رواية لمْ تكُنْ خطيئَتُنا الفصل الثامن والعشرون 28 - بقلم نورا ناصر

#لم_تكن_خطيئتنا
بارت 26
نورا ناصر

سمية .. احس نفسي ثگلت وثبتت  مثل نخلة صامدة بمكانها ..
عيوني ماجاي اكدر اشيلها اجفاني شبه مشلولة عن الحركة شسوه بيه بُعده وقربه اثنينهم واحد
احس مشتاقتله بغيابه وبوجوده لان ماجاي اكدر حتى المسه ..
احسب اللحظات حتى يوصلي
محتاجة جرعة حياة منه
بدونه احس روحي ميته
نصيبي من الدنيا حبيت شخص كل الطرق ماتكدر توصلني اله ..
واخيرا وصلني
من هيبته اريد اوگع
بس تمنيت هالوگعه بحضنه وبعدها مااريد اصحى ولااشوف الدنيا بدونه ..

ظليت ابلعم واسمع حسراته،سودة عليه اخليك تتحسر امداني مو وجه نعمه. متبطرة
احس قلبي يعتذرله اذيتك حبيبي .. سامحني
مدنگه ومارفعت راسي
عيوني بالارض ..
گال وبهدوء طاغي
بيها مجال نحجي؟

غمضت عيوني جريت نفس
قويت نفسي رفعت راسي بس ماباوعتله لا جانت عيوني بالفراغ ..
گتله اي والرجفه باينه عليه وكملت اي بيها مجال ..
اشرلي براسه يلله
مشى وانه مشيت وراه
اباوعله لهيئته وجسمه
اناقته سحرتني .. اتمنى اعرف اسم عطره احتفظ بنسخه منها اشتمها كلما يهزني ويذبحني الشوگ اله.

وصلنه لحد الكافتريا .. كعدنه كعد بصفي موجه الكرسي عليه يباوعلي مثل جوعان ومخلين كدامه اكل ويباوعله بنهم. 

حسيت بسعادة وجوده بقربي تمنيت هاي اللحظة ماتنتهي انرسمت على محياي ابتسامة عيوني كلها تتأمله ..

رفع تك حاجب گال اكو شي يضحك .. ؟

خنزرت بس بعدها الابتسامة مو قابلة تفارگني
گتله شنو حرام انتوب مانضحك  هم گول الضحك عدم ذوق وقلة احترام بعد؟

أمان .. انت شگد تصرفين حجي جاي اگلج بلا هالاسلوب هذا سمية ..

سمية .. على طاري الاسلوب شسويت ويا اختك؟

أمان .. سويت الي لازم يتسوه واطمئني من هالناحية الموضوع انسد.

سمية .. قربت وجهي عليه بلهفه گتله يعني كتلتها كتله معدله حتى بعد لاتعيدها؟  ..

.. اضربها؟  من كل عقلج شلون ترضيها  لو عادي عندج
باجر عكبه تحرضيني على نفسج وامد ايدي عليج؟!  كافي شهالعقليه لتضلين متخلفه  سمية الضرب بس للحيوان شون تردين اضرب اختي ؟ !

سميه .. جاي اريد اكوله شحدك بس سكتت
حجيت احم هي هم
وهم سكتت ..

أمان .. ادري بيج شنو تردين تگولين هي هم حيوانه زين شعجب سكتي جان طلعتيها للكلمة هي بقت على هاي؟

.. تحسرت أمان انت اذا تحبني تتقبلني  مثل ماانه.

.. هذا مو اسلوب سمية اني اريد احترام يكون متبادل بيننا .. مو نتر وغلط ولسان طويل شون راح نتزوج شون راح يصير عدنا اطفال نربيهم. 
على اسلوبج هذا من هسه احضرلي بيكيسي للعازه الج وحده والي وحده.

.. ضحكت بصوت مسموع خليت ايدي على حلگي اكتم ضحكاتي لاننفضح بنص الكافتريا ..
لان ضحكتي ماشاءالله ..
گتله أمان انه مااحب احد يفرض عليه شي.

: شوكت فرضت عليج شي اني تذكرين من گتلج لاتخذليني هسه اكررها عليج لاتخذليني باسلوبج سمية.

