رواية لمْ تكُنْ خطيئَتُنا الفصل التاسع والثلاثون 39 - بقلم نورا ناصر

#لم_تكن_خطيئتنا
بارت 36
نورا ناصر

سمية .. گعدت على الجرباية وبعدني بهدوم الدوام
وايديه على خدودي واهز نفسي بتوتر
وافكار تاخذني وتجيبني ..

دخلت صفا .. ولج سمية صدگ هذا الحجي.
صدگ عمي يريدج لأمير هذا شنو الي يريد يوصل اله بالضبط؟

: جاوبتها ماادري ماادري هذا من هسه يتحكم بينا
الله يرحمك بوية المن خليتنا المن بس للي مايرحمنا.

تقربت مني صفا وظلينه نبجي اثنينه

يوم ثاني الصبح رحت للدوام ومن دربي لقسم امير ادور عليه ..
شفته واكف ابحده يدخن جكاير نظراته بالفراغ وصافن
تسللت على كيفي ورحت يمه گتله امير شجااا أبوك؟

هو ارتبك واحتار شيسوي شمر الجگارة بالگاع وسحگ عليها گال ابوي وينه ابووي؟

هزيت ايدي يحضي يخاف من ابو لايشوفه يشرب جكاير گتله قابل اسرح بي تسألني عنه.

باوعلي ومنخزر گال احترمي نفسج شنو هو صخل واسرحين بي.

حجيت بگلبي صخل وستين صخل همين

رديت گتله ...
امير شنو هاي السالفة الي طالعلنه بيها ابوك؟
انا مااريدك واكره مااكرهك.

امير .. وانا عندي الموت اهون  ولااتزوجج.

: اي يلله لعد موت وخلصني منك.

: عسى يومج گبل يومي ان شاءالله

تقرب مني گال مو تسمع انصاف بهاي السالفة افتهمتي؟

لااع ماتسمع بس انت شراح تسوي شكله ابوك قافل.

شسوي سكتت عنه ومعتكف ومن يدخل للبيت احبس روحي بغرفتي.

.. لك مو هيج سايسه اخذه بالسياسه
انت ماسامع اذا جانت حاجتك يم الچلب سمي حجي جلبان ..

.. ايا جلبه يابت الجلبه انت شنو ماتستحين؟

.. شبيك شبيك هو مثل والامثال تضرب ولاتقاس.

ولج سكتي سكتي وولي منا  اجت انصاف " بنتر وخوف"

باوعت شفت انصاف جايه صوبنه ووجهه يذب الوان غيرة على عصبية
انصاف من نوع غيرتها قاتلة كلش ..

وصلت يمنه وسلمت .. وظلت تباوعلي وتباوعله وتباعد بنظارتها عني بعدم رضا ..

ترخصت منهم ومشيت ..
هي دقايق وشفتها يم زينة وايثار
ويباوعولي ويحجون ..

ظليت اخمن .. اكيد تعاركت ويا
وراحت يم ذني تفرغ
وتحش بيه
عبالها انا مخلية عيني عليه
وماتدري اليمها شنووو؟

رغم تدري احب امان وحاجيتلها انا
بس ماهذه عليه مو خوش نظرة
عبالها مثل امي انا
ياربي شلون بيه كلهم ياخذوني بذنب امي
شنو من حظ عليه ..

مرت ايام عمي لسليمان كلما يشوفني
يحاجيني بنفس الموضوع
وهم ارفض والاسنه واحصلي رزالة ..

وسكت فترة ..

مرة رجعت للبيت .. سلمت عليهم وگعدت يمهم
گالت بيبيتي:  سمية باجر لاتروحين للجامعه
سألتها ليش بيبي
بيبي:    باجر نروح نسوي وكالة لعمج سليمان علمود البيت ..

: شبي البيت؟

: يردون يبيعونه ..

: شسالفة يبيعونه هذا عمي صدك مايستحي شكد حقير مايكول احنا كاعدين بي وين نروح.

فاطمة:   سمية الناس تريد حقها هسه محد يفكر غير بس بمصلحته واحنا هم ناخذ حصصنه واخذكم نروح نأجر او نشتري يم اهلي حتى نصير قريبين على رقية خطية هم محتاجتنه يمها لاتخافين انه مااتخلى عنكم.

