رواية لمْ تكُنْ خطيئَتُنا الفصل الرابع والعشرون 24 - بقلم نورا ناصر

#لم_تكن_خطيئتنا
نورا ناصر
بارت 22

أمان .. العمر 28سنه خريج لغات موضف بمكتب طيران ..
عشت سنين مراهقتي وشبابي واني منفي ..
بسبب ابن عمي وابن خالتي بنفس الوقت رضوان وشجاراتنا الدموية المتواصلة ..
فجأه لگيت اهلي يتخلون عني ويبعدوني عن عائلتي
واخواتي .. ماكو احد يتمنى اهله يتخلون عنه مقابل شخص اخر حتى وان كان يتيم.
مرت عليه ايام صعبة تجاوزتها بشجاعة ..
هواي حسيت بغربة وانا بعيد عن اهلي صح بيت عمي مو غربة لكن احساسي كان يوحيلي انو اني غريب ابينهم ..
كانوا اهلي يدزولي فلوس ويخلصن
اخجل اطلب من عمي اروح اشتغل بدون مايدري
كلشي اشتغل عماله اصبغ بيوت ..
اشتغل وي فيتر .. ولا عبالك ابوي دكتور وامي استاذة جامعية ..
اما بالصيف من كانوا يسافرون وينسوني ..،
فهذا بحث اخر .ماكو كلمه توصف احساس الالم الي يعتريني
. الى ان مرت الايام وتعودت وصار عندي عادي تعودت اعيش وحيد .. واعتمد على نفسي بكل شي .وانا بمقتبل العمر. اما رضوان ماتركني بكل شي شاركني .. حتى بحبيبتي ..
تعاركنه اقسم الي انه ميدري واني صدگته لان حسيته صادق
لكن بقت الفجوه بيننا كبيرة ..لا كلام بيننا ولا حتى سلام ..
مرت ايام وكبرت والثقه عندي انعدمت
سويت علاقات بس مجرد علاقات عابرة وللتسلية ماتعمقت ولاتعلقت بيها ..
من شفت سمية بباب غرفة امي بالجامعة
ماجنت مهتم الها ولاباوعت عليها
بس هي جبرتني بتصرفها
جبرتني اهتم الها واسأل عنها منو؟
شفت بيها مثال للشخصية القوية
أنثى بصلابة جبل .. ماتنكسر عينها ولا تتنازل .. ولاتطخ راس ..
احرجتني وخلتني اني الي اتنازل ولو قليل من خليتها تفوت قبلي .. طخيتها بكتفي لو حسيت امتلكتها.
دخلت على امي شفتها معصبة .. معرفت السبب سألتها منو هذه جاوبتني بعصبية بنت خاالك
وبس ..مالحيت عليها ..
اخذتها وطلعنا وشفتها وي بنات باوعتلها
كثفت من نظراتي عليها .. استغليت الفرصة
لابس نظارات حتى لا تحس باهتمامي بيها
انيقة محتشمة ونازكة كلها انجمعت وكونت شخصيتها وهيئتها البارزة ..
توالت لقائاتنا .. ازاداد اعجابي بيها. .
رغبتي الشديدة بالحديث وياها واستغلال كل فرصة فراغ عندي اروح للجامعة واشوفها ..
موبيدي رجليه تاخذني ..
عرفت عنها جريئة وشخصيتها قوية بس عدهه رعونه شوي لو تتخلى عنها تصير توب بس محتاجه احد يحتويها ..

بيوم حفلة رقية .. عزمونا على مشية الزلم .. شفتها واگفه بباب المطبخ .. فستانها الاسود المخملي واللماع بارز مفاتنها خصلات شعرها الاسود بلون الكحل الي على عيونها تداعبه الهوا تزيدها جاذبية وسحر رسمت گدامي لوحة انوثة رقيقة فاتنة لاتخلوا من الهندام والثقة ..
ابتسامة لطيفة وخجولة .. نظرات دافية و قوة واعجاب
حسيت بيها وصلت دفئها لقلبي
انصدمت بيها شون تواجه امي معجبني تصرفها ..
شون تعيط بوجهها وهي عمتها واكبر منها .. !

