رواية لمْ تكُنْ خطيئَتُنا الفصل الثالث والثلاثون 33 - بقلم نورا ناصر

هلاو .. بنات فعلا مايهون عليه اشوفكم مقهورين والله انقهرت على تعليقاتكم وعلى بجيكم اعذروني بس هاي حياتنا كلها قهر وخاصة احنا بالعراق الموت يحوم علينه وخاصة على الشباب ..

ملاحظة صغيرة قبل لا ابدي بالبارت
شخصيات القصة كلمن يسرد قصته من جانبه والاحداث الي صارت ويا
يعني سمية جاي تسرد الاحداث الي صارت وياها قبل لايموت فراس فمااريدكم تتخربطون ولا تجي وحدة تگول الاحداث مخربطة ..

--------------------
#لم_تكن_خطيئتنا
بارت 31
نورا ناصر

سمية .. صفا ياحمل الله لايكولها تردين تجيبين الطفل لهاي الدنيا التعبانة يتيم ..

صفا .. اي اريد اجيبه من ريحة فراس ويحن عليه مثل ابو ..

سمية .. اووف صفا كافي گطعتي گلبي وهو شنو ظل بي ياالله يااختي يلله هذا مقسوم ومكتوب شنو نسوي بعد العوض بلي جاي يلله گومي مايصير تبقين هنا ...
صفا ..
كوه كدرت افارگ الغرفة والبيت ظلت عندي امنية وحدة بداخلي ارجع هنا بعد مااخلص العدة واحمل طفل يشيل اسمه ..

كل شي مااخذت من الغرفة بس ضروريات
ونزلت جوه. بالعباية والبوشية ..

شفت عمتي منتهيه خطية وعمي مريض من الفاتحة ويلوم بروحه متعذب يكول عساني لا گعدته من نومته لو ميتين حرر لو متحمل الحرر شجاني.

ودعتهم وعبالك هستوه ميت بجي خواته وصل للجيران وانه يكلولي لايطلع صوتج.

لزمت رگبتي اكتم شهگاتي ..
وطلعنه ..
صعدت بسيارة ابوي ..
وداني للبيت ..

مرت كم يوم وانه الدنيا ماطايقتها
ابجي الكل يبجي وياي .. بوكتها جانت الشهرية متأخرة .. طلبت تحليل حمل بيتي
سويته طلع سلبي ..

ظليت املخ بروحي واضرب على بطني ليش ماإله شي بيه ليش اريد ذكرى منه ..

ابوي انقهر عليه اجه گعد گبالي
كال كافي بجي يابنيتي راح يصير بيج شي هذا امر ربج وكلنا نموت .

گتله مابيدي شي على روحي وديني الگبرة بلكي ارتاح ..

هز راسه بقبول .. يوم ثاني اخذني للمقبرة
بعده گبره تراب ومامبني .. تمددت بصفه ونمت

الجو حار يكتل ماهمني بس اريد ارتاح حتى لو يتعذب جسمي ..

عاتبته فراس ليش بخلت عليه بطفل مااردت شي بس طفل يشيل اسمك بس ردت شي من رويحتك مابخلت عليه بس بالطفل ليش؟
بجيت حد ماغفيت يمه .. وردت طيفه يزورني ماكوو

رجعت للبيت وانتكست وجع بكل جسمي وروحي وجع ماينحمل ولاينطاق ..

-------------

سمية ..  الي سمعته بذاك اليوم خلاني استعيد نفسي القديمة الي فقدتها من وكعت بحب امان.

مو انا الي انهان ولااحب انذل .. سمعت كلامهم ومن بينه كلام امان واستقتاله عليه بس مااهتميت
كل الي يهمني نفسي وبس مااحب الذل النفسي ولامحتاجة احد حتى اثبت ذاني واكون نفسي .

انا اسند نفسي بنفسي ولو اظل طول عمري بدون رجال ماراح يهمني ..
حذفت كل البرامج وغيرت السيم كارد
بس تواصلت ويا رضوان وكال تعالي للمجمع اعلمج على الشغل ..