بيبي .. وانه هم حصتي الكم وابقى وياكم مااتخلى عنكم.

صفا .. خلي يبيعه  عمي وياخذ حصته ونفتك بلكي يفك ياخه منه ..

سمية .. ماادري بكيفكم .. عود اروح وياكم امري لالله والله وكت صار هذا وذاك يتحكم بينه.
انه طابه جوه من رخصتكم.
دخلت للممر صوت
صفا وراي .. ماتردين غده؟
كتلها بصوت عالي انسدت نفسيييي.

طبيت للغرفة ابدل واشمر يربي مااريد عمي يتحكم بينه.
يوم ثاني ماداومت كعدت شفتهم كاعدين كبلي
كتلهن لعد انتن مو لازمات عدة؟
صفا .. عمي سليمان يكول يصير المرة بالعدة تطلع للضرورة هو سائل شيخ ..
.. اي طبعا هاي بيها مصلحته شون مايروح ويسأل

بدلت  ورحت وياهم سوينه وكالة لعمي سليمان ..
ورجعنه للبيت تغدينا ونمنه شويه
كعدنه العصر جاي نشرب جاي بالمطبخ ..
سمعنه الباب اندگ
كلهم باوعولي وادري بيهم يردوني افتحها ..
گتلهم اي انه صايرة البواب مالتكم
كله انه افتح ..

صفا .. شنسوي احنه هنا جمعية الارامل بس انت مختلفة عنه ..

سمية .. باوعت لفراس مخليته فاطمة بالكرسي المحمول مالته دنگت عليه باوعتله عيونه كلما يكبر تبين لونهم احلى وافتح .. تذكرت ابوي ولون عيونه ترحمت اله بقلبي
دنگت على فراس بوسته من گصته
گتله ولك انت شوكت تكبر وتفتح الباب عني
ضحك وبوسته
وگمت من مكاني
سلتتلي شال وخليته على راسي ..
طلعت من المطبخ وعبرت الحديقة وصلت للباب
فتحتها وانصدم بي منتجي على بنيد سيارته
يفر بالسويج ..
لابس تيشيرت رصاصي نص ردن
وبنطرون اسود ..

تمنيت  بلحظة جنون.
أركض اله   وأحضنه ..
وبقوة الحضن  أنسى  كل شي..
أنسى أهلي وأهله..
أنسى الناس المحيطين بينا والمجتمع واخليهم شمايحجون خل يحجون.

احط ايديه حول رقبته وأباوع بعيونه بدلع..
هاي العيون الي نخلقت علمودي حتى اباوع بيهن ومااشبع..

مثل ماخلقه كله لحتى يكون وطني ..
ابدي بهاللحظة عيونه هي الي  تحجي وكل هالكون يسكت..

اسمع غزله  واخجل.. يلزمني  من خدودي واسمع كلمة الاحبج مرة ثانية .. هم اسمعها مرة ثانية يراد الها بخت وحظ مو مثل حظي،المطين
يربي مو صعبة عليك ..

هي لحظات وصحيت من احلامي وشفته واكف يمي
وانه لازمه صفحة الباب واباوع اله وناسية كل شي

نظرات عيونه تحجي شوگ ولهفه وشغف
اخذتني عيوني لاصبعه افتش عن الحلقة
ماكو مالگيتها ..
ظليت اسأل بقلبي
هاا مايعجبك تلبس حلقتها

وبدون مايسلم گال .. وبنبرة هادئة صيحيلي بيبيتي

يمكن يدري بيه اذا سلم ماراح ارد عليه ..
هزيت راسي بقبول ..
ودخلت بدون مااسد الباب.
رحت اجر بخطواتي
اريد بس ابقى يمه واشبع منه شوف

صحت لبيبيتي كوه تكوم بس كتلها امان يصيحلج
طلعت برة ...
وانه بقيت اباوع من شباك الديوانيه
ع الحديقة
شفتها تتوسل بي يدخل
ودخل وكف بالحديقة
ظل يحجي وياها
وانطاها بيدها شي
حجه وياها وباوع على الشباك الي واكفة يمه انا
ودعها دنگ بوسها على راسها و راح

احس روحي طلعت من راح ..
مويدري بيه احبه ليش يروح ..

