رواية لمْ تكُنْ خطيئَتُنا الفصل الحادي والأربعون 41 - بقلم نورا ناصر

#لم_تكن_خطيئتنا
نورا ناصر
بارت 38

.
صفا .. صارلي هواي ماسامعة صوته اكثر من سنة تقريبا اتذكر اخر مرة تعاركنه وضربني ومنها بعد ماتواصلت ويا بالتليفون ..

اگول انه شجابني عليك هسه ماكو غيرك ينقذني شنو هالذلة هاي ياربي ..

لازمه التليفون ومخليته على اذني وبس نفسي يصعد وينزل بصوت مسموع محتارة شحجي ..

صاح ببرود وتكبر .. احجي اسمعج ..

ماادري،شجاني من سمعت صوته .. تذكرت ايام من جنه نضحك ونسولف ونتعارك ذكريات ماتنسي بلحظتها لزمتني قشعريرة .

گتله وبعدها الرجفه بصوتي
اسلام انه .. وسكتت! !

ايناس هم وترتني يارايحة للشباك تطل خاف يجي عمي
لو تروح للباب تفتحه وهاي لازمه ابنها وماخذتها مشي من الباب للشباك.

صاح اسلام: - تحجين لو اسده .. ؟!

ايناس "بنتر ".. ولج احجي فضيها لايجي عمي بي طبع يسنط يوكف وره الباب ويتسمع ..

ياربي الحجاية ماتطلع هي گوة ..
حجيت :- عمي يريدني اتزوج.

اسلام .. وانه شيخصني ؟

:- اريدك تحاجي تمنعه انه مااريد اتزوج حاجيت ولده محد گادر يوكف بوجهه كلت بلكي انت تگدر.

:- اتزوجي احسلج صفا الزواج ستر الج ..

قهرتني حجايته صارت دموعي على خدي غصيت بالبجي ادري بي يريد يذلني انه مارايدة منه غير يوكف هالزواج گتله الحمدلله انه مستورة ومامحتاجة رجال يسترني.

:- مابيدي شي عليج صفا ..

:- انه ادري انت تگدر.

:- شنو تردين انهي عليج مثلاً؟

:- اي شي ..

:- لاء تزوجي احسلج ..

:- مااريد اتزوج هذا الرجال بگد عمري مرتين اعتبرني اختك وجاي تستنجد بيك وخلصني.

:- انجبي شنو هالحجي انت غبية لو تتغابين اختك شنوو؟

:- مشكور ابن عمي وماقصرت.

ايناس واگفة على راسي خمشت التليفون مني بسرعة
باوعتلها بحقد وطلعت من غرفتها اركض
نزلت جوه صارت گبالي غرفة عمي الي بيها تليفوني
بس مااكدر ادخل الها لان ابنه الصغير سمير عمره 16 كاعد بالهول وبيده تليفونه ..

رحت لغرفة عمه زينب ..
عمه زينب وعمو ماينامو سوه اثنينهم بغرفة وحدة غرفهم منفصلين عن بعض
ماادري ليش
بس مرات اشوفه بالليل يصيح الها تروح يمه ..

&&&&&

اسلام .. شگد فرحت من استنجدت بيه وخابرتني
شكد مشتاق وولهان على صوتها
احس هيه ماي وانه كاع ..
ومااگدر بدونها ..

بس حبيت اتلذذ وهي تتوسل وانتقم لرجولتي
واللعب باعصابها شوية.

شكد قهرتني من تحجي وهي تبجي

اكو اختلاف مابين عمي يجي يكلي اتزوجها ومابين هي تتصل بيه وتطلب مساعدتي
صوتها بسرعه خلاني اضعف.

قررت اروح يوم ثاني لعمي واخلي يوكف خطوبتها من ذاك الرجال وانه اتقدم الها ..

&&&&

صفا .. كلش ضجت وضليت ابجي بالغرفة الوحدي
شجابني على اسلام وشوداني اله.

اصلا انه لو ما ضاقت بيه السبل مااستنجد بي
بس لان ادري شخصيته قوية ويكدر يفرض رأيه على عمي عكس ولده.

هو لو اريد جان رحت حاجيت رضوان بس ادري بي مايدبرها ومايوكف بوجه عمي.

بس ادري بي جاي ينتقم مني لان بيوم من الايام جنت حبيبته وأذاني وتركته ..

ولو يرجع بيه الوكت هم ارفضه وتصرفه اليوم وياي يثبت ماراح ارتاح ويا
واختياري الفراس جان صحيح بس الوكت ضدي.

