رواية لقاء مستحيل ليآرا سمير الفصل الخامس 5 - بقلم ملك صلاح

وصلوا البيت وكان عباره عن فيلا من دورين رنت رنا الجرس ..
فتحت الباب ست قد مامتهم اول مره تشوفها ريم

عواطف: حمد الله ع السلامه نورتى البيت

ريم بتبصلها بأستغراب ..
رنا : دى داده عواطف يا ريم انتى ممكن متعرفهاش علشان مشفتهاش دى ال ربت فريد وامير وقاعده معانا هنا يعنى ممكن تقولى من العيله مش غريبه

ريم هزت راسها ل عواطف وبتبصوبتبص بترقب شافت مامتها واقفه مستنيها وشايله بيبى جميل ع ايديها وهى واقفه سمعت صوت حاجات بتفرقع وحد خارج من اوضه المكتب معاه بانر كبير مكتوب فيه
Welcome back our moon

وكان امير لكن امير قال غير ال مكتوب والكل سمع ...
Welcome back my moon

ريم متفاجئه قرب منها امير وبيديها بوكيه ورد : وحشتينى ‏‎heart‎‏ رمز تعبيري

رنا بتضحك: ايه الحاجات الحلوه دى

أمير باصص ع ريم : الحاجات الحلوه لناس الحلوه ومفيش احلى من ريم طبعا

ريم مخضوضه من الموقف والجو ..: عاوزه اطلع أوضتى فين أوضتى

رنا : اه طبعا تعالى هطلعك أوضتك بس مش تشوفى رامى وتسلمى عليه

مامتها قربت منها : حمد الله ع سلامتك يا ريم نورتى الدنيا يا حبيببتى

ريم لفت نظرها البيبى لمسته بايدها خده وابتسمت ليه وهو ابتسم ليها

عاصم: يلا بينا نتعشى

ريم : انا مصدعه اوى عاوزه ارتاح ممكن

مامتها: طبعا يا حبيببتى اطلعى ارتاحى

طلعت رنا مع ريم وحنان واقفه معاها عاصم وأمير وفريد ..

حنان: اخيرا قلبى ارتاح واطمن انى شايفاها قدامى وبخير

عاصم : هى الحمد الله احسن بكتير بس لسه علاجها مخلصش فالدكتوره غاده نبههتنى ع كام حاجه نخلى بالنا منها وهى هتكملها العلاج بره المستشفى علشان يبقى افضل يعنى

حنان: ال ف مصلحت ريم احنا هنعمله

مشيت حنان وعاصم يقعدوا
وأمير واقف باصص ع ريم وهى طالعه فريد وقف جنبه ..
فريد: مش كده اوفر ولا انا متهيالى

امير: لازم تضرب ع الحديد وهو سخن قبل ما يبرد ومش هيأثر فيه اى حاجه ..وبعدين فين ال اوفر ..

فريد : بوكيه ورد ووحشتينى والحلو لحلو ايه حلوانى وانا معرفش

امير بيضحك: ممكن تخليك فى حالك ومع رنا وملكش دعوه بريم

فريد: ع اساس ان ريم بنت الجيران ها

امير حط ايده ع كتف امير: اكتر من بنت الجيران دى مستقبلى ال جى كله ومش هسيبه يضيع ....

فريد باصص ل امير : امير خلى بالك

عاصم: واقفين عندكم بتعملوا ايه

امير : ها .. جايين اهو .. يلا يا فريدو

طلعت ريم أوضتها ..
رنا : ها ايه رائيك كل حاجه هنا جديد فى جديد
الاوضه هديه من اونكل عاصم والللاب و MP3 ال ع المكتب هديه من فريد

راحت ناحيه الدولاب وفتحته

رنا : وانا نزلت عملت شوبنج ودول هديتى ايه رائيك

ريم بتبص حواليها : رنا انا عاوزه ارتاح شويا

رنا : طبعا يا حبيببتى ارتاحى ولما العشا يجهز هطلعك تمام

باست رنا خد ريم : نورتى يا حبى

خرجت رنا من الاوضه وريم قعدت ع السرير وقعدت تبص حواليها وع وشها علامات أستغراب وضمت نفسها زى البردانه برغم انه مش وقت شتا ....!!

شويا وجهزوا العشا والكل مستنيها طلعت رنا تنادى ع ريم خبطت ع الباب ملقتش رد فتحت لاقت ريم نايمه ع السرير وفى ودنها السماعات MP3 قربت منها لاقتها نايمه
خبطت على كتفها تصحيها : ريم ..ريم

اتفزعت ريم من نومها واتخضت ..

رنا اتخضت: سورى بجد مش قصدى اصل العشا جاهز وقالولى اندهلك و..

ريم بملامح توتر: مش جعانه ..مش جعانه انا عاوزه انام

رجعت ريم تنام تانى
ورنا محبتش تزعجها تانى سحبت نفسها بهدوء وخرجت وقفلت الباب وراها ..
وريم نامت ع السرير لكن معرفتش ترجع تنام بسرعه وفضلت نايمه رغم انها صاحيه
نزلت رنا ...