بعدين من صاحوها حتى يعاقبوها
عذرت تصرفها .. وكفت مثل مقاتلة شرسة تدافع عن نفسي وحقها .. عذرتها .. ووگفت الى جانبها ودافعت عنها ولو جانت ممحتاجة ..

حاجيت امي عنها وعلى الي صار بطريق رجعتنا وانا جاي اسوق ..
گتلها ياامي مايصير الي سويتي اليوم انت شون تحرضين خالي على بنته .. ؟!

-- خلي تولي هالطايحة الحظ هايه لسانها يراد اله بتر بنت اماليد الساقطة ..
-- بنت اخوج قبل لاتصير بنت اماليد لازم تحتوينها تعاملينها زين مو تشجعين على اذيتها هيج راح تتمرد اكثر ماكو فايدة من هذا الاسلوب ..
تحسرت وسكتت ..

كلام رضوان اذاني خلاني اشك واسترجعت ذكريات قديمة نسيتها بالم وتعب ..
انهكني التفكير معقولة تحب رضوان .. زين ونظراتها وابتساماتها الي معقولة عبثية او هي طبيعتها هيج تباوع وتبتسم .. وله محادثاتنا الطويلة معقولة للتسلية ..
خلتني بداومه افكر ودائما ابعد الشكوك الموزينة اكول يمكن يشاقة او هو يريدها وهي لا ..
سألت أخواتي گالن خطبها ووافقت بس امي ماقبلت وتفشكلت كلها. ..،
ضجت حيل حسيت نفسي مضيع شي ..
شكد جنت محتاج احاجيها بس ماضعفت بعد الي سمعته من رضوان انه هو يريدها خلص الله يسعدهم مامكتوبتلي ..
وبيوم الي اجت وي رضوان لبيتنا .. فسرت نظراتها على انها غيرة شفتها عصبية حسيت بيها
كل شي يكول هي تحبني بس اكو سر .. ولازم اعرفه
صحت وبالمستشفى وسألت عن رضوان شفتها قلقة
عليه .. زادت حيرتي بين الحقيقة وا.. وهسه تگلي الحادث هي مفتعلته ومنهزمة من بيتهم صدمتني ..،
گتلها شنووو
.. ماتدري ..
-- كملي اشو اسمعج؟
-- ههه خلص وقتي وياك عندي محاضرات نكمل غير وقت.
-- انتظرج ترفعين الحضر ونحجي ..
-- اي من ارجع للبيت ارفعه ..
عفته ومشيت واحس جبال هموم انهارت من على اكتافي .. احس انا مو نفسي سمية قبل لااحب
تغيير كل شي بيه صرت مجنونة بالحب ..
مااعرف شون اعترفت اله بافعالي المشينة قبل انا مو هيج مااحب ابرر ولا اعترف بس كدامه شخص ثاني صرت مؤمنه بانه كل تصرف لامنطقي هو منطقي بالحب ..
تمنيت انا اله وماابتعد من يمه تمنيت ياخذني ونروح لبعيد .. الحب واضح بعيونه ماحاجه اخمن ..
او الزم ورده وانتفها واكول يحبني ،مايحبني ..
..
..
كعدت بالطارمة على الكرويته الخشب وخليت بصفي الملازم
وطلعت تليفوني، فتحت نت ورفعت عنه الحضر ..

وكعدت انتظره .. هسه اريده يراسلني بهاللحظة
ماكو ماموجود ومو اون لاين
كعدت افكر وينه هسه هو وشجاي يسوي
منو الماخذه مني وملهي عني ..
باوعت للساعة 2:30 .. هسه شجاي يسوي تغدا؟ نام؟ اوووف اريده ياربي ..
دخلت للبيت .. من الفرح حتى مااشتهي اكل ..
مابدلت ملابسي .. وتلحفت بالبطانية ..
اسمع صفا تكول ماجاي احاجيج رجعنا لسرحاتج وصفناتج .. سلمي على الاقل ..

نمت ولا كانه اسمعها ..
كعدت قبل المغرب .. محد بالغرفة ..
طلعت منها .. شفت صفا جاي تنضف بالهول
كعدت على طرف القنفة .. گتلها صفا ساعديني انزع ملابسي واريد اسبح همين .. وحكيت راسي ..

تباوعلي ومعاجبها وتكنس
: والله اعتمدي على نفسج منا وجاي ..
: ليش هيج خبيثة ..
: مدام ماتكليلي شعندج ..

