رواية لمْ تكُنْ خطيئَتُنا الفصل الخامس والعشرون 25 - بقلم نورا ناصر

مساء الخيرات
شلونكم حبايبي مشتاقتلكم
اشكر كل الي دعولي ولكم بالمثل يبعد عمري انتوا ❤
جاهزين للتكملة ..

#لم_تكن_خطيئتنا
بارت 23
نورا ناصر

سمية .. قبل يومين من حفلة صفا ..
جنت متمددة على السرير وافكر يربي هسه وكتها ايدي مجبسة شون اللبس وشون ارگص بالحفلة ..
الف بشعري باصابعي وافكر ..

رن تليفوني .. باوعت هذا امان! !
ابتسمت .وقلبي نفض . مديت ايدي لشعري احك بتوتر اخجل كدامه كلش واستحي احجي ويا صوت
انا شبيه گدامه يربي ..

عود انا جريئة بس كدامه غير ..
تنهدت وفتحت خط گلت الوو بخجل  /.

گال شلونها حبيبتي ..
من سمعت كلمة حبيبتي معت رجعت اتكيت على تاج الجرباية ونسيت ايدي المصابة عطت اه ..

فز هو گال شبيج شبيج ..

يبووو من الفشلة ماادري شحجي ..
گتله دحچت ايدي بالحايط ..

: غير على كيفج ويا نفسج ياعيني ..

يبووو انا كدام الكلام الحلو تتخربط اوضاعي لان مامتعودة .. 

گحيت همست اي ..

گال شبيج خجلانة ماتوقعتج هيج خجوله ..

: اي مو مامتعودة. 
: اوك المهم اني راح اجيكم هسه.
انتفضت من مكاني:  صدك تحجي.

: اي راح اجيب بيبيتي ماتقبل تبقى يمنه متعودة عليكم واريد اشوفج لان باجر راح ارجع لأربيل.

بحزن گتله:  ليش ترجع؟

: مبين ضجتي .. حبيبتي المهم ثبتت حبي الج  وهذا احلى شي صارلي برجعتي لهنا بعد سنين وانا متغرب  ظفرت بحبج وصرتي اميرة وتتربع على عرش قلبي ماجنت احلم بوحدة مثلج ابد عاجبني كل ذرة بيها.

:يربي شون كلام اخجل انا تره
گتله يعني بعد ماترجع؟

: لاشون ماارجع هو اني اكدر ماارجع وحبي هنا لو مملتقي،بيج جان رايح من زمان وماراجع
بس لان  عمي وعائلته راح يروحون اروح وياهم فد نوب هناك هم عندي شغل ..

: عمك؟ ؟ يعني ابو فرح؟ راح تروح وياهم ..

: اي هم ..

: والله اضوج منها هايه فرح يعني ضروري تروح وياهم ..

: ضحك گال ليش تضوجين منها ..

: هواي تتقرب منك وتندحس بيك ..

ضحك گال وانت تغارين منها مووو؟

باصرار كلتله اي اغااار ..

: اويلي ... لتخافين حياتي اني احبج ومكتفي بيج خو لو اريد جان ارتبطت بيها وهي گدامي طول الوقت بس قلبي اختارج انت.

: ميخالف لاتروح وياهم سويلك شي حجة وخليهم يروحون وحدهم مو هي مبينة معجبة بيك والله اباوعلها عيونها كله عليك وتتعمد تطخك وتلزمك.

: ضحك كال هاي شوكت انتبهتي عليها وانت بس مره وحدة شفتيها.؟

: اي انتبهت عليها من ذيج المرة ..

: لا تخافين خلي تصير الج ثقة بيه ..

: والله اظل اكل بروحي ها كلمها ها باوعتله ها باوعلها.

: اسم الله على روحج ياروحي واني اكولج اطمئني عيوني ماتشوف احلى منج.

: احلف ماكو وحدة تارسة عينك غيري.

: ضروري احلف يعني،؟

: اي اريد قلبي يرتاح ويطمأن.

: ولج والله والله احبج اقسم اعشگج جيبيلنه خبزة نحلف عليهاا.