بالليل اجه عمي صاحني ..
كال صفا انه اتفقت ويا الجماعه على كل شي
الحاضر والغايب وكال راح يكعدج مؤقتاً ويا نسوانه وبعدين يعزلج عنهم.

انه سكتت وارجف خوف منه گتله عمو وين سمية؟

گال لاتسألين عنها .. وطلع
اجت يمي عمه زينب نمت بحضنها وابجي
كتلها مامعقولة محد يكدر يوكف بوجهه.

كالت النه الله والله شكد حجيت ويا
كل حجاية والثانية اصلخ واذبح واطلكج واشمرج تعبت منه كلش.

عمه خلي ياخذ البيت وحصصنه بي بس خلي يفك منه.

ولج عيني صفاوي هو مو قصده البيت بس يريد يزوججن ويستر عليجن والله من زين ماخلفت منه بنات جان وئدهن مثل ابو جهل من يدفن البنات.

: عمه هو اشايفنه قابل تايهات بالشوارع اشو الحمدلله مستورات.

: بعد هاي عقليته وهاي نظرته للمرة زين منه وخلاني اداوم مدري شعجب بس بهاي هو نصفني.

گوه خلص الليل. وانه بس اخطط .اخر حل توصلت اله اخابر امي بلكي تكدر تسوي شي. يوم ثاني الصبح
طلعوا للدوام عمي ومرته وولده.

امل وايناس يتأخرن بالگعدة الصبح.

رحت لغرفة عمي فتحت الباب انفتحت زين مامقفولة.

دخلت وسديت الباب وراي .. مديت ايدي اريد اتناوش التليفون ماالوحه. فوگ البوفية ..

جريت كرسي وصعدت عليه
شفت تليفوني اخذته ورجعت الكرسي بمكانه.

دست دگمة القفل ماينفتح مخلص شحن.
دورت على شاحن ماكو.

طلعت من الغرفة شفت بالهول وحده خليته ع الشحن واترقب خاف احد يگعد ويشوفني.

مرت كم دقيقة فتحت التليفون ودگيت رقم امي
واباوع ع الدرج خاف لااحد ينزل.

طلعت رقم امي اتصلت مرة مرتين و3 ..

الى ان جاوبتني ومبين صوتها منعسة.

گالت الووو ..

گتلها انت شنو من ام انت ماتسألين عن بناتج خلفتينه ونسيتي عاد فكري شراح يصير بينه بعد ابونه ..

: اووو سمية شبيج ولج انه من فاتحة ابوج طردوني تردين اجي وره الفاتحة حتى يملخوني!

: انا مو سمية انا صفا ولج يمه سويلنه جارة انت امنه والج حق بينا عمي ماادري وين وده سمية روحي اشتكي عند الشرطة عليه.

: يا صخام صخمه وين وداها ..

: ماادري صار اسبوعين ماشايفتهه وحجيتلهه سالفة سمية كلها.

: ولج انه هسه مو بالبصرة بغير محافظة ارجع ويصير خير.

: وانا راح يزوجني لواحد اكبر مني ب25 سنة وانت يمته ترجعين حضرتج.

:شبي هذا استجلب عليجن خو مااستجلب ماكو احد يكدر يوكف بوجهه ويرده.

:ماكو...ماكو ليش خابرتج انه مأيسة منج بس من لا جارة من حلات البروحي شسوووي.

: تكدرين تطلعين من البيت روحي الخالج جابر وابقي يمه بين مااجي واحط اله حد واخلي يعرف حدوده اله اخلي يخيس بالسجن.

: وانه وين اندل بيتهم ..

: ولج مايتيه انت تعرفين المنطقة اخذي تكسي وروحي هناك ع الشارع المحل مالته روحيله للمحل وهو ياخذج للبيت انه هسه راح اخابره وافهمه ابقي يمه وهو مراح يقصر بحمايتج.

: زين يمه خلي افكر هسه لازم اسده خاف يجي احد يشوفني انه ابيتهم.
ختمته منها ..
دكيت الفاطمة جاوبتني بسرعه سلمت عليه اطمنت على فراس.
كالت دزيت مناضل للبيت شاف الباب مقفول وعليه سلسلة جبيرة وعليها قفل حديد.

گتلها فاطمة تره انه رايحة لبيت خالي راح انهزم منا

انت متاكدة عمري ديري بالج على نفسج.

اي متاكدة والله هناك اخليهم يشتكون على عمي هنا محد كادر يوكف بوجهه وخايفه اجي يمج خاف يسويلكم مشاكل وياخذني.

ان شاءالله حبيبتي بس ابقي على تواصل وياي ولاتگطعين مني.