كمت تقربت منها .بخجل. كتلها اليوم امان كلمني ..
: صلوات ...
: حجيت الها ..
: ماتوقعتج هيج متناقضة سمية تذكرين من جنتي توبخيني على علاقتي باسلام وتكليلي العلاقة فاشلة.

: اسلام مايحترمج ودومه يذكرج بامي.

: وامان شنو ملاك منزل من السما ..

: افين حظه غير انسي اسمه والله خلي يتجرأ وياي بس ...

: خنشوف
ودنكت تكمل كنسس ..

رحت يمها .. تره ماصار بيناتنا شي .. مجرد كلام

كامت اي وشنو يعني.

: اذا تحبين اسلام هسه كدامج فرصة ارجعيله شعلية انا.

: عوفج مني صارت قسمتي لفراس بعد كليلي شخبار رضوان مااطمنتي عليه؟

: لا والله ماادري شنو اخباره ..

: اخلص كنس واساعدج ..

: اوك ..
اندگت الباب ..
انا اروح افتح .. كبل لااطلع دخلت عمه زينب.
سلمنه عليها .. ودخلت جوه گعدت ..
زينب .. عمتي بعدها مااجت ابيت اشواق ..؟

سمية .. اي بعدها هناك ..

: انت شونج شون صارت ايدج؟

: ايدي بعدها يصير شهر يلله يفتحون الجبس
بس الخياطات من راسي شالوهن امس ..

..الحمدلله، ابوج وين؟

.. بعده مااجه ليش؟

.. موصيني على شغلة ..

: اي وشنو هي الشغلة عمه؟

: لاتصيرين فضولية ولج بيني وبينه ماعليج.

صفا: لا عمه احجي شسالفة سرج ابير مانكول لاحد.

سمية .. اي عمه شدعوه عاد احنا بناته.

زينب .. والله يابنات ابوجن طلب مني اخطب اله بنت اخوي فاطمة حمات رقية.

صفا، سمية .. فاكين عيونهن وحلگهن وبصوت واحد اييي !!!

زينب .. ماقبلت

صفا .. يااا! !

سمية .. يوو ليش خاف لان شافته اسمر طوخ وعيونه خضر اخترعت منه ..

زينب .. كامت من كعدتها وتلبس عبايتها ماتجوزين من سوالفج ام لسان .. المهم انه اجي بغير وكت. لو اخابره واگله.

سمية .. عمه كولي ليش ماقبلت. ؟

: والله ياعمه تكول انه نحسه خاف اتزوجه وهم يموت مثل ذاك اسم الله عليه عمره طويل ان شاءالله.

سمية .. اسم الله عليه اي هم صدگ ..

زينب .. جنج ماقابلة ابوج يتزوج ؟!

سمية .. اي والله عمه شله بالزواج لاعدنه بيت ملك لا شي يورط بنت العالم ويا ليش.

: الله يرزقكم ان شاءالله ..

راحت عمه زينب .. ساعدتني صفا حتى اسبح
طلعت .. جاي تمشطلي .. كالت شعرج حيل طولان
باوعتلي .. امان شون يحبه؟

باوعتلها بخجل ولج شمدرريني ماحجينه بهيج شي احنا ..
وخرت من يمها وشعري مبلل باوعت للمراية
ولج صفا كون يطلع هذا الشعر الي حلقوا الي بمكان الجرح بالمستشفى قبل حفلة خطبتج.

.. ان شاءالله.

كملت تمشيط .. اكلنه شي خفيف .. ابوي اجه ضايج يمكن خابرته عمه زينب .. وكلتله فاطمة رفضته.

لذلك مااتعشى وگضاها تدخين .. قهرني يمكن عجبته. خطيه يلله مامقسومة اله ..

