رواية لمْ تكُنْ خطيئَتُنا الفصل الحادي والعشرون 21 - بقلم نورا ناصر

يسعد مسائكم احبابي
#لم_تكن_خطيئتنا
بارت 19

نورا ناصر.

سمية انداريت على رضوان بغضب باوعت لامان
واگف مصدوم انطاني السمجه الي بأيده
وطلع من باب المطبخ الي يطل  ع الحديقة

رجعت باوعت لرضوان .. يباوعلي بنظرة انتصار

كملت كلامها بيبيتي گالت الله يحنن گلبها عليك ويحنن گلب فد وحده على فد واحد
" تقصد على صفا "
تحسرت صفا بانزعاج

صيحت بوجه رضوان انت شنوووو ماتملللل
طختني صفا ولج صوتج منا خطار.

تقرب مني :سبيج عصبتي
غمز بعين ورفع تك حاجب العين الثانية.

نفسي صار يصعد وينزل بقوة «نتيجة غضب اجتاح روحي بلحظة ..

كمل كلامه گال لان هالحجي صار گدامه
ويأشر على الباب الي طلع منه امان

انصدمت صحت بوجهه مرة ثانية
انت تخبلت شبيك لا والله انت مو صاحي اكيد موصاحي.

رضوان .. تحبين نكمل هنااااا؟!!!!!

درت وجهي على صفا وبيبيتي واگفات ومتفاجآت
خاصة صفا نظراتها غريبة ..

دخلت امل ووراها ايناس ..
سوالي اشارة بعينه ووميل وجهه معناهه اتبعيني ..

طلع وبعد لحظات فزيت من صفنتي طلعت وراه
امشي وادور بعيوني على امان
هواي اسئلة
ياترى شنو قصده رضوان من سوا هيج؟
امان شنو ردة فعله .. شنو احساسه
يعرف بخطبة رضوان الي من قبل لو لا ..،!!!،؟

رضوان وكف بصف الدرج واللتفتلي
واكف بحزم وثبات .. ومتخصر
وصلت اله وگفت يمه
باوعتله بعصبية
شتقصد من كلامك هذاااا هااااه! !!

نصى راسه قرب وجهه عليه
گال يا كلام منهم الي صار گدام أمان؟

باوعتله بأشمئزاز .. لااا الي صار گدام صفا وبيبيتي شتقصد اريد توضيح هسه فهمني ..

الي سويته من اجلج حتى لا يأذيج هذا الحقير

من گال حقير تمنيت اگله مااسمح الك تحجي عليه بس ماالـي حق ..
بس گتله ليش حقير لأن انت اخذت منه اهله لو اخذت حبيبته لو ليش فهمني.

---جيد كلامج هذا اكبر دليل و لاتنكرين وتكولين مابيني وبينه سي
نظراتكم ابتساماتكم مو خاليه ابد
توصلني اخبار توكفون بالساعات يم باب الكلية تسولفون لاتگوولين عادي وانا منبهج متسمعين كلام
تدرين بيه اتجنب اتواجد ويا بنفس المكان بس اليوم لا اجيت حتى انقذج منه.

-- هه ضحكتني .. تنقذني؟ ؟؟؟؟

--- تدرين سغله سميه  جاي احاول اداوي روحي من حبج اتجنبج ازيحج من فكري بس صعب عليه تصوري حتى فيس ماجاي افتح حتى لااسوف حسابج واتأذى كل سي يخصج اريد ابعدج عن طريقي اقلل من جياتي لهنا حتى اشوف بيبيتي او احاول اجي وانت بالدوام بس الجية هنا تدمرني بس ادخل احس اسم ريحتج واتعذب.
وصلني خبر هو مايعرف بموضوع خطبتنا
الي سويته اليوم  الج علمودج اذا استمر بعلاقته وياج بعد ماسمع هالكلام احذرج منه.

سمية .. باوعتله وعلى شفتي انرسمت ابتسامة استفزازيه گتله خلصت؟ تره انه ماينخاف عليه مامحتاجة تحذيرك.

--- اعرف ماينخاف عليج بس الحذر واجب
كل مرة تصدميني بيج اكثر انت جريئة سمية سون غامرتي بهيج علاقة خطرة يعني نسيتي امي وعلاقتكم المحترمه انت وياها
وشدد على كلمة محترمه ..
هاا وخلي اگولج سغلة تره امان مو سهل.

