رواية ما بين الحب وعذابه الفصل العاشر 10 - بقلم حبيبة الديب

_الو؟
_ع ..عمر ممكن نتكلم ؟
عايزه اقابلك..!
_ريتاچ؟!
_اه و عايزه اكلمك بخصوص ريتال ..!
_تمام
هبعت لك لوكيشن نتقابل دلوقتي ..!
و بعد شويا وصلت على اللوكيشن اللى بعته
و اللى كان في كافيه
_عمر ..!
قام وقف و بصلي نظرة حنين و شوق و زعل في نفس الوقت
ماتغيرش لسه زي ماهو
نفس الشكل
و ممكن كمان بقى احلى ..!
شاور لي اقعدت :
_احم ..اتفضلي .!
_انا جايه اكلمك بخصوص ريتال
_ هتتكلمي عن اي؟
انك حرمتيني منها طول السنين دي؟!
اتهربت منه بعيوني:
_احنا مش هنفتح في اللى فات يا عمر ..!
_لأ هنفتح في اللى فات
مش هعديه بالساهل على فكره
انتى حرمتي بنتي مني .!
بصيت له :
_طب مانا اتحرمت من تالين برضوا ..!
_بمزاجك
اتحرمتي منها بمزاجك
انتى اللى مشيتي يا ريتاچ .!
_امك السبب
خدتها مني عافيه و لو كنتو عرفتو كانت هتاخد ريتال و تالين كمان مش تالين بس
هى عرفتني أنها هترفع قضيه حضانه و هتاخدهم ..!
بص لي لحظه و اتكلم :
_ انا لما امي وافقت على جوازي منك مقابل جوازي من ساره وافقت عشان بحبك
و عشان ابقى معاكي
و اهو انتي اتحطيتي في نفس الوضع
عشان تبقي مع بنتك اللى بتحبيها وافقتي انك تستغنى عن التانيه
ف ياريت متعشيش دور الضحيه يا ريتاچ
انا غلطت و انتى كمان غلطتي ..!
_عمر لو سمحت متفتحش في اللى فات
انا دلوقتي عايزه اطمن على بنتي
و ارجعها
_ طب ما انتى سيبتيها
و اتخليتي عنها..!
_انا ما اتخلتش عنها
انا بس مصدومه
و متخيلتش انها تتجوز ب الطريقه دي.!
صوته علي شويه:
_حتى لو هربت معاه و اتجوزت برضاها
كانت واقفه قدامك و بتطلب منك تخديها معاكي
اشتكت لك عشان تحميها بس انتى ضربتيها و سبتيها .
_انت عرفت منين؟
قابلتها ؟
_ايوه روحتلها و كانت منهاره و حاسه انها بقت لوحدها
و ان كلكوا اتخليتوا عنها .!
_عايزه أشوفها دلوقتي
هاخدها معايا
و مش هسيبها تاني .!
_ريتال سافرت .
بصيت له بصدمه :
_سافرت فين؟
انت هتاخدها مني ؟
_بطلي خوف بقا هاخدها منك ازاي؟
هى صغيره عشان أخدها منك؟
ريتال كبيره و واعيه و سافرت برا مصر تريح أعصابها
مكانتش عايزه تشوف حد فيكوا .!
_طب هترجع امتى؟
و اكلمها ازاي اطمن عليها ازاي؟
_لما تهدى هخليها تكلمك ..!
_________________
الحمد لله يارب كما ينبغي لجلال وجهك ولعظيم سلطانك.
________________
في أوضة تالين ..!
كنت قاعده في الاوضه مانمتش من امبارح كنت بفكر و بس
في رحيم
و ريتال
و ماما
و فيا انا شخصياً ..!
في يوم و ليله حاجات كتير اتغيرت
حبيبي طلع خاين و بيضحك عليا .
طلع ليا أخت من العدم.
امي طلعت عايشه مش ميته
و المفروض دلوقتي اني اتقبل كل ده عادي كده ..!
مش هنكر اني انبسط شويا أنها عايشه
و بفكر ب الموضوع بشكل جدي أنها فعلاً اضطرت تسيبني
بس اللى مكانش
مضطر فعلاً هى جدتي
هى سبب كل اللى حصل
انا متخيلتش انها تعمل كده
ليه تكره امي بالشكل ده
و تبعدني عنها و عن اختي
اللى اكيد اتظلمت هى كمان ..!
طلعت من الاوضه و روحت لها أوضتها
في الوقت ده بتكون قاعده في البلكونه بتشرب فنجان قهوه
و تقراء جرنال ..!
_ممكن ادخل ؟
_تعالى يا روحى ادخلي ..!
دخلت و فضلت ابص لها
حاسه اني شايفها على حقيقتها بجد :
_مالك يا حبيبتي واقفه ليه ؟
تعالى اقعدي !
_هو انتى ليه كده ؟
_كده اي مش فاهمه؟!
_انا روحت قابلت ماما امبارح و عرفت منها الحقيقه ..!
سابت اللى في أيدها و بصت لي باهتمام و ملامحها اتغيرت للقلق و التوتر البسيط :
_ و انتى تروحي لها ليه؟
ماهى سابتك قبل كده و اتخلت عنك !