حنان: فين ريم

رنا : نايمه سيبها نايمه يا مامى خليها ترتاح

حنان: يعنى كل دا متجهزلها علشانها ونتجمع كلنا يحصل كده

عاصم: خلاص يا حنان سبيها براحتها قلنا ولا ايه

حنان: ماشى

فريد لاحظ وش رنا متغير : فى حاجه ولا ايه

رنا : ها .. لا مفيش مفيش

أمير: يعنى مش هينفع اسلم عليها قبل ما اسافر

رنا: هسلملك عليها انا

حنان: انت هتغيب كتير يا امير

امير: مش عارف اقصى مده 5 شهور اشوف اكون حليت المشاكل ال فى مصنع هناك

عاصم: ما قلنا نبيعه ونخلص

امير: لو هبيع مش هبيع برخص كده وهشوف
العقود والارتباطات علشان هيكون التركيز هنا وراجعلكم
ماهو السيد الوالد سايب كل حاجه عليا وبيشحططنى

فريد: تعيش وتتشحط\ط مش انت عاوز كده

امير: ماشى يا دكتور عموما مسيرك اشوفك متشحططت وبقرار جمهورى يا سياده السفير

فريد بيضحك: قريب مش هتلاقينى علشان تفرح فيا هانت سنه وهناقش الدبلومه وهتعين رسمى

امير: وبقى عندنا واسطه دبلوماسيه
الكل بيضحك ..

امير: ابقوا سلمولى ع ريم وانا هجبلها هديه حلوه وانا راجع تعويض ع غيابى

فريد: ماشى ياعم الحساس دا لو حست بغيابك اصلا

امير: هتحس ....

تانى يوم الصبح دخلت حنان تشوف ريم لانها منزلتش ع الفطار لاقتها قاعده جنب الشباك وفتحاه حاطه سماعات Mp3 ومغمضه عنيها قربت منها : ريم

ريم اتخضت ..

حنان : متتخضيش انا

ريم : فى حاجه ولا ايه

حنان: منزلتيش تفطرى معانا ليه

ريم : مش جعانه

حنان: يعنى لا عشا ولا فطار لو عاوزه حاجه معينه قوليلى

ريم: لالالا انا مش جعانه

رن موبيل حنان : طيب انزلى اقعدى معانا وبلاش قعده الاوضه دى

ريم بصت لمامتها ولسه هترد كانت مامتها خرجت ضحكت ريم نص ضحكه ورجعت زى ما كانت قاعده تسمع المزيكا شويا وباب الاوضه خبط وكانت عواطف ودخلت

ريم: ايوه

عواطف كانت ماسكه صينيه فى ايديها : انا لاحظت انك مفطرتيش ولا اتعشيتى امبارح وصعب تقعدى لغايه الغدا وانتى بتاخدى علاج ..جبتلك حاجه خفيفه كده.. عصير الفراوله ال بتحبيه وتشيز كيك بفراوله ايه رائيك

ريم : شكرا بس انا مش جعانه

عواطف باابتسامه: حته صغيره مش هتفرق معاكى وكوبايه العصير اعتبريها مايه .. لازم تاخدى حاجه علشان علاجك ولا انت عاوزه تتعبى تانى ..انا مش عاوزاكى تتعبى تانى لان البيت طلعت فيه شمس مش عاوزينها تغيب تانى

كلام عواطف وابتسامتها لفت انتباه ريم برغم كل ال ف البيت عارفين ان ريم بتاخد علاج مفيش حد فكرها بيه او كلمها عليه ولا اهتم زى ما عواطف الغريبه مهتمه .. بطريقه غير اراديه عواطف ماده ايديها بقطعه من التشيز كيك ناحيه بوق ريم فتحت ريم بوقها واكلت وواحده واحده عواطف خلت ريم اكلت كل ال ع الصينيه بالعصير وادتها علاجها

عواطف باابتسامه : لو احتاجتى اى حاجه اى حاجه بلغينى تمام

ريم باابتسامه هزت راسها ..

عواطف لفت وبصت ل ريم: انهارده هعملك اكله خفيفه هتعجبك اوى وتدوقى اكل داده عواطف ال مش هتعرفى تاكلى بعده تانى وتقولى ياااه ياريتنى كنت رجعت البيت من زمان

ابتسمت ريم لعواطف وخرجت عواطف

وريم حست براحه اتجاه عواطف واستغربت ازاى هاودتها وارتاحت ليها كده

قابلت عواطف حنان وهى خارجه : كان فين الصينيه دى

عواطف: عند ريم اخدت ليها فطار علشان علاجها مينفعش تهمله

حنان : اه صح بس اعتقد ان ريم عارفه علاجها مش محتاجه تنبيه

عواطف : ولو ..هى ف راعيتنا ولو هى فاكره نفكرها كمان حضرتك عاوزه حاجه منى

حنان اتحرجت: لا مفيش وشكرا يا عواطف

عواطف : مفيش شكر ريم زى فريد وامير ورنا كلهم معزه واحده

جه ميعاد الغدا ومردتش ريم تنزل برضه تتغدى معاهم وطلعتلها عواطف الغدا واكلته ف أوضتها وميعاد العشا ونفس الكلام ..

أستمر الوضع كده لغايه يوم ما جت غاده ميعاد الجلسه لريم وطلعتلها اوضتها وقعدوا يتكلموا

غاده: ايه الاخبار

ريم: مش عارفه

غاده: ازاى

ريم: حاسه انى غريبه هنا وسطهم مش حاسه بوجودى معاهم غايبه عنهم 3 سنين شبه مشفتهمش حساهم غرب عنى وهما بيعاملونى زى ما اكون كنت عايشه معاهم من زمان فمش قادره استوعب

غاده: اممم دا شئ طبيعى فى الاول وبعدين علشان عازله نفسك ياريم احنا اتفقنا نختلط بالناس ولا ايه

ريم: بحاول

غاده: حاولى اكتر ..
وع فكره انا اتكلمت مع مامتك واستاذ عاصم انك مهم ترجعى لدراستك
وهما بيجهزولك الموضوع دا وبيدوروا ع مدرسه كويسه تدخليها فى سنتين هتاخدى حاجه ما يعادل ثانويه العامه كورس يعنى وتدخلى الجامعه والجامعه يعنى اصحاب وعالم تانى وهتقابلى ناس مختلفين ..

