رواية ماء مغلي الفصل الثاني والخمسون 52 - بقلم Zoka 🌷

..♣️🩸   ماء مغلي  🩸♣️..
* adzzon *

اخذته وحاولت افتح رمز مانفتح
ضليت مخلي بايدي وكاعد صافن على المكان وجان يدك تلفون ....

المتصل ( ١١١٤)
فتحت خط ..
صوت بنيه ...
- ابو سيف

ضلت تكول الو وانه ساكت ردت كالت ..
- هاا هم انتي متجوزين من سوالفج الا اخليه يكرمج ويكعدج يلا تجوزين من تلفونه

سديت الخط ونزلت لغرفتي حسنين يباوعلي
وانه ادور بالمجر طلعت تلفوني الصغير
النوكيا .. خليت بي سيمكارت عادل وشحنت التلفون ...

انتظرته فتح ودورت على اسمها ( ١١١٤)
نقلت الرقم بجهازي سجلته وضليت اكلب بجهات الاتصال ماله ...

حسنين يسألني شكو شتسوي وانه ساكت
رجعت السيمكارت بتلفون عادل ونزلت
جوه ...

شفت ريري كاعده .. خليت بايدهه تلفوني ...
- رور هاي صاحبه عادل خابرت وحجزت رقمها هذا
اخذي وتصرفي وياهه اعرفيهه منو

- اووكيي بس خلي اصير زينه هسه كلشي ماعرف افكر الحساسيه دمرتني

- اخذج تغسلين تبردين جسمج

-لاا حيداااار هي بدمي احسه يفوور
حتى عيوني ولساني ونص بلعومي كله مأذيتني وصايره نار

- لا اله الا الله حبيبي والله حرت بعلاجج
اخاف اخذج بعد دكتور وينطيج شي يأثر ع الحمل

- اكولك شي
داحس هو يمكن يريح جسمي شويه

-شنو احجي!

- اتبرع بالدم

- بووويه حااامل انتي يرادلج دم شبيج انتي

- ادري اعوضه بس هذا دم فاسد
اني عندي لزوجه بالدم كل فتره جنت كل كم شهر اتبرع بالدم
هسه يجوز لان صار هواي هاملته
وتغييرات الحمل يجوز ارتاح شويه

- لااا اخاف عليج يروح يصيرلج شي
لو الطفل يضعف نموه ماجازف بيكم

- كلشي ميصير شبيك عومري
هسه خلي الصبح اخابر الدكتوره واشوف اذا كالت اي تاخذني اوووكييي

- نتأكد يلا اخذج

- اووكيي
تعال بحضني شبيك هيج وجهك مصفر

حضنتهه وهي ايدهه على وجهي ..
- رور هذا عااادل تفهمين شنو عادل !
اخويه ولج ماشي بدرب السحوره
نمردت روووحي من شفته

- ادري هسه ماتعودت عليهم

- موو هيييج يطلع وياهم ! لج اخويه هذا
واحنه اهله كدام عينه روحنا مفرفحه جانت من السحوره والامراض وهو وياهم شريك بكلشي !

- هسه دنطي صبر ليش كبل خليته وياهم
يجوز دربه غير دربهم

- دربهم واحد كلهم سحوره وشياطين
شكو غيرهه

- مادري احساسي يكولي عادل وراه سالفه
مو منهم و بيهم
لان هو قبل هم جان متأذي من السحوره
لو صدك وياهم جان كلشي مابي

ها وهو هم يصلي ويروح زياره ويحضر مجالس لو مثلهم كافر جان مسواهن

- لااا والله يسووهن
بويه انه اعرف سحار جانو الولد بالمكبره يحجون عليه
يكولون . .

هو مسوي روحه متدين وعنده نور وهبه اله رب العالمين ومسخرله جن ودارس وفاهم
وكل ما واحد يجي عليه ما يعالجه ولا يكعد وياه الا يروح يتوضى ويصلي ركعتين كدامه يلا يجي يعالج المريض او يشوف شبي

وطلع هو بعدين معترف بنفسه كايل
انه جنت كبل ماكعد ويه شخص يريد اسويله شي بعلاج ...
اروح للحمام تطلعلي كتله مال نار اسجدلهه
واقضي حاجتي واطلع بدون تغسيل واروح اصلي حسب الاصول وانه مامتوضي
يلا الشيطان يساعدني وكلشي اريده واكله عليه للحاله الجايتني يسويه الي

-عزاااااا يمه ايييع ايييع هاييي شبيهم ويه الوصخ موقعين عقد بالنكاسه والجيافه!!

- اييي همه الوصخين هيج مكان شياطين
فلاتغرج سوالف الصلاه هذوله يسووهه
حتى يزيدون كفر ويرضون شياطينهم

- يبووووو صخااام بعينهم وعين الخلفهم
ولك هذوله شلون نهد عليهم النجف ونخلص
شنسوي !!

