رواية لمْ تكُنْ خطيئَتُنا الفصل الثاني والثلاثون 32 - بقلم نورا ناصر

#لم_تكن_خطيئتنا
بارت 30
نورا ناصر ..

صفا .. عمو الله يخليك دخلني ابوس رجلك بس اشوفه طفي النار البيه عليه هذا رجلي الله حبوبي.
ونزلت على رجله اريد ابوسها گام رفعني وانه منهارة بس نظرة ياربي نظرة منك اله لاتيتمني بي.

ابو فراس .. يابنيتي الدكاترة مايقبلون مايصير احد يدخل وضعه حرج ..

اخو فراس .. يابه هاي خبصت المستشفى خبص فضحتنه ختروح تشوفه وانه ارجعها للبيت ماظل هنا انه رايح استأذن من الطبيب اگله يطببها.

صفا .. گعدت بالگاع وابجي وانتظر حماي عباس يجي حتى يخلوني ادخل.
اجه عباس وويا دكتور گال دخلي بس وحدج 5 دقايق بس وتطلعين.
ظليت امسح عيوني وخشمي بالعباية واجاوبهم اي اي ماطول والله هسه هو بس يشوفني يگعد.

دخلت عليه بس شفته انرعبت
رابطين ايديه بسرير المستشفى
راسه مضمد وايرات وصوندات اشكال على جسمه
شگالت روحك حبيبي من وگعت من فوگ
يبعد عمري ريت الوجع البيك بيه ..

ظليت اشهگ اشهگ ودمعي مايشفعلي
وين تريد تروح عني فراس وين علقتني بيك
ولك لو كاتلني لو ذالني ماجان انحرم منك
اكعد لو مشلول انه اصير الك ايد ورجل بس اكعد وحق الله مارايدة منك شي
حبيتك فراس والله شاهد عليه
شفت بيك الاب والام والاخ صرت الي كل شي.

تقربت منه بخطوات يائسة وبعد لحظات خوف خايفه ااذي اذا اللمسه ..
شفت الدم محصور من يم الربط مال ادييه وصايرات زرگ كسر گلبي ليش هيج مأذينه خطيه
تقربت وفتحتها..هي لحظات و جسمه ظل يهتز قووي ووكع من الجرباية ظليت اصرخ
اجو الاطباء وعمي وحماي وطلعوني بره.
طلع الدكتور ..
سأله عموو .. شبي دكتور شبي ابني
صفا .. باوعلي كال ليش تفتحين ايديه من السرير.

صفا .. وسط الدموع كتله ايده محصور بيها الدم وصايرة زرگة ..

الدكتور .. رجلج قوي وجسمه بي شحنات كهربائيه
المهم النزيف هم رجع وراح نسويله عمليه ثانيه.

صفا .. عفية دكتور گلي شراح يصير بي.

الدكتور .. احنا جاي نسوي الي علينه وبقت يم الله وانتوا هم توقعوا كل شي ..
وراح ..
رجعت گعدت على الارض ..
عباس .. گومي صفا گومي اوديج للبيت يلله لاظلين هنا ..
: وين توديني ماعوفه لحظة والله ابقى هنا.
: كومي كومي يله لاتعاندين احنه اي شي يصير نخابركم.
: وانه انتظرك علما تخابر لا ماروح كاعدة هنا ماضارتكم بشي انه هذا رجلي وماعوفه وحده.

عباس .. بويه احجيلك كلمة وياها مجلبه هنا خلي اوديهه للبيت وباجر اجيب امي واجيبها وياها.

صفا .. اجه صوبي عمي وكوة يحجي من دموعه
كال كومي بنيتي روحي للبيت ظلتج هنا مامنهه فايده.حطيت راسي على ركبي وظليت ابجي
گتله عمي ماروح مااريد خلي ابقى هنا ماسوي شي والله ..
سمعته كال خليهه تبقى ..
بقيت گاعدة واشوف الدكاتره تطب وتطلع عليه
ومابقى واحد مااجاله للمستشفى ...
والكل يبجي عليه نسوان وزلم تبجي ..