ريم : ها

غاده: احنا قلنا ايه نكمل حياتنا ونمشى المشوار ل اخره

ريم: ان شاء الله

خلصت غاده الجلسه ونزلت مشيت شويا باب الاوضه خبط دخلت عواطف ومعاها رامى اخو ريم الصغير

عواطف باابتسامه: الاستاذ رامى عاوز يسلم ع اخته الاموره ممكن

ريم باابتسامه: ممكن

دخلت عواطف وادت رامى ل ريم : شبهك ع فكره

ريم: انا حلوه كده لا طبعا

عواطف: انتى زى القمر بس تقيل علينا

ريم: القمر ف السما يا داده

عواطف: انا واثقه ان ال هيشوفك هيدوب فيكى زى ما رامى شافك وحبك بسرعه كده

ريم: وانا كمان حبيته اوووى

فضلت ريم تلعب مع رامى وكانت موجوده عواطف معاهم وريم كانت فرحانه بوجود رامى معاها ...

ابتدت جلسات ريم ف البيت مع غاده وعاصم قدم ف مدرسه لريم واول يوم راح معاها هو و رنا ودخلت ريم الفصل وسط توترها وخوفها من ال حواليها لدرجه ان الطلاب استغربوها وحسوها مش طبيعيه

اتصلت ع رنا ف نص اليوم وراحت تاخدها من المدرسه وراحت ع البيت وراحت غاده تشوف مالها لاقتها مش مهيئه لاختلاط مع الناس مباشر كده ومحتاجه وقت .. فااقترحت انها تدرس ف البيت وتروح ع الامتحانات
وقدموا طلب ف المدرسه كده وفعلا وافقوا

وابتدت ريم الدروس ف البيت بمساعده مدرسين ومدرسات وحاولت ريم تركز زى زمان ف مذاكرتها وفعلا كانت مجتهده وشاطره ولاحظ كده المدرسين ال بيجولها استيعابها الملحوظ ...

وكانت ريم علاقتها بتطور ناحيه اخوها رامى وداده عواطف اكتر من اى حد تانى ف البيت

>> ففى يوم حنان كانت سايبه رامى نايم ف اوضته ورجعت تبص عليه مش لاقته دوروا عليه ف البيت كله مش لاقوه قلقوا راحت عواطف دخلت اوضه ريم ..لاقت ريم نايمه وحاضنه رامى وهو نايم والاتنين نايمين مع بعض فى منظر جميل فرجعت وطمنت الجميع ونام رامى فى حضن ريم اخته ..

واغلب الاوقات رامى كان بينام مع ريم ..فاابتدت حياه ريم تنشغل ب رامى اخوها وبدراستها وبمساعده غاده وحنيه واهتمام داده عواطف ريم ابتدت تتأقلم ع الجو البيت وشويا شويا ابتدت تتعامل مع اهل البيت وتاكل معاهم ع فترات متقطعه لانها دايما بتبقى مشغوله بتذاكر ..!!

مرت سنه وريم شبه اتأقلمت مع البيت لكن مش بتخرج من البيت

اغلب وقتها الفاضى يا قدام الللاب توب بتذاكر لغات يا بتسمع ميوزك mp3 يا بتلعب مع رامى وهى قاعده فى الاوضه بتذاكر باب الاوضه خبط

ريم: اتفضلى يا داده

أمير: مينفعش اتفضل يا امير

اتخضت ريم من المفاجاءه: امير .. حمد الله ع السلامه

امير: الله يسلمك .. عامله ايه

ريم : الحمد الله

امير: وحشتينى

ريم: ها

امير: اقصد البيت كله وحشنى .. سفرى الكتير مخلينى مقعدش معاكى كتير انا عارف ..شوفى جبلتك معايا هديه ايه

ريم شافت امير ماسك شنط فى ايده: ميرسى

امير: دى هديتى من السفر لكن فى هديه تانيه مستنياكى تحت يلا تعالى

ريم: اجى فين

راح ناحيه باب الاوضه: يلا بينا تحت الكل مستنيكى

ريم مش فاهمه قامت نزلت لاقت عاملين ليها عيد ميلاد ومسك امير التورته : happy birth day to u happy birthday to y roma happy birth day to u يلا طفى الشمع

رنا: لا اتمنى امنيه الاول يلا

ريم واقفه مذبهله مبتتحركش وطفت الشمعه ..وفريد طير حاجات ف الهوا

عاصم: كل سنه وانتى طيبه يا روما

حنان: سنه سعيده عليكى يا قلب مامى

رنا: ايه رائيك ف الاحتفال المفاجى دا

ريم بتجمع نفسها من المفاجئه: اولا بشكركم ع كل دا لكن بليز متكرروهاش تانى ..انا مبحبش احتفل بعيد ميلادى من زمان وانا اتعودت ع كده اوكيه ..انا طالعه اوضتى بعد اذنكم

حنان: هى لسه فاكره منسيتش

عاصم: ياريتنا كنا سألناها قبل مانعمل حاجه علشان متزعلش

طلعت ريم ع اوضتها حطت السماعات mp3ف ودانها وفتحت كتاب بتذاكر ودموع نزلت من عنيها حست انها وقت ما كانت زمان محتاجه حد يفرحها باحتفال بسيط مكنش بيحصل ولما حصل فكرها بزمان ...!!!