- شنسوي شبيدنا عليهم
اكو الله هو بيده امرهم

-  اوووف اوووف عبالي خلصنه من هذنيج الحيايه طلع عدنه حيه اكبرين النوب بيتنا

نمت على رجلهه وغمضت ضليت افكر بعادل وحاله ... بعدين كلتلهه...

- اكلج لازم اطلع عادل من البيت
واكعد وياه تحقيق بس وين اخذه ؟

- اي كولش ينراد هنا يفلت من ايدك يفلت
اخذه بيت الحجي ديساعدك هم هو خوش عقل عنده احسن من ابو صماخ

- صدك خلي اصعد اشوفه
واكله ناخذه كبل ما يكعد عزيز

-اي ديلا روح بس لتبقى وياهم هناك
للظهر ارجعلي عفيه اريدك يمي

بوستهه وطلعت.. صعدت لغرفتي لكيت حسنين متمدد ومخلي المخده على وجهه
وعادل بعده نفس نومته بالكاع ...

استعجلته واخذنه عادل ونزلنه ..
خليناه بالسياره وانه بعد ظهري تشنج
ضليت واكف اطك بظهري ورحت شربت ماي ورجعت شغلت السياره وطلعنه
لبيت الحجي ....

اول ماوصلنه بيتهم خابرني عزيز ..
يسألني وين طالع من الفجر ... كلتله
ويه عادل كعدني وعنده غراض يريد يجيبهن
وسديته ..

نزلنه انه وحسنين وعفناه بالسياره
كعدنه ويه الحجي وفهمته السالفه من اولهه
وهو كال ..
امشونا نطلع لغير مكان ناخذه ..

اخذنا الحجي ويانه وطلعنه حسب وصفه
للطريق على اطراف الكوفه بيت مثل
حسينيه صاير .. بي غرف فارغه بس
حصيره بالكاع مفروشه ...

تلكانه شايب يمشي محني الظهر سلم على حجينا وبس ردلنه السلام وكال اختارولكم غرفه وكعدو بيهه ..

اخذنا عادل انه شايله من رجليه وحسنين من ايديه وخليناه بالغرفه ...

طلعت رحت يم الشياب وصرنا نتفاهم بسالفته
والشايب كالي ..
خلي يصحى ونفتهم منه ..

رجعنه كعدنه يم عادل وطب علينه رجال
شايل المغذي وابر وراد يضربه وانه ماخليته
كلتله خلي نفتهم ابر شنو تضربه !
كالي يصعدن ضغطه ويصحنه وانه مضمد
وعندي خبرتي وهاي الحالات شابع منهه ..

شكله المغذي وراح ... طلعت خابرت ريري
وحجيتلهه الوضع واتطمنت عليهه ورجعتلهم

وره ساعه صار الشايب هذا يضرب بوجه عادل ويرش عليه ماي لحد ما كعده ..

ضل يفرك بعيونه ويندار يباوعلنه ويرجع يكمش راسه ... حسنين جر ايده وكعده
وهو ضل يباوع بوجوهنا .. كال ..

- خيركم !

احنه واحد يباوع بوجه الثاني ويريده يحجي
بداله ..

تالي الحجي كال ..
- ابو سيف احنه هاي كعدتنا وياك مطوله
ونريدلك الخير
تعاونا وتحجيلنا مشكلتك بعون الله نصيرلك
ند و مايطلع سرك بره هالباب
ما تعاونا وتكتم بكلب وتحذب علينه
لا والله احنه ما نجوز عنك ونتعبك

ضل هو صافن عليه ورجع باوعلي
وكال ..
- هاذ انته الضربتني  خويه !

ضلت عيني بعينه وكلتله..
-اي انه
شعندك من سالفه وخلتك بنصاص الليالي
كاعد بالسطوح !
اللبس والحيه هالمتنهه بركبتك
شبيك خويه !!

ضل ساكت ويباوع لحسنين .. تالي كال ..
- مادري شحجيلك
مادري ليش هيج سويت

- لااااا تجذب عاادل مو صغيرون انته
وماتدري بروحك
كلش زين تفهم دربك شنو وتفهم احنه شفاهمين عليك
اااانه كل شي شفت ماجذب عيني واصدكك

صار عصبي ووكف يريد يطلع وانه ماخليته
وكمشناه انه وحسنين وهو يصيح يريدنا نهده
وماعفناه لحد ما تضاربنه انه وياه ...
ضربته من جوه فجه ودفعته على حسنين
وطلعت ....

انفض بايدي واعصابي ترجف ..
ردت مااشوفه منو ..ردت اكعد متجاهل كلشي بعد .. ادري مواجهتهم تكسر ظهري
بس كلشي مفروض عليه امشيله ...

طلعو البقيه وضل هو قافلين عليه الغرفه
كعدنا بالمضيف والشايب كال ...