.. بقيت صافنه عليه ومبتسمه ونظراتي كلها اعجاب وحب حجيت بقلبي ياذوق يااسلوب انت كدامي تسوا ابو الدنيا مارايده شي بس تبقى وياي
ظل يحجي وبالي مو يمه بس اباوع ومبتسمة
كال هاا اتفقنا
گلت اي
شنو اي

احبك .. وجانت هاي المره الاولى الي اكولها اله مباشرة.

شفته ضحك .. لملم  اصابعي الاربعة ماعدا الابهام ولزمهم بقوه ظليت ارجف واطرافي ثلجت
بين لمساته حركت ابهامي وخليته على ظاهر كفه وظليت احركه بلمسات ناعمه . وعيوني بعيونه نسيت الدنيا كلها واحس،الضجه الي يمي بعيدة ومااسمعها بس اسمع صوته.

گال ليش تحرميني منج ليش تعذبيني ..
سكتت .. بعدها گتله انا هيج مااحب احد يلوي ذراعي.

بهاللحظة دك تليفوني .. فتحت الجنطة وطلعته
شفتها ايثار
جاوبتها

كالت وينجن يالعشگانات بلشت االمحاضرة

كتلها جايين ..
سديته منها باوعتله
گال آخرتج صح .. ؟
لازم اروح هسه ..
گال يعني اتفقنا؟
ابتسمت كتله اتفقنا وبگلبي كملتها على ان لانتفق وضحكت .. طلعت من يمه وبطريقي للمحاضرة
سعادتي تسع الكون كله.
فرحت بجيته مو بس لان مشتاقتله واحبه واموت عليه ..
لا وانما احس بيها إثبات لذاتي
الكل جانوا يتشمتون بيه لان انا بنت اماليد بنت الدلالة الخاينة واولهم عمه اشواق وهسه ابنها يعشقني ويتعنالي من بعد الاف الكيلو مترات ..
حتى بس يرضيني ..

كنت قبلها بلحظة ضعف ويأس كلت خلص لازم انهي قصتنا قبل ما القدر ينهيها ..
بس من شفته وحاجيته گلبي رف مرة ثانية
نسيت القدر، نسيت الناس والظروف وسافرت بعيونه على دنيا جديدة ...
وبس لمحت ضحكته ارتاح تفكيري
وفرح قلبي وروحي حلقت وطارت بالسما
...
حتى لو آخرة طريقنا  فراق واذا سرقه النصيب مني
اريد  اعيش بقربه گد مابيه
اريد  أتهنى ويا  واستمتع بكل لحظة هو  موجود بيها وياي..
اريد  احبه وابالغ بحبه، اريد  اعيش كل دقيقة فرح وهو يمي
مااعرف شلون  بنظرة ينسيني ويمحي كل غضبي منه
ومن العالم بضحكة .. ياربي شگد ساحرني ..

كملنا محاضرات وطلعنه ..
انصاف ماكو لاهية ويا الحب امير
بس تخلص المحاضرة تروح اله ..
نتمشى انا وايثار ..
ظلت تتلفت .. باوعت الها گتلها جنج عندج سر احجي ثرثري لايظل حسرة وتنجلطين وشيفكنه بعد.

ايثار .. اكلج على سر بس مو تحجين عليج الله.

.. مااحجي بس فضيها ...

: زينه وامير عدهم علاقة ..

: ياعزاا خطية انصاف يعني يلعب عليها؟

: ولج ماادري بس هاي زينة تشتغل برصيد نص الليل ههههه.

: شنو شتشتغل ..

: يا ماتعرفين.

: لا مااعرف شنو فهميني؟

: ههههه خليها سكته يلفته.

: انه لازم تجي انصاف واگللهه.

: لا عليج الله تكطعني زينه حلفتني.

: لا بس احذرها منه ..

: وانت شعليج بيهم.

: ليش شعليه مو انصاف صديقتي وماتستاهل الي يسوي بيهه هذا الشيطان وهاي زينة كلبة وحقيرة شون تخون صديقتها وتدري بانصاف تحبه.
ايثار سكتت وانا غديت نار .. شفت انصاف وكعدنه نحجي وحدنا ..
گتلها ديري بالج من امير تره ملعب هذا.

