رواية لمْ تكُنْ خطيئَتُنا الفصل التاسع عشر 19 - بقلم نورا ناصر

#لم_تكن_خطيئتنا

بارت 17

نورا ناصر

صفا .. دخلني جوه بالحديقة
ضربني راشدي بكل قوته ويسب ويغلط ويهدد
دفعته وتفلت عليه
وخخررر عني ماعليك بيه
لزمني من شعري من وره الحجاب احس،الدبوس دخل برقبتي ظل يحجي باذني
... ادبسز *** اذا مااگول لابوج عليج وحتى لعمي سليمان هم اگله واخذج غصب واربيج من جد وجديد.
شلعت ايده من راسي دفعته
احرگ روحي ولااخليك تاخذني حقير متخلف.
طلعت من بيتهم ركض لملمت اغراضي الي طاحت بالباب ودخلت لبيتنه.
بعده أبوي ماجاي
گعدت بالحديقة ظلمه  ارجف واشهگ خوف على الم
ياربي مايحق الي افرح شنو هالعذاب!
خليت ايدي على وجهي مكان الراشدي يوجعني
شنو من أيد.
رن تليفوني توقعتها سميه باوعت على باب المطبخ
شفت سمية واگفه يم الباب والضوه عليها لازمه التليفون
ومبينه قلقه
اخذت اغراضي ومشيت لحد ماهي واكفه.

صرخت بوجهه اشششش ولاكلمة مفهوووم
لزمتني من عكسي صاحت  تعاااي مخبلة.
ملصت ايدي منها دفعتها.
: وخرووو عني عوفوني شجاكم.
وصلت الباب المطبخ الي يطل على الهول تلگتنه بيبي مخروعه شبيكم ياستار صدگ جذب وانت شبيج وين جنتي الهالحزه؟
سمية بعصبية.. عوفيها بيبي مو صاحية يرادلها طبيب نفسي.

صفا .. عفتهم ولاخليت بالي لكلامهم  وركض للغرفة طكيت بجي.

ابدل وابجي ..
خلصت تبديل وكعدت بعد وقت اجت سمية
دخلت بكل قوتها وسدت الباب

سميه .. ولج شنو مسوية هاا شنو بس گليلي ابوي يريدج احجي ولج.

:خفت كلش حجيت بتوتر ولج مامسويه شي جنت يم امي و مروان ابن خالي وصلني واسلام شافني وظل يهدد ويمكن هسه وصلها لأبوي.

بهاللحظة دخل أبوي اجه يمها
صفگها راشدي وجرها من شعرها
وهو يصيح عليها بكل قوته .. منووو هذا الي اجيتي ويااا ولللج.

سمية .. شفت صفا عاجزة عن النطق بس تبچي لزمت ايد ابوي وگتله على كيفك يابه هذا مروان ابن خالي وصلها لأن هي جانت يم أمي ..

دفعها طاحت على الكاع
ضربها على راسها بايده
هم امج ؟ طيح الله حظج وحظ امج انعل ابوج لاابو امج وياج ..وساعة السوده الي تزوجتها بيها وساعة الاسود بيوم اجيتن للدنيا وابتليت بيجن طايحات الحظ ..

قهرني كلامه منو گله يخلفنا لعد؟
لزم يدة الباب بعصبية يريد يطلع صحت عليه ... يابه يعني لو انت شايفها جان ماحجيت بس لان اسلام گلك هيج تسوي ؟

رجع دفع الباب بايده اكو مرايه ع الدولاب الي بصف الباب اخذها وشمرها عليه دنگت راسي اجت بالحايط

خزرني وطلع ..

كرفصت كعدت يم صفا بالكاع وهي تبجي وشعرها مغطي ووجهه ومتناثر ..
بعد مااكدر احجي وياها وااللومها واعذبها بزيادة
مو صغيره عمرها 20 سنة مرحلة ثانية كلية وهيج تنضرب.
الكل غلطان واولهم امي ..
كومتها من الارض .. خليتها على السرير وهي تبجي وتشهگ ..

