رواية لمْ تكُنْ خطيئَتُنا الفصل العشرون 20 - بقلم نورا ناصر

#لم_تكن_خطيئتنا
بارت 18

نورا ناصر

*صفا . ..
ابد ماتفاجئت من كلامها لأن اشوفه نظراته عليه ومااعيرله أي اهتمام .. فكرت يمكن فراس هو خلاصي من إسلام خايفه من عمي سليمان هوايه
اما ابويه كلمة تجيبه وكلمه تودي ..
خاف يضغطون عليه ويوافق !

بعد وهلة تفكير گتلها اي تعالو هله بيكم ..

مريم .. يعني انت موافقة صفا ..

: القرار الاول والاخير  لأهلي.

: وانت، ؟

:عادي مابيها شي فراس خوش ولد ..

: اي والله كلش قلبه طيب وحباب وشاغول
ياريت اخذ رقمج حتى نتواصل وياج واذا ردنا نجي انطيج خبر.

انطيتها رقمي وصعدت بسيارته وابد ماخليت عيني بعينه .. مااريد اثبت اله شي ولا خجلانه منه
بس الاحاسيس بداخلي محتدمه
ماجاي اعرف شنو اريد بعد لحظات من كلامي وياها تندمت
وراح فكري لإسلام وحبي اله والمشاكل وكلامه المؤؤذي .. احس نفسي غرگانه ببحر متلاطم الامواج وماادري اذا جان فراس راح ينتشلني  او لا؟
راح اگدر احبه؟!
أهلي راح يوافقون لو لاا .
. ردة فعل اسلام شون راح تكون
كل هذه اسئلة والايام الجاية كفيلة بالاجابه عنها وكلها ايام من عمري الماشفت بي راحة ..

وصلنا للبيت نزلت سلمت على البنات ..
احس نفسي فارغه من كل شي ...
احس بألم ومااعرف شنو بيه بس منزعجة من شي اعجز عن وصفه ..

قابلت رقية يم الباب جاي تنضف
ابتسامتها المعتادة البريئه المليانه حب مستقرة على وجهه.
ظلت تحجي ويايه بالاشارة
-راح تعطلون يعني اليوم اخر يوم هسه اكدر اتزوج؟

-اي خلصنا حتى تجهزين ملابس وذهب وكل شي ونوب تتزوجين.

-انت تروحين وياي؟ اريدج وياي انه يعجبني ذوقج استحي من فاطمة وعمه زينب انت تعرفين شنو أريد.
- اي اروح وياج شعندي غيرج جم رقية عندي يلله دخلي جوه الشمس قويه اليوم وانت وراج عرس،لاتتأذى بشرتج.

- شمس شتاء هاي دافية بس اغسل التواليت البرة وادخل.

- براحتج حياتي.

* سمية..
كل مره اشوفه وأحجي ويا احس بسعادة مفرطة انسى كل شي ويبقى بس الفرح  احساسي الوحيد.
انسى الهم والالم والندم الي مرافقني من يوم فتنت على امي ..

بدلت ملابسي وتمددت على ظهري
عيوني مفتوحات على السگف والابتسامه ممفارگه محياي
واتذكر نظراته الي.

اتمنى اعرف احساسه من يباوعلي ياتره اكو الي نصيب  بمشاعره او حتى  اعجاب.
شعور الي بداخلي تجاهه ينسيني امه وينسيني كل الحواجز الي بينه.

تجيني حالات اخاف اسأل نفسي احبه؟ لو بعد؟ وارجع واتذكر اول يوم اللتتقيت بي اتمنى ارجع اله واعرف احساسي من اول يوم.

ماحسيت بشي الا وصفا على راسي

صفا: شبيج مو جاي احجي وياج وين سرحانه؟

: ها اي شنو ولج شحجيتي؟

: اليوم انخطبت ..

