رواية لم اخلق لرجل سواك الفصل الخامس 5 - بقلم ايزابيل

#بقلم إيـزابيـل
#الفصل الثالث
# لم اخلق لرجل سواك
..
سألتني كيف تحمون حدود الوطن!
احتضنت خصرها ثم قلت لها : هكذا

..

تعليق البنيه فدشي🤣🤣

َ

..
روح

رغم ضلمه بس جانت عيونه واضحه مثل وضوح الشمس تخزر بيه..اباوع اله بعدم خوف وواحرك
شفايفي على باطن كف ايده علمود يوخره لان خنكني وكل شويه منزله عيني للمسدس الي حسيته راح يدخل بقفص صدري..

روح : شنو عجبتك الوضعيه؟

كام على حيله واني بعدني متمدده على التخم جان لابس بنطرون ووبدون قميص حط مسدسه ليوره بضهره وراح فتح الضوه انتجيت على يده القنفه من ورا ورفعت روحي..

هو تمشى على الكرسي سحب قميصه ولبسه يدكم بي ويحاجيني : شجابج بهذا الوقت؟

: ردت احجي وياك

: ب ثنتين ووتدخلين مثل الحرامي

كعد مقابيلي وسحب باكيت جكايره..

كتفت اديه : امي متقبل احاجيك

قسور ضحك بهدوء واكتافه تنرفع

  : هههههه شعجب تخافين منهه؟

: وليش حتى ماخاف

قسور :عمي امج خالسه زلم ونسوان

: لو صدك جان خلستك

قسور : لا اقصد الزلم من نوع رجل امج خيخه

باوعت اله بطرف عيني
: المهم هسه اريد احجي وياك بموضوع مهم

باوعلي من فوك ليجوه وبنظره مفصله
: احجي ام برموده طافره جايتني بنص هليل بلبسج هذا..

: معليك بلبسي

جر نفس طويل من الجكاره وهو لازمهه من نهايتهه بثنين اصابعه وورفع راسه ليفوك نفخ الدخان وصفن يستمع الي..

: اريد اعرف امي شمسويه

ضحك بسخريه : واذا كتلج راح تصدكين

: وليش خايف ماصدك تعرف نفسك راح تجذب عليه..مو

:  لو اريد اجذب جان سفطتلج من زمان واخذتج ورحت للبصره ووانت الممنونه..

باوعتله بنص عين : لا والله

جاوبني ووهو يفر راسه : اي وداعه الغالي

تنهدت : احجيلي

باوعلي ببرود : شنو تردين احجيلج؟

رفعت كتفي بمعنى ماعرف

تنهد وكال :روح انه ماريدج تكرهين امج بس بالمقابل هم ماريد تبقين يمهه..

: ليش؟  هلكد الكلام خطر

: فووك متتصورين اريدج بين اهلج وعمامج لان مالج غيرهم ووتضيعين هناك

درت وجهي صفح ووفركته بقوه ورجعت باوعت اله : وين جنت بحلم مو كعدت وتذكرت عندك بنت عم مشرده ببغداد واجيت عليه؟ عمامي الي طردو امي بيبيتييي الي تهمممممت امي وحاووولت تحركني..

عقد حواجبه: منو كال

بلعت ريكي احس بلعومي متجرح

: امي جانت دوم تحجيلي على اهل ابوي وشسوو ويانه،

ليش تخليني افتح الجروح ليش عشنه ايام تصعب على الكافر لك كمنه اللكمه نجديهه قسور اني جنت صغيره احب اكل احب العب احب البس وتمنيتهن يتوفرن بس مالكيت غير الفقر والجوع والحرمان والشماته اي شماته..

اروح للمدرسه يصير اجتماع وكلمن تجيب امهه ابوهه تفتخر بيهم اني اجيب منو؟ امي ملتهيه عني ومتعرفني بالشمس بالفي وابوي حتى ماتذكر شكله...