بقيت انا عيني على التليفون .. وانتظر امان يراسلني
اقرا وافكر بي ..
الى ان راسلني وحجينه .. عرف ليش وافقت على رضوان وليش افتعلت الحادث
كتله انضغطت هواي بيومها من اهانات امه واستفزازات رضوان ..
طلب يخابرني رفضت ..
گتله .. انه مااحب اخابر بس كتابة خلينا
امان .. لا انت لتحجين بس اني احجي كلمة وحده وسدي ..
ماجاوبته اتصل بيه .. اباوع صفا متمددة على السرير مالتها .. على نظراتي انتبهت ..
هزت راسها شكوو؟ شبيج منو جاي يتصل ماتجاوبين؟
طفرت من السرير وانا متوترة كلتلها ابقي هنااا مو تجيين وراي ..
: هو منو الي يريد يجي وراج ثوول ..،

طلعت وگفت يم الباب. وسديته وبقيت لازمته بقوة تنفست الصعداء وفتحت خط بس ماحجيت.

اسمع اله يحجي .. الوو سمية .. احبج
من كال احبج انرسمت على وجهي ابتسامة عرييضه
رد گال سمية اني احبج ..
خليت ايدي على حلگي اكتم انفاسي الطلعت بلهفة.
سديته بدون ماانطق ولا كلمة .. رجعت للغرفة ونظرات صفا ماترحم .. تباوعلي وترجع تقرا ..،
وتهز راسها بعدم قبول ..
گالت: كلها ايام واتزوج واخذي راحتج بهاي الغرفة.

قهرتني رحت يمها لزمت ايدها گتلها لاتگولين هيج والله مامتخيلة البيت بدونج .. !
لزمت القلم وظلت تكتب بعبث ..
گالت البركة بأموني .. هو يسليج
ضحكت .. باوعتلي معصبة .. گالت: اي وشوكت ناوي يخطبج لو ما گال وتتوقعين امه تقبل؟

: بعدنه باسم الله كدامنا هواي حواجز امه، رضوان وووو.
الله يهنيكم وان شاءالله تكونين من نصيبة ..

سمية " بهيام" : اليوم گلي احبج ..

: اول مرة اشوفج بهالحالة سميه معقولة هيج غيرج الحب .. زين ليش هو حبيتي؟

: رخيت نفسي وخليت رجل على رجل وانا كاعدة على السرير .. اول شي عجبني وكنت متوقعة نفسي مجرد معجبة بي بس كلما اشوفه يزيد اعجابي ويتحرك شي بداخلي .. حبيت بي يوكف بوجه امه يعني يوكف وي الحق .. والجانبي يدافعلي ..حماني من عمو سليمان هو هذا الرجل الحقيقي الي اريده بحياتي.

: وعمتي اشواق؟

: اتوقع راح تفرح وتوافق لان راح يبقى رضوان واحتمال يتزوج رجوان ..

: بس رضوان يعتبرها مثل اخته وماايريدها ..

سمية .. انتفضت من مكاني .. دخليني اتخيل وفرحانه شبيج من هيج ماكولج على شي ..
..
: مثلما انت كنت تضوجيني من احجيلج على اسلام.

: وهسه شنوو صار مو ادري بسوالفج املتي 3سنوات وتالي تكولين مااحبه خليها سكته يلفته ..
مااريد اجرحج بالحجي وبعدين كدامج فرصة ترفضين فراس ورجعي لاسلام وخلي يطيح حظج شعليه انا ..
صفا .. هوووف.

: لو بس اعرف شبيج ضايجه؟

: لان گلبج مو على گلبي وماتحجيلي كل شي؟

: ياعيني مو هيج والله بس اكو شغلات ااحب احتفظ بيها لنفسي.

: يلله وخري عني خلي اقرا واكوم اكوي الملابس.

: بس تطيب ايدي ارجع اساعدج.

: مايحتاج تعودت.

كمت من يمها .. ورحت لفراشي .. حتى خجلت اخذ التليفون واباوع خاف جايه رسالة من امان استحي كلش.
يوم ثاني اجاني للكلية من شفته احس قلبي يريد يطلع من بين تجاويف صدري يستقبله ويحتضنه ..

سلم عليه،.. رديت بخجل وبقيت مدنگه راسي ومااباوع اله .. وحاضنه الملازم قوي من الخجل.