رحت لملمت الگزاز ونضفته بسرعه ..
اخذت تليفوني ورحت للترك .. دگيت رقم امي
جاوبتني
هلا حياتي سمسومة ..
- ماما انت شلون تخلين صفا تتأخر يمج للمغرب وهاي شمسوية بيها ماتگليلي هيج تخلينها ترجع شنو اليوم عدنه عرس وهيج مسويتها؟ !

- خليها تعيش حياتها شبيج انت ماتگليلي؟

- يا حياة هاااي احنه مدفونيين بالحياة ياماما وبعدين هيج راح تسببيلها مشاكل ابوي ضربهااا
بعد لاتأخرينها الهالوكت عندج خوش ماما؟

اذا الحايط يسمع امي ماتسمع الكلام ..

ختمتها وياها ..
ودخلت للبيت.
الليل كله صفا مانطقت ولا كلمة
وانه هم ماكلمتها اعرف كلامي راح يجرحها
اذا تفوهت بي ..
وهي حساسة .
. يوم ثاني الصبح گعدت قبلها
رحت اگعد بيها
وخرت البطانيه .. گومي صفا ماتروحين للكلية؟

.. مااروح خليني انام بلكي مااگعد ..

.. ليش ماتروحين ابوي ماگلج لاداومين مو؟ انه جنت واگفه ماسمعته منعج من دوامج.

.. سميه عوفيني الخاطر الله .. مااريد اداوم اليوم.

وخرت عنها ياربي بس لاتسوي بنفسها شي.
طلعت صارت بوجهي رقية تأشر وماافتهم
سحبتها من ايدها
طببتها بغرفتنه .. صحت صفا گومي شوفي رقية شتريد خطيه.
صاحت من جوه البطانيه عوووفينيييي
گتلها ووجع حتى وجع شكد مكروها
طلعنه انه ورقية
أشرتلها شنو شتريدين.
ظلت تأشرلي على حلقتها وعلى الباب والساعه وطلعت 8 أصابع من ايدها وحركات على وجهه وجسمها .

خليت بالي وياها  معناها خطيبها راح يجي ساعه 8.
وتريدني امكيجها واختارلها ملابس.
فكرت ياتره مناضل شون يفهمها ليش اختارها هي بالذات وهو يكدر يتزوج اي وحدة صاحيه
ياربي اسعدها خطيه.
قهرتني ..
تندمت على كل لحظة ماعشتها وياها ماتقربت منها ماعرفت شتريد مادققت باشاراتها ..
واعتمدت فقط على صفا وترجمتهاا.

اخذتها للمغسله اشرت الها تغسل وجها
وانه رحت للغرفه ..
طلعت الها ستره كاوبوي على الصدر بيها خرز ابيض
وجواها بدي بنفسجي غامق وتنوره سوده وشال بنفسجي وي البدي مرهم ..
دخلت بيدها الخاولي تنشف بوجهه
اشرتلها على الملابس تلبسهم. ..
وانه طلعت سويت ريوگ .. تريگت ..
غسلت .. رجعت للغرفة ..
شفتها مبدله .. تقربت منها  خليت ايدي تحت حنكها رفعت وجهها
اوووبس شنو هااااي لاعبه لعب
خاطه حواجبها بخبال صايرة جنها الساحرة الي  نشوفها بالافلام
مخلية بمكان الهاي لايتر تحت الحاجب بنفسجي وع الجفن المتحرك اسود واي لاينر خاطته كم انش ويوصل لأذنها. ..
خرعتني من الصبح .. خررب يووومج
كعدتها على الكرسي .. اخذت سائل تنضيف المكياج ومسحته كله وهي تبعد ايدي عنها مزعوجة ومستائه ماتريد امسحه .. التفتت على صفا فاتحة عيونها حمررر يخوفن انصدمت. خليت ايدي على صدري صحت .. يمه وهي ماحركت ساكن بس ترمش