طلعت من الغرفة المغرب ..
دورت ابوي اريد احاجي على موضوع الشغل
ماشفته.. طبيت للمطبخ شفت فاطمة واكفه على السنگ تغسل مواعين .. لابسه دشداشة ربع ردن وسمنانه شوية بطنها كبران .. شايله شعرها ليفوك سرح حلوو مصبوغ خصل حمرة  والباقي بني محمر ..
باوعتلي ماحاجيتها اريد اطلع درت وجهي
كالت سمية تردين شي.

رجعت درت عليها گتلها ابوي وين؟
فاطمة:  ابوج طلع يجيب عشا تردين شي مشتهية شي اخابره يجيبلج ويا؟
سمية : . لا بس ردت احاجي بشغلة ..

طلعت من المطبخ وكعدت بالهول
انتظره .. سمعت صوت سيارته بقيت بمكاني ..
حسيته دخل للمطبخ ويحجي وي فاطمة ..
ماعرفت عن شنو؟

بعدها اجه للهول .. كال هاا سمية شنو ردتي تحاجيني
اكيد كلتله فاطمة ..
كمت على رجليه كتله اريد اشتغل ويا رضوان بالمجمع الطبي ..

ايوب .. ليش محتاجه فلوس مقصرين وياج احنا.

: لا انه ضايجه بالبيت والعطلة بعد هواي يلله تخلص
اروح اگضي وكت واتعلملي شغلة تفيدني ..

: بس هذا مو اختصاصج .. .. ..

: هو منو بالعراق يشتغل باختصاصه بس ردت استفيد
واقضي وقت هاي رغبتي  وردت استأذن منك  ..

: اي روحي مدام هاي رغبتج.

هزيت راسي بقبول .. دخلت فاطمة بيدهه صينية العشا .. كام ابوي اخذهه من ايدها .. تذكرت من جان يكوم يتناوش الصينيه من امي ..
انعصر گلبي .. مو على امي لا على كل الي صار وماالنا ذنب بي .. بالاضافة الى شي ثاني اجهله ..
انقمت قلبي وزعت نظراتي بين بطن فاطمة وبين نظرات ابوي الحنينة الها وابتسامتها البريئة ..

درت وجهي اريد اروح للغرفة .. صاحت عليه فاطمة
يلله سميه بسم الله وين رايحه تعاي تعشي ..

باوعت الها وللصينية بيها مشاوي وطرشي وطماطة مشويه وخضرة وقواطي ببسي 3 ..
كتلهم مااشتهي .. اكلوا انتوا الف عافية ..

ودخلت للغرفة .. رجعت خبر لرضوان وبلغته بموافقة ابوي على شغلي ويا ..

خليت راسي على المخدة .. وفكرت بفعلتي هايه وموافقتي على عرض رضوان اكيد راح اغضب امان
اي انه اريد يحمق عليه اريده يكرهني.

مااكدر بعد استمر ويا غلطت غلط جبير وماادري شلون وكعت ومافكرت بالعواقب ..

حضرت ملابسي .. الليل طويل ماجاي اكدر اخلصه وانه وحيدة ..

كعدت الصبح جان كل شي ممل عادي وروتيني ..
للظهر يلله بديت احضر لروحتي للمجمع قريب علينه مسافة ربع ساعه مشي ..

خابرني رضوان جنت جاي ارتب وجهي بمكياخ خفيف ..

جاوبته ..
كال تحبين اجي عليج بالسيارة ونطلع سوه ..

لا مايحتاج انه اجي امشي ..

حارة شون تتحملين المشي خلي اجي عليج.

لارضوان والله مايحتاج انه امشي الحركة بركة ..

اوك براحتج بس اذا تحبين اجي عليج ماقصر والله

ختمتها ويا بالرفض .. واسأل نفسي الي جاي اسوي خطأ لو صح .. بعدت عني مايأثر على حماسي بالشغل ..