انصاف .. هههه هاي شبيج سمية هذا هم حاطة عينج عليه؟ موتحبين امان انت؟

: شبيج تره اريد مصلحتج انه ليش هيج ماخذه عني نظره؟

: لا نظرة ولا مصلحتي ولاشي بس امير دز امه وخالته وخطبني رسميا من اهلي بس ابوي اجلهه يكول لبعد التخرج وامير يحبني وانه محذرته من اي شي غلط راح اتركه.

: الله يسعدكم شنو اريد انه ..

بعد هذا اليوم انصاف هواي ابتعدت عني عبالها اغار منها .. جان اكبر غلط تدخلي بيناتهم
بهالوكت صدك المثل الي يكول لاتسوي زين الشر مايجيك.

زينه وايثار مثل الجدر والقبق مالته
تصرفاتهم ماتعجبني
ايثار اتطبعت باطباع زينة
فصرت وحيدة .. .. ..

شفت أمير حاجيته ..
گتله عيب عليك تره انصاف خطية تحبك مايصير تخونها وي وحدة تافهه مثل زينة

أمير .. وانت منو گلج هالحجي زينة؟

: محد گلي أمير بس الي جاي تسوي مايصير تره.

امير بنتر:  انت لا تدخلين خوش ابتعدي عني واذا وصلتي خبر لانصاف وكتيلها هالحجي والله ادمرج خوش لعبي بعيد حبابة لايلوحج طشار مني.

.. ظليت اهز بيدي مو انت ابن عمي الله يچرم وانصاف صديقتي مااريد اخسر صداقتها من وراك وهاي انه جاي احذرك اذا تماديت وياها والله اوصلها الها كافيك لعب.

: انت وصليلها وشوفي شراح يصير بيج

وراح..  
رجعت للبيت صفا جايه قبلي ..
كعدت يمها سالتها عن فراس.

صفا .. اليوم اجه عليه ورحنا للدوام بس مانطق وياي ولا حرف عبالك ناوي على نية لو جاي يفكر بشي.

سمية .. وانت ماحاجيتي؟

صفا .. لا عفته ماحجيت ابد.

.. ووين كعدتي يمه؟

.. خليت اخته مريم وصديقتها يمه وانه كعدت وراه بس ماباوعلي بعد ابد.

.. يلله ياخبر بفلوس باجر ابلاش الايام الجاية كفيلة بمعرفة كل شي راح يصير.

.. خايفه وما مطمئنة وگلبي يأذيني.

.. لاتخافين ولاتضوجين ان شاءالله مايصير اله كل خير.

------------

مناضل .. رقية بس وصلت للبيت صعدت فوك ودخلت الغرفتها وقفلت الباب.
صعدت وراها ادك ادك ماكو
انا هم غبي شون تفتحه وهي اصلا ماتسمع
صارت كبالي فاطمة
ظلت تضحك
كتلها قافلته بنت الكلب .. ظلت تضحك
ونزلت جوه بعد ماشفتها ..
كل شوي اجيك الباب ماتفتحه مقفول
كلش مشتاقلها اعرف ضلمتها وخدعتها بس شسوي اطفالي مااكدر اتخلى عنهم ورقية عشقتها
الله عاقبني بحبها لان بريئة وانا استخدمتها غاية شون راح ارجعها الي واخليها تثق بيه مثل اول محتار
رحت للدوام الصبح
طلعت بلا ريوك
هالايام حبيبتي هاملتني تريد تعاقبني
عبالها هيج اريد منها شغل وبس ماتدري شوفتي الها تنطيني جرعة سعادة ..
رجعت للبيت .. اجت الاء صبتلي غدا
گعدت يمي
ظليت اتلفت رقية ماكو.
حييل تغيرت وياي وجعني گلبي.
الاء .. بلله عليك حبيبي هاي الخرسة
بعدهه مامكملة كلامها لزمتها من ملابسها وعيوني مخنزره بعيونها وهي تباوعلي بخوف
گتلها سمعييييني عدلل اسمها رقية اخر مره اسمحلج تكولين عليها خرسة مفهوم؟
برجفه وخوف كالت خوش.
رجعت للاكل اخذت الخاشوكه وظليت اكل
تذكرت اي شي يخص رقية يهمني
كتلها شبيهه رقيه
كالت غسلت هدوم البيت كله وشامره هدومك على صفحه ماغاسلتهم.
: انت غسليهن شعندج.
كامت زعلانه ..
رحت اغسل وبعدها صعدت الفوك ادور رقيه شفتها جاي تجلف المغسلة
حضنتها من وره
ملصت نفسها مني
ظلت تاشرلي على بطنها
ضحكت كتلها انت حامل واشرلها ع بطنها واسوي حركة بايديه بمعنى طفل نايم.
كالت لا لا باشارة بايديها ..،
وحركات فهمتها تريد تروح للدكتورة حتى تجيكها ليش لهسه ماكو طفل عدها ..
ضحكت بوجها كتلها صار وسويت الها علامة الاوكي بايدي ..
وخرت مني بسرعة ودخلت للغرفة وقفلت الباب
تريد تعاقبني
كلت ميخالف .. اصبر عليج مابيدي شي ..

