رواية لمْ تكُنْ خطيئَتُنا الفصل الحادي والثلاثون 31 - بقلم نورا ناصر

لم_تكن_خطيئتنا
بارت 29
نورا ناصر

سمية .. كرفص گبالي ومبين معصب كلش اول مرة اشوفها هيج عصبي ..

لزمت ايدي متألمة منها .. واون اه وصوتي مسموع
مدنگه راسي اباوع لنفسي ..

جر حسرة خله ايده على راسي ويرفع بي كال تأذيتي ..؟
تنفسي صار سريع كلش
اسحب نفس وازفره
مديت ايدي  دفعته  من صدره
گتله وخر عني يلله.

ميل نفسه .. راد يوگع بس سند جسمه بايده وخلاها ع الكاع .. كال ولج

كمت .. كام  صار گبالي
صاح  انت شنو مخبلة تورطت بيج اني

: لاتورطت ولاشي من هاللحظة وينتهي الي بيننا وانسحب من حياتك مو صعبة تره.

: هذا الحجي مااريد اسمعه مره ثانية، وهسه شنووو صار احجي .ومنو وياج امي ؟ .

: انت وياي وكلكم وياي
ليش كتلي تعاي للحفلة حتى انهان مووو اسمع حجي يسم ويغث وكلش زين تعرف امك ماتريدني الك ليش تأذيني
لو  عليمن اسالك انه اعرف ليش حتى انسحب من كيفي مو؟ .

: سمية اهدي وننزل ونكعد اني وانت وامي ونتواجه واله اطلعج منا مخطوبة الي.

: مااريدك لأن مااريد ذل ..

: شنو ذل سمية لاتحاسبيني على سوالف امي كتلج ماراح نعيش وياها.

:لا ذله من اوكف بالشارع انتظر احد يعطف عليه يوصلني للبيت  بينما انت مصعدها يمك ومو سائل عني اخابرك ماترد عليه اكعد ابيتكم امك تهيني وانا نار مأججة بيه وانت واكف يمها تضحك وتتشاقة وتلزمك شون تخليها تلزمك شوون.

اريد اروح لمكان الدرج انزل بس هو مايخليني وصاير مقابيلي لزم ايدي ضحك
امان .. تغارين من فرح تره ماتعنيلي شي اختاريتج انت لاتسوين مشكلة من الماكوو سمية.

سمية .. مشكلة من ماكوو أمان؟ ؟انت ماشفت امك شون عاملتني اشششش مااريد احجي بس احنا انتهينا لا من صدك انا غلطت وياك اصلا حبنا جان غلطة من الاول .. اخخ مني باوعت لفوگ زايد ونسيت اصلي نسيت كل شي ..
ضعفت ظليت ابجي ..
امان .. لاتبجين حبيبتي ..
طلع تليفونه فتحه شوفنيا مخلي سايلنت
مسحت دموعي بيدي كتله مايهم بعد هسة.
تقرب مني اكثر طلع كلينكس ظل يباوع لوجهي
باوعت بعيونه
گال شمسويه بوجهج بس رغم هذا تخبلين طالعه بكل حالاتج انت حلوة ..
ظل يمسحلي دموعي بالكلينكس
جمدت بمكاني بلا حراك كلي مستسلم اله
مرر اصابعه على خدي اباوعله ويباوعلي
سحبني من خصري بايد والايد الثانية خله راسي على صدره

شالي وصل لنص راسي رجعت رفعته
راسي يوصل لرگبته رفعت راسي ظليت اشم بعنقه
خليت ايدي على قلبه اتحسس نبضاته سريعه كلش
مااسمعه شنو يكول اذني نسدت  وكاني بعالم ثاني
لزم ايدي الخليتها على صدره وباسها ورجع خلاها بمكانها على صدره ولزمها قوي
گال اذيتج سامحيني ..
ويمسح على راسي .. وخرت راسي من على صدره وسحبت ايدي من ايده
بهدوء گتله اريد اروح ..
ظل يباوعلي وايده مستقرة على خدي ..
مشاني بهدوء وگعدني على الكرسي
كرفص گبالي .. كال اني هسه اوصلج اكعدي انتظريني هنا بينما اجيب سويج السيارة من جوه.

-----

أمان .. كسرت قلبي سمية بدموعها ..
بس اني مخليها براسي واصريت اله هي ومااريد غيرها تصيرلي مرة ..
حاجيت امي قبلها بيوم كتلها راح تجي للحفلة مااريد هوسة وياها هالبنية اريدها ومااريد غيرها.
سكتت ماحجت بس اظاهر  الكلام الي ماانحجه يمي
انكال يم سمية ..
اللتهيت عنها بالحفلة انشغلت جيب هذا ودي ذاكه
وبالاخير سويت موبايلي سايلنت
وديت عائلة عمي لبيتنا
توقعت سمية رجعت لان ماشفتها بعد ..
من شفت تصرفها هذا عصبت مليت وانا اعلمها ماتعرف تحجي بهدوء
دفعتها شفتها تتألم تندمت انقهرت عليها
حاولت احتويها شفتها هدأت
كعدتها كتلها ابقي هنا هسه اوصلج للبيت.
دخلت من البلكون ونزلت جوه ..
بعده بيتنا بي اقاربنا ..
جاي ادور على سويج سيارتي شفت امي وابوي كاعدين وحدهم .. بالصالة
دخلت عليهم وسديت الباب ..
باوعت لامي .. گتلها يوم انت شنو گلتي لسمية اني شنو وصيتج .. دارت وجها بتكبر .. وحاجت ابوي گلتله حاجي لابنك انه تعبت من الحجي ويا ووياها
امان اسمع لابوك .. 