- خلوه يمنا وانتو ارجعو لاهلكم
انه اتكفل بي

الحجي كال يلا نمشي وانه اعترضت عليه
- وين نمشي حجي
واخويه اعوفه وحده هنا.  ! غير افهم سالفته

- بويه ماتفهم هسه منه مااتفهم
وعمك راح يخليه يراجع نفسه يومين ثلاث
ويكعد يحاجيه

- چا شووون !! مانشوفه بعد !
هسه غير نفهم علته وين

- بعدين تبين بويه بعدين
امشينه وعمك عنده دبارتهه
هو يعرف ازيد منك

وكفت وياهم اريد امشي بس كلبي عليه
ضليت اوصيهم ينتبهون عليه واخذت رقمهم
يلا طلعت ...

بالطريق اسأل الحجي واسأل حسنين
' شبي عادل شعنده هيج يسوي!! هم درب السحوره ماشي بي '
ويسكتون مايردون ...

وصلت كل واحد لبيته ورجعت لبيتي
شفت ريري كاعده بالهول وبايدهه جيس ثلج
كعدت يمهه وهي خلت الجيس على راسي
وتكلي..
- برد عقلك برده
ادري بيك صاير نار اعصاب

- انه هم بعد شجم يوم يضل بيه عقل !
لا والله

- عادي تخلص وتنساهه
خلي اسويلك ريوك

- كلشي لاتسوين ماريد
بس اريد انام

عفتهه ورحت غسلت ورحت لغرفه اهلي
ذبيت تشيرت وتمددت ..
شويه وضليت اصيحلهه ..
اجتي وشغلت الضوا ... صيحت عليهه..

- شعندج ضاله هناك كاعده
ماشفتيني اجيت مسمومه روحي
تضلين وياي لو تكعدين تتصفنين هناك

- بس طلعت اغسل رجلي بالصونده لان مي بارد

درت وجهي وهي اجتي كعدت يم راسي
تلعب بشعري وتبوس بجتفي ..
- اكووولك تره حامل وجسمي مورم ماكدر اضل حاضنتك صفح تعال انته اندار يلاا بلا دلع  مرتك حااامل وتعبانه

- هم بلوه طلع حملج

- حيداار ادري ضايج وكذا بس اني هم ضايجه واني حامل لازم تداريني

- عليج الحسين اسكتي خلي انام

-حيدااااااار

-هااااااااااا

- اني احبك انته تحبني لو لاااااااء

- احبج والحسسين احبج

- شكد يعني تحبني ؟ زين تحبني اني اكثر لو ابنك اكثر ؟ زين واذا طلعت بنيه هم تحبهه مثلي ؟ لو ابقى اني اكثر تحبني ؟
زين لو ما صرت حامل هم تضل تحبني ؟

- انتي بيج شي !

انداريت عليهه وكمشت وجهه فريته منا ومنا
كلتلهه..
- شبيج صاحيه ! ضاربه عندج فيوزات !
لو هرموناتج ماتشتغل بس وكت مايشتعل ابو ابويه بالمصايب !

- اييي غير داعرررف اوووي شو انته صاير متنحمل
ادنى خلي انام تعبت من الحجي عيينيي
تعبت شنو هاي بس وحده تصير حامل وتحجي شويه تتعب !!
لا لاا عيني ماكو هيج وحده حبالتهه نحسه مثلي

ضلت تمدد بجسمهه على راحتهه وتتغطى
وتعدل بشعرهه ولامه شفايفهه .. 
وانه صافن عليهه !

شفتهه غمضت وانه رجعت تمددت وانداريت
جان ادغني بظهري ..
- حيداار اكووولك هسه اني وجهي حلو لو لااااء

- حلووو

- يعني بعدك تحبه هو واحمر لو صاير يلعب نفس ويخوف

- لا زين

- ماكلتلك زين كلتلك تحبه لوو لاااء

- ايييي احبه احبببه

- اوووكييي زين اكوولك
عيوني صدك صارت مال جكمان
هذوله اليابان هيج عيونهم مبقبقه
اني مثلهم لو لاااء

- لااء

- لااء خاف مثلهم شو هذا كرفش يكولي صايره مثل هذوله الجكمان
لعد انته ليش تجذب عليه وتكولي بعدج حلوه
متصير صريح وياي وكولي صايره تلعبين النفس

- حلوووه والحسسين حلوه معليج بيهم

-لاا خاف دتقنعني وانته من تطلع تباوع على اشكال البنات وتكول هم عندي مره مثل هالنسوان شحلاتهن ! !!

- دخييييلك يارررربي
لج انه وووين وانتي وين
خلي اولي فوك انهمد وضلي انتي خيطي وخربطي بعقلج

كمت وصلت الباب وصاحت ..
- حيدااااار تعال يمي  ارررجع
شلون تعوفني وتصعد واني بالي يضل يمك ىماكدر اصعدلك غير حامل شيصعدني لو نسيت اني حامل

ضليت واكف واضرب براسي بحافه الباب
وهي تكلي ..
- ديلا شدعواااك متتحملني هسه اني شحجيت !
مو كلتلك تعبت من الحجي شكو تتزعل اوووي شو عبالك انته هم هرموناتك ضاربه

حيداااار شووو ساكت !! ترجع يمي لوو لاااء

- ارجع وعلي ارجع
ارجع وين اولي انتي براسي براسي وين انطي وجهي
يمج عمي هاي انه يمممج

- ديلااااا اووكي
يلا تعال نام بحضني شو عاجبني ابوسك
لو شفتي مورمه خاف متحب ابوسك بيهه !