: ضحكت ..لا هذا هو مايحتاج  وهسه ياحبيبتي.
اگول امان؟
: گولي حياتي؟
: احم هم جانت علاقات  سابقا؟
: ليش احسج تعرفين شي؟
:مجرد سؤال اذا ماتحب تجاوب عليه ميهم.
: واذا ماجاوبت عليه تطنگرين موو؟راح اجاوبج اي جان عندي هواي علاقات وختمتها بيج حبيتج ومليتي عيني وان شاءالله تتكلل بالزواج.
بيبي دتنتظرني لازم اروح ابدل ملابسي واجيبها حتى نتشاوف.

: اوكي صدك عود تتعشه عدنا. !؟

: يعني انت عا زمتني على العشا؟

: اي ..

: يلله اوكي لعد اتعشه عدكم حتى هم اشبع شوف منج ولو متاكد مراح اشبع.

: ههه يلله باي.

سديته وادور وراي اشوف صفا واكفه اخترعت
صحت يمه انت من يمته هنا. ؟

هزت بايدهه قوي گالت صايرة كلش خفيفة اثگلي شوية اثگگگلي عييب شراح يگول عليج.

: وانه شسويت هسه اشايفتني سويت.
راحت گعدت على السرير مالتها مقابيل سريري.
: وبعدين انت عزمتي على العشا منو راح يسوي بلله.

: البركه بيج انت منو غيرج تدرين بيه ايدي جان ماقصرت والله.

: انت اذا الله قدرج وكمت تسوين اكل ماكو غير الاندومي والبيض عيون و كلش كلش اذا ردتي تبدعين تسوين بيذنجان محروگ وبتيته كل وحدة بگد المخدة ومامستويين.

: معليج مني وهسه شراح تسوين عشا ..

: والله هو حبيبج مو حبيبي مااعرف شنو يحب .

: انت مو البارحة سويتي همبرگر وزادت منها وخليتي بالفريز اي كومي سويها ووياها فنگر ونخابر ابوي نوصي على كباب من السوگ ..

: اي خابري انت گليله حبيبي حيجي يتعشا عدنا جيبله وياك كباب.

: لا عادي اگله انا مشتهية كباب وهو يجيب مايگوول شي ومن يجي امان هو راح يلزمه على العشه.

: ماعليه انا كايمه اسوي الهمبركر .. ووصي ابوي على سندويچ همبرگر همه ..

: انت مو هذيك المره سويتيها طيبه سويها هالمره حبابه هسه ابوي يشك.

: خلت ايديها على راسها وصرخت اخخخ ولج عروس انا ارحميني خليني ارتاح شوية بعد يومين حفلة خطوبتي.

: اي ميخالف انت نادرة ومعدلة وهسه اكيد تخلصين كل شي بسرعة.
شمرت عليه المخدة وراحت كبل لاتطلع وكفت يم الباب گالت خابري ابو مو كلساع  اطلعيلي شغلة ..
واختفت بسرعه

ضحكت .. خابرت ابوي على الكباب .. كال المغرب اجي واجيب وياي ..

سديته منه .. رحت غسلت وجهي .. ورجعت للغرفة فتحت الكنتور.   اگلب بالملابس ..

اريد شي مرتب .. كومت الملابس على سرير صفا لان الكنتور بصفه .. اسحب الملابس واشمرهن.

حد ما صاروا مثل الجبل .. ماعجبني شي ..
حولت على خانة صفا .. فتحتها .. ظليت اقلب بايد وحدة بالملابس .. صار كبالي چاكيت بهاري لونه تركوازي بي خرطة على الخصر ووياه كبوس لزگ وسحاب ذهبي  من الوسط .. لحد الورك وويا بدي اسود وستريج ثخين مو كلش ضاب.
عجبني .. شمرته على السرير مالتي. ..

رحت للمطبخ شفت صفا منهمكه بالشغل ..
رجعت للغرفة حاولت اللبس وحدي ماگدرت.
رتبت وجهي وبايد وحده بس اللبس صعبة.

اخذت الملابس الي كومتها على السرير وارجعهن  للكنتور بدون تسفيط هيج حشك .
دخلت صفا .. عفية بالنادرة عفية ..
بتوسل گتلها عفية تعاالي لبسيني ادري بروحي مو نادرة.
كعدت على السرير .وهي جوه . كفت الستريج بيدها ودخلته برجليه تلبسنيا .. تباوعلي وترفع تك حاجب
: الحب غيرج 180 درجة والا من شوكت سمية تعدل وتبدل وتمكيج بالبيت يومية جنج زعيبل ..