بعدت نظراتي عنه ..
ظل ىهمس قريب اذني بس احس همساته بيها قهر.
---لو الحب عمى عيونج وحتى قلبج وجميع حواسج.

نترت بي مايخصك ..
-- اخخخ گلبي مال حرگ والله انه گلبي عليج وانت قاسية اقسى من الحجر نفسه.

---شتريد مني رضوان شتريد بس فهمني
أملتك بيه انه؟ ؟ انطيتك وعد اصير الك ؟ ؟ تعرف كلش زين من وافقت عليك جان عليه ضغط ومااكدرت ارفض لابوي طلب بعد شكووو هسه شكووو.

-- ماااكو سي انه اعتذر اذا خربت عليج حبج.

-- شبيك انت صدگ مو صاحي ..

-- باااي.

راح وطلع من البيت حتى ماابقى على الغدا.

اما امان اخخ امان بعد ماباوع بوجهي
ماعرف شنو من نضرة اخذ عليه
اباوعله مايستجيب لنظراتي المتوسلة
انقلب 180درجة ... احسه مصدوم
تعمدت صبيت الجاي ووديته
انطيت للكل ومن وصلت اله اخذ الاستكانة بدون ماحتى يباوعلي
اباوعله متوتر بگعدته على القنفة يحرك باصابعه
بسرعة ويتنهد بانزعاج ..
بعد الغدا وشرب الشاي اخذ اخواته  بقت بس امه .
طلعوا من باب اللهول .
وانه اطل عليهم من باب المطبخ بحزن
ركزت عليه واشوفه شلونه يعاملهن بحنية يشاقيهن بمرح وحب .. تمنيت انه بمكانهم على الاقل اكون قريبة منه ..
هم طلعوا وانه بقيت واگفه بمكاني متمسكه بالباب حزينه اتمنى اعرف ليش هيج تصرف وياي.
فزيت على صوت ضحكة صفا وبعدها صاحتني
سمية سمية ..
اللتفتت عليها
كاعده على الكرسي وبصفها رقية
جاوبتها هاا شبيج
صفا:  تعااي شوفي رقية شنو تريد ..
تقدمت خطوات وصرت قريبة عليهم
جريت كرسي وكعدت وبحسره گلت شنوو؟

-- ولج تريد ملابس نوم جديدة.

-- هه شلهه بيهن مو اشترت من جهزت ..

-- تريد بعد تگوول مناضل يحب اللون الاحمر والاسود وانوب يريد شعرها اصفر بعد اكثر مو بس هيج خصل.

-- اي وخلي تحط عدسات زرگ حتى تصيرله كاميرون دياز مكافح افندي ..

-- شبيج ماعاجبج العجب خليهم يتونسون عرسان جدد.
وبعدين تعاي انت شبيج وشنو سالفة أمان والحجي الي گاله رضوان ..
-- ماكو شي لاتخلين بالج.
-- لا اشو اله تگليلي انه مو كلشي اگلج شنو بينج وبين امان شفته اكثر من مره عينه عليج
وانت تبتسمين اله.
-- وشنو يعني واذا ابتسمت اله معناها عندي شي ويا.
-- بس ابتسامة عن ابتسامة تفرق!
-- اي ماشاءالله عاد انت خبرة بهالامور .. شوفي رقية شبيها شتگوول.
-- تريد تعرف عن شنو جاي نحجي؟ 
-- گليلها راح نوصيلج على هدوم نوم وهي تسكت.
كمت من يمهم  البيت بعده هوسه
اريد اعتزل عن العالم كله مااريد اسمع صوت ولانفس ولاابد.
ماتوقعت حبي اله راح يتحول بهالقوة
شون ضعفت هيج  

شون تعذبت وتألمت لان صد نظراتي اله ..
لزمت التليفون .. باوعت للساعة
طلعوا من ربع ساعة تقريبا باوعت لمحادثتنه اخر مره وحده من الرسايل كاتبتله ضايجة
رد عليه .. احجي على امي بلكي ترتاحيين.
رديت ..  اي والله الحجي على امك راحة نفسية
.. جربي تحجين عليها واشوفج الراحة النفسية على اصولها ..
.. والله اذا اريد احجي عليها ماخايفة منك.
.. مايصير هيج سمية راح يحجون عليج حجي محلو.
.. مايهمني المهم ادافع عن نفسي اهم شي متضل حجاية  ماحجيتها واضل اكل بروحي
احب افرغ كل مابجعبتي وضميري مرتاح ولساني ماعليه كلمه مانحجت عبالك بيانات انزل من دماغي للساني اوجه للمقابل.
.. منين يطفوووج انت؟ ؟
سميه من حقج تدافعين عن نفسج اني وياج بهالحاله
بس اكو فرق بين ان تكونين وقحة ولسانج طويل على الفاضي
وبين تدافعين عن نفسج بجرئه وذكاء بحيث تخلين المقابل ماينسى كلامج طول عمره.