- شتوسين سوي  بس عليج العباس عليج الحسيين اسكتي لخاطر رب الخلقج اسكتي

-ديلااا مو كلت تعبت اوووي كلساع اعيدلك مالي خلك متحسسه وروحي بخشمي اوووكيي لتضوجني يلا حبيبي حياااتشي انته
تعال ابوسك

رجعت للفراش تمددت وهي تبوس وجهي
وضلت تشم بركبتي وانه مغمض وعايفهه

بوست اذاني وشاورتني ..
- وياك سند وام سند يحبوك هواااي هوااي
وميعوفوك وحدك
حتى لو اهلك اذوك احنه نداريك

بوست ركبتهه ونزلت جسمي شويه وضليت كامش بطنهه وابوسهه وراسي فوكاهه ..
سكتت بعد وانه هيج بين بطنهه وصدرهه صارت  نومتي ..

كعدت على صوت امي وهوسه الجهال
كمت سلمت عليهم وتغدينه وراهه خابرت
بيت الشايب سألت على عادل وكال بس منطيه اكل وعايفيه بعده بالغرفه  كاعد وساكت ...

ريري اخذت خبر اكيد من الدكتوره
تكدر تنطي دم بس بطل واحد وتعوضه بالاكل بدون دهون ....

اخذتهه للمستشفى سحبو منهه الدم وانه
مشتريلهه عصير واكف يمهه ..
من كملت انطيتهه تشرب وشفت بيهه حيل يلا رجعتهه للبيت ..

امي كضتها كله تسويلها الاكل  شوي
وتنطيها لبن وكرفس وثوم وانه كاعد وياهه
هم اكل و ادور وياهه بالبيجات على ملابس هي بالهه تشتريها وانه اختارلهه منهن ..

عبرت ٣ ايام واخذ الحجي ورجعنه لعادل
وانه الوكت كله كايللهم هو طالع بشغل وناسي تلفونه بسيارتي ...

رحت شفته عصبي مايتحاجى اول ما شافني
هجم عليه خنكني والولد يفاككون بينه
بالف ياعلي خلصت منه وطلعت اجر نفس بره واشرب ماي ..

ضليت اسمعه يسب بيه ويسب باهلي
ويكفر ماخلى لا رب لا نبي لا امام
وانه من بره اصيح واتلاغى وياه
وهو حتى الحجي هم ضاربه ومطرده

ضلينه كاعدين بالمضيف ويه الشايب
وهو كال لبة الموضوع ...
- عادل مو بوعيه مغسول غسل كلبه وعقله
وشيسوي يروح يجي هاي من الزن بالراس

الحجي كال واضح عليه وانه وصلني خبره
بس بيتي صعب اعالجه وناس تشوف حاله

انه فهمت من الحجي هو مايريد الي مخلي هيج يوصل مواصيل يدري بينا عرفناه
وراح نعالجه .. فهمته يخاف من اليعرفون
لا يأذوه ...

رجعنه وعفناه يم الشايب كال هو يكعد يتفاهم وياه هالايام وبراحته يعالجه بدون مايتعب اعصابه ..

صارت الايام عندي مابيهه روح
كل فكري يم عادل وحاير ارتب جذب كدام الاهل حتى اغطي على روحته ...

ريري  خفت عدها الحساسيه بس شكل عدها فقر الدم ... لان كلشي تاكله وره شويه تلعب نفسها وتتقيء كلشي اكلته ...

كبل مارجع لدوامي اخذتهه دكتوره هنا حتى تشوفلهه حل للعبان نفس وكتبتلهه ابر
وحبوب كبل الاكل .. عفتهه زينه ومرتاحه عليهن .. تطمنت عليهه يلا رجعت لبغداد ..

باشرت دوامي وضال على التلفون ويه
بيت الشايب اتطمن على  احوال عادل
وهو يكول مايحجي بس صياح على الرايح والجاي .... النهار والليل بس يصيح ويسب بيهم ويكفر ..
شوكت مايسمع صوت اذان الفجر يضل يكفر
ويعلي بصوته وهمه اكو عدهم ولد اثنين
شغلتهم بس يسكتون بصياحهم ..

يرحون عليه للغرفه بس يشوفهم يسكت
ويضلون يجبروه يسبح ويتوضى ويضل كاعد
واحد منهم يمه لحد ما تطلع الشمس ويجيبون ريوك ... يخلوه ياكل ويصيح بسم الله الرحمن الرحيم بالبدايه وهو يسويها مصيبه عليهم
بس تالي يحجيها ...

يخاف من واحد من الولد بس يجي يمه شيحجيله  يسوي حتى لو يعاند بالبدايه بس يرضى بكلامه ويهدا ويسوي كل الي يريده ..

