجت متعصبة حيل، دفرت ريحانة. صاحت: -كافييي هلكد مكابلتها اني بنتتتتج! -ومرض، شكو تطلعين خبالج بالبت؟ -خلي اتمووت، عش الساقطات يعيشن ويرتاحن واحنه هيج حظنه. -يا حظ ولجن، البت عقلها موش براسها، ضالة بس هيكل حتى أكل ما تاكل.

-يكفي حامل، عاشت أيام ويه الجان هاوي قلبها. إلا انييي أسبوعين وإني أتوسل ومناطرة بس نظرة منه، ما عبرني أصلاً ما دحگ بوجهي. -يطبج مرض، إشكد حجيت ونصحتج وأبوج إشكد حجه. گالج ابن خالج رايدج، جلبتي ودگيتي رجل إلا غيث. شيلي اتحملي اليصير. -ميخالف أتحمل، راح ينسى هالساقطة. -أسماء بالقرآن إذا سمعج يصلخ جلدج عن عظمج، كضبي لسانج أحسلج. -عش يابه، فوق ما ساكتين جابها من الشارع ودخلها بينه حلوة. هسه من انهزمت وطت راسو بين السلف.

هيه تحجي واندفرت الباب، دخل هو وأركان. اندارت شافته اتصنمت. جان بيده فون خلاه بجيبه. گالها: -كملي يولي عش. انكتمتي. ما حجيت شي جذب، روح اسمع السلف ما عدهم غير سالفة حرمة حفيد شمخي الجبير انهزمت. امم وبعد؟ خلي يزين شاربه أحسن من مشيته بين الزلم ودخوله للمضايف. هز راسه وتقدم يأشر: كملي. أحسن ما ضال اتلطش بالعالم، روح أگضبها وذبحها حتى اترد سمعتك. خلي أذبح الطش الخبر بالأول.

قالها وهفها براشدي من قوته سطر راسها بالحايط، وگعت من يمي. كمزت وكمشت خدودي. دنگ شالها من شعرها. دخيلك والله. ما خلاها حتى تكمل حجي، انطاها واحد ثاني أقوى من القبله طگ خشمها وحلكها دم سوه. عصر ركبتها خنگها، گطعت النفس، كامت اترافس. صاحت الأم خزرها سكتها وضرب راس أسماء بالگاع غمضت لأن حسيته اتفلش. كام دنگ شالها من شعرها سحلها يم الشباج، رفعها وصلها يم الحديد ودگ راسها حيل مرة ثانية. كامت أم حمزه كمشتها قالت له: كافي.

اندار لأركان، أجه جرها كامت تلطم، سحبها وطلعها بره سد الباب. هي تدگ على الباب وتصيح: لحكونيييي بتي راح يذبحها وهو اتوالاها دفرات وراجديات كل ضربه أقوى من القبله وين ما توكعلها. وكعت بالكاع. شال رجله دفرها انطوت على بطنها، رگعها بظهرها من قوة الرگعه اسمع طگة عظم وهي انعصرت، سحگ بطنها حيل گطع نفسها صارت زركه شهگت رفسها اتقيأت. مسح حذائه بملابسها وتركها، أجه يمي انحشكت بالزاوية طلع الفون قال: الشفرة -***ناي***

سد الفون بوجه جود، عرفت كمشوا لحن وعرفوني وين. أخذت فوني وقمصلتي طلعت أركض ألبس بالباب، أجه جود وراي. بس انتظري وين تردين؟ غيث عرف مكاني من لحن، تلقيه بالمطار جاي. كرم: اللزگه، طفروا ناي بوجهج على العراق، وجود شوف لك غير محافظة. باوع له جود رافع حاجبه وهز أيده. ناي، رقمج وين گاعده؟

آسفة جود، آني من أعتازك أجي لك بس مكان لا مو لأن ما أثق بيك لا وروح أخوي، بس غيث ما طول خلانا براسه راح يدز جماعة وراك يراقبوك حتى يحصلني. لا تصدقين غيث يأذيك. لعد ما تعرفه بعد؟ غيث مستعد يدوس على أكبر واحد مقابل كرامته وسمه قدام أهلها. ما أگلك ما غلطت لأن آني غلطان من راسي لساسي، أستاهل اللي يصير لي، بس ما متندمة مو آني اللي أرضى أعيش عبدة وأنطي ابني لوحدة إبليس تافل بحلكها. انطيني رقمج ما رايد شي.

رقمي احتمال أغيره ما طول عرفني يمك، عرف رقمي لا تقلق والله ما عليه جود آني ناي نسيتني؟ ضحك وخربط شعري: المشاكسة أم تك غمازة. روحي ربي يحفظج أمانة وبداعة الخوة، أي شي تعتازيه أول واحد تطلبين منه آني. هزيت راسي. ابتعدي اشكد ما تگدرين، غيث إذا لزمج ما راح يرحمج، أقل شي ياخذ ابنج قدام عينج ويخليه بحضن مرته الجديدة ويشمرج بمكان يخليج تتمنين بس الضوه.

وروح عاشق لو بس مؤمنة على لحن وماخذ دم أخوي ما همني أروح له برجليه، بس هو الجبرني هيج أسوي. كل هذا بس لأن منعج لا تاخذين حق أخوج؟ هذا عاشق، تعرف شنو عاشق؟ اللي لو جان موجود لسه ما جان هذا حالنا، كل وحدة بمكان، شابعين ذل وإهانة وما كفاهم الظلم نيتهم ياخذون حتى الفرحة اللي ربي عوضنا بيها. ديري بالج على طفلج وروحي ناي، لا ترجعين حتى لا تتندمين أكثر.

أدري اتسرعت بلحظة غباء وأدري ما راح يرحمني، بس والله حسيت ابني غالي، ما گدرت أسمع ياخذوه مني وأسكت. اللي سويتيه صح، ابنج محد يستحقه غيرج، روحي ناي. ابتسمت أشرت إي وطلعت، وراي أجت غسق لبست كلاوي وتلثمنا، خفت مراقبين كلشي أتوقع منه شيطان مصور وأعرفه إذا لكفني انتهى أمري. كل شارع أدخله أتأكد ماكو أحد وراي يالله أدخل الثاني، علمًا وصلنا للشقة روحي خلصت. دخلنا جوه شمرت قمصلتي گعدت على الفراش تعبانة، قلبي يم لحن،

قالت غسق: شراح تسوين؟ أظل هنا ما أطلع منا لمن أولد. حيل صدگ تحجين؟ لعد شسوي غير محافظة؟ إذا رحت أضيع ما أعرف، ورجعه ما أرجع له وأتنازل عن ابني لو تصير روحي بي. بس لحن قلبي يمها أخاف يأذوها. مو تكولين زوجها يحبها؟ وطلگها الناقص. أقول لك أريد فلوس، اشكد عندج؟ ما عندي مجال غير اليوم كون أحضر كلشي قبل لا يوصل حتى أقدر أنحبس ما أطلع. عندي أقساط الدوام بعد وكت التسجيل.