.. تحركت من مكاني رفعت نفسي للاعلى سندت جسمي بعكوسي الاثنين متفاجأه شنووو انخطبتي والله عمي زين
ناس تنخطب مرتين خلال شهر وناس ولامره بخخخت. ..

: حتى على هاي حاسدتني الي يسمعج انه فرحانه طايرة من السعادة محلقة فوگ الغيوم ..

: ليش ولج ومنو هذا الي خطبج عندج وياا شي؟

: شبيج سميه شنو هااي الاسئلة وشهالنظرة هايه الي ليسمع هيج تحجين يگول انه يوميه وي واحد هو بس اسلام ..

: لعد هذا منو سعيد الحظ ..

: فراس ابو الخط  مالة الكلية ..

: هااا اي هو كلمج شنو گال .. ؟

: مو هو اخته ..

: وهو مايتكلم وياج؟

: لا وعلى شنو يتكلم   ماعندي شي ويا والكروة انطيها لأخته بس هذاك اليوم من رحت لأمي گتله يوصلني للصالون ..
اطمئني اذا عندي شي ويا راح اگول الج ..

سميه .. تكلمت وي نفسي اي صحيح صفا ماتخبي عني شي كل شي تگول ..
بس انه ماگول الها اي شي ..

اي صفا وانت موافقة؟شنو گلتي لأخته؟
: گتلها تعاي هلا بيكم ..

: انت مقتنعه بي ..

: خوش ولد ماشفت عليه شي موزين ..

: وخاصة هو شايفج ومقتنع بيج اقصد لبسج ومكياجج الاوڤر ..

: وانه هم فكرت هيج ..

: اي وشمدريج اسلام مايسويلج مصيبة وياخذج غصب؟ !

: ابوي ماراح يجبرني وهمين هو ضايج منهم لان كل واحد بيت وماتنازلوا النا عن هذا البيت اكيد ماراح ينطيهم وثالثاً فراس ابن منطقتنا ويعرفوا وبيبيتي تعرف أهله خوش ناس وماعدهم أذيه على احد وسمعتهم زينه والولد شاغول وماعنده سوالف مكسرة.
واذا على اسلام يحلم حلم ابليس بالجنة ارضى بي والله.

: هه وين راح الحب وين راحت المخابرات النص الليل خطيه من البداية ليش أملتي بيج ونطيتي مجال.

: شوفي من هيج مااريد احجيلج كل شي لان تحرگين دمي وتذبين اللوم بيه.

: جا بيمن اذب الصوج ابيبيتي خما ابيبيتي.

: اگووم ابدل احسن الي ولا حرگاااان الاعصاب هذااا

: گومي حسرة على واحد يحجي وياج كلمة اذا ماطنگرتي . 

بهذه الفترة اللتهينا بتجهيز رقية
كلما يقترب يوم زواجها يقلبي ينغزني وانقهر وابجي وحدي ..
صفا ... بنفس الاسبوع الي راح يتم بي زواج رقية
خابرتني مريم گالت راح نجي
كلتلها هلا بيكم ..
انطينا خبر لأبوي وبيبيتي
بما انو ابوي يعرفهم گال خلي يجون.
يوم ثاني تحضرت وبقيت انتظرهم
بس احس نفسي بدون مشاعر
لافرح ولاحزن ابد بس خايفة من ردة فعل إسلام

اجو امه واخواته اثنين الي عرفت عنهم متزوجات ..
ومريم الي ويايه بالخط ..
من دخلت عليهم امه گالت شون حلو ذوق وليدي.
بيبيتي تعرف امه ودگ سوالف .. 
طلعوا گالوا ننتظر موافقتكم ..
احنه البنيه رايدينها ..

