رواية لمْ تكُنْ خطيئَتُنا الفصل السادس عشر 16 - بقلم نورا ناصر

#لم_تكن_خطيئتنا

نورا ناصر

بارت 14

اشواق "بصياح":شنو مو بكيفها ولج ياعديمة التربية

سميه: والله خابصتني بهي الكلمتين،عديمة تربية على الاقل مااطرد بالناس جايين ضيووف.

: تعترفين ماعندج تعالي خلي اربيج.

عمه زينب وعمه امتثال لازماتها من ايديها وهي تريد تهد عليه وصوت صياحها عالي.

اماليد "بعصبية": على كيفج عيني طالعين طالعين ماباقين على راسج.

سميه "بقهر": لا يمه عفيه بس شوفيها والله انه كلت لابوي راح تجين وسكت ماكال شي.

اشواق "بصياح": وينه ايوب صيحولي ايوب احجي ويا لو انه لو هم هنا.

من بين النسوان فات أمان وأخذها
حاوط اكتافها بايدينه وهو يتكلم وياها بهدوء وبرود غير طبيعيين.
فوتها للمطبخ غصب عنها. تمشي وتتلفت.
وتدردم.
بكل خطوه تتلفت وتريد ترجع عيونها علينه تجدح نار وشراسة وغضب خلتني متسائلة شنو من حقد! !

عمه زينب وامتثال ظلوا يطببون بالنسوان
الي اللتموا يباعن على المشاجرة الصارت قبل شويه.

اللتفتت على امي ،
:يلله ماما ادخلوا معليكم بيها هذه بس بوخه كل شي ماتسوي بس تهديد وصوت عالي.

ام أماليد : لا بنيتي لازم نكسر الشر ونروح خاف تصير مشكله شلنه بهالربابه هاي.

: لاعفيه ماعليكم بيها هسه تعوفكم وتسكت مالها علاقه.

اماليد: لا يمه لا اروح احسن.

انه سكتت وضجت وماردت الح عليهم بعد اكثر

امي فتحت جنطتها طلعت علبة وانطتنياها
كالت: هذا السوار الوعدتج بي صوريلي اختج ودزيلي صورها اشوفها.

مامديت ايدي بس احجي واتوسل بيها تبقى
استياء وماكو ذرة فرح بيه
سحبت ايدي وخلت العلبه براحة كفي.

بوسناها انه وصفا وظلينه واكفين نباوعلها وهي تمشي وتطلع من الباب الرئيسي.

باوعتلي صفا وعيونها كلها دموع
انا مو مثلها ماابجي كدام اي احد
هي عكسي بسرعه تبجي وعلى اقل موقف

گالت: لا تدخلين للمطبخ تره عمتي اشواق هناك تجنبيها تولي سميه عفيه ابقي هنا على ماتهدأ شويه.

: اتجنبهااا! !؟ لا والله رايحتلها واريد اطلع كل الي بقلبي.

:لا سميه تدرين بيها عصبية عقلي اليوم فدوه
الخاطر رقية.

جريت نفس وزفرته لزمت جبيني بتوتر كلشي براسي مخربط.
وابوي ماكو ولابين مشغول داخل بالديوانيه ويا ضيوفه.
اريد اهدأ حتى ادخل ماجاي اهدأ ابد.
شوفة امي وهي تطلع منا مكسورة خنگتني عذبتني.

اباوع الصفا واكفه يمي
صفا: امشي ندخل بلكي راحت للهول
كتلها يلله ندخل
دخلنا للمطبخ
تلگتني بيبيتي يم الباب
لزمتني من ايدي وتهز بيها برجفة وهوان علامات الكبر
:ولج ماعندج عقل هي سوالفج ماتيوزين منها
انت شون وياج ماترتاحيين اذا ماتسوين مشكله.

: يا مشكلة بيبي يعني واذا اجت امي حالها حال النسوان شراح يصير تطير نصكم؟ !

امتثال: انت تدرين بامج مامرحب بيها هنا وراح تصير مشاكل اذا اجت ،مالهها داعي جيتها تره.