مو خواات احس روحي  بفلم رعب ..من الصبح. خرعوني .. 
بعد ما مسحت المكياج رجعت خليت الها اساس،
وظل خفيف على الجفن المتحرك اللون بنفسجي وي لون البدي ومسكاره خطيت حواحبها وحمره خفيفة
صارت تجنن .. كرصتها من خدها كتلها تخبلين ولو ماتسمعني .. بس احسها تعرف من ملامحي
انطيتها بوسه هوائية .. نسقت الها جنطة وشوز اكسسوارات وساعة .. فيونكه ناعمة للشال ..
لان هي ماتطلع متعرف شون تأنق نفسها ..
واللتهيت ابدل ..
شفتها طلعت من الغرفه ..
كملت لبسي وطلعت .. ادورها مالگيتها
فتحت باب المطبخ شفتها گاعدة برة ..
تنتظره كسرت گلبي ..
حتى اذا دگ الباب ماراح تسمعه ..
ليش گاعده هنا وبالبرد ..
اخذتها ودخلتها مااعرف شون اوصللها الي اريده ..
لدخلتها وسط رفضها ..
رحت ادور بيبيتي .. شفتها بالهول توها گاعده ..
بيبي والله تأخرت ديري بالج على رقية لگيتها گاعدة بالبرد وتنتظر مناضل ..

.. يوو هو منو يروح وياها؟
: ماادري ..
: خابري على زينب وافتهمي منها
: خوش عندج افكار زكية فاتتني ..
خابرت زينب گالت هو واخته وشوفي ابوج اذا يروح وياهم ..
گتلها ماشي ..
خابرت أبوي دگ جاوبني ..
گتله ماتروح ويا رقية اليوم راح تروح تحلل دم عمود عقد المحكمة ..
: ولج وين اروح عندي شغل هسسه ..
: لعد هو راح يجي عليها هو وأخته.
: ها لعد احاول اجي واروح وياهم ..

سديته منه .. من سمع باخته تخربطت احواله اگص خشمي اذا ماناوي يتزوجها ويجيبها على گلوبنا مرة أبو  نخلص منها من اخته واخو وابن اخو ...
كملت السبحة ..
صوت هورن .. اجه ابو الخط ..
صحت على بيبي ديري بالج على رقية تره كلش متحمسة لاتطلع تدور على مناضل وتضييع ..

بيبي : روحي روحي مو كل الناس مخابيل مثلج. ..

طلعت من البيت .. ورحت للدوام وانه متحلفة بايثار
بس شفتها انهديت بيها .. ولج انت شون تكتبينه شمية وخليتيهم يقصفوني ويتشمتون بيه هاااه؟

ايثار .. ههههه منو قصفج اكيد ابن عمتج الدكتور الي دائما تقلدين وتعيبين عليه مووو؟

بتوتر ... لا مو هو المهم اريدج تغيرينه الي ..

انصاف .. ههههه بعد مايتغير اله بعد مرور ستين يوم.

... خرب بحضي صدگ تحجن ولج انت تقطرين خباثة أثيره .. طاح حظ الي قبلج هندسة

... ولج جنت منعسة وتعبانه انتبهت عليه صار شمية گلت خلي هيج حتى يصيرلها درس وماتعيب على ابن عمتها.

.. وانت شكو ليش محروگ كلبج عليه؟ وبعدين هو مايلفظ حرف "ش" مو بالعكس.

... المهم تنقصفين ههههه

... ماعليه غيرولي الاسم او الحساب انه عوبه بهيج شغلات ياااربيييي ...

... امشي امشي مايتغير كلنالج خلي نروح نلحگ على المحاضرة ..

خلص الدوام ورجعت للبيت .. دخلت شفت صفا بالمطبخ جاي تسوي أكلات .. بس بعدها مبين الحزن بين ملامحها.
وگفت يمها .. شلونها اختي الصاكه اليوم ؟

ببحة حزن واضحة ..زينة للحمدلله .. اخت مناضل تگول عرس رقية الاسبوع الجاي.

لا صدگ ورانه امتحانات الاسبوع الي بعده خلي ياجلونه للعطله شدعوه مستعجليين.

اي انه هم گتلهه بعد ماادري گالت راح تگول اله .

علواه.  هم رجعوا لو بعدهم وابوي راح وياهم ..؟

اي راح وياهم ورجع بس هو رقية راح تتغده عندهم.

ماحجه عليج بعد؟

لا ماحجه

هاا شطابخة النا اليوم لو بيبيتي طبخت؟

انه طبخت شبزي ...

الله احبه اليوم مدللتنا ..

ليش احس كلامج بي شفقة وعطف عليه ..

بعدين نحجي

مااريد احجي بهذا الموضوع ابد.

انه احجي المصلحتج

اعرفها مو صغيرة انه تره ..

اوكي براحتج بس رجعي داومي .. مابقه شي للامتحانات.

اي باجر اداوم والاسبوع الي وراه عطلة.

رجعت رقية تكلمنا ويا اخته بموضوع تأجيل العرس لأن حتى تجهيز ماجهزنا الها ملابس وذهب وكذا.

گالت انه اجهزها لاتشيلون هم ..

سمية. : بس الكل عدهم امتحانات بهالفترة وانت هم معلمة وراح تنشغلين خلي يأجله احسن للكل ..

فاطمة .. ان شاءالله اتكلم ويا و اي شي تحتاجونه انه حاضرة.

سمية .. ان شاءالله.

خابرت النا بالليل گالت مناضل تفهم الموضوع وقبل يأجل العرس ..

يوم ثاني وبعد العشاء .. اندگت الباب
صاح عليه ابوي أروح أفتحه ..
خليت شال على راسي وطلعت افتحه
صحت منووو .. سمعت صوت عمي سليمان گال انه.

گلت اووو اجه الدكتاتور شيريد بلله ..
فتحتله الباب .. تفضل عمو
گرصني من خدي ع السريع وگال هله ام لسان
وراه
دخل اسلام .. رفع ايده عود يسلم ..
دخلوا اثنينهم للهول بعد ماافتحت الهم الباب ..
سلموا على ابوي وبيبيتي ..

استغربت جيتهم اثنينهم .. !!
صاح ابوي سمية سووي چايات ..

سويت الچاي ووياه قطع كيك خليت بالصينيه
فديتني صايرة نادره مدري شعجب ..

اخذتها الهم اسمع ابوي .. يكول بس شويه شايل خشمه عليهم ..
ايوب .. والله ياخوية انه مااغصب بناتي على الزواج هسه اصيحلها وانت احجي وياهاا وشوفها اذا تريده او لا حتى يصير كل شي گدامك لان هاي مو اول مره يخطبها وترفضه  ..
سمية صيحي لأختج ..
: ان شاءالله.

صفا .. صاحتني سمية بس اكو شي مربطني مااريد ادخل عليهم مااشتهي اشوف اسلام كلش كرهته.

كوه لبست روب فوگ تراكي وشال خليته على راسي.
ودخلت عليهم بالهول استقبلني اسلام بنظرات قويه كلش ..

سلمت على عمي وتجاهلت اسلم على اسلام حسيته ضاج ..
بقيت واگفه ..
سليمان .. گعدي عموو
كعدت على طرف  القنفة وانا مرتبكة ..

سليمان .. جايين نخطبچ لإسلام انت موافقة لولا؟

صفا بحزم .. لا عمو ماموافقة مااريده ..
باوعت لإسلام سد قبضة ايده بغضب ملامحه احتدمت وحتى عروگه بينت ..

سليمان .. ليش بويه؟ مايرگص عدل لو يطير ناصي ابن عمج ورجال وماناقصة شي شتردين بعد؟

صفا .. عموو مااريده واذا جبرتوني عليه والله احرگ روحي .. تركتهم ورجعت للغرفة ..

سمية دخلت وره صفا للغرفة شفتها تبجي
رحت يمها:  صفا انت متأكدة من الي سويتي.

: اي متأكدة ماااريدة بعد ..
خليت راسي على المخده وفوگه مخدة ثانية
راسلتني هجران
سألتني صدگ إسلام خطبج وانت رفضتي!

: اي صدگ وشنو يعني؟ !

: يعني هوو يحبج ..اشو ماحجيتي ولا گلتي ويگولون هاي ثاني مرة يخطبج.

: اي هجران هسه انه رفضته بعد شنو هالتحقيق؟

: يعني ماكو شي ضامته عليه؟ 

: لا ماكوو شي اطمئني

: مو نخرب تره؟

: شتقصدين جاي تهدديني؟
ماجاوبتني .. 

عفتها ونمت .. يوم ثاني وانه طالعة من بيتنا انتظر الخط الي يوصلنه للكلية ..
صار بوجهي اسلام .. متت خوف منه
ردت ارجع وادخل بالبيت بس هو وگفني
إسلام .. انتظري اولا اسف علي صار ذاك اليوم واقسم الج اخر مره وبعد ماتنعاد واعتبر رفضج الي البارحة مجرد زعل وحبنا بعده باقي ومايتغيير راح ارجع اخطبچ شگلتيي ..؟

: ماكوو بعد حب بينا إسلام انت خربته بكلامك المؤؤذي ..

: اعتبريني ماگلته انه احبج وغيرتي عليج منبع هذا الحب مااريد احد يباوع عليچ بس انه.

: روح اخطب هجران تحبك من زمااان وتمووت عليك وامها شريفة وعفيفة انا مااللوگ الگ ..

: هجرااان شكو شجاي تخربطين؟ 

: مو جاي تحچي وياها وتراسلهاا روح اخطبها تفيدك.

: واذا اراسلها ؟؟ شجاي احجي وياها مثلا قابل احجي وياها مثلما احجي وياج.  معتبرها مثل اختي وكلامنا عادي جدا لاتزودينها صفا لاتمحيين حب 3 سنوات بلحظة وحدة انه مااستسلم وراح استمر اخطبچ.

: وانه راح أستمر ارفضك مااريدك ..
اجه الخط عفت اسلام  وصعدت. ..

سميه ..
مرت أيام بعد ماراسلني أمان وانا من سابع المستحيلات اراسلة ابد ماافكر بهالشي ..

اخر يوم بالامتحانات خلصنه امتحان وظلينه نفرفر انه وصديقاتي
انه من قبل گايله الهم اسمه امان بس ابد مااتكلم عن مدى اعجابي بي وگدام اي احد مبقية هذا سر بقلبي.

انصاف .. اكوول سمية شنو معنى كلمة كومة؟
بس گالت هيج عرفت شافت امان ظليت ادور عليه بعيوني .بين الطلاب .
شفته واحس فقدت كل حواسي بس النظر اله هو وبس انيق هيبه ومايباوع بس يمشي ويا امير
بقيت متسائلة شعنده بين كل فترة ويجي هنا للجامعة
وشعجب بقى بالبصرة هالمرة؟
شافني وجه نظراته عليه رفع ايده يسلم عليه
انه فقدت حاولت احافظ على اتزاني
اباوعله بنظرات قويه ومسويه نفسي عود مامهتمه
ولا كانه جاي اشوفه
ايثار .. سمية فقدت انه اكلج شنو معناها؟ معناها الامان والاستقرار والامان وامان وامان ...

سمية .. بعدت نظري عنه وظليت اضحك وياهن وهنه يباوعن اله
ولجن لاتباوعله عيب هسه يحس جاي نحجي عليه

انصاف .. ولج سميه هذا كلش لايگ الج
ايثار .. اي هو ابيض وانت حنطاويه تصيرون گيمر وعسل ..
سميه .. هههه اي هذا گيمر عرب عراقي اصلي
حده للشهر الرابع اذا بقى هنا يخرب وين يتحمل حر البصره والشرجي والرطوبه اكيد يمووع.

انصاف .. يتحمل على مودج عيني .. هههاي

سمية .. حياتي لاتعبين نفسج هو يريد بنت عمه تره
وانت تدرين عمتي تكرهني تموووت مني انه مااريد اورط نفسي بعلاقة فاشلة وماوراها شلعان الگلب.

