تحميل رواية «ليالي رمضانية» PDF

ارتفع صوت ضجيج لعب الأطفال بخارج المسجد بعد أداء صلاة القيام عقب صلاة العشاء مباشرة. رحل جميع المصلين لكن بقى شاب واحد في مكانه ويظهر على وجهه علامات الشرود والحزن في آن واحد.

اقترب الشيخ من هذا الشاب وجلس أمامه مباشرة قبل أن يقول بتساؤل:

- مالك يا آدم؟ سرحان كدا ليه؟ هل فيه حاجة مزعلاك؟

نظر «آدم» إلى الشيخ «محمود» وقال بنبرة تعبر عن مدى حزنه:

- هو أنا ممكن اسألك سؤال يا شيخنا؟

ابتسم الشيخ وأومأ برأسه قائلا:

- أكيد

نظر له باهتمام قبل أن يقول متسائلا:

- هو حرام لو تابعت مسلسلات في رمضان؟ بص أنا عارف إجابتك هتكون ايه بس أنا مش قادر أمنع نفسي، على فكرة أنا بقرأ قرآن وليا ورد وبصلي التراويح وبذكر ربنا بس بعد الفطار والتراويح بلاقي وقت كدا وفيه مسلسلات كتير إعلاناتها شاداني وفيه اللي مستني الجزء الجديد بتاعه.

ربت الشيخ على فخذه وهتف بنبرة هادئة:

- طالما عارف إجابتي يبقى أنت عارف ومتأكد إن الحوار كله على بعضه غريب وفيه شك، هسألك أنت سؤال وجاوبني ... هي السنة فيها كام شهر؟

أسرع «آدم» وأجاب على سؤاله:

- 12 شهر طبعًا.

ابتسم الشيخ واستطرد:

- حلو والشياطين بتُصفد امتى؟

فكر لبعض الوقت ليس لأنه لا يعرف الإجابة لكنه بدأ في ربط الأحداث وأجاب أخيرا:

- في رمضان.

التقط الشيخ أنفاسه وقال بهدوء:

- حلو أوي، دلوقتي أنت عندك 11 شهر تانيين غير رمضان ليه المسلسلات دي كلها متتعملش في الشهور دي؟ اشمعنا كلهم اتفقوا إنهم يعملوا كمية المسلسلات دي في شهر رمضان اللي هو أصلا شهر عبادة وطاعة؟ جرب فكر كدا... الموضوع غريب صح؟ اسأل أي حد السؤال ده يا إما مش هيعرف يرد ولا يجاوب يا إما هيرد ويقولك علشان يتم إلهاء الناس عن عبادتهم، الشيطان أيوة بيُصَفد في رمضان وبيتحبس لكن هو سايب رجالته وراه، هو أجازة لكن المسلسلات قايمة بالواجب في غيابه، المسلسلات اللي ملهاش مكان في 11 شهر وليها مكان بس في شهر العبادة والطاعة.

صمت للحظات قبل أن يتابع:

- دلوقتي أنت في ايدك الإختيار، متباقش زيهم، معاك 11 شهر وشهر واحد للطاعة والرجوع لربنا، ها هتختار تضيع وقتك في 11 شهر ولا شهر واحد بيجي كل سنة ومش ضامن هتعيش له السنة الجاية ولا لا؟

ارتفع صوت الضحكات الدافئة، تملأ الأجواء بفرح نابع من القلوب، فلا شيء يجمعهم بهذه الحميمية سوى شهر رمضان. كانوا قد فرغوا للتو من صلاة التراويح، والآن يجلسون يتسامرون، تستعيد أرواحهم ذكريات جميلة.

بعد موجة الضحك التي عمّت المجلس خيّم صمت قصير وكأن الجميع يستمتع بلحظة سكون نادرة قبل أن يقطع الجد هذا الهدوء بابتسامة مشرقة قائلاً بصوته المليء بالحكمة والمودة:

- بما إننا في رمضان يلا بينا نبدأ الفقرة الدينية والمرة دي هتكون عبارة عن تحقيق أحلام في الآخرة، عايز كل واحد يقول عايز ايه يحصله دلوقتي في الآخرة وأنا هساعده يحققه مستعدين؟

تلقى الإجابة منهم جميعًا في صوت واحد:

- مستعدين.