تمنيت واحد منكم يذكرنه يطمن حتى لو بالجذب شذكرك فهمني شذكرك لو جاي لغايه.؟

قسور : مو غايه وداعتج مو غايه  قابل انه ماعرف چا جيتي لهنا المن انه اصيرلج سند اليوم وباجر َوعكبه بس طاوعيني اعوضج عن كلشي اطلبي وويجرالج لبس اكل هدوم ماخلي شيء بنفسج..

استغربت ليش يحاجيني هيج ويباوع لعيوني بهيام وعبالك يريد يحطني بكلبه..

روح :اني ماجدي منك ولا اريد اي شيء تسلم خلي حالك ومالك الك الحمدلله مو بعازه..

نزلت راسي وواني اتذكر ايام القهر والذل الي عشناها جنه ندك بيبان الجوارين نطلب كلاص المي وننام ببيت هيكل بجوله واحد باني وعايفه  بس من يجي رمضان نكيف ونفرح لان تكوم الصواني تركع علينه من الناس الخيره َ.

لحد ما امي تزوجت هذا رجلهه قطته فلوس ووفتحت صالون ووبعدين ضربته ميه جلاق..

الدموع كامت توكع بحضني.. كام من مكانه ووكعد مقابيلي على الطبله الي بالنص دنك راسه عليه
وكال : لا تبجين

رفعت عيني واشهك بصوره موطبيعيه
: عمرك ماراح تحس بالايام العشتهه لان بالحضه الي انت كاعد ببيت ١٠٠٠ متر والدلال الباذخ والعز والاهل ووبالصيف تبرد وبالشتاء تدفى اني اكرفص بروحي جوه سكف مهدوم اضم وجهي من يجيبون النه الجيران صينيه..

بلع ريكه : دورت هواي عليج امج جانت ماتقبل تنطي عنوانهه الاحد ومانعه اي شخص يوصل النه اخبارهه روح مالكيتج غير قبل سنه وبوقتهه حتى صلاه شكر صليت..

عقدت حواجبي : قبل سنه

ذب حسره طويله ووهز راسه ب اي مسحت وجهي وودموعي ولفيت الجاكيت عليه ووكفت على حيلي  : راح اروح..

: متسمعين

: تؤ، تصبح على خير

: اجمعين عيني

كمت ووهو يمشي وراي ضله الطويل عاكس كدامي ووخطواته تلحكني وتوترني سد الباب وراي وراح
رجعت الغرفتي تسللت جانت عابره ال ٢..

ضل كلامه محفور بعقلي من كلي اني سندج اليوم وباجر ووعكبه غمضت عيوني وطرحت حسره طويله..

شكد تمنيت اسمع هاي الكلمه ووخاصا من اب او اخ او هيج شخص حنين عليه..

..
خابرني مؤمل كال فتحي كامره كتله نعسانه وجهي تعبان كال عادي لتطلعين وجهج بس جسمج..

ضليت احجي ويا لل ٤ الصبح ونمت كعدت ب السبعه دربي ما اندله وومتيهه الاول والتالي يادووب لبست ملابس المدراسه ووطلعت اركض..

نصدمت بالشارع ثنين جلاب روحي راحت ونشغت بصدمه ضليت واكفه بنص الطريق لا اقدم خطوه ولا احرك خطوه خايفه امشي وويركضون وراي..

ووالدمعه بطرف عيني خشمي كام يحركني...
وهنه يباوعون بوجهي حرت شسوي راح اتأخر على الدوام.

حسيت بي يخلي ايده على كتفي وويدفعني بهدوء ليكدام : امشي

لزك بيه ووضهري صار على صدره راسه يم اذني ووهمس كلامه وانفاسه تضرب بعضمه اذني...

همست : قسوور خايفه..

نزل ايده وعصر كف ايدي بقوه داخل اصابيعه
وصار هو من جهه الجلاب واني من الجهه الثانيه
سحبني بصفه ويمشي بثقه ولا خايف مثلي
لعد شمالني اني بلعت العافيه..

