رواية لو انك لم تعد ..... الفصل الثالث والعشرون 23 - بقلم نورا ناصر

#لو_انك_لم_تعد 23
بقلمي نوره ..

اني ارتبكت كتلها خاله ماكو شي وبديت اتهرب منها
كملت العشا وحضرته ع الطاوله وصعدت فوك اصيح الكرم ..
يله كرم كوم تعشه
مااريد سم
فدوه الگلبك اني مقصدت شي بس خوفتها
ضوجتيني متملين من المشاكل ..
كعدت يمه .. احسن حل نطلع بيت وحدنا
نزلي تعشي
ماريد اله انت ويايه .. بقه ساكت ويهز برجله وشكله معصب واحاجي ميحجي عفته ونزلت جوه بس ماالي نفس اكل وشهد گبالي هم مطنكره عليه لاادري بسبب رزالة كرم الها لاادري بسبب كلامي
كملت شغل وكل شي ملك نامت يم خالتي رحتلها اريد اخذهه .. كالت بقيهه يمي بس حضري الها كوب الحليب يمي من تكعد بالليل اسوي الها
رحت جبت الحليب والمي وكوب وخليته ع الميز
صعدت غسلت وطبيت للغرفه اباوع الكرم متغطي بالبطانيه كله حتى راسه بس مبين بيده الفون
بدلت وعطرت وفليت شعري ...
سويت حركه عود وكعت وتعورت حتى اشوفه يجيلي لو لا .. كلت اخخ يمه شمر الغطا منه وكمز من الجربايه واجاني بسرعه واني واكعه ع الارض ولازمه بطني بايد ورجلي بيد الثانيه
شبيج صارلج شي خو ماتعورتي
باوعتله سويت نفسي متاثره كتله انت اصلا مخايف عليه خايف ع ابنك
شالني وخلاني ع الجربايه
وين تعورتي ؟!
ماتعورت بس زلكت رجلي وخفت ع البيبي (بدلع)
اسم الله ع البيبي وام البيبي
بعدك زعلان مني
احبج اني ومااريد مشاكل تعلمي تطنشين
يعني مترجع وئام
تصرفاتج هي تخليني اعيد كل حساباتي
يمه يعني ترجعها
صيري ادميه وماارجعها
لطمت ع وجهي .. يعني الك نيه
هالشي يعتمد عليج . لاعفيه كرم اخذ ابنك منها واني اربي بس لترجعها
ليش احسج ظالمه !!
لا مو ظالمه احبك واغار عليك موبيدي حبيبي
اشو تعالي انام يله تعالي ..
بعدها شهد ماكامت تاذيني ولاحتى تحاجيني وكانما متشوفني .. ومشه هيج الوقت الصبح دوام والظهر انام شويه .. والمغرب اسوي العشا وغيره من الشغل وبقت شهد على حالتها متهتم بملك وزيد ولايمه الموضوع مايوصيهه تدير بالهه عليها ..

علاقتي بكرم كلش حلوه ودوم يساعدني بملك وحتى بشغل مرات  يغسل عني المواعين ويرتب الغرفه ويعتني بملك .. صرت احس بي هو ابوهه مو زيد اما علاقته بشهد مو مثل اول جانت تحجي ويا كرم وتضحك لا هواي احسها تضوج منا وحتى ملك وخالتي ويا البيت كله موزينه
وبعد مرات كرم يجي عليه للكليه واذا ماعنده شغل جايب ملك ويا ونروح نتغده سوه واسأله منو مبدل الها يكولي اني اظل اضحك عليه حتى شعرها هو امشطه الها ..
فد يوم جان كرم نايم ساعه 1:00بالليل اباوع التليفونه اني ولامره ماخذته ومفتشه بي .. ابد دوم اثق بي لان اشوفه يحبني بكل تصرفاته ومينطي بيه صح يحجي عليه بس من ورايه ابد مينطي بيه وهذا حجي امه تكول يحبج هوايه ..