اعتدل الجد في جلسته وهتف بابتسامة:

- طيب يلا مين هيبدأ؟

هنا رفع «محمد» يده وقال على الفور:

- أنا عايز بيت يتبني ليا دلوقتي في الآخرة.

ابتسم الجد وقال بهدوء:

- وأنا هساعدك تبني بيت في الجنة دلوقتي، أول طريقة تبني بيها بيت في الجنة هي إنك تصلي السنن وهم 12 ركعة.

قال رسول الله صلى الله عليه وسلم: مَنْ صَلَّى اثْنَتَيْ عَشْرَةَ رَكْعَةً فِي يَوْمٍ بَنَى اللَّهُ لَهُ بَيْتًا فِي الْجَنَّةِ، أَرْبَعًا قَبْلَ الظُّهْرِ، وَاثْنَتَيْنِ بَعْدَهَا، وَرَكْعَتَيْنِ قَبْلَ الْعَصْرِ، وَرَكْعَتَيْنِ بَعْدَ الْمَغْرِبِ، وَرَكْعَتَيْنِ قَبْلَ الصُّبْحِ.

اتسعت ابتسامته وتابع:

- تاني طريقة وهي إنك تقرأ قل هو الله أحد 10 مرات.

قال رسول الله صلى الله عليه وسلم: مَنْ قَرَأَ: قُلْ هُوَ اللهُ أَحَدٌ حَتَّى يَخْتِمَهَا عَشْرَ مَرَّاتٍ، بَنَى اللهُ لَهُ قَصْرًا فِي الْجَنَّةِ. فَقَالَ عُمَرُ بْنُ الْخَطَّابِ: إِذًا نَسْتَكْثِرَ يَا رَسُولَ اللهِ؟ فَقَالَ رَسُولُ اللهِ صَلَّى اللهُ عَلَيْهِ وَسَلَّمَ: اللهُ أَكْثَرُ وَأَطْيَبُ.

- مفيش أسهل من كدا، تقدر تبني بيوت في الجنة مش بيت واحد.

في تلك اللحظة رفع «خالد» يده وقال:

- وأنا عايز يبقى ليا حدائق في الجنة يا جدي.

ربت الجد على كتفه وقال بحب:

- قول سبحان الله كدا.

أسرع «خالد» وقال على الفور:

- سبحان الله.

ابتسم الجد وقال:

- بس كدا مبروك عليك نخلة اتزرعت في الجنة.

قال رسول الله صلى الله عليه وسلم: لقيتُ إبراهيم ليلة أسري بي فقال: يا محمد، أقرئ أمتك مني السلام، وأخبرهم أن الجنة طيبة التربة عذبة الماء، وأنها قيعان، وأن غراسها سبحان الله، والحمد لله، ولا إله إلا الله، والله أكبر.

وقال صلى الله عليه وسلم لأبي هريرة لما وجده يغرس غرسا: ألا أدلك على غراس هو خير من هذا؟ تقول: سبحان الله، والحمد لله، ولا إله إلا الله، والله أكبر. يغرس لك بكل كلمة منها شجرة في الجنة.

وقال رسول الله صلى الله عليه وسلم: من قال: سبحان الله وبحمده، غرست له نخلة في الجنة.

- شوف بقى أنت هتقول كدا كام مرة وهتغرس كام نخلة وكام شجرة وهتعمل كام حديقة في الجنة...

انتهت صلاة التراويح وخرج المصلون.

تبعهم في النهاية الإمام الذي أغلق باب المسجد والتفت للرحيل، لكنه تفاجأ بشاب يجلس على حجر مقابل للمسجد ويوجه بصره صوب الباب ويبكي بصوت مرتفع.

وضع الإمام المفاتيح في جيب بنطاله، ثم توجه إليه.

وما إن وصل حتى قال بهدوء:

- إيه اللي مخليك بتعيط كدا يا ابني؟ استهدى بالله بس واتكلم معايا يمكن أساعدك.

حرك الشاب رأسه بيأس وهتف بصوت باكي:

- أنا تايه يا شيخ، تايه أوي.