مشاني من يمهن بكل برود ولا كأنو اكو حيوان مفترس بصفه وعلى ساعه يهجم علي يباوع بعين الجلب ويمشي..

بس ابتعدنه سحبت ايدي منه ووكفت مقابيله
: شلون هيج مخفت منهم؟!

ابتسم : انه اروض حيوانات عندي بوليسي هناك بالبصره..

بعد شعري عن كتفي ببرود
: اها اي اني هم ماخاف بس هسه لان منعسه وماشوف كدامي..

ضحك بسخريه وخلى ادي بجيب بنطرونه
كال ببرود : غير تستقر يحصان الحمزه..

اجيت احجي قاطعني
: يله امشي اوصلج تأخرتي

: اني اروح

: شكد اندق من هيج شخصيات

مشيت كدامه وهو وراي جاوبته : شلون يعني

: تدرين بيه من اكول شيء اسوي ومع هذا تعاندين

: هههه احب اكسر غرورك

: يربج منيلي غرور..

: اي تكول هيج طبعا قابل تعترف

: يله صيت الغنى ولا صيت الفقر..

وصلنه للمدرسه وجنت متأخره ف هو دخل وياي جانو الطالبات واكفات اسطفاف ووانه امشي وهو صدره بكتفي ويمشي خلفي صايره هلكدوتي يمه وضخامته معكوسه كدامي بضل..

رئساً اجت المدرسه باوعتلي بحده
: ليش متأخره ومنو هذا الي وياج

جاوب بمكاني : ابن عمهه

وطلع من جيبه جنسيه ووباج باج ماعرف مال شنو بس من شافته تغيرت ملامحهه ووكالت هالمره سماح مره ثانه تتعاقين وندز على اولاياء الامور ووتشكرت من قسور لان جابني..

هاي شغيرهه هددهه لو شافت الهه شوفهه بالباج معقوله عنده نفوذ!
..
خله وراح وواني دخلت ووذني الطالبات تولني حمس اسأله منو هذا وليش تأخرتي جنتي طالعه ويا تعرفينه شمسه؟
..
جمانه

كاعده على الكرسي وومنزله راسي واتذكر قبل شهر بخطبتي من اجو ولد سلطان وبوقتهه دخل اخوي احمد يصيح كوم اسعد كوم..

كلنه نفجعنه وخاصا اني خفت يسوون اله شيء.
وكلنه تجمعنه على الشباك اني وفستاني الطويل احشك بروحي بين النسوان ووازيح بيهن بس اريد اوصل نظري الهم..

تلاثه سيارات مسطرات بالباب اول وحده جان بيهه هذا الي اسمه همام الدين شفته كاعد بالصدر وومدنك راسه يورث بجكاره..

ووالسياره الثانيه كاعد بيهه رجال جبير يطلع عمره بـ ٥٠ لابس قاط رسمي ووبيده سبحه...
عيونه مدوره وومجوفه اصلع من البدايه بس بالجوانب عنده شويه شعر..

نزل واحد كاعد بالصدر فتحله الباب وهو مد رجله بهدوء للشارع بس السياره الثالثه مشفت منو بيهه ولا لمحت احد  لان مضلله..

رجال صاحب طول فارع ووجسم متوسط وجهه
بشوش ووالسبحه مامفاركه ايده توقعته اخو همام الجبير ووفعلا طلع هيج تقرب من اسعد الي واكف وولون وجهه مسحوب كلت راح يسويهه على روحى شماله مادري.

مد ايده كف ايده الاسعد ووتصافحو ووباركله بالخطوبه وكله احنه جاييين ووطالبين الصلح واريد اعتذر الك على تصرف همام الطايش ..
وان شاء الله مابينه غير الموده والتفاهم..