سمية ..
طلعت صفا من الديوانية لابسة فستان تركوازي لف على الصدر و كلوش من جوه الخصر ورداناته طوال.
باوعتلها وجهه مايخلوا من الحزن ..
: هاا شنوو گالوا.
: ينتظرون موافقة ابوي يكولون رايديني هم ..
: يعني انت موافقة؟مقتنعه؟ متاكدة من نفسج!
: اي موفقة اريد اخلص منا.
: ومنو يگول هذا الزواج بي خلاصج؟
: ماادري سمية اريد اتزووج واخلص ..
: راح تتزوجن اثنينجن وابقى وحدي انوب شغل البيت كله عليه انه وين بيه علي بعد شوي وابجي.
: يعني ماهامج غير شغل البيت احنا خواتج ماهامينج امداج اي والله.
: لا بالعكس والله ضوجة كلش بدونجن شون ياربي انتظرني اتزوج وتالي تزوجن حتى نطلع كلنا سوا.
: هههه امنيتي اعرف منو الي راح تتزوجينه
: انه هم هههههه. 

بعد زواج رقية نرد الهم اذا كنا موافقين او لا .. لازم اشوور أهلي بالموضوع وإلا هو الولد خوش ولد واهله ناس طيبين.
هذا مجمل كلام الوالد ..

بيبي .. يمه واسلام موخطيه رايح ياي يريدها وانتوا ترفضونه يمه ايوب گلولهم ابن عمها يريدها وفضت راحت.

أيوب .. يمه شتحجين انت ترديني اجبرها حتى يومين وتجيني زعلانة اذا مامتوالمين شسويلهم ماكو قسمة.

... ليش يمه تظلم هاليتيم هذا مو ابن اخوك وشاريها لامره ولامرتين يجي يدك بابك رايدها وماناقصة شي هم رجال وشاغول وماعنده سوالف مكسرة.

سميه .. بيبي ماتريدة هيه گوه!

.. وشماله ماتريده شهالعيارة هاااي بعد. ..

... اووو شيفهمج انت.

ايوب ... هذا الموضوع يتأجل لبعد عرس رقية مااريد احد يحجي بي.

ام أيوب .. والله اذا ماصارت صفا لإسلام فلا اگعد عدكم بعد ..

سميه .. بيبي ابوي جاي يگلج الموضوع هذا يتأجل وره عرس رقية لاتخربين العرس خلينه نفرح بيها ..

: انه اخرب عرسها ياطايحة الحظ شبيج ماتعرفين تحجين.

ايوب بعصبية.. سمميه سدي المووضوع گلت وروحي طبي جوه. ..

سميه .. صار يابه ..
دخلت يم صفا ورقية .. جاي يرتبن اغراض رقية بالجنط حتى ينقلوها لبيت زوجها.
صحت صفا ..بيبيتي تكول اذا ماصارت صفا لاسلام ماابقى يمكم بعد!

: اي وشنو يعني؟

: يعني اعقليها اذا طلعت بيبيتي منا معناها راح يطالبون بحصصهم بالبيت هذا واحنه وين نروح راح نبقى بس انه وابوي انتن راح تتزوجن مااعرف شون راح ندبرهاا.

: كله منه ابوي لو ظال على وضيفته وراتبها زين ليش  مافكر قبل لا يطلع منها زين مايگدر يشتري ارض ويبنيها؟

: وين يگدر هو البنيان شويه شويتين ماتگليلي هسه بيبيتي حرام عليها هيج تسوي بينه والله.
ماتفكر ماتكول هذا ابني وين يروح.

: لاابد اكيد ماتفكر ..

رقية .. شافت ملامح اخواتها تغيرت صارت كلها توتر وحزن أشرت لصفا شكوو؟ !

مو وقتها يكدرون عليها ويخربون فرحتها
گالن الها ماكو شي لايظل بالج ..

