رواية ماء مغلي الفصل الحادي والخمسون 51 - بقلم Zoka 🌷

..♣️🩸   ماء مغلي  🩸♣️..
* adzzon *

تحية شُكر لجميل صبركم  💕

اكو كم ملاحظه اطلعو عليها  هنا اذا عجبكم واذا لا عادي تعدو البارت ..

🌷🌷

١- موضوع الديانه ...

موضوع حلو + حساس + قليل معرفه

بالنسبه لسؤال
( ليش تتعمقين بهيج مواضيع )
اني اذكر التفصيل لان اكو اشخاص ما يعرفون الموضوع من ساسه لراسه
يعني ..
اني شفت من بين التعليقات والمسجات
هوااي بنات يكلولي ماجنت اعرف هيج شي وكثريلنه معلومات احنه بعيدين عن المواضيع هاي

اني ادري اكو فئه من عمر ٢٠ وفوق
تفهم وتعرف بالتفصيل او بدون تفصيل بس عدها سابق سمع ومعرفه عن المواضيع التاريخيه نوعا ما
بس فئه ما دون العشرين ( قليلي معرفه)
جيل الالفين جيل فقير المعلومات
واني لهواي اسباب من ضمنها ( همه )
كتبت تفاصيل حادثه بسيطه مالها دخل بأي تطرف ديني
مابيها اساءه لطرف
مابيها انحياز لشخص دون الاخر

الصراحه ناتج الخلاف صار منكم وبيكم
انتو حللتو الموضوع لبعيد واخذتو اساءه لاشخاص مانذكرو وماكانو اسا موضوع
كان لبه الموضوع ( سبع الكنطره )
وليس ( الصحابه )
الانحياز منكم .. من تعبير رأيكم ومشاداة الكلام ويه بعضكم

اني ماجبت طاري احد بسوء وكل الي انذكر الف والف مصدر وثقه بنفس اساس الحديث ...

ليش زعلتو ؟ ليش اعتبرتوني متطرفه ؟
مادري !!!
هو منو الي اساء !!

وبالنسبه ل ( الموضوع هنا سحر ماله دخل بالامور الدينيه ليش دتضيعين القصه بهيج شغلات بعيده من الموضوع الاساسي )

هنا الجواب كالأتي..

اني زهراء .. اني عايشه حياه ثانيه مو حياه القصه .. اني مو ريري واشيل بكيفي شي من قصتي وما اخلي يصير

القصه قصتها يعني هي الي كلتلي اني صار وياي هيج وهيج وهيج
ومن ضمن ال ( هيج ) اكو هاي المواضيع
مو اني بكيفي داجيب واضيف واطول بارتات
هاي كلها تطلع اسباب ذكرها بعدين

لاحظت بأكثر من قصه لغير كاتبات نفس المعاناة ان اي شي بالسرد يحيز عن موضوع الاساس يكون مرفوض وعليه الف رد سلبي

بس احب اوضحها الكم ..

انتو عدكم بارت واحنه عدنا قصه
يعني حبكه .. كل طرف منها مرتبط بطرف ثاني .. ماكو شي اسمه الغي هذا والغي هذاك وخلي بس النص !!

هي الحبكه ماتكمل اذا مو تنوع الاطراف وارتباطهه بانسجام بالنهايه وتصفى لكل حدث مكانه وزمانه ..

فتقبلو هاذي كلمتي الكم ..
انتو تشوفون الخطوه واحنه نشوف نهايه الميل ...

ثقو باختيارنا للحدث المكتوب لان الرسمه بعقلنه كامله وهاي طريقه التلوين لازم تتنوع ...

٢-  الحوار ..

هنا ركزو وياي شويه والكم حريه الرد ..

انتو هاي البارتات كلها بالنسبه الكم
قصه دتقروها يومين بعد تخلص تنطوها مسح او تنزل باخر المكتبه مالكم دخل بيها اخذتو الزبده وفهمتو السالفه
تونستو شويه وعشتو تشويق شويه
كسرتو ملل يومكم وخلص

بس بالنسبه لغيركم هاي ذكريات
داتنحفر يوميا  بملف الكتروني ..

انتو تسدوهه وتروحون بس غيركم ديرجع يقرأ كل كلمه ويعيد باله نفس الشعور
غيركم ديشوف نفسه من جديد هنا
ماكدر اني اقصر بكلمتين واختصر حوار
هو من الاصل ناشىء طويل

بكل قصه تسمعون اكو الها ناقل
يتابع تقبلو طريقه الحوار لان هاي حياته
هيج صارت وديحجيها ما ممكن تكون حسب مزاجكم لان هو شخص يختلف عنكم وشخص عاش اللحظه هاي وانتهت
وعبر الحدث ..
شخص اله فكر غير فكركم واطباع وبيئه غير الي عدكم
وانتو داتقرون حيااااته لازم تقبلوهه مثل ماسواهه لان هي حياته وديحجيها الكم

ولتنسون هاي مو اني هاي ريري
( اووكيي 😒)

٣-  تنوع البارتات ..

مثلا ( هذا البارت ما بي احداث ديحجي بس ع الحب )
( هذا البارت بس حمل او بس مرض )

الجواب كالأتي..