مرت سنه .. اخر سنه ف كورس المؤهل لدخول الجامعه ونجحت بتفوق وجه الوقت ال هتدخل فيه ف الجامعه ودا اول مره هتتعامل مع الناس لانها كانت بتروح ع الامتحانات بس وكانت ابتدت انها بتروح لغاده المستشفى لجلسات العلاج...

ففى يوم ريم كانت قاعده فى أوضتها باب الاوضه خبط ودخل امير :
امير: هعطلك

ريم كانت قاعده ع المكتب بتسمع ميوزك: لا ابدا اتفضل

امير : انا جيت اعرفك شخصيا انكم كلكم معزومين ع العشا بره انهارده

ريم اتفاجئت: ها .. لا ميرسى انا بنام بدرى ومش بسهر وعندى ....

امير قاطعها : بس بس ايه كل دا انهارده بريك اجازه ومفيش اعذار تمام يلا جهزى نفسك

خرج امير وريم متوتره مش عارفه تعمل ايه حاولت تخلع من العزومه معرفتش كان امير حاجز فى مطعم شيك جدااا وابتدا العشا وريم كانت ساكته

رنا: ايه البذخ دا يا امير

امير: يا جماعه دا اقل حاجه عندى

فريد: يا راجل بلاش التناكه دى .. يعنى مكنش مصنع بعته يعنى

امير: انتم يا جماعه مش عارفين قيمته وبعته بكام وسط المشاكل بتاعته والاشاعات ال طلعت بعته بمبلغ عاصم بيه لو بنفسه كان باعه مكنش هيعرف يجيب السعر دا وبعدين اهو كله راجعلنا كلنا ولا ايه يا ريم

ريم : اه اه

عاصم بيضحك: علمناهم الشحاته

حنان: لا ياعاصم ..امير شاطر فى شغله برغم انه صغير وبقاله كام سنه بس سمعته واصله دا انا فى ناس طلبوا ايده منى لبناتهم

عاصم بيضحك: لا بجد

امير: بلاش يا حنون انا خلاص محججوز
وبص امير ع ريم وهى باصه ع الطبق ومش مركزه معاهم وعماله تلعب بالشوكه ..: ولا ايه يا ريم

ريم مش اخدت بالها ..

رنا كلمتها : ريم ..امير بيكلمك

ريم: نعم

امير: نعم الله عليكى يارب يكون عجبتك الهدايا ..عموما هتعجبك دا اشتريتهم من اغلى المحلات

ريم باصه ل امير: ميرسى

ريم مالت ع رنا: رنا انا مصدعه اوى عاوزه اروح

رنا: استنى دا فى بروجرم هيتعمل هنا هيعجبك اوى دا السهره لسه ف اولها

امير بيوجه كلام ل ريم : العزومه دى ع شرف البرنسس ريم

الكل : يااااااااه

وبدت فقره من البروجرم الاضاءه خفت شويا الا ناحيه المسرح
وبدء عرض السحر وكان عباره عن بنوته بيدخلوها صندوق وهى تصرخ وكفقره شويا وتخرج لكن ف الوقت ال قبل ما تخرج فيه اول ما ابتدت الضلمه ريم ابتدت ملامح وشها تتغير ويحصلها صعوبه ف التنفس ومنظر البنت الصغير وهى بتتجر ع الصندوق فكرها بنفسها وهى صغيره

وصريخ البنت سمع فى ودنها مقدرتش تستحمل راحت ريم حطت ايديها ع ودانها وتتحمل مقدرتش صرخت وانهارت ووقعت ع الكرسى وضمت نفسها وعماله تمتم بالكلام ومره واحده اغمى عليها .. اخدوها بسرعه ع المستشفى وبعدها اخدوها ع البيت وكلموا غاده راحتلها ...

حنان: فى ايه يا دكتور ايه حصلها مش كانت خلاص بقت كويسه سنتين محصلهاش حاجه زى كده فقلنا انها خفت

غاده بملامح غير مريحه: ريم كويسه فى طريقها لعلاج انما شفاء كامل محصلش ريم عندها فوبيه من الضلمه ذاكرتها بطفولتها وال حصلها متمسحتش وااقل حاجه ليها صله بال فات بيرجعها لوقتها

عاصم: احنا افتكرنا انها بقت كويسه بقت تتعامل عادى وبتتكلم معانا وحتى المدرسين خوفها قل منهم شويا

غاده: هى بتتعامل عادى لكن مبتعرفش تتعامل مع الضلمه ودا سبب كوابيسها ..العلاج ع مراحل وهى لسه ف اخر المرحله التانيه عموما هى نايمه دلواقتى ياريت نتجنب اى حاجه بتفكرها بزمان والاماكن الضلمه ...!!

مشيت غاده والكل بعد ما كان مبسوط وفرحانين اتكدروا بسبب ريم

سمعت وزعلت عواطف فقررت تبات مع ريم ف اوضتها ولاحظت عواطف ان ريم بتعانى وهى نايمه ف احلامها ففضلت تقرا القران عليها وتهديها ...!!

قعد امير فى اوضته سهران بيفكر فى وضع ريم وازاى يتعامل معاها ويقربلها ويخليها تتقربله تعبه التفكير لانها تختلف عن اى واحده لانها ف ظروف غير طبيعيه ... وفى نفس الوقت مينفعش يسيبها لحد تانى
وفرصته انه يسيطر عليها وع تفكيرها وافضل وقت هو دا لكن مش عارف ازاى ..