:تكدرين ماتحضرين عرس ابنج اسلام لو مهما مسويه انت؟
:لاتقارنيني ويه امج امثالها عقابهم الرجم والقتل بس اهلها مامهتمين وابوج مايريد يوصخ ايده بدمها.

:انت هم مامعصومة من الخطأ تره.

بيبي: وشراح يصير بيها اماليد اذا مااجت.

: والله حرام عليكم الله بعزته وجلاله يسامح ويغفر الذنوب بس انتوا لا
هم زين الهوا مو بيدكم جان گطعتوا عنه.

عفتهم رحت امشي بخطوات يائسه وحزينه كعدت
على خامس بايه من الدرج.
البيه نار مستعره
عيوني احسها جمر يحرگني
دموع متكدسه بيها موراضية تنزل
مثل سحابه ومليان مطر بس طال الوقت ومامطرت بقت محمله.
مرت الدقايق وانه گاعده القهر بيه
صافنه ومامنتبه على اي شي
اسمع صوت كعب صفا ع الدرج فززني من صفنتي باوعتلها
صعدت يمي گالت سميه اجو يلله تعاي شوفي رقيه شلون طالعه تخبل
فركت عيوني ماجاوبتها
حاوطتني بايديها
خلت وجهه على كتفي
تحجي وتبجي
ولج تسألني عن امي تگلي مو كالت تجي شو ماكو وينها خلي تجي تشوفني شون طالعة حلوه.

من سمعت كلامها خليت ايدي على حلگي
ماتحملت الدموع الي كانت محبوسة قبل شويه
نزلت عشرة عشرة على خدي
محمله قهر والم عذاب وندم
ياريت ماكلت لابويه على سوالف امي.

درت وجهي على صفا كتلها وانه ابجي وصوت شهقاتي مسموعه
:روحي كليلهه ماكدرت تجي عدها شغل بالصالون.

: امشي ماتشوفينها انت.

: خلي امسح دموعي واجي يمها.
: ماشي.
نزلت وتطقطق بالكعب
اباوع لرجليه حافيه
والفستان كشخه
صايره نشاز ولاااعرف اللبس كعب!
مسحت دموعي بحذر
لااخرب المكياج
نزلت باوعت لنفسي بالمرايه
جوه عيوني خط احمر شسوي متشوقو اشوفها
رحت للهول
شفتها كاعدة بالكوشه وابتسامة عذبة وبريئة على محياها مرسومة.
لهج قلبي بالدعاء الها
بأن يسعدها

بدلتها وردية مدنفشه
كركش على اكتافها
طالعه مثل اللعابه
ملامحها بريئة
لمحتني من بعيد ظلت تأشرلي بحب بكف ايدها
ابتسمت الها
وتقدمت باتجاهها وسط الهوسه وتجمع الناس.
اوخر بيهم بايدي
نزلت نفسي عليها وحضنتها وجهي صار على اكتافها بستها على كتفها.
وخرت منها تباوعلي وتضحك فرحانة
وتباعد خصلات شعري الي

تبعثرت واللتصقت على وجهي

ارتسمت على ملامحها علامات انزعاج وتسائل
اللتفتت على صفا الي كاعده على يمينها وتكلمت وياهه بلغة الاشارة

فسرتلي صفا: تكول شبيهن عيونج حمر ومبينة باجيه قليل اشوفج هيج شبيج اليوم؟

انطيتها نظرة اطمئنان ... وبستها.
بقيت يمها شويه
نظرات اشواق ماتركتني بحالي انزعجت.
بس بقيت واتظاهرت بالقوة
الى ان تعبت وتعب كل شي بيه
گمت من مكاني
اريد احرق قلب اشواق
ابدل فستاني الاسود حتى لايبين عليه الحزن اكثر
رحت للغرفه لبست فستان شيفون بنفسجي غامق طويل وكصته كصة الحورية.

طلعت من الغرفه شفت هوسه
اجو اهل العريس
رحت يم الدرج كباله صاير الحمام وبصفه مغسلة ومرايه.
شفت نسوان مااعرفهن من اهل العريس
يم المرايه جاي يعدلن مكياجهن
بقيت واكفه جاي اسوي شريط فستاني الي نازل من الرقبه على الصدر
اريد اربطه هنا لان الغرفه صارت هوسه.
بقيت واكفه انتظرهن يخلصن
واستمع لكلامهن
: يايمه شلون حاره ماعبالك شته
: هو منين اكو شتا بالبصره بس كم يوم معدودات على عدد الاصابع.
: اي والله انه ولااللبس قديفه بالبيت.
: هو جونه مال قديفه اشتريهه واشمرها بالكنتور.