بعد ليلة بالمستشفى ماضكت طعم النوم بيها ولاثانية قطرة ماي ماشربت لكمة اكل مااكلت.

صار الظهر ووقتها شمس قوية طلعت
ادعي الله .. كعدت بالشمس بلكي الله يعطف عليه ويستجاب دعائي ..

ابوي وسمية ورقية وفاطمة اجو للمستشفى  ركضتلهم ابجي وانحب ..
تعبت كعدت بالكاع ..
وعمي يكللهم اخدوها للبيت خلتبدل وتغسل تاكل ترتاح ..
كتلهم ماريد مامحتاجة شي كلشي مااريد
سمية يمي كاعدة بالكاع لازمتني من كتفي وتبجي
كرفص يمي ابوي گلي يلله يابه گومي اوديج ارتاحي وارجعج بيدي والله ..
گتله يابه كللهم خلي اروح اشوفه عفية مايخلوني والله اروح وياك بس خل اشوفه ..
كام وراح حاجاهم ..
قبلوا ادخل .. دخلت يمه. بعده بالغيبوبة
باوعتله اريد اخلي عيوني يمه
مااجاي اشبع شوف منه احاجيك.. شبساع اتريد تتركني بعدنه ماشفنه شي من زواجنا ع الاقل اتركلي شي منك اشم ريحتك بي.
خليلي ذكرى منك ..
اللتفتت ليوره خاف لااحد وراي لان محذريني مااتقرب هواي منه ..
حجيت ويا فراس فدوه اسند نفسك الخاطري ارجعلي اريدك والله عشيرتي كلها تروح فدوه لأسمك
لاتيتمني بعدك عفيه ..   فراس يردوني اروح للبيت انت تقبل اروح لو ابقى يمك فراس راح الزم ايدك اذا تريدني ابقى
اعصر ايدي .. ..
لزمته حسيته عصر ايدي وجسمه ظل يهتز حيييييل
وكعت على ركبي وفقدت وظليت اصرخ
تريدني وماتكدر تحجي وينه صوتك فراااس
اتخبلت عليه
اجوني طلعوني فقدت مااعرف شسوي ..
بعدها تخربطت كلش ..
هبط عندي الضغط اخذوني وانا شبه فاقدة للبيت
مددتني سمية على جربايتي ..
وكعدت يمي تمسح بدموعي
كتلها بعد ماانام يمه هنا ولج كله ينومني على ايده سميه كلكم مااريدكم بس خلي يعيش الي هووو

سمية .. شبيدي عليج والله لو بيدي انطي روحي خلي يعيش الج على الاقل وحدة منه تعيش بسعادة انه مارايدة شي من هاي الدنيه ماعندي امل بيها.

صفا .. مايصير واحد يمووت بداله خلي يعيش الي هو.
سمية .. ماكدرت احجي طگيت بجي حالتها تصعب على الكافر.
صفا .. اريد ارجع للمستشفى ..
كومتني سمية .. ماتدخلين تسبحين الجو حار
بلكي ترتاحين.
صفا .. ماارتاح سمية اذا مااشوفه گبالي ..
سمية .. تشوفينه ان شاءالله حياتي بس ارحمي حالج اتقوي هو يريدج قوية مو هيج اكليلج لكمة اكل شربي ماي ..
صفا .. مااريد بدلت هدومي گتلها وين عمتي؟
: عمتج بالضيم جوه ..
: طلعيلي عباية راس.
: عندج انت عباية راس؟ ؟منيلج ماكو.
: هاي الي جنت لابسته بالمستشفى.
: غسلتها وشريتها كلها تراب.
:بصياح  اله تغسلينها تولي انه وين رايحه رايحه عرس.
: اهدي شبيج هسه ندبرلج وحدة من جوه اكيد عدهم ومايخلون منها.
تحسرت كتلها يلله اروح لعمتي ماشفتها راسا صعدت لغرفتي ..
نزلت جوه رحت لغرفة عمتي جاي يحضرونها يردون يودونها للمستشفى
شفتهه متمددة
على سريرها شافتني ظلت
ظلت ماتعرف شنو تگول
تريد تكوم مابيها ودموعها عشرة عشرة على خدودها شمرت روحي عليها حضنتها وهي بس تكول أفا أفا كلش حالتها وحتى النطق فقدته.
گابلتها وابجي ..
جابتلي سمية عباية راس دبرتها منهم
اخذتني وصعدت بسيارة ابوي
وعمتي اخذوها بناتها بسيارة زوج حماتي