صار دوامي بي تعويض الاجازه وتاخر نزولي أسبوعين.. بهاي الايام انه اطلع
للكاظميه وره صلاه المغرب هناك اتعشى
وازور الامامين و اضل ادعي لعادل كون الله يغفرله ويرضى عليه ويرجعه لعقله ويحفظه لبيته وجهاله...

اشبع زياره واطلع اتمشى اشتري كل مره نوع حلويات للاهل واشوف شغلات للبنات
كلايد وبجايم والولد اخذلهم مسدسات
واجمعلهم كل مره هديه شكل ..

واطلع اتمشى بشوارع الكاظميه
انه كِلش نفسي ترتاح بيهه احب هالمنطقه
من بين بغداد كِلهه ...

افتر بالسياره والمكان اليعجبني اطبك وانزل اتمشى بي ..
اكو محلات راقيه وكبار هنا كلشي بيهه
اطبك براس الشارع وانزل افتر بيهن

شفت هالمره اكو سيارات ع الشحن تشتغل
كبار ويلمعن حلوات كِلش كعدن بعقلي
صحت الولد وخليته يشغلهن وشفتهه شلون
تمشي واضويتهه وستيرن وبريك وهورن بيهه ...
اختاريت وحده لونهه اسود وسمائي
كلت هاي لابني شوكت مايكبر يصعدها ..

وره شجم يوم هم رجعت للكاظميه
وانه احب شارع المحيط لااازم اطلع عليه
شكو محل فرع بيت كلهن حافظهن

احب الشارع هذا بالشته بالليل يصير الجو بي
مال لندن هيج انه يعجبني ...

شفت هالمره كره سله ... السله تتثبت بالحايط و وياهه الكره بيضويه جوزيه من هاي القويه
هم اشتريتهه....

صورتهه ودزيتهه لريري ...
خابرتني وانه بالسياره افتر ..

- لك حويدر شو عقلك بالملاعيب صاير !
شعجب!!

- فلوسي زايده شسوي

-بلاا شقى كول شعندك تجيب وتكوم
خاف عندك جاهل ومادري ولك !!!
كوووول داجي احرك بغداد على راسك وراس الخلفوك

- ييييييييي بويه شبيييج كلشي عندج افكار صهيونيه

هسه انه شوكت لحكت يصير عندي جاهل ومتدرين بي ! چا انتي مو هستوج حاااامل

- اييي بعده بطني وانته هاي المن تجيب وتكوم سالفتك مارتاحلهه
اعترف احسن ماصيدك ويصير غير حجي بعد

-بووويه والحسييين اشتري لابني شبييج
چا مو منتظرين الجاهل منج

- لك بين مايجي ويكبر ملاعيبك هاي
تصير اثريه

-اي انه اريده يلعب بشغلات اثريه
كيفيي ابني وانه حر بي
اجيبله هسه اجيبله بعد سنه لو عشر سنين
كيفي

-هااااا
يعني هسه ماعندك شي منا منا
كول عادي تره روحي رياضية اووكييي

-ههههه  عليج علي!
من شوكت هاي ! من صرتي كيوت ومامه

-اييي مو هم واحد شويه يكبر ويعقل
تعرف حسب المزاج يعني

- انه خايف من ولادتج يكولون نفسية المره هنا بالانفاس هم موخوش
متنراد ...شلون بيه ساعتهه اخذ ابني واهج واعوفج

- دكعد رااااحه حويدر اكعد راحه
مو لازمته للساني وداصير ام مؤدبه
وزوجه حنونه ليش تخليني اغرد واكسر هيبتي

-هههههههههههه وعلي مشتاقلج
لج مابدلج بعشر نسوان

- واذا اجتي ال ١١ تبدلني مو ؟

- عمممي ابتليت !!! لج شلون مصيبه انتي

-انته حجيك صاير يخوف احسك راح تطلع عن طريق هاي فرفرتك مارتاحلهه
شكو تفرفر متروح تنام ! عفيه رجال روح عمرك الشارع والسياره !! والتبصبص
بالكظماويات

- ياااابويه هالاسطوانة الماتخلص
لج وعلي انه هنا جاي اشوف الشارع اهدي بالي شويه اغير جو ياكظماويات انتي
هنه وينهن !!! شارع فارغ ماكو ولا كظماويه
بس طوابيك وشجر

- ايييي تدورررهن وماتلكط طالع متاخر
حراامات مالحكت عليهن

- اطلع بعد للجادريه احسسسن هيج وكت كلهن يلتمن

- اااااخ ااخ لك هم  اكو  وحده ثوووله مثلي
وعقلهه محشش !!!
اني لو ما براسي ثول ماخليك تداوم هناك
بس هو الثول شلون يصير احمر اخضر !