گال سمعتي البارحة شنو گتلج؟
يبووو زاد الخجل كلش خليت حنكي على الملازم
گال فدوه شكد احبج من تخجلين.
هو انه يمته اخجل هاي اول مره هه حجيت بقلبي
كال تعاي نحجي ..
كعدنه ..
وانه لسه مدنگه .. كال رفعي راسج شويه
رفعتها بخجل وظليت اباوعله .. لحظات واختفى الخجل وصرت اتأمله واباوع بعيونه .. لابس بلوز رياضي ومشكل رداناته بي كبوس ومنه نازلات قياطين ساعة سلفر .. اموت ع الطبرة الي بنهاية حاجبه ..
بدينه نسولف .. ونسولف.
كال حاجيت امي عنج
انصدمت ياصخامي
شحجيت بلله
: اكيد ماعندج مانع گتلها اريد اخطبج.
بقلبي كلت ماعندي مانع اكيد بس اموت واعرف شگالت عني سالته.
ضحك كال بعد نقاااش طوووويل جدا توصلنه الى اتفاق هي متكدر تفرض عليه شي لذلك وافقت وبشرط؟
:الله عليك شكالت عني؟
: كالت ماعدكم غيرها بس هي بالدنيا انت ورضوان شكاكم.
:وبعد الله عليك؟
: ماكو مكالت بعد
: لا اكيد حجت هوايه زين شنو الشروط؟
: رضوان يتزوج رجوان يلله تبارك زواجنا
: وانت شنو كلتلها.
: كتلها لاتدخلين بحياة رضوان خلي هو يختار شريكة حياته.
: زين احنه انا وانت شعلينه برضوان ورجوان؟
: معليج بهالسالفة المهم عندي رضوان يتزوج يلله احنا نتزوج سواء رجوان او غيرها.
:وامك شون وياها؟
: انت حاولي تكسبينها مسامعه الف عين لاجل عين تكرمُ انت الخاطري حاولي واحنا مراح نعيش هنا وياها اخذج ونروح نعيش باربيل قريب على شغلي.
:لا امان انه مااكدر ابتعد عن خواتي.
: مو مشكلة نجي نشوفهم دائما.
: لاعفية ماالنا غير بعض احنا!
: مم اوكي لعد لازم ارتبلي شغل هنا يلله.
المهم سمية فدوه لاتخذليني
انت ماتعرفين شنو يعني يعشقج شخص محبط والخيبات اجته من اقرب الناس اله شخص عاش حياته منبوذ منفي وعن طريقج يريد يستبدل كل هاي الخيبات مثل الي يبدل صحراء بحديقة ورود حلوة .
هزيت راسي بابتسامة وباوعت لعيونه نظراته تبث حب وهيام وشغف گتله ان شاءالله مااخذلك ..
__________

إسلام ..
مرت عليه ايام كوه خلصتها احساس الندم وتأنيب الضمير مسيطر عليه ومو راضي يتركني.
ماكدرت ارجع صفا باي طريقة مااحب الح وعندي كرامتي فوق اشتياقي وحبي ..
الحاح عمي سليمان هواي اثر عليه يريد مني اخطب هجران .. امي وايناس هم بعد مايهمني شي اتزوج هجران وله غيرها كله واحد بعد صفا
ووافقت اخطبها بدون مشاعر تجاهها.
اخذت امي وعمي ورحنا عليهم طلبت ايدها وبعد ايام دزولنا الموافقة ..
____________
مناضل ..
كاعدين بالهول كلنه .. كلساع اشاقي رقية لو اكرصها وتضحك لو اشوفها فيديوات مضحكة بالفون احب اشوفها ضحكتها .. واحنه على هذا الحال اتصلت الاء زوجتي .. جاوبت وتركت الحيرة بعيون رقية لان انتبهت عليه .. وحست وره هذا الاتصال اكو شي.

جاوبتها هلا الاء شونج سرى وعبودي شونهم؟

: بخير حمدلله اشوفك لاهي وي عروستك وماتسأل عنهم.

: اي والله مشغول ..

: مناضل اريد ارجع الجهال يردووك.

: اي ارجعي هلا بيج بس بدون شروط تعجيزية رجاءا وخاصة رقية تره ماطلك.

: لا عادي خليها بس اريد بيت وحدي ..

: تعذريني مااكدر افتح بيت ثاني.

: لعد وين اكعد وانت خليت الخرسة تاخذ بيتي! ؟

: البيت جبير ومليان غرف زايدة وحمامات كعدي حالج من حالنه.

: والمشاكل؟

: ماكو مشاكل ان شاءالله لازم تعلمتي من الدرس الي اخذتي.

: لعد تعال عليه.