نزل امير ودخل المكتب وفتح ازازه ويسكى يشرب شافه فريد ودخل ...

فريد: انت ليه سهران لدلواقتى كده معندكش شغل الصبح

امير بيبص ل فريد وشبه سكران : شغل اه فى
فريد بص ع الازازه لاقاها خلصانه وفاتح ازازه تانيه: ايه دا ياابنى مش كنت خففت من الشرب دا

امير: مش قادر افكر واوصل لحل

فريد: عندك مشكله ف شغلك

امير سكران: لا المشكله هنا فى البيت ولو محلتهاش كل تعبى هيروح بخ ف الهوا

فريد مستغرب من كلام امير: مالك فى ايه

امير حاول يقوم ومسك فى فريد: انت يافريد من زمان واحنا صغيرين ايقونه الحظ معاك ومبتتعبش ولا بتحارب كل حاجه سالكه معاك
فريد: رجعت تانى تتكلم ع الحظ ..وياترى فين الحظ ال شايفه معايا

امير سكران : اقولك انا ... تعليم كنت مجتهد ودرجات عاليه وكليه قمه وومكانه سياسيه مستنياك فى السلك الدبلوماسى ولما قررت ترتبط ارتبطت برنا بنت محمد توفيق ال لما مات كتب وصيه باملاكه كلها ل بناته وجزء صغير لطليقته بس بناته اخدوا النصيب الاكبر ..رنا ورثت منه ملايين وانت ضامنهم
فريد: ما قلنا موضوع رنا مش مادى زى ما انت بتفكر ..وبعدين ايه المختلف يعنى انت مجتهد ف شغلك ومستواك التعليمى والاجتماعى الكل بيحسدك عليه

امير : الا حاجه واحده انا بحسدك عليها

فريد: ايه هى بقى يا عم الناصح

امير : رنا ... انت محظوظ يا فريدو بارتباطك برنا جمال ومستوى تعليمى واجتماعى وفلوس وعقل انسانه طبيعيه وانت مسيطر كويس ..انما انا حظى واقع مع ريم ومعان كان قدامى لمياء لكن قلت عيله واحده ومع بعضينا وبصراحه كفه ملايين ريم طبت ولمياء اتجوزت خلاص وسافرت مع جوزها يعنى مستحيل ارجع لخطتى الاولى ومجبر اكمل فى خطتى مع واحده مبتعرفش تنام غير لما تاخد مهدى يا طول الليل صريخ من الكوابيس ومش تخرج فى اى مكان اصلها بتخاف من الضلمه ....انت انسان محظوظ فى اختيارك وانا انسان غير محظوظ فى اختيارى ... تعبى ومجهودى ف الشركه هيروح لغيرى لكن انا مش هسمح لحد يلمس قرش منى فاهم يافريد مش هسمح

فريد مستغرب من كلام امير : امير اطلع نام علشان انت خرفت بزياده اوى يلا بينا وواثق انك هتصحى تكون ناسى

امير: مش هسيبها

فى الوقت دا كانت ريم صحيت وشافت داده عواطف نايمه جنبها محبتش تقلقلها و نزلت رايحه المطبخ تجيب مايه تشرب سمعت صوت امير افتكرته تعبان قربت وسمعت كلامه مع فريد كله عليها وع نصيبها ف الشركه من ميراثها من ابوها . وفريد ساند امير وخارج شاف ريم وهى كانت قريبه من المكتب وطالعه ع السلم وشك انها سمعت .....!!!

تانى يوم الصبح فريد اتصل ب امير وعرفه ع العك ال قاله امبارح وان ريم كانت موجوده وشك انها سمعته ..

راح امير ع اوضه ريم عاوز يتاكد وقف اخد نفس شاف عواطف جايه بصينيه فطار ل ريم

امير: داده انتى جايبه دا ل ريم

عواطف: ايوه علشان تاخد علاجها

امير : هاتيه انا هدخلهولها

عواطف مستغربه: ماشى بس اتاكدت انها هتفطر

امير : اكيد

اخد نفس امير وباابتسامه خبط ودخل .. افتكر هيلاقى ريم نايمه تعبانه
لاقاها قاعده ع المكتب فاتحه اللاب ..

امير مبتسم: صباح الخير

ريم شافته واتعاملت عادى : صباح الخير

بصت ريم لاقت ف ايده الصينيه: ايه دا

امير: دا الفطار علشان علاجك علشان تعبك امبارح و ريم باصه ل امير وع اسلوبه الغريب ف الكلام وامير لاحظ بصت ريم

امير : انا كنت ناسى بصراحه انك لسه بتخافى من الضلمه قلت انك خفيتى يعنى و هنقضى يوم وتنبسطى معانا لكن بصراحه اتفاجئت بال حصل امبارح و ..

ريم باابتسامه : فى حاجه تانى يا امير

امير اتحرج : انا جيت اقولك سورى ع امبارح واى حاجه منى زعلتك او فهمتيها غلط والفطار علشان تفطرى و

قامت ريم اخدت الصينيه حطتها ع المكتب : ميرسى ياامير تعبتك فى حاجه تانى

امير : متزعليش منى يا ريم انا مش بعرف الون الكلام

ريم ابتسمت : لا عادى ال قلته دلواقتى حصل وحقيقى انا مريضه نفسيه ولسه بتعالج ومخفتش ..

