رواية لمْ تكُنْ خطيئَتُنا الفصل الثالث والأربعون 43 - بقلم نورا ناصر

#لم_تكن_خطيئتنا
بارت 40
نورا ناصر.

صفا .. گعدت الصبح  على صوت خفيف بالغرفة
شفته متوضي وجاي يفرش سجادة الصلاة.
باوعلي ودار وجهه .. وتوجهه للقبلة يصلي ..

بعدني انام جوه .هو مطنگر وانا استحي منه مااريده يكول عليه اتنازل اله. .

گمت طبگت فراشي وخليته بمكانه باوعت للجرباية هو مرتبها كالعادة ..

نزلت جوه توضيت وصليت بالهول ..
سويتله ريوگ وحضرته على الميز بالمطبخ.
شفته نزل ومبدل ملابسه.
انه صعدت .. كسرت نومتي بعد مااكدر انام
نضفت الغرفة ورجعت نزلت جوة اشوف شنو اكو اخلصه على وكت خاف انعس بعدين اخذلي غفة..

دخلت للمطبخ شفت عمتي  موصله الاستكانه  لشفتها تريد تشرب جاي.

گتلها صباح الخير .. شربت جاي وطولت شوية
يلله ردت .. كالت صباح النور ..

رحت للقوري اريد اصب جاي ..
گالت حتى نغسل زولية الصالة صارت وصخة من بداية الشته الهسه ماغسلناهه ..

گتلها خوش عمه ..

بينما صبيت جاي وخليت فوگاه حليب
وطلعت بسكت وياه .. جاي اكل اول بسكوته.
سمعتها جاي تسحب بالزولية وتسوي روحها فحطانة.
وتريد تطلع من باب المطبخ ..

شربت شوية وگمت گتلها عوفيها عمه انه اطلعها.
واخذتها منها. كالت اي هم يلله تلحك تنشف

.. طلعتها بالطارمة .. وطبيت للبيت اشغل السخان
.. نهاية شهر الثالث ..
والجو بعده بارد .. هسه على شنو مستعجلة.
بعد وكت ..

شغلت السخان وطلعت بره مديت الصوندة
سمعت صوتها صاحت صفااا تره الماي دافي مو اله تشغلين الگيزر ..

تحسسته بارد ثلج والدنيا صبح وهم برد
بس هاي مبينة تريدها حجة عليه
خلي تولي ماناقصني هيه بعد.

شكلت التراكسوت ودنكت افرك الزوليه وهي كلساع اخلص شي
تجيبيلي شي ثاني .. لحد مااذن وانه مامخلصة
رحت صليت وتغديت ورجعت.

جاي اطبگ بيهن .. رفعت راسي جان اشوف اسلام كدامي يباوعلي وفاك عيونه عليه.

حطيت ايدي على صدري گلت يمممه شبيك خرعتنييي.

تقرب يمي كال  شنو هاي مفرعة ولج احنه والشارع سوه بلله واحد جاي يطل عليج من فوگ سطح الجيران.

انه لابسة تراك ربع ردن احمر رياضي ومخطط على جنب بخطين  أبيض ..

سكتت عنه .. واريد ادنك اخذ الزولية ..
گام دفعني من زندي ..
كال وخري انه اشيلهه ..

يالله شگد عنيف ..

شكل ردانات قميصه .. وظل يشيل بالزولية

اجت عمتي كالته هسه انت متوازي توك جاي من الدوام وتعبان خليهه هي تشيلهم وتشرهم شعليها شو لا اكو طفل ابطنها ولا شي ..

باوع لأمه وباوعلي وسكتت
وانه انقهرت ودخلت جوه احضر اله الاكل ..

حضرته وصعدت فوگ ابدل ملابسي كلهن ماي حتى بردت ..

إسلام .. شريت الزوالي وطبيت للمطبخ .. شفت بس امي
كتلها يمه مايصير هالكلام هذا كدامها تره خطية مايصير تجرحيها.

الام .. اكلك واسمعني زين تره هي ظلت يم رجلها ذاك 3 اشهر وماحبلت واذا بيها شي انه مااصبر ازوجك الوحدة ثانية.

اسلام .. اووو شلون شغلة  هايه يمه على كيفج تره اكو ازواج يبقون سنين مايصير عدهم احنه ماصار النه شهر بعدنه.

الام .. انت هالواحد الي واريد اشوف خلفتك.

اسلام .. بهاللحظة دخلت صفا وكأنها سمعت كل الكلام وبعيونها دمع .. بس ماحجت فاتت من يمي تريد تطلع گتلها وين رايحة؟

صفا .. رايحة اشوف الزوالي ..