- هههههه يصير اصفر مثل وجهج

- تره حااامل ومريضة اوووكييي

- روحي اكلي بويه شتردين مني حاركه اعصابج وياي وانتي حاامل ومريضه
روحي انه اتعبج روحي

- امممم اسمع عيووني حياتتششي
صح اني مالازمه وجهك هسه ومفكسه عيونك الي تفرفر بالشوارع والدوائر
بس ابننك يمممي اووكيي
ديربالك بس تغثني وتسويلك مكسوره
اشرد واعوفك تلطخ راسك بطوابيك الكاظميه

- والله وقسم بالله ياريري اذا طلعتي
واندكيتي بابني وتحرميني منه
قسسسم بالله اموتج

- اوووكي لعد متفاهمين صير حباب حتى اني مااموت
يلاااا چاو اروح اضرب ابره
هاي اجتي فضه

- يلا عفيه بالسباعية

سديته وكملت طريقي ...  ثاني يوم راجع من الدوام وخابرني حسنين..
- ها خويه

-اكلك حيدر هاااي المره يمنه اجتي
وشابعه بجي ونين على رجلهه
ورايحه محلله طالعه حامل وكعدت نصبتهه مناحه

-هاا بالخير ان شاء الله
شكو البجي ؟

- اكله تبجي وياامن يسكتهه
تكول عادل بي شي مو من عوايده يطلع هيج وميخابر ولا يسال علينه وراح يقبط شهر ماسامعين صوته

- استغفر الله دبرهه خويه دبرهه

- انه كلت لو انته تخابر الجماعه وتخليهم يخابرون على رقمي وانه انطي تلفون للمره تحجي وياه
انطي لسيف هم رايح راجع يسأل عليه
شتكول  انته ؟

- والله مابيهه شي هسه اخابرهم و انطيك خبر

-اي بعد اخوك انتظرك انه

سديته وخابرت الولد تفاهمت وياه وحجيتله وضع الاهل كلشي مايدرون عليه وهو تكفل بالباقي ...

رجع خابرني حسنين وكال حجو وياه وزين
سلم عليهم وكللهم ناسي تلفوني ومشغول
وهيج برد كلوبهم عليه ...

وره شجم يوم صار نزولي للبيت ..
ضليت اجيب وانزل بالغراض من السياره
الجهال كلهه ذكرتهه وكلمن وعلاكته
واهلي كل الحلويات عدهم
وريري يمهه العاب ابنه عجبنهه وأمنت من صارن بايدهه ...
كل عقلهه انه اشتريهن لغير ولد ...

رحت ثاني يوم اشوف عادل ...
كعدت وياه هالمره زين هادىء بس
احاجي ما يردلي ..
متمدد ومنطيني ظهره ...
ادنك عليه ابوسه احاجيه خويه رايدلك الزين
وانه اخوك مااذيك واحرمك من العيشه
بس هو ساكت ولا دار وجهه ولا حاجاني ..

كعدت تفاهمت ويه الشايب ...
حجالي جاي يعيدون تأهيل نفسيته
دماغه افكاره واطباعه كلهه جاي يغيروهه
وهو هسه مايدري منو صاحبه منو عدوه

وشكو عمل وجن ساحبيه منه بس ضال تأثير الجان بي مخليه لا عقل ولا ادراك وهسه ضال فارغ عقله شيعلموه يمشي عليه ..

شكد ما كلبي مكسور عليه كلت الحمدلله
تلاحكتله واتأمل خير بالجاي ..

خليت بايدهم فلوس تعبهم وانه جنت ماخذله ملابس جديده ومسواك ..

رجعت للبيت ولاكاني حسنين ..
عاتبني ليش رحت وماخذته وياي
وضل يسألني شلون وضعه صار وحجيتله الحال ...

كال يريد ياخذ اخته للبيت حتى تراجع دكتوره هي وامهه عدهم موعد اليوم ..

اخذهه وضليت انه كاعد ويه اهلي ...
ابويه وضعه خير من الله صارت صحته
كلش زينه ...
يمشي براحته ويطلع بالمنطقه يفتر يروح على بيت عمامي ويطلع لفواتح ومحل عادل
مال مفروشات بالسوك هو يروح يفتحه
ويكعد بي يمشي الشغل ..

جنت ناوي اذبح لسلامته بس كلت عادل
مو هنا وكلبي مانطاني اسوي عزيمه واخويه مايحضرها ...
نويت بس يرجع عادل بسلامه اذبح لاثنينهم واوزع المنطقه كلهه ..

اخذت ريري ورجعنه لبغداد .. راجعنه
دكتوره .. هذا شهرها الخامس ..
عرفنا جنس الطفل ... ولد ...

من فرحتي وانه يمهه بس سمعت الدكتوره كالت ولد كبل شلت ايدهه وخليتهه على حلكي ابوسهه واباوعلهه مدمعه وتضحك ..

دكتوره انطتهه ابر ضروري تلتزم بيهه
كل ٣ ايام ابره مقويات ...

طلعنه من الدكتوره.. بالسياره كلتلهه..
-لج ابوس راسج ! ابوس بطنج ! ابوس كلبج! لج شسوي فهميني !!!
لج راح تجيبيلي الولد
اووووويلييي الله

ضلت تضحك وانه كامش ايدهه ابوسه واخليهه على كلبي واسوق ...

