رواية لم اخلق لرجل سواك الفصل الثامن 8 - بقلم ايزابيل

بقلم ايزابيل
الجزء السادس
لم اخلق لرجل سواك

‏الحب ّ، أن ألمح وجهكَ على زجاج المقهى ‏وأنتظر دخولك طوال الوقت، وأنتَ في مدينةٍ أُخرى
..
نزلت عيني على معصم ايدي عدلت اسوارتي بأرتباك انفاسه عاليه بالسياره وحواجبه عاقدهه يحاول يبين عصبيته الي اصلاً واضحه
بلزمته لستيرن السياره بقوه ووشاد علي بضغط
عالي..

كلبي يدك وصدري يصعد وينزل بهدوء اثر ذالك
حسيت الجو صار حار هفيت على وجهي جان يباوع عليه وتنهد بضيق مد ايده على التبريد..
حجيت

روح : ااا لا ماكو داعي

مهتم الي شغل التبريد ووجههه عليه ضرب الهوى البارد بوجهي احس خدودي الي شعلتهن الشمس وكلبت لونهن احمر جمدن..

وقف السياره مقابيل باب الصالون قبل لا انزل
ندار عليه وحجه : روح

باوعلته كال : قبل متطلعون خابروني اني اجي اخذكم

: ماكو داعي

قسور: مو انت الي تحددين اذا اكو داعي لو لا

رفعت طرف حاجبي بصدمه حركت شفايفي ناويه اهاجمه جان يقاطعني بـ : اشش مالي خلك اتعارك نزلي يلا..

فتحت باب السياره ووخليت رجلي ب الكاع رفعت بنطروني وعدلت الاحزام اول مسديت الباب طار
وبس التراب كب ورا
..
نزلت راسي بهدوء ورجعت بذاكرتي لقبل كم ساعه
..
دخل للغرفه نزلت الموبايل فورا من اذني عقد حواجبه : وي منو جنتي تحجين!

بلعت ريكي ورفعت اكتافي : ووي منو محد

: چا الموبايل شيسوي على اذنج!

: وانت شكو

رفع اصبعه بوجهي : احجي بأحترام ومن تردين بوجهي ردي عدل لا اخرب ملامحج

عطت بوجهه : انت شدتحس لخاطر الله ترا كولشي بيك اوفر تصرفاتك عقليتك كلامك بأختصار انت واحد..

سكتت من شفته يباوعلي بعيون بغيضه ونظراته محتدمه تجاهي رجعت ليوره كم خطوه وخليت شعري خلف اذني خطواته تبعتني وصار يتقرب عليه ويكول : كملي ليش سكتي..

: قسور رجاءً سد الموضوع وكافي فضايح

لزمني من ايدي ولواهه بقوه وويصرخ واني اضم بوجهي واحاول اطلع نفسي من بين وكره
: ماكووو فضيحه بهل كوكب غيرج لا محترمه صغير ولا محترمه جبير..

: هاي اني يعجبك ميعجبك..

كمل عني : اي طگ رراسك ب الحايط مو!

:محجيت هيج لتحجيني شيء محاجيتهه..

دفعني وولتفتت انطاني ضهره ومسح وجهه
: اعوذ بالله من شر الشيطان الرجيم..

: تقصدني اني مو

:نعم؟
: كلت اعوذ بالله من شر الشيطان الرجيم وقبل شويه جنت تتعارك وياي يعني تتعوذ مني واني شيطان رجيم..

ضحك بسخريه وهز راسه يمنى ويسرى بهدوء
:الله يعينج عل هل عقل الشايلته عمي بعد ما اعتب عليج امشي حجيه امشي..

اجيت اكله حجيه بعينك بس طلع وعافني جبت جنطتي وفتحت موبايلي حذفت محادتثي وي مؤمل وطلعت
..
الحاضر

صوت الهورن العالي فززني رجال مطلع راسه من الجامه ويعيط بيه : يابه دمشيي لا نضربجج ونبتلي..

بلعت ريكي بفشله وهزيت راسي حتى وهو غايب مأذيني تمشيت بسرعه واني اعبر الشارع بركضه
دخللت للصالون لكيت ماما هواي عندهه زبائن..