بيوم حنة رقية.  
عزمنا الكل اقاربنا والجيران سوينه الها حنه بالبيت ..
قبلها وديناها للصالون ..
بالبيت لبست 3 بدلات
ماروني مدنفشه  وصفرة قصيره هم مدنفشه وبنفسجيه گصة الحورية ..
تونسنه ورگصنه
سمية .. اجت اشواق وبناتها ماسلمت عليها ماتهمني ومااحب اتلوگ واجامل اكبر راس مايهمني حتى لو عجبني ابنها مومعناها ابدي اتلوگ لا ..
طول الحفل تباوعني ..
دخلت للمطبخ اجيب الصينية الي بيها شموع وحنة وياس وچكليت .. حتى نبدي نحني رقية
ومن عوايدنه الي تريد تتزوج او متأخره قسمتها
تحني من هاي الحنه وتجيها القسمه مجرد عادات بالية!
شفتها اشواق بالمطبخ تخابر زوجها ..
ختمتها ويا بينما جاي احضر الصينيه
باوعتني .. بنظرات قويه
.. انت لشوكت ماتحترميني وتسلمين عليه سميه خاتون ..

عفت كل شي بيدي وباوعت الهاا
گتلها انه اذا سلمت عليج اعرف شراح يصير راح تفشليني گدام الكل وانا مااحب اتفشل.
رفعت تك حاجب حدقت بوجهي بغضب وطلعت من الهول.
اخذت الصينيه ورحت للهول
وبدينا مراسيم الحنة ..
صفا ..
صاحتني إيناس تعالي احجي وياج شويه
عرفت شنو تريد مني.
گلتلها ادري شنو تريدين انوسة انه واخوج بعد خلص انتهى كل شي بيناتنه ..

ايناس .. ليش هيج مو هو والله يحبچ وكل هالفتره هاي باقي بدون زواج رغم هو ماعنده شي دراسة وكمل تعيين واتعيين  بس ينتظرج.

.. قهرتني بس بعدني مصرة .. گتلها مااكدر ايناس احنه مامناسبيين لبعض اسلام يريدلي وحده مومثل وضعي الحياة راح تكون مملة ويا مااكدر اعيش ويا يضرب ويغلط ويعيرني بامي وسوايتها ويشبهني بيها معقد متخلف ماينحمل اعذريني مااكدر اتخذت قرار.

عفتها وكملت الحفلة .. اليوم ردت بس افرح ومااريد يكدر عليه شي بس ايناس ذكرتني بي ضجت كلش.

ونظرات هجران عليه طول فترة كلامي ويا ايناس.
بلشوا الناس يرحون بقوا بس بيت عمه اشواق لان بيتهم بعيد.
اشواق .. رجوان ماما اتصلتي بأمان يجي علينا لو اتصل بي ..

رجوان .. اي ماما اتصلت بي كال فد عشرة دقايق يمكم.
زكية .. يمه أشواق وين رايحه ظلي تعشي هنا.

اشواق "بتكبر" .. لا يمه اريد اروح نتعشا بتايم سكوير
سمية .. هجم بيت الفخفخه وشبينا ماتتعشى يمنه  كون هسه اسويلهه عشه اگلي بيذنجان احرگه حرگ وبتيته اسويها ثخينه جنها مخده اگليها ومااستوها عدل اخليهه نص ستاو
واخليها گدامها تاكل شرط نص ساعه تظطر تگللهم ودوني المستشفى  التعليمي.

صفا ... ههههه لاتسمعج سكتي ومنو يگول تاكل منه؟ !
.. لا تاكل تاكل هسه بالها يم الاكل ولايبين عليها شون مهتمة برشاقتها.
تذكرت كلام رجوان كالت بعد 10 دقايق يوصل امان
استرسلت رجليه واخدتني لباب الهول
طلعت وخليت الكل جوه وسديت الباب ..
وقت مغرب .. سمعت صوت سيارة وكفت يم باب بيتنه
لبدت وره شجرة اليوكاللبتس .. شفته فتح الباب ودخل صحت عليه على كيفك مو كسرت بابنه من الدك ..
اللتفتت عليه متفاجأ بصوتي ..
بقيت واكفه بمكاني ..
تقرب مني .. يحدق بوجهي ..
گال هو هذا هم باب بابكم بس نفخت عليه انفتح.