بهذه الاثناء اجت وحده وياهن
گالت: والله وسواها نضولي ولاتوقعتها منه شون گدر يتزوج على الاء وهو شايلها بالصلوات يمووت عليها.

: يمعوده هو سوا هيج وخطب هاي الخرسه حتى يكسر خشمها وترجع غصبا عليها.

: لا يمعوده يريد يطلگها حسب ماسمعت!

: لا عيني هو گال لأياد رجلي هذا الكلام يكول بس اخطب ترجع لان قافلة صارلها مدري كم شهر يروح عليها وماتقبل ترجع.

: زين هاي الخرسه شنو ذنبها خطيه هم مايصيير تره يورطها ويا واذا رجعت الاء شراح يسوي خو مايعوف هاي.

: ليش هو لعب ويعوفها بعد ماادري علمي علمج انه سمعت هذا الحجي هو ماراح يطلگها بس يريد يكسر خشمها بخطبته من هاي الخرسه!

سميه ...
سمعتهن لو تهسترت مااتحملت ابد يعني معقولة كلامهن صح؟
هاي تكول هو بنفسه حاجي لرجلها هالحجي مامعقولة تجذب؟ !

عفتهن يسولفن احس انقطعت عن العالم ياربي شسوي وشون انقذ اختي شلووون.

ركضت للمطبخ اريد اشوفلي احد يصيح لأبوي
اگله.

وصلت لحد باب المطبخ الي يطل على الحديقة
شفت رضوان واگف
اشرتله اجه دخل بالمطبخ
حجيت بسرعه :رضوان روح صيح لأبووي.

: سكو فهميني؟

: روح صيحله بسرعه جااي اگلك

: على كيفج ليس هيج ترجفين غير افهم.

صحت بوجهه اوووو شعليك انت روح صيحله وانت ساكت.

حسيت بأيد دارتني عليها
باوعت شفتها اشواق ضربتني بكل ماتملك من قوة راشدي على وجهي ووياها طلعت كلمات
گالت ادبسز ليش تصيحين بوجهه يشتغل عندج هو ولابعينج احد.

لزمت خدي صوابها ألم بروحي مو على وجهي
مااهتميت ولاخجلت گدام رضوان
ولا بناتها الي اللتمعت عيونهم وبشماته.

لا الي يهمني اختي وبس شون انقذها من هي الخطوبة.

گتلها والله راح ادفعج ثمن هذا الراشدي وراح يكون الثمن غالي.
كلت هالكلام بعفوية المهم عندي ماتضعف شخصيتي ومااعرف شنو حيصير بعدين

وخرت رضوان من على الباب
رضوان الي مااحرك ساكن وردع امه عن ضربي
هنا ماعندي شي افكر بي غير اوصل لابوي واكله الي سمعته.

طلعت للطارمه،
اسلام وامان واكفين
شافني اسلام كال:شعندج هنا روحي دخلي ماتشوفين الزلم گدامج.
نترت روح صيح لابوي.

: دخلي جاي اگلج.

مااهتميت لكلامه گتله انا رايحه وخررر
صار مقابيلي امان منعني حتى ماافوت
واخيرا تحرك ونطق هالصنم شكد بارد انت الخاطر الله.
رفعت راسي صارت عيونه بعيوني
نظرات باردة وهدوء قاتل.
وترني بس حاولت احافظ على اتزاني وماابين اله توتري.
گال رجعي اني راح اصيح اله ...

تنفست الصعداء
ولا واحد بي خير بس هذا العذاب
مع الاسف امك هاي النسرة

رجعت كم خطوة وكفت اباب المطبخ متوتره والدمع رجع تجمع بطرف عيني.
اجه ابوي لابس دشداشته البيضاء

اشرلي من بعد خطوات يمشي ويحجي وكل ما اله يتقدم باتجاهي گال: يلله بويه روحي جيبي جنسيتة اختج راح يعقد الهم الشيخ.