بهالليوم احس روحي تخربطت كلش
ياربي النا اشهر واحنا منفصلين
ليش مو گادرة انساه ابد ..

""‏و كأنك مسحت على قلبي بيدك
و قلت بسم الله ارقيك
ولا احد غيري يسكنك و يحتويك
وكأن كل شعوب الأرض رددت آمين""

بقيت واكفه بمكاني .. وابجي على حظي
شيصير لو بس هو الي ومااريد بعد اي امنية تتحقق.
دخلت صفا .. صاحت سمية سمية ..
مسحت دموعي .. بدون ماللتفت الها ..
وحجيت هاا صفا اسمعج ..

اجت يمي
: ها جاي تطلين عليه منا؟

دنگت وسكتت ودموعي تطيح ع الگاع ..

گالت يوولي الله يرزقج احسن منه

جاوبتها والاحسن منه منوو امير موو؟

: لا ولج مو امير ان شاءالله مو هو.

: سكتي صفا مااريد الاحسن منه انا ..
ومشيت بسرعه وطلعت من الديوانية
رحت للغرفة اجت وراي
گعدت على السرير ..
اجت كعدت يمي
كالت:  بس هو خاطب هسه شيلي من بالج

: والله لو ينشال جان شلته بس مابيدي على روحي شي وهم ادري بي ما راغب الها ولج حتى حلقتها مايلبسها ..

: سمية هيج راح اتعبين لاتعيشين نفسج بالاوهام
وتوقعي عمي باي لحظة شيسوي اقتنعي  بانه امان  خاطب وراح يتزوج وانسي ..

: اي كليلي هيج بس لاتكليلي الله يعوضني
من يوم الحبيته وانه اشوفه بس هو رجال على وجه الدنيا بعد هيهات اقبل او احب بغيره ابد اعرفه قلبي عنيد .

دخلت بيبيتي وبيدها فلوس
گالت هاجن هاي من امان يكول مصرف الكم
باجر راح يسافر خطية ويمكن يطول يلله يجي.

سمية .. بيبي ليش خذيتي شنو احنا نجدي ؟

بيبي:  وليش تجدين قابل هو غريب وهنوب يدري ماعدكم معاش حب يساعد بعد عيني.

سمية .. حجيت بگلبي وبعد عيني انه همين.

دخلت فاطمة .. ليش عمه ماعدهم لعد و راتبي انه مسؤؤلة عنهم واصرف عليهم خوات ابني خو مااقصر عليهن.

بيبي .. يمه الكل مامقصر والله سليمان واشواق وحتى اسلام ..

سمية .. اشواق هاي بالذات ماتاخذين منها ولافلس احمر.

بيبي .. ليش يمه عيب عمتج هاي.

:حتى لابعدين تعيرنه واحنه هم مااريد احد يتصدق علينه.

: ولج عمتج هاي ماجاي تتصدق ولا شي ..

صفا .. عفت بيبتي وسمية يتجادلون ورحت للمطبخ اكمل تحضيرات العشه راح يجون  رقية وعمتها

رن تليفوني رفعته شفتها اخت فراس الكبيرة
قلبي وجعني كلش كل شي يخصه يقهرني
مو عبالك عشت ويا 3أشهر لا وانما عمر.

جاوبتها سلمت وظلت تسأل عني
بعدها گالت اشو ماسألتي بعد عن اغراضج بالغرفة بقت.

.. والله عمري اصلا ناسيتهم.

.. ان شاءالله احنا نجيبهن الج والغرفة الاخشاب ابوي كال اذا ماترديهه نسويهه فلوس وننطيج اياها.

.. لا يمعودة يافلوس كل شي مااريد وداعتج الدنيا كلها طالعه من عيني ومابنفسي كل شي.

.. الله يساعدج بدل المصيبة مصيبتين بس هم مايصير احنا هم نخاف الله بيج والله اغراضج بعدهن على حطة ايدج.

.. اي ادري تعرفيني بيكم والله من يوم الي طبيت لبيتكم عروس حد ما طلعت وانه ارمله ماشفت منكم شي موزين وتمنيت اكمل حياتي وياكم بس الله ماقاسمها الي الحمدلله على كل حال.