امير استغرب من اسلوبها: ريم انتى كويسه انا مزعلك ف حاجه

ريم: لالا اطلاقا يا امير انت بس مضايقش نفسك ع حاجه انت معملتهاش يوم وعدى وخلاص وانا هاخد بالى

امير: يعنى مش زعلانه منى انتى غاليه عندى يا ريم

ريم: لا مش زعلانه

امير : طيب انا خارج ولو احتاجتى حاجه انا موجود

ريم: ميرسى

امير خرج واستغرب من اسلوب كلام ريم الصريح وف نفس الوقت انبسط لانه اتفتح مجال لكلام معاها وحس انها مسمعتش وشك فريد طلع هوا وحس انه كده بدء صح وكانت خطوه كويسه يتقرب ليها .. رجع جهز نفسه وراح ع الشركه وريم قعدت سرحت شويا وبعدين رجعت تبص فى الللاب ..!!

مر يومين وراحت لغاده المستشفى لجلسه العلاج :

غاده: مبرووك يا روما ع دخولك الجامعه

ريم باابتسامه: ميرسى يا دكتور كله من تشجيعك

غاده: لا يا حبيببتى كله من ارادتك وذكائك واجتهادك انتى ال نجحتى وبتفوق كمان

ريم: الحمد الله لولا المذاكره مكنش ف حاجه تانيه هتخرجنى من حالتى

غاده :كويس انك لاقيتى وسيله لهروب بحاجه مفيده وكمان ايه درجات ف كورس اللغات ممتازه بتتقدمى بسرعه

ريم مبتسمه : فضل نصايحك يا دكتور فعلا ملقتش هوايه كانت تنفع ف ظروفى قعدتى ف البيت غير كورسات الاون لاين وفادتنى جدااا

غاده: جه الوقت بقى ال تطبقى ال اتعلمتيه عملى ف مخاليق ربنا

ريم متنحه: ها

غاده : بلاش الريكشن الغريب دا لولا انى عارفاكى كنت هقول عليكى غبيه يا ريم

بتضحك ريم: لا بجد انا جيالك علشان الخطوه دى انا خايفه من الجامعه والناس ال هناك هبقى معاهم ازاى هعرف اتعامل ولا هخاف
هبقى طبيعيه ولا زى ما روحت المدرسه وافتكرونى مجنونه و..

غاده قامت من ع المكتب وقاعدت قدام ريم ومسكت ايديها : هتعرفى وهتتعاملى انتى اتحسنتى كتير عن الاول عرفتى تتغلبى ع الحاجز واتعاملتى مع اهل بيتك هتعرفى تتعاملى مع غيرهم .. اتعاملى مع الناس وحطيلهم حدود ميعدوهاش غير لو انت عاوزه غير كده متسمحيش وانتى قادره والرجاله والشباب بنادمين زينا مبيعضوش خدى الامور ببساطه وكونى صداقات وعيشى سنك وحياتك وعوضى ال فاتك استغلى كل لحظه ف سعاده اخلقيها لنفسك واقفلى ع ال فات وارمى المفتاح

ريم: تعتقدى هقدر

غاده: هتقدرى اكيد

ريم: يارب

ريم افتكرت كلام امير : دكتور هو انا طبيعيه زى اى بنت

غاده بتضحك: لا ليكى ايد زياده وودن واحده .. اه ياريم طبيعيه بنت كما قال كتاب الانوثه زى ما بيقول الشاعر .... انتى بنوته عسوله ذكيه طيبه مفيش فرق بينك وبين اى بنت غير طريقه التفكير ال موجوده بين الناس كلها

ريم: لكن مفيش بنت طبيعيه بتاخد منوم ومهدئات وبتيجى جلسات علاج نفسى ومبتخرجش علشان تخاف يحصلها حاجه بره تحرجها قدام الناس و..

غاده: ريم احنا قلنا ايه كل انسان معرض يتعب زى دور الانفلونزا طبيعى يجى لكل الناس ودا مش معناه مرض ميئوس منه لا ليه علاج وبيرجع وبناخدله علاج تانى وهكذا .. العلاج النفسى كده زى دور الانفلونزا بعلاج واجتهاد واراده بنقضى عليه ولو رجع بنتصدرله .. الوقت يا ريم انت كنتى فين ووصلتى لفين ..مع الوقت كل حاجه هتتغير

كلام غاده زى العاده زود ثقه ريم ف نفسها و ريم علشان مش بتخبى اى حاجه ع غاده راحت حكتلها ال حصل من امير وسمعته ..

غاده : انتى بتقولى كان شارب واى حد مش ف حالته الطبيعيه بيبقى مختلف فى ناس تلاقيها بتشتم وفى الطبيعى مبتشتمش وهكذا ..احكمى ع حد قالك كلام صريح وهو واعى متحمل مسئوليه كلامه وممكن تواجهييه لو عاوزه تتاكدى من نواياه ...

ريم : اوكيه

غاده غيرت الموضوع : والمجرم الصغير عامل ايه

ريم بعد ما كانت متوتره اترسمت ابتسامه كبيره : حبيبب قلبى رامى دا فرحتى ال ف البيت بجد

غاده: علاقتك كويسه مع ال ف البيت

ريم: البيت ..البيت رامى وداده عواطف

غاده: والباقى

ريم: اممم اونكل عاصم راجل طيب اووى مش بيزعلنى وبيحاول يراضينى بكل الطرق ومشغول ف شغله ويوميا لما بيرجع بيطمن عليا ...ومامى حنان هانم مشغوله ف نشاطات مع زوجات رجال الاعمال اصدقاء اونكل عاصم ورنا مشغوله ف تحضيرات الخطوبه وانا سمعت حاجه تضحك ع موضوع خطوبتها هى وفريد

غاده: ايه

ريم: واحده من صاحبات مامى قالتلها مينفعش يتجوزوا علشان رامى موجود وهو اخوهم ويعتبر اخوا ف الرضاعه .. ومامى اتخضت وكانت زعلانه ومش عاوزه تقول ل رنا ولما قالت لداده عواطف تصدقى بقى ان مامى نسيت ان رامى اصلا مرضعش منها ورضع صناعى من اول ما اتولد وافتكرت وسئلت شيخ وقالها ينفع

غاده ضحكت: وهى دى حاجه تتنسى

ريم بتضحك: عادى اذا كان كل فين بتسئل عليا اخدت علاجى ولا لا مفيش غير داده عواطف يوميا تتاكد اخدته ولا لا ..انا اتعودت المهم انهم كويسين

غاده: يمكن علشان شايفاكى كويسه فمش داعى لقلق

ريم بصت ع ساعتها: ممكن ... همشى انا بقى

غاده: اوكيه وهستناكى ف الميعاد الجى

ريم :اوكيه

خلصت ريم الجلسه وكان ف سواق مستنيها اخدها وروحت ع البيت دخلت اوضتها غيرت بتبص ع المكتب لاقت علبه راحت تفتحها لاقت موبيل وهى ماسكه العلبه الباب خبط وكان امير ودخل : ممكن ادخل

ريم باابتسامه: انت دخلت اساسا

امير بيبص ع نفسه : اه صحيح
انا جيت من شويا ليكى مش لاقيتك ..

ريم: كنت فى ميعاد مع غاده ..

امير: وانتى كويسه

ريم: الحمد الله

امير بص لاقاها ماسكه العلبه: عاجبك الموبيل

ريم : هو انت ال جبته

امير : احدث حاجه

ريم: والمناسبه ايه عيد ميلادى عدى وهديتك موجوده

امير: دخولك الجامعه علشان ابقى اطمن عليكى

ريم : ها

امير: انتى من وقت ما جيتى البيت ومش معاكى موبيل فقلت ابقى اول واحد يجبهولك حافظى عليه

ريم: ميرسى واكيد هحافظ عليه دا تمنه غالى باين

امير : زى ما انا محافظ عليكى

ريم: بتقول ايه

امير : بقول بالتوفيق ومستنيكى تخلصى ومكانك موجود معايا ف الشركه

ريم: ياااه لسه بدرى وغير كده مش ف دماغى متقلقش

امير: لا ازاى فلوسك ولازم تعرفى رايحه فين وجايه منين

ريم: فى امان متقلقش عارفاك ال معاك بيزيد وانا مبفكرش ف فلوس

امير: اها قصدك ع صفقه امبارح دانا تعبت من كتر المحاولات وكان فى ناس هتاخدها منى بس ع مين دا مكسبها اضعاف ما كنت متخيله ويعتبر حوت مش سمكه ولسه ف صفقه الشهر الجى و ..
ريم باصه ل امير وامير لاحظ انه بيتكلم عن الشغل بحماس : سورى انتى حمستينى تكلم فى البيزنس

ريم: لا خليك ع طبيعتك انت بتحب شغلك وبتحب تكسب دا طبيعى
ربنا يوفقك

امير: طيب يلا علشان نتعشا

ريم: لا انا اكلت حاجه خفيفه من بره هاخد علاجى وانام

امير: اوك واعملى حسابك انا اول يوم هوديكى الجامعه

ريم: ان شاء الله

خرج امير وع وشه ابتسامه وريم بصت ع العلبه وحطتها ع المكتب وقعدت فتحت الللاب وشويا الباب خبطت ودخل رامى وقامت ريم وقعدت تلعب معاه ويهزروا ويضحكوا وناموا ف حضن بعض كالعاده ...!!

فى يوم رنا دخلت ع ريم الاوضه مش لاقتها نزلت تسئل مامتها عليها

رنا: ريم فين يا مامى تعرفى

حنان: فى اوضتها هتلاقيها فين هى بتنزل منها

رنا: لا هى مش ف اوضتها

حنان: تلاقيها ف اوضه رامى بيلعبوا هناك

رنا: ولا هناك رامى نايم انا شفته

حنان : غريبه هتكون فين

رنا بملامح استغراب : افتكرت مدام مش ف اوضتها ولا مع رامى عرفت هتكون فين

حنان: فين

شاورت رنا ع المطبخ: عند داده

حنان علامات ضيقه ع وشها: ف المطبخ تانى دى بتقعد مع عواطف والخدامين اكتر منى
رنا راحت ع المطبخ لاقت ريم عماله تضحك وماسكه كوبايه عصير وبتتكلم مع عواطف والطباخ والشغاله

رنا بتريقه: كوبايه مايه ياريم

ريم بتبص: ايدى مش فاضيه تعالى خديها

رنا: انتى بقيتى مستقره هنا هو الفيلا كلها بقت يا اوضتك يا اوضه رامى يا المطبخ يا السطوح بس

ريم: هنفتح الحوار دا تانى خير يا انسه رنا طلباتك

رنا : عاوزاكى يا انسه ريم ممكن

عواطف: انا قلتلك بلاش تفضلى قاعده هنا

ريم: ليه مش المطبخ دا تبع البيت ولا انا روحت عند الجيران وبعدين الواحد بيقعد ف المكان ال يريحه يا داده

رنا: ريم بجد عاوزاكى

ريم: اوك اوك جايه

ريم بصت لعواطف: اياكى تكملى انا جايه وانتى يا سوسن متكمليش الحكايه الا لما اجى ها

قامت ريم وراحت ناحيه رنا : ها ايوه

رنا: تعالى معايا اوضتى عاوزاكى

راحت معاها اوضتها وفتحت رنا الللاب : ع فكره قعدت ف المطبخ مش لذيذه

ريم: ليه

رنا: ريم مش ملاحظه ردودك جامده شويا

ريم: اووه سورى مقصدش بجد بس انتى
ومامى دايما بتحرجوا داده عواطف وسوسن لما بكون معاهم دول بنادمين ومش بحس بنفسى سوررى

رنا :انتى بتقعدى مع داده عواطف اكتر من مامى ودا بيضايق مامى

ريم: هى مامى بتقعد ف البيت اامتى صحيح علشان اعرف اقعد معاها

رنا بصت لريم: ريم

ريم : .. عاوزه حاجه علشان مش فاضيه ورايا حكايات تحت

رنا : بصى اختارى معايا موديل فستان انتى عارفه ان هنعلن خطوبتنا رسمى خلاص كمان شهر قبل سفر فريد وانتى ولا اى اهتمام ..

ريم: رنا انتى طلبتنى منى حاجه وانا معملتهاش

رنا: كذا مره اطلب منك نخرج وانتى بترفضى وكل شويا بتقولى بذاكر

ريم: رنا انتى عارفه ان عندى مشكله بحاول فيها

رنا: يا حبيببتى لازم تختلطى بالناس اومال هتدخلى الجامعه ازاى وهتعملى ايه
ريم واقفه ساكته ..

رنا غيرت الكلام : المهم اختارى واعرفى انك هتيجى معايا بكره مشوار هنلف ع حاجات وانتى كمان اختارى ليكى

ريم شاورت ع فستان اسود: دا حلو

رنا: عروسه تلبس اسود

ريم: لا طبعا دا ليا انا ايه رائيك

رنا: يا كئبتك يا شيخه اختارى لون دهبى او دخانى الالوان المفرحه دى

ريم: انا من يومين الورقه طلعتلى اسود فااختارت الاسود

رنا: انتى هتفضلى تعملى حركه الورقه الحظ دى

ريم اتجاهلتها : بصى ليكى دا حلو ها و ركزى ف نفسك يلا نختار

قعدت ريم مع رنا ورنا مستفتدش اوى من ريم لان كل الاختيار رمته ع نفسها كل ما تسئلها تقولها لو عاجبك احجزيه ...

تانى يوم نزلوا واخدتها رنا لمكان مليان بناس اعتبرته ريم تجربه لمواجهه تواجدها وسط الناس علشان الجامعه وفعلا اتشجعت واتغلبت ع خوفها وال ساعدها انها طول الوقت سماعات mp3 ف ودنها ومشغله الميوزك ومامتها ورنا بيختاروا ف الحاجات وهى بتحاول تجمع نفسها وقدرت برغم انها رجعت وعلامات الاجهاد ع وشها لكن هى كانت مبسوطه ان اليوم عدى وهى قدرت تتغلب ع خوفها والرهبه نوعا ما ....!!!!

جه يوم حفله خطوبه رنا وكل فرحان وكانت ف حديقه الفيلا واتعزم فيها ناس المقربين وبعض رجال الاعمال والبيزنس وزوجاتهم .. ام ريم كانت مشغوله بالمعازيم وريم كنت قاعده ف المطبخ مع عواطف : مش ناويه تخرجى

ريم: حاسه بخنقه بره شويا كده

عواطف مسكت ايد ريم : روما الناس جزء من حياتنا مينفعش تهربى منهم

ريم: عارفه ياداده عارفه بس انا ..

عواطف: يلا يا حبيببتى دى خطوبه اختك واقفى معاها

سمعت ريم كلام عواطف وخرجت ووقفت تبص ع الناس لاحظت انهم بيتعاملوا عادى وبيضحكوا

جه امير وقف جنبها : اخيرا القمر ظهر

ريم اتخضت : خضتنى

امير:كنتى فين دورت عليكى عرفت انك مع داده

ريم: كنت بشرب ..

امير لاحظ بص ريم ع الناس: عارفه يا روما كل الناس دى اغلبهم هيخرجوا من هنا بمصالح وبصقفقات واتفاقيات علشان كده مفيش حد مش جيه من ال اتعزموا

ريم: علشان كده انت على طول ف حفلات

امير بيضحك : البيزنس ولازم اثبات الوجود لو لوحدى مش هعرف اعمل حاجه

ريم: ربنا يوفقك

امير : الدراسه قربت جاهزه لجامعه

ريم: بحاول

امير: يلا مستنيكى معايا

ريم بتبتسم : ان شاء الله

امير باصص ع رنا وفريد: قوليلى يا ريم انتى مش غيرانه

ريم: هغير ليه

امير: انك تكونى مكان رنا وتعملك حفله كبيره و..

ريم قاطعته: لا لان مفيش سبب اغير

امير: بس يعنى هيجى يوم وهتكونى عروسه احلى عروسه دا حلم كل البنات انهم بيحلموا باليوم دا

ريم بصت ل امير: اه حلم كل بنت اليوم دا ..بس مش البنات ال لو ماخدتش المهدى قبل ما تنام بتحلم بكوابيس وبتصرخ دول حلمهم ابسط انهم يناموا طبيعى من غير منوم ولا مهدئات ...

امير سكت معرفش يرد ..

ريم: انا رايحه اشوف رامى ف اوضته لانى صدعت

دخلت ريم الفيلا وامير باصص عليها وفى نظرته ليها حيره:
امير: ريم انا .....