_بقولك عرفت الحقيقة كامله و مصدقاها ..!
قامت وقفت قصادي و ربعت أيدها :
_ماتعرفي اللى تعرفيه
اعمل اي يعني؟
_انتى السبب صح؟
انتى اللى عملتي كده
جوزتي بابا ل ساره مامت رحيم عشان يطلق ماما
و ماما تبعد و تاخدي فلوس ساره و تبعديها عن بابا صح؟
_ انا عملت كده عشان اسم العيله يفضل و يكبر
الشركه كانت هتأفلس و هنبقى على الحديده
و لولا جوازة ابوكي من ساره كنا زمانا بنشحت ..!
بصيت له بصدمه :
_انتى واعيه ل نفسك؟
على فكره انا حياتي ادمرت
انا و اختي و امي و حتى بابا اللى دايما مش مبسوط
حياتنا ادمرت بسببك و بسبب أنانيتك ..!
انتى واحده انانيه .
خلصت كلامي و كانت هى ضربتني ب القلم و قالت بعصبية :
_انتى واحده مش محترمه و ناقصه ربايه ..!
بصيت لها بكره لأول مرة و مشيت و سيبتها
وهى اتوترت اكتر و قفلت الباب بعد ما مشيت رزعته جامد
و شويا و كنت سامعاها بتكسر في الاوضه ..!
ما هتمتش بيها و غيرت هدومي و لميت حاجتي كلها و سيبت البيت و مشيت .
_الو؟
اياد معايا؟
اتكلم بصوت نايم :
_على حسب انتى مين؟
_ انا تالين يا بنى ..!
اتاوب و اتكلم تاني و باين عليه نايم على نفسه :
_تالين مين ؟
الرقم غلط .
قفل في وشي و مفيش دقيقه كان بيرن عليا
فتحت و هو اتكلم بسرعه :
_ تالين ازيك معلش كنت نايم .!
_صحيت يعني دلوقتي؟
_اه خدت بالي اول ماقفلت معاكي انك انتي يعني .
_انت بتقول اي؟
_انتي عايزه اي؟
_انا سيبت البيت و ناويه افضل مع ماما
ممكن تبعتلي اللوكيشن .!
_ايوه طبعاً
ثواني هبعته ..!
_________________
اللهُمَّ إنّا نعوذ بك من جهد البلاء ودرك الشّقاء وسوء القضاء وشماتة الأعداء.
_________________
في فيلة رحيم..!
كان قاعد في أوضته و ماسك الفون و بيشوف صورته مع ريتال
الصوره الاصليه
اللى كانت بعيده عنه و مكشره ملامحها و مش طايقاه .
افتكر لما كان هيحضنها عشان الصوره و هى صوتت و بعدت عنه .!
قفل الفون و ابتسم للذكرى دي
بس ابتسامته اختفت
كان مضايق عشانها
اتصدم أن أمه هى اللى خربت بيتهم
و سبب طلاقهم ، مكانش يعرف أن عمر ملوش ذنب
و تالين كمان ملهاش ذنب
و ريتال اللى بسببه بقت بعيده عن عيلتها كلها ..!
__________________________
اللهم صِل وسلم وبَارك على سَيدِنا مُحَمَّد.
__________________________
في تركيا …
في “أضنه”
كانت ريتال قاعده في مكان فيه ارياف و زرع في بيت صغير و بسيط تبع ابوها
كانت قاعده في الاوضه جنب الشباك و بتتفرج على المطر و مبتسمه و مستمتعه بالاجواء
و بتشرب قهوه بلبن في فنجان و ماسكاه بتتدفى منه .
موبايلها رن ..
_الو ازيك يا بابا ..!
_انا كويس يا حبيبتي انتى عامله اي ..!
اتنهدت و بصيت للمطر جنبي و رديت :
_المكان هنا مريح للأعصاب اوي
و بعيده عن الناس
الوحده طلعت حلوه ..!
_ده

انتى بتقولي كده بس عشان عايزه تريحي اعصابك الفتره دي
و مكملتيش يومين و انتى لوحدك
بس اول ما تطولي كده هتلاقي الوحده صعبه
و مُمله و وحشه جدا
هتشتاقي للمة العيله و الدفى..
هو وقت و هيعدي و هترجعي لنا تاني .
_إن شاء الله يابابا
_على فكره مامتك كانت عايزه تشوفك
من قبل ما احكي لها حاجه طلبت مني اساعدها تخدك من رحيم
و لما عرفت انك سافرتي قلقت عليكي اوي
و عايزه تكلمك
كلميها و طمنيها عليكي .
_مش دلوقتي
مش حابه اتكلم مع حد فيهم دلوقتي و انا زعلانه منهم ..!
استنى شويا لما اروق من نحيتهم
_طب رحيم كلمني و طلب مني يكلمك ..!
_ هو عايز مني اي ده كمان؟
_معرفش انتى كلميه و اسمعيه ..!
_ طلقني ولا لسه؟
_هيطلقك
هو طلب مني يكلمك الاول قبل ما يطلقك
و بالمناسبه انا و هو اتكلمنا و اتصافى من نحيتي
و حابب يعتذرلك ..!