رواية ماء مغلي الفصل السادس والستون 66 - بقلم Zoka 🌷

📌تمنع الردود في التعليقات 📌
.........

..♣️🩸 ماء مغلي 🩸♣️..
* adzzon *

حيدار ضحك وكال ...
- انته شنو سالفتك ؟ انتمائك وافكارك ماتشبهك ؟ ليش انته ضدين لنفسك !

عمي هم ضحك ورجع ايده وره راسه
وكال ...
- الدنيا ماترحم احد
لازم كل واحد عنده درع يلبسه بالعيشه وينزعه ويه اهله ونفسه

- يعني هسه انته بالضبط شنو ! انه حتى شغلك مافهمه !!

- اني جنت لحد ٢٠٠٥ شخص ومن وراهه صرت شخص ثاني
الشارع مايرحم
هواي سوالف تجبرك تتغير تجبرررك تصير مو زين حتى لو كل زينيه الدنيا بيك
مدامك ابن شارع انتهى بعد مقسوم عليك التغيير

- انه الاعرفه الشارع يغير البنات بس الولد احرار

- لاااا وين اكو هيج منطق !
ابن الشارع ولد ولا بنيه مطيوح حظه
هسه انته هد طير. وطيره مكسرين جناح بغابه وشوف اكو واحد يضل منهم ؟ لو اثنينهم يضل منهم بس الريش !!

- فهمتك بس شغلك مافهمته ! تحجي عليه لو شي خاص عندك ؟

- شغلي اشكال اشتغلت
هم بي مظهر وبي مضمون
اكو عندي فلوس توصلني واشغلهه بعدة اشغال
السيارات والوكالات وغيرها وغيرها

- يعني تابع شغلك لناس تصدرلك فلوس وانته تخليهه قانونيه غير هيج؟

- يعني تقريباً هيج

- شلون وصلت هيج مرحله ! 

- علاقات ..الملاهي سوك كلشي تلكى بي
من الوظائف للتجاره للاجرام للمناصب وااااخر شي النسوان

- هاااا اخر شي !!!

- اي اخر همهم النسوان
اني ماكو ركن ملهى ما شايفه واعرف شبي ما بي مو من سنه وسنتين هاي من اول شبابي اني هناك حفظتهههم اكثر من نفسي
.
٨٠٪؜ من الي يكعدون بملهى مايدورون نسوان

- لييش شعجب ؟ جا جيتهم على شنو!

- هاربين .. هذا اليهرب من بيته المشاكل وهذاك التعبان من الشغل والضغوط يريد بس ينسى واكو الي ماعنده مكان يلفيه يكعد هناك يكضي وكت
واكووو الي يجي يتافخر بنفسه وبفلوسه
ويدور ونسه هذوله جماعه الانااا كلهم هناك يلتمون
والي يبقى هذوله الي يدورون نسوان
قليلين همه تقريبا عشرين بالميه غايتهم ساعات بليله ..

- انتو عالم عجيب غريب

- لا احنه واقعييين الى ابعد الحدود
انتو العجيبين

-احنه ناس عايشين يومنا شلون ماجان
ماعدنه شي غريب

- لعد الي مكومين بالملاهي جايين من المريخ  ! منين جايين غير من الي منكم وبيكم !
هو مو شي عجيب هو مكان انتووو الضارب مزاجه منكم يجي يتجمع بي
خلص لا اكثر ولا اقل

ضحك حيداار وضل يرفع بشعره واني كلت لعمي ..
- عمو هسه الحل شنو ؟ العراق شلون يصفى ؟.

- مااكو حل بنتي ماكو حل
متكدرين تغيرين عقول ونفسيات كل بشري وتخليها بصراط  مستقيم لهدف واحد
.
ولا اكو حل يقتل الطائفيه لان الرس غلاب
.
مدام الطائفيه موجوده يعني الدمار موجود والحقد موجود والبلد واكف بشغله عناد
.
تذكرين من مره جنت احجيلج على بدايه اقتراح تغيير الهويه لبطاقه الكترونيه

-ايييييي هي تنسي ! 

عمي باوع لحيدار وكال ..
- هاي من رجع شغل الدوائر وغيرو المدراء العامين وتعينو هواي اهل اختصاص ماجستير سوو مجموعه منهم مقترح يبنون حكومه الكترونيه واولها يبدون بتغيير الهويه للبطاقه الالكترونيه
مستندات شكبرها كتبوها ودرسوها
وضلت على حطتها ..
اكو واحد معاون مدير عام ..هذا احنه اشتغلنه عنده رشاوي وسوينا جناسي مزوره بالجمله
شككككد زورنا جناااسي كله ادفع واستلم
.
فهذا حجالنه مره يريد نحاجي واحد خريج دكتوراه ويشتغل بدائره البحوث والمشاريع
حتى يسهل امر ويوقع على المقترح الرافعيه ولد الماجستير لتغيير لنظام الكتروني
.
هذاك الدكتور اخوه يصير صديقي كل خميس احنه نكعد مجموعه ونطك كاس سوه
.
فحاجيته للولد وجبته منا ومنا خليته يخابر اخوه ... سلمت عليه وحجيتله السالفه هيج محتاجيه ...
هو ضحك وكالي
' يمعود المن ؟؟ !! '
ضل يعيدهه ' المن !! متكولي المن ! المن نشتغل ونتعب نفسنا '
كلتله بلد وتطور هذا يفيد الكل وكذا وكذا كالي ' منو اليستاهل ! عوفهم ناس تكتل بناس لحد مايخلصون ونسجلهم بسجلين ينحطن على الرف وابوك الله يرحمه '
..
بهذااا الجواب جاوبني واجيت حجيت لريري كلتلهه شوفي الناس وين وصلت بعار النفوس ويحجون على الكواويد