: خلي اخوانج يجيبوج انا مااكدر ماعندي مجال.

بعد ايام وصلت الاء واطفالها للبيت مما اثار مفاجاة رقية.
وبحيرة وتسائل منو هاي وشسوي هنا.
تشوفهم مشغولين وجاي ينزلون جنط من السيارة.
فاطمه مموجوده راحت لام مناضل .
شافتها لازمه الاطفال تبوسهم بلهفة ..
تريد تروح للمطبخ .. بالممر شافت مناضل حاضن الاء وهي تبوسه من خده ورقبته بلهفه.
وكعت بالكاع وظلت تشهك حست انها انخانت انغدرت.
الاء بقت بمكانها مناضل فك منها وراح لرقية.
حاول يهدأها ترفض.
اشر الها هاي زوجتي مثلما انت زوجتي.
اشرت اله وديني لأهلي.
رفض حاول يهدأها بكل الطرق ومنعها من الروحه لاهلها مرت ايام تشوف الكره بعيون الاء وهي تحرك شفتها ماتعرف شتكول عنها بس قلبها يحس جاي تشتمها.
ابتعدت عن مناضل وماتخلي يلمسها ولاتنطي مجال.
خلاها على راحتها وماضغط عليها.
بعد ايام اجه يمها كال الها اهلج دعوج حتى تحضرين حفلة خطوبة اختج صفا.
راح اوديج بس مااريد تجيبين الهم سيرة مااكدر مااخليج ترحين روحي العصر وي اهلي ومن تخلص الحفلة اجي عليج وترجعين هنا.
وافقت ومااعترضت بس مو ناويه ترجع وماكلتله حتى يخليها تروح.

_________

صفا ..
بيوم حفلة الخطوبة حسيت بوجع بقلبي نتيجة حزن شديد كنت متيقنة جدا ان هذا الحزن مو سببه اسلام انما شي ثاني اجهله ..
برجعتي من الصالون وجاي انزل من السيارة مقابيل بيتنا .. صار كبالي اسلام .. وعيونه حزينة صار يتاملني .. ارتبكت وجيت اطيح انا والبدلة منفوشة
لزمتني سمية ومريم اخت فراس جانت ويانا بالصالون.
دخلت بالبيت وانا احس مامرتاحه. . الى ان اجه فراس وعقدنا ولبسنا الحلقات وقطعنا الكيكه ..
حسيت بشي مختلف .. مشاعر مولودة حديثة
شي بفراس يجبرني احبه .. هدوئه خجله نظراته
بعدها ضحكت لان سمية متفقة وي امي تحضر الحفلة وهي لابسة نقاب ..
حتى لاتشوفها عمه اشواق .. وامي مامتعوده على النقاب احسها اختنكت كلساع تگح .. سمية ماتجوز من سوالفها ..
رحنه اللتقطنا صور ورجعنا .للبيت .و راح فراس لبيتهم ..
رحت بدلت ملابسي .. واشوف هوسه بالهوول ..
دخلت عليهم .. رقية كاعده وتبجي .. كسرت قلبي.سمية بصفها وتهدأها ومبينة معصبة حييل.
رحت كعدت يمهم .. ابوي يحاجي ام مناضل ..
اعذريني حجية انتم غشيتونا كلتوا راح يطلكها وجذبتوا علينا .. ماالكم مره يمنه ورقية راح تبقى هنا

بعد نقاش طويل واجه مناضل ورفضت رقية ترجع ويا تدخل عمو سليمان لكن ابوي كان مصر جدا ورقية هم راحوا مناضل وامه وعائلته بدون رقية بقت يمنه ودمعتها على خدها ماراضية تنشف ..

الى هنا ينتهي الجزء الاول من الحكاية انتظروني بالجزء الثاني ... ارتاح قليلاً واكملها لان بعد احداث مطولة ..
اعتذر الهنا وراح اوقف القصة لان تعبانة نفسيا وجسديا .. ودامر بضروف قاهرة اوقفت مسيرتي الكتابية اشكر كل من يذكر اسمي بمنشورات بيج المكتبة حبايبي اعتز واتشرف بيكم جميعا يزيدني فخر متابعتكم الي وقرائتكم لرواياتي

تحياتي الكم ..
دعواتكم الي ❤