: دنگت عليها گتلها أنا كالمجنونة بالحب ..

: مو جربنا الحب ماسوينه مثلج ..

: سكتت ..
كملت لبستني الستريج گالت ديري بالج لاتطيرين زايد تره توكعين.
وانا رايحة اكمل شغل بالمطبخ ..
رجعت گالت اكول هذول مو جنهن هدومي؟ !!!

: ضحكت اي جان لابسهن الكنتور انت ماتلبسيهن.

: امي جابتهن اخر مرة ونسيت اللبسهن يلله بالعافية عليج.
: اي انه صايرة عالة عليج هالايام تحمليني يلله اردهه الج ان شاءالله
  : عابت ليش تكولين هيج  تفاولين عليه ترديني انكسر.
:هههه لا ولج مو وراج زواج وحبالة يمكن تتنسين وتجين عدنه انه اداريج.
: هف الله كريم.. ولج صوت هورن يمكن اجه حبيب القلب.
طلعت صفا للباب .. وانا ركضت على المجر فتحته وطلعت سواري الذهب الي جابته الي امي.
صحت عليها ولج تعاي لبسينيا .. رجعت كالت
اوووو هسه اله تطلعين بكامل اناقتج راح يخطبج خو ما راح يخطبج.
جرت ايدي وبلشت تلبسني.  
گتلها اي غير يتزوج رضوان العلة حتى يجي يخطبني.
: ورضوان شعليه ..
: غير تملا عينه مرته وينساني.
ماجاوبت ..
خلصت وطلعنا .. خليت الكبوس على راسي.
شفناهم يم الباب .اجت عيني بعينه. طار گلبي .. استحيت كلش.
گال سلام عليكم وهو عينه عليه ومبتسم.
ردينه السلام انا وصفا وعيوني تروح تروح وترجع عليه من الخجل.
دنگت على بيبيتي بوستها هي قصيرة گالت ها مگموعه ولج خوفتيني عليج كلبي فرفح سوده عليه شوف ايدهه.
سمية ..لاتخافين بيبي صرت زينه.
: الحمدلله شريد انه غير تصيرين زينة.

صفا اخذت بيبيتي ودخلت.
امان يباوعلي ..بيدة جنطة ملابس بيبي والايد الثانية علبة حلويات وعلاكة هدايا ..
بهيام ونظرات مليانه حب گال: شونج.
بخجل گتله زينه.
: هاج هاي العلاگه الج ..
: كتله بخجل الي؟
: اخذيها وروحي ركض بس مو توگعين.
: ضحكت .. لا مااطيح .. مديت ايدي جاي اخذها لزمني من كفي وعلكها برسغي بعد ماانتهى من تعليگها  ضغط على ايدي قوي رجف جسمي .. باوعنه لبعض بهيام.
امان .. بعدهه ايدج ثلج بارده
سميه .. انت ايدك تجوي ..
غمزلي گال ..  يلله نفوت.

دخل جوه .. رحت وديت العلاگه للغرفة.. تمنيت اعرف شنو بيها .بس ماافتحتها. كعدت يمهم شويه هو وبيبيتي ..
اتأمل كل شي بي. من شعره لرجليه ..
عيوني تحوم على كل شبر منه .. شكد جنت احلم بالحب بس ماتوقعت نفسي راح الگاه واوكع بي .
جان بالنسبه الي حلم بعيد المنال.
صرت هسه اتنفسه ازفره واشهگه .. احب كل شي بي ..
احس روحي هادئه وحنينه كلش ومايعكر صفوها شي مادام هو گبالي تمنيت هاي اللحظات ماتخرب وماتنتهي .. وتبقى عمر.