- استغفر الله
هااااي هيج يرخصون نفوس ! جا مايريد لروحه ولاهله مستقبل زين !
ليش خلوهه شججججم سنه صارلهه الحكومه الالكترونية يلا سوو نصهه هسه !

- هي هيج باشا هي هيييج
بلد مو كله لمصلحتي ومن ربعي مااااشتغل بي واوكف كل شغل زين يصيرله

هسه هذا زين بله كول هو توقيع وما وقعه
بس اسمع هذا الثاني ..
هم مدير عام نصبوه جديد بوحده من الوزارات اني اعرفهه والمدير شايفه
بس خليهه مستوره
ايي .. هذا اول ما استلم  المنصب
بعده البلد هستوه هدأ من امريكا وبدات الطائفيه..
هو اول ما بدأ بشغله سأل
' كم سني وكم شيعي بالوزاره ؟ '
كلوله ' ٤٠٠٠ شيعي و ٣٠٠٠ سني '
كال ' ميصير هيج لازم نسوي موازنه بالحقوق بين السنه والشيعه '
..
راح فتح تعيينات بس للسنه .. هو اله تواصل ويانه .. واحد اكبر مني جان وياي نشتغل سوه وهو يتواصل وياه .. مخابره منطيه خبر فتحو تعيينات واي واحد سني خريج اعدادي او بعده يدرس كليه او خريج ثالث متوسط اي شي بس يعرف يقرا ويكتب خلي يقدم على التعيين حتى لو بعده طالب جامعي يجي يداوم وبعدين يخلص كليه براحته المهم نريد عدد موظفين محتاجيهم
..
وطش الخبر وتعينو بدال الالف ٣٠٠٠ ولد وبنات ونصهم سجلوهم ' حرفي '  وكالو الي يريد يدرس بعدين خلي يدرس وياخذ راتب وسنه على سنه نرفعله درجته بالوظيفه هذوله الي على شهاده الاعدادي البقيه كلمن استلم وظيفه مرتبه
..
تصدك بعدهم ماااكملو سنه بالوظيفه وهمه الي تعينو الشباب نفسهم بالسره ذبو استقاله وطلعو ..
واحد من منطقتنا هو تعين وياهم ويكول تخبلت خفت خاف صاير شي هنا وكلهه شردت .. اسأل يمعودين ليش تستقيلون هاي منو المحصلهه للوظيفه هنا
يكلوله
' متفيد مابيهه فلوس '
رغم همه رواتبهم ماشيه حالهم حال البقيه
بس متصرفلهم بالشهر ٤٠٠لو ٥٠٠ و٦٠٠
ذبو استقاله و حولو للرمادي هناك يكلك
شغل سنه سنتين اطك سياره وكاع وتارس جيبي فلوس يارواتبكم انتو يا وظايف !
..
اخذ هيج حال بلد جان باااول هبة الهوسه والخراب
وهذولااك وينهم الي تعينو بهذيج السنين نفسهم مخضرمين لحد هسه بالوظايف لا حطو غيرهم ولا وياهم
..

- لاا اله الا الله
وهسه ناس نشتلت بالشوارع تصيح وتناشد وشايله ارقى  شهايد ومحد بحالهه
وكبل يدورون على ابو الاعدادي !!
ظليمه والله ظليمه

بس اكلك شغله .. تره السنه مو هيج حاقدين
وطائفين والله بيهم ناس ينحطون دوه للجروح
انه هم عندي جماعه اعرفهم سنه بغداد ومحافظات والله ماااينشبع من كعدتهم
ونفسهم طيبه وكريمين
والله اكو واحد
من رحت اتدرب عسكري كبل مااباشر دوام
هو سني ومسؤول علينه كل ما يوصل يمي
يكلي
' بداعة الاعزاز  احلف '
انه اضحك واكِله
' وعليي ' يكلي ' رحمه لذاك الاب الطيب بعد '
اكِله ' والحسييين ' يضحك ويكِلي ' سلام الله على الحسين '
هاااي شوكت مااشوفه ويشوفني يكلي احلف
واكله والحسين ..
من اسأله يكلي ' هيج من اسمعهه بلسانك ارتاح .. بس الشيعه انتو تحلفون بالحسين حلو بلسانكم وانه اجلب بالشيعي الا يسمعني مو بس انته هاي كل شيعي الزمه اجلبله بعد مافك ياخته الا يحلف '
..
وهو رجال محترم ونفسه طيبه ولا فرق بينا ولا عاملهم احسن مني ورحت ورجعت ماسمعتهم حجو على شيعي ولا عالو وياه
واحنه تدربنا بمنطقه اكثرهم سنه من ديالى
اصلهم وعلييي حجايه مايسمعون الشيعي وكلمن بحاله كاعد كلمن يصلي صلاته براحته ولا هذا ولا ذاك تدخل وحجى على الثاني ورحنا ورجعنا بامان الله