لبست قميص احمر مقفل باسود طويل وويا بنطرون جينز وترانشوز اسود وقياطينه حمر.
شال اسود عليه فيونكه حمرة ناعمه ..
وطلعت اتمشى من فرعنه ..
لفرع رئيسي  ونوب على الشارع العام ..
وحدي بسرعة وصلت للمجمع دخلت من الباب الجام
كعدت بصالة الانتظار .. انتظر رضوان يجي ..
شفته دخل من الباب .. وكبل طب للصيدلية
الي مفصولة عن صالة انتظار المراجعين بحاجز زجاجي شفاف .. جانت اكو صيدلانية
بنيه مرتبة وناعمه ظلت تحجي ويا
ظهره عليه وهي مقابيلي وجهه عليه
ملامحها تضحك ونظراتها بيها اعجاب ويمكن حب.

خلص حجي وياها واجه باوعتله لابس قميص رصاصي وجينز ..
شافني من بعيد ابتسم .. انا هم ابتسمت.

سلم عليه .. كال ها وصلتي قبلي ماساءالله عليج ..

: امم شعبالك لعد بس انت متأكد انا راح ادبرها

: اي وانا كلي ثقة بيج .. يلله جاهزة ..

گتله اي ..

اخذني دخلنه ممر قصير گباله غرفة كانها مختبر
وبعدها ممر ثاني على جهة اليمين .. اقصر من السابق  وضيق صارت گبالنا غرفة مكتوب غرفة طبيب الاسنان ..
دخلنه بيها انطاني صدرية بيضة اشبه بصداري الاطباء باوعلي گال لايگه عليج ..

ضحكت ..
بدأ يعلمني على الشغل وشنو اسوي شوية دخت گال لاتدوخين انت گدها وانا راح ابدي وياج من الصفر ..

هزيت راسي وبلشنه شغل ..
المجمع عبارة عن عيادتين ..
للاسنان وعيادة عامة .. ومختبر
خلص اليوم المغرب رجعت للبيت ..
خابرت ابوي يجي عليه ورجعت وياه
رغم الحاح رضوان بتوصيلي بس رفضت ..

رجعت للبيت سألني ابوي على الشغل
گتله متعب بس عجبني اكمل ..
هنه هالكم شهر وبعدها يبدي الدوام واتركه ..

يوم ثاني وصلت للمجمع قبل رضوان ..
فتحت الغرفة شغلت السبلت ..  جيكت الكرسي الي يستلقي عليه المريض شفته محتاج شحن شحنته.

طلعت الادوات المغسولة والمعقمة  من الفرن
حضرتهن  وخليتهن على  الميز الي يصير متلاصق وي الكرسي
طلعت الگطن  وابر الزايلوكائين او ابر البنج.
ونيدل وويا زيت القرنفل وادوات ثانيه هوايه ..

اجه رضوان وكل شي جاهز باوعلي كال شطورة
ضحكت گتله اعجبك .. صفن بوجهي ..
انا ماجان قصدي شي .. رأسا درت وجهي
وسويت نفسي جاي افصل الشاحن عن الكرسي.
منها تعلمت احقن المراجعين بالبنج ..
اجه مراجع شكله مو راحه
ولازم احقنه بالبنج .. طلبت منه يفتح حلگه حتى اضربه بالمكان المطلوب
كام لزم ايدي صيحت عليه
اجه رضوان يمي
كال شكوو
الولد كاله هاي مساعدتك زين مااكلتني بالغلط لزمت ايدها لان اخاف من الابر ..
اخذ الابرة مني رضوان وانا معصبة
ظل يضحك وهو بنجه 

لم يحتاج شي من الصيدلية رضوان واروح اجيبلهيا
اشوف الصيدلانية تباوعلي بنظرات ماتتفسر
عرفت راح اواجه مشاكل هنانه ..
غلست عليها ..

