رواية لمْ تكُنْ خطيئَتُنا الفصل الثامن عشر 18 - بقلم نورا ناصر

#لم_تكن_خطيئتنا
بارت 16
نورا ناصر.

اوووف شبيه من اشوفك أذووب
حاولت أخفي توتري
واعتقد نجحت باخفائه

واكف گبالي يباوعلي بنظراته المعتادة الي دائما اكون عاجزة عن تفسيرها.

أتمنى اخلي ايدي داخل قلبي واهدأ نبضاته المتسارعه والهائجة
خفت لايحس على قلبي وهو منتفض بشوفته.

أمان:  شلونج بنت خالي؟

سمية "نظرة عليه ونظرة على غير مكان عبثاً احتاريت اسيطر على قلبي الهائج بنبضاته لو على نظرات عيوني الي مالاگية الها موطن هو واگف بكل ثبات وانا الهيئة ثابته لكن داخلي مهتز ": گتله بخير ابن عمتي.
بقلبي:  ولو مااتشرف بيها عمه!

أمان:  امم دتنتظرين أحد.

سميه "بقلبي" اووي عيني يتبغدد هسه شگله جاي انتظر حبيبي اشوف ردة فعله لا عيب مو الهالدرجة.

: خلصت  اريد ارجع للبيت.

: وشون ترجعين اذا تردين اوصلج للبيت.

:بقلبي گلت شعنده ابو الخط مال اني
بلساني گتله: لا انه مأجرة خط بس اليوم تأخر شويه كل يوميه اطلع اشوفه ينتظرني.

بهاللحظة اجه أمير:  هاا سميه مو گالو بطلوج من الدوام شو جاي تداومين.

: شماتتك مرجوعه عليك ماعاش الي يبطلني من الدوام.

: هو منو المشمت شكد نفسيه
امير ضرب ايده على كتف أمان بشقة وگال ههه  ونوب تدعي على أبوها.
امان ابتسم ابتسامة مجاملة

رديت : لا ماادعي على ا ابوي  لان مستحيل الدم يصير ماي اكو غيره يحاولون يأذوني وبأكثر من طريقة.

أمان ابتسم ابتسامة متكلفة ورفع تك حاجب
باوعتله تذكرت ابتسامته بذاك اليوم حسيتها ابتسامة خبيثة گتله.
:  بعصبيه...اكوو كلام يعجب الناس تضحك عليه اكوو كلام ميعجب الناس هم تضحك 
انت ليش هسه جاي تضحك ؟

امان "بجدية وعصبية " : لان ماعجبني.

سمية بقلبي:  لايعجبك ويطبك طوب هه.
گتله انه مايهمني سواء اعجب الناس او لا انه اتصرف على طبيعتي.

باوعلي وتحسر
باوعتلي ونفسي بدا يصعد بقوة!
اتمنى اعرف سر حسرته.

امير:  يلله تأخرنا

أمان بهدوء :  تجين نوصلج ويانا خاف هذا ابو الخط يتأخر ومبينة راح تمطر.

سمية بزعل:  لا مايهم انتظر شعندي.
ودرت وجهي على غير مكان.
هم راحوا وانه اللتفتت عليهم وهم يمشون ونظراتي على أمان.
فززني صوت هورن سيارة ابو الخط
وصعدت ويا ..

رجعت للبيت بدخلتي للهول شفت بيبيتي ورقيه كاعدات والصوبة مشتغلة

سلام شلونكم اليوم باردة
گعدت يمهم خليت كتبي على القنفة

بيبي:  اي اليوم بدت الچلة(عدة ايام باردة حييل) !

سمية:  انت شمدريج بيبي تدرين اليوم شگد بالشهر. ؟!

بيبي:  انلصمي انلصمي شبيه ماعرف مسويه روحج فهيمة.

رقية تأشر وتضحك بفرح
ضحكت الها بس مااعرف شنو تحجي
بيبي شبيهه رقية صاير شي؟
: اظن تگلج اليوم اجه ابو سرى
: ابو سرى منو هذا بعد؟
: خطيبها نسيت اسمه شيگلوله
خلت ايدها على حنكها تفكر.
: هاا عشتوو ابو سرى مكافح وشعنده جاي.
: گال لأبوج باجر ياخذها يعقدون محكمة.
: وشدعوه مستعجل.
: مرته وبكيفه شعليج انت.
:تغديتوا؟ 
: اي تغدينه
:صفا اجت؟
: اي طبت حتى ماسلمت مطنگره بوزها واصل شبر.
: يووو؟ يلله خلي اروح اشوفها.
اخذت جنطتي ودخلت للغرفه
سمعت انفاسها من جوه البطانيه مبينة جاي تبجي
كترت اغراضي على الميز
ورحت يمها على السرير رفعت البطانيه وصحت بيها شبييييج؟ !
باوعتلها وجهه احمرر والكحل سايح جوه عينها من البجي.
صفا ... وخري عني سميه اريد ابقى وحدي.