هز راسه ووالابتسامه على وجههه وابو اسعد هم كعد يعتذر وويعزمه لجوه يدخل بس كال مستعجل ان شاء الله على العرس  الصدف هواي

ندار وواشر براسه لهمام بمعنى انزل ووهو صدك نزل جان لابس قميص ابيض ووبنطرون اسود ومسدس ذاك هو مبين مخلي بخصره  بس شنو يمشي ببرود وورافع راسه وعبالك كوه على نفسه جاي ووكف كدام اسعد ووجره بقوه من جتفه حضنه ودك على ضهره..

كلت راح يتقيئ الرجال مابيهه مجال شدعوه هلكد خسف ضهره ولزم وجهه .

اسعد ووجهه ضعيف وبالطول وهو لزمه بأيد وحده بس راد يجعصه باسه بوستين بخده..
وصاح : كل الخير شايف..

ووعافه وراح انتجى على سياره ببرود خلى رجل فوك رجل ومكتف ادي ويباوع على اخو  أشر للسايق الي جاي ويا راح فتح صندوق السياره ونزل ثنين طليان اثنين.

وخلوهن جوه رجل اسعد بس كال اخو همام نترخص فورا هو صعد السياره وعبالك جان منتضر الامر من اخو ووحركو تلاثتهم ماشفت بس العجاج والتراب وصوت شخطه سيارتهم..

باوعت على ام اسعد مخليه ايدهه على كلبهه وتتنفس براحه رحت رجعت المكاني،،،

ووتكول جنت خايفه يسوون شيء الابني بلعت العافيه لحد ما راحو وخطيه كعدت على التخم وورجليهه ترجف ووجابو الهه مي هي عندهه ضغط ومن اقل هبطه ينرفع
..
طلعت من ذاكرتي على صوت امي
: ها ماما هاي شلونهه شنو رأيج بيهه؟

بعد اسبوع عرسي ووجايه أجر البدلات احنه ماطولنه ب الخطبه حسب رغبتهم همه..

باوعت الهه بدله سمائيه على تركواز كلهه شغل وورادن طويله بس تول ووالصدر شويه مكشوف..

كلت خل اروح اجربهه عجبتني ووصدك دخلت جربتهه حلوه بس يحتاج الهه تخصير..
ووتقصير شويه لان حيل طويله عليه..

اني قصيره ووهاي ينراد الهه وحده طويله وومتروسه شوويه كلت الابو المحل وكال احنه نرتبهه الج..

كملنه كلشي وطلعنه جانت اختي ناي جايه وياي
تمشي وتهز بيدهه : ذوقيش هذا مو حلوه

جمانه : لا ليش حلوه

باوعت بطرف عين : شنو الحلو بيهه هسه بس يشوفج الرجال يشرد لج هو هذا اهم يوم بحياه المرأه ولازم تجذب نظر.. هسه انت ماتتذكرين شلون تيمور بيوم الحنه مالتنه تيهه حتى حلكه شكد ماطلعت حلوه اني.

جمانه : شوف الجذابه غير كضيتوهه مناطح بالاستقبال

توسعت عيونهه بصدمه : شمدريج؟

حركت اكتافي بغرور : عندي أذن اسمع بيهه حبي

ووضلت تلغي ولا انت متدرين حتى الرجال بيومهه كلي ضليت كاعد للصبح صابني ارق من جمالج واني ماخذتهه على كد عقلهه.

بس هي صدك حلوه وطلعت تخبل بالحنه مالته
بس جذابه ماكال الهه هيج تعاركو بيومهه..

وصلنه للبيت لكيت ضي موجوده وزوجهه واصف همين وتيمور كاعدين يم ابوي وهي بالهول دتوكل بأبنهه. ربعنه مقابيلهه..

ضي : ها كملتي كلشي؟

هزيت راسي بأي حجتلي على المركز الي سوت بي مكياجهه بعرسهه  وكالت روحي اله طلعني ملكه جمال.

جمانه : بله متوخرن من يمي شيقانات خبصتني هاي تصيح كام مايندل حلكه وهاي تكول طلعت ملكه جمال.

