رواية لم اخلق لرجل سواك الفصل التاسع 9 - بقلم ايزابيل

#بقلم إيـزابيـل
#الجزء السابع
#لم اخلق لرجل سواك
..
- زاحمني ، ولا تترك مجالاً لغيرك ان يحتويني

النشر بين يوم ويوم اختارو الوقت الي تكونون بي فارغين انشرلكم بي..
..
جمانه

الحياه قصص والقصص عباره عن دفاتر دونت بي
كل لحضه مرينه بيهه لمن اكعد اقره بأوراقي..
واوصل لهل لحضات اخلي ايدي على كلمه واحمي الحبر من دموعي تمنيت يجي يوم اكدر اشك هالورقه وبعد ما اتذكرهه ولا اوصل الهه بكل مره اراجع دفتري..

بس ماكدرت بقيت اتذكرهه وابجي واتندم على كل ثانيه ضيعتهه بس بكد ما بيهه سلبيات هي
صنعتني..!

اسمعه يكول : فادديه شبيج لا تخبليني اريد اشوفج ليش ماتفهميني اني اجيت من بغداد للعماره علمودج..

حسره تكسرت بصدري وشهكه وصلت لبلعومي
بس سكتت وضليت مسويه نفسي نايمه اريده يكمل..

: والله وداعة عيونج اخذتهه حتى اقهرج لان نسيتيني بسهوله حتى انساها بيج وله هي بشنو توصلج حتى ابدلج بيهه.. من كل عقلج حتى مقارنه ماكدر اقارن بينكم ولج انت تختلفين انت مكانج بكلبي هي مزهريه بحياتي جبرت كلبي عليهه...

صدري يصعد وينزل بسرعه فضيعه ونفسي قوي اعض بشفايفي ماريد صوتي يطلع دموعي ترست المخده وجعي بذيع الحضه ماينسي..

كمت احس بطعم الدم يطلع من بين شفايفي كد ما ضغطت عليهن بين اسناني كلامه يرن بأذني رن.. حفر داخلي مردني ودمرني حطمني سواني اشلاء..

خلاني احتقر نفسي واحسهه فدشيي بذيئ ورديئ الى درجه يستغلني ويعترف حتى بدون ما يحسبلي حساب واني موجوده ويا بنفس الغرفه..

لعد لهل درجه اني ما همه يكولون مايجرب خنكه الكبر بس الميت بس اني اليوم جربتهه وعشتهه حتى كدت اصدق انو انفاسي نقطعت وروحي تلاشت....

كمل وهو يدوس على كلبي بكلامه
: راح اجي اشوفج كافي تقهريني وتكولين مخطوبه ادري بيج مخطوبه بس هذا الشيء ميوكف عائق بوجهي صدكي وخليج على يقين لو يضل اخر يوم بعمري اني اخذج..

رفعت اديه الي ترجف مثل سفعه عصفت بيهه الرياح وسديت اذاني بيهن..

لحضه صمت وكلشي سكن حتى صوته ما كمت اسمعه يمكن طلع فتحت عيوني الي لزكن ببعض من وره دموعي الي نحبسن بين رموشي..

رفعت راسي عن المخده الغرفه فارغه وبس شهكاتي تترادم بين الحيطان بقيت صافنه ووعلى نفس كعدتي...

عيوني تجري واديه ترجف كوه مثبتتهن على الدوشك كمت من الجربايه امشي كوه واتگئ على كلشي يصير كدامي وصلت للمرايه باوعت لشكلي
شعري لازك بركبتي الي سابحه بالدموع شفايفي
محتصره بيهه الدم..

جريت كلنس ووضليت امسح وارتب بوجهي بهل اثناء نفتح الباب ودخل بيده الموبايل يريد يضمه بجيبه انصدم وتصلب بمكانه من شافني..

مهتميت اله ولا كأني شايفته مستمره امسح بشفايفي وعيوني بقوه وقساوه فضيعه عبالك دانتقم من نفسي تقرب عليه: جمانه بيج شيء شصاير..

مجاوبته تقدم عليه اكثر وخله ايده على كتفي
ماتحملت نفذت طاقتي درت علي وضربته راشدي من قوته صوته رج بزوايا الغرفه وايدي صارت حاره صحت : لك والله تروح ستين فدوه للنذل وللحقير انت شيطان مامقهوره بس على ساعاتي الضاعت وياك لان ماتستاهل وحده مثلي انت تلوك اللك السافله الي تخونك حتى تمشي عدل لان ببساطه متحب الي يحترمك ويقدرك..