.. واحنه هم ماشفنه عليج شي موزين الله شاهد صفاوي بس هم مايصير حتى ذهبج مااخذتي وباقي بالغرفة والله نحجي بيج نكول شون نفس عليها ومأمنه بينه حتى مرة عباس اخذته وضمته وقفلت عليه خاف كل شي يصير.

.. ميخالف خلي العمتي تلبس بي انه مابنفسي شي والله يااحلام مالي خلك حتى روحي.

.. هي امي وينها وين الذهب يمعودة زين من تكد لنهاية الشهر تعبانه والله.

..سودة عليه ان شاءالله بس اطلع  العدة اجي اشوفها.

.. هله بيج عيوني احنه باجر نجي ونجيب اغراضج ويانا ..

سديته منها ..
اندگت الباب .. ودخلت رقية وعمتها وبنت مناضل سرى وياهم.
سلمت عليهم واخذت بنتهه
كلش ناعمة وملبستها طوك ابو الشعر الاشقر
لانها گرعه وملبستها اتميمه بايدها
وبدون كماط وبدله  وردية كيبور ومبطنه بقماش شتوي
لاعبة بيها لعب
اخذتها بوستها رقية بدلت ملابسها وراحت تحوس بالبيت اجت سمية وظلينه نباوع الها ونحجي گتلها شكد  افكر ياربي رقية شون راح تربيها وهي ماتحجي اكيد تتعلم للغة الاشارة اكثر من الحجي.
كلش افكر بيها هالطفلة شون راح تصير بالمدرسة منو راح يهتم بدراسة واجباتها
مناضل كله دوام.
واكيد من يجي تعبان وين اله خلگ ..

حجت سرى اني ادرسها عمه كل شي اعرف.

كرصتها من خدها كتلهه عفية بالشطورة ..

...
رقية ظلت تحوس شافت ملابس مامغسولات غسلتهن ونشفتهن وشرتهن وجلفت الغسالة

طبت للديوانية جرت الزولية للطارمة وصبت فوكاها ماي وظلت تفرك بيها ..
اشرت الها  لاتتمرضين
بالاشارة كالت الجو حلو مو بارد كلش.
دخلت جوه للمطبخ
اجت سمية طلت على الطارمة
خلت ايديها على راسها يبوو مدام اليوم رقية عدنه راح يخلص الماي ولج روحي كليلهه كافي اريد اسبح باجر وراي دوام.

.. هسه رايحه اكلهه بتج جاي تبجي تعاي رضعيها
طلعت الها اشرتلها
اشرت الي ماارضعها سويلهه ممه تشرب
ودنگت تفرك ..
كلت لسمية ماكو فايدة وضحكت ..

كالت رايحة ركض اسبح كبل لايخلص الماي على ايد رقية وخاف اليوم ماكو ضخ واظل ..
ودخلت تركض جوه ..

بقوا عدنه ويوم ثاني راحو
العصر اجوا خوات فراس ومرة اخو
جايبين اغراضي .. شكد بجيت بيومها
مرة عباس طلعتلي الذهب كالت جيكي خاف ناقص منه
كتلها مايحتاج .. من طلعوا فتحت جنطة جانت مليانة مكياج يمكن اكثر من البلوكرات انه عندي
جان مايطيح من وجهي ..
وهسه زين من اغسل بصابونة
سديتها ودفعتها جوة الجرباية ..
اتذكرت كلادة ذهب خنك
بيها حرفي وحرف فراس
طلعتها ولبستها والباقي ضميته كله ..

&&&&&&              

سمية .. اندكت الباب وماكو غيري البواب الي يفتح البيبان
وانه شون عجوزية .. 

فتحتها واشوف عمي سليمان وعمه زينب
بيده السبحة ودخل كال طبي سويلي طريق
حتى مالحكت اسلم عليه ..
طب صار يم شباك الديوانية ووكف .

علما بوست عمه زينب ماتشبع من البوس
فوك العشرين بوسة باستني ..
اخر شي گالت هله بلي راح تصير چنتي .

گتلها اي من دبش ..

ضحكت  مشت وكفت يمه .. 

دخلتهم جوة وصحت لبيبيتي ..
اجت وكعدنه .. طبت صفا سلمت وضيفتهم ..