عزا اني شلون دخلت للمحل مو على اساس اروح وي مؤمل اهووو هاي شلون شغله يلا. اطلع من وقت..
زين وقسور ماريده يشك واذا ماخابرته حتى يجي ياخذنه راح يعرف كلشي متأكده..

دخلت بالحمام مال الصالون كلت الماما بس ارفع شعري واجي طلعت موبايلي وخابرت مؤمل.

جاوبني:ها حبي صارلي ساعه منتضر
: ها ماكدر اجي اعذرني ان شاء الله ع باجر

:شنووو متكدرين تلعبين عليه انت

: اسفه والله شبيك بس افهمني

: دنجبي انجبي متقصده طبعا متأكد

: لاوداعتك يشهد ربي تمنيت اجي لان مشتاقه الك بس..

سد الموبايل بوجهي مخلاني اكمل تنهدت وضميته بجيب البنطرون الوره شديت شعري ذيل عالي وطلعت اساعد ماما طبعا اني اعرف احف واصبغ اسرح شعر واسوي ال ويفي والكيرلي وامكيج اتفنن ب المكياج بس ماما عليهه التاتو وصبغ شعر كله هي نادرا ما تخليني اني اشتغله..
..
بقينه لل ٩ بليل خلصنه ماما تعزل ب الصالون وتطفي الاضويه اني دزيت رساله لقسور كتله تعال جان يكول ب الباب اني اطلعي..

صدمني كلت : يلا ماما قسور منتضرنه

عقدت حواجبهه : شنو شنو ياقسور هذا وشكو منتضرنه

: مو هو جابنه وكال راح اجيكم

جان تصيح بيه
: لج شو انت متخبله فد مره ونسيتي هذا ابن منو
ليش خليتي يجيبج وشكو جابج اصلا

تخصرت :وانت ليش هيج خايفه منه لازم عليج لزمه؟

:ادبسززز احجي عدل لا اكص السانج

كلت بضيق:اوووي اني طالعه عود الحكيني

لزمت الكتر من فوك وسحبته نفرد شعري على ضهري رتبته وطلعت شفته واكف كبال المحل ومشغل لايت سيارته رحت اتمشى فتحت الباب

كعدت ب الطرف ولازكه روحي ب الباب ماريد اصير ب النص وتجي عيني ب عينه...

جان هادئ بس صوت انفاسه واضح الشارع ضلمه
والسياره اضلم كولشي ممبين بس كف ايده الي على الستيرن..

طلع من صمته : امج وين؟

روح : هسه تجي

سكتت رجعت حجيت برتباك: ااا

قسور : احجي لتخافين

روح: لا والله منين اخاف مثلا

قسور : ماكلتي غير الصدك قابل منو يكدر يخوفج انتِ

روح: اجيت اكلك شكو ضال منتضرنه

قسور : ومنو كال كاعد انتضرج؟ هيج اني فارغ

روح : لعد شكو واكف بالباب حتى قبل لا اخابرك

قسور : صار عندي شغل ومريت وكافي لتسألين..

شكد مستفزز عضيت اصبعي من القهر اجت امي
فتحت الباب ضطريت اتدنه عنهه واصير ب النص وهي كعدت مكاني..

اول ماصعدت مخنزره وكالبه وجهه قسور حرك
السياره فورا وبسرعه مو منطقيه..جان تتصرخ
:على كيفك ولك تريد تموتنه شنووو

جان يباوع ب المرايه ونتظراته فرحانه ليش مادري تجاهلته رجعت همست بصوت واضح
: ادري بيك ماميت علينه بس تريد تخلص منه هل ماخذنه ب سيارتك وناويلنه ع نيه سوده هسه اذا نكلبت السياره ف راح تكون بفعل فاعل

قسور : وعليش هيج اني مارايد روحي اضحي بيهه علمود ميكب ارتست ام روح ترا وجودج ب الحياه ميفرق عندي ولا يشكلي خطر.. بكد ما وجودي مأذيج..

ام روح : دحترم نفسك واحجي عدل الكدامك مو زعطوطه مره بكد امك.. سافل واهلك ماعرفو يربوك..