: لا ماتبقين وحدج گولي شبيج وشمسوية من مصيبه؟

: انجبي شگالولج عني ام مصايب
جرت البطانيه وورجعت تغطت مرة ثانية.
وشهقاتها مسموعة.

رحت على سريري كعدت وانحنيت انزع جواريبي
تكلمت بانزعاج وانه اسلت الجوراب من رجلية
راح امهلج مدة نص ساعة بس صفا خانم
ابدل واغسل واتغدى من ارجع للغرفة تحجين كل شي مفهوم.

ماردت هي وانه رحت للمطبخ كشفت الجدورة
مسووين مركة شلغم طيبه بالبرد
سخنته وصبيته أكلت
فتحت الثلاجة اخذت بطل ماي بارد
رجعت للغرفه.
رفعت عنها البطانيه كاعده بس ماجاي تبجي
قربت منها البطل
گتلها لزمي.
شبيج تخبلتي
گتلج لزمي
بس لزمته رفعته ليفوك
هاا شفتي شلون بارد هسه كله اصبه عليج اذا ماتحجين شبيج.

تحركت من مكانها تباوعلي وبعيونها دموع متكدسه
گعدي احجيلج.
خليت البطل على جهة وگعدت يمها.
احجي اسمعج العاشقة الولهانه.

:اليوم شفت هجران بالكلية وظلينه نحجي ومثل كل مرة تحجيلي عن اسلام واعجابها بي تگول راسلته قبل كم يوم وحاجيين.

: اي وشنو حاجين؟ يعني معترفتلة بحبها لو شنو؟

: لا تگول حجي عادي.

: وانت شبيج  يعني صدك عادي.

: لا مو عادي بالنسبة الي هو يحبني وهي تحبه انه صايرة بنصهم لازم اخصمها ويا اكله كل شي ينتهي بينا واحنا مامتوالمين.

: بس هيج؟

: شتقصدين يعني؟

: خاف اكو واحد غيره؟

: ماكو هيج شي بس صدك تعبت منه كلش مأذيني صارله شكم يوم يسمعني كلام يسمم البدن وساكته اله.
:  شيحجي بلله.

: يقارني وي أمي كل عركة والثانيه يحجي عليه ويگلي تردين تصيرين نسخة من امج انه يعجبني اهتم بنفسي واللبس مثلما اريد مو قصدي اجذب نظر احد بس هالشي يعجبني وبس.

: انت ناطيته مجال اكثر من اللازم اولا مخليته يحجي بكيفه عليج وثانيا بتصرفاتج لبسج ومكياجج الاوفر هذا كله ينطي حجة يحجي عليج وهجران مو فد مشكلة.

: لا هجران بحد ذاتها مشكلة هذا الموضوع يأرقني ماكو يوم حجيت ويا مااجت على بالي هجران واعجابها بي.

سميه "بقلبي"  اووف كون هسه افر راس صفا فر واخليها تگول لاسلام يخطبها وانتقم من اشواق وبناتها مثلما دفعت ابوي على عمي بس ماادخل خواتي بانتقامي واعرف صفا واسلام مامناسبين البعض واذا تزوجوا راح يصير عدهم هواي مشاكل.

گتلها گومي تغدي وخليها على الله بس الكاتبه يصير.

عفتها ورحت تمددت قريت شويه انطيت حساب الفيس لايثار تغيرلي اسمي. 
تمددت صفح وجهي على الحايط
غمضت وانرسمت صورة أمان على اجفاني
وصار كلامه مسموع بأذني
بس ليش هيج يضحك مااتحمله مره ثانيه اذا ضحك اله ارزله رزالة الماصايره.
غفيت گعدت الغرفه ظلمه صاير المغرب اريد اعرف روحي منو ماادري مرت دقايق يلله
مزعجه هالنومه المفروض انام نص ساعه اشو جريتها فد نوب للمغرب.
مديت ايدي اخذت تليفوني على الدولاب الي بصف السرير.
شفت مسجات من صديقتي
ولج سميه الاسم ماصار سويته بالانگليزي.

دزيت الها هذا مثل واحد لابد وره البردة والبردة قصيرة ورجلينه طالعات منها يعني ماسويتي شي بتغييرج لهالاسم غيرتي من العربي للانگليزي.

عفت التليفون ورحت توضيت وصليت
كعدت صفا
تعشينه.
ورجعت للغرفه اتصفحت فيس شويه
مؤيد ابن عمي منزل منشور على الزوجة الثانية
سويت تاك لزوجته أمل وعلگناها بالتعليقات
ضحك وتحشيش عفتها گابه بيناتهم خليت التليفون بصفي وگعدت اقرا.