دفعته بكل حيل عندي رجع ليوره نطخ ب الميز
محجى ولا حرف بس صافن دخل للحمام ووقفلت الباب بقيت واكفه علي وصافنه...

مستحيل ابقى يم هيج واحد مستحيل اهين كرامتي اكثر نزلت ايدي على بطني وشنو مصير هذا ميلت راسي بتعب و بملل : اخ ياربي اخ شسويت بروحي..
...
اسمعه يدك على الباب ويصيح اطلعييي خل نتفاهمم اطلعييي سمعتي كلامي وي فاديه مو..

غمضت عيوني وعصرتهن لو بيدي اطلع املخه حتى صوته ماجاي اتحمل اسمعه..

فتحت قفل الباب وكفت بمكاني هو كدامي ويباوعلي ضحكت بسخريه وحجيت
: احبج وكلامي وي فاديه فاضي ولا تاخذينه بجديه انت زوجتي وام طفلي وذيج مالهه مكان بحياتي تحب تضيف شيء.!

خليت اديه على كلبي وصحت: لك انت زرفت كلبي انت حطمتني اتمنى بس لو تحس بوجعي حاليا مو عليك مو عليك مو حباً بيك لا لا على سذاجتي لك على الوقت الي نهدر وياك على مستقبلي الضاع دراستي الي هملتهه عمري الي كبرته ١٠٠ سنه علمودك..

ضحكت بوجع وباوعت بعيونه : وشسويت انت تخليني انام وتخابر حبيبه الگلب ماخذني علمود تنساها مو هيج شايفني سلعه تستخدمهه ب الطريقه الي تعجبك شنو اهلي باعوني عليك علمود تستحوذ مشاعري هيج لو انطوك امانه تحافظ عليهه بس وسفه على كلمه الرجال الي تنكال الك لك والله وسفه ومع الاسف انت ابو الي ببطني..

دفعته من كتفه واجيت امر من يمه لزمني من عكس ايدي ورجع وكفني كدامه : سكتت الج على كلشي بس لانج على حق بس مع هذا اني مغلطان لان تدرين بيه احب فاديه ومصارحج بهذا الشيء و..

جمانه : اششش لتكمل شنووو تحبهه شنوو تحبهه واني موقعي من الاعرب وين لو انت الزوجه عندك بس تلبي احتاجاتك وتخلف الك اطفال؟

طلكنيي وروح اعشگ واتمعشگ براحتك درب السد ما رد يلا طلكنييي...

استغفر وفرك وجهه : لا تفضحينه اسكتي خل نتفاهم.

هزيت راسي :
اي نتفاهم نتفاهم بس على الطلاك
مو على غير شيء..

اسعد : مستحيل اطلكج واني ناوي اتزوج فاديه بس خلي تنفصل وغصباً ما على راسج تتقبلين الواقع لان  الي طفل يمج..

جمانه : اتزوجهه واني اروح اخطبهه الك واركص بعرسك هم  بس تطلكني وخلي هي تبتلي بواحد تافهه مثلك انت متستحق حتى اضفري...

تقرب عليه لزمني من فكي وورص على اسنانه بقوه : لج احترمي نفسج لا راسج اكسره صوتج ما اسمعه انجبي وكافي مهزله فاديييه احبهه وما مستحي ولا خايف منج وانت زوجتي وابني يمج يعني تبقين يمي ورجلج فوك راسج..
..
بقيت ساكته واحاول قدر المستطاع احبس دموعي نزل ادي عن وجهي وذب حسره طويله..

نزلت راسي شويه ورفعته
: راح احضر ملابسي باجر نرجع لبغداد..

اسعد :ما امشي بمزاجج اني

صحت : لا نرجعععععع نرجعععع

خله ايده على شفايفي ويدفع بيه بهدوء
:  اش اش فضحتينه نرجع بس انلصمي

جرني من ثوبي ووخرني عن طريقه وطلع...
بقيت كاعده ب الغرفه وروحي مشتعله كل ما اتذكر كلامه اموت الف موته..

معقوله هيج يطلع منه ادري بي مناسيهه بس يبيعني ليش! شسويلته بشنو قصرت ويا..!
مو حبيته بكل جوارحي..