حسيت على بيبيتي توزع نظراتها بيناتنا بحيرة وتعجب من يسولف وياها بس عينه عليه ..
استحيت وگمت .. رحت يم صفا ..
وهيمانه بي اريد اكعد يمه بس اخجل حييل.
لحظات واجه ابوي .. صبينه العشا
اكلنه كلنه سوه .. سيطرت على نفسي بوجود ابوي
بس احس نفسي مفضوحة بحبه .
قبل لايطلع دنگ على بيبيتي بوسها
كال في امان الله
حسيته جان كلش محتاج يباوعلي بس ماكدر لان ابوي واكف ..
             .. وبعدها راح بسرعه. ..
طلع وراه ابوي .. صفا اخذت ستكانات الچاي ودتهن للمطبخ.
كضتني بيبيتي من عكسي ..
ولج لاتسوين ويا هذا سوات اختج تره تبجين دم.
لا عبالج هذا مثل ذاكوولي .. يندمج والله.

لزمتهه من خدها گتلها اووي فدوه زكزوكه تفهم للغة العيون نزلت عليها شميتها واحس،عطره بيها تمنيت هالعطر بيه ..
تذكرت العلاگه نسيتها .. رحت ركض للغرفة
هم زين مااتدعبلت .. من شدة السرعة.
دخلت .. وقفلت الباب .. جريت العلاگه ..
فتحتها طلعت منها دبدوب على شكل سمايل وعيونه قلوب حمره 😍هيج شكله.
ظليت اقلب بي واشمه عندي كلشي هو مدام بي ريحة الغالي شلون هيج حبيت يربي.
ويرجع بيه الزمن لحظات ليوم خلصني من عمي حسيت بي سندي من ذيج اللحظة وبدأ يتسلل الحب القلبي شيئا فشيئا وبكل لحظة احسه يكبر وينمو اكثر. واليوم وبشوفته تاكدت بانه هذا الحب والي اكتسح كل مشاعري بعنف مستحيل يهدأ ومستحيل يتوقف.

على صفنتي رن موبايلي .. فزيت واخذته
شفت تليفوني يضوي برقم تليفونه
انرسمت على وجهي ابتسامة
جاوبته
گال والله ماشبعت منج راح اشتاقلج مو من حق المشتاق نظرة وعناق.

: اي من حقه بس كون بالحلال.

: والله لو انت حلالي جان حضنتج گدام ابوج.

: لا عاد مو الهالدرجة ..

:لا الهالدرجة ونص .. يلله كوليلي شفتي الهدية؟

: هسه بيدي ..

: شفتي شنو بيها؟

: لا

: اقلبيها واكو زنجيل افتحي وشوفي شنو بيها اني جاي اسوق هسه.

: ماشي يلله ..
سديته وفتحت السحاب مالة.  السمايل ..
بي بطاقة اخذتها مكتوب بيها بخط كلش حلو

يا أنتِ
أُحاول أَن أَربط الكلمات و أُقلب في اللغات
لعلني أَجد مخرجا لعشقك الذي توغل في الجسد و الروح
و لكنني أَعود من حيث بدأْت عاشقا يسهر في بحور عينيك.
احس طرت بهالكلمات لاعلى سماا.

احس هالكلمات نزلت على قلبي مثل العسل من كثر حلاها .. يربي احس نفسي،بحلم مااريد اصحى منه.
ووياها اسم امان بالانكليزي مصوغة صياغة ذهب
مثل عين القلادة ..
ضحكت هديته تدل على غروره وحبه لنفسه لدرجة صاغ اسمه صياغة ..،
بين افكاري هم اتصل  .. ضحكت ..
ياربي كون ماتتبدل فرحتي .. ديمها عليه ياربي.
جاوبته كال شفتيها
كلت اي وبخجل ..،
امان .. المره الجايه ومن ارجع اصيغ اسمج ويبقى يمي راح اصيغه شميه شنو رايج ؟
ضحكت ..
وختمتها ويا وكملت ليلتي وانا سعيدة بحبه
حضنت المخدة ..تمنيت احضنه هو
بدل هالاقمشه الباليه  و يصير مسند لراسي الليلة و كل ليلة  !

مرت يومين بحفلة صفا
خابرنا على مناضل يجيب رقية ماقبل كال الا العصر
ردنا ناخذها ويانا
للصالون ترتب نفسها ماقبل
كوه لزمت اعصابي ومارزلته ناويتله على نية گشرة
بس مشغولة بحفلة صفا والتجهيزات
روحي نار كبره على رقية حاجزها حجز ..
رحت ويا صفا للصالون .. سويت تسريحه .لشعري.
الفوگ كله بف والجوه نازل بيرمن ..
وصل لحد نص ظهري ..
الفستان اسود طويل ..بردن واحد والثاني مفتوحه وعلى الكتف ورده  ..