: اشكرج هاي من حسن اخلاقج

ام روح :ماعليك عتب نزلنه هنا يلا نزلنه

قسور : على كيفج يابه ترا جنه نتشاقه

ام روح : والقرأن افتح باب السياره هسه واذب روحي منهه اذا ما وكفت..
وجان تجر باب السياره بقوه باوعت علي وبخزره
: افتحهه

ضرب ايده بقوه على الستيرن ووتنهد وفتح الباب
نزلت امي تركض واني متعلكه بأيدهه واحاول الحك عليهه بس شاده محرك فيراري تركض ركض...

وتسب وتنعل
:كله من وراج خليتينه نصعد وي هذا الادبسزز الي لسانه متبري منه صوجي اني مخليتج على حل شعرج تخيطين وتخربطين بسيطه بسيطه

روح : اهووو اني شدخلني رجاءً لترجعين عليه انت مدري شضامه وهو ديهددج مبينه ترا واني ساكته لحد هل لحضه ومداحجي منتضرتج انت تبادرين..

جان توكف بنص الشارع باوعت عليه وخزرتني
خلستني نظراتهه همست : لو ما شارع جان عرفت شلون اربيج..

ضلت تمشي على كيف واني بصفهه اتنهد واذب حسرات شفت ضل طويل كدامنه امي ما منتبهه..
بلعت ريكي بخوف ودرت وجهي بهددوء وبس عيوني تباوعله شفته يمشي ورانه وبيده سويج السياره يفر بي.. عضيت شفايفي بقلق شكو لاحكنه..

امي هم انتبهت اله ووندارت علي وصرخت مانخلص منك احنه وهو ساكت ماحجى شيء..

وكف سياره تكسي جان ولد شاب اشرلنه براسه بمعنى اصعدو امي صعدت ليوره واني بصفهه..
بعده مامحرك الولد نفتح باب الصدر ودخل قسور
استغرب الولد وامي ضربت على رجلهه بقله صبر
ضغطت على زندهه بقوه وهمست : لتفضحينه..

قسور : وياهم امشي بابا

كاعد بكل اريحيه وامي تشعوطت يعني شنو الي استفاديناه من نزلنه من سيارته لحكنه المستفز

بكد ما وجوده مضايقنه ماسكت وضل يلغي وضايقنه اكثر كل شويه وكل للولد اعيونك عل طريق لتفر الستيرن هلكد لان انت مبين ما متمكن من السياقه لتورط روحك وتورطنه وياك
..
من وصلنه امي فتحت الباب ونزلت حتى مانطت فلوس التكسي خلت قسور يدفع المهم هو اول وتالي يدفع نزلت اني ووكفت بضهر امي الي تدك ب الباب عيني علي تمشى
للباب ديخلي المفاتيح جان تفتح الباب هديل..
بنت عمه وبنت عمي ههه على اساس..

َالمكروهه اموت منهه لحد هسه ترن بأذني كلامهه من حجت عليه يم قسور دخل لجوه ويبتسم وياها وياي بس يرزل ويصرخ استغفرالله حتى بهاي ماعندي حض
..
دخلت امي للبيت شافت زوجهه نايم على تخم وبطل الويسكي بأيدي متلولح ولكبر شكد عار
ضلت تسب وتلعن حتى اني رزلتني وتمشي وتلملم بهدومه الي مطشره والبيت الي مهوسه.

عفته ودخلت لغرفته ذبيت ملابسي وتمددت على الجربايه غمضت عيوني واسترجعت كل
الي صار اليوم وكلام قسور وياي ونظراته والطريقه الي يباوع بيهه مادري ليش الف مره
عدت مواقفه براسي..
..
توني دانام جان اسمع صوت صياح وعرك قوي..
خليت ايدي على كلبي بخوف زحت الغطى عني
وكمت تمشت بخطوات بطيئه وكفت اتسمع..

ام روح :لك عارررر قذررر مو اني التخوني والله واسم الله اشعل اجدادك جد جد.. منو هاي الجايبهه للبيت بغيابي احجييي..