انطيني كل اللي عندج وأنطيك الهوية أخذيها والرقم السري حتى تسحبين أنتي، وانتبهي أخاف هم يراقبج فدوة. لا تخافين، حتى مكاني ما يندله ولا يعرفني معرفة شخصية، قليل ملتقية بي ومن كثر البنات المارة عليه نساني. ولو أشك ينسى بس إن شاء الله تروحين للمستعمل تشتري لي ثلاجة وطباخ أهم شي حتى أخزن أكل وأطبخ، ويظل المسواگ أطلب يوصل لي مواشكال، وروحي جيبي لي الكتب النقص حتى أشغل روحي بالدراسة. تمام هسه أروح.

غسق روحي بيدج، أي غلطة منج يطير راسي، غيث ما يرحمني راح يطلع القديم والجديد بيه. أزعل منج والله، أصلاً ما راح أحجي وياج، نظل على اتصال للاحتياط. يلا داقوم هم يالله نحضر، بس ارسلي لي الموقع أخاف ما أقدر أجي يتأخر الوقت أنطي يجيبوا لك الثلاجة والطباخ. بس فدوة كون رخاص ما أريد أصرف هواي حتى أقدر أكمل جواز لحن حتى لو نص عمر أمشي روحي بي. ولا يهمج أدور لمن أحصل شي مناسب.

حولتلها الرقم وراحت، وآني قمت رتبت الشقة وشلت ملابسي شفت النقص حتى أجيبهن وما أطلع بعد. للعصر جابوا لي الثلاجة والطباخ دخلوا أسسوهن، لليل طلعت اتسوقت اللي أعتاز هن، صح قليل بس أعرف أدبر روحي. أشتري وأترحم لماما، لو ما ربتها الله أعلم شنو حالي هسه. رجعت بتكسي لأن ما أقدر أشيل، أتحاسبت ودخلتهن شمرتهن سديت الباب آخر نفس. هسه كلشي تمام، يلا غيث دا أشوف شلون حتكمشني، تريدها حرب وآني گدها؟ كل عقلك أنطيك ابني بسهولة؟

رتبت الغراض شغلت الثلاجة تذكرت ما عندي أكدور، اشتعل أصلك كرم. رجعت تمددت ميتة تعب، نمت بسرعة حتى ما فكرت. كعدت من الفجر على صوت الفون شلته، لقيت غسق رديت: ها ولج؟ ردت أنام قلت خلي أتصل أخاف معتازة شي. لسه بعدج تدرسين ما نمتي؟ هسه خلصت وحنام. لا لا تنامين، أريد غراض مطبخ ومي والكتب حتى أقفل الباب ما أفتحه بس لأبو الفاتورة، راح أعلن سباتي للسنة القادمة.

ههههههه أنعل أبو الحرية العايشة بيها ناي، ولج هذا رعب دا أحس زومبي يركض ورانا مو غيث. ظلمتي الزومبي بالوصف بنتي، هذا اتعدى هالمرحلة من زمان، سوى عقد ويه عزرائيل كل كم جثة يسلمها له مقابل يزود سنة من عمره. نانووو حبيبي، أتشرفت بمعرفتج، جنتي كلش طيوبة وحلوة بس هسه صار لازم أسوي مغادرة.

انظبي لج، روحي اتسوقي لي وتعالي دا أنطيج الهوية حتى إذا ما گدرتي تسحبين منا انطيها لعمتج من ترد للعراق تستلمه مناك، وها من توصلين رمشي مرتين حتى أعرف ما صايدج. سديت الفون راحت نومتي مو مال أرجع أنام. كعدت غسلت وجهي، أتريكت بدون جاي، أخذت علاجي، فوني بيدي منتظرة بأي لحظة غيث يتصل، متفاجئة لحن الجبانة لحد الآن مقاومة وما أنطتهم الرقم. رحت للبالكون اتجتفت، وقفت من وره الشباك ما أقدر أطلع باردة. شنو تفكر هسه؟

قلبك بعده ينبض؟ اتوقف؟ خليت أيدي على بطني، يريدون ياخذوك ما يدرون أنطي روحي وأنت لا، بعتك مرة قبل لا يدگ قلبك ببطني واتندمت، مو هسه بداخلي ودا أحسب لك بالساعات اشوكت تجي. لحن شلونج هسه؟ أكيد أكلتي لك كم كف، يلا ما يضيعن بوجه أختج بس وعد راح أعوضج. أخذت نفس ورجعت لفراشي، فتحت كتبي والفون خليته على الأستاند، بلشت أقرأ لحد ما رمشت غسق مرتين، ضحكت قمت فتحت الباب دخلت بيديها العلاليك شمرتهن وحضنتني. خير شكو؟

ولج دا أحس روحي بفيلم أكشن، شكراً عيشتيني هالشعور. هههههه صدگ دتحجين؟ والله أمشي وأتلفت وملثمة وأتأكد من الشوارع وأركض، الله شعور يخبل. لعد راح تشبعين من هالعيشة ما طول مقابلتني. أريد واحد مثل غيث يركض وراي ومن يلقاني يسحلني ويكتلني وآني أبجي وأكسر خاطره يجي يحضني يخليني على صدره يبوسني يكول: أذيتج يا روحي. الله، هذا الفيلم شنو اسمه؟ أنا والأنباري.

ما أريد أصدمج بالأنباري بس هذا اختصاص رعب، مرة شك أراسل ابن خالي سحلني من كفشتي، شمرني بمكان مسكون، آني الراسلته بعد ما شلع منه لحم وگطع الكهرباء خلى الجن يحتفلون بينا للصبح. بطلت أرد لجود حبيب قلبي، صح ما عنده أكشن بس رب الرومانسية، خو من يعصب فديت. على كولة ذولاك الناس: اندارلو فدوة. أمشي وياي عندي مسألة ما دا أفهمها شرحيها لي. بعدج مصرة تكملين دراسة؟ لعد ما عرفتيني لسه؟

من أخلي شي براسي أنفذه، تدرين من قررت أنحزم من خالي وأكتشف هالشي كل يوم يمر يصلخني صلخ لباله راح أخاف وأتراجع، ما غمضت عيني إلا وآني بتركيا. وأختج؟ راح أجيبها ونعيش بعيد عنهم، حياتهم ظلام وحنا خلصنا عمرنا عايشين بالظلام، أجه الوقت نطلع للنور. غيث راح يتركج؟

دخلت عالمه بالغلط، ما أعرف شلون أخلص نفسي، بس اللي أعرفه لازم أأمن مكان حتى أجيب لحن وأولد ابني أخليه بحضنها وأأمن لهم حياتهم بعيد عن جهنم الناوين يجبروهم يكملون بيها، حتى أعرف شلون أجيب حق عاشق، إن ما قدرت بالقانون أخذه بيدي ولهنا انتهت مهمتي بالحياة. أشوفج نهايتج بالسجن مؤبد لو إعدام ما تقبل غلط. عود تعالي زوريني. الله ونگعد نكتب قصتنا وأودعج بيوم اللي يعدموج وأترحم عليك لأن بسببج اتعرفت على جود.

عود ردي لي معروفي بأختي، حسبيها بدالي ولا تخلين واحد يندل مكانها. وبعد ما أشوفج؟ شوفيني بيها وذكريني بضحكة غيث. هاي إذا ما انكتل قبلج. والله هم أهلها نواقص، مو بعيد عمه يحمله الثار وينطي راسه. والورث كله يصير باسم ابنج. ما تشوفين ابني قاتلهم؟ الكل يركض يريده، وأدري إذا حصلوا ما يعيش ساعة وحدة لهيج أنهزمت حتى ما تلوموني.