انخفض وربت على كتفه وأردف بصدق:

- مش عيب الواحد يتوه يا ابني، العيب هو إن الواحد يكون تايه ويشوف الطريق بعنيه لكنه يفضل تايه.

شعر وكأن الشيخ قد لمس ما في قلبه، لذلك ردد بعينين مبتلتين:

- أنا عملت ذنوب كتير أوي، مسبتش حاجة حرام إلا لما عملتها. مصلتش ولا دخلت مسجد بقالي أكتر من 20 سنة، حياتي بقت ضنك. ماشي بالصدفة سمعت صوت الإمام... كان بيقرأ آيات بتتكلم عن مغفرة ربنا وصوته كان حلو أوي، محستش بنفسي غير وأنا قصاد المسجد. لكني مش قادر أخش، واقف بسمع وبعيط بس لكن قلبي مش جايبني أخش خالص. معقولة بعد كم الذنوب دي أخش المسجد؟ معتقدش ربنا هيقبل واحد زيي بعد كل المعصية دي. هيقبلني بعد 20 سنة مذكرتوش فيها؟ استحالة يا شيخ يقبلني. علشان كدا فضلت مكاني عمال أعيط وأنا سامع صوت الإمام وشايف كم الناس اللي بتصلي وراه. اتمنيت أكون منهم وأعيش اللحظات دي لكن...

أخرج الإمام منديل ورقي من جيب جلبابه وأعطاه إياه وهو يقول بابتسامة:

- امسح دموعك يا حبيبي. أنت ربنا بيحبك ومتستغربش، بتقول إن حياتك كانت ضنك وده منطقي جدا بعد كم الذنوب دي. ربنا سبحانه وتعالى قال: {وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ}.

أما موضوع إن ربنا ميتقبلكش أو ميغفرلكش فده مستحيل، ربنا غفور رحيم ومهما كان العبد عاصي وبعيد بمجرد بس ما يتوب ربنا بيفرح وبيغفر له. وده مش كلامي ده كلام حبيبي وحبيبك رسول الله صلى الله عليه وسلم:

«لله أشد فرحًا بتوبة عبده من أحدكم براحلته التي عليها طعامه وشرابه فأضلها في أرض فلاة، فاضطجع قد أيس منها، فبينما هو كذلك إذا هو بها قائمة على رأسه فلما رآها أخذ بخطامها وقال من شدة الفرح: اللهم أنت عبدي وأنا ربك، أخطأ من شدة الفرح».

وربنا سبحانه وتعالى قال: {قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ}.

شوف جمال الآية... ربنا بيقول يا عبادي ياللي أسرفتم في الذنوب وعملتوا كل الذنوب لدرجة الإسراف شوف بيطمنهم إزاي وبيقول متقنطوش من رحمة الله إن الله يغفر الذنوب جميعا. وأنت بتقول ربنا مش هيغفرلك؟ ده غير كم الآيات اللي بتتكلم عن رحمة ومغفرة ربنا.

ابتسم وتابع:

- على فكرة أنا ممكن أفتحلك المسجد وأصلي معاك جماعة كمان وأسمعك صوتي اللي عجبك، ها جاي معايا؟

نهض الشاب على الفور وقال بابتسامة تحمل الأمل:

- جاي.

كان يستقل سيارة "ميكروباص" بعد عودته من العمل في اليوم الرابع من شهر رمضان. وأثناء شروده، انتبه لصوت السائق الذي ردد بصوت مرتفع لصديقه المجاور له:

- بقولك ايه يا صاحبي، هات السيجارة متوجعش دماغي.

رد عليه صديقه قائلاً بابتسامة:

- خد يا زميلي أحلى مسا عليك ولع وعيش.

بالفعل أخذ منه السيجارة وأشعلها في الحال، ومن ثم ضغط على المشغل الخاص بالسيارة لترتفع أصوات الأغاني. شعر الركاب بالسوء مما حدث، لكنهم لم يتحدثوا عن الأمر. لكن «مراد» لم يكن مثلهم، بل نهض وتقدم لمقدمة السيارة قبل أن يرفع صوته وهو يقول:

- اطفي البتاع ده يسطا واسمعني بعد اذنك.