المهم اخذت التليفون وهو نومه ثگيل فتحته بصمة اصابعه ..
وظليت اقلب بي ماادري منين اجتني الفكره شفت رقم مسجل باسم ام علاوي عرفت هاي وئام ..
فتحت المسجات واشوف كومه متوسله بي يرجعها تكوله احبك ورجعني واني اخطات ومن هالحجي
هو اغلب رده عليها شونكم شونه علاوي وناطيهه موعد يجي يشوفه
اني كلش ضجت بوقتها ليش يراسلها ويحاجيهه المفروض ميحاجيههه هي طليقته ونوب كاتبتله رجعني قبل لتخلص العده واخواني اعتذرولك وعوضوك ورجعلك كل شي ليش مترجعني
كمت ادفر بي كوم كرم كوم كعد من النوم وعيونه منططه كمت كلبت كلاص ماي ع وجهه ظل ينكت وجهه شبيج ولج تخبلتي يحجي وهو نعسان
كتله شنو هي هاا شنو هي مسجاتك وي طليقتك
يعني متصبرين تنتظرين للصبح انت تبقين هيج شالعه گلبي
اي مااصبر مالصبر
كام كعد ومد رجله كال كليلي شكو شصاير
يعني ابقى اعيد الك الكلام ليش مراسل طليقتك نسيت شسوت بيك وبعدين هي مو مرتك هسه حتى تراسلها
يابت الحلال يابت عمتي اني نايم شنو اني نايم هسه هذا يمج التليفون تردين تحركي تكسرين شتسوين سوي اني راجع انام الصبح نحجي وخله المخده ع راسه ورجع نام
بقيت اللوب كل الليل .. نمت شويه والصبح حسيته يكعدني سويت نفسي مطنكره واخذتني نومه كعدت شفته رايح للشغل واني الدوام فايتني بقيت بالبيت ماداومت مفكرت حتى اتصل بي سويت كم شغله للظهر هو اجه ..
بقيت مطنكره عليه .. يحاجيني بالمطبخ  مغلسه تغدينه وخلصنا وصعدنا فوك .. اني بالغرفه اجه يمي اريد اعرف شبيج وع شنو مطنكره
ليش تحاجيهه
غرور كبري عقلج .. شفتيني متغزل بيها شفتي مكالمات مني الهه ماعندي شي وياهه بلا سوالف مزعطه وتعالي سويلي مساج ويغمزلي
رحت يمه هو مدد ع جربايه كتله المفروض تحاجي اخوتها مو تحاجيهه هي
تسدين الموضوع لو اطك روحي طلقه واموت لو اسافر وماارجع تره جايني شغل بغير محافظه اعوفج واروح .. مااعتقد مقصر وياج اني حتى هيج تسوين بيه كتلج مابيني وبينها شي وهاج اذا تردين الكود او الباسوورد بقي يمج شكد ميعجبج افتحي متصورتج هيج مالج ثقه بيه ولج حاربت الدنيا عمودج وانت تدورين من وراي
اني بلحظتها كلش انقهرت من كال اطك روحي طلقه كلت بكلبي يمه بيه ولابيك خله المخده ع راسه وسكت

رحت كعدت يمه ع جربايه وانقهرت كلش ظليت ابجي وكوه كتمت شهكاتي بس بقت مسموعه كعد ع صوتي اخذ الفون ولزم ايدي  وخلاه بايدي كال هاج اخذ ي احذفي رقمها وحضريها ..
رجعتله الفون وخليت راسي ع كتفه كتله خلص اني الي ثقه بيك خلي ننسى السالفه ونرجع حبايب
لزمته من وجهه كتله لتعيد سالفة الموت عفيه تره اني اموت بس تكول هيج فدوه الخاطر ابنك البطني
باسني ع شفتي كال والخاطرج انت هم .....