الله ينتقم منهم، لا والله آني الوحيدة وقفت وياج، صح غيث ما يستاهل بس حياته ما تنطاق ولا هو يقتنع يتركهم لو يطلگج، أحسن شي سويتي من أنهزمتي. نصحني قال ما راح تكدرين لعيشتي، چلبت لا أقدر أخذني بس والله جنت مجبورة، لحن جانت على فراش الموت وما جنت أتخيل هيج واحد راح يحب الثاني وراح يجي يوم أتندم وأضطر أنهزم منه وأكسره وراي. هااا ناي مسحي دموعج ويلّا الأكل برد خلي ناكل ميتة جوع.

كعدنا ناكل ونقرأ للعصر، عين بالكتاب وعين بالفون. أجت رسالة لغسق فتحتها قالت: جود. اشبيه؟ دا يسألني عنج شكله. قولي له ما أعرف أي خبر عنها، ما شفتها من زمان. أرسلت، خليت راسي بالفون وياها طلع جاري الكتابة، أجه مسج: ناي يمك بس لا تكولي لها دا أراسلج. باوعت لي أشرتلها: لا تكولي لي، كملي. لا ما أحجي لها، رايد شي؟ علاج، عدها فلوس؟ شنو معتازة قولي ولا تكولين مني.

لا خزنت مواد أكثر من حنطة يوسف وغيرت شقتها راحت منطقة أبعد ما نندلها. على الأساس أندل الأولى حتى الثانية، شنو تسوون؟ هي نزلت تتسوق وآني اختليت مكانها. ولا تكعد راحة الفتاة المغامرة، شلونها دراستكن إذا تعتازون شي افتحن كام أشرحه لكن. ما يحتاج تشرح بس راويني وجهك أفهم وحدي، أمك شلونها؟ تسلم عليك تكول: الثكل حلو. أبوسهاااا، كلها حكم ومواعظ، كافي أنت ثقيل راح نكون ثنائي متوازن.

بنتي انتبهي لدروسج، عدتي اللي شرحته لك البارحة؟ إي والله مرتين ما ذكرت من شرحك بس عقلك وين انتبهي. لأن أنت شغلتك تعبانة بابا، أهلك خطية تعبانين عليك ودا يصرفون ليش هيج؟ إي والله بابا كلش خطية، متساعدة وتاخذني منه والله ربي راح يكتب لك اشكد ثواب. هههههههه أستغفر الله، روحي بنيتي عندي شغل يلا حبابة روحي كملي دروسج. أحبك. نعم؟ دا أحجي ويا كتاب الفيزياء. سلمي لي على كتاب الاقتصاد اللي يمك وكلها خلي تخفف ضغط مشاكل السلعة.

سدت الفون واندرت لي: خو ما شفتي شي؟ لا أبد يا أخي من ثگله أجاني مغص. أحب أمه. حبي صاحبه بطريقج وكومي ولي دا أطلع أجيب دفاتر بعد. استوني أقوم وأجاني مسج من لحن... ***لحن*** أريد أحجي ما أعرف. صاح بصوت كمزني: الشفررررره شنهووو؟ ما أعرفها هي تتصل. حلو أركان خويه شوف شغلك. شمر الفون على أركان ورد لأسماء دنگ عليها قال لها: إذا دحكت شكلج بيت أهلي أجرم بيج.

لا لا لا غيث أبوس رجلك أصير لك خدامة بالقرآن أصونك حتى لو ما تعقدني بس خليني يمكم، ما راح أدحك وجهي ولا تسمع نفس مني. أركان تاخذها تزتها على أبوها، قله إذا لمحت شكلها اعتبر حقك منتهي. كامت تلطم باثنين أيديها. شالها من شعرها ما تگدر تگوم يمكن كاسر ظهرها لأن صرخت بصوت رجت الغرفة، أخذها سحل فتح الباب شمرها على أمها قال لها: هالمرة بس طگيتها على الخفيف، الثانية أدفنها، ربوا بنتكم لا تجبروني أربيكم. سد الباب.

وأركان يطبق بردانه بس شوفته وهو هيج هادئ قلبي وحده وقف. شال الفون فتحه وأجه يمي خلاه كدامي. الرقم لحن. حتى النفس گطعته. دنگ حك خشمه، أتقدم حشكت روحي خفت من شكله. وصل قريب كلش، خلى أيده وره ركبتي سحبني له همس: الشفرة شنهو؟ مااا ما أعرف. ما رد نزل أيده خلاها يم بلعومي حرك أصابعه على كيف حتى بعده ما ضاغط، گطعت النفس ودموعي نزلت.

كمشت أيده أحس روحي بهتت، ضغطه ما جانت قوية بس من كثر الخوف غمضت ما گدرت أوقف على رجلي، گعدت بالگاع. گعد گدامي نص گعده كمش أيدي شهقت. الرقم شنهو؟ ما أدري. دار أيده وره راسي بحركة خفيفة ما أعرف اشسوه. بس افترت الدنيا رخت أيدي تركت أيده، كمشني نيمني بالكاع وخر شعري عن وجهي. لحن حركة ثانية تفقدين الذاكرة. ما أعرفه الرقم. غيث: اسم عاشق لو اسمج؟ غمضت. أحرفكم الأولى. أركان. جرب! أي غلط تلقفنه نغلة هاي.

عجل هاي راح تموت وما حكت يمكن ما تعرف صدق. خلينا نروح لتركيا نعرفها من الإقامة. الحريم ما يهتمون بالإقامات مالتهن حتى بدونهن يدخلن محافظات. يمكن بإسطنبول. موش غبية لهالدرجة تظل بإسطنبول. تدري أحصلها بسهولة. نروح لغير محافظة. أدور بغير محافظة وهي بأسطنبول خاتلة تضحك على عقلي. ما أعرف شنو براسها، مو بنت إبليس ما يلحقها، شايلة عقل وتفكير ما يخطر براس أحد. فلوسها تخلص، تضطر تطلع تشتغل. عجل ما عرفتها بعدك؟

هيج بشر إذا ما مأمنة روحوا لشهور بعيدة ما يجازف بالموت. إشكد عايش وياها ما عرفت طريقة تفكيرها. ما تنحزر كل دقيقة تغير طريقها، بالثواني تدخلك بمشكلة، وبلمح البصر تطلع منها. تصفن أكبر مسقط، متمرسة بالجذب والمصايب لدرجة ما تخطر بعقل مسودن. رد اندارلي أركان، أني من الخوف كوة أتنفس ما أعرف شناوي. دحقتي أسماء شعملنا بيها؟ أنتِ مضاعف أعمل بيج. شهقت بخوف. آخر جنص لحن، أحكي والج جلمة ما نأذيها. كل شيء ما أعرف.

هز راسه ودنق، كومني خلاني عالحايط كعدني، طلع من جيبه جكارة ورثها، بجيت. أخذ نفس، نكثها من الجمر وخلاها يم عيني، غمضت حسيت بحماوتها. وروح أخوي أطفيها وأقلع عينج. وخرت راسي، كمش وجهي بأيده عصره وثبت راسي، سد حلقي وقرب الجكارة بصفحة بركبتي، لاحتني لولا ما أدري بس من الرهبة صرخت صرخة طلعت من قلبي. وخرها وسحب النفس مرة ثانية، نفخه بوجهي ودنّا الجكارة يم عيني. أظن وحدة تكفي. الحماوة مالتها حسيتها جوه الجفن، قلت له: ع ل ن.