: لا عفيه يابه لاتزوجها "وحجيتله النسوان شنو گالن"

: ولج يابه ماعليه بحجي النسوان انه جاي اكلج روحي جيبي جنسيتها.

وخرني ودخل صاح صفا صفا

مااعرفت شنو اسوي ابداخلي صرخة اريد اصرخ وابجي اريد امنعهم مايزوجوها.

ركضت ادور عمه زينب ماكو. النسوان
يباوعولي شبيهاا هي؟
شنو غيرانه من اختها لان راح تتزوج قبلها
مااهتم لحجيهم
لاول مره حسيت انه الخرسه مو رقية
حسيت بيها وهيه ماتكدر تحجي
شون راح تتزوج ظلم شون يربي شلووون. ؟

وصلت للهول باوعت لمكان رقيه شفته فارغ وهيه ماكوو.
صارت مقابيلي إيناس حجيت بوجهها بانزعاج وين رقيه؟
اشرتلي وحجت بصوت اكاد ان اسمعه بسبب الهوسه.
گالت: دخلوها لذيج الغرفه راحوا يعقدون

غمضت عيوني هم الدنيا كله على اكتافي
تحسرت صار مقابيلي ابوي
بيده جنسيتها
توجهت اله لزمته من ايده
يابه عفيه وخرني عنه ماسمعني.
شسوي مابيدي شي.
توجهت مبتعدة عن الهوسه
بكل شبر بالبيت اكو ناس.
يربي احس روحي بدوامة
زوبعه عاصفه
شنو ذنبها ياالله وشنو ذنبنا كلنااا؟ ؟!!!!
كعدت على الدرج بيأس
راسي بين ركبي ودموعي تنزل على فستاني.
الهلاهل بأذني عرفت عقدوا وخلصوا.
كرهت روحي الماگدرت تنقذ اختها
كرهت حياتي لو انه ولد جان كدرت اسوي اي شي وامنع هالزواج
بس انه بنيه مشكلة؟ !
وبنت منو؟
ام مجتمع ينظر الها نظرة سيئه
اب لاابالي ميهمه بناته يريد يرضي اهله ويكفر عن ذنبه بطاعتهم لان وقبل سنين منعوا من هالزواج
وماامتنع اتزوج وعض اصبع الندم
لان الي عاف اهله ودنيته عمودها خذلته!

كل شويه وحده تصيحني ولج كومي جاي يلبسها الحلقه يلبسها الذهب قطعوا الكيكة
بقيت بمكاني مااتحركت
والناس تسال شبيه
مااجاوب
اجت صفا
: يلله كومي ماتروحين راح نروح للاستديو نصور
اشرت الها لا.
بقلبي عمت عيني اتونس بحفلتها وهي راح تنظلم.

بلش المغرب والناس خفت
مااعرف منو الي صاحني كال يردوج بالصاله.
كمت من مكاني
مشيت بخطواات ضعيفه اجر بروحي جر.

وصلت للصاله اول واحد صار گبالي امان واكف يم الباب ايد بجيبه والثانيه لازم بيها السترة وسويج السياره.
ارتبكت من نظراته
مديت ايدي لزمت الخصلات المتمردة طالعه من شعري رجعتها داخل الشال.
مناك امه وخواته
وعمي سليمان وابوي وبيبيتي.
عرفت هنا راح اتم محاسبتي على كل الي صار بالحفلة
ياربي احس نفسي بحلبة مصارعه والكل ضدي
ماكو الي يعيني
بس انت قويني وخليني اواجههم.

يتبع.

بالنسبه للي سألوا عن رقيه
رقيه صماء وبكماء
والقصه نعم حقيقيه
البارت 1633 كلمة
موو قصير والبارحه نزلت بارت واليوم هم
ياريت تعلقون على احداث القصه
مو على موعد النشر او على التأخير او قصر البارت.
موعد محدد للنشر ماعندي شوكت مااخلص كتابة انزله
نزلته بدون مراجعه اذا اكو اخطاء غلسوا.
🙈😘