- حبيبي كولي شتريدين اشتريلج اي شي بنفسج هسه كليلي
مشتهيه فد اكله ! اخذج فد مكان عاجبج
كولي

- اييي اولاااا اريد كانيور

- يجيج بس نرجع اجيبه الج ادللي

-ثانياً اريد اروح مركز تجميل

-وعلي وجهج يلمع مابيج شي

-ادري يلمع لعد اعوفه خايس !
بس اريد اسوي تنظيف للجسم اريد
احجز حمام مغربي شويه ع البخار انتعش
وجسمي احس من كد العصارات صاير مدري شلونه معاجبني ومابيه حيل اجلف عيني بسررعه اتعب ادووخ وداعتك

- چا عندج فقر دم ليش ماتدوخين وتتعبين !

-ايي هسه اروح ؟

- اي حبيبي ادللي اليوم شتردين بنفسج يصير
حمام مغربي انه مافهم شلونه بس سوي اذا يريحج

- اييي عومري بعدين تتلمس وتشوف الفرق
تكوم انته تاخذني من وحدك

- ههههه يابعد روووحي چا كثريلي هيج سوالف .. ابو سند محروم صار هواي
رجعي نشطه رجععععي حبيبي

- اوووكي يدلل حويدر
اكولك لون شعري حلو لو اغيره ؟

- اي غيري اريد تسوينه هذا الهيج عبالك لون مال رمل

-اييييع لااا بي قصر يتلف شعري
شوف لون هيج شويه غامق

-چا سوي بكيفج انه ماحافظ كل الوان الشعر
انتن سبعين الف لون تستخدمن

- زين هاي لعد شمعرفك اكو لون رملي !
وين شايفه !!! منو هاي صابغه شعرهه هيج
وضاله بالك وعاجبتك !!

ضربت كصتي وضليت اصيح ..
- تورررطت يااابويه ياخضيير
شيخلصني من لسانهه

عدلت كعدتهه وندارت عليه وفتحت تحقيق
ماخلص لحد مانزلنه للبيت وهي قافله
انته تباوع ع البنات و تركز بيهن و تخوني بعيونك ومن تنام تضل تفكر بيهن حلوات والشعر اشكر و تلعب نفسك مني لان حامل صرت محلوه ..

اجيب واقنع واحجي ومايفيد ..
عفتهه بالغرفه مطنكره ورحت انتظر
يجيبون كانيور ...

همه جابوه وسمعت صوته طلعت تركض
وهو كمز عليهه ..
رجعت تضحك وتبوس بي وهو يشمشم بيهه
وضلت كاعده ع القنفه ومخليته بحضنهه
ورجعت تحجي وياي عادي ومزاجهه حلو
ونست العركه كلهه ..

تغدينا واخذتهه للمركز وصتني انتظر ابو التوصيل وادفعله .. وضليت طابك سيارتي
يم المركز ومشغل ملخص مباراة واباوع بالتلفون وكانيور عفناه بالبيت ...

خابرني ابو التوصيل ونزلت اخذت منه الغراض  ورجعت للسياره .. وكل شويه اخابرهه وهي قفلت تلفونهه ...

كعدت اشوف شموصيه ؟ فتحت العلاليك
وكلهه ملابس نوم عريضه .. عفتهن ورجعت للتلفون شويه ودك رقم غريب جاوبت وطلع ابو توصيل ثاني ...
ضربت على كصتي وهو كالي قريب
عليك ..

نزلت وانتظرته وهم استلمت منه ورجعت للسياره .. كعدت اشوفهن طلعن مكياج ومعطرات ..

لبست النظارات ورجعت الكشن واخذتلي غفوه ... وكعدت ورجعت غفيت وهي بعدهه
انه نمت بعد مادري بالوكت ..
وتالي حسيت عليهه تدك ع الجامه
كعدت وفتحتلهه الباب وشفت الدنيا غربت ...

- لج هاي دكه تسويهه بيه !
جان كلتي اتأخر اعوفج واروح انام بالبيت
وضلي لليل شكو شتلتيني هيج !

- اييي بلا احتاجيت شي شلون تروح وترجعلي لازم تضل يمي

-وتلفونج ! شكو تطفيه! شجم مره كايلج بطلي هاي السوله

- شوف صراحه اني جنت فاتحته بس من دخلت للحمام طفيته لان اريد اصير ريلاكس
وانته ادري بيك كل خمس دقايق تكولي وين صرتي

- يااااابويه انه متعجب على روحي شلون جارعج لهسه وماكسرت ضلوعج

- اييي غير حبيبتك ام ابنك ااانييي
واليوم انته كلتلي ادللي

- اتخليني بعد اكول التوووبه من دلالج
كل شويه نازل ادفع وارجع
منين مادير وجهي اورق وياااريت محصلي شي

- يلاا هسه اني ريلاكس لتضوجني اووكي لتضوجني
تجيبلنه عشه. ؟ اني نظيفه كوولش ماريد اتدهن