بس بكد ما حبيته كرهتهه وكرهت عيشتي ويا حتى اسمه صار اذا يمر على لساني يلعب نفسي..
..
ماطلعت من الغرفه ولاجنت مفكره اطلع بس دخلت امه وتكلي ليش كاعده وحدج شنو نبزز
لو مو من مقامج احنه! وكالت شبي وجهج يطرد النعمه

جمانه : شكو؟

: جنتي تبجين

مسحت وجهي : لا بس لان هسه كعدت من النوم

ام اسعد : دتعالي اطلعي يلا
هزيت راسي بـ اي عافتني كمت غسلت وجهي وحاولت اخفي تعب وجهي ب المكياج بدلت وطلعت وتمنيت مااشوفه بس مكابلني وكاعد..
..
حتى البنات ماكدرت اختلط بيهن واحاجيهن واجامهلن اعتكفت وحدي وهنه عبالهن متكبره لو شايفه نفسي حتى وحده كالت الـ اسعد
: شبيهه مرتك نحاجيهه وهي تعاملنه برسميه رافعه خشمهه ليش ههههههه

اسعد :هههههه لا هي هادئه ومو اجتماعيه..

خزرته حيل عفتهم وكمت هو وجهه صار اصفر
ذبيت شالي وكعدت على الجربايه لحكني بعصبيه :  شلون هيج تسوين وتفشليني كدام اهلي يا مرتبيه يا ام اخلاق حلوه..

جمانه:مفشلتك ولا شيء بس مالي خلك اكابلك واكعد كدامهم واكعد اجاملك انت واهلك.. عوفني رجاءً

رفعت رجليه من الكاع للجربايه وجريت الغطى..
اتمددت وعيوني للسكف واحاول الهي نفسي عنه
..
روح

نزلت راسي بخجل وهو انفاسه الحاره تضرب بوجهي عصبيته واضحه  ولو بيده يلطشني
بـ الكاع لزمني من زندي وجرني اني محجيت ولا حررف لان اعرف نفسي غلطانه ضل يسحل بيه
عبالك نعجه مربوطه..

وصل لبيتنه دفر الباب برجله وودخل ذبني بقوه احس ايدي نخلعت طلعت امي لونهه مخطوفه وتركض..

ام روح : شكو شكو شصاير

نفجر بيهه : اشششش انت بالذات كلشي ولا تحجين بسببج انت ضاعت البنيه بسببج وبسبب تربيتج الخرا بس بسيطه ما اتسمى بسمي اذا ما ندمتج وندمتهه وعدت تربيتهه..

تقرب عليه واني الهث بخوف لزمني من ايدي ورفعني توجعت بس ماحجيت صاح
: منوووووو هذاااا النزلتي من سيارته

هزيت راسي بـ محد رجع صرخ بيه صوت زرف طبله اذني : الكلام ماعيده مرتين لججج احجيييي منو هذاااا..

دفعته من صدره وصرخت
: معلييييك بيه خووووش وَكافييي تدخللل  عسى ما مدري ياهو انت شلك علاقه وهذا الراشدي ااندمك علي و الله وما طلع روح اذا ما طلعت حقي مربع من بين عيونك ياحقير..

كلامي خله الدم يغلي براسه رجع كفخني على راسي وضربني راشدي لا لا مو راشدي واحد منين ما دير وجهي تجيني سطره من ايده تخلي عيوني تنحول واني اصرخ وامي تصرخ وهو بنصنه ما مهتم لكلشي بس يضرب بيه ويعيط احجي شتسوين ويا منين عرفتي ياكو*** هذا..

دفعني على الحايط ضهري نقسم ب النص ردت افلت منه واركض لجوه بس لزمني من شعري وسحلني ردت اوكع وعثرت بس تماسكت....

َماكدرت احمي نفسي منه لان جارني من وره ومجلب بشعري ويحجي يم اذني بزفير حار..

ويزئر بعالي صوته حتى اذني وجعتني وكامت توشوش اجه يغمى عليه بذيج الحضه..

مديت ايدي من ورا وكرصته من ايده بكل ذره قوه عندي ونبتت اضافيري ذبني عنه وفك عن شعري..