وصلت للمستشفى بالليل جانوا مدخلينه لغرفة العمليات
سودة عليه شكالت روحك عمليتين خلال يوم ونص

الانتظار صعب وطويل .. لساني مابطل دعاء
عيوني مانشفت من البجي
وقلبي ماتعب من الوجع بقى يوجعني عليه
اصابعي مابطلت تسبيح
بيدي سبحة واسبح ..
سمية يمي وتبجي وياي ..
صاح عليها ابوي كال يلله خنروح ماترحين ويانه صفا ارتاحي وباجر اجيبج من الصبح ..
هزيت اله راسي گتله لا ..
بوستني سمية واناا فاقدة ..
كالت رايحه جريتها من ايدها كتله ادعيله عفية
رجعت حضنتني وتحجي.
شون ماادعيله بس والله مالها داعي كعدتج هنا امشي وياي.
مااريد سمية روحي يلله ..انا باقية حد مايصحى.
وخرت من حضني كالت ..
ان شاءالله يصحى على كيفج ويا نفسج واكلي فدوه العينج.
مااريد اكل خل يكعد يلله ..
عصرت ايدي حييل غمضت عيونها وطاحت دموعها كامت وراحت تمشي وره ابوي.
بقيت انتظر وبصفي اخت فراس الجبيرة مابطلنه بجي ولادعاء ..
طلعوا من العمليات ..
كالوا الي علينا سوينا بقى كل شي يم الله
ننتظر اربعه وعشرين ساعه ونشوف ..
بقيت اون احس عيوني غوشت .. صداع موتني الوب عليه اريد اشوفه منعوني من شوفته ..
مر الوقت بسرعه بعد 3 ايام بالمستشفى
كالوا مات سريريا ..
تخبلت تخبلت ربي بمعجزة ورجعه اليه
فدواتك مارايدة منك شي
والله اتوب عن كل معصية وشيگلي اسويلة اطيعه اكثر من قبل ..

ساعة 5 الفجر .. طب عليه الدكتور
ومن طلع كال انا لله وانا اليه راجعون.
هنا عرفت مات وراح يم الله ..
شلون بهالسرعه يخطبني اوافق نتزوج احبه اتعلق بي ويموت مر شريط ايامي ويا كدامي
تمنيته موزين وياي تمنيت ياذيني يضربني بس مو اتعلق بي يموت ويتركني ..
ودوا للثلاجة گبال عيني .. وانا مثل الحمامة المنحورة ماادري شسوي بروحي .. ضربت رجلي
قوي ماادري شصار بيه ..
رجلي ظليت اعرج مااكدر امشي منها
جسمي كله يوجعني بس الم روحي اقوه
رجعنا للبيت .. عمتي جانوا جايبينها من المستشفى شمرت روحي عليها اريد اشتم ريحته بيها
اي صوت ماعدها الدموع ناشفه بعينها.
بس تضرب على رجلها بايديها وماتعرف شتسوي.