بعد لا هيج تطلعهم كلهم مو خوش
الشعب معليه بس الي يحط رجله بالحكومه هذاك يبدا يتبختر

- اي اكييد اكو منهم الزين
همه عامة سنه وشيعه العراق
عركتهم بس على الصحابه والامام
عدهم لا تكول هذا موزين تبقى صاحبنه وعلى الراس وحتى لو تعاركو اليوم
ثاني يوم اذا يجي هذاك  يسلم عادي ينسوهه
..
بس شنو تبقى اكو مفاضله
وهاي شغله الدنيا كلهه تدري بيهه
واني واحد من الناس سمعت حجايه من شيخ عشيره من الغربيه
حجايته كل مااشوف الانبار شلون صارت وتعمرت والوسط والجنوب منعدم حالهم
اذكره واكول ' كول وفعل يا زلمه '

- وين لاكيته هذا الشيخ ! شوداك لشيوخ الغربيه !!

-  مااا واصل اني هناك هذيج المناطق اختنك بطاريهه
لان همه ناس زينه بس الهم لو هسه تنطي كنز سليمان وتكوله اخذه واشتغل مشاريع بغداد لو اشتغل بالحله العماره ناصريه
ماااااايطلع ويشتغل لو على كص ركبته وحتى لووو صار واشتغل تلكاه يلم شكو واحد من ربعه  ...
الغربي للغربيه روح وعقل وايد لو وين
متخليه هو حيله وماله وجاهه لناسه
..
بديرته يبدع بديرة غيره لا ارى لا اسمع لا اتكلم .. طلع منهم بس المقاولين والخلفات
هذوله عادي اليطلبهم شغل بيوت وكذا يروح يشتغل ماعنده مشكله بس الكبااار لا
شغله ما تنفع اهله وعشيرته مايسويهه
لو تناطح راسك براسه
..
اني هالشغله كولش تغثني منهم واكره بيهم
نفخه الروح الزايده
وسبحان الله ويييين الي بالسانه الانا والعم والخال يصير  بوجهي
وشلون مواقف تصير يا يابه تخليني اريد اجفص كل حجايه بكبر حبايه سبحته
بس اجر خلك ..
.
- هههههه عممي انته مكانك مو هنا وعليي مكانك يمنه بالنجف يكيفون عليك
.
- هههه هناك اضربين لك باشا مو صرنا اهل احنه ومحترم ناسك وديرتك وماجبتلكم طاري
ليش تحجيني وتخلينه نكلبهه كلات هسه
.

- لااا عمي شبيك كول يالله
النجف انه اكلك بكلشي حلوين بس مخربه سمعتهه السحوره
بس همه لا عليهم بالراح ولا بالرجع

- اييييي باشا كل محافظة داخل مناطقها واهلها زينين وينحلف بيهم
بس اني اقصدلك تأثيرهم للغير
مو الكل تنطي بنفسهه لمصلحه غيرها

- اي طبعًا كلمن يريد الزين لنفسه واهله بالاول

- اي بس مو دائمآ كلشي اله
يعني هسه وييين كردستان ووين الجنوب !
وين الغربيه ووين الوسط والجنوب !
الاعمار والترتيب والمشاريع  كلها المن دتروح ! كلها الهم
مو كافي !! بدال ما الشمال حايره تبلط شوارع بمناطق منعزله كل شهر داتفوت بيهه سياره لو سيارتين
اروح اسوي شارع الدولي البادي  من ميناء البصره وانته صاعد هذا شارع شايفه شلون صاير !!! حواااادث كل اسبوع بالملايين ديخسرون اصحاب السيارات
احد يدري بحالهم !!!!
اكو شريف من هالشرفاء العايشين عبالك بحدود تفصلهم من باقي العراق
اكو واحد منهم تبرع لو عرض فكره
اهتمام بالطريق هذا !
جرب واحد منهم يرفع مسانده وتأييد لمناشده اهل الجنوب على تعبهم من العيشه !
..
سيطره الحسينيه شايفهه انته شلون مأساة
كم منااااااشده ومناشده دزو وسجلو تصوير ونشرو ياهل الغيره شوفولنه حل
اكو راس بي غيره من كل العراق طلع وكال هذا شغلته عليه !!!
ليش يعني الا الك يلا تشتغل !!!
لو شغله تابعه للشمال جان بيوم وليله تلكاهه حرير صارت
ولو للغربيه جان البرلمان كله انتفض
والعشاير هناك كلهه طلعت داكه صدورها
وساعات يحلوهه
..
بس هذوله المنسيين خلي يطلعلهم صوت
كلهه تصيح شعلينه .. لا اصلا حتى ميطلعلهم صوت

- صحيح والله ماكو بينهن فرق حتى موارد بالجنوب اكثر من الشمال والغربيه
بس انكس عيشه عايشين

- هو لعد شدااكول اني
حالي وفلوسي وجاهي لاهلي والعابر خط اهلي اله اذن الطرشه
..
حجيتلك على الشيخ ابو حجاية الرنانه
هذاك سمعته حجاهه اول ما صار رئيس الوزارء شيعي
كال
' الحكم ٣٥ سنه النه  ويرجع الحك لاهله
والما رجع بالعين نرجعه بالسن وسن اليلمع من بعيد اشرس من السن حدر الايد '
..