بالفعل أطفأ الأغاني ونظر له بانتباه هو وصديقه قبل أن يقول:

- عايز ايه يا صاحبي؟

شعر «مراد» بالسوء والحزن في آن واحد وقال:

- صاحبي؟! أنت اسمك ايه يسطا؟

أسرع السائق وأجاب عليه:

- محمد.

ابتسم «مراد» بسخرية وردد:

- ياااه اسمك على اسم أشرف الخلق ودي أخلاقك؟! بتشرب سجاير في نهار رمضان؟ يعني فاطر وبتجهر بالمعصية ومشغل أغاني كمان؟ يا أخي اعمل حساب للشهر الفضيل اللي إحنا فيه، هيجي يوم وتقف فيه قدام ربنا هتقوله ايه؟

بدل نظراته بينهما وتابع بقول الله:

«الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ».

أنت وهو فاكرين إنكم كدا صحاب، لكن يوم القيامة هتبقوا أعداء. ده هيقول يارب ده هو اللي أضلني وجرني معاه، والتاني هيقول لا يارب ده هو اللي جرني معاه. وبدل ما أنت بتقوله يا صاحبي وهو يقولك يا زميلي، هتقوله يا عدوي وهو يقولك يا عدوي. اتقي الله أنت وهو.

الصيام فرض على كل مسلم، يعني فرض تصوم أنت وهو وملكمش عذر. ده فيه ناس مرضى وبيصوموا وأنتم أصحاء وفاطرين؟

صمت للحظات وتابع:

- شهر رمضان ده كنز وأنتم بتضيعوه بالسهولة دي؟

الرسول صلى الله عليه وسلم قال: "خاب وخسر من أدرك رمضان ولم يُغفر له".

وقال بردو: "أتاكم شهرُ رمضان، شهرٌ مبارَكٌ، فرض اللهُ عليكم صيامَه، تفتحُ فيه أبوابُ الجنَّة، وتُغلَق فيه أبوابُ الجحيم، وتُغَلُّ فيه مَرَدَةُ الشياطين، وفيه ليلةٌ هي خيرٌ من ألف شهرٍ، من حُرِمَ خيرَها فقد حُرِم".

وربنا سبحانه وتعالى قال: «شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ ۖ وَمَن كَانَ مَرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۗ يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ».

ده بالنسبة للفطار في نهار رمضان. أما الجهر بالمعصية فقال عنه رسول الله: "كل أمتي معافى إلا المجاهرين".

وما إن أنهى حديثه حتى ردد السائق بصوت مسموع:

- عملت فيها شيخ خلاص، حل عن دماغي بقى يا صاحبي علشان مش فايقلك.

ابتسم «مراد» بسخرية وردد وهو يشير إلى قلبه:

- هنا بقى أسود خلاص للأسف. أنا نصحتك لله علشان يوم القيامة لما نقف بين ايدين الرحمن ميكونش ليك حجة وتقول محدش قالي، ساعتها هقول يارب أنا بلغت ....

رفع يده إلى السماء وقال بنبرة ممتزجة بالبكاء:

- يارب أنا عارف إني قصرت خلال الأيام اللي فاتت كلها لكن دلوقتي في رمضان أبواب الجنة مفتوحة وأبواب النار مقفولة، يارب اقبلني وسامحني واغفرلي على كل اللي فات، اللهم ردني إلى دينك مردًا جميلا.

ارتفع صوت الطرقات على باب الغرفة قبل أن يفتح الأب الغرفة ويدخل عليه. اقترب منه وقال بابتسامة:

- خرجت البلكونة اللي جنبك وسمعتك بتدعي، عايز أقولك إن ربنا بيسمع دعائنا وبيتقبله... ادعي بيقين وهتشوف العجب يا عمر.

ربنا بعزته وجلاله قال: "وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ".

استمر في الدعاء يا عمر وادعي ربنا بيقين حتى لو أسباب حدوث اللي عايزه ده ضعيفة... كل ما كانت الأسباب ضعيفة ويقينك في إن ربنا هيستجيب كبير هتلاقي دعائك اللي كان مستحيل ربنا هيستجيبه وهتشوف العجب... إحنا في شهر رمضان وكل ليلة فيها عتقاء من النار... ادعي ربنا تكون منهم ومتنسانيش في الدعاء وخليك فاكر إن الدعاء عبادة ومعنى إن ربنا يوفقك للدعاء يبقى هيستجيب بإذن الله.

كانت تجلس مع صديقتها التي عزمتها على الإفطار في اليوم السادس من شهر رمضان.

بدأت في احتساء كوب الشاي قبل أن تنظر إلى صديقتها وهي تقول بابتسامة:

- صحيح وصلتي للجزء الكام في القرآن؟

ابتسمت صديقتها وأجابتها على الفور:

- الجزء السادس.

عقدت الأولى ما بين حاجبيها وقال بنبرة تحمل التعجب:

- معقولة؟ متأخرة كدا ليه يا سلمى؟

أجابتها سلمى بهدوء:

- ما أنا بقرأ كل يوم جزء علشان أختم في آخر رمضان.

هنا جاء دور «آلاء» في الحديث:

- بس أنتي أكيد عندك وقت فاضي كتير، الجزء ممكن مياخدش نص ساعة.

حاولت «سلمى» التبرير:

- أنتِ عارفة شغل البيت وكدا والوقت اللي بيتبقى بقسمه على ورد القرآن اللي هو جزء وكام مسلسل كدا متابعاهم.

وضعت «آلاء» يدها على كتفها وقالت بابتسامة:

- سلمى حبيبتي شهر رمضان بيجي مرة واحدة في السنة، يا عالم هل هنعيش لرمضان اللي جاي ولا لا، شهر كله خير ورحمة... تخيلي كدا حد قالك الشقة دي مليانة كنز دهب وألماس وفلوس كتير أوي، حرفيا شقة مليانة كنز وقالك هسيبك تاخدي من الكنز ده لمدة ٣٠ يوم وبعدين هقفل الشقة دي ومش هتقدري تاخدي منها حاجة تانية، تفتكري هتعملي ايه؟ أي حد هيستغل كل دقيقة وكل ثانية من ال ٣٠ يوم دول علشان يقدر ياخد أكبر قدر من الكنز اللي موجود في الشقة ده ولو عمل غير كدا يبقى مجنون معقولة يضيع فرصة زي دي؟

صمتت للحظات واستطردت:

- كذلك شهر رمضان... عبارة عن كنز كبير جدا وأنتِ المفروض تاخدي من الكنز ده على قد ما تقدري أكبر قدر لأن هم ٣٠ يوم بس وبعدين الكنز مش هيبقى متاح تاني، أيام معدودات يا سلمى، استغلي كل ثانية فيها ومتضيعيش وقتك في حاجات تانية ممكن تتعمل عادي بعد رمضان، وأنتي بتعملي شغل البيت أذكري ربنا ولما تفضي بدل الجزء اللي متعودة عليه خليهم جزئين أو تلاتة ... بقولك كنز يعني فرصة ممكن متتعوضش تاني، خدي من الكنز على قد ما تقدري يا سلمي.