قريت لحد الملل تعبت والله صعبه حييل.
صفا مقابيلي ساعة تبرد اظافرها ساعه تبدل وتسوي عرض ازياء ساعه تشغل اغنية وترگص ساعه تگعد تبجي اريد غرفة وحدي كأبتني هالبنيه.

رجعت لتليفوني سحبته من على الميز
شفت جايين اشعار طلب مراسلة
فتحته وانصدمت أماااااان يريد يتواصل وياي!

بقيت لازمة التليفون بأيدي غمضت عيوني جريت نفس بقوة صوت بداخلي يگولي لاتضعفين وتردين عليه انت معجبة بي واذا تقربتي منه اكثر يتحول الاعجاب الى حب وتتأذييين.
صوت ثاني يگلي لا منو يگول راح تحبي مو يمكن ميعجبج الي عجبج بي شكله منو يگول تعجبج شخصيته! ؟
بدأ صراع عقيم بين عقلي وقلبي
فكرت بكلام رضوان
بس كلامه مايهمني لان مايكدر يلعب عليه انه امه ماگدرتلي بعد هو!
فززتني صفا شبيج صافنه
جرت التليفون من عندي وي منو تحجين؟

ماعليج جيبي التليفون خمشته منها.

ظلت تباوعلي
مااصدك بس لا  الي ابالي

وشنو ابالج بلله خانم ؟

خاف تحبين ولج

اسم الله عليه.

اشاقة ههه منيلج مشاعر حتى تحبين.

جملتها أذتني مامعقولة ماعندي مشاعر انه هم انسان كتله من الاحاسيس
امان عجبني وماعجبني غيره ياربي شسوي
ليش اله هو
اعرف مايحق النا نرتبط حتى لو نحب بعض
حتى لو تهبط السما وترتفع الارض ماراح نرتبط.

من جهة رضوان ومن جهه اشواق ومن جهه امي وسمعتها شسوي؟
رحت على المسنجر فتحت طلبات المراسله
شفته كاتبلي شاميه؟ ؟ وعلامات استفهام هوايه
شيقصد
دست على موافقة
امان مثل سفينة مثقوبه وخاطرت بالابحار وياها واعرف نتيجتها شنو اكيد الغرررق!

تنفست شويه وصفا تباوعلي اكيد مبين عليه التوتر
ودخلت رقيه
باوعت الهاا انقهرت خطيه المخطوبات غيرها عدهن تليفونات ويخابرن هي ماتكدر.

رجعت عيني على التليفون بعد مااللتهت صفا ويا رقية بلكي تخلصني من نظراتها.

كتبت لأمان متوهم احنا مانبيع شامية على ايدك اليسرى گدام يبيعون .

شاف الرساله وظل يكتب
احس قلبي وجعني حييل راح يبين عليه
تغطيت بالبطانيه وانتظره يكتب
واخيرا وصل المسج مالته.
غمضت عيوني
بلعت ريق فتحتها وباوعت على الاحرف الي كتبها
: ههه انت اسمج شامية لو سمية؟ !

ضحكت ماادري شيقصد بالشامية
دزيتله شچلبت؟

: مو جان اسمج بالعربي سمية أيوب اشو هسه شامية وبالانگليزي؟

: غيرته للانگليزي.

: تغييري تكتبين شاميه شون طلعتي هندسة.

باوعت للاسم ايثار من مغيره الاسم كاتبته هيج
عزااا "Sumya" صدك تنقري شمية هههه يبلاج ياايثار ردتها تغيره حتى لااحد يعرفني  .

انوب هذا يقصفني ... !!
دزيتله مو انه غيرته صديقتي.

: وليش مو انت الي غيرتي مايصعب عليج ؟

شون لطشة لطش ع الاسم.
دزيتله اي مايصعب عليه وشگالولك عني؟

: ما گلولي شفت بعيني.

: الي انت شفته هذا قطرة من بحر.

: واضح يلا روحي تغطي ونامي تصبحين على خير.

: اتغطى وانام ؟؟ ليش منو گلك انام مكشفة.

: متعجرفة.

: اذا انا متعجرفة انت شنووو؟ 
بقيت انتظر رده مارد عليه
لازمه التليفون واباوع بالشاشه على المحادثة
نشط ومااايرد.
لزمت التليفون وشمرته شگد مستفز.  
انه الج ياايثار فشلتيني انه اتفشل واطلع كلشي ماكو راحت الهيبة.