ابو امان .. ابني هاي بنت ايوب مومناسبة الك امها سمعتها موزينة واحنا ناس والنا سمعتنا ماتناسبنا لذلك خطبت الك فرح بنت عمك ومن زمان احنا حاجين بهذا الموضوع ..

أمان .. شنو خطبتوها الي وشوكت ..

اشواق .. هسه بجيتهم هاي للبصرة خطبناها الك.

أمان .. وشنو اني جاهل عمري 17 تروحون تخطبولي بدون علمي هسه حتى لو جاهل ويخطبوله هم يكلوله
المهم خطوبتكم هاي مامعترف بيها  يعني راح تفشلون نفسكم انتوا مو اني .. وماكو غير سمية راح تصيرلي مرة.

ابو امان .. اماان .. كتلك سمعة امها مو زينة واني حتى رضوان من تقدملها جنت رافض بس حرجني كدام خالك ..

اشواق .. امان سمية ماتصير جنه لك هاي تجيب العار لعائلتنه.

امان .. اكتفيت منج راح تخذليني للمرة الثانية البنية منهارة بسببج كافي توجهيلها اهانات
عود هاي بنت اخوج مو غريبة تاخذيها بذنب امها مو من حقج.

ابو امان .. امان لاتفشلني وي اخوية وتقلل من احترامي.

امان .. مو مشكلتي انتوا حلوها من يمكم  دومكم مخليني شماعة لتعليق اخطائكم دوم مخليني بوجه المدفع ماكو غير سمية اتزوجها خلي يكون ابالكم هالحجي.

اشواق :  اتبرى منك والله  ..

امان : مو جديدة عليج دكتورة ..

عفتهم ورحت اخذت سويج سيارتي
وصعدت للبلكون .. باوعت سمية ماكو
طليت شفتها تحجي ويا رضوان بعدها صعدت ويا بالسيارة .. ضربت قبضت ايدي على محجر البلكون
اني ادافع الها بكل مااملك من قوة وهي مصرة تضوجني ..
نزلت جوه .. شفت امي وبيبيتي
گالت .. لعد وين سمية
گتلها .. راحت وي رضوان
بيبي .. يووو كوون؟ غير تگلي شو ماگالت وراحت لاحجت وكالت بيبيتي ايظل بالها عليه.
اشواق .بنظرة لامان . عرمة وعوبة وعوجه وعمرها مراح تنعدل مدام امها اماليد ..

امان .. رمقتها بنظرة غضب وعفتهم وصعدت فوك
واني اصعد اتصلت على سمية رفضته اتصلت مرة ثانية مغلق شمرت التليفون بغضب ..

------
سمية .. شفت امان راح دخل جوه
كمت من مكاني امشي بكسل
نزلت جوه اخذت حذائي  بيدي
وسمعت صوت ابو امان من الشباك
يكوله بنت ايوب امها سمعتها مو زينة وماتناسبنه احنه ناس النه سمعتنه ..

وكع كلامه عليه مثل السهام وصابت روحي
مزقتني اشلاء
لزمت المحجر مال الدرج اجيت اوكع كوه تماسكت
ليش يربي شنو ذنبي وخطيئتي
بجيت بحرگة اسمعهم يحجون بس مااتحملت بعد.
اسمع اي شي .. الغلط مني باوعت ليفوك زيادة عن اللزوم .. خلص امان مايحتاج بعد احنا انتهينا من هاي اللحظة وراح انسحب من حياتك احنه مانرهم لبعض ابداا ..
طلعت من مكاني مشيت وبيدي حذائي
امشي وامسح دموعي واعدل بشالي

صار گبالي رضوان منتجي على بنيد سيارته
باوعلي ضحك  گال سبيج؟

ضحكت رغم الالم الي جاي احس بي بس ردت اظهر ماتبقى من قوة عندي.
گتله مو غريبه عليك سوالف امك ..