صفا طلعت اية من الجمال الكل يشهد على حسنها جدا جميلة .. وكل شي لايگ عليها ..
اما رقية  اجت تعبانة كلش
وجها اصفر وجوه عيونها اسود
ممخلية قطرة مكياج وفستانها مبهذل
مو رقية المعهودة ابد .. اخذتها جرر للغرفه اريد اعدلها ماقبلت دفعتني وتسوي حركات ماافهمها ..
اجو اهل فراس واللتهيت ويا صفا..
وعفتها ادور على عمتها وحماتها ماكو صارت هوسه.
بس اريد اسألهم شبيها؟ !
بعدها عرفت شبيها متت قهر عليهاا
بقت يمنه كم يوم وحالتها النفسية زفت ومحد گادر يطلعها من الي هي بي.

_______

إسلام .. بعد شوفة عيوني لصفا وهي بالبدلة
فقدت الامل باسترجاعها ..
وبعد الحاح عمي  خطبت هجران بنت عمتي اشواق بدون قناعة بدون حب وبدون مشاعر ..
خاصة بعد ما اتقربت منها حسبتها متكبرة.
هجران عمرها 19 سنة مرحلة أولى كلية أداب قسم تاريخ .. حنطية البشرة متوسطة الطول ملامحها حادة. شوية  .. وغير المشاكل الي صارت
لان عمتي اشواق تدور فخفخه وانا على گد حالي واحب البساطة ومااحب امد ايدي لأحد ولااحب احد يمن عليه بشي.
وهي اصرت اله قاعة وانا موضف بسيط وراتبي موهالگد وشايل فلوس بس على كد المصاريف الباقية صارت اشكالات تدخل عمي سليمان وكال فلوس القاعة عليه هالشي ضوجني بس كلت ميخالف ووعدته اذا الله رزقني ارجعهم اله الفلوس.
المهم تعدي على خير.

خابرتني وطلبت تكون الغرفة على ذوقها
كتلها ماشي وهالشي من حقها تختار غرفتها الي راح تعيش بيها ..

يوم ثاني رحت عليها للبيت انا وأُمي ..
اخذتها وطلعنا .. اول مانزلنه يم محلات الاثاث
شاورتني حتى لاتسمع امي گالت
إسلام .. ماناوي تبدل سيارتك موديلها قديم.
باوعتلها بعدم رضا وبداخلي مامرتاح لتصرفها هي شنو وتدخل بسيارتي بعد؟
گتلها .. عاجبتني اقتصادية وماشالعة قلبي ومو اله اخر الموديل المهم توصلني للمكان الي اريدة.

شفتها ضاجت ونظرات امي متحيرة
سكتت ودخلتهن لاقرب محل وظلينا نتفرج على الاثاث.

دخلنه اكثر من عشر محلات وكل شي ماعجبها
احس انفقعت مرارتي ومااكدر احجي مااريد من اولها ازعلها وورانه حصبة وجدري ع كولة الكايل.
حتى امي تعبت رجلينها وهاي ماناوية تصفى على رأي.
اخر شي باوعت الها حجيت
هاا هجران ماعجبج شي.
هجران .. لاء ماعجبني أشوو.
: اوكي لعد نرجع للبيت؟
: اي يلله.
ام اسلام .. ارجعي ويانه لبيتنا اتغدي والعصر يرجعج.

: اي مو اهلي كلهم دوامات مااكدر ابقى وحدي بالبيت اضوج.

رجعنا للبيت .. امي من دربها للمطبخ واحنا بقينا بالصالة ..

هجران .. اسلام وين غرفتنا الي راح نتزوج بيها؟
: فوگ تحبين تشوفيها.
: يعني هي نفسها غرفتك.
: اي نفسها
: اوكي اشوفها.

صعدنا فوگ ..
هجران .. يا هاي هيج راح نتزوج بيها حتى حمام ماكو  وانا شينزلني لجوه؟

: شسالفة تره اكو حمام هنا فوك وهذا كله راح يبقى الج .. احنا شعدنا.

