رواية لم اخلق لرجل سواك الفصل الثالث عشر 13 - بقلم ايزابيل

#بقلم إيـزابيـل
#الجزء الحادي عشر
#لم اخلق لرجل سواك
..
أنا الذنب الذي ستتوب عنهُ وتعود اليهُ كالمهووس !
..
جمانه

حلمي جان اكبر من ثار وعشاير جان اكبر من انو اتخبط بين اديهم ماجنت متوقعه قدري يكتبلي
انسحل هيج سحله بنص الليل

فتحت عيني بعد ماجنت غايبه عن الوعي كل الي اتذكره نحط شيء على خشمي ونسد حلكي..
ضليت ارمش الاكثر من ثانيه عيوني مداشوف زين بيهن الرؤيه مو واضحه عندي..

انتجيت على الحايط الوراي وكمت وكفت على حيلي توقعت الخلل بعيوني بس طلع اساس
المكان اضلم! بحيث نفسي ماجاي اشوفهه..

احط رجليه بهدوء واتمشى خطوه خطوه بخوف واتلمس بالحيطان تجي بيدي خيوط مال عناكب
وووصخ ووتراب افتر بنفس المكان اريد اعرف اني وين..

دموعي على خدي تنزل ووكلبي يرجف مثل السعفه ضميت اديه الصدري ووكفت بمكاني غمضت عيوني وعصرتهن وواردد ايات وادعيه..

اللهم ارفع مقتك وغضبك عنا، اللهم إنا نستغيث بك فأغثنا، نشكو إليك ضعف قوتنا وقلة حيلتنا”.

يارب ا إِلَهَ إِلَّا اللَّهُ الْعَظِيمُ الْحَلِيمُ، لَا إِلَهَ إِلَّا اللَّهُ رَبُّ الْعَرْشِ الْعَظِيمِ، لَا إِلَهَ إِلَّا اللَّهُ رَبُّ السَّمَوَاتِ، وَرَبُّ الْأَرْضِ، وَرَبُّ الْعَرْشِ الْكَرِيمِ .

ياعالي ياحكيم ياعزيز ياغفور احميني برحمتك الواسعه ربي افتح الي ابواب نجاتك ونجيني من هل دهاليز..

جنت اشهك بخفوت ووارجف كلي من رجلي لراسي واردد  ب الادعيه بصوت ناصي وبس شفايفي يتحركن..

سمعت ذبذبات صوت سكتت وتقدمت بخطوات سلسله ومخليه اديه ليكدام لحد ما صارن على الباب ثبتت ب مكاني وخليت اذني صار الصوت اعلى..

: لا ادز تهديد ولا ادز احد همه راح يعرفون بنتهم عدنه اول وتالي وبوكتهه بس نكدر نسترد حقنه وزياده هم بس اصبرو..

: ووابن عمنه الي حابسينه يمهم شلون نكعد نخلي ايد على ايد وننتضر حرمه الحقير النذل الي اتمنى اعرف كبره وين حتى اتفل على ترابه تنقذنه تحجي صدك انت لا خويه انه هسه ماخذ ولدنه ورايح والي يصير خل يصير..

: همممام انثبر بمكانك ولا تخليني اضوج منك استعجالك مو وگته ابد مو وگته شوكت كلت الكم شيء وطلع خطأ؟! هاي المره حامله بأبنهم يعني راح يرجعونه صادق وهمه الممننونين في سبيل ياخذوهه..اذا مو علمودهه علمود الطفل

صوت مره عالي : وينههههه ولك وينههه خل اشرب من دمههه دليني عليهه همام همام احاجيك لا تخليني اروح هسه ادور البيت زاويه زاويه واسحلهه كدامكم واكتلهه..

همام الدين : اشششش صوتج نصي ووامشي طبي للغرفه لا تصيرين غبيه البنيه مالهه علاقه..