اسلام .. شريتهم كلهم مايحتاج وبعد من وجاي من تطلعين للطارمة او للسطح.  تلبسين حجابج على راسج.

صفا .. هزيت راسي بقبول وين مااروح ظيم هاي شجاها عمتي بعدهه حاقدة عليه لان ماقبلت بي گبل جاي تشوفني الويل هسه خاف انه ناقصة وماشايفة ظيم وقهر جانت قبل تحبني وزينة وياي بس من رفضت اسلام تغيرت هسه لازم احاول ارضيهه شسوي احاول اتأقلم واعيش .. من سمعت اسلام يدافعلي رغم تقصيري ويا فرحت بداخلي .

رحت للديوانية مسحت الارضية وفرشت زولية ثانية هي طلعتها الي .. صار العصر حضرت العشاء وبالليل تعشينه بس احس روحي گوه افتح عيوني من التعب والسخونه وعضامي ظلت توجعني وانه اصلا مااتحمل ابد.

صعدت گوه اجر خطواتي .. حتى مابيه اطلع فراشي الي انام عليه .. رحت تمددت على السرير
وهو يحاجيني وبس اهز براسي ..
لحظات وصارت شفايفي حبيسة شفايفة
فك اسرها استحيت ضميت راسي بصدره
كمشت فانيلته حييل احاول اخفي خجلي ...

ظل يهمس بأذني كلام حلو وغزل سامعته من قبل سنين منه وهسه انعاد على اسماعي ..

ماهي الا لحظات حتى صار يطبع شفايفه على راسي، جبيني خدودي وعنقي ..
لحظات وصرت كلي ملكه وماعندي اي خيار غير ان اطيعه وبس ..

سمية ..الصبح  فتحت عيوني حسيت بامير گاعد يبدل وشاعل الضوة طخ بعيوني زعجني.

گمت گتله انت ماتعرف تبدل بهدوووء

باوعلي .. شبيج تتعاركين ويا ذبان وجهج.

: طفي الضوة انريد نخمد ..

: خمدي بلكي ماتگعدين .. لو هيه غيرة لان انه اداوم وانت لأ .. ؟

: تنفست بعصبية گتله انه اعلمك اذا ماگول لعمي على كل شي.

: انجبي انجبي ورجعي نامي يلله ثبرتينه.

يريد يطلع صحت عليه تعال ولك شيل فراشك يلله تطلع. واشر اله عليه.

رجع شاله من الگاع وشمره عليه كله هو المندر والبطانيه والمخدة وگعن عليه وطيحني ع مرة ثانية وخله وشرد وطبگ الباب.
وحتى الضوة ماطفاه ..

گمت وانه اوخرهم من عليه واعدل بشعري لان تخربص گلت انا اعلمك اذا مااربيك من جديد ياامير ياابن زنوبة ..

غسلت وطلعت من الغرفة .. اه شكد مشتاقة للدوام بس هسه فاتتت بعد ..

دخلت للمطبخ شفت عمي طب من باب الحديقة
متلثم بكفية ومخليها على حلگه.

وكفت يم باب المطبخ الي يطل على الهول
وهو گعد على الميز مال الطعام

اشوف عمه زينب تباوعله
گلتله شنو اليوم ماراح تروح للدوام ..

جاوبها صبيلي جاي ولا ولج ماروح هذا الصبغ اثاريه يطيح الشعر بعد مااشتري منه.

افاااا راحت الهيبة اريد اسيطر على روحي من الضحك مااگدر طلعت على السريع ورحت للحديقة وانه خربانة ضحك ..

مر اليوم عادي .. بالليل وبعد ما الكل نام
شفت امير اخذ تليفونه وباكيت جكايره ونزل جوه
خليت الوقت يمر شوية ونزلت وراه ..
سمعت الصوت جاي من الديوانية
اتسمعت جاي يحجي ويا بنية ويتونس.
مديت ايدي على يدة الباب ماتنفتح. 
قافلها! !!
گتله هين انه اعلمك ..

صعدت ونمت وهو مااجه.
الصبح هم مالحگت عليه اريد ارزله ..

للظهر حظيت بيه بس دخل جاي يبدل.

گتله اكلك شونهه سهرة البارحة

باوعلي گال شنوو؟

گتله ترضى انه اسوي مثلما انت تسوي. ؟!

گال شتقصدين ولج وضحي؟

حجيت اله على الي سمعته ..

گال شحدج اذبحج والله

عليت صوتي وشمعنى انت لعد ؟

انه رجال ...