ليالي رمضانية الفصل السابع 7 - بقلم عبد الرحمن الرداد اليوم السابعاقتربت من والدها الذي كان يقرأ القرآن وجلست مقابلة له وعلى وجهها ابتسامة هادئة تستمع لصوته الجميل ولا تُريد أن تُقاطعه حتى ينتهي هو. انتهى والدها من القراءة، ثم رفع رأسه ليرمقها بوجه مبتسم قبل أن يقول بتساؤل:- قاعدة مبتسمة كدا يبقى عايزة حاجة، اؤمري يا حبيبة قلب أبوكياتسعت ابتسامتها واقتربت أكثر وهي تقول:- كل يوم بتديني معلومة دينية في رمضان والنهاردة عايزة أعرف فضل قراءة القرآنمسح على رأسها بوجه مُزين بالابتسامة وهتف:- بس كدا عنيا... الرسول صلى الله عليه وسلم قال: «اقرؤوا القرآن؛ فإنه يأتي يوم القيامة شفيعا لأصحابه»القرآن هيجي يشفع لصحابه اللي كان مهتم به في الدنيا وكمان صلى الله عليه وسلم قال: «الذي يقرأ القرآن وهو ماهر به مع السفرة الكرام البررة، والذي يقرأ القرآن ويتتعتع فيه وهو عليه شاق له أجران»يعني اللي بيقرأ القرآن وهو حافظه أو بيقرأه بسهولة ده مع السفرة الكرام البررة أما اللي القراءة صعبة عليه وبيقعد يحاول يقرأ فيه كذا مرة فده له أجرين مش أجر واحد...شوفتي رحمة ربنا، وكمان الرسول صلى الله عليه وسلم قال: «إن الله يرفع بهذا الكتاب أقواما ويضع به آخرين»وقال بردو: «مثل المؤمن الذي يقرأ القرآن مثل الأترجة: ريحها طيب وطعمها طيب، ومثل المؤمن الذي لا يقرأ القرآن كمثل التمرة: لا ريح لها وطعمها حلو، ومثل المنافق الذي يقرأ القرآن كمثل الريحانة: ريحها طيب وطعمها مر، ومثل المنافق الذي لا يقرأ القرآن كمثل الحنظلة: ليس لها ريح وطعمها مر»المؤمن اللي بيقرأ القرآن عامل زي الثمرة الطيبة اللي طعمها حلو وكمان ريحتها حلوة أما المؤمن اللي مش بيقرأ قرآن زي التمرة طعمها حلو لكن ملهاش ريحة، إحنا بقى عايزين نكون زي الأترجة ريحها طيب وطعمها طيب ...إلى اللقاء في اليوم الثامنعبد الرحمن الرداد

قال طارق للشيخ بوجه يعتليه الصدمة والقلق في آن واحد:

"هل فعلا يوم القيامة مقداره 50 ألف سنة؟ أنا كل ما بفكر في الموضوع بخاف أوي، حياتنا دي كلها اللي هي عبارة عن 60 أو 70 سنة طويلة أوي... إزاي هنقدر نقف 50 ألف سنة يا شيخنا."

رد عليه الشيخ بجدية:

"أيوة فعلا مقداره 50 ألف سنة، وقت طويل جدا لكن على الظالمين العصاه اللي ضيعوا الدين في الدنيا واشتروا الدنيا وباعوا الآخرة بثمن بخس، اللي ظنوا إنهم مخلدين في الدنيا واختاروا 60 أو 70 سنة وفرطوا في عدد سنين ملهوش نهاية في الجنة."

"أما المؤمن فهتعدي عليه السنين دي كلها كأنها صلاة مفروضة مش هيحس بيهم، عشان كدا لازم نعمل لليوم ده من دلوقتي. تخيل تقف 50 ألف سنة والشمس فوق الرأس مباشرةً وشايف كل أهوال يوم القيامة، يوم صعب جدا."

قال الرسول صلى الله عليه وسلم: {يوم كان مقداره خمسين ألف سنة} فقيل: ما أطول هذا اليوم؟ فقال النبي صلى الله عليه وسلم: «والذي نفسي بيده إنه ليخفف على المؤمن حتى يكون عليه أخف من صلاة مكتوبة».

انتهت الأربع ركعات الأولى من صلاة التراويح وجلس المصلون للإستراحة.

بينما نهض الشيخ وتحدث بصوت مسموع قائلًا:

- من الحاجات اللي عايزين نهتم بيها في رمضان وفي كل وقت هي ذكر الله.

- الذكر من أهم الأشياء في الحياة.

- ممكن نجعل العادات عبادات بالذكر.

- أنا كدا كدا بشتغل ليه مذكرش الله أثناء الشغل واخد الوقت ده عبادة.

- لازم نتعلم كل الأذكار.

- فيه أذكار النوم وأذكار الصباح وأذكار المساء وذكر لدخول المنزل وذكر للخروج وهكذا.

- أنا كدا كدا هعمل الحاجات دي لكن لو عملتها بالأذكار دي هاخد عليها أجر من الله.

ربنا سبحانه وتعالى قال: {يا أيها الذين آمنوا اذكروا الله ذكرا كثيرا * وسبحوه بكرة وأصيلا}.

وقال أيضا: {الذين آمنوا وتطمئن قلوبهم بذكر الله ألا بذكر الله تطمئن القلوب}.