كوه جروني واخذوني لبسوني اسود وجابولي بوشية اللبسها .. اجوا خواتي وكل اقاربي
حضنت سمية وابجي اكللها مويدري بيه احبه ليش عافني ..
ماكو اجابة حد يومه ووصل ..
كعدنه هواي ننتظر التابوت يجيبونه للبيت حتى يودع بيته ويودو لمثواه الاخير ..
اصعب لحظات هايه عبالك راح يجيبونه الي عدل موميت ..
كالوا جابو بالجامع القريب منه راح يغسلونه ونوب يجيبونه هنا .. كلساع تجيني وحده لايطلع صوتج لاتبجين البوشيه لاترفعيهه تره تأذينه بگبره ويصير برگبته طوگ حديد من نار وبس تموتين يصير برگبتج.
فوگ الميت وحدة اجت كلتلي هالحجي وانه غاديه نار والجو صيف وحاره وكلساع كالن نزلي البوشية لاتأذينه مايصير يطلع شي منج.
كالوا جايبينه يم الباب وهنه اجني لبسي وسكتي وصوتج لايطلع ..

صيحت سميه وخرن وخرن موتنهه شجاجن وكتجن هسسه .. صيحي وصرخي وماعليج بيهن  راح تموتيين.

بعد ماوصلن يمي وانه بس اوون.
جابوا التابوت فروا بالبيت اللطم والصريخ والبجي سد اذني خليت  راسي ع التابوت يم راسه
كتله سامحني ابريني الذمه خاف اذيتك بيوم
الكل بجه عليه نسوان وزلم اهل وجيران وغربة مامأذي احد بعمره كله ..
مااعرف شون خلصت الفاتحة محد ماتمرض عليه حتى ابو يلوم روحه ابو المولدة اجه يبجي بجي ماصاير كال نسيت انزل الجوزة هو خابرني وانه اللتهيت.

صعدت الغرفته كوة رجلي تاذت واللتهب العصب ظليت اتالم منها.
اباوع الغراضه ملابسه واصرخ وابجي
لحد مايغمى عليه
اخذت المكص كصيت شعري كله وذبيته الوقت مااعرف شون يمر موحش مظلم من دون صوته وضحكته ..
بيوم السابع جابو صورته الي يردون يخلوها على قبره اصدقائه مسوينهه
باوعتلها
جانت صورة بالشته ولابس جاكيت رصاصي شتوي واكف يم سيارته وضاحك .. مرد قلبي مرد عبالك واكف يمي وجاي يحاجيني والضحكه هاي مرسومة الي.
بحياتي كلها ماعشت مثل الاوادم بس هالايام العشتها ويا مكتوب عليه هالالم والحزن بفراگه
بنفس اليوم جنت بالغرفة واحاجي صورته
شفت سمية دخلت عليه
حضنتني وبوستني
كالت يلله ابوي يكول؟
شنو يلله؟
امشي ويانه ابوي يكول هنا عندج حمويين وناس طابه وطالعه ومالها داعي گعدتج هنا.

روحي سمية گليله ماروح مااترك غرفته انه ومااترك اهله وهم بمصابهم.

امشي صفا يلله هناك لزمي عده ابيتنه يلله عمري.

اريد اللزم هنانه عدة سمية خاف اطلع حامل ومااحرمهم من حفيدهم مثلما انحرموا من ابنهم.

سمية .. هذا حجي ابوي كومي يلله ينتظرج جوه.

صفا .. زدت بالبجي ولج خطية عمتي اعوفها متأملة اطلع حامل وابقى يمهاااا .. نزلي وكولي لابوي مااروح وياكم ابقى هنانه مااتركهم بمصابهم.

للحكاية بقية ..

اسفة على كمية الالم الي بالبارت
اعرف البارت قصير بس ردته يبقى خاص بصفا وفراس .. الله يرحمه ويغفرله ..

هنانه حابه انوه على شغلة من تجين تعلقين على شخصية بدون سب وشتم لان يمكن هو ميت وانت متدرين لذلك دائما تحكموا بتعليقاتكم 🌹

وبالنسبه للتعليقات الجارحة بحقي الي تكول تقطرين عليه البارت تقطر وغيرها من هالحجي ياريت يكون عندج اسلوب افضل بالتعليق.

بعيدا عن القصة وصلني تنبيه من بنيه متابعه حابه تفيدكم بي تنصحكم بعدم الثقه بابطال القصص الي يظهرون شخصيتهم بمواقع التواصل والابتعاد عنهم.