عفية بالحبابة. الرقم. سكتت، سحب نفس منها وسد حلقي، كمشت أيده أشرت أحكي. نفخه، وخر أيده، رديته وغيث يكتب. دز الأحرف، دقايق واتصلت. مسح دموعي بطرف أصابعه. راح تجاوبيها وأي غلطة، وروح شاهين أطفي الجكارة بعينج، سمعتي يولي؟ أشرت: إي. شكو شيء أكتبه تقري وتسأليها، غيره ما يحتاج أكلج عقوبتج شنو. لميت رجليا. طلع فونه وغيث رد على الاتصال، فتح سبيكر، قالت: ها لحن، شعجب اتصلي؟ هاا ما عندي شيء ومحد موجود.

آهاا، قلتي ما عندي شيء تمام، عندج شيء تقولي لو أروح عندي شغل؟ كتب أركان، قريتها قلتها: أركان طلقني. ناقص مثل أخو، استغرب بيج وضربج مو؟ لا. هه، أغبياء لبالهم المرة ما تعيش بدون رجال، ما يدرون نفر الكوكب بدينه. أريد أجيج. وين أنتِ هسة؟ بعدني يمهم بغرفة ريحانة، خلوني حتى أخدمهم. نطاج جوازج؟ إي، وفلوس مهري. حلو، قدمي على فيزا ومن تطلع اتصلي أقولج وين تحجزين. على إسطنبول مو؟ لا بأنطاليا أني.

يعني أجيج على أنطاليا، أخاف ما أقدر أتصل بعد. لا تعالي على سامسون. ليش؟ حجزت طيران من دهوك لآفيون، احتمال هسة أطلع لإيران. غيث ضغط على سنونه وشمر الجهاز فلشه بالحايط، كمش راسه قال: أكضبها لو طير للسما. أركان باوعلي، لميت رجلي لحضني. مسح وجهه وقام. لازم نلقى طريقة، ما تظل هيج. آاااخ ربي بس أكضبها ما رايد شيء. نروح للمطار، نحصلنا واحد يعرفنا حجزها أي محافظة. دنقت الباب وصوت حسام يقلهم: جدي ينشد عليكم.

فتح الباب غيث طلع وأركان إجاني، رجعت ليورا، قعد قبالي نص قعدة. وخر أيديه، كمش وجهي داره، أتلمس رقبتي، باوع لعيني، مشى أيده على رمشي. وحق كلام الله لو صاير بيج خدش لنعل أبو أصلج. وخرت أيده وضميت وجهي بحضني، شهقت أخذ نفس وقام طلع، أحس الدنيا تفتر ودايخة، باوعت لريحانة. شفتِ أخوج إش سوى بيه؟ طوت نفسها وضمت وجهها بالغترة، ما حاسة بالدنيا. دخلت أم حمزة قالت: طقج الجلب؟ ما رديت.

إجت يمي قعدت، شالت راسي باوعتلي، ردت أديره صرخت أحس رقبتي طقت. اصخام بوجهه هذا شعامل؟ رقبتي خالة. توتة ندهي جدتج بسرررعة. قامت جرت مخدة خلتها وكمشت راسي مددتني عليها، دخلت أم أركان قالت: شصاير؟ حدري خية، هذا شانط رقبتها وأني ما أعرف أشلون أردها. هاي الهوسة كلها، لا تقولين ما طاقها؟ أركان ما يطق حرمة.

موش بس هي حرمة، عجل إشوا خواته يكضبهن ينهيهن وسهيلة صاعد نازل يطق بيها، آاااخ يمه تعالي لي ودحقي حظ بنتج بيا خيسة نايم. تركي الحظ، البت مشنوطة رقبتها شعمل، لا يصير لها شيء. لا تخافين كل شيء ما يصير لها، موش عصبة هاي راكها لخاطر تخدر ويخوفها، عفية ابني الذيب هذا كل حيلك. البت يتيمة، خافي ربج بيها. بس أريد أعرف أنتِ هم عندج قلب، بنتج متسقطت وأنتِ جاية مزنحة لهاي؟

بنتِ لسانها باذر إذا ما نحش ينفلع راسها، بلقي تخاف وتبطل تلتح ورا سماهر، دتعالي دحقي البنت روحها رايحة من الخوف. تستاهل عبنها عرمة وما تنكضب، كون جاسرها جان برد دمي صدق، ميلي غادي لشوف. قعدت يمي بحركة سريعة ما أعرف شسوت بيها بس حتى ما حسيت رجعت طبيعية، تفلت بوجهي وقامت. صدق روحي رايحة حتى ما حكيت، أول ما غطتني أم حمزة نمت. يومين وأني بالغرفة ما أطلع لأن عمي ما موجود، أخاف أتحرك لا هم أنكتل وهنه هم ما دخلني.

أسماء طلع عدها زلة بالفقرة، أخذتها سماهر وياها هناك لأن ما عدها أحد وأمها ما فارغة، يا دوب ريحانة اللي عليها ما أعرف كم شهر بس بطنها بدت تبين وخايفة عليها لا تسوي شيء تروح طفلهم مكابلتها أربعة وعشرين ساعة. رغم ما سويلي شيء بس من أذكر روحي بين أيديه لا حول ولا قوة أبكي بخوف وهو مستغل هالشيء، أحقد عليه وأكره نفسي أشلون جنت مصدقته، هسة يا الله حسيت روحي صدق ثولة وما أفتهم. قاعدة يم أم حمزة، دخلت

سهيلة تركز برجلها قالت: يلا ست الحسن كافي مطمورة وإحنا نخدم. أم حمزة: البت مريضة وما تعود الكم بعد. حتى لو موش ضالين بس نعلف بحلقها، شعرفنه إش وقت ترد لأهلها، سالفتها مطولة، خلي تقوم تساعدني بحدي بالمطبخ، يلا قبل لا يردون. عمج ما يرضى. جدتي قالت: خلي تقوم ومن اليوم تجي تنام غادي يمها لأن حسام يريد ينام يمكم، المكان بارد بالمضيف. أمج إشلونها؟ قالوا غيث طاقها.

الله يجسر أيده بدل جسر أيد أمي، جعله بالمرض الما يقوم، منو قدرتوا على الفقرة تارك حرمته ادحم بالبارات؟ روحي أحكي هالشيء جدامه، عش تتختلين؟ لا أحكي ولا يحكي وياي، مشاكلي مكفيتني، يلا لج قومييي. قمت طلعت وياها للمطبخ لقيته تقول مزبلة من الوسخ. هي يا دوب وقفت عالطبخ وأني بلشت جلف وتنظيف، ما خلصت لمن طق ظهري، دخلت عمتي أم أركان قالت: لا هلا ولا مرحبا بهالوجه. سهيلة: عمة كضبي الطبخ تا أسبح راح يجي أركان. موش الصبح سبحتي؟

هههه لا ذيج سبحة الليل، هسة كلي ريحة طباخ، أبروح ابنيج بسرعة ما أبطي. ما صار عندج جاهل؟ إن شاء الله هالشهر وأبشرج. الج بشارة مني ست، أبتوت ترس أيدج، يلا روحي قبل لا يرد. البشارة من يروح الثاني. هذا شغلته هينة بس يكضبونا ويجيبوها لجايه وأني أعرف أشلون أريحه. ما يجيبها لجايه، يأخذها لبيت جدتي غادي يحبسها لحد ما يصير الجاهل. إي وخطية الجاهل اختنق بالحضانة، شنهو أول جاهل نفاس يقطع النفس؟ هسة صدق ارتاحيت أروحن يله.