والوضع كدام عينك يشهد
الشيخ يابه كوووول وفعل
..
لمعت ديرته وظلمت ديرتنا
هاي سوالف لا المتظاهر يدري بيهه ولا الحاط وجهه بالفيس يفهمهه
يكولك .. اخذ الكلمه من رجالها ..
ورجال كال وحجايته شهد عليهه كبااار الروس الي ثلثين الكاعدين منهم همه بالدوله
هسه والباقي من اصحاب الخير وياه ضلو
ومن الي كعدهم حتى يسمعهم ويوصلون الحجي للمنا ومنا ..
هاي كلمه انكالت بمجالس وعكل وكباريه
وتتنفذ مااابيهه اي مجال للشك وتنفيذها متباشر من اللحظه
لان همه ' عدهم الكلمه كلمه وماتنزل من حلك صاحبهه الا وعليها عزيمه فرحه التنفيذ '
..
.
- ادري ادري بس شيوخ الغربيه نشامى
وما اذو احد
بينهم شغله مناصب هاي تعودنا عليهه
الكل هيج حتى شيعتنا هم جازو منها يعني !
هم نفس الشي الي ومنصبي وربعي
مابينهم فرق كلمن يريد هو يصير الزين
.
-  لاااا تفرق
هاي حجايه بيهه كل عثرة الشغل كله
المقصد بيهه انته تضل متعثر واني اصير لاحسن حال
حتى اشوفك حكمك شلون تعبان ومو رجال قياده انتو .. ' القياده النه احنه اهلهه  '
وهالحجي ماكو عراقي يكدر ينكره
وجيبلي واحد منهم هسه يواجهني واحجيله هالحجايه بس كوله ' القياده بالعراق من حق منو تصير ؟ ' واسمع الرد شلونه
اذا ما كلك ' احنه اهلهه '  عود تعالو اثنينكم زينو شاربي  اذا طلعت حجايتي غلط

- عمي علكيفك هسه انته اعصابك ويانه
جاي نتناقش

- حيدر انته شتعرف ابويه ! شتعرف !
اني صنف صنف بالعراق معاشره
من شايبهم لصغيرهم
لوووو اكبر ابن عشيره ودواوين ومن بعده يحبي اهله مكعديه دواوين ولحد ما شيب
هو من ديوان لديوان هم ما يعرف
نص الي نعرفه احنه ' اهل الملاهي '
ولتسألني ليش
لان هي شغله طبع وميوزه وهاي ماااتفهمها الا تصير مثلنه ويتفرمت عقلك بعقل جديد
يلا تجي تكول اني فاهم الناس وعارف الدنيا شبيهه ما بيهه

- بروووح كل غالي عندك ما تحجيلي انته شلون تشوف هيج شخصيات ويكتولك الاول والتالي !!
شتسويلهم ويأمنون ويحجون كلشي !!

- اني حراام كلشي مااسوي
كاعد حالي من حالهم بس عقلي يشتغل
وعيني تعرف وين تباوع واذني تعرف  تسمع
هذااا كل شغلي هناك
..
تره السمع موهبه والشوف مو بس فتحه عين
مو كل من سمع صوت معناهه سمع
انته هسه من اني احجيلك يجوز مركز وياي على شكم حجايه من تختلف نبره صوتي وتعلى بس بالباقي انته تسمع ومتركز
يعني اذنك تشتغل بس متسمع كل الحجي
الي بي نبره واشارة ايد هاي تسمعهه
والي عداهه لا انته متدري بيهه شنو
..
هو مو غلط منك بس ذبة الانسان العادي هيج
حتى الشوف بالعين عدكم بس عندي
الشوف مرتبط بالسمع
اذا تعمى عيني ماااهتم بس اذا انطرشت
اموت
اني عندي العين زيادة خير بس الخير الاولي لاذني

- والله صحيح هاي سالفه السمع
صدك موهبه

- اي اني جبتهه بتعب ..
رايح لاربيل انته ؟

-اي رايح

- حاضر حفلات او عزايم هناك؟

-لا

- لعد اسمع هناك شيصير ..
اكو كل سنه اوقات محدده باربيل تصير بيهه حفلات Vip عدا ايام الاعياد هاي هيج مابيهه بس الفارغين
بس اكو حفلات تصير على شرف حضور
فلان وفلان من عشيرة الفلانيه
هاي الحفله مثلا الجماعه همه نزلو اليوم باربيل
وره ساعه من نزولهم يندك تلفون دعوى
لحضور حفله بكذا وقت على شرف فلان وفلان ..
اليوم الاول الهم باربيل ياخذون راحتهم
ثاني يوم او ثالث يوم ويه العشى الحفله
صارت
طبعاً دك وركص وافخر المشروب
والبنات مواصفات ينطلبن على نمط الضيف
واعداااد المدعويين قليله بس متنوعه

-يعني شنو متنوعه !