صاح : ولج بطووووول اصبعييي ويطلع منج كل هذاااااا ادبسزززز وحده كلبه وميوكف بعينج لا شرف ولا سمعه ماعتب عليج طالعه على امج الي تاريخهه حافل ب السقوط

كلت واني الهث وكوه اطلع الكلمه رفعت اصبعي بوجهه
: اليوم اذا ما بتت ب السجن تلكاني حاطه طلقه براسي وماكون بنت امي اذا ما سويتهه..

هو يباوعلي بكل صلافه وجهه صاير احمر من العصبيه وامي تدفع بي وتبجي تريده يطلع...

دخلت لجوه امشي واشهك وامسح بوجهي شعري يوجعني ووكوه واكفه لحكتني امي تلطم على وجهه وتحجي : شسويتي ولج شصخمتي..

وكفت بمكاني اشهك وافرك بأذني الي لحد هسه تأذيني بسبب صوته

ام روح : انطقيييي لا تخليلي ادير البانزين فوك راسج واحرررركج واخلص منج ومن شرجج لج اني صوجي صوجي اني مانزلتج ماخلصت منج اول مادريت بنت ذاك النذل..

برطمت : عمرج كله ما حبيتيني ولا حافضتي عليه اني الي اتمنى لو بذاك اليوم منزلتني ولا جايبتني لهل ضيم هذا بس بعد عندج فرصه احركيني يلا ماريد اعيش اني نكره تافههه وساقطه وحقيره احركيني...

صحت : احركينيييييي يلااااا خلصينييي ابوس رجلج خلي اموت المن عايشه اني منو يحبني منو يريدني لج يمه لا بالمدرسه وحده تتقرب مني بسبب تصرفاتي ولا هنا احد يحترمني المن موجوده اصلا اعتربيني ماجيت للدنيا وخلصيني واكسبي اجر بيه..

لا عندي اب الي اخاف افارك الدنيا لعيونه ولا عندي ام الي تستاهل اعيش الهه اني المنو عايشه!

روح المنو عايشه يمه!

ماجاوبتني وبس صافنه ووتبجي بللت ريكي واهز براسي واباوع الارجاء البيت : وهذا هم راح يجي يوم يصيرلي كبر بس منتضره الحضة المناسبه

عفتهه ودخلت للغرفه قفلته وكعدت على الجربايه اهز برجلي ووابجي وابجي وابجي لحد مااورمت عيوني..

تقريبا ورا نص ساعه اجت وكفت يم الباب
: روح اطلعي حاجيني ويامن شافج قسور؟! واذا مامسويه شيء كولي الي حتى اروح اشعل امه وابو

ماحاجيتهه ضلتت تكرر عليه السؤال لحد ما جزعت وتعبت باوعت على شعري ب المرايه واكع على اكتافي خدي ازرك من ورا راشدياته حاجبي متروس دم..

كلت اروح بهذا حالي للمركز وهسه اشتكي علي واخلي يندم على الحضه الي فكر يرفع ايده بيهه عليه..

كمت فتحت الباب ووبهمه امشي امي كاعده على القنفه ايدهه على خدهه من شافتني وكفت على حيلههه : وين رايحه..

لتفتت عليهه : رايحه اشتكي علي ب المركز

ام روح :ولج نجبي واكعدي لا تفضحينه شنو المركز منتضريج تجين علمود تحبسي تدرين بي يكدر يطلع على شنو هل كلان تبن هذا...

روح : شنو معناها اذا هو عنده مركز يعني يكدر يكفخ بالرايح والجاي وماكو احد يحاسبه مارجع للبيت اذا ما اشوفه بالسجن ويبرد كلبي..

طلعت اركض وهي لحكتني جرتني من ايدي
: داخله للمركز وانت بنيه وحدج شتكول علينه العالم امشي ادخلي جوه لا راسج اكسره

: لج يوم باعي شلون زوركني تقبليهه

: اني اعلمه َماسكت اله بس ادخلي انت لا تفضحينه

جان وكت مغربيه وصاعده عندي كلش وحالفه لو اني لو هو حتى اصابيعي عضيتهه من القهر..

دخلت بعد اصرار من امي اخذت تراك وردي برموده وربع ردن والتيشيرت مالته بي بالنص باندا اسود وشويه فضفاض دخلت سبحت وطلعت.
رفعت شعري كعكه ووذبيت روحي على الجربايه اتلمس ب وجهي ومقهوره...