-------
سمية .. ابوي خطب فاطمة .. سوا حفلة وحده هي عرس وهي خطوبة ..
لبست فستان ماروني بينصل
عليه حزام عريض اسود جلد ع الخصر.
وعلى اكتافه قطعة شيفون مقصوصة بيضوية سوده طويله .. شعري سرحته كله الكذله شلتها ليفوك كلها وسويتها بف ..

جاي اطلع من باب المطبخ
صار گبالي امان ضحكت وهو هم
گال شوكت هذا الجمال كله يصير اليه ..
كتمت ابتسامتي كوه .. 
جرني من خصري اله ووداني ع الترك الي بصف المطبخ
گتله لايشوفنه احد ..
سكت ويتأملني وجهه قريب على وجهي
حسيته تقرب كلش
دفعته من صدره لزم ايدي گال اششش
اخذ خصلة من شعري استنشقها وخلاها على شفايفه باسها .. تركها .. قرب وجهه من كلش حسيته راح يبوسني خليت ايدي على شفايفه دفعتها بخفة
عفته وركض للمطبخ واسمعه يضحك ..
صارت كبالي اشواق عبالك شايفه عزرائيل
بهاللحظه ..
گالت:  مو عبالج وزيتي امان وجبتي مناك لهناك حتى يرزل اخته ويحجي عليها وسوالج قيمه عود تره انت وان كمتي وان كعدتي تبقين بت اماليد وماحاجه اكلج اماليد منووو اتعرفين كلش زين
وزواجج من امان كطنه وشيليهه من ذانج شيلي من راسج لااشيله الج گووه.

انا مثل المخدرة  بعدني من جرعة الرومانسية وي امان مااكدرت انطق ولا كلمة
عفتها ودخلت جوه.
واسمعها وي امان تلغي ..
كالوا اجت السيارات ..
لفيت شالي واهذت جنطتي ولبست الكعب
صار گبالي رضوان .. واكف يم سيارته
احتاريت ويا امان بعيد عني واكف عينه عليه
اجه رضوان يمي سلم عليه
شونج اشوفج صرتي زينه وايدج هم فاتحتها  

كتله زينه وعيني على امان ..
كملت كلامي وانت شلون صار كتفك ..

ضحك كال بعد وكت توج تسألين.

سمعت هورن قووي باوعت سيارة امان
واحنه واكفين يريدنه نتفرق حتى يفوت ..
بس اكو مجال مناك بس هو متعمد

رضوان باوعلي گال اجتج اشارة مننن
وماكمل ووخر عني ..

شلت فستاني وصعدت وي خواتي بالسيارة
ورحنه على بيت مناضل ..
فاطمه لابسه فستان اوف وايت
ردان طويلة .. كيبور
ملامحها حلوه سمره بحمار عيونها وسيعه مثل الساعه
قصيره  بس جسمها تارس . ..
اخذها ابوي لابس قميص ابيض نص ردن ورباط نيلي بلا ستره
مااعرف ليش حسيت بالغيرة او الخوف شي اعتراني وعصر قلبي.
بعدت الافكار السودة عني ..
زفوهم للفندق  واحنا رجعنا للبيت ..

-------

صفا ... مرت ايام فراس ميحاجيني بولا حرف ولا انه همين ..
قبل الامتحانات انطونه عطلة كم يوم ..
كاعدة اقرا .. دك تليفوني انصدمت فراس يخابرني جاوبته بخوف
گال صفا انت تردين نتزوج لو لا؟ 
گلت اي ..
گال اوكي نتزوج بس بشروط ..

للحكاية بقية ..