-يعني كل واحد من مكان
الكردي والسني والشيعي  واللبناني وكل مجموعه تجي لازم ثكيله يعني ما يحضر الحفله واحد
جامعله  فلسين من العماله وجاي يتونس
لو هستوه مستلم راتب وجاي سياحه
ماكووو هذوله يم الباب ميخلوهم يوصلون

الحفله اول ساعه كلهه عينهه وبالهه على البنات والمطرب ونوع الكاس
ثاني ساعه واحد من الولد المدعويين
يكوم يطلب إذن من الكاعدين حتى يسوون ميز واحد ويجتمعون كلهم سوه وتبدا لمه التعارف
وشرط الي يكوم يدعو لهاي اللمه هو يتبرع على حسابه مشروب الكاعدين كلهم هسه باللمه ..

العاملين بالمكان حافظين هاي السوالف
ويجون يطرحون كدامنا خيارين
' تريدون تكملون السهره هنا ونصي صوت الموسيقى الكم وتاخذون راحتكم بالحجي
لو يعجبكم تحولون بره عدنا حديقه خاصه وبوفيه عشى درجه اولى اذا يعجبكم تعشو سوه '

خلي نسميه ' ضيف الشرف ' بس همه مجموعه يعني اقل شي اقل شي خمسه
مرات يعبرون العشره همه ضيوف شرف
واحنه مدوعيين على شرف حضورهم لاربيل
..
هذوله راح كبل يكولون نحول بره والعشى على حسابنا ..
ونطلع بره ولد وبنات ..
يطبكون ميوزه سوه يصير ميز واحد طويل
ومرتب ..
احنه بين ما يحضرون الميز والكعده
تلكانه واكفين نكمل الكاس الي على حساب هذاك الاولي الي اقترح نلتم ..
والحجي على جمال البنات والعطور شلون طيبه وراقيه و وين نازلين بيا فندق وهالسوالف التعبانه يطكطكوها لحد ماتترتب الكعده ونكعد واحنه ماخذين عشانه من البوفيه
وهنا يصير الشغل ...

كم واحد يبدا يفتح مواضيع على استثمار الاراضي ويطرح فكره مشروع هي جذبه
بس مثل طعم تصير حتى هذولاك ينفتحلهم باب الحجي ..
راح يبدا الجبير بينهم الي هو مثلاً جبير المجموعه احنه نسميه جبير قياساً بفلوسه
مو بعمره ..
يعني ممكن المجموعه عباره عن شباب اكبر واحد بيهم عمره مايتجاوز ٣٢ سنه
بس همه جايين من بير مال فلوس
ومرات المواضيع تتغير حسب الاعمار والمعلومات على اهتماماتهم

- مااااشاء الله اقوى من استخباراتنه انتو

- همه استخباراتكم مناا وبينا
شدتحجي باشا !
خليني اكملك سالفتنه دتشوف الناس واصنافها

- اي عليك عليي كمل انه حييل كاتلني الفضول والعجب عليكم

- ههه
اسمع .. هسه اني صنفتلك شلون جريناهم
للكعده وفتحنالهم الباب للحجي ..
وهمه مثل شربة المي هيج سهلين يصيرون
لان نااااس تحب المفاخره بروحها
تريد بس تذيع صيتها
والكاعدين مو ناس عاديه ولااا طائفه وحده
ومرات حتى لبنانين يكعدون  ويانه
يعني مثلًا يكعدلك
' مدير فندق باربيل ينطح نطح بفلوسه
وتاجر الكترونيات 
وصاحب سلسله استوديوهات
و صاحبه مراكز تجميل ويه كادرها من الولد الي همه لبنانين اكثرهم والباقين منهم اكراد
وتاجر كهربائيات و اعلاميه
ودائماً اختمها اني تاجر السيارات
محجوز مكاني بالدعوى مايتغير اني الوحيد من تجار السيارات احضر الحفله '
..
لازم كل شخص حسب شغله ما يجي وياه منافس .. اذا يريدون يدعون بغير دعوتنا عادي بس بنفس كعدتنا لازم كل واحد وخصوصيته
حتى الحجي يصير مرتب

- روووح عمي وين اليجدحون ملتمين
عمي انتو ياهو اليدري  بيكم شلون عايشين !

بس كلي شغله .. انتو هذوله كلكم شتستفادون هنا !!!؟
يعني لا ناقصكم فلوس ولا ناقصكم صيت
شعدكم بعد هيج متعبين روحكم ؟؟

- هو شلون لعد يدوم الصيت ! بهاي الكعدات
وشلون يزيد ربح الشغل هو هيج كعده
تسوى ست شهور بمكان شغلك
شوف هسه اني انطيتك كم صنف من المدعويين بس ضيوف الشرف تعرف منو ؟

- منو ؟ غير بالدوله ! ماكو غيرهم
بعد انتو شبقيتو

- لااااا غلطان
اني ابو دوله اجي اتعرف عليه ! ليش هو مامعروف شنو اصله وفصله ! 
لو محتاجنه ؟؟

ضيوف الشرف همه شيوخ عشاير
اووو ولد شيوخ العشاير
من جنوب وشمال وغرب  يا مجموعه منهم تجي تصير عليهه العين هاي كعدتنا وياهم

- اااانه اخوووك !!!