راحت وهي وقفت عالطبخ، خلصت المطبخ قالت: هالوهاد عدل نظفي وانطي مي للحيوانات. عرفتهن بلشن حرب ويردن حجة، أعترض حتى يضربني بدل كتلة أسماء لأن بيبي ما هي رايحة لبيت أبو حمزة.

سكتت ما رديت، طلعت للمكان كله قذارة حيوانات ووسخ، لفيت الشال على خشمي وبلشت بالتنظيف، كل دقيقة أريد أتقيأ كوة مسيطرة، آخر شيء ما تحملت، قلبت معدتي حتى الحيوانات ما انطيتهن مي، صعدت ركض للغرفة لأن ملابسي ادمرن، صارت بوجهي سهيلة طالعة من الغرفة تقول عروس، المكياج والذهب والعطر ساطر المكان، عود لابسة أسود. شافتني بهالحالة القذرة طقتها ضحكة بصوت عالي وإجى صوت أركان من جوه: ومررررررررررررض. دخلت للغرفة وقفلتها بسرعة.

وقفت ورا الباب أباوع لروحي وقذارتي، صعبة عليه نفسي ليش هيج يصير بي اليتيم؟ ملابسي وسخة وحالتي تعبانة مذلولة ما عندي أحد يرضى يستقبلني، ضالة عالة على ناس. سمعت صعدتها وهي تسولف تقله: حضرتلك الحمام. نزلي زهبي الزاد غيث جاي. بس أحضرلك ملابسك، تآمر من عيوني أهم شيء رضاتك عليه. دخلوا للغرفة سدوها، غمضت، تاليتج تخدمين وهم يضحكون على جرحج.

أني راضيتها استاهل، ذيج ناي أزغر مني بس ما رضت على نفسها الذل، مع العلم تدري وراها موت بس طلعت بكرامتها ورفضت تكون ذليلة. وأني راح أكون مثلها، أدوس الكل جوه رجلي، محد يكدر يحاجيني. رحت للكنتور طلعت أنكس فستان، رحت للحمام. فتحت الدوش يتوازن ميه بين ما نزعت، دخلت جوه ساعة كاملة وأني أجلف لمن وقعت شكو وسخ.

نشفت وطلعت وقفت قدام المراية، باوعت الدلعة مال فستاني كلش أوفر، صدري ورقبتي كلها طالعة وضيق من فوق، بلحظة خفت من أتذكرت أركان. شكلنا لحن ولج، غيث دق على راسه وناي ما لبست لا شال ولا فستان لمن خلته ينجب ويرضى بالواقع وهم ضربته على وجهه وانهزمت. شغلت الشسوار نشفت شعري وسحبته. طلعت علبة المكياج خليت خفيف، شلت الربطة زغيرة شديتها مثل الإسكارف وطلعت شعري من قدام كم خصلة بإهمال.

رشيت عطر، باوعت بالمراية ضحكت، صدق نفسيتي اتحسنت، أحس روحي إنسانة ثانية، إنسانة قوية رغم شيء قليل سويته بس حسيت اتغلبت عالضعف. لبست شحاطتي وفتحت الباب صار الغروب، نزلت دخلت لغرفة بيبي لقيتها جاية وعمي قدامي قاعد، سلمت. قعدت يم بيبي، دنق هو يسبح. بيبي: أشلونج يجده؟ الحمد لله. البنوات زهبن العشة؟ إي بيبي ديصبن. عجل قومي استعجلي الولد إجوا. ردت أقوم دخل غيث وأركان، رجعت قعدت حشكت روحي يم بيبي. إجى

غيث دنق باس راس بيبي وهمس: لقيتها. سبع كفو من أصلك. قلبي رجف شلت راسي، إجت عيني بعين أركان، خزرني ودنق على بيبي باس راسها. قعد يمها من الجهة الثانية. إش وقت تسافرون؟ أركان: باجر الفجر. أبو أركان: أخذوني بطريقكم أودي البت لأهلها. وين يا بيت أهلها؟ تراهم مسافرين. اليوم جنت يمهم واتفقت ويه الزلمة وأتفهم الوضع. ييييبه ما تطلع من هنا، البت بعدها على ذمتي.

لا ما بيها مجال، يا أني مسودن يا أنت خبل وناوي تخبلني وياك، يول موش طلقتها جدامنه؟ إي بس بدون شيخ، وببيت أهلها عدهم ازلام هذا شرع ربي هم تدخل بي؟ أنجعلك بالموت واختلاف الدفانة ابن الكلببببب! أنت إش جابك عالشرع؟ واحد سكير تافلته الكاع، خزيتني وسودت وجهي جدام العالم وكوة قدرت أسدها، تقولي ما تروح؟ ما تطلع وحق كلام الله، إذا اتحركت للباب أجسر رجليها وراوح وراها أسحلها هي وأهلها، لا تقووول ما قال.

أودها وكونك أزلمه وتسويها بالقرآن أخلي طلقة براسك وأخلص من رعونتك. وحق كتاب الله أحرقها هي والبيت التنطمر بي، ما أخلي بيهم صاحيييي، لا تقولون ما قااال. قام دفر الباب وطلع يتعارك ويه روحه. بيبي: تسودن الزلمة وروح ابني. مسودن من كاعه، هذا الولد راح يموتني ناقص عمر. خلو يردها لذمته ما طوله هيج قاتل روحه. بيبي، اني ما أرد، أريد أروح لهلي.

أبو أركان: ولا اني أخليكي ويه الخبل، كل دقيقة مزاجه شكل، تهيري واني أوديكي يبوي، وأنت عمك أبو حمزة إش لونه؟ غيث: بالبيت، الشباب ملازمينه، طشينا خبر سافر لدبي وجهزنا بيت جدتي. موش بعيد. أحسن، بعيد عن العين، وإحنا ما نتركها نتناوب عليها، وهم راح اجيب لها وحدة أزتها حدر الكاع تسليها لحد ما تولد وأخلص منها. الله يقويك. هو يحكي واني قلبي نعصر، يعني لكاها، شلون أقدر أنبهها، أخبرها من خالتي أم حمزة ماكو غيرها.

قمت طلعت رحت للغرفة، دخلت لقيتها توكل بريحانة، قلت لها: خالة أبوس إيدك. خيرج يمه؟ شفتي وجع القلب مال الفقد واني ما ضل عندي غيرها. لقوها؟ فدوة أروح لكِ، والله ناويين يقتلوها بروح شاهين، شلون كانت تساعده، رديلها الله يخليكِ. يمه شيخلصني من غيث؟ اجفينا شره. والله ما أخلي يدري خالة، راح تموت أختي الله يخليكِ، قلتها وجريت إيدها دنقت بستها وبكيت. جرتها استغفرت.