ختمتها وياها .. ملصت التليفون من الشحن
قفلته ورجعته لمكانه ..

ورحت للغرفة دخلت جوه البطانية
وبس افكر شراح يخلصني.

&&&& إسلام .. باليوم الي قررت بي اروح لعمي سليمان .. صبحت مريض كلش
اريد اكوم من الفراش مابيه .. افلونزا لزمتني بعضامي احسهم مفتتات تفتت ..

صعدت امي شافتني .. سوت الي كمادات
وسوائل دافية وانطتني علاج للبرد والانفلونزا.

تغطيت ونمت وحتى للدوام مكدرت اداوم.
اجلت الروحة بينما اصير زين
جنت محضر اخذ امي وواحد من خوالي
واتقدم الها على حسب الاصول

&&&&

صفا ..! يوم ثاني الصبح ..،وره ما طلعوا كلهم
للدوام ..رحت لغرفة عمي اخذت التليفون ورجعت عبايتي و البوشي وطلعت ..

امشي واتلفت .. والبرد يلفح بيه
من الصبح كلش برد.

فتت من الفرع الي بي بيت عمي
ووصلت للفرع الي بيي بيتنه
ومثل ماكالت فاطمة شفت الباب مقفول بسلسلة وقفل حديد
مكتوب عليه للبيع

وكفت اباوع وابجي وينج سمية وانه شون تركتج.
بس مابيه حيل وقوة حكم الظالم الله يرحمك يابوية ..

&&&
نفيت وأستوطن العدم مكاني محيت من حياة تمنيت لو أنها كتبت لي وما أُجهضت منها بسبب خطيئة لم ترتكبها يداي أسائل نفسي من أنا ومن أكون قضيت حياتي وأنا ضائعة بين الحقيقه و الأوهام ولا أعرف كيف تدفقت حياتي بطريقة وددت كثيراً لو أنها تُنسى كيف شوهت قساوتها ملامح ذاكرتي من أذن لمن وئد طفولتي بتحديد مصيري فمن أعماقي تعذبت من داخلي تمزقت توسلت القدر مرارًا حتى تعثرت بروح تائهه مثلي ادمنته عشقته ثم تناثرت حقيقتنا أشلاء وبقيت أقضم أظافري ندماً لكوني لم أتشبث به .. ..

سمية .. بقيت بالغرفة لشوية واسمع ماكو صوت ظليت اتسمع خليت اذني يم الباب ..
ماكو حس ولانفس وين راحوا هذول؟ !

دقايق واسمع ضرب قوي على الباب
متت من الخوف رحت سحبت دولاب خشب صغير
صاير بين سريري وسرير صفا ..

اريد اوصله للباب مالحگت اتكسرت وتناثر الخشب.
وشفته عمي دخل .. واشكال الشتم والضرب
اكثر شي على ظهري بالسبحة
ودفر برجله .. وانا احاول احمي نفسي مااكدر.

سحبني من شعري وانه اتوسله

گال ولج انه ابني رجال شكبره ماوكف بوجهي انت بت الـ***
ونزل غلط على امي

گتله اذا انت مخنثه انه شعلية

صاح بغضب :- انت ناوية على عمرج اليوم عاجبج تموتين على ايدي.

وظل يعت بشعري حيل حسيت راح ينشلع كله
و يسح بيه
وين راح يوديني واهلي وينهم
اصيح بيبي، صفا، فاطمة
محد يستجيب الي.

صعدني الدرج وشمرني بالصالة الفوك.
ظل يباوعلي وانه مدممه
خليت راسي بين رجليه واردد
حسبي الله ونعم الوكيل عليك هم تلاگي ابوي من تموت شراح تگله كتلت بناتك
واشهگ بالبجي ..

وهو يسمعني وساكت
جر حسرة
كال كافي عليج اليوم
طلع وقفل الباب الي منه ننزل لجوه ..
لحظات وصارت ظلمة
طفه عليه الكهرباء متت خووف ..
لزگت روحي بباب الدرج وادگ عليه
ومحد الي ..
ظلمة وبرد
ظليت مااميز رجفتي من الخوف لو من البرد ..
بقيت بمكاني ..
مااعرف شلون خلص الوگت ..
وكعدت صاير صبح
الطابق الثاني بي غرفة فاطمة و3 غرف غيرهن
وحدة منهن ابوي الله يرحمه سواه بيها حمام قبل لايتزوج من جان جاي يحضر لعرسه ..

بقيت طول الوقت فوگ .. وحشة وخوف
الوكت كوه يخلص.
وكهرباء ماكو ..
كبل لايجي الليل ظليت ادور شموع
ولكيت وبقيت الليل على الشمع اباوعلها حد ماتنطفي واغفى.
اروح لثلاجة فاطمة بيها بس ماي
وشفت بسكت ونساتل
اسكت معدتي بيها.
سمعت الباب انفتحت
شفته عمي
ركض دخلت للغرفة وقفلت الباب
سمعته صاح كال هذا زقنبوت وسم الج
واريد اشوف شون تعانديني اله ابقيج هنا طول عمرج.
بس سمعت طكة الباب طلعت شفته جايب خبز ولبن روبة واجبان.
كعدت اكل ميتة جوع شنو من حكم هذا
يربي وتاليتها شلون
والله اختنگت
الكل اتخلى عني
امي من زمان حييل.
فاطمة بيبيتي،صفا، رضوان الي كتل روحه عليه
لو انت امان وينك ماتگلي وين؟
مافگدتني ماسألت عني ماوصلك خبري
فرحان بخطيبتك ونسيتني.
ليش الكل تخلى عني ليش؟

بقيت على هالحال كم يوم
مرات ابقى بدون اكل والشمع قرب يخلص
وابقى بالظلام .. صارت الحياة ماتنطاق لدرجة صرت اتمنى الموت الف مرة باليوم
ومرات مايجيب الي اكل والي عندي يخلص امووت جوع.
بكل لحظة اريد استسلم واقبل بامير.
لان الشغلة صارت شغلة عناد.

ظليت كلما يجي عمي يجيب الاكل اللبد بالغرفة وماطلع صوت.

يوم منهن سمعت صوت طكة الباب ورحت اركض للغرفة دخلت وقفلتها.
سمعت صوت بنية واكفة يم الباب تصيحلي سمية سمية.
صوت صفااا هذا .. ركضت للباب وفتحتها ..

&&&&

صفا .. وگفت ابجي بعدها مشيت
ووصلت للشارع العام ..
اجرت تكسي .. وانطيته العنوان وصلني اله
نزلت على الشارع وادور على محل خالي
من بين سوك وهوسه محلات مخضر وسمج
واخيرا لكيته هو يبيع مواد غذائية ومحله مو كلش كبير .
دخلت و سلمت عليه ..

&&&&

إسلام .. بعدها صرت احسن
حاجيت امي گوة اقتنعت وشون انت شاب وتتزوج هاي ارملة ومن هالحجي الي لاياكل ولايشرب عندي.
ادري مااقتنعت ورافضة هذا الزواج بس ماتكدر ترفض وانا مصر.

خابرت عمي عود اريد افهمه
گتله انا جاي ووياي امي وخوالي واريد اخطب صفا.
فاجئني بصياحه ولك صفا شردت وماادري وين ولت اله اذبحها بس خل الاگيهه ..،!!!!

&&&&

سمية .. فتحت الباب شفتها ايناس عبالي صفا
گتلها شجابج؟
كالت عمي جابني
راح يخليني اطلع منا موو؟
لا بس گلي صار كم يوم ماالج حس واجيت اطمئن عليج.
ليش وهو يهمه كليلي شلونهم خواتي واخوي شخبارهم.
موزينين ولج صفا شردت.

لطمت على وجهي صخاام ولج وين راحت؟

دخل عمي بسرعه گال خلي بس الزمها اله اذبحها
گدامج.
لطمت وجهي وصرخت گتله هسه انت شتريد گلي شتريد ميخالف انه موافقة اتزوج امير بس عوف اختي وطلعني من هنا.

تقرب گال ها واذا عدتي الي سويتي ذيك المرة اذبحج واذبح اختج گدام عيونج.

هزيت راسي بيأس گتله اطمئن مااسويهه بعد.

ضحك كال اي تعلمتي من الدرس الي انطيتجيا هااا.

سكتت ..

كال يلله امشي ايناس وطلع قفل الباب عليه ..

كعدت بالكاع اللوب وافكر بصفا
ياربي وين راحت معقولة راحت لامي اكيد والا وين تروح.

يوم ثاني كعدت على صوت الباب وهو ينفتح
دخلت عمه زينب بس شفتها سالتها على صفا
كالت مالكوها وامج يكولون مو هنانه.
وعمج بس يعرسكم انت وامير يروح لخالج جابر لبيته وبعد الله كريم.

اخذتني ونزلنه جوه ..
كالت يلله بدلي عمج وامير كاعدين بالهول ينتظرون

وين نروح ..

ترحون تعقدون عقد سيد وهم فد نوب تعقدون محكمة ..

للحكاية بقية ☺