بفد يوم جنت كليه .. بالعاده كرم يخابرني اذا راد يجي نطلع سوه واذا عنده شغل اروح ويا الخط مال صديقاتي .. قربت نهاية الدوام دنمشي نريد نطلع اني وصديقتي من غير مرحله .. شفنا اياد صدفه وكفت صديقتي تحاجي وسلم عليه وويا زوجته لان هو تزوج هسه.. داباوع اشوف كرم واكف وصافن عليه متت خوف بلحظتها نظراته غريبه ومخنزر اعرفه من يعصب
ترخصت منهم ورحت اله اباوعله مستغربه من نضراته وهم ليش مااتصل مشى قبلي بدون ميحجي واني تبعته وصلنه للسياره .. حاولت اكسر الصمت واحجي
حبيبي اشو مااتصلت بيه
بدون ميباوعلي كال .. جيكي فونج
فتحت الجنطه طلعت التليفون شفته مطفي شحن يعني متصل بيه والفون مطفي
اكدر اعرف شموكفج وي هذا ؟!
مو اني صديقتي هو استاذهه وكفت يمه تساله
ع موضوع
اهااا ..
انت شبيك ضايج
مابيه شي بس جان احترمتيني ومبقيتي واكفه يمه وابتعدتي
حتى تحس بيه من اغار من وئام واحترك كلبي من شفت مسجاتها ..
باوعلي بخزر وساق السياره .. بدون ميحجي اني بداخلي فرحت اولا كدرت اغوره بدون مااخخط و2حلو شعور الي احبه يغار عليه شي كلش حلو
كوه فكاهه ورجع الطبيعته ويايه
صرت بشهر 5وكلش جنه متشوقين اني وكرم نعرف شنو بيه . رحت اخذت سونر مجنه نريد جنس محدد اي شي ميفرق ويانه طلع بيه بنيه فرحت جنت ناويه اسميهه ريم .. رحنه اني وكرم من دربنا البيت اهلي سلمنه عليهم .. رضا حالته زينه وصار يكدر يمشي ع عكاز .. بس مو هوايه بسرعه يتعب هي بعد عمليات سواهه خطيه وحتى عمامي انطوهم فلوس حصة ابويه بالورث طلع بيها للخارج وي ابن عمتي وسوا عمليه  ..
هالحجي رفل تطلكت وشكد حاولت ترجعله وتجي تشوف ابنها حمودي يم امي بس هو ميواطنها ولاحتى يطلع يسلم عليها
بس عمتي رقيه تريد تزوجه بنتها هي هم ارمله بس ماعدها جهال .. بس رضا متردد شويه بسبب وضعه وحالته النفسيه بعد ماعافته رفل عباله كل النسوان مثلها كعدنا نقنعه اني وكرم ونحاجي وامي هم تكوله اني تعبت ومادايمه الك وافق خلي نخطبها الك ..
هو كال عود افكر .. بس شون راح اعيشها واني مااكدر ع الشغل
امي ... هي خوش بنيه وشاغوله حتى تسوي انواع الاكلات بالبيت وتشتغل بيهم
غرور .. اي الشغل مو عيب وانت هم تكدر تفتح الك محل تسوق شغلها وتكدر هم تساعدهه ع كعدتك ماكو شي عيب بالموضوع
رضا .. لا مو عيب عادي اساعدهه مو دااساعد امي مرات بالطبخ بس خاف هي ماتتقبل هالشي وتبقى تتذمر
كرم .. انت لازم تتفق وياهه من البدايه ماكو شي اجباري اكعد وياهه هي بنت عمتك وحاجيهه واتفقوا ع كل شي ....
غرور ... تعشينه يم اهلي وطلعنا بعدها نتونس
واشتريت شغلات لملوكه وللبيبي ورجعنا دنيا ليل متاخرين محد كاعد نايمين طبيت الغرفة خالتي اشوف ملوكه شفتها نايمه وحتى وجها ممغسول قهرتني اعرف خالتي مابيهه وكلش عجوزيه بس شهد شبيها
ماردت اكسر نومتها بس حضرت الها شغلات الحليب تكعد تشرب بالليل ..
وطلعت يوم ثاني .. شفتهم كاعدين جان يوم جمعه
اول ماطبيت كتلهم صباح الخير
صباح النور
ام زيد هلا بشري شنو طلع بيج بالسونر
غرور .. خاله بيه بنوته ..
ام زيد .. صلوات الله يسهلج ويكومج سالمه
شهد .. هههه خلفتكم كلهه بنات ..
غرور .. درت عليهه من صدك غثتني .. اكول شهد انت مره لو رجال
شهد .. شنوووو
غرور .. شبيها خلفة البنات ماعجبتج انت موبنيه
شبيج غرور .. تره دااشاقه ليش تسوينها قصه إف
لا مو اسويهه قصه بس الفروض تكولين مبروك شي مو تغثين بالحجي
ام زيد .. صلوا على محمد بنات ليش دومكم هيج
غرور .. اللهم صل على محمد وال محمد
طلعت صدك مغثوثه منها
مر اليوم واني ابدي اخنكها .. كاعدين ع الغدا
كتلهم راح اسميها ريم زيد دنج وحتى مكدر يكمل اكل شحال قلبي ..
خلصنا اكل دااغسل مواعيين جتي شهد ..
اكولج غرور انت ليش تضوجين زيد
ماضوجته منيلج هالحجي
يعني متعمده تسمينها هيج بنتج
لااله الاالله .. شبيج انت تره بكيفي اريد اسميها ع اسم اختي شكو انت بالموضوع
غرور لتشوفيني ساكتتلج توزين بكرم عليه يجي يرزلني ع مودج .. وكرم طول عمره مثل اخويه ويحترمني واني هم احترمه
لابالله هو منو اليوزوز بي اني لو انت شهد وخري مالي خلكج تخلقين من الاشي مشكله
عفتها وطلعت
ع طول بقت تتحجج وتريد تسوي مشكله ورجعت تحاجي كرم وكل شويه تكوله ابو علي وابو علي قصدها ع ابن وئام ع غير عادتها جانت كله تكوله كرم سكتت الها وصعدت الكرم كتله مااكدر اتحمل شهد اني ..
شكوو غرور