تنفست بغضب وهو يرطن سكران وميعرف شيحجي ركعت الباب بملل تمشيت كعدت بالكاع
سندت ضهري للحايط وضميت وجهي بين اديه
تعبت من هل عيشه تعبت واني اشوف عركاتهم
وصياحهم..

نزلت راسي لحضني ودموعي تهل وينك بابا وينك اني محتاجتك ليش عفتني بأيد هيج ام ليش متت اني اريدك تعلمني الصح تصحي ضميري تكون الي سند..

تعبت واني اواجهه الوحدي ويسألوني ليش هيج تصرفاتج شسوي اذا محد احتواني عشت بين عائله متفككه ام حايره بنفسهه ورجال حاير
بنزواته لنفسي ماكدرت احميهه من نظراته..

اذا هي امي نفسهه تدري بعلاقتي وي مؤمل وساكته شبيدي اني حاولت اربي نفسي بس عقلي الطفولي هو الي قادني..

بقيت كاعده للفجر من ورا صياحهم وعياطهم ماكدرت انام طردته من البيت والي عرفته لاحقاً نايم ع رصيف ب شارع مقابيل الشقه..والناس تفوت من يمه ولاكانو ومحد سأله شكو وشصاير
لان مو اول مره ينطرد من قبل امي..
..
صوت الاذان عالي عمري كله ماصليت ولا مفكره اصلي لان اخذلي يوم يومين التزم واكطعهه..

سمعت صوت سياره كمت من مكاني وتمشيت للشباك وخرت البرده باصابيعي بهدوء.. الصبح بده يطلع والشمس بعدهه متلبده بحضن الغيوم
شفت قسور واكف مقابيل سيارته لابس قميص رمادي وبنطرون كابوي بيده كلاص جاي ويشرب بي كتفت اديه وانتجيت على الحايط اباوع علي..

سرحت وفصلت حسيت نفسي بعالم ثاني بحيث
ماكمت احس بأي مؤثرات خارجيه لحد ما طلعت هديل هي وامهه وصعدن ب السياره وهو اخذ كلاص الجاي مالته وصعد ب الصدر.. وراحو

الي اثار فضولي انو وياهن جنط حيرجعن للبصره ايييي واخلص واخيراً بس كون صدك..
بالنسبه للسياره استغربت شوكت رجعهه ماعرف

طفيت من النعاس بس خابرني مؤمل دخلت غسلت وجهي وتمددت على السرير واحاجي..

ضليت لل ٧ احجي ويا كلامه وياي كله منحرف
واني ماكدر اسكته لانو يكلي ما تحبيني يطلب صوري وماكدر ارفض اي هيج جان مقيدني.. واني طايعته وماتجرء ارده اعمه بصيرتي عن شرفي وكياني ومستقبلي
..
مر وقت زين ونمت الضهر كعدت جان عطله ومعندي دوام اتفقت ويا على باجر اجي ونطلع

رجل ماما بعد ماشفته اختفى حتى بالشارع ماكو
بس الضهر اني واكفه اكلب التمن مو اني طبخته امي بس داكلب بي حتى الهي روحي سمعت مكالمه اجت الامي خلتهه تعوف البيت وتطلع حتى بدون ما تكلي استغربت وخفت معقوله صار شيء

بقيت لوحدي بالبيت موبايلهه ومترد علي صديقاتهه خابرتهن وحده وحده وميعرفن عنهه شيء

للعصر رجعت هي ورجلهه الشفيه طلع متعارك وي واحد والرجال مدمى لرجل ماما لحد ما مغمى علي وماخذينه الناس للمستشفى..

ومخابرين على ماما وجابته واجت للبيت مدري هو سوه هل فيلم مدري صدك بس مزورك من كل. جهه

صبيت لنفسي تمن وفوكا شويه مركه وكعدت لوحدي اكل كملت ذبيت ع سنك ورجعت لغرفتي
..
هم تصافو بس ماما بعد وجهه ثكيل المغرب قررت اروح ازور جمانه وبدلت وطلعت رجلهه جان مموجود وعرفت هي حامل حيل فرحت الهه بس راح تتعب ب الدوام تكول اسعد كلي بطلي بس متقبل
...
وخطيه ثاني يوم داومنه سوي وهي تعبانه وكوه تمشي حمل اول شهر كالت حيل مأذيني..