ايثار.. ههههاي تره نصييف جاي تتشاقة بس انت مبين عليج واكعه واگعه لان قلبتيها جد.

انصاف .. لا والله مبين تحبينه سميه لان اخذتي كلامنا على محمل الجد ههههه خرب معقولة وگعتي بيد من لايرحم الله يرحمج لعد.

سميه .. يبوووو انه شخربطت صدك بين عليه هسه انه شنو حجيت هنه جاي يشاقن وانه گلبتها جد مااحب يبين عليه معجبه بي ابد حتى كدام نفسي هم اخجل يااربي خلصني منه هسه اله يجي هنا مايروح لكلية امه اخخخ ..

طاح حظجن اسكتن صارلي ساعه شجاي اخربط
ودعتهن طلعت من الكلية انتظر الخط.
واكفه واباوع للساعة ..
سمعت صوت قريب يم أذني يگلي

: شلونج شامية.

ماللتفت غمضت عيوني ياربي سحرني بصوته
قويت نفسي انداريت عليه شفته قريب يمي لدرجة حسيت  عطره كله صار بيه.
رفعت راسي حتى احجي ويا لانه اطول مني.

عليت تك حاجب خليت عيني بعيونه
گتله مبين عليك مشتهي شامية ليش ما انطيك الف تروح تشتري ..

ابتسم ومبين عليه كاتمه ضحكه جبيرة
ماتحملت نظراته احس نظراتي تغيرت من القوه للضعف سحرني
نصيت راسي لا يكشفني وبنفس الوقت خجلت من عيونه مااتحمل اباوعلهم كل هالمده.

امان ...شعدها حاتم الطائي صايره چريمه
والله انت مغرورة وشايفة روحج يراد واحد يكسر خشمج.

: بعده ماجابته امه اليكسر خشمي.

: لسانج طويل يرادله گص ..

باوعتله بتحدي گتله والله راسك الي يرادله گص.
بقلبي گلت شبي هذا يريد يكسر ويگص امه منو؟

خزرني مبين عصب .. يريد يحجي
بهاللحظة اجه امير وضربه على كتفه بالشقة
امير .. هااا شعدكم ..

أمان .. ماعدنه شي بس سمية وعدتني تنطيني الف تشتريلنه شامية.
أمير .. يلله سميه وين الالف ..

سمية .. هاا؟
أمان .. مبين ماعدهه الف لو بخيله ماتريد تنطي!

سمية .. يبوووو بس لـا صدگ ماعندي الف واتفشل
گتله لا عيني عندي شبيه فگريه خو ما فگريه
فتحت جنطتي ادعي كون الگه الف
شفت ارباع يااربي كون بيهن الف

أمان .. هاا مبين ماعندج موو؟

سمية .. لاعندي طلعت الف من الارباع وانطيتهن اله اثنائها ايدي طخت بيده دافيه حيل دفئها وصل لاحساسي والجو بي برودة ..
خجلت توترت باوعتله بنظرة خاطفه حاولت اقوي من موقفي الي خلاني بي ..
گتله يلله حباب اشتري بسرعه وارجع لأمك لتروح تضيع.
وعفته بدون مااعير انتباه  اله ..
بس سمعة ضحكت أمير ..
صعدت بالخط متحلطمه المغرور قطاني الف دينار اذا ماارجعهن عشرة مااطلع انه سميه اخخخ.

صفا ...
خلصت امتحان باخر يوم منهن .. صاحتني مريم اخت فراس .. ماعندي علاقة وياها بس هي ويانا بالخط
رحت الهاا ..
مريم .. صفا ممكن نحجي شويه على انفراد ..

.. اي اكيد

.. صفا فراس يريد يتقدملج  ونريد ندز  اهلي البيتكم يخطبونج من اهلج
بس بالبدايه يريد يعرف رأيج  هو گلي احاجيج اذا موافقة حتى يجون بهالايام واذا لا حتى مانتفشل شتگولين. ؟

يتبع ..