باوعلي ورفع اصبعه ويحجي بصيغة الامر ..

: حسبي حسابج باجر اجيب شيخ ونعقد الكم انت وامير ..

: گتله بس عمو مااريده مايصير تجبرني حرام عليك.
كام على حيله معصب مخنزر وعيونه تبث نار وشرار حمرة
وتخووف ..
صاح. . كلمة زيادة ادفنج هنااا مو انت الزعطوطة تالي وكت توكفين بوجهي تره والله ضاملج ضميمة
سوي الي اگلج عليه لاتره والله تتندمين واخليج تحفرين گبرج بيدج ..

وكفت اريد احجي بس جسمي كله يرجف
گلت بصوت مرتجف والله حرام الي جاي تسوي بينه احنه مو عبيد عندك ..
رفع ايده الي بيها السبحة واجه صوبي ..
صارت بيبتي گباله وتصيح بوجهه يمممه حبوبي عليك بروح المرحوم لااااااا

عمه زينب سدت حلگي وظلت تدفع بيه لحد ما طلعتني بره الديوانية وهو بقى يلعلع بصوته ..
و كلامه كله تهديد ووعيد وغلط ماخله حرمة لاحد . .. ولا گال عيب من ارملة اخوي وبعدها بالعدة وهيج صياحه واصل لسابع جار ..

لزمتني عمه زينب .. گالت بس اهدي حبوبة

بصياح .. عمه شون ترديني اهدأ ماريده جاي اكللكم.

گالت ولج سكتي لايسمعج و الله يذبحج ع الجبلة
ودخلتني بساع للغرفة .. وقفلت الباب ..
گعدت ع الجرباية كلي ارجف وادردم
كتلهه عمه فدوه العمرج حاجي مااريد امير انه مااريده ..

اجت كعدت كبالي على سرير صفا
كالت لاانه ولا اي احد نگدر عليه .. انه لروحي مااسوي جاره بس انت طيعي امرج لله شسوين وتعاي يمي ادللج دلال اخليج بعيوني ..

رديت عمه انت على عيني وراسي وياريت بس عليج بس هذا زواج وانه وامير مامتوالمين.

سمعنا صاح زنيييبه يلله مشينه وكليلها لهاي باجر العصر اجيب الشيخ والشهود خلي تحضر روحهااا.

نزت عمه زينب وكامت اجت يمي باستني على راسي وخدودي كالت عماتي بعد شسوين فوضي امرج لالله لاتعمين على روحج اقبلي بامير تره هو خوش ولد.

وطلعت بسرعه ..

ماادري شون خلص الليل وانه افكر بطريقة تخلصني
وماكو حل ..

يوم ثاني ماداومت .. وكاعدة على اعصابي
صار العصر ماسمعنه اله اشواق وبناتها على راسنه فرحانه ومبدلات عبالك عدنه عرس ..

وانه ظاله بدشداشتي ..
ومعصبه راسي بالشال ..
اباوعلهم واتأفأف وعيون ونظراتها وحجيها  اشواق كلها شماتة ..
هي دقايق واجت عمه زينب ..
كعدت يمي كالت شو مامبدلة ..
حركت ايدي بعدم رضا وانزعاج ..

سمعت صوته صاح سوولنه طريق
ودخلهم بالديوانية ..

صاح احم احم ودخل كال يلله تعاي خل نعقد الكم.

باوعت اله بعصبية .. انطوني عباية ودخلت عليهم
انه وعمه زينب ..

الشيخ وامير واخوانه واثنين ماعرفتهم اتوقع خوالهم  ..

گعدت وبدأ الشيخ يحجي .. وانا مامركزة بشي
بس كلي ارجف .. رجفه مرافقتني ماترضا تهدني.
تمنيت امان اليوم مكان امير
شيصير يعني قابل راح تنگلب الدنيا ليش يربي . !

ماحسيت اله على عمه زينب وهي تندسني بيدي
همستلي كووولي نعم ااقبل ..

صحت لاااا مااقبل .....

وكمت وطكيتها ركضه للغرفة .. وقفلتهاااا
مر شويه وقت ..
اسمعه يم باب الغرفة
كال انه رايح اودي الشيخ واجي واعلمج شراح اسوي.

للحكاية بقية ..