طبعا اني من جنت صغيره مالفظ حرف ال طاء
وودائما اي شخص اضوج منه اكله انت شيطان..
وبحكم مالفط ال طاء فـ تطلع شيقان.

كمت احبهه حتى من استعدل كلامي ماكدرت اكول غيرهه واموت عليهه لان تستفزهم..

تغدو يمنه وراحو بقيت اني اغسل مواعين وونفضت البيت ووصعدت للطابق الفوك همين
رهف حامل ومتكدر تشتغل على النص وخابرني
اسعد كال حضري روحج جايج.

كتله شكو ووين

اسعد :نطلع نتعشى بره

هزيت راسي بأي طبعا هو كلي من نتزوج نكعد ببيت وحدنه ببغداد مارجع للعماره وماكعد وي اهلي استغربت وكتله ليش..

كال احسن العماره كلهه ماريدهه

كلامه خلاني ادخل بفجوه تفكير واضل احسب البعيد وواحلل كلامه واحاول اطلع سبب مقنع يخلي يكرهه العماره بس!! مالكيت

نزلت كلت الامي وكالت روحي ويا صار زوجج بعد لا تستحين بدلت بنطرون ووبدي ابيض وفوكاهم ستره كابوي طويله توصل لنص الفخذ ولفيت شالي ووحطيت شويه مكياج.

واني جاي البس بالحذاء مالتي دك عليه كال اني بالباب

جمانه : متدخل

اسعد : مستعجل اذا ادخل لازم اكعد بالنص ساعه يم ابوج وجر وعر وسوالف متخلص..

شبي هذا لعد اذا هيج مستعجل شكو اجيتني هزيت ايدي وطلعت اله جان بدايه المغرب ووالسماء بدت تضلم فتحت باب الصدر ووكعدت

جمانه : السلام عليكم

باوعلي ببتسامه : وعليكم السلام شلونج

بلعت ريكي ونزلت راسي : الحمدلله

جان يقرب نفسه عليه ويلزم حنجي من جوه بأصابعه : اروح فدوه لهل خجل

درت وجهي للجامه وابتسم ووصلنه للمطعم وونزلنه سوه ايدي بأيده وعبرنه الشارع تحت انظار العالم

تعشينه ووبقينه شويه بالمطعم وبعدين طلعنه نفتر بشوارع الاعضميه ودخلنه على محلات الملابس اشترالي كم قطعه ووكلي اخذي اليعجبج.

بس استحي ولو ما هو جبرني مجان اشتريت شيء

اسعد : يعجبج تبدلين موبايلج؟

هزيت راسي ب لا : لا عادي موبايلي مابي شيء

: بله شوفينا

طلعته من الجنطه هو جان مفلش تفلش حتى الشاشه مابيهه وضوح وومن الجهتين خطوط سود.
وموديله قديم بس مقتنعه بي لان ماستخدمه هواي على كد مكالمات الرصيد..

ضحك بسخريه : مابي شيء مو تره ازعل عليج جمانه

باوعت اله وعقدت حواجبي : ليش

اسعد : من اسألج وتكليلي مابي شيء وهو روحى كامزه شنو معناتهه؟ موكلت مابينه رسميات..

ضحكت : ماريدك تكلف نفسك

سحبني بقوه وودخلنه لمحل الموبايلات كلي اختاري الموديل الي يعجبج وبطبيعه الحال حرت
ماريد أشر على شيء ويطلع غالي..

اسعد : ها؟

جمانه: ممم بكيفك

هز راسه وواختار واحد ولمن عامله للرجال وكله ٧٠٠ الف اتخبلت رصيت على ايده بقوه وهمست
: ماخذه ونبي ماخذه صدك تحجي خو انطي اقساط الذهب شدعوه هلكد غالي.

اسعد : اشش معليج بالذهب اني احير بي انجبي واخذي..