.. وانت شون تشوفيني منو منهم .. ؟
.. بين هاي وبين هااي ..
.. بالحالتين مراح اعجب امك وباي طريقة هيه تكرهني ..
.. بس الاحترام واجب صح؟
.. صحيح.
.. باجر جايين راح تسلمين عليها؟
.. خاف تفشلني وماترد عليه وانه مااحب اتفشل.

.. محد منه يحب يتفشل بس من باب الاحترام والادب والذووق واكرام الضيف مو هي ضيفة عندكم شون ماتسلمين عليها؟

.. ماادري ماامفكرة

.. طيب .. واذا اگولج الخاطري.

بلحظتها خجلت كلش كتبتله تصبح على خير وقضيت الليل كله افكر بكلامه.
وفعلا من اجو سلمت عليها وتفاجئت بيها من ردة عليه ..
معقولة هو هم كلمها مثل ما كلمني!

بقيت لازمة الفون على امل اتلقى رسالة منه ..
دخلت عليه رقية وصفا
نظرات صفا كلها تساؤؤل شبيه وشنو الي غير حالي بلحظة.
رقية محضرة نفسها وعيونها مدمعه كسرة گلبي اكثر مما هو متوجع ومكسور ..
حضنتها شبيها ولج صفا.
صفا .. راح يرحون وتكول ماشبعت منكم.
: يااا خلي تبات يمنه الليله.
: كلنه لزوجها ماقبل ..
: اوو شدعوه عليه.
حضنتها  بجييت وياها شكد جنت محتاجة ابجي بهاللحظة اطلقت العنان لدموعي ..
حضنه بعض احنا الثلاثة ودعناها وراحت ..
بقيت وحدي بالغرفه
وصفا صاحلها ابوية حتى يتناقشون بموضوع خطبتها.

صفا ... على طول هذا اليوم كلما اشوف إسلام يغمرني بنظراته .. عباله يثنيني عن قراري بترك حبه.

اسلام بي طبع اذا دز رسالة وماجاوبت ابد مايدز بعد لذلك صار هواي مامحاجيني.
ابوي طلب مني اگعد وياهم
صبيت الشاي مرة ثانيه وديته  ..
حاولت مااخلي عيني بعين اسلام بعد واتجاهل نظراته حتى لااضعف ..
خلص اتخذت قرار مااريده لان مايحترمني ..

گعدت وابوي بلش بالكلام ..
أيوب:  صفا جايين الها خطابة .. اذا تعرفون فراس ابن حجي فاضل متقدم الها وحبيت انطيكم علم بالموضوع ..

سليمان : افا ايوب تفضل الغريب على ابن اخوك مو  اسلام يريدهااا جان رفضتهم گبل لا تگول النا.

أيوب:  مااگدر اجبرها يا ابو مؤيد البنيه ماتريد ابن عمها وانه اريد ازوجهن مابيه على مصاريفهن هم اريد اتزوج خو ما اضل طول عمري عزوبي.

سليمان:  وشبي ابن عمها ماتريده ه

إسلام:  من رخصتك عمي اريد اعرف رأيها هيه اذا موافقة او لا؟

أيوب وجهه انضاره الصفا :   گولي بويه انت موافقة على  فراس لو لا .. ؟

صفا .. بدون مااباوع لإسلام مدنگه وعيوني بالارض والدمع بطرف عيني سامحني إسلام الضروف الي باعدت بينا انه ما اصلح الك زوجة الكلام هذا كان بقلبي اما اللساني نطق "موافقة " ..

حسيت اسلام انصدم ومن الصدمة سكت باوعتله بقهر وباوعلي بأسف حسرة وعتب!

سليمان :  لاتزعل سلووم ازوجك اغاتها وتاج راسها وداعتك ..