: شلون مالهه علاقه ورجلهه راد يموت اختي حلال شلون مالهه علاقه ورجلهه خله سمعتنه وراسنه الي ينحلف بي بالكاع وي التراب ماسكت وودموع فاديه ووكسرتهه ماسكت اذا ما اضوكهه الي ضكناه احنه وازيدددد.

همام الدين: شبيك انت ساكت لازم راضي على هالتبن هذا؟! اي راضي چا مو انت الي خطفت البنيه وجبتهه لهنا... انه طالع والي اسمع بيهه متعرضه لهل مخلوقه يابه ووتراب ابوي اشوفجن شيء عمرجن كله ماشايفته لا مني ولا من غيري

راد يغمى عليه من الخوف يمه وين اني يمه دخيلك ربي ذول اهل فاديه ماكدرت اضل واكفه بمكاني ووكعت للكاع ورجليه يتراجفن ووسنوني يطكن وحده ب الثانيه..

اهز بنفسي وابجي شلت اديه خليتهه على راسي وصفنت شراح يصير بيه اني هسه يكتلوني يذبحوني.. اي اي اكيد مايخلوني عايشه..

من اول يوم تسجلت بأسم اسعد واني ما لفاني الخير كل يوم مشكله اكبر من الثانيه

حايره شسوي اخاف احجي ويجون عليه خاف يأذوني ويصير شيء بأبني ضليت كاعده بمكاني
بس اسمع هوستهم وصياحهم وخبصتهم ووهذا الي اسمه همام مراضي على جيتي لهنا وويكلهم امرنه ماتحدده مره خل نروح الهم ونطلع صادق من بين عيونهم شبيكم خايفييين ومترددين..
وهمه مراضين علي ويكلوله الطبخه اذا طبختهه على نار عاليه تحترك خلينه هادئين وومانستعجل لان مو بصالحنه احتمال يكتلون صادق ونخسر من الجهتين..

صادق منو ومنو خاطفه واني شدخلني ماعرف..
كضيتهه بس بجي ونوح حتى كلبي ضل يأذيني..
..
بقيت يوم كامل اني على نفس الحاله لا اكل لا شرب وضغطي يمكن هبط زحفت من مكاني ووتمددت ب الزاويه وخليت راسي على الكاع الي كلهه تراب ووصاخه..

مادري شوكت اجه الضهر وشوكت خلص وشوكت اجه الليل ووشوكت خلص لان الغرفه الي مخليني بيهن ضلمه ولا بصيص ضوه يوصلهه يادوب اكدر اتنفس بيهن
..
بوقت ماعرفه سمعت صوت اقدام جنت توني داغفه نز كلبي وبلعت ريكي صوت فر مفتاح وواضح لان سنطه ووهدوء نفتح الباب لزكت رَوحي ب الحايط واتمنى افتح الطابوكات واضم روحي بيهه.

نفتح لايت ووكبل اجه بعيني خليت ايدي علي وجهي واني احجب الضوه لان نعميت شفت خيال شعر ودشداشه ووسوارت بأيد..

ماعرفته بنيه اله لمن الضوه مله المكان ووضح كلشي تباوعلي بخبث وعيونهه كلهه شر.
ابتسمت : هنا ضامينج يعني!؟

اجيت احجي توني فتحت حلكي جان تهجم عليه تجرني من رجليه وتمددني ب الكاع نركع راسي ب الحايط صرخت واني استنجد..

رفعت شعري بأيدهه ملخته ووتضرب براسي ب الكاع بكل قوتهه احس دخت ووعيوني نحولت.
..
نفسي عالي واصرخ وهي مستمره تضرب بيه ورفعت دشداشتي تزلخ برجليه بأضافرهه لحد ما ماحسيت كام يطلع دم من رجليه ووتهلس بشعري وتصيح : كله من ورا رجلج اختي ندثرت هي واحلامهه وشرفهه ياكلاب انه الج بسيططه..

اشهك ووادفع  واتوسل بيهه : والله مالي دخل اني عفيه عوفيني فدوه..