- اي محد يحب المفاخره بنفسه والنفخه غير العشاير
لو مشغل سمعك وياي زين جان لكطتهه

هذوله اني اقصدلك بيهم الكبار الي تلكاهم ما يعرفون يحجون بالمليون كله شدات ومليارات

اكو عشاير خزينة دوله  ورثها وصدكني لو الحكومه تفلس وتجي تعليهم تكللهم يابه داينونه فد عشر مليارات  ندفع بيهن راتب نسويلنه بيهن شارع جان شالوهن وحطوهن
بحضنهم بس بين ما ياكلون ويغسلون يلكون الفلوس حاضره
هيج قابليه عشاير عدنه بالعراق

انته هسه يجوز تصفن تتفاجىء بغناهم
بس همه اذا تعاشرهم راح تشوفهم ما يدرون اكو طبقه من الناس اقصى ما تملكه
سلفه ام الخمس ملايين
صدك لو يسمعون بهيج واحد يفتحون حلكهم
ويكلولك ' تدور سلفه !!! '
لو ' عايش بس على الراتب ! '
وحق الخلقك وخلقني ... نااسين تعرف شنو ناسين اكو ناس بعدهه تعيش بالراتب
ابو ٥٠٠الف لو حتى ابو المليون او المليونين
هيج يعتبروهم مثل مرتزقه كدامهم

-  حكهم عمممي جاا اذا يحجي بالمليار
وابو الملياار رايح متعنيله يتعرف عليه
جا ليش ما يتعجب من عدنا !!
اصلا مو زين من عنده يشتم الهوا الي نشتمه
لو بيده اوكسجين خاص يصنع لنفسه
على هذا حجيك

- اي فعلاً لو يكدرون يسووهه
شايف هذوله من يكعدون شيسولفون !!

بس اسمع راح احجيلك على سبعه شباب
شلون عيشتهم وبعدين افهمك شنستفاد منهم

هذوله حضرنا حفلتهم جانو سبع شباب بعدهم اعمارهم بالعشرينات ..
ولد عشاير وشباب وكاعدين ويه تجار واعلاميين واصحاب مال
شتتوقعهم بعد يضمون سالفه !

- لاااا طبعا

- اي .. من فتحولهم مجال الحجي
صار ابن الشيخ الجبير يزامط بعشيرته
احنه هيج جدنا واحنه هيج عمنا وخالنه مسوي هاي الشغله وعمنا مسوي هذاك الجسر وابن عمنا بفلان منصب
هااااي كولهه يحجيها الابن الجبير
بعدين ولد عمه يحجون على ابهاتهم
شعدهم وما عدهم 
واخر شي صاحبهم يحجي على نفسه ودراسته ومخططات مستقبله
وياخذ وينطي بالحجي ويه التجار ديكتسب منهم معلومات تفيده لنجاحه بعدين
..
هذوله عدهم ..
ثروه اراضي تتقدر ب ٤٨٠ مليار
اجدادهم واحد بعد واحد جامعيهه لهاي الاراضي بمنطقه وحده والمنطقه طبعاً
بيهه نوع من السياحه  والتضاريس العجيبه بس ما مستثمره من الدوله .. قيمة هاي الاراضي عند الدوله اذا تريد تشتريها منهم لازم تدفع كم مليار يلا تحصلهه من قوة موقعها ..  المهم ...
جدهم قبل ميموت موزع الحصص لولده
ومخلي الشيخ ..
كل واحد مستلم حصته من الاراضي الي قيمتها عرفتها شكبرها و وياهن العمارات
والمعامل الي بنفس محافظتهم وبغير محافظات والفلوس الي بالبنك كلهااااا تقسمت
والحصه الاكبر ضلت للشيخ
..
الولد ابن الشيخ يكول اني عندي فِله بسليمانيه بيهه مزرعه وعندي بيها خيل باسمي واسم اخواني كلهم كل واحد عنده خيل خاص بي
وعدنه خياله مختصين عايشين بالفِله حتى يدارون خيلنه .. وعندي بيها مسبح و مطعم خاص ماعدنه مطبخ .. اكو مطعم خاص للمشاوي .. الطباخ هناك يحضرلنه بس مشاوي ومكااان الكعده يصير على البره يعني على الهوا والزرع .. وهناك يعزم اصدقائه
ما يكعدون بفندق ..
ويكول عندي فِله باربيل عارضها إيجار
وحالياً احنه كاعدين بيت ابن عمنا نخلص حفله اليوم وباجر نطلع لسليمانيه نرتاح بالفِله ..
هذا ابن الشيخ الي بس اله من ابوه بالشمال هيج
ويكول عندي بغداد عمارتين اثنينهن مجمع طبي  .. عيادات و مختبرات بيهن ..
وعنده بالبصره مجمعات ملابس نسائيه
وكل بضاعته خليجي وتركي ..
.