إسلام بصوت مبحوح بالگوه يطلع: كفو منك ماتقصر عموو الله يسعدها ..
باوع لأمه يلله يمه خلينه نروح
وجه انضاره لأيوب .. سفرة دايمه عموو  ايوب
والله يسعدها لصفا .. وطلع.

كلامه صار يسوي صدى بأذني
شعل بروحي جمره ماتنطفي تجويني
مثل كل كلامه السابق
من حقي اريد احترام اريد اعيش مثلما يعجبني .. !

طلعوا كلهم من الديوانيه وطلع وراهم ابوهم
بقت بس بيبيتي يمي ..
گالت:  سودة عليه كسرتي باب گلبه ولج والله يحوبج رجال واله حوبة انه ادري بكل سوالفج ويا والله  وخليتها سكته بس والله حوبته راح تظل تلاحگج.

ماجاوبتها عفتها ودخلت للغرفة
سميه متغطيه بالبطانيه رحت يمها كومي اريد اسولف وياج.
ماجاوبتني عفتها وبدلت ملابسي ونمت ..
تعبانه من الصبح گاعدين ..

إسلام ..
طلعت من بيت عمي مخذول واحس شايل الوجع على اكتافي .. مدنك راسي وخطواتي ثقيلة ..
يوصلني كلام امي وايناس  بعيد احس اذني انطرشت

ام اسلام .. ولا يهمك يمه اشوفلك احسن واحلى منها تولي ماتستاهلك لاتقهر روحك اختارلك وحده من اهلي خوالك وخالاتك يتمنونك منوه ..

اسلام .. دخلي يمه دخلي مااريد اتزوج چزت روحي من الزواج والبنات كلهاااا ..

.. عليش يمه اتچز روحك ماتگلي فد مندله هايه كلها جم يوم وتنساها خليها تتندم هم الك حوبه انت وماتتعداها لاعبالهه تنسعد من خذلتك وكسرت قلبك  ..

دخلنه للبيت ..
گتلها يمه الخاطر الله كافي ياريت ينسد هذا الموضوع واريد انام لااحد يزعجني.

إيناس .. لا صدك تروح تنام هسه عصر يانوم وانه اريد ابقى عدكم اريد اسولف وياك عفيه ..

تنهدت بألم گعدت على القنفة ..
لزمت جبيني احس بصداع راح يشطر راسي الى نصفين من گد الالم.

گعدت يمي إيناس .. اكلك على شي انت مدام ناوي تتزوج اخطب هجران بنت عمتي اشواق حبابه ووردة وتحبك ..

.. تحبني؟ ؟

--بتلعثم..  اقصد . يعني احسن من صفا الي باعتك.

-- عدكم غير موضوع تحجون بي لو اروح انام ..؟

ام اسلام .. يمه انوسه انت باقية الباجر موو؟

ايناس .. اي ماما باقية وباجر يجي عليه وعد اروح للطبيبة عندي موعد حتى تروحين وياي ..

.. اروح وياج حياتي هسه خلي سلامه يروح ينام اكيد محتاج للراحة ..

.. اوو ولو مشتاقتله بس ميخالف خلي يروح ينام.

أسلام .. الي يسمعج يكول ماجاي اخابرج باليوم مرتين تلاثه وكل يومين ثلاثة يمج ..

ايناس .. لا اخويه عمري انت مامقصر بس حابه اخفف عنك.

إسلام .. مايحتاج انه اروح انام وبالليل من اگعد اروح اجيب حبشكلات ونگعد نتفرج على فلم.

ايناس .. خوش لعد راح اخابر وعد هم يجي يسهر ويانه.

إسلام .. اوكي سلام ..
عفتهم وصعدت فوگ صداع مأذيني ..
بدلت ملابسي تمددت على السرير ..
افكر صفا .. لزمت تليفوني طلعت محادثاتنا
ظليت اقرا بيهم ..
مامصدگ تخوني وتتركني بهالسهولة
يمكن زعلانه مني لان ضربتها غلطت  وفتنت عليها عند ابوها .. يمكن امها مسويتلها عقدة وانه شبهتها بيها، ندمان كلش ماتوقعت اخسرها
بعد عندي امل اتوقع باي لحظة تدزلي رسالة وتكول اشاقه جاي اعاقبك
نمت وانا انتظر منها مسج.