تأملته بضوجه : بس

سحب جنطتي ووحطه بيهه ماكدرت اعترض اكثر رجعنه للبيت وبالطريق جان صاير نص الليل بحدود ال ١٠ طبعا بابا خابر على  اسعد وكله تأخرتو وهو كله جايين..

دخلنه بفرع اضلم ومابي بس كم بيت ووطسات بي خطوه والثانيه : ليش دخلت منا جان طلعت من ذاك الشارع.

اسعد: تردينه ننفضح

عقدت حواجبي  : شنو!

وكف السياره بنص الشارع وسحب راسي بسرعه  ثواني وماحسيت غير شفايفه تحتضن شفايفي وويبوسني بعمق ووهدوء مخلوط ب رومانسية وومشاعر قويه خلت داخلي يرجف قريبين لدرجه مايفصل بينه غير الگير صدري يصعد وينزل بسبب لهثتي العاليه وهذا شيء جان واضح عليه..

عافني من بعد ما كادت انفاسي ان تنقطع خرب شالي وشعري طلع بلعت ريكي وانطيته ضهري واندريت على الجامه الخارجيه الصغيره..

عدلت شالي ووضميت شعري وفي حين ما طبك السياره بالباب نزلت اركض حتى بدون ماكله تصبح على خير او اتشكره..

حتى مباوعت اله بس كلت الامي اني اجيت ليضل بالج وودخلت لغرفتي بعد مطلعت منهه لثاني يوم
..
روح

كاعدين نتعشى ندك الباب بقوه خلانه ننفزع رجل امي بهاء جان توه راجع من بره وونايم على التخم دايخ باوعت الامي بأستغراب
: منوو؟
:وشعرفني روحي افتحي الباب

كمت على حيلي جنت لابسه تعلاكه وبجامه جريت الجاكيت خليته علي جتفي ورفعت شعري القصير من جوه..

فتحت الباب صار بوجهي قسور استغربت
: هااا

وجهه ميبشر بخير صاير نار عيونه بكصته وودمارات ركبته وايده مبينه دفعني من كتفي لطشني بالحايط ووركض على بهاء شاله من قميصه ووررجع ركعه بالقنفه ودنك علي يخنك
بي

وهو يرافس امي كلبت الجو كلاب تصيح وتزلخ بخدودهه : عوووووفه ولك عوووفه قسورر الم العالم عليك ووروح ابويه راح يموت..

ندار عليهه وخزرهه
: اششش اكسري حسج لا اطبكج ويا.. وتدرين بيه رجال ساقط مسقط محد يوكف بوجهي لا كونج مره ولا كونج زوجه عمي..

هي خنست بس وكفت تبجي وتعصر بأديهه ووتشيل روحهه وتركعهه بالكاع واني واكفه على الحايط منتجيه ووببرود اباوع علي..

قسور : خاب اشكك وصلتين وحصان الحمزه اطرك اثنين اخلي نص بالجنوب ونص بالشمال وواوزع لحمك ثواب..

بهاء هز راسه يمنى يسرى يريد يستوعب الصار
بس الدم يفيض من خشمه وحاجبه الي ببوكسي من قسور طبر حاجبه لان جان لابس محبس وشذرته جبيره

رفعه من ياخته لطشه بالحايط ويباوع اله. بأجرام : ابو العرك   انت يطلع منك كل هذا لك ببطل ويسكي خابط ويكطع ماشتريك الف مره نبهتك لا تندك بيه ولا تندك بالي يخصني احركك وادفنك ووانت عدل وارجع اطلع اعضامك احنطهه واشويهه واذبهه للجلاب

بهاء : شكو شمسوي شكو؟

قسور : تريد تنطي روح  الواحد كواد ابن كواد وامه مثل امك جابت نغل يفتر فوَك راسنه هااا؟! عبالك ينظم علي شيء لو تفوتني فايته..

لا وحاسم الموضوع ويريد يزوجهه بالسر..