: زين وشون بعدين تره البيت يحتاج ترميم واثاث جديد شون راح يجون اهلنا اهل بابا كلهم ناس طاگين وعلى كل شي يعيبون.

:كعدت على سرير گتلها  شسالفتج هجران تره بيتنا مابي شي واثاثه كله جديد ومرتب وانا بطبعي احب البساطة.

: انت لازم توسع الصالة وتجيب تخم ملكي لان الصالة صغيرة وراح يضيع بيها ويصير محلو.

: الله كريم منا لذاك الوكت خلي نختار النه غرفة نوم وبعدين نحجي بموضوع ترتيبات البيت واكيد قريب العرس انا راح ارتبة واشتري اثاث جديد انت لاتشغلين بالج بهالاشياء.

: اسلام انا ناسية تليفوني بالبيت ممكن تليفونك اخابر ماما؟

: اي ممكن هاج خابري ..
دكيت الها الرقم واخذته مني دقايق وصاحتني امي ونزلت جوه يمها ..
شفتها محضرة النا صينية بيها كرزات وحلويات وعصاير ..
گالت: يمه اسلام على كيفك وياها شماتگوول كللهه اي.
: لا مااكللهه اي يمه مامجبورة تقبل بيه وتدري على كد حالي.
: يمه سلومي مو احسن من ذيج الغدرتك.
: اوو يمه لاتجيبيلي سيرتها الله يخليج هنه اثنينهن ماعندي حظ وياهن مبينة من اولها.
اندگت الباب اروح اشوف منو.
خليت الصينية على اول باية من الدرج وطلعت للباب شفت ابن جيرانه ولد صغير گلي عمو طوبتنا طاحت على بيتكم اريدها.
دورتها شفتها بالحديقة انطيتهيا ودخلت
امي بالمطبخ جاي تسوي الغداء.
اخذت الصينية وصعدت. 
دخلت على هجران بالغرفة
شافتني جفلت ..
وظلت تدوس بالتليفون وكانها جاي تكنسل شي تطبيق ..
خليت الصينيه على الميز
عگدت حاجبي ماارتاحيت الحركاتها
گتلهاا شكوو؟
ترجف متوترة .. تباوعلي نظراتها  متحيرة وكانها تتهمني بشي وعيونها ماثابتة على مكان.

كررت سؤالي:جاي اكول شكوو؟
هجران:  عندك علاقة وي صفا ليش انا مااعرف؟

اسلام .. جريت التليفون من ايدها بعدم رضا
گتلها هذا ماضي ومو من حقج تحاسبيني عليه وبنفس الوقت مو من حقج تفتشين بتليفوني.

: بس انا من هسه صرت  زوجتك ..

.. رفعت ايدي گتلها جاي اكلج هذا ماضي وراح علينا بالجديد هسه.

: انا من حقي اعرف بهاي العلاقة.

: اولا انت جنت تعرفين انا خطبتها اكثر من مرة وهي رفضت.

: بس ماجنت اعرف بينكم حب وعلاقة جريئة وواصلة الهالدرجة.

: خلص هجران كتلج هذا ماضي وانتهى  هسه صفا مخطوبة واحنا همين.

: اسلام وديني لبيتنا حالا ..

: هجران اهدي مااله داعي كل هذا تره عادي كل واحد وماضيه انت ليش هالكد متأثرة .. تغدي هنا واوديج العصر.

: وانا كل الوقت عبالي صفا ترفض عمود مشاعري طلعت غداره وخاينة الحقيرة ..

: شنوو انت شجاي تحجين.

: وديني لبيتنا گتلك ..

: لاتصيحين وكعدي واهدأي انت مو كلتي محد ابيتكم هسه ..

: توديني لو اخابر بابا يجي عليه.

ام اسلام .. يمه شبيكم صوتكم طالع استهدي بالرحمن بنيتي ..

هجران :  خاله اسلام وصفا عدهم علاقة شفت المسجات بينهم كلها حب وغرام ووو ...

: عمري انت اهدي هذا ماضي وراح تره هي خانته وغدرته ..

: مثل ما خانتني وغدرتني  .. انا اعلمها الكلبة

: ماتوصل لاضفرج والله عيوني انت ختولي عليمن تطلع غير على امها العرگ دساس.

اسلام .. يممه مااله داعي هالحجي تره.
وانت هجران اهدي كل هذا مايهم عندي وكل شي انتهى وياها.