توني راجعه من المدرسه دك عليه مؤمل جاوبته
: ها وينج؟

: شنو ويني

: مو كلتي اليوم اجي اشوفك

: احم اي هو

: دنجبي ولا تمشين سوالفج براسي يلا منتظرج براس الفرع تعاي

كتله ماشي وسديت الخط امي جانت بالصالون كلت اروح واذا اجت ولكتني اكلهه يم جمانه نقره سوه

بدلت وطلعت شفته من بعيد كاعد بسيارته ويباوعلي بنظرات غريبه ماعرفت افسرهه
..
صعدت بسيارته جر ايدي فورا ولزمهه مادري ليش هل مره خفت ورجفت الاول مره احساس
بتأنيت الضمير انتابني..

: ليش متغيره

: شلون يعني

: ماجنتي هيج انت مو روح الي اعرفهه

: هههههه شبيك مؤمل

جر ايدي وباسهه وخلاهه على خده جريتهه بقوه :راح ننفضح

: تنفضحين؟ شنو اول مره

بلعت ريكي : مؤمل اني مدارتاح بهل سوالف

ابتسم بسخريه ودفعني ويهز راسه
: هههههه عرفت ومن اكلج متغيره تكليلي لا

روح : انت تريد ادزلك صور تريد اطلع وياك وتتقرب مني براحتك زين شنو نهايتنه؟ لوين راح نوصل

مؤمل :هسه صرتي تفكرين ب النهايه!ليش مو تدرين اني احبج وانت تحبيني وهذا كلش كافي

ذبيت تنهيده طويله ونزلت راسي

مؤمل :اكو احد مالي راسج عليه؟

صحت : ماكو ماكووو بس اني تعبت

نظرلي بنظره حادقه : لج ليش تصيحين عليه روح ترا صبرتلج هواي امشي انزلي يلا وبعد لا تحاجيني ولا تتصلين اذا ما تطلعين هل مهزله من بالج وتغسلين راسج..

بللت شفايفي بتوتر وضليت لكم ثانيه كاعده اباوعله وهو داير وجهه عني فتحت الباب ونزلت
شخط السياره بسرعه

اول ما رفعت راسي نصدمت بقسور يتقرب منيي.
يمشي تجاهي وعيونه مفتوحه ونظراته بركان.
الدم جمد بجسمي وااعصابي ارتخن حتى ريگي نشف...

معقوله شافني ب سياره مؤمل يعدمني والله اول ماصار مقابيلي فتحت حلگي اريد احجي جان يجيبني براشدي دخلت شفتي بين اسناني نجرحت والدم سال بسرعه البرق خدي بقى يطلع حراره
..
جمانه
جنت اتمنى المح نظره الفرح بعيون اسعد من كتله اني احمل بس رده فعله غريبه ماعرفت افسرهه متضايق فرحان زعلان سعيد؟

وجهه بهت لونه ويجر بالحجايه جر
: ااا صدك

جمانه: اي قابل اتشاقه وياك

ضحك بتوتر: ههههه لا بس فاجأتيني

جمانه : يعني فرحان لو لا

: اي اي لعد شلون

وكام وعافني كال داتصل على صديقي الشك اكل كلبي ليش ضاج ليش نقهر! اليوم جنت كاعده مربعه على الجربايه وبحضني الكتب دخلت ب الشهر الثاني والحمل زاد صعوبه عليه احس روحي تريد تطلع من طبخ ودراسه وتنظيف واسعد ابد مايفكر يساعدني..دوم طالع برا البيت
اشوفه بالليل..

جان بليل فتح باب الغرفه ودخل مبتسم بفشل وعيونه حاجبهه شيء اتوقع دمع لان تلمع..
اجه سحب الكتب من حضني وخله راسه على رجلي وشال كف ايدي غرزه بشعري..

مسدت راسه بهدوء : شبيك

تنهد : نخطبت

: شنو

:فاديه نخطبت

عقدت حواجبي منو فاديه يا اتذكرت هاي حبيبته القديمه الي صارت مشاكل وعرك من وراهه.