مرت كم يوم اروح للشغل وارجع ..
بس احس بوجع قوي بروحي
احس قلبي وي كل نبضة يلعنني ..
شوگي لامان تخطى كل الحدود ..
بس عزة نفسي وكبريائي كان اقوة ..
ماكو اي تواصل بيني وبينه ..

فد يوم طلعت من البيت
لبست صدرية شيالات بيها عريضة
الوانها حيويه وحلوه بصلي وسمائي
والبدي سمائي ..
وترانشوز ابيض .. وشال سمائي .. ونظارات شمسية عريضة ..
طلعت اتمشى .. اضحك ويا الجهال بالشارع ويضحكولي يسلمون عليه شونج خاله .. وابتسم
ساعه اربعه ونص العصر .. الجو حار بس هوا عالي وبي حروره ..
ابتسم احس بالحرية بس بداخلي الم مايعلم بي اله ربي ..
جاي امشي .. بالفرع الرئيسي .. طلعت من الفرع الي عن يساري سيارة بيضة عرفتها المن ..
وكفها بصفي .. نزل الجامة ..
وكفت انه .. باوعتله .. الحمدلله لابسة نظارات لان عيوني اكيد راح تفضحني حتى دمعت
لك قسما بالله ميته عليك ..
ليش جاي اشوفك بعيوني احلى من گبل ..

لابس قميص زيتوني مفتوحة الدگمة مبين صدره
نظارات سودة ..
گال صعدي وشكله حييل عصبي صعدي نتفاهم

: خلص امان ماكو تفاهم احنا انتهيناا ..
ضرب قبضة ايده على الستيرن قوي
گال صعدي داگوولج وكافي عناد ..

باوعت للشارع ماترهم ابقى هيج احجي ويا
اصعد اخصمها اسمعه كلام موحلو حتى يفك مني وانا گدها ..

تحسرت بانزعاج ودرت فتحت الباب وصعدت سديته باوعت اله
گتله شتريد مو گتلك انتهينا احناا لاتلح وياي بعد.
قرب مني نزع نظاراته شمرها .. كال

: اني جاي اصلح كل شي بيننا رغم شغلج ويا رضوان ومعارضتي اله بس فوتتها الج .. 

: امان انا ماافيدك شوفلك وحدة غيري اهلك مايعيرونها يحترمونها وماتسيئ السمعتهم ..

: هذا كله مايهمني لااهلي ولااهلج ولااحد الي يهمني شي واحد ارتبط بيج وننقذ حبنا ونعالجه بالزواج ..

: حبنا ماكو امان حبنا غلطة ..

: الخاطر الله خلينا غلطانيين ..

: كرامتي وعزة نفسي عندي فوق الحب وفوق كل شي مااحب انهان ولاانذل ولاانوخذ بذنب ماارتكبته.

: الحب مو فد شي تمتلكينه وقت غرورج وتتركيه وقت كبريائج الي يحب  للموت مايتخلى عن حبيبه.

:ببرود گتله وانا ميته للاسف ..

امان بعصبية .. اظاهر اني انطيتج اكثر من قيمتج ولهنا وبس اكتفيت منج ..وداعة جرحج الي والخذلان ومثلما كتلج احبج راح اكلج نسيتج ..

دفعني من زندي على باب السيارة .. گال يلله نزلي

وخرت ايده مني گتله لاتتجاوز لا انت ولااهلك يقيموني انا اعرف شون اثبت ذاتي ..

گام ميل جسمه عليه طخ زنده بيدي تمنيت مااتركه مد ايده فتحلي باب السيارة وصاح نزلي بعصبية ..

صحت وشعندي باقية اصلا مااتشرف 

نزلت بسرعه .. سيارته عالية طفرت طفرر ركعت الباب حييل. .
شخط سيارته وراح .. وكفت بمكاني مااتحركت
لو بس شايل نظاراتي وشايف عيوني والدموع الي تجمعت بيها جان ماصدگت كلامي ..

يتبع ..

الفديو لسان حال أمان لو حبنا غلطة 😭💔