رضوان .. هاي سنو سندريلا اسو سايلة حذائج؟

: اي نفس حال سندريلا عدها مرت ابو وانا عندي اخت ابو نفسها ماتختلف عنها بشي.
دنكت اللبس حذائي
رضوان : وين رايحه ..
: للبيت ..
: منو يوديج
: اشوفلي تكسي من الشارع
: تعاي انه اوصلج.
: ضحكت وماتخاف على روحك مثل اخر مرة
: لا مااخاف عود اتساهد قبل لااصعد.  
...ضحكت وصعدت وياا .. 
حرك سيارته .. بهاللحظة خابرني امان
رفضته وقفلت التليفون ..
رضوان .. وين ماوين وسون تقضين وقتج هسه بالعطلة ..
سمية .. ماكو غير البيت طبعا
: ليس ماتستغلين.
: وين اشتغل اصحاب شهادات مالاكيلهم شغل انوب انه! !
: استغلي وياي اريدج مساعدة اليه بالعيادة.
: بس كلشي مااعرف انا بشنو اساعدك.
: انت معليج انه اعلمج والمجمع الطبي قريب عليكم كلس فكري ورجعيلي خبر ..

------
صفا .. كعدت الصبح سويت ريوگ الفراس
ورحت كعدته نزل تريگ ..
خلص محضرتله الحمام سبح ونزل نزلت وراه
بوس امه من ايدينها وراسها وطلع
عمتي مگرمه مابيها تمشي بس تزحف.
طلعت وراه باسني كال رجعي نامي لاتظلين كاعدة بعد وكت .. ابتسمت اله ودخلت جوه ..
غسلت المواعين ورجعت نمت شوية
كعدت خابرني كال نروح العصر للسوك نشتري ملابس،جهزي نفسج كتله ماشي ..
صار العصر اجه هو يحب ينام هيج وكت
نام وكلي اكعدة بعد مااخلص ..
لبست وخلصت كعدته سبح وبدل وطلعنا للسوك
جاي نفتر ولازمين ايد بإيد
كتله فراس انتظر انفتح قيطان حذائي
ماخلاني ادنگ .. نزل وربطه الي
متت من الخجل گتله ليش سويت هيج انا اربطه
كال لا مابيها شي انت مرتي ومااريدج تدنكين وانا شسويت قابل.
اخذني من ايدي افترينا السوگ اشترينا
نفسه حلوه مالها مثيل اشتره لاهله وخواته وجهال اخو كل واحد حاجه امه وابوه مانساهم.
يمشي ويسلم اصدقائه هواي ..

مرت الايام هادئة وحلوة كل خميس نطلع كلنا سوه
لو نروح للساحل لو تايم سكوير لو بصرة لاند
واذا مايرحون اهله ياخذني وحدي للمطعم لو نروح للجزائر نشتري موطة ولفات ونرجع
بهاي ال 3اشهر العشتها ويا جانت احلى ايام حياتي
سمية تخابر وترزلني ولج ليش ماتجين تخابرين تسألين ناسيتنا اكلها اي لان عايشة ..
يوم منهن الظهر اجه فراس ضايج روحه بخشمه
كال راح انام ..
هو نام وانه رحت اغسل ملابس
وكهرباء ماكو فركتهن بيدي
سمعت عمو صاحني كال روحي وعي فراس خلي يسوي واير السحب مكطوع ..
رحت كعدته ماقبل يكعد
لحد مااجه عمو للغرفة ..
وظل يحجي .. كام على حيله وانا مقهورة عليه خطية تعبان ماكمل نومته .. راح سبح وبدل
اخذ درج حديد ودرنفيس وطلع ..
كعدت بالطارمة انتظره .. حاره وكهرباء ماعدنا ..
بعدهه سمعت هوسه بالدربونه.
اجه حماي ينهد ظل يصيح فراس انتل فراس انتل
لطمت وجهي وركض لباب الشارع ..
صار كدامي صاح وين رايحة طبي جوه
دفعته وكومته بالكاع ماادري منين اجتني القوة
قلبي وروحي مثل طير مذبوح ع النص ..
طلعت بره ووصلت لمكان الحادث
شفتهم ملتمين عليه ويضربونه بالعصي يسحبون منه الكهرباء وانه بدشداشتي وابجي .. اريد بس اروحله ماكدرت .. كومه ملتمين عليه.
شافتني جيرانه انطتني عباية ..
خابروا الاسعاف واجت وانه واكفه واصرخ وابجي وماحاسة بلي حوالية شنووو.
بس لزمه المسعف نتله من شدة الكهرباء الي بجسمه
صعدت وياهم بالاسعاف بس مااكدر اجيسه
كضيتها بجي وصياح وهو فاقد وماحاس بشي.
اكله فراس لاتتركني الله يخليك.
ابجي واشهك وادعي وحالتي حاله ..
وصلنه المستشفى ..
كالوا حالته خطره نقلوا للجملة العصبية
نقلوا وهناك قرروا يسووله عملية لان عنده نزيف داخلي .. سووله العملية ونجحت بس دخل بغيبوبة بعدها وماخلوني اشوفه ..
بعد العملية الطبيب گال ننتظر 24ساعه ..
كعدت ادعي واصلي ربي كون يفيق ويصحى ويصير زين دموعي مانشفت وكعدت اتوسل بعمو بس خليني ادخل اشوفه اترجاك عمو ونزلت على رجله ابوسها بس اسمحلي اشوفه ..
يتبع ..