دفعته بقوه وصحت : انت صدك تحجي ذاب نفسك بحضني حتى تشكيلي همك وحزنك لان انخطبت حبيبه القلب..

صفن بيه : شبيج

رفعت ايدي بوجهه
: شنو شبيج شنو شبيييج انت مستوعب الي دتكوله

من استوعب كلامه بقى يعتذر ويجر بيه يريد يحضني واني ادفع بي : ترا ماقصدي شيء وداعتج بس كتلج نخطبت لا اكثر مجنت اقصد شيء..

جمانه : اي قشمر على روحك بهل سوالف انت بعددددك تحبههه ومقهورررر وراح تموت من القهر لان نخطبببت مووو لك اني صوجي والله صوجي وين وكعت نفسي شجبت الروحي من هم..

دفعته بقوه وحضنت المخده جريت الغطه لفيت روحي بي ماوكعت مني ولا دمعه بس كلبي الي نحرك وشعوط هيج احس دخان كمت اشتم منه
..
نمت من دون ما احس جنت تعبانه وسهرانه اقره
ف غفيت كعدت اول ما رفعت راسي شفته كاعد مقابيلي على كرسي وصافن بيه..

دفعت الغطه بقهر وكمت انزل بدشداشتي واباوعله بغضب تمشيت من يمه بأنزعاج ودخلت للحمام غسلت وجهي ولميت شعري وطلعت مريت من كدامه جان يجرني بقوه احس خلع ايدي..

كعدني على رجلي واحتضن خصري بحب..
كال :زعلانه مني

جمانه كلت بسخريه : هههههه لا بالعكس فرحانه وهسه حكوم ادك واركص..

اسعد : ااا تعرفين تركصين

عفست ملامحي بأنزعاج : بله متوخر عني خل اكوم البيه كافيني

بااوعلي بعيونه الي لونهه عجيب غريب يخطف الكلب لا ارادياً عبالك كزازه..

اسعد : باعي حبي اني لو الحد هل لحضه فاديه احبهه ماجان انطيتج هيج مكانه بحياتي وخليتج زوجتي الي راح تشاركني العمر كله يعني غطاي وستري البيه والعليه الامر الناهي بحياتي فاديه ذكرى حلوه وان شاء الله انساها..

جمانه : اكلك شنو انت دتعيرني لان تزوجتني لو تذلني بأختيارك الي..

اسعد : منين تجيبين هل كلام ليش تعوفين كلشي وتركزين بس على التردي..

نفخت بنفاذ صبر وكمت من يمه اسمعه يطرح نفس بتعب جريت الجرجف مال الجربايه بقوه
واسفط بي بغضب
ََ..
كتله واني دايره ضهري : شسويلك غده

اسعد :ماريد لتعبين نفسج

جمانه : كتلك شتريد

اسعد : واني كتلج ماريد

جمانه : براحتك

عفته وطلعت للمطبخ بوجهي فرغت مواعين الكاونتر كلهه وجبت طاسه جبيره خليت بيهه مي وزاهي وكعدت ب الكاع بسطت اجلف ب الجدوره والمواعين الي صايره كدامي جبل...
..
فات من يمي ايدي بجيوب بجامته السوده ويضحك بسخريه
: اني ماماخذ بشر صاحي خبله والله

ماجاوبته اجه كرفص مقابيلي ويباوع واني منزله راسي للجدوره : ارفعي راسج

ماجاوبته رجع كال : مو داحاجيج

عطت :شتريدد

ضحك وكال : احبج

جمانه : ديلا هاهيه صدكتك

اسعد :ليش تردين تكلبين حياتنه سوده هم ونكد بس

صرخت وعيوني نفتحت بقوه : ترا مو اني الي اجيت نمت بحضنك وكتلك حبيبي السابق خطب مو اني الي زعلت وعفت البيت وتجاهلتك وماجايك بس بليل..

كام على حيله ودفر الماعون الي يم رجله
اسعد : احترمي نفسسج لج ترا زودتيهه والله لو مو حامل

جمانه : اي شتسوي تذبحني مو

اسعد : ولا توقعتج هيج

جمانه
: ليش توقعت تضربني راشدي انطيك خدي الثاني؟

عفت البيدي وكمت دفرته من كدامي وركضت للغرفه فتحت الباب جان خلعته اله شويه اديه بيهه زاهي وثوبي مبللل فتحت الكنتور واجرجر بملابسي ودموعي توكع..