وأيضا جاء رجل إلى رسول الله صلى الله عليه وسلم يشكوه حاله وقال: يا رسول الله إن شعائر الإسلام قد كثرت عليَّ فأخبرني بأمر أتشبَّثُ (أتمسك) به، قال: لا يزال لسانك رطبًا من ذكر الله.

كلمنا عن الجنة يا شيخنا.

قالها "طارق" للشيخ بعد انتهاء الصلاة.

فابتسم الشيخ وصمت للحظات ليقول بعدها:

يااااه الجنة... الجنة أعدها الله لعباده الصالحين، مكافأة رب العالمين بعد سنين من الإختبار، فيها ما لا عين رأت ولا أذن سمعت ولا خطر على قلب بشر.

وقال صلى الله عليه وسلم: "إنَّ في الجنَّةِ لشجرةً، يسيرُ الرَّاكبُ في ظلِّها مائةَ عامٍ لا يقطعُها".

وقال الرسول صلى الله عليه وسلم عن بناء الجنة: "لبِنةٌ من فضَّةٍ ولبنةٌ من ذَهَبٍ، وملاطُها المسكُ الأذفرُ، وحصباؤُها اللُّؤلؤُ والياقوتُ، وتُربتُها الزَّعفرانُ مَن دخلَها ينعَمُ ولا يبأسُ، ويخلدُ ولا يموتُ، لا تبلَى ثيابُهُم، ولا يفنى شَبابُهُم."

وروى مسلم أن النبي صلى الله عليه وسلم قال: ينادي مناد: إن لكم أن تصحوا فلا تسقموا أبدًا، وإن لكم أن تحيوا فلا تموتوا أبدًا، وإن لكم أن تشبوا فلا تهرموا أبدًا، وإن لكم أن تنعموا فلا تبأسوا أبدًا، فذلك قوله عز وجل: وَنُودُوا أَنْ تِلْكُمُ الجَنَّةُ أُورِثْتُمُوهَا بِمَا كُنْتُمْ تَعْمَلُونَ.

وقال رسول الله صلى الله عليه وسلم: إن في الجنة لسوقًا، يأتونها كل جمعة، فتهب ريح الشمال، فتحثو في وجوههم وثيابهم فيزدادون حسنًا وجمالًا، فيرجعون إلى أهليهم، وقد ازدادوا حسنًا وجمالًا، فيقول لهم أهلوهم: والله لقد ازددتم بعدنا حسنًا وجمالًا، فيقولون: وأنتم والله لقد ازددتم بعدنا حسنًا وجمالًا.

وقال أيضا: إن في الجنة غرفًا يُرى ظاهرها من باطنها، وباطنها من ظاهرها، أعدها الله تعالى لمن أطعم الطعام، وألان الكلام، وتابع الصيام، وصلى بالليل والناس نيام.

وقال تعالى: مَثَلُ الْجَنَّةِ الَّتِي وُعِدَ الْمُتَّقُونَ تَجْرِي مِنْ تَحْتِهَا الْأَنْهَارُ أُكُلُهَا دَائِمٌ وَظِلُّهَا تِلْكَ عُقْبَى الَّذِينَ اتَّقَوْا وَعُقْبَى الْكَافِرِينَ النَّارُ.

يؤتَى يومَ القيامةِ بأنعَمِ أَهْلِ الدُّنيا منَ الكفَّارِ، فيُقالُ: اغمِسوهُ في النَّارِ غَمسةً، فيُغمَسُ فيها، ثمَّ يقالُ لَهُ: أي فلانُ هل أصابَكَ نعيمٌ قطُّ؟ فيقولُ: لا، ما أصابَني نعيمٌ قطُّ.

ويؤتَى بأشدِّ المؤمنينَ ضرًّا، وبلاءً، فيقالُ: اغمِسوهُ غمسةً في الجنَّةِ، فيُغمَسُ فيها غمسةً، فيقالُ لَهُ: أي فلانُ هل أصابَكَ ضرٌّ قطُّ، أو بلاءٌ؟ فيقولُ: ما أصابَني قطُّ ضرٌّ، ولا بلاءٌ.