تخصر يباوعلي بحيرة في حين ابتسامتي مافارگت وجهي ..
تقرب مني اكثر رجعت للخلف ..
بهدوء گال خو ماتعاركتي ويا أُمي؟ !
بعدها عيوني بعيونه ..
گتله تعاركت
فتح عيونه
ضحكت انه گتله اله شويه جانت تعاركت وياها.

.. ادري بيج ماتگعدين راحة انت.
يريد يدخل
گتله .. ابكيفي ..
رجع گرصني بمعصم ايدي ..
ودار ضربته بقبضة إيدي على كتفه من وره
رجع لزم ايدي الي ضربته بيها وهي على حطتها مسدوده ايده دافية حيل كالعادة
رفع حواجبه گال هاا تردين اكسرها الج موتگولين بعده ماجابته امه الي يكسرها جابته وهذا هو مقابيلج.

سحبت ايدي : لا ماگول هيج هالمره بس الي يكسرها اكسرله راسه.
ضحك وعلى ضحكته ضحكت اني ..

سمعت صوت امه تصيحله أمان
غمضت عيوني .. ندبت حضي خرب انفضحت ..
راح يم امه وانه رفعت فستاني من طرف واحد
وركض للمطبخ ..
استقريت بمكان واحد ..
شافتني اشواق شراح تگول عليه هسه
يوو عادي بنت خاله وجاي يشاقه وياها قابل شنو؟

فتت للهول رايحين كلهم
باقيين بس عمه زينب وامل جنتها ..

بيبي كاعدة بصف رقية هي وبدلتها

أمل .. يابنات علمتن اختجن الي راح يصير بليلة العرس لو لا ..

سمية .. واحنه شمدرينه شراح يصير ؟قابل مجربين

أمل .. والله بنات هالوكت كل شي يعرفن

زينب .. يلله بنات علموها رقية خطيه لاتروح تنصدم.

سميه .. هاي مهمتج صفا ..

صفا .. هو شكم رقيه عندي والله متعودة عليها شون راح افارقها ..

امل .. عندج سميه بقت ..

صفا .. سميه مو مثل رقيه اربع وعشرين ساعة تعاركني.

سمية .. من سوالفج العوجة اگول تعلمي وعلمي رقية وانت ساكتة انه هم راح اشتاق الرقية.

صفا .. علمت رقيه مثلما كلولي عمه زينب وامل
ظلت تبجي نامت بحضني اشرتلي اريدج وياي باجر بالصالون عفية ..
استحي ومحد يفهمني اريد اطلع حلوه هاي ليلتي.

طمنتها وكلت الها راح اروح وياج ..

سمية .. بالليل راسلني امان فرحت من شفت المسج.

.. ليش ايدج دائما باردة ثلجتيني

.. شمدريني المهم امك شافتني اشاقة وياك؟

.. اي شافتنه ليش تسألين ؟

.. شنو گالت ؟

.. ليش تردين تعرفين؟

.. فضوول.

.. مااگلج

.. ليش تصير خبيث

..مو بخباثج

.. گوول لااحضرك.

.. وحضريني وشنو يعني؟

.. انه اگول ماگالت شي لان عادي بنت خالك وجاي تتشاقه وياها مو صح.

.. لاء مووصح

.. تبط الچبد مووتتتني.
مااقبل يگوولي شنوو گالت امه بقينه نسولف هواي عرفت عنه عمره 25 سنه خريج كلية لغات قسم انكليزي .. هواي حجينه مره يقصفني مره يحشش مره يطنگر الحديث ويا اكثر من ممتع
باوعت صارت الساعه 2 بالليل
ورانا گعدة من الصبح باجر عرس رقية ..
سديته بدون ماگوله تصبح على خير

الصبح كوه كعدت صفا فرغت كوب كامل على وجهي يلله صحصحت ..
اول مااكعدت اخذت تليفوني فتحته
كاتبلي انت عديمة ذوق ماتعرفين تگولين تصبح على خير يلله تسدينه ..
ضحكت وماجاوبته گمت شكلت وبديت اشتغل.