جرني من زندي ودارني علي واني انفر بأدي لزم وجهي بثنين ادي ويمسح بخدودي الي مليانه زاهي ودموع

اسعد : شسويتي بروحج يا ام نص عقل..

سكنت وهدئت باوعت اله بغضب وصدري يصعد وينزل بلهثه قويه عافني وراح سحب كلنس من ميز المرايه ورجع وكف مقابيلي..

ومسح وجهي وركبتي واديه وحضني بقوه وخله كف ايده على راسي :وداعتج ما اكو غيرج بحياتي

ضليت بحضنه الاكثر من دقيقه صافنه وبالي رايح لبعيد اصدكه اصدك كلامه بس شلون وهو كلشي بي يشرح هيامه الهه..

سحبت نفسي منه بكل هدوء ورحت كملت المواعين ضليت لليل اني اغسل وارجع ليوره..
مادري شحسيت من طلعت مواعين المطبخ كلهه
صدك طاك فيز براسي
..
لليل كال اسعد خابرني اخوي وعزمني باجر رايحين للعماره ه صدمني حتى ما ممحضره نفسي ولا مستعده لهيج سفره بس اضطريت اقبل لان يكول مشتاق الاهلي..

بليل حضرت الي كم قطعه بجنطه وياها مكياجي وفرش الاسنان وباقي شغلات العنايه...

و كعدنه الفجر بدلت ولبست كعب اسعد مقبل حامل وشلون كتله معليك اني متعوده..

ورحنه للعماره بالطريق خابرت اختي ناي كالت اريد اجيج اني وضي كلت الهه بالبصره الاسبوع
الجاي ارجع..
..
الطريق كله اني افكر ليش هيج فجأه طلعت سالفه الروحه للعماره؟ واخو شوكت خابره وعزمه وهو مو عنده دوام شنو الي خلا يوافق هيج بسرعه واهله قبل كم يوم جانو يمنى..

اكيد قبل حتى يروح يشوفهه اي اني متأكده...
بلعت ريكي اكو غصه ببلعومي لا تنشرح ولا احد يكدر يفهمهه..
..
وصلنه هناك جانو منتضرينه ومحضرين الغده
مادين سفره شطولهه احير على شنو اباوع بس ماكلت هواي وهمه انتبهو وضاجو عبالهم مستحيه بس فعلا جنت ما اشتهي..

ام اسعد جانت كاعده مقابيلي عوجت حلكهه بضيق وكالت : جمانه بنيتي ليش متاكلين..

جمانه : لا خاله داكل

رفعت طرف حاجبهه : خاله!

جمانه :اقصد عمه

ام اسعد : الحمل هواي مأثر عليج ان شاء الله تكومين بالسلامه واكحل عيوني بحفيدي..

ابتسمت : ان شاء الله

ابو اسعد الي يصير ابن عم ابوي حاجاني
: شلونه ابوج شخباره

: الحمدلله بخير

راسي نثول همه هواي وكلهم يحجون بنفس الوقت اكثرهم ولد قليل بنات وكلهن جناين والبنات متزوجات..

ماكو اصغر مني ولا بعمري اسعد كال محضرين النه غرفه اذا تحبين روحي ارتاحي..

جمانه : اي ياريت

اسعد : كومي يله

جمانه
: ماكو داعي انت ضل كاعد يم اهلك اني اروح

باوعلي بنظرات عتب عفته ومشيت خليت وحده من البنات تدليني دخلت للغرفه مخنوكه وضايجه بدلت ملابسي بسرعه ونمت على وجهي..

مادري شكد ضليت نايمه بس كعدت على صوت همس مافتحت عيوني بقيت مسويه نفسي نايمه واتسمع

: فادديه شبيج لا تخبليني اريد اشوفج ليش ماتفهميني اني اجيت من بغداد للعماره علمودج
.. يتبع

🖤🖤🖤🖤🖤
ايزابيل