هي تسلسل احداث .. يعني تسلسل ايام وشهور ما ممكن تمر فارغه لازم الحدث الصار بكذا وقت ينذكر حتى تكمل الحبكه لان كل حدث اله ثماره بالاخير

ولاحظو كم مره عدت حجايه
( كل حدث اله شي بالاخير )
يعني ركزو ركزو
حتى لو مو هسه
احجو بكيفكم انتو احرار بس بالنهايه
اربطو الاحداث
راح تشوفون شلون فلاان شغله هيج جانت وهيج صارت

هاي زبده الموضوع ..
اذا اني اريد اوصللكم فد فكره ان
هالشغله تغيرت لازم اكون مشوفتكم هي شلون جانت بالبدايه !!!
حتى شلون صارت هسه

اذا اني ماكتبت مثلا على الحب شلون عاشوه ومكتبت على نمط علاقتهم
انتو شلون راح تفهمون النهايه شلون مؤثره !

داغششكم اني بس انتو ركزو
😅

يعني اكو امور انتو من منظوركم عاديه
بس هي للشخص المعني بالقصه
شي كلش مهم .. شي كلش مؤثر عنده
ابسط تفصيل مذكور حتى لو على اكله
او على حجايه بسطر هي الهه ثمرة نهايه

رجاءً انظرو للموضوع من هالمنظار
حتى نكون متفاهمين ومحد عنده شي
مستصعبه بالقصه

٣-   ( الجريئة )

مااقصد بيها بس ( كلمات بذيئه) او
( مواقف رومانس زياده وطالعه عن الطريق )

هاي الكلمه ذكرتها بالبدايه ( المقدمه)
وكلت رجاءًا الي مايعجبه هالنمط لا يدخل
ويعلق ليش تكتبين هيج
لان اني من هسه نبهت يعني الي يدخل هو راضي وعاجبه الموضوع

انتو تفكيركم حلو كوولش ( 😏)
وعبالكم بس اقصد هذيج الشغلات

بس تره اني كتبتلكم اكو
( سياسه ، مواضيع حساسه )

( الشاااارع العراقي )

( كشف المستور )

هذني كلهن ضمن كلمه ( جريئة)
لييش ؟؟ لان بيهن حجي مايتقبله الكل
يعني بعدنا بس ذكرنا تطبير ، وموقف واحد تاريخي ..
قامت القيامه بالتعليقات
لو نحجي بالسياسه شتسون ياعومري
😁

تدرون القصه لحد هسه بايخه
واني اريد بس اعبر هاي الفتره
تفكيري بالاخير عاجبه هناك يضل عايش
واني ارجعه حتى اعيش حدث ٢٠١٧

حجايه من ريري كالتها الي اول ما
حاجتني   وسألتهه ..

عندج فد هدف معين تردين توصليه
بقصتج ..عبره او مجرد كتابه ذكريات
بقصه ..

كلتلي بصريح العباره ..

اني لا جايتج تكتبيلي على رجلي ولا على خبالي اصلا طاري الحب لتجيبيه بالقصه
شوفي شلون تلوفيهه وتطلعينه منهه

اني جايتج حتى تصحين عقول البنات المعشعش براسهن الثول

داشوفهن يبطن الكلب بالفهاوه والثول
والعالم اني مصلخ كدامي شايفته و جازه روحي منه
وهنه ديجفصن وميدرن بروحهن  وين
وشديسون
وحتى اهلهم هم ثولان مثلهن وماكو
بنيه تعرف الاعرفه بالعراق فدوات اسمه شكد يكسر الكلب

كلتلي ..
بيج خير تكتبين وتشدين راسج بوصله
تسدين بيهه عينج واذانج من الناس وتمشين بس وراي كولي
مابيج خير و هم بنت الماما انتي
وتبجين من اول عركه سدي الخط وروحي
قبل ماحجيلج واتعب نفسي

( هاي جزء من بدايه مكالمتنه )

واني طلع بيه خير وكتبتلكم وشديت راسي مثل ماوصتني 😄

واني الي اعترضت على سالفه الحب
كلتلها لازم تنكتب ماتكمل القصه بدونهه
هاي اكبر جزء بيها

بس اتفقنا ان يكون ذكره بس للضروري
والتركيز على مواضيع هي تريد تكشفها بصورتها الصحيحه الي انتو ما راح تصدكوهه وتتعاركون ويايه واني راح اخليلكم هذا القلب ( 💕 ) بس ما راح اردلكم اي كلمه

واني مو متكبره تره
بس اتجنب الجدال واكتفي بأن اكللكم
قريت و فهمت رأيكم

....

هاي كم ملاحظه حسيت ضروري اذكرها
بقى بالنسبه لكمية المصداقيه هنا ..

مانطيكم فد رقم معين بس هي عاشت
الحدث بحقيقته ...
الشارع كان صادق وياهه لحد الجرح
وهذا اكتفي بي مصدر ثقه لنقل الكلام

....

* خاف فد يوم يجي بالكم سؤال على شغله حتى لو بالبارتات الجايه
او استفسار على موضوع ضل بالكم
وراسلتوني بالخاص ومارديت
اكتبو هنا ... بهذا البارت

لان تعليقات تطلع بسرعه
الرسائل يطلع اشعار بس ما تحمل

واذا موضوع كلش خاص راسلوني بالفيس او التلي اني اجاوب الكل
وبكل المواضيع

* ادري كلبكم هالكبره صاير مني
وما جارعيني ابد
وصراحه اني هم ما جارعه نفسي
فتره توتر رهيبه عندي

بيتنا عدنا مريض كورونا ( بيبتي )
وصاير البيت انذار

اني ادري الاعذار شي ممل واني هم اضوج من اليتعذرلي
بس اني داحجيلكم يعني مو دالتمس لنفسي عذر
بس هيج دانطيكم خبر

اني مُتعِبه و ممحظوظه بهالمره ويه احد
٢٠٢٠وجهه كلش خير عليه

بس رغم كلشي
اتمنى يبقى الـود بيننا عامراً 🌷💕