صفا ورقية بدلن وابوي ينتظرهن حتى يروحن للصالون.
صفا .. دخلنا على ابوي باللهول گتله يلله يابه خلصنه
باوع لرقية وعيونه مدمعه ...
حضنها وبوسها على راسها الله يسعدج بنيتي گال الهاا.
كلنا طگينه بجي حتى بيبيتي ويانا
سميه ..سمعتهم يبجون طليت  عليهم وانه بالممر
دموعي ظلت تجري شلال على خدودي
ركضت للغرفه ابجي وحدي ..
خابرتني امي تسأل عنها
بعد الي صار بحفلتها ماتگدر تجي ..
العصر جابوها هي والبدله البيضة
تجنن مثل اللعابة . .. ابوي كل شويه يدخل يبوسها گدام النسوان ويطلع ودمعته معلگه برمشه ..
اجو عليها اخذوها من بيتنا وهي تبجي واحنه نبجي
وابويه ودعها  بالبجي ..

رحنا وياها وبعد الزفه رجعنه والبيت فارغ ومهووس اباوع الشفاطه مامتحركه من مكانها المكناسه
لو هي هنا ميبقى دقيقة مهووس.
گوه علينه گمنه انضف وهم نبجي
ولا واحد اكل حتى ابوي وبيبيتي.

رقية الفتاة البريئة النضيفة من الداخل والبرة
دخلوها لغرفتها نزلوا الاكليل على وجهه
بقت واكفه يحركونها هما
خلوا بايدينها الشمع وهو مشعولة بي النار
وجهه لباب الغرفة ..
اخته مقابيلها تصورها لحتى يبقى ذكرى
دخل مناضل للغرفه وهو يشوف انثئ ابدع الرحمن بخلقها عروسة جميلة بمعنى الكلمه طفلة ببدلة عرس صماء مايعيبها بس الكلام طفى الشموع الي بايديها وخر الاكليل عن وجهه بوسها من راسها
گعدوهم على السرير
لزم ايديها الناعمة الصغيرة
نقل الحلقة من اليمين لليسار

الكل طلع وعافوهم وحدهم ..

ابتسم بلهفه وهو يگعد وراها وينظر الرقبته الطويله البيضه مثل بشرة الاطفال حط ايده الخشنه على كتفها
عاطت ... انصدم منها وهو يبعد ايده بحيرة
ماعرف تصرفها هل هو خووف منه او منقرفه منه.

حطت ايدها علئ كتفها وهي تمسح عليه
باوعلها يتأملها شاف احتصار الدم من خيط البدله ومااخذ اثر ابتسم وعرف سر عيطتها متوجعه من خيط البدله شاداته بقووه الها حاصرات الدم وكتفها ازرك
تقرب منها خله شفايفه باس كتفها بحنيه وهو يحاول يفتح الخيط
ابتعدت خجلانه منه لكن هو قيدها بذراعه ويباوع لعيونها
حطت ايدها على صدره وهي تبعده عنها وتبتسم خجلانه
لزم اديها ثنينهن وهو يقربها عليه باوعتله بخجل وابتسمت
باسها بشفايفها وهي رمشت مصدومه ومتفاجئه شئ غريب عليها دفعته وابتعدت هو بايسها بس اليوم البوسه غريبه عجيبه.
تكلم وياها وهو حاب يطمنها ويستدرجها وهي كانت تبتسم بوجه بدون ماتفهم شي حس نفسه مثل مذيع وكاتمين صوته
اشر علئ نفسه بمعنى انا وعكف اصابعه وهو يسويهن علئ شكل قلب الحب❤
معناها انه احبج
هزت راسها وهي تحشر بصوتها....اابببه
ماعرف هي افتهمت حركته لو هيج تنهد بضيق هسه لو بس كلمة
يالله احسن من باقي النسوان بس،يلعلعن ههه
بس كون ما تطلع مثل ام سرى صوتها يجيب التايهه
وكت ام سرى هسه خلينه بالعسل العندي
تقرب اكثر وهو يقبلها وهي تتهرب منه
وهو يتقرب اكثر فتح سحاب بدلتها
دفعته بخووف و بدلع...ابببا
لزمها بقووه وهو يهمس بااذانها ولو هي ماتفهمه...احترك ابو ابببا لج احترك ابو ابوي كل شي بيج حلو
استسلمت اله لان هي لا حول ولا قوه وهو يعرف شنو يريد يريدها زوجه فعليه يريد يقضي ايام حرمانه صارله اشهر محروم من اللحم الابيض واجته رقيه حاضرة
ماتركها اله اخذ كل حقوقه منها وترك بكل جسمها اثر يدل على ملكيته الها