سحبه من ياخه قميصه وجره ويا مثل الطلي ضليت مصدومه وواكفه لا اخذ ولا انطي يزوجني بالسر؟ عزا بعيني

اخذه يجر بي وكلساع ضاربه على علبته لو منطي دفره من وره ضليت مستغربه وين راح ياخذه يمه يخوف هالرجال.

على كولته ساقط مسقط نوب شلون لسان حتى بنات الملاهي ماعدهن هيج الفاظ ولسان..

طبكت الباب وباوعت الامي بتنهيده
: هذا الي ملفيته ببيتنه مو يمه يريد يستثمر براسي..

ذبيت حسره اطول من همي وودخلت للغرفه بقى بالي مشغول بقسور دخلته ودفاعه عني معقوله لهل درجه خايف عليه!

راسي يوجعني واتكلب يمنى يسرى وين اخذه هذا وين اخذه اوف تذكرت الباج والبدله العسكريه الي بغرفته واجاني الفضول بما انو هو طالع اروح استكشف من جديد..

هيج عندي فضول اعرف كولشي عن حياته وشغله يحب متزوج عنده اطفال شلوو عاش شلون كبر يعرفني قبل؟!

اي هو كال صارلي سنه من عرفت مكانج

زين وين جان وليش هسه طلع عقلي راد ينفجر اله شويه مارحت خفت يجي على غفله عود على غير يوم..

ولو هو مثل البومه الليل كله كاعد ووبالنهار نايم
لان افوت من الممر اشوف من جوه الباب ضوه البيت مشتغل..

غموضه جذبني نمت بمعجزه ثاني يوم للعصر يله اجانه بهاء مزورك مدمه عينه مورمه َوكل شوفه مابي حتى نحاجي ميحجي..
..
طفرت من الشباك بدل ونزل لبس قميص بنطرون اسود ساعه سوده ووشعره مبين مبللل.
لبست نعالي ورحت اركض طايره ووصلت ليمى وصحت : قسور قسور

جان يوكف يندار عليه يعقد حواجبه ويكول
: يربج خلستيني

ابتسمت وحضنت اديه وتقربت منه وكفت ويا طول بطول : انت محد يكدر الك اجي اني اخوفك

قسور : من ذوقج الخايس

اختفت ابتسامتي : ذوقي خايس؟

قسور : اي لان قبلتي واختاريتي تعيشين يم هيج ططوه ابن اثمنطعش ططوه

: اني مختاريت نجبرت

قسور : لج شهل عياره مو كتلج تعاي وياي وضليتي تتفيكين

روح : اجي وياك على اي اساس

غمزلي بطرف عينه :  اتزوجج وتعاي

روح : لا والله اني تالي عمري اخذ شخص مثل تفكيرك

قسور : خاب نجبي صحلهه رجل كالت اعور المهم لتدوخيني وفضيهه شتردين..

حضنت نفسي اكثر
: شسويت ب رجل ماما ووين اخذته

قسور : حطيت العوده ب*** ورفعته فلقه..

فتحت عيوني مصدومه
: صخام دهرررر صدك تحجي شنو مجرم انت شلون تسوي هيج قسور لتجذب عليه..

قسور : اششش كافي فضول امشي ولي يله أخرتيني

والتاف وانطاني ضهره زميت شفايفي بغضب..
..
وكفت يم باب ببيتنه وواباوع لبيته ناسي الباب مفتوح؟ استغليت الفرصه ووتقدمت بهدوء دفعت الباب بطرف ايدي وودخلت..

ملابسه مذبوبه على التخم والبيت يقلب يضرب
سمعت صوت بغرفه نومه اجاني الشك والفضول
ووالفار بده يلعب بعبي..

مشيت بسرعه وهمه دفرت الباب وودخلت وانصدم ب البنيه الي نايمه على الجربايه ومتغطيه ووشعرهه الطويل مغطي نص وجهه
.. يتبع
..
راح نحط هواي نجوم بوجود قسور 🤣🤣
🖤🖤🖤🖤🖤
ايزابيل