وانه هم رجال تره الرجوله مو بإنك تمتلك فد شي معين لااا الرجوله بالمواقف والتصرفات  وانت كل الي عليك تحترمني طول ماانه على ذمتك فاهم عليه.
ظل يسوي حركات طايح حظها ويغلط عليه وانه ارجع عليه ..

وناسين روحنا ونتعارك
لحد ما سمعنه عمي يگول

ولج زنوبة هذول زوج النعل شبيهم صوتهم طالع شو صيحيلهم يلله.

گلت اوووو يا سليمان هسه انت منو شمرلك عظم.

أمير .. هاا قصدج ابوي  چلب وشمروله عظم اله اگله عليج

سمية:  گله وشوف انه كم لزمه لازمه عليك لحد البارحة صاروا 3 حتى صورتك من الشباك وانت گاعد تدخن ولازم التليفون وفاتح كاميرا والباقي خلينه ساكتين احسن.

امير:  ايا قندرة وين تليفونج جيبي ..

سمية .. خذيته وضميته بيدي گتله انجب ماانطيكيا.

سمعنه الباب تندگ بقوة وعمي يصيح طلعوا ولكم.

طلعنا واحنا واحد يباوع للثاني ويتوعدله بالنظرات.

وكفنه يم  باب غرفتنه واحد بصف الثاني ..

وحصلنالنه رزالة مبلله ... لان عمي شبعنه تفال تف عليكم وتف عليكم.
جهال زعاطيط ..

ودخلنه للغرفة كملنا العركة هناك بصوت ناصي..

وهيج مرت الايام .. يوم منهن رن تليفوني
باوعته شفتها انصاف رديت عليها وياريتني مارديت اشكال الغلط غلطت عليه وظلت تشبهني بأمي..

گتلها ماحاجة ابررلج واحجي ويطبج طووب شنو
النظرة الي تاخذينها عني اخذيها المهم انه مو مثل ماتگوولين وانا اسمى واعلى من ان تجيبين سيرتي بالموزين بس شوفي نفسج شنو قبل  لا تتهميني.
انت هم مو ملاك ولا معصومة من الخطأ.

وسديته بوجهه وبقيت مقهورة كلش .. 
رحت للمطبخ شفت ايناس وأمل جاي يشتغلن. ..

گعدت  على الكرسي .. جانت گبالي الخضرة اباوعلها ومتعاجزة انضفها احس كلشي بيه ميت وواهس ماكوو.

دقايق ودخل حسن ابن مؤيد عمره عشرة سنوات
ملابسة متدمرة كلها طين

صاحت عليه امه ..

ولك هاي شمسوي بنفسك هاااا.

جاوبها .. والله ماما جدوو گلي اسگي الحديقة ووطحت وتدمرت ..

.. وانت شبيك اعمى ماتشووف ..

ولزمته وتضرب بي انريد نفكها منه مانگدر.

لشوية حسينه بإيد لزمتها قوي ..

باوعنه عمي لزمها من ايدها وشمرها وكعت على الثلاجة ..

ونزل عليها غلط وسب وشتم ..

جاوبته انت ليش تغلط عليه مو انت نفسك تعرف اخلاقي وانت الي خطبتني لابنك.

صاح بيها لا انت طايحة وادبسز ويرادلج تربية من جديد واذا زوجج ماادبج وعلمج شون تردين عليه انه بيدي اربيج.

حجاية منه وحجايه منها .. اجه مؤيد وماگدر يسكتها وكفت بوجه عمي مثل السيف وتدافع عن نفسها
تقرب يريد يضربها.

مؤيد مايكدر يوكف بوجه ابو ويلزمه حجايه ماكدر يحجي بوجهه
وگف مؤيد  بنص المطبخ وشگ ملابسه وظل يصيح بكل قوته ولكم تعببببت موووتوووني كافي يومية مشكلة

ووكع مغمي عليه ..

اجو اخوته وعمه زينب توها جايه من الدوام ظلت تدگ وتلطم وودوا للمستشفى ومنها اكتشفوا عنده سكر وهو  عمره 30 سنة ..

عمي ابد مايرحم ولا احد يگدر يوگف بوجهه ..
وللاسف شواربه طلعت مرة ثانية ..

يوم من الايام .. اجاني امير يبجي ايييي يبجي!!!
كعد يم رجليه وانه گاعدة على الجرباية.

ولج سمية انصاف راح تتزوج ..

گتله شنووو؟

ولج اي والله اليوم اجتني كالت احذف كل شي يخصني جايين الها خطابة وراح توافق.