- توصخي واسبحي عدنا تانكي ماي يكفيج

- مووو خطيييه ااانيييي حيداااار

- لا اله الا الله كرهت اسمي وعلي كرهته

- ديلااا لتجيب اصلا اني اكلت ابقى انته حير بروحك
شافوني خوش اورق هم خوش دللوني جوه
تنظيف وتلميع وبخاار عيني يفتح النفس
وترطيب من هذا التووووب
الريحه اوووف اوووف تجنن بس اشم بايدي وشعررري غيرت لونه وهم معالج رجعله النعومه كلهااا والريحه تجنن صارت وهذيج اللمعه والفير يخبل ..
كووله لخااطر حبيبي حيداار اووف شكد احبه

باوعتلهه وضحكت .. كلتلهه ..
- ناخذ صاج لحم لو دجاج ؟

- دجااج عوومري

- كولي حبيبي احلى

- حبيبي حبيبيييي ابو الحيادر

اخذنا العشه ورجعنه للبيت ... عفتهه بالغرفه وطلعت اخلي اكل لكانيور ..
غسلت ورحتلهه ...

شفتهه لابسه ثوب   كصير و صلوخ فانيله رصاصي وحاشيه سوده وطابع على بطنهه
وشعرهه ملفلف و لونه بين الجوزي والعسلي
جان هو على شكار وبي خصل هسه احلى صاير ...

ردت احضنهه ماخلتني ..
- اخذلي صوره قبل متخرب شعري والحمره هيج اريدهه تبرز هاي جديده اووكيي

ضحكت ووكفت اصورهه وهي تأشرلي على بطنهه ..
خليت ايدي على بطنهه وصورتهه بس هي وجف ايدي مبين على بطنهه ...

شبعت صور وانه اخذت راحتي ...
ثاني يوم باشرت دوامي ...
وانه كلش ارتاااح من اداوم وهي يمي
حتى هي الكاهه نفسيتهه مرتاحه وماكو هذاك الاستجواب اليشلع الكلب ...

يومين وخابرت امي تريدني ارجعهه لان فضه تعبانه من الحمل هاي اول شهورها وراحت لاهلهه .. والجهال محد يداريهم

اخذتهه رجعتهه للبيت ورجعت لدوامي
اسبوع وريري انطتني خبر ...
عرفت منو الي مصاحبهه عادل ...

طلعت هاي اخت ام سيف الصغيره
بعدهه عمرهه هسه يلا ١٩ سنه

ريري مخليه رقمهه بالفيس ومحصله حسابهه
وضاله تراسلهه من حساب ثاني وتعرفت عليهه واخذت هواي معلومات منهه ...
وصيتهه تضل تسحب منهه حجي حتى نعرف غايتهه شنو ؟

لوكت نزولي شهر السابع ٢٠١٧..
كدرت ارجع عادل للبيت ....

متغير بكل شي .. الولد هناك كلولي صار احسن وهو يرجع ويه حياته يتأقلم
واخذته للبيت .. يسلم ويحجي ويه الكل بس انه ميحاجيني ...

اي شي احاجيه يضل ساكت مايرد عليه ..
وفيت نذري وذبحت لسلامتهم ..

صارت حصه ابويه كلها للتوزيع وحصه عادل للعزيمه ...
عزمنا كل اهلنه ومعارفنه .. ميوزه بالشارع من الطول للطول ..

وكت كعدنه نشرب جاي .. حسنين .يمي
واثنين من ولد عمي واخويه عزيز
واجاني احمد يصيح ..
- وينك عمي ابو سند

كلهه ضلت تسأل ياهو ابو سند؟ 
انه صحتله ..
- تعال تعال

كالي ..
- عمي سيارتك حركهه ابو البيت يريد يطلع سيارته
جان حركتهه انه بس سيارتك عمي تكرك خاف تنضرب وشيخلصني

ضحكت ورحت وياه حركنه السياره ورجعت
كعدت يمهم وحسنين كال ..
- ابو سند ؟؟ ولد جايك يعني !

ضحكت وكلتله ..
-اي ان شاء الله

دار وجهه ورافع حواجبه ورجع شاورني
- شكو فرحان و شايلهه لمرتك شيل من كاعهه !! على كسران الوجه مكيف وشاك وجهك بالضحكه !

كبل خزرته وضليت عاصر ايدي وهو رجع شاورني ...
- حرفت نسل الساده وخليته من بطن الشوارع والملاهي يطلع راسه
خلي ابوك يشد رايته بسوايتك

كبل ضربته بوكس على حلكه والولد كلهه كامت وانه ضلت عيني بعينه خزرته وردت اضربه النوب بس عزيز جرني وضل يذكرني العالم ملتمه وهو اكبر مني وعيب السويته ....

عفتهم وشغلت سيارتي وطلعت بعد مارجعت للبيت ...
تخابرني ريري ماجاوبهه .. يخابرني عزيز
هم ماجاوبه ...

ضليت وحدي كاعد بالسياره وحجايته تدك براسي ...
' نسل الساده من بطن الشوارع والملاهي '
.
.
يتبع💕