ادليه ورجليه نترست جروح دخلن وياها ثنين بنات ونفس همجيتهه وحشيتهه طلعن روحي يدفرن بيه وويضربن راشديات واني نفسي اجه ينكطع من كد الوجع واهمس وينج عني يمه بابا تعال اخذني راح اموت بنتك راح تموت..

كامن عني ويلهثن بسرعه هاي الي اول وحده اجت ندارت صفح ووصاحت فاديه تعالي..
اني متمدديه بنصهن وماكدر ارفع راسي بس اون من الوجع...

درت عيني بهدوء وباوعت الهه واكفه بـ الباب لازكه روحهه بالحايط ووعيونهه تصب دموع وبس تباوع...

غمضت ورفعت روحي ردت اطلع من بيهن جان تخلي كف رجلهه على رجلي ووتضغط عليهه..
صحت ورجعت بمكاني..

دنكت عليه وعيونهه يطفرن شرار كضتني من ركبتي ووتحجي بفحيح: عبالج اخليج تتهنين و..

بعدهه مامكمله قاطعهه صوت : ررررررررهف

هي تغيرت ملامحهه بسرعه وكامت عني هدت ركبتي فركتهه بوجع خيل ضخم ووصوت رجولي يتقرب منه ماكدر اشوف ملامحه بسبب الضلام..

رهف : همام

: اييي ليش ماجنتي متوقعه اجي مو!

رهف : لا ليش تعال وشوف شلون جاي اخذ بثار اختي والله اله اطلع روحهه بيدي واعصرهه عصر..

قبض على ايده بعصبيه وهمس بصوت متضخم
: اخذي اخواتج واطلعي برا..

رهف : ماطلع عوفني وياها وروح..

همام الدين : كلامي ماعيده مرتين يارهف لاتخلين خبالي يطلع عليج بنص هالليل اطلعننن يله اخذي فاديه واصعدي لفوك ماريد المح طولج..

عضيت شفايفي السفليه براحه واخيرا بس بعديش بعد ما كسرني تكسر وجرن الدم مني حتى جسمي ماكدر احركه..
..
ماكدرت اباوعله واشوف شكله لان بسرعه دار وجهه وطلع وقفل الباب برطمت وسحبت روحي للحايط رجليه يوجعني وويونن عليه..

كلهن مزلخات وويجرن دن ووالكاع متربه التراب يدخل  ب جروحي يأذيني اكثر..
...
اشهك شهكه طفل وابجي بحسره ووغربه فضيعه
عطشت وومعدتي ضلت تأذيني لان مماكله شيء..

هنه عافن الايت هنا جريته واادوس بي بلكي يشتغل لان من وكع بالكاع طفه..

والحمدالله اشتغل ضليت ادور بي على انحاء المكان شفت طاسه صغيره ومليانه مي رجعلي الامل والابتسامه لا ارادياً نرسمت على محياي..

لساني ماكدر احركه كد ما نشف زحفت ليمهه ماكدر امشي رجليه يوجعني لزمتهه بين اديه الي يرجفن وشربت شويه..

عبالك سم دخل لبطني نار تجوي حاره ووطلع مي مخلينه للطيور لان بي ضروك لعبت نفسي وماكدرت اتحكم بروحي تقيأت رأساً بنفس العبه..

وبقت روحي تلعب وومعدتي تكلب اوف اوف..
زدت همي همين بس استغربت الاطيور شيجيبهن هنا..

شلت الايت وودورت ب الحيطان والسكف جان اشوف شباك صغير ومجرجفينه ووعلي حمامتين بس ميتات..

منظرهن مرعب ياربي وين مكعديني بسرداب جوه الكاع لو شنو الفيلم..ذبيت الايت بعصبيه
ووكفت على حيلي مشيت بأخر ذره قوه متبقيه عندي..

اضرب على الباب واصيح : افتحوووو الباب افتحوو معليه اني معليه الله لا يرضى عليكم دمرتوني هلكتوني..

افتحووووووو والله اندمكم افتحووووو ادك بجسمي كله على الباب واصرخ حتى بلعومي نشحط لحد ما خويت ووكعت بمكاني
...
روح

صليت الضهر وواكفه على المرايه اعدل ب الشاش مر تقريباً اسبوع قسور لا شايفيني ولا شايفته..

خلصت ووطلعت جنطتي اخذت الواجبات المتراكمه من صديقتي وكلت اقراهه لان الاسبوع الي يجي لازم ارجع للمدرسه ماريد اضيع مستقبلي..

ندك باب البيت جنت لابسه بجامه ووبدي نص ردن يوصل للگمر شلت الكتاب بأيدي ووطلعت..

فتحت الباب وتفاجئت من شفته بلعت ريكي بفرح وكلت : هلووو

ابتسم بجمود : هلا

روح : ااا ادخل

: لا مستعجل يله بدلي وتعالي

عقدت حواجبي : ها شكو؟

: نروح للمستشفى لازم تفتحين خياطج

عوزني بس جناحات وواطير معقوله هلكد مهتم بيه بحيث عايف شغله وجاي ركض عليه ماكدرت ماخفي ابتسامتي..

روح : ادخل اكعد جوه اني اتأخر ترا

دفع الباب بطرف اصبعه وودخل كعد على التخم وواني ركضت للغرفه سديت الباب ووكفت علي زفرت نفس طويل براحه من بعد هل كتل الي كتلنيا وهل اذيه الي سواهه الي ماتصورت راح يجي يوم ابتسم بسببه..

شمرت الكتاب على الجربايه ووفتحت الكنتور..
حرت شلبس بس طلعت اجمل ملابس عندي..
لبست تنوره مشمشيه كبس كلوش ووياهه تيشيرت ابيض فضفاض وعلي حزام رفيع اسود.. وكفت كدام المرايه..

خليت ايدي على خصري واتلفت يمنى يسررى لحد ما اقتنعت رشيت عطر وحمرره ورديه كحله ومسكارا واخر شيء دنكت لبست حذائي الاسود الكعب..

ووطلعت سمع صوت الكعب ولتفت عليه وهو كاعد بمكانه كام وكف وتقرب عليه : ماكتلج راح يزفونج..

رفعت طرف حاجبي : وتتوقع البس هيج بزفتي

عدلت اطراف شعري بغرور وومشيت من يمه واني اتمايل بـ الكعب فتحت باب البيت وسبقت وكفت يم سيارته بمكان الصدر هو نزل رفعت عيني علي ركض على الدرج ووكبل راح فتح السياره وركب..
..
هاي ليش مفتحلي الباب عقدت حواجبي بضوجه وفتحته وكعدت بصفه انتبه الضوجتي
: ها شو معبسه

: ماكو شيء

: ضوجج كلامي شنو

: لا عادي

ضحك بسخريه
: فيوز فيوز

باوعتله بطرف عين
..
وصلنه للمستشفى ودخلنه سوه انتضرنه يوصلنه السره ودخلت على الدكتوره كعدت على السديه وهو واكف مقابيلي ووايده بجيوبه..

ووكفت الدكتور وهي تفتح الشاش بهدوء رغم هو لا وجع ولا شيء بس متقصده عطت بوجع ووبرطمت : اخ اخ راسي دكتوره على كيفج..

َوجنت اباوعله بترقب انتضر رده فعله شفته نز ووملامحه تغيرت نزلت راسي واضحك..

الدكتوره:  ماما هو وين يوجع

روح : لا أذاني

قسور : دكتوره هاي مايعه اذا تطخيهه تتخربط

خصمت عيوني بضوجه وخزرته جان تلتف وتباوع علي بضحكه : ههههه شتصير منهه

قسور : ابن عمهه
..
فتحت الشاش واحس ارتاحيت نزلت من السديه وتمشيت على المرايه ووغرزت اديه بنص شعري ووالعب بي وواعدل بأطرافه..وفرحانه..

جان يكول : متفضينهه

باوعت اله ببرود وهمست : يلا

وكالعاده عفته وطلعت سبقته هو مادري شضل يحجي وي الدكتوره اكيد جاي يتبادلون الارقام اي لعد هو ميت عليه يجيبني للمستشفى غير يدري اكو دكتورات حلوات ابو النسوان ايع طلع مثل مؤمل..

مكتفه اديه وامشي وواحاجي بروحي ماحس غير انجر من ايدي شهكت وولتفت وجهه مكلوب احمر وعيونه بكصته من العصبيه صاح بيه
: انت بيج شيء؟ متأكده صاحيه!

: شكو

: شحاسه روحج مثلا! تفتحين الباب وتطلعين تندلين المستشفى انتِ عندج سياره؟ لو شيسموهه هاي

جريت ايدي من يمه وخنزرت
: على فكره عيني اني بغداد مدينتي واعرفهه شبر شبر هاي اولاً ثانياً مجنت ناويه اروح وحدي كلت اسبقج للسياره لان حضرتك مشغول وي البرنسس الجميله..

عقد حواجبه : شجاي تخربطين انتِ

: ماكو شيء وبعد لتصيح عليه هيج كدام الناس توني داحاول اتقبلك لتخليني اكرهك..

استغفر ووولزم كف ايدي وجرني بقوه وويركض واركض ورا ولابسه كعب احس تكطعت رجليه
..
ركبنه ب السياره واني دايره وجهي صفح ووالضوجه معلكه عندي...

قسور : ترا ماله داعي تضوجين

روح : وهيج اهمك اني؟!

قسور: لا بس ماحب اشوف شخص زعلان عليه

خليت رجل على رجل : صالحني لعد

: اها هنا الحجي

باوعتله ببأبتسامه ماكره

: وشتردين حضرتج

: والله جوعانه ممتغديه

جان يضحك بقوه ويضرب الستيرن بكف ايده كال : ويعني هسه المفروض اعزمج بمطعم..

رفعت اصبعي وأشر : وارقى واحد ببغداد

: اي عيني ادللي

لتفتت علي وابتسمت وواتنهدت براحه  ووصلنه للمطعم ونزلنه سوه لزمني ووعبرني الشارع ماطبك السياره كبال المطعم لانو ازدحام وماعدهم كراج ف ضطرينه نعبر الشارع ونخليهه بغير مكان
...
انطااني المنيو وكال اختاري الي تردينه

روح : بكيفك

قسور : اذا ترجع الي اطلب الج باچه

عفست وجهي : لا ايع

قسور : حرام لا تكولين هيج لا اخلي الممحله براسج..

روح : يعني اقصد حشى نعمة الله بس ماحبهه..
ََ..
هو اكل سمچ واني بيتزا اثناء ما داكل شفت ثنين بنات يباوعن عليه ركزت بيهن ذني اعرفهن
ب المدرسه وجانن صديقاتي قبل..

استغربت ليش هيج يباوعن عليه وويخزرن ويتهامسن خلص قسور وكام يغسل كال انتضري
اني هم خلصت ووانتضرته يجي واروح..

جان يكومن عليه وويتقربن كعدن مقابيلي على الميز

: هلو شلونج روح تتذكريني

:  هدى مو

: اي عفيه شخبارج شلونج

: الحمدلله بخير

ابتسمت : منو هذا!

عقدت حواجبي: منو قسور

رفعت طرف حاجبهه : اها اسمه قسور مبين من هذول الي بالدوله الاثكال وين لكيتي ماعنده اخ ابن عم..

بلعت ريكي كوه طلعت الحجايه من عندي
: قسور ابن عمي

: يا ههههههه لعد ومؤمل وين راح شنو انت كل اسبوع واحد بس عفيه واحد احسن من القبله..

خنزرت وصحت بصوت عالي : داكلللللج ابن عميييي ابن عمييييي موحبيبييي

هي نصدمت من صرخت بوجهه هيج واخذت الوياها وراحن بسرعه الناس كلهه تبااوع عليه بأستغراب فشلت ووبداخلي نحبست حسره..
ماراح يغيرون نظرتهم عليه لو تنطبق السما على الكاع..

اول ما دخل وكفت على حيلي ارجف وكوه مثبته رجليه دمعتي بطرف عيني : شبيج

روح : خل نروح

قسور : ليش متوتره شكو

غمضت عيوني بقله صبر ووفتحتهن برطمت ونزلت دمعتي : خل نروح عفيه..

تفاجأ تقدم عليه صار وجهه بوجهي لزمني من ثنين اديه : منو وياج احد ضايقج كولي ليش تبجين..

هزيت راسي بلا وومسحت دموعي بعدت نفسي عنه وهمست : مابيه بس تعبانه
..
هو وكف على الطاوله يدفع الحساب واني مقابيله لازمه الكرسي من ورا  اسند نفسي ومنتضرته يخلص..
..
رجعنه  نزلني يم شقتنه ووطلع بسيارته ماعرف وين فتحت الباب ودخلت شفت امي موجوده كاعده على التخم وتباوع على الباب..

: وين جنتي

ذبيت الحذاء من رجلي كارهه الدنيا كارهه العالم كله ومالي خلك احجي وهي ستلمتني..

: داحاجيج جاوبيني

: وي قسور رحنه للمستشفى فتحت الشاش والخياط

: وليش هو اخذج؟

: هو اجه واخذني شكله يعني

كامت على حيلهه : ولج رووووووح باوعيلي لا تلعبين بذيلج لا احركج وانت عايشه..

كلت بتعب: ميخالف ميخالف احركيني

هي ضلت تحجي وتصيح وتلطم واني دخلت لغرفتي نزعت الاحزام وذبيت روحي على الجربايه ابجي وواشهك لحد ما تعبت نمت بملابسي
..
لليل كعدت كلهه نايمه غسلت وجهي وطلعت..
السما ضلمه والكمر طالع باوعت للزرع كلت اروح اسگي طلعت للحوش شكلت الصونده ب البوري واروي بيهن..

سمعت صوت همس استغربت عفت الصونده ووتقربت من باب الحوش فتحته بهدوء شفت قسور كاعد ب الشارع على كرسي وبيده نركيله ويشرب ووعلى اذنه الموبايل..

اجاني فضول اعرف يحاجي منو ب ٢ بليل

قسور :ههههههههه بابا شبيج اني روحي مالحك اشوفهه ب المرايه بعد اشوف منو واني غركان ب الشغل

روح! من كل عقلج روح طفله واني جاي احاول اهتم بيهه حتى ما تنجرف وحتى اكدر احافض عليهه داحاول اصير قريب منهه..

ولو ماكدر بس عسى ولعل اكدر اخذ مكان ابوهه بحياتهه..

اششش قمر اني  كتلج سابقاً بس خل ارتب وضعي وشغلي ببغداد واجي نخطب رسمي احنه قارين الفاتحه واليحجي شكي حلكه..

ماستقر ببغداد اول وتالي عايف كلشي وجاي للبصره
..
جمانه

اسبوع مر واني على نفس حالتي بس كامو يجيبون الي اكل ومي  اعوف الصينيه على حطتهه بس من اجوع اكل لكمه اسد جوعتي بيهه..

معقوله ميردوني ليش مسألو عني تعبت من كد ما بجيت عمت حتى عيوني الضلام الي بكلبي نرسم بواقعي..

بيوم الصبح توني كاعده جنت ذابه نفسي على الكاع ونايمه صار عندي تقلصات ووجع ماكدرت اتحمل بطني كلش اذتني..

كمت اصيح اريدهم يجون راح تصير عندي ولاده متأكده اني على وجهه ولاده لان الوجع مو طبيعي رغم بعدني ب٧ شلون راح اجيب مادري..يتبع

الغلاف الجميل الي وقعت بغرامه من Shahrazat_altimimi

عشتيييي

🖤🖤🖤🖤🖤
ايزابيل