معقوله اني  هيج انهان ومن قبل واحد همجي
وسطحي! ويحجي بالشرف وهو بايعه؟

ماكو دقايق وسمعت صوته يتهدد ب الهول خلي بنتج تطلع لا افوت اسحلهه الادبسز هايه..

كلت بكلبي والله ماكو غيرك ادبسزز نهضت وطلعت اتمشى بهدوء وكفت بباب الغرفه وانتجيت علي وكتفت اديه : نعم..

قسور : تعاي نحجي ما اسويلج شيء..

ضحكت بسخريه : وشنو خايفه منك مثلا؟ بس ماريد اوكف وي ناس همج مثلك..

امي واكفه بيناتنه
: والعباس لو تصيرين بيدي هاي الحيطان اخليهه تبجي على حالج بس الايام بينه وبعد عمري وعمرج طويل..

روح : عود من تصير ب السجن واسي نفسك بهذا الحجي.. عفته ودخلت قفلت الباب مرتين.

هو بقى يتعارك وي امي لحد ما نشف ريكه وخله وراح امي كالت اطلعي راح طلعت هي متحاجيني وكابله خلقتهه عليه..

روح: راح اسوي عشه

ام روح : ما اشتهي

روح :تنتضرين بهاء رجلج مو؟

ام روح : نلصمي انت الثانيه

:بكيفج

لان وحدي ماضلي واهس اكل سويت لفه جبن واكلتهه ودخلت انام كوه نمت الكوابيس تتراكع فوك راسي..

حوالي ب ٣ ب٣ ونص بعده ضلمه وحتى الفجر ما طالع حسيت بأيد خشنه تتخلى على حلكي وتسحبني من فراشي مادري اذا جان احد الكوابس او واقع...!
..
جمانه

رجعنه لبغداد واني نفسيتي زفت حتى اهله نتبهو علينه لانو بكل لحضه اعاركه وماسكت..
هيج من اشوفه افور وماكدر اذا ما اتعارك ويا على الاقل يهدء داخلي شويه..

بالسياره الطريق كله منه حجايه ومني حجايه لحد ما نصير من الروس بس اني هذا الشيء نعكس عليه سلبياً بطني ضلت توجعني كتله وديني الاهلي هو والحايط سوه عبالك احاجي صنم..

وصلنه للبيت بقيت كاعده ب السياره نزل الجنط والجه اليمي فتح الباب وكال : انزلي

جمانه : مانزل وهسه توديني الاهلي يلاااا

اسعد : دنزلي لج زعطوطه

نفخت بملل : اللهم طولج ياروح لتخليني اذب روحي جوه التاير وابليك وديني ماريدك ماريد اكابلك واكعد شنو كوه هي كوه..

زفر ومسح وجهه دنك عليه وسحبني من زندي جان دنيا ضهر والشارع فارغ خزرته..

جمانه
: شكو مخلي مزهريه ببيتك تاخذ مساحه لا اكثر..

باوع بعيوني الي عاكسه عليهن الشمس وواضح خضارهن هزيتله راسي ب اي

اسعد : دخلي نتفاهم والي تردينه يصير الج...

ضليت مركزه بي وصافنه وافكر سحبت زندي من مقبضه وسبقته للبيت
..
كعدت على القنفه وهو يفتر فوك راسي ينزع بحذائه ووقميصه ذبه وراح دنك على الجنطه الي بالهول فتحهه وطلع بلوز خفيف نص ردن لبسه..

ذب تنهيده وكال : انت الي تردين هذا الشيء و..

قاطعته بصرخه: شنو اني اريد هذا الشيء؟ لك بابا سمعتك بطبله اذني تحاجيهه وتكول الهه ماريدهه وماحبهه واخذتهه حتى انساج شتردين اكعدلك وواحاول وياك وانت لا كلبك ولا عقلك يمي..

ذب نفسه على القنفه وكال : اني اطلكج بس بشرط ان قبلتي خيراً على خير وان ماقبلتي تشيلين فكره الطلاك من بالج ولو يبقى اخر يوم بعمري ما اطلك..

عقدت حواجبي :  شنو

رفع طرف حاجبه الايمن وشبك اصابيعه وعصرهن بقوه ورجله يهز بيهه تصرفاته وترتني وخلتني اشك ومن ملامحه مبين الي راح يكوله مو سهل رفع عينه عليه وجان يكول..!!
يتبعععع

🖤🖤🖤🖤🖤
ايزابيل