سمية .. بعد زواج رقية البيت فاهي وانا وصفا عركة على التنضيف.

اما علاقتي بأمان هالفترة تطورت صرنا نحجي عن نفسنا اكثر عن احلامنا طموحاتنا
مو كله قصف وتحشيش
بكل لحظة احجي ويا اتعلق بي
بكل مره يكلي باي او تصبحين على خير او مع السلامه اضوج مااريد اتوقف عن الكلام ويا
اجت اوقات اكره نفسي بيها.
كرهت نفسي لعد انا شگد متناقضة جنت شكد احجي على صفا واگول الها علاقتج باسلام خطأ وهسه ناسية نفسي وي امان
على الاقل اسلام ماكو حاجز بيناتهم غير تصرفاتها الا انه كوومه حواجز بينه تمنع ارتباطنا

باول جمعة بعد زواج رقية قرر أبوي يعزمها هي واهل مناضل
بالاضافة الى اهله
عمي وعائلته  عمتي وعائلتها واسلام وامه
وبعد مايطلعون مناضل واهله
راح يفاتحهم بموضوع خطبة فراس لصفا وياخذ رأيهم ويشاورهم بالموضوع ..
گعدنا من الصبح حضرنا كل شي
ابوي اتولى مهمة شوي السمك على النار
واحنا جوه بالمطبخ نكمل باقي التحضيرات.
لحد لساعة ب11:00 كملنا كل شي
اجت رقيه واحنه مانعرف نبجي لو نضحك
دموعنا على الخدود تجري
حبيبتي متغير شكلها وصايرة مرة حلوه وتجنن
تشكلت وتشتغل ويانه
يمعوده عروسة انت كعدي وسكتي ماتقبل.

كل المعزومين حاضرين ..

بس بعد هاللمه مانعرف شراح يصير
ابتسامات امان ونظراته الدافيه مااكدر افسرها احس نفسي غبية تجاهها
عكس نظرات رضوان القاتله ..
اباوع لرضوان وبيبيتي يتبسبسون ماتجوز من سوالفك رضوان اكيد ناويله على نية.

وقت غدا وجاي نحضر احنا انا وصفا  بالمطبخ
امل وايناس  يرحن يخلن الاكل بالسفرة ويرتبنها
وبنات اشواق گاعدات يم امهن 

بيبيتي ورضوان واكفين يم الكاونتر
يضحكون ويسولفون.
دخل امان للمطبخ شايل بيده السمجه من بره ابوي يشويهن بالحديقه الخلفيه الي ورة البيت
نسيت نفسي وابتسمت اله
وهو هم ابتسم ..

بيبي .. رضوان يمه يمته تتزوج حتى افرح بيك واشوف خلفتك بلكي تصير عندك بنيه تشبه امك واشوفها واحس شايفه ابنيتي الله يرحمها.

رضوان .. گوليلها لبنت ابنج سمية شگد صارلي انتظرها مو سنتين يمته تحن عليه .؟

يتبع
اعتذر على التاخير ❤

اليوم اشكر صديقتي الكاتبة المبدعة Smoo-1997
على مساعدتي. 💋