اريد بيت وحدي مااتحمل الهي شهد
ردينه النفس السالفه زين اولدي وبعدهه عود افكر وهذا حقج ميخالف بس جيبي
هوووف .. كعدت ارتاحيت شويه .. ونزلت ..
اكمل شغل الميخلص لان كعدت متاخره واشوفها شون متحمله عليه ..
مخليه ابنها بالكرسي مالته بالحديقه وملك طلعت بره بالحديقه طلعت وراها .. وكفت اباب المطبخ احس شهد حتى كارهه ملك .. راحت تقربت لاخوها ووكعته من الكرسي مالته دفعته لان هي من النوع تغار وبعدهه زغيره جتي شهد وضربتها ع ايدها فرفرتها اني ابد مااتحملت الوضع وطول اليوم هي تريد بس تنهشني .. رحت الها هايجه واصيح ولج انت منو سمح الج تضربيها يتيمه هي يتيمه من انكسرت ايدج ان شاءالله مابرد گلبي هجمت ع ايدهه وعضيتها الكل فزع يمنه زيد وكرم وامهم ..شكو شصار صدك جذب غرور شنو هالصايح تعاي طبي جوه بلا صياح فضحتينه ..
طبينه جوه وشهد تغلط عليه
لج سكتي شهد لااليوم افنيج والله ليش تضربيها
واذا ضربتها قابل ماتت هي
ماتمدين ايدج عليها افتهمتي يتيمه هي ولج بنت الغاليه انت بره وهي جوه
شهد .. اسكتي انت اخر من يحجي نسيتي نفسج نسيتي شغلج السابق عود
كرم .. شهد اسكتي مااسمحلج لا والله الي تصرف ثاني وياج زيد تسكت مرتك لو اسكتها اني ..
غرور .. مو كتلك نطلع منا ونعزل وحدنا
زيد .. اي بس لتنسين عيني اذا طلعتوا منا مومعناهه تاخذون بنتي وياكم تبقى هنا ابيت ابوها
غرور .. ليش عيني هنا منو الها كلنه نعرف خالتي مابيهه
زيد .. شهد تدير بالها عليها ومتقصر وياهه واذا ضربتها اليوم عادي وهالشي ميتكرر
غرور .. لاا ههههه اني ماامن بنت اختي عدها هي اصلا السوته بيه موبعيده تسوي بيها
زيد /ام زيد .. ليش شسوت ؟!
غرور .. والله صورتني عاريه ويا كرم واني مخدره وشوفوا الصور الخطيبي السابق وخلوا يتركني وصار الي صار .. _____يتبع
اذا مليتوا عادي لتقرون 😘