هجران .. وهذا اكبر دليل عليك بعدك ماناسيها ومحتفظ برسائلها لحد هاي اللحظة .. وماتقبل يصير حجي عليها هم.

: لان انا اعرف شنو الي صار بالضبط ومو بكيفنا نحجي عليها بدون دليل الولد خطبها وهي وافقت لان جنت قاسي وياها وهذا من حقها وخلص وهذا الموضوع ماينحجي بي مرة ثانية.

: ماابقى هنا دقيقة وديني يلله ..

: امشي اوديج امري لالله بس اسمعي هجران تهور مااريد ولاااريد احد يحجي بسمعة صفا ولا يوصل حجي لعمامي تره يصير شي مايعجبج وننتهي انا وياج.

: الهالدرجة تحبها؟ !!!

: مو حب وانما هاي سمعة وهي بنية ومخطوبة ومااريد يصير حجي عليها.
.. اشوفج سكتي ماتحجين؟

.. وديني هسه تعبانة اريد ابقى الوحدي ..

.. صار يلله امشي.

--------------------
سمية .. جنت ضايجة كلش على تصرف مناضل ورقية دموعها الي مانشفت .. اتصل امان جاوبته
گال شبي صوتج ليش متغير؟ اكو احد مزعلج حبيبي؟
: لا ماكو شي لايضل بالك ..
: اكيد اكو شي وضامته عليه يلله احجي اشوو ؟

ظل يلح صيحت هذا الكلب ابن الكلب مناضل زوج رقية
بعدني مامكمله ..
قاطعني اشش سمية شنو هالاسلوب
مو عيب تغلطين عليه وعلى ابو الميت؟

: احتركت روح ابو الي خلف واحد عار وماعنده رجولة . 

: امان...لج بابا شبيج رجال ومرته انتي لاتدخلين وتهجمين بيته.

: شنوو اهجم بيته شنوو مرته هذي اختي والله احرك الدنيا علئ راسه شافها خرسه وماتحجي يستغلها

امان بتنهيده...انتن عوود ليش تحبن المشاكل همه يحلون امورهم الوحدهم انتي كوني بعيده.

سمية بنتر .. لا ماااكووون بعيدة واريد اطيح حظه لهذا الحقير ماعليك انت لاتدخل.

: مو صوجج صوجي اني جاي احاجيج  والا انت كل ذوق ماعندج
كتلج بلا غلط مايعجبني هالاسلوب بس مجاي تاخذين حجي ومستمرة .

: لا صوجي انا جاي اشكيلك وخلي يكون عندك علم تره انا هذا اسلوبي وماراح اغيره ..

: اوكي مدام هيج من تحسنين اسلوبج تعاي احجي ويايه.

: لاتنتظر احسن الك لان اسلوبي عاجبني وراح ابقى هيج ولا تنتظر احجي وياك هم
ويلله في امان الله ..

سديته بوجهه بدون مااسمعه شراح يگوول....شبيه اسلوبي ماعاجبه اوووف صدك اسلوبي زفت بنت امي بعد ياربي شسوي اختي خطيه والله وهذا منافق اله اطيح حظه  ..
بنفس اليوم اجت عمه زينب تتوسط لمناضل يريد يرجع رقية وكايل الها موافق على كل شرط تشرطوا
رقية خانسة وبين القابلة ترجع ومو قابلة ..
ابوي اخذ رأيها گالت ارجع ميخالف بس حاسه جاي يدور براسها شي شنو هو ماادري ..

اما ابوي وجه نظراته لعمه زينب وكال اول شرط لرجعة  رقية انطوني منكم مرة ...
بلا هذا الشرط فلا ترجع رقية حتى لو هي راغبة ..

زينب:  ماافتهمت ابو صفا شتقصد يعني بعدك مصر تريد تخطب فاطمة.

: بعد مادام فهمتيها ليش تسالين.

: واذا رفضت؟ !

: رقية تبقى هنا.

: بس رقية تكول عادي تريد ترجع فترة زعل وعدت ومناضل يحبها ومدللها.

: هذا اخر كلام عندي تنطوني مره ارجع رقية ماتنطوني تبقى هنا ماخسران خسارة

يتبع ..