صفا ..
من عرس وعد ابن عمي وانا واسلام مشاكل
اغلب الاوقات
يراسلني وماارد عليه الا ماندر وبس عركه وكلام يسم البدن وتهديد واخذج غصب عنج انهي عليج واكول لابوج على لبسج ومكياج وتاخيرج بالكلية ومرات انزل للسوك ويا صديقاتي وماانزل ويا الخط
من ارجع من الكلية يوگفلي بالباب يرزلني اعوفه وادخل.
تعبت منه من هسه هيج حاكمني من نتزوج شلون
بالاضافة الى هجران وحبها اله كل هذا وضع بينه حواجز كبيرة ومانسى امي وسمعتها ابد ماراح ارتاح ويا.
بس اكو شي بداخلي يريده وينبض اله.
يوم ثاني جنت ضايجة كلش خابرت امي انطتني عنوان الصالون مالتها.
من طلعت من الكلية حاجيت فراس گتله وديني لهذا العنوان
بنظراته

الخجولة الي مليانه حب گال تدللين.
بعدت عنه منقرفة من نظراته كلش كرهت الحب من وره اسلام.
نزلني يم صالون امي
گلي تحبين اجي عليج؟
لا تسلم امي توصلني
حتى يكون عنده علم انه مارايحه لمكان غريب وانما امي هنانه.
دخلت للصالون شفت امي
حضنتها بوستني
لابسه بدي اسود وبنطرون احمر.
شعرها لونه احمر بارمته
مكياج وذهب مغرگها على حباية ونص والاكثر من هذا حريتها حسدتها على الحرية الي هي بيها ونسيت كل شي!
سلمت على صديقتها سعاد
سعاد .وهي تتأمل صفا من فوگ لجوه .  اماليد هي بنتج لج تخبل ياعيني شحلاتها.
صفا .. فدوه لعمرج خاله تسلمين ..

نزعت الشال كعدت على الكرسي.
نضفتلي وجهي ورتبت حواجبي.
أماليد .. ليش ماادگلج تاتو لحواجبج.
صفا. . لا مااريد خاف ابوي ينتبه انه من اروح للكليه اخطهن واخلي مسكرة حواجب يصيرن يخبلن.

سعاد .. من تتزوجين ان شاءالله تعاي انه ادگهن الج انه اشطر من امج.

صفا .. ان شاءالله

أماليد .. اي صح هي اشطر مني.

صفا .. رن تليفوني رقم سميه اووو هسه تنطيني محاضرة شطولها لان تأخرت
خاف مااجاوبها يزيد قلقها.
اخذت تليفوني ورحت للحمام جاوبتها
هاا سميه قبل لا تنطيني محاضرتج احب اگلج انه يم امي بالصالون فد شويه اجي
سمعتها صاحت طايحة الحظ
سديته بوجها
تنفست الصعداء مليييت وين مااروح حكومة.
رجعت يم امي سألتني هاا حبيبة منو خابرج وتغمزلي
جاوبتها .. هاي سميه ماما لايروح بالج بعيد.
اماليد .. فديتها شنو تريد؟
... تسأل عني لان تاخرت.
... فديتها الماخذه مكاني
... علواه عليج ماما.
انه تأخرت لازم اروح صدگ انت مو گلتي  خالي يحاجي ابوي يخلينه نشوف بعض.

: جا غير ماقبل وگال مااريد مشاكل خاصة بعد الي صار بحفلة رقية.

بصفا بزعل .. اهااا

: حضنتها وباستها وباعدت شعرها .. لاتزعلين حبيبة اله نلگي حل نتواصل على طوول.

سعاد .. ورثت جكاره وحطت رجل على رجل
يمعوده اخذيهن وشلعي بيهن شبيج انت خطيه مبينه البنيه ذبلانه وشصاير بيها يمكن شابعه ظيم عند ابوها.
اماليد .. اي اخذهن ليش لا والله أطلع بيهن للخارج.

صفا .. ماما تأخرت لازم اروح توصليني.

اماليد .. هسه اخابر مروان ابن خالج اخلي يوصلج.

سعاد .. تعاي امكيجج اسويج عروس قبل لاتطلعين

صفا ..مكيجتني كلش حلو شغلها طلعت من يمهم صعدت وي مروان وصلني للبيت صاير المغرب نزلني سلمت عليه وراح.
اريد ادخل لبيتنه تفاجأت بصوت اسلام
: هذا منو ولج الصاعدة بصفه وهم جايه المغرب وشهالمكياج شهاللبس انت ماتستحين! ؟

: انت ماعليك افتهمت وولي من وجهي خليني ادخل.

: منووو يولي ادبسز انه اعلمج تعاااااي.

سحبني من ايدي بعنف فتح باب بيتهم   ودخلني.
يتبع

لاأحلل النقل بدون اسمي ولا تغيير اسم القصه لان وصلني جاي ياخذون قصصي ويغيرون اسمها مااحب اكتب هذه الملاحظة بس وصلت حدها 😅هسه يكلولي شبيج عصبيه .😃