خالة تموت خالة، والله أنتحر وراها، ما عندي غيرها أظل بروحي بهالدنيا، حسبيها بنتك وهيج يسوون بيها، ترضيها؟ يا خالة والله يحركنا غيث. إذا درى أقول له اني بقت الفون، أبوس إيدك. هاك وطلعي بالمزرعة، لا تخلين أحد ينتبه، وإذا عرفوا ترى أنكر، أقول لهم هي أخذته بدون دراية. اي اي. أخذته خليته بصدري وطلعت بسرعة، أمسح بدموعي، رحت بالمزرعة خفت هم ينتبهون، ابتعدت شوية. قعدت على حجر، استوني أطلع الفون

وأسمع أركان وراي قال: شتسوين هينه؟ هاا؟ ومرض! وشنهو هالبس؟ انتي شنهو ماكو أحد جاسر راسك؟ قبل شايفينا مقرنين جدامك بس فهميني. أنت مو طلقتني؟ أطلقك! أزتك أدفنك! هالبس إذا لقيتك لابساه أطرك بالنص، وشعدك قاعدة هينه؟ هاا؟ دخيل رب العباد، لحن اللي براسي كافي يسودن سلف بكبره، لا تزيديها، شعدك هينا؟ ضجت جوه ووو. اي كملي. هيج اجيت دا أشتم هوا. مسح وجهه خلى أيديه ورا رقبته، باوع لي.

صعدت الزيق مال الفستان وخليت إيدي أضم صدري لأن عرفت متخبل من هيج. أخذ نفس، اجى يمي، ردت أقوم كمشني رجعني لمكاني قال: بس خلي أحكي وياكِ. ما بينا حكي. أذيتكِ. ما رديت. كرهتيني يولي؟ اي. حقكِ، بس انتي ما قصرتي طلعتيني جاهل قدام أخوي. وأخذت حقك وزيادة، باجر حأروح بعد ما أفشلك، صدق اني مو كفو أصير مرتك. لا تروحين.

ما أريد أظل أصلاً غلط طلعتي مناك وتندمت لأن سويتها، ولو يرجع بيه الوقت عمري ما أفكر أجيك وأطلب منك اللي طلبته. طلبتي أولاً، انتي لي من أول يوم دحقت وجهكِ بي، وما تصير لي لغيري حتى واني حدر التراب هم أخلي جماعة وراي تقتلكِ. شنو شنو اشتريتني؟ يا أخي ما أريدك. دنج عصر وجهي رفعه صار قريب من وجهه،

حكى من بين أسنونه: والسماني أركان، أراويك الأديان كلها بين عيونكِ، أكرهكِ بحياتكِ وأخليكِ تتمنين أمك ما جابتكِ، بس تفكرين تطلعين من هينه تروحين لأبوي تقولين له: ما أروح، سمعتي؟ وخر إيده قمت. ما أروح ولا أقول له، والصبح حأروح، دا أشوف شتسوين. لحن! لحن! لا تجربين حظكِ وياي، بالقرآن أدفنكِ، تعرفين شنو أدفنكِ؟ أنت طلقتني ظالة شنو؟ أردكِ. ما أريد أرجع لكِ.

لا تردين، ظلي معلقة حالكِ حال أي زمال، لا تطلعين ولا تحترقين من مكانكِ، وهاي عيونكِ أقلعها بيدي بس ألقفكِ مدحقة بوجه أحد. راح، ردت أقعد رد جرني من إيدي. وهذا شعركِ أدير عليه بانزين وأحرككِ انتي ويا إذا دحقتكِ بدون حجاب. دفعني وراح، كمشت إيدي أفرك بيها، سمعته رجع كمزت كمشني من فستاني جرني له. ذني تنزعيهن وتزتيهن أحسن ما أربطكِ وأزتكِ من السطح، سمعتي؟ أشرت اي. شمرني على الحجر قعدني بمكاني، عدلت فساتيني.

راد يمشي وقف، قبل لا يحكي بكيت. مسح وجهه وأخذ نفس. ادخلي جوه. عوفني! والنبي أنتحر وأخلص منكِ. شكو قاعدة وحدكِ؟ ألطم! أملخ روحي! شسوي يا أخي؟ اعتقني راح أموت. ادخلي موتي جوه لا يمر أحد. وروح أخوي أقوم أنحر نفسي وأخلص، تعبت أركان تعبت، اتركني يا أخي، هسه جاية بس آخذ نفس، راح أختنق. صوتكِ بت السطل، العالم تسمع نعوصتكِ، شتتخيل؟ قعدت بالكاع كمشت راسي راح أتخبل ما بيها مجال. طلعت أم حمزة دفعته. ش لزقت؟

راح أتخبلها، روح اني يمها هسه نرد. خلي شي على ملابسها، حسام وغيث هينا. هاي عباتي راح ألبسها بس روح البنت ترجف ساعة وانجلطت. ابعدي عن طريقي. اي عافيه ابني، اكو حرمة هناك دحك على حرمتكِ، روح تقاتل وياها. ما رد باوع صفح لخالتي وراح، هزت إيدها وقعدت. وروح ابني، إذا طلع عنده ذرة عقل أطلع ما أفهم، خبرتي أختكِ ولج؟ ما شفتي إش لونه؟ وين أقدر أخبر؟ راح يفتر بالمزرعة يصيد أكلاب مثله، اتصلي.

دخلت رمز صفحتي رجعتها دخلت على نايا اتصل بيها رن، ضحكت بس غابت ضحكتي بصوتها من ردت بتعب كوه قالت: لحن راح أموت... *** نايا *** يومين محبوسة بالشقة اختنقت وهو ماكو حتى ما رد لتركيا، حسيته يضحك عليه ما يعرف وين مكاني. كنت أقتصر بالأكل، أحاول أكل وجبة ونص باليوم، وحتى الفواتير أدفئ بالحاف، ما أشغل صوبيا حتى أقدر ألم فلوس جواز لحن.

كنت محتاجة علاج وكم دفتر، باوعت لساعتي اتأخر الوقت، حتى لو طلعت محد راح يشوفني، أجيب كم إبرة حتى ما أطلع بعد. لبست وطلعت رحت للماركت للصيدلية ما حصلت، يمها صار الدلمش قدامي والجو ممطر، ماكو بشر، أمنت أكثر، رحت صعدت أت لثمت عدل. رحت للميدان نزلت ركض للصيدلية شفته يدعزل، دخلت أنطيته الراچيتة، أخذت علاج، شفت أشياء مال طفل رف قلبي اشتهيتهن، أخذت ممه وباودر طفل.

دفعت فلوسهن أخذتهن وصلت للباب حضنتهن أول أشياء لابني، يمه فديته هو وأبوه. بستهن وكملت طريقي. صارت المكتبة قدامي، دا أروح والمح صديق غيث التركي ويا صاحبته، شافني ما شافني ما أدري. ركضت لجهة الموقف بسرعة، ما عاونت تجي الدلمش واقفة وأتلفت. قام واحد قعدت مكانه، إيدي على قلبي غمضت، ربي اعمي وسد حلقه كون ما شافني، دخيلك وين أروح هسه؟

اجت الدلمش قمت صعدت كانت مقبطة، ظليت واقفة وقلبي يدق بسرعة، وصلت قريب دفعت ونزلت ركض للعماره، دخلت أركض حذائي مي والدرج مرمر، ما حسيت غير رجلي راحت بالخالي، أجيت قبل على بطني. انقطع النفس، أريد أسحبه ما أقدر، كوه قمت صعدت أسحل بروحي، دخلت للشقة شمرت أغراضي واتمددت ظهري وبطني سوى وجعني. طويت نفسي ردتها تهدأ ماكو أحسها تتملخ.

قعدت وأشوف الدم ينزل، نزلت دموعي ويا، خليت إيدي على بطني، لا ماما لا تروح فدوة الك، ولك آخر شي بقالي أنت. عاشق لا تتركني مرتين استوني ردت ضحكتي. جسمي يرجف خايفة أحرك روحي وأشوف نزف، غمضت وخرت رجليه وأحس الدم ينزل بغزارة، شهقت بحركة: قتلتك اني، قلت لك بيدي ولك استوني اشتريت لك ممه لا تروح. ربي دخيلك ابني، ربي أنطيتنيا وجبرتني بي لا تأخذه وتكسرني، تركت كل شي لخاطره، اتركليا.

حسيت لويه قوية شلعت روحي قطعت حتى النفس، اتمددت طويت نفسي، شلت فوني اتصلت بغسق مغلق. الوجع ما ينحمل والدنيا افترت من الهبطة. عصرت بطني وعضيت إيدي أريد آخذ نفس ما أقدر. ردت أقوم أطلع حتى أدق الباب على الجوارين يلحقوني ما قدرت، افترت الدنيا ورجعت لمكاني. أفرك ببطني أريدها تهدأ ماكو، النزف بعد ما ألحق عليه، صرخت: لحقوني. افترت الدنيا بعد ما حسيت. صحيت على ألم يروح ويجي، فتحت عيوني كوه، هدوء وحدي.

خليت إيدي على بطني: بعدك لو رحت؟ ردت أشيل راسي ما قدرت خدرانة. مديت إيدي ترجف اتصلت بغسق مغلق، ندمت شلون ما سجلت رقم كرم، وقع الفون من إيدي. أباوع إيديه كلها دم، المكان صاير عبارة عن أحمر، البرد مجمد جسمي بدون غطا سابحة. فتحت حلقي أريد أصيح صوتي ما يطلع، غمضت قمت أحسب لنهايتي. أسوء موتة بعد هاي حياتي وحدي بدون أهل ولا حبيب، فاقدة جزء من روحي. أفقد وأرجع وحدي، تمنيت يمي غيث، تمنيت يهدئني من

الخوف الشايلته ويقول لي: ما تموتين، بعد عندكِ عمر لا تخافين. فوني يضوي كوه سحبته، رديت بدون لا أشوف منو يتصل، اجاني صوت لحن همست: راح أموت... *** لحن *** قمت بسرعة فتحت كام. نايا! بس فتحي كام دا أشوفكِ فدوة أروح لكِ، لا تقولين أموت، لا تتركيني ولج، فتحي كام. ما أقدر. لا لا تقدرين نايا نايا، احكي شبيكِ؟ انفتح الكام نايمة عيونها سادتهن كوه تفتحهن وترجع تغمض، الموبايل ينهز ما كامشته عدل، خلته على شي يمها وتركته.

بكيت بصوت عالي. همست: لا تبكين، خليني أروح واني ما قلقانة عليكِ. لا لا نايا نايا باوعيلي ولج، فتحي عيونكِ، أشبيكِ احكي. عاشق مات. منو يمكِ ولج؟ صرخي خلي يلحقوكِ نايا لا تغمضين نايا. ما عرفت شسوي، أخذت الفون وركضت جوه، دخلت لبيبي كانوا قاعدين، قلت لها: لحقيني بيبي نايا ماتت. جدة: شنو ولج؟ هاك احكي وياها، كلها شتسوي حتموت، أبوس إيدكِ. أخذت الفون قالت لها: شمالكِ يا العرمة؟ همست شي ما عرفنا.

يا مصخمة ميلي الكاميرا خلي أدحكِ شنو وضعكِ؟ حركت الكاميرا شهقت بيبي، أباوع الشقة متروسة دم. نزلتي الجاهل يا الهتره، جعلكِ بالموت. همس: لحن أمانة يمكِ. غيث على قعدته ما تحرك يباوع لنا. بيبي: ولك قوم البنت موته. يطبها سطعش مرض، خلها تعفن، محد يندل مكانها. ركضت يمه كمشت إيده. الحقها خلي جماعتكِ ينقذوها بعدين أقتلها، أبوس إيدكِ غيث أختي حتموت. ضحك بتعب وسحب إيده. ولك ماتت! ماتت! شنو من قلب شايل؟ دنج على فونه ما همّه.

دخل أركان قمت رحت له. أركان أسوي اللي تريده بس نايا. أش بيها البلوة؟ راح تموت، خبر أصدقائكم خلي يرحون لها. منهو يندل مكانها؟ بيبي: عشتوا تقولون حصلناها. لا عرفنا بتركيا بس بالضبط وين ما نعرف. قعدت متبنجة كامشة الفون واني أشوفها تموت قدامي. قام غيث اجى أخذ الفون قال لها: أنكس موتة تستاهليها. راح ابنكِ غيث. انجعل لكِ لاحقته. شوف الممه اللي اشتريتها له.

ما تستاهلي، قذرة وموتة أقذر، حتى دفن ماكو، لمن تطلع ريحتكِ بالتعفن ذاك الوقت يلقوكِ. بردانة. لسه البرد جاييكِ من تصيرن جوه الكاع ونرش عليكِ المي. همست: غيث خايفة. أباوع لغيث، ظل يباوع لها ساكت شوية ونزلت دمعته بسرعة مسحها لا أحد ينتبه له. شمر الفون علي، شلته لقيت إيد نايا على الفون واقعة ومنتهية ما بيها نفس، صرخت ولطمت على وجهي، كمشتني بيبي وأركان أخذ الفون قال: لا حول ولا قوة إلا بالله.

لا لا أختي ما تموت، لا لا أركان سوي شي. غيث. وينها؟ ما أعرف والله ما أعرف، بإسطنبول بس ما أدري وينها. غيث ماتت ناي. منهو يندلها؟ أحكي خل أخبّر يلحقوها. وحدة ما أعرفها، صديقتها. لج أحكيييييييي راح تمووووت! اسمها غسق، إلحقها بلكي بعدها عايشه. طلع فونه وطلع برا يخابر. سمعه يقول: كرم، اطلع وأفهمك بالطريق بسررررعة يا خوي. كمشت الفون وكعدت. لميت روحي مقابلة الشاشة، عيني بناي أتمنى تتحرك. حتى دموعي نشفت بس جسمي يرجف.

ماكو بحلقي غير: ناي قومي لا تتركيني. أكثر من نص ساعة، حتى عيوني بعد ما أشوف بهن وهي ماكو فاقدة. لما سمعت بابها انفتح، وانشال الفون. بنية صغيرة وياها كرم شافتني سدت الفون. قمت ردت أطلع ورا غيث، كمشتني بيبي. ما تموت لا تخافين. ماكو بيبي، منتهية. قوية ترد، ما تخليج بروحج أعرفها. اقعدي ادعي ربي يردلها أرويحتها. كعدت لميت رجلي لحضني شبه فاقدة، عيني بالباب. أش وقت يرد أركان ويقول عايشة؟

لنص الليل وماكو خبر. حتى أريد أقوم وأسأل ما أقدر، أخاف أسمع شيء مو زين. دخل أركان، قمت أشرتله: شنو؟ مثل هاي ما تموت لا تخافين. عايشة يعني؟ بس جاهلها راح، هي بخير. أحس الروح ردت إلي، مو الها. بسرعة صليت صلاة بابا جان يصليها من يسمع خبر يفرحه. لقيتهم يباوعولي صافنين. تركتهم وطلعت، كمشتني قال: وين يا وِلي؟ أتوضى أصلي صلاة الشكر. عجل هاي شنهو العملتي؟ بغير دين هذا، دا أصلي صلاتي، وخّر. يا وِلي ويين؟

لا تسوديني. لحّن خلي شيء على صخامج وطلعي. رجعت أخذت شيلة بيبي خليتها على جسمي، وطلعت اتوضيت. رحت لغرفة ريحانة، هناك السجادة. دخلت لقيتهم نايمات. طلعت السجادة وقفت أصلي وأبكي، ما مصدقة. خلصت دا أسلم، كعدت ريحانة. باوعتلي ابتسمت: طرّ الفجر. لا بس دا أصلي صلاة الشكر، رجعت ناي للحياة. عجل أني عش ما انطاني ربي وأصلي؟ بالجنة هو وانطاج ابنك عوض عنه، راح تشتمين ريحته بي.

وأني ما رايدة غيره. كل ليلة أنام بس حتى أدحگ شكله ما يجيني. ما يريد يقهرج لأن يحبج. اشتاقيتله كثير، حتى ريحته خلصت من الغترة بعد ما اشتمها بي وروحي لهفانة إله. راح يجي ابنك وينسيج كل شيء ويرد ضحكتج. ما ترد غير وأني بحضنه. قالتها وباوعتلي مبتسمة بكسرة. حضنت الغترة وردت غمضت. حسيتها عاقلة ما بيها شيء. حمدت ربي وسجدت، بلكي ردت لعقلها خطية لخاطر ابنها.

كملت قمت ردت أطلع بس شيء سحبني الها. رحت اتمددت يمها، بطنها كبرانة. خليت ايدي عليها، رفس الطفل. ضحكت كعدت. رفسني ابنك. أبو دق بقلبي. الله يعوضج ويصبرج. ما ردت. غمضت، كمشت الغترة حيل. خليت ايدي ببطنها منتظرة بلكي الطفل يرد يرفسني. إحساس حلو من تحس كائن صغير جوه ايدك يتحرك بعد ما شايف الضو، تحسه ملاك. نمت وأني أضحك على حركته. كعدنا على صوت سهيلة وهي تقول: قومي يلا عمي ينشد عنج حتى يوديج لهلج. هسه جاية، روحي.

أي ريحانة، أش وقت تجيبين النغل اللي ببطنج؟ أم حمزة: اكتِمي لا أقوم أدوس حلقج. ابن ابني نغل؟ أنعل تربيتج. وش عرفج ولد؟ بطنها مدورة كشفت عليها وعرفته جاي ياخذ التعب وحق أبوه. اممم يجي بالسلامة، أخاف هم مثل ابن غيث. ينجعلج مكانهم، قولي آمين. راحت. قمت لقيت ريحانة كاعدة تمسح بالغترة، مطبقتها عدل وصافنة. قمت حضنتها وبستها. باوعتلي عيونها مليانة دموع. لا تهتمين للحجي، راح يجي ويكون لج سند ويكص لسانهم.

أم حمزة: إن شاء الله من حلقج لباب السما. رايحة بخاله؟ أي خاله، لهلي. أحسن لج روحي يا خاله، بعدج صغيرة وحلوة، حرامات تضيعين شبابج ويا هيج عالم ما وراهم بس الموت والثارات. ديري بالج على ريحانة. بعيوني، هاي حرمة العزيز ما توصيني. رجعت بستها وقمت طلعت غسلت وجهي. صعدت غيرت ملابسي، شلت شعري، لبست الشال عدل. نزلت. لقيت عمي يبلس قال: استكان جاي يبوي. تأمر عمي. غيث سافر؟ أي من الفجر راح يجيب حرمته. يلا تهيّري. أي خلصت.

عجل جيبيلي استكان جاي تانطلع. رحت للمطبخ دخلت لقيت سهيلة اتخابر. شافتني نصت صوتها. ما اهتميت. صبيت جاي شلته وديته لعمي، لقيته كاعد يسولف. انطيته وطلعت بين ما يشرب أروح أخبر ناي أمن عليها. دخلت لغرفة أم حمزة لقيتها ماكو. ريحانة وين خاله أم حمزة؟ دخلت سهيلة قالت: راحت لبيت أهلي تشوف بنتها. شوي وجاية. رايدة منها شيء؟ لا بس ردت الفون دا أخبر أختي.

ههههههه أختج راحوا يجيبوها من قشتها حتى يذبحوها قدام السلف. أوف ربي عدالتك. وأنتي ريحانة ما تقومين، أربعة وعشرين ساعة كاعدة. تركيها خطية مريضة. منهو هاي مريضة؟ تضحك عليكن، علي ما تضحك. ناطري ودحقي عدل عقل منهو الشاطح. راحت جرت الغترة منها، أخذتها. قامت ريحانة صاحت: جيبيهااااا. رايدتها؟ انزلي هينا. راحت لها ريحانة، دفعتها وطلعت تضحك. راحت وراها تركض، دخلت للمطبخ. أكو جلكان نفط، ركضت عليه، غطت نهايتها وشالت الجداحة،

قالت: بس تتقربين أحركها. ريحانة: لا بس هاي بقت من شاهين. وحنا ما رايدين منه ذكرى. أباوع لها واقفة بس دموعها تنزل، تباوع لها بترجي. سهيلة: عش تبكين على الغترة ههههههههه؟ عجل دحقي شراح أعمل. قتلتها وجدحت الجداحة ونهاية الغترة لقطت النار. ما أشوف غير ريحانة ركضت جرتها من ايدها وحضنتها حيل. طلعت أصرخ: لحكونااااا عميييييي الحكنييييي. أجوا يركضون من الغرفة وأركان دخل من برا صاح: شكووو؟ ريحانة بيدها نار بالمطبخ راح تحترك.

كلها اجت للمطبخ. دخلت وراهم وأشوفها دايرة الجلكان النفط على روحها وبيدها الجداحة. عمي: يبه ريحانة، جيبي الجداحة يبعد أبوج. راحت ريحته يبه، احترقت غترته. ما يخالف، عنده غيرها أجيبها لج. ما رايدة، رايدته إله. اشتاقيت له كثير. ابنك يبوي، ابنه ببطنج. خطية جاهل يموت. عجل ما خفت عليه من كسرت قلب أبوه عش عملت بينا هيج؟ ريحانة أبوج، جيبي الجداحة يبعد روحي. أني مو ريحانتك، أني ريحانة شاهين.

سهيلة: أركااان. اندار لها من الباب الثانية. اتقدم أركان قال لها: يا خوي انطينيها. شاهين جان رفيقك ويحبك ما غدرك. أعرف وحق كلام الله. بالحلال يا خوي ما وطينا روسكم. جيبي الجداحة يا خوي. ما أريد أعيش بمكان ما هو بي، رايحة له أكمل ويا غادِ. كلها بثواني اللي يريد يكمشها واللي يتوسل. بلمح البصر جدحت الجداحة وثقبت النار بيها.