مناضل ..
من شفت رقية سالت عنها وعرفت عنها كل شي
من بينهن صماء جميلة نضيفة كلما المحها
اشوفها جاي تنضف .. لگيت بيها كل المواصفات الي احتاجها .. انا اگدر اتزوج اي وحده صاحية ومابيها عيب وياي بالدوام هواي يتمنن اباوعلهن
بس شفت برقية الي ماشايفه باي وحده ثانية.
جانت الي هواي غايات بيها ومنها اكسر خشم الاء  واخليها ترجع خاضعة الي .. تعبت اربع أشهر ماشايف جهالي ولاسامع صوتهم .. شروطها مااكدر انفذها تريد اكعد وياها بغير محافضة يم اهلها .. واترك امي وانه مااكدر اترك وضيفتي ولا لگيت بديل حتى انتقل يمهم واذا اترك الوضيفة شنو اشتغل

.. ورقية تفيد امي لأن اثنينهن صنف .. مهووسات بالنضافة ..
وامي بيها طبع تحجي وتگرگ وميعجبها العجب
رقية تفيدها وحتى لو حجت امي ولعلعت ماراح تسمعهااا رقية ..

رجعت من الدوام .. الظهر شفت امي واكفة يم المغسله وتصب على ايديها ديتول .. لو يصح بيدها تشربه مو بس تغسل بي .. امي فاهمة استخدام غلط.
وماتريد صابونة ديتول لا.  
شافتني ابتسمت .. عبالك داخل مستشفى ريحة الديتول عاطه ..
الله يساعدك يمه
ويساعدج يمه وين فاطمة ورقيه ..

فاطمة دوامها عصري اليوم ورقية النادرة المعدلة هسه توها ييله قبل ربع ساعه صعدت لغرفتها جانت تنضف مابقى شي مانضفته حتى النضيف والله يايمه هي النسوان المعدلة احسن من ذيج لويلو ام الوصخ نهارها كله نايمه ..

يمه عوفيها الذيج تولي حتى وهي هناك هم بعدج تحجين عليها   ..

.. جا غير شفت الويل منها ومن اللسانها اليكنس ويرش وانت الهسه ماتقبل عليها لو ماحرمتك من بزريتك.

.. يمه انه تعبان صاعد ارتاح ..

.. اخذ راحتك.

صعدت لغرفتي فتحتها صارت مقابيلي رقية
الغرفة مرتبه نضيفه تلمع معطرة ملابسي محضرة ابتسامة رقية حياة لابسه ملابس جريئه مغريه
منزله شعرها على اكتافها ومخليه ورده صفح

.. حضنتني خليت راسي برقبتها شميتها بوستها ذابت بين ايديه تتفاعل وياي بكل حب.

وخرتها من حضني نزعت ملابسي وهي تأشر ماخليت بالي الهاا .. تعبان ماادري شتريد .. صعب افهمها ..
تمددت على السرير طگيتها صفنة اجو على بالي جهالي و الاء .. مشتاقلهم صارلي فوگ السبع اشهر ماشايفهم .. بلحظة صحت اخخ عضتني بصدري اذتني .. ضربتها راشدي على وجهه مو كلش قوي بس احسها تأذت لزمت خدها برطمت دنگت راسها
صارن دموعها يوگعن بحضنها بصمت ..
قهرتني اخذتها لصدري العاري بوستها على خدودها ظلت تضحك وبعدها عيونها كلها دموع بسببي   مددتها على السرير .. ومددت عليها
اخذتها الحضني وطلعت تعب اليوم كله ..
خلصت نومتها على صدري ونامت غفت
مبينه من انفاسها تعبانه ..
اريد انام دگ تليفوني ..
رفعته شفت رقم الاء ماصدگت فركت عيوني اريد اتأكد من نظري معقولة الي جاي اشوفة.
فتحت خط گلت الووو
الاء:  الوو شدعوه عيني اسأل گوول عندي جهال اثنين اعرف اخبارهم شصار منهم ماصار لو ملتهي بغير شغلة ..

مناضل .. الاء شعجب اليوم منين طالعة الشمس ليش هو منو الي ماسأّل كم مرة اخابر واتعنه واجي البيتكم واهلج يصدوني ..

.. ماعلينه يگوولوون هههههههاي متزوج خرسة وامها استغفر الله ههههه صدك جذب تغورني بخرسة مناضل .. ؟
.. منو گلج منو وصلج هذا الحجي لازم عندج استخبارات قوية هنا مووو؟
.. ههههه هسه ماعلينه طلگ الخرسه حتى ارجع ..

يتبع ..
احبتي النشر بين يوم ويوم 😘