اما ولد عمه فعدهم بيوت باربيل كل واحد عنده بيت شوكت مايعجبه يطك سيارته ويجي يتونس ويرجع ..
وعدهم محلات بالمولات خاصه بالفضه
والمكياج
هاي بس باربيل
اما بالبصره هم عدهم مجمعات ملابس
بس كل واحد. بمنطقه شكل ..هاي بس للولد من عدا ثروه اهلهم الي بمناطقهم  والسيارات هاي هيج حصه ابناء الشيوخ الي ورثو من ابوهم
..
وعدهم ابهاتهم كلهم اصحاب اسهم بشركات
رنانه وبنفس الوكت همه شيوخ عشاير
وصاحبين سلاح وقوه وعدهم كراج سيارات خاص لفزعه عشيرتهم

هذوله يلتمون كل فتره ابن الشيخ وولد عمه
وصاحبهم واحد لو ثنين وياهم ويجون لاربيل
يدللون نفسهم .. سهر شرب بناات و مزامط بالعشيره والفلوس

يعني واحدهم من يكيت يغطي رجل الرقاصات بالفلوس ...
و يمشي ويصرف .. بس شوفوني عندي فلوس تغطي راسكم ..

الحجي هذا كوله احنه نسمع ونسحب حجي
همه بس يعبرون عشر دقايق من حجيهم بنفسهم بعد مااااا يسكتون حتى على شكد يصرفون بانزين للسياره هم يحجوهه
يحبوووون يمدحون بنفسهم وخيرهم
لااازم يخلوك تحس انته لا شيء كدامهم
حتى يرتاحون ويكملون كعده وياك
مال يضلون كاعدين وبحسبة انته تاجر
وترفع خشمك عليه ! هاااي متصير لو يعرف يخلق لنفسه ثروه من الخيال هم ما يضل ساكت وكاعد كدامك .. لااازم يعرض بطولاته وفلوسه

هذا عالم  الاغنياء هيج عدهم يصرفون نص فلوسهم حتى يحافظون على مستواهم الاعلى بين المجاميع الاغنياء نفسهم

- عمممي هذوله بشر !! جا ربي ما خلالي جد يورثني عماره وحده ماريد لا كاع ولا مادري شجم مليار بس عماره اشد بيهه حيلي
جا بس جدادهم بيهم زود وخير ! جا واحنه شبيهم جدادنا لاحسين عقولهم !!!

- هههههه حظ ابن الخايبه هذا
شتسوي بعد

- كمل عليك عليي  هذوله شلون يفيدوك !!!

- هذوله يريدون يصيرون براسك همه الاحسن
يعني يكولك انته تاجر الكترونيات !
اريدك لجماعتي بغداد او لجماعتي بالانبار
او بالموصل اريدك فلان وفلان وفلان محل
تحول كوله عليهم بعد تنطيهم كلشي درجه اولى
التاجر يكوله ' هاهيه لعيون الشيوخ بلاش الكم '
هذاك يكوله 'لاااااا احنه كلششي بالحك
وجماعتنه يدفعون الفلس وفوكه زياده شكر اذا الجوده بالمضبوط مثل اليطلبوه '
التاجر يكوله ' سجل رقمي '
وربحنا القضيه ..

هيج مداوله شغل ... يعني مثلا هذا التاجر
معاميله بس وسط وجنوب اذا كعد ويه ابن الغربيه راح ينفتحله باب رزق يوصله
للقمه ..
واذا كعدله ويه كردي بعد هاي لكطه ولكطها

يعني مثلا عندك الاعلاميه ..
كعدتها تصير مقاااابل ابن الشيخ
عين بعين وبعد سوالف نسوان وتكسب نظرته
الهه ..
اخذتلهه من يكومون كم صوره وياه
وكلتله اني كلش حبيت عشيرتكم وصارلي فضول اتعرف على الاهل وازور المنطقه
وهو يبدي يكوللها ... المنطقه والبيت كله
كدامج حياج بكل وكت ..
وهي هنا تبدي تحجيله مشكلتها الي تريدلهه حل منه ...
مثلاً.. ' لو عدهه مشكله ويه واحد همه يكدرون يأثرون عليه ' .. ' لو تريد رأس مال تفتح بي ماركه لاسمهه  وتريد تاخذ رأيه شلون تحصل على رأس المال وتكدر تعوضه بطريقه اقتصاديه ؟ ' .. ' لوووو تريد تسافر وتريد رجال شهم و بعيد عن الاعلامين الي وياهه حتى تحس نفسها بامان وسفره خصوصيه تصير الها محد يدخل بيها وبشغلها  وتطلبه يسافر وياهه عشر ايام ويرجعون '
.. وهو عاد يشوف المكان مو مناسب بعد للحجي والوكت تاخر وهوسه صارت كلهه كامت تريد تطلع ... فاما يعزمها على بيته او فلته باجر او يكوللها مبيتج اليوم يمنا بضيافتنه
ونكمل حجي بالطريق
وبعد هي ومزاجهه ..
بيهه حيل هسه باجر تبقى يمهه ..

اني طكيتهه بضحكه وهمه باوعولي
ضحكت بصوت اعلى بعد وكلتلهم ..
- ليل ابن الشيخ محمر   ونهاره مصفر البنك

عمي ضحك وحيدار يتصفن بوجوهنه
وبعدين كال ..