باوعت اله گتله مدام انت هيج تحبها ليش ماوكفت بوجه عمي ووكفت زواجنا ليش ظلمتني وظلمتها وظلمت نفسك.

رفع راسه كال سمية أنه طالب ومااكدر اشتغل انه متعود على مصرف ابوي اذا طردني وين اروح وابوها ماانطانياها لان بعدني مابيدي شغلة  كلت اتزوجج بينما اتخرج ويصير خير حاولت اخليها ماتدري بالموضوع بس عرفت.

سمية .. وهسه شنو الي بيدي اسوي انه؟

: ماجاي تجاوبني اريدج ترحين الها للبيت وتفهمينها على زواجنا وضروفه.

: وتتوقع ابوها يزوجها الك وانت متزوج او مطلق.

: خلي لا توافق هسه وبعدين يصير خير ..

سمية .. گتله اوك وديني لبيتهم ..

كال كومي بدلي ..

رحت لبست كوت زيتوني وجينز ازرگ
بوت ربع زيتوني وشال كريمي ..

رتبت وجهي بالمكياج وطلعت وياا ..

وصلنه لبيت انصاف نزلت وهو بقى واكف يم السيارة دگيت الباب .. طلعت اختها ..
راحت تصيح الهاا ..

طلعت انصاف مخنزرة .. وتنتر بالحجي ..

شجابج وليش اجيتي ..

جاوبتها .. اسمعيني  انصاف الي راح اكوله صعب ينگال بس انا مضطره ..
باعيله الي واگف هناك واشرت على امير
مجرد اخوان وبغرفة وحدة احنا
ومابينه اي شي انت عاشرتيني بس للاسف حالج حال هواية مايعرفوني شنوو وهذا مو موضوعنا ومايهمني بس اريدج تثقين بيه انتظري امير يحبج وشاريج وزواجنه صار تحت ضغط رهيب بس ثقي زواجنا مؤقت وانا مستحيل ابقى ويا بعد بس هاي فترة وتعدي .

طلعت شوية من الباب وظلت تباوعله بقهر

باوعتلها وحجيت بگلبي وييه على حظي ماادري شنو الي عجبها بي هالاملح هذا صدگ الحب اعمى شگول انه لعد أمان يخبل وضاع من ايدي بلحظة وحدة وراح.

گالت ماااشي ..

گتلها يعني اروح اطمنه تنتظرينه انت؟

هزت راسها ايي.

كتلها لعد خوش الله وياج.

صاحت سمية ..

باوعت الها ..

كالت ماتطبين تكعدين شوية ..

كتلها ماجاية اكعد انه ورحت للسيارة ..

صعدت ويا خبلني شكلتلج وشكلتلج.

حد ما عطلت السيارة بنص الطريق ..

گتله هيج احسللك .. نزل فتح البنيد وظل يحوس بيها.
نزلت وگفت يمه .. وويه على حظي المطعطع مثل هاي السيارة المطعطعه ..
وظليت اگرك يم راسه مالكيت اله هاي تجيبنه بيها.

لعد خو ماترديني اجيبج بطيارة

شبيهه سيارة وعد حديثة جان اخذتها منه اله سيارة ابوك البخييل صارله قرن ما مبدلها بس بي يضم الفلوس.

اووو هسه شجاب ابوي بالنص ولج ولي صعدي بالسيارة ولاتظلين هنا  ولاتدوخيني

لمحت واحد يعبر الشارع .. اي والله هووو دمعت عيوني بلا وعييي ظليت افرك بيهن يعبر ويباوعلي ونوب يصد بنظراته مني ويباوع يمنه ويسره على السيارات
حيييل صار كومة مشايفته
هوو لو موو هووو ايي والله هووو أمااان ..

لم يكن شعوراً فـ حسب
ان قلبي يركض في كل مرة يراك فيها نحوك
حتى وانا كما ابدو عليه بهذا الثبات

اجه وگف يمنه وانه مصدوومة .. بس اباوع اله واتصنع القوة .. امير ملتهي يحووس ..

سوه نفسه متجاهلني

كال سلام عليكم ..

رفع راسه امير سلم عليه ..

أمان .. هاا محتاجين شي ..

أمير .. لا والله انه هسه اروح اجيب مصلح يشوف علتها بس اذا تگدر ودي هاي المخبلة للبيت گرعتني بوگفتها هنا.

سمية .. منو المخبلة ولك يا مخبل خو ماانه.

أمير .. اي لعد منو جدييي.

سمية .. ومنووو گلك انه اريد ارووح وياا ..

أمير .. ترحين وغصبن على راسج دوختينييي ...

يتبع ..