رواية لمْ تكُنْ خطيئَتُنا الفصل الأربعون 40 - بقلم نورا ناصر

#لم_تكن_خطيئتنا
بارت 37
نورا ناصر

صفا .. شفت سمية ركضت  حبست نفسها بالغرفة
وماندري شنو صار.
.. اجت عمة زينب تركض وتلطم على خدودها .
. ولج جنت على نفسها صخمتنه وفشلتنه .. شراااح يفكها منه شررراح يفكها ..

لزمتها فاطمة تحجي بصوت ناصي عمه شنو صار؟

جاوبتها .. ولج فشلتنه كدامهم كالت مااقبل ولججج شراح يسوي بيهه هسه ...

عمه اشواق واكفة يمهن كالت ماتصيرلها جارة شون هيج تفشل عمها ماحسبت لفعلتها اي حساب ..

فاطمة .. العفو منج بس هذا العقد باطل لان هي ما موافقة اصلاً ..

ظلن يحجن وبيبيتي وياهن
.. شفت عمي كال احم احم
ودخل بدون مايباوع لاحد
صرت كباله كال وين اختج ولج؟
سكتت ..
من بين اسنانه كال وينها جاي اكلج
انه خفت منه كلش وشكله يخوف
اجيت اطيح من الخوف
اشرت اله على الغرفة ...
راح وكف يم الباب حاجاها ..

ورجع وكف يم الديوانية
صاح اشواق ..
راحت اله عمه اشواق تمشي بتكبر وابهه
حجه وياها وطلع بسرعة ..

اجت جان تلزم بيبيتي من ايدها ..
وحجت وياها يلله يمه امشي وياي الليلة ..

بيبي:  لا يمه اشواق ماروح .. هسه يجي سليمان وخاف يسوي لسمية شي مايهون عليه هاي بنت المرحوم امانة برگبتي مااخلي يأذيها.

اشواق : من ايدهه يمه ماشفتي شون فشلته ..
ويلله روحي جيبي عباتج خلي نروح.

: ماروح يمه روحي انت ...

: زينب هنا وفاطمة موجودة مايسويلهه شي وهاي ماينگدر الها العرمة وقافلة الباب مابي يفتحه
لو هسه يعصب ويصيح وانت يرتفع ضغطج وسكرج وتتأذين.

بعد اصرار قوي من عمتي طلعت بيبيتي من البيت ودمعتها بعينها ..

گعدنه انا وفاطمة وعمتي زينب بالهول .. وولده بالديوانية .. ظلينه  محتارين شنو نسوي ومانعرف شراح يصير ..

وراها بوقت قصير رجع .. وصاااح زنيييبة
طفرت عمة زينب وراحت اله ركض ..

سليمان: .. خابري مناضل خل يجي ياخذ اخته ..

زينب .. والله فشلتنه يارجال المرة بالعدة وانت لا خليت حشمة واحترام الها كافي والله عيب.

سليمان "بعصبية" : ولج مو اكبر من فشلتي ولج خابري لا والخلقج اطلكج وبعد تنسين ولدج يلله روحي خابري.

صفا .. بعدهه اجت عمة زينب وكالت لفاطمة بعد سمعتي كل شي فطومة خابري على مناضل خلي يجي ياخذج.

فاطمة .. والبنات عمه خلي اخذهن وياي. 
نطلع ونفرغ البيت اله اذا يريد البيت.

من بعيد وكانه سمع كلامهاا صاااح البنات يبقن هنااا.

زينب .. يلله فطومة عفية اخذي فراس وروحي والبنات يبقن يمي انه هنانه.
وتضرب على صدرها ..

نزلت دموعها فاطمة اندارت عليه كلتلي مااعوفجن بس خلي تخلص هاي الليلة على خير.
وراحت للغرفة وانه وراها
نبجي اثنينه ..

لفلفت فراس بالبطانية واخذت حاجاته الي يحتاجهن
متت قهر عليها وعليه خطية تطلع بهالليل وبالبرد

كعدنه بالهول وننتظر مناضل يجي
وعمي رايح راد ..
يمشي ومخلي ايديه وره ضهره ويسبح بالسبحة مالته ..

دك تليفون فاطمة .. كالت هذا مناضل
كامت على حيلهه وبيدهه فراس
حضنتني وبوستني من وره البوشي
وظلت تهمس باذني وصوتها بي بحة البكاء
ومخنوكة.  .. كالت مااتركجن ااجر شقة ونكعد بيها بس خل اخلص عدة.

وخرت منها واهز راسي بقبول .. طلعت
وانه كعدت على القنفة ..

بس طلعت اجه عمي كال صفية روحي لبسي عبايتج ويلله امشي.

جاوبته .. وينه اروح عموو؟

صاح لا تجادلين يلللله ..

كتله عموو عبايتي بالغرفة وسمية قافلة الباب.

اشرلي على العباية معلگه بالهول كال لبسي هاي وغطي وجهج بالخاولي.

رحت لبستها وبصفها ميز ونقطة كهرباء عليها تليفوني ملصته من  الشحن اخذته ..

غشيت وجهي بالشال ونزلت العباية كلش على وجهي ..

صاح زنيبة يلله اخذيها وروحي انت ولدج للبيت.

كتله عمووو وسمية؟

ماعليج بيهه هاي الـ*** ويلله روحي.

لا عمووو فدوه لا تأذيهااا ..

صاااح زنييييبة اخذيها من وجهي لاادفرهااا هسه.

جرتني عمه زينب وانه اتوسل بي
وصوتي مايطلع
حجيت بصوت ناصي سمية سامحيني عفيه
ادري لو انت بمكاني ماجان عفتيني بس والله ماعندي قوة .. والي صار كلنا انجبرنا عليه.

طلعت من الباب رفعت راسي للسماء ..
صافية والگمر بدر ..
دعيت الله يرحم بحالي وحالها
انه هم ماادري شنو الي ينتظرني! !

بعدني شابة و ماشفت من هالدنيا غير التعب والقهر..
شفت قساوة الدنيا وانا مستسلمة وقوتي كلها انهدت راحت  ...احلامي ماتت ...
.
كان حلمي انو اعيش حياة وابني مستقبلي بأيدي...
حلمت هوااي   بس والله ماشفت من هالهواي شي ....
اي صح شفت ، شفت احلامي وهي  تنقتل كدام عيني ، شفت زهرة شبابي وهي تذبل  وللاسف ماتت ، شفت هموم بحياتي  ألي اعمارهم بالسبعين ماشافوها وانا  بعمر العشرين وشفت انواع الصدمات..
كان حلمي اعيش بس هسه  صار حلمي اموت واخلص .. جبتها ظيم بظيم ماشفت يوم حلو
كل الحلو الشفته وي فراس انمحى بلحظة وفاته

صعدت للسيارة كعدت وره انه وعمه زينب
الجو بارد وانه لابسة دشداشة كشمير
لان بالبيت حر ومااتحمل الملابس الشتوية.

ظليت اطكطك من البرد وبداخلي شهگة قوية ومااكدر حتى اشهگ بالبجي كلشي اكتمه

من شدة حزني وقهري على فراس ..
اللتزمت بكلشي يكولونه الي واعتبره صحيح
رغم من قبل جنت انتقد الي يكولون المره الي بالعدة اذا طلع صوتهه رجلها يتعذب بالقبر .. فخفت اذا يطلع صوتي اعذب فراس بقبرة ..

ظلت عمه زينب تحجي ويا ولدها وانه فكري وبالي يم سمية وفراس طلع بعز البرد خاف لايتمرض ..

وصلنه لبيتهم ونزلت اتعثر  وعمه زينب لازمتني
دخلوا ولدها وبقيت بالطارمة

كتلها عمه شراح يصير بسمية خاف يكتلهه عمي. !

جاوبتني:  لا عمه شسالفة خو مامجرم هو وهي قافلة الباب عليها شيطلعها هسه يهدأ بس هي،سوايتها جبيرة.
دنكت ولزمت راسي احسه راح ينفجر لزمتني الباردة وهم انقهرت وانصدمت ..

دخلتني عمه زينب جوه بغرفتها ..
اجن امل وايناس يمي ..

حجت الهن عمه زينب كل شي صار

كالت صفاوي تمددي وارتاحي ..

باوعت الها جاوبتها ..  منين تجي الراحة ..

كالت نزعي البوشي محد يدخل هنانه بعد.

مديت ايدي نزعته ..

ظليت اللوب على سمية ماادري شصار الهاا.

انطتني عمه روب لبسته لان بس ارجف.

بقيت كاعدة على مندر بالارض بغرفة نوم توقعتها لعمة زينب. 

بعدها بوقت چفت علينا عمي .. صاح انطيني تليفونج.

من الخوف خليته بايده بدون اي تردد .

اندار يريد يطلع من الغرفة

گتله بخوف وصوت يرجف .. عموو وين سمية.

اندار عليه ومنظره يرعب .. عيونه حمره ومخنزر.

گال لا تسألين عنها ..

وطلع وطبگ الباب حييل.

شمرت روحي على عمه وابجي بصوت مخنوگ ومرتجف .. واباوع لعيونها بتوسل ودموعي تكت.

گتلها عمه عفية حبوبة كليلي شسوه بيها فدوه روحي استفسري منه.

ظلت تهدأ بيه .. صفاوي اهدي مايسويلهه شي بس يعاقبهه لان فشلته وتدرين بي عصبي ..

مااعرف شون مر الوقت وخلص الليل ..
بين دموع وبجي والم وحيرة وتفكير بالمجهول..

طلع الصبح وانه نمت بالفراش انتكست كلش
صخونه ولزمتني الباردة ..

اجت يمي عمه زينب .. وخرت البطانية
من عليه .. كالت صفاوي شبيج تونيين
ماجاوبته مابيه حتى احجي ..
خلت ايدها على جبيني
تحسست حرارتي گالت اوو هاي شنو حرارتج مرتفعه كلش .. انه هسه رايحة للدوام
راح ائمنج عند البنات يديرن بالهن عليج
اكو دوه مال افلونزا وبرد بالثلاجة
اتريكي حتى تاخذينه ..
حركت راسي بقبول .. وهي راحت ..

بعد شوية اجت ايناس وبيدهه صينية الريوك
حليب دافي وبيض مسلوگ وشكلين جبن.

يلله كدرت اكل لكمتين واخذ نوعين من الدوه

ساعدتني اطلع اغسل ورجعت للغرفة
تريد تطلع كالت تردين شي لو  اروح اريگ ابني.

ايناس بس كليلي ماكو خبر عن سمية؟

لا والله ماكو ..

عفية گليلي شراح يصير بأختي؟

الله يخلصها من شره ان شاءالله ادعيلها.

طلعت ايناس ورجعت تلفلفت بالبطانية

صار الظهر اجت عمه زينب من الدوام
صبوا الغدا بالغرفة الي انه بيها
تغدينه انه وعمه زينب وايناس وامل.
ونطوني دوه وشوية صرت احسن.

للعصر اجه مناضل ورقية
طبت يمي
الغرفة الي انه بيها تطل ع الهول.
وكفت اتسمع لحجيهم ..

مناضل .. عمي من رخصتك احنه بيتنه جبير والبنات مثل خواتي خليهن يجن يعيشن عدنه.

سليمان .. وشتريد الناس يحجون عليه مخلي بنات اخوو عند الغريب!

مناضل .. عمي هذا منو اليحجي اشو الناس كلمن ملتهي بظيمه وانه مو غريب زوج اختهن.

سليمان .. اكول انت دير بالك على الخرسة وماعليك بخواتها.

مناضل .. هاي الخرسة زوجتي وام بنتي  والها اسم

سليمان .. اكلك شنو انت جاي  تعلمني الحجي.

مناضل .. لا العفوا منك عمي بس هسه شگلت؟

سليمان :  .. ماعليك بالبنات ..

صفا .. تمنيت اروح وياهم اشتاقيت الفراس ولفاطمة وخايفه من نوايا عمي مو هالله بلله يريدني ابقى هنا ماادري شنو الي اباله ..
رقية مرتين سألتني على سمية .. گتلها ابيت عمتي اشواق ويا بيبيتي.
بعدها صاح عليها مناضل وراحت ..

ردت تليفوني من عمي ماقبل ينطينيا.
وبس افكر بسمية.

مرت كم يوم وخلصت العدة ..

گلت اتواصل ويا امان و اكله على سمية  بلكي يكدر يسوي شي

بس تليفوني عند عمي
انتظرت ايناس تنزل واحاجيهه.

من نزلت كتلها
كالت ماعندي رقمه ..
عفيه اخذي من اي احد
ماشي.
بقيت انتظرها
ومن رجعت كالت خابرت هجران ماقبلت تنطيني رقمه تكول امها ماتقبل.

اكيد حست بيه انه اريده ..

كتلها زين اخذي من وعد او اسلام اكيد مايخلون منه.

خوش افكر ..

حاجت وعد كايل الها رقمه مغلق والفيس مالته ماكو صار هواي مااله ظهور عليه ..

دعيت الله ربي كل البيبان انسدت بس بابك ظل مفتوح ومشرع كون بعونها اختي وتوئمي شحالها هسه ..

وره ماطلعت من العدة بكم يوم صاحني عمي.

رحت يمه .. عنده غرفة هو وحده بيها بوفية
باوعت شفت تليفوني فوك البوفية
طالع شويه من الكڤر مالته خط احمر ..

بس خفت اكله انطينيا ..

كال كعدي ..
كعدت على القنفة ..

سليمان: - صفا انت هسه طلعتي من العدة وانه ولدي كبار وشباب ومااريد مشاكل ولا اي شي غلط يصير بهذا البيت.

سكتت بس گلبي وجعني عرفت ضاملي ضميمة
...
كمل كال:  جايين الج خوش خطابة عليج  الجمعة يجي يشوفج الرجال ..

ظلت الدموع تصب من عيني وكلش اخاف منه
طلعت من الغرفة ابجي.

ظل يومية يگلي حضري نفسج للجمعة
وانه محتارة بعمري والخوف متملكني منه ...

شفت ابنه مؤيد الجبير ..
كتله مؤيد عفية حاجي لابوك انه مااريد اتزوج لايجبرني.

مؤيد .. يمعودة انه لروحي مابيدي شي بعد مو الج اتزوجي واخلصي ولاظلين تحت رحمته.

: بس انه مااريد اتزوج وهو مصر.

: بعد ها هيه شسوين اتزوجي وارتاحي انه مااكدر اوكف بوجه ابوي.

انسدت البيبان كلها بوجهي وماادري عن اختي شي.

يوم الجمعه اجت عمه زينب وانطتني فستان اسود من القهر حتى ماانتبهت عليه كالت لبسي راح يجون
لبسته وطلعت شفت مره  بالهول كاعدة عمه زينب كالت هاي اخته .
سلمت عليها وكعدت گبالها ظلت تباوعلي بعدم اهتمام وتسولف.
دقايق وصاحني عمي ورحت اله اجر بخطواتي جر وابدي ابجي.
دخلني عليه رفعت راسي انصدمت
رجال بكد عمري مرتين
بس مبين صابغ ومعدل ومرتب
كعدت كباله وكل شوية ارفع راسي اباوعله اشوف نظراته تتحسسني بشكل انقرفت منه
ابتسامته كانها  ماكرة وبيهه خبث
صابغ شعره وحواجبه وهم بيده سبحه ولابس قميص زين ماينبط من كرشه ..
كال لعمي اكدر احجي وياها على انفراد
رد عليه اي بعد هيه راح تصير مرتك ..
وطلع ..
اجه گعد يمي .. دنگت اعصر بايديه وارجف
كال خلي احجيلج عني انا متزوج اثنين وانت الثالثة بس انت راح تصيرين الاعز انت الصغيرة وبنت اخو الغالي صديق عمري ابو مؤيد
وظل يلغي انصدمت ودموعي ظلت تطيح بحظني
ياربي خلصني شهالزواج هذا ..
اريد قوة اجر روحي من مكاني مااكدر.
بقيت كاعدة متوترة ..
الى ان اجه عمي وراحوا ..
للمغرب عمي طلع .. والولد ماكو
مابقالي بس اسلام استعين بي يخلصني
صعدت لايناس دكيت باب غرفتها ودموعي
على خدي
فتحتها وبيدها ابنها
كالت هااا صفااا
دخلت وسديت الباب گتلها عفية خابري اسلام خل احجي ويا ...

شتردين منه؟

بس كلمتين فدوه

لا عفية اخاف من عمي انه محذرنه.

عليج الله بس شويه هو مو هنا طالع عفيه ايناس بروح ابوج.

كوة قبلت طلعت رقمه ودگت عليه من اول دگه جاوبها
كلتله صفا تريد تحجي وياك ..
ماسمعت شكال بس ردت كلتله ماادري هاك اياها تحاجيك كبل لايجي عمي ..
وانطتني التليفون كالت بسرعه خلصيني
اخذته وايدي ترجف
شرداني عليك اسلام شنو من زمن هذا
راح تساعدني لو تاخذ بثارك مني على السويته بيك بالماضي ..

يتبع
اسفه ع تاخير هم زين كتبت المغرب وهسه كملته لان كهرباء من المغرب ماكو لذلك تاخرت
جان ذبحوني هذولاك الناس 😡