- هاي صدك يعني !!! انتو ويانه بالعراق !

عمي كال ..
- بشمااال العراق باشا العراق شي وشماله شي ثاني

لتستغرب هذوله العاديين حجيتلك على ولد بس هيج على جماعتهم الشباب مثلهم كادرين
بس اذا كعدو وياك الشيوخ نفسهم هنا الحجي يصير على كولتهم مربع
..
لا تضل مفاخره مزامط واشعار
ولا ارقام فلوس خيااااليه ما تنذكر
ولاا دواهي سياسيه ما كلها تتفرغ على الميز
..
احنه شغلتنه نفرغ عقول ونشتري جيوب على الميوزه

فلااا تتوقع اكو واحد يكدر يفهم الناس ويلعبها صح مثلنه
احنه معاشرين الذيب وماخذين اللكمه من الثعلب

شايف هذا مدير الفندق شيقدم من عروض بس الهم حتى ياخذ منهم كلمه
ان جماعتهم هاي العشيره بعد فندقهم الوحيد هو هذا
واذا مثلاً محتاج شغله تدخل بالحكومه
همه يتوسطون اله
او حتتتتى الكهرباء مال الفندق يستغلهم بتخفيضها
وتخيل انته بعد شنو من راس راسه اليكدر يمشي شيخ من غير محافظه ويخفضله الكهرباء !!!

- عليييك علي ! شلون يخفضهااا !!!

- هو يسوي نفسه على اساس مولداته عطلانه
ومتفق ويه الدوله على كذا مبلغ بين ما يصلح مولداته وعلى اساس صار اشكال بدائرة الكهرباء لو القوه ضعيفه  لو يحتاج اكثر من الخصصو اله
فهذا ينحرج وياه اذا ميكدر يتدخل باهل الكهرباء  وكدامنه يصير الحجي
فشيسوي ... يكوله مولداتك عليه
شكد تحتاج تصليحهن اعينك بيهن ...
هذا يلوفهه منا يوديهه منا وياخذ الفليسات
ويشتري بس مولده وحده احتياط وعلى اساس الفلوس صلح بيهن هذنيج وهو جذب
نصهن حطهن بالجيب وعوض اجور الكهرباء مال شهر كله واكثر   ..
المدير بالمقابل ..
ينطي للشيخ .. اقامه ومساج وكادر لبناني للعنايه بالشيخ ولبس كله درجه اولى وعطور وارقى الاكل والحلويات  وبنات كلهن شابات ولبنانيات .. بحيث يطلعه من الفندق عريس
ويضل كل فتره يدزله دعوه ديحسسه هو فد شي عنده موقر ويريده بس يجي يمه هو والاهل ..

- ااانه اخوووك شيوخنا فوووك بالغيييم عايشين

- شتعرفون انتو على الشيوخ ! متكولي شتعرفون !!!
اكو شيخ جبير متزوج اربع نسوان
وعنده فيلق ولد وبنات واحفاد
وعنده فلوس لو ولده واحفاده كلهم ياكلوهه لفلوسه هم ماتخلص
هذا اني بعتله خمس سيارات بوكتها نوع
تيوتا البيك اب .. و شاحنات سكانيا اثنين
هنه والعربانه ..
هاي باول لقاء النه اتفقنا على هيج عموله
..

وره فتره خابرني يريد يبدل سيارته
وديسأل شنازل جديد
اني بوكتهه جنت بايران ..خابرت جماعتي و
دزيتله اربع سيارات من المعارض كلها بعدهه لووك .. النايلون بعده بالدوشمه مالتها ما مفتوح
.. دزيتله الولد اخذوهن اله شافهن وهنه كلهن
جكساره ورنج  بس كل وحده موديل
ولون ..
هو اختار وحده وكال ' عيب نرجع البقيه
والطريق طويل  الولد متعنين النه .. اريدهن كلهن لولدنا '
واشتروهن اربعتهن ...
اله و لولده اثنين والرابعه صارت لصاحبهم
وكتها اني خفضتلهم من السعر
' شده  ونص '
..
وره سنه خابرني ابنه و راد خمس شاحنات سكانيا يعني ' تريلات '  و ٣ جارجر
و ٣ سنتافيا  ..
..
دزيتهن الهم ورجعولي ويه السعر ' الشده ونص الخفضتها الهم قبل سنه '
..
وره اسبوع اني دزيت الولد اخذولهم
تايرات للتريلات بقيمة خمس ملايين
شايف شكد فرحو بيهن لان ذكرتهم هيج فجأه
وشغلات التريلات ثكيله اسعارهه كيفو بيهن

هذاا الشغل باشا .. هيج احنه من نسلم ايد بايد على واحد بعد تسجل بدفتر الحسابات
احنه وهو اثنينا نسجل رقم جديد بدفاترنا

- يااااا بوووووويه ياااابووويه
وعلييي الحجي ضاع مني انتو ويييين
والدنيا وين.
بس كِلي هذا شيخ ومال الله كله بايده
يعني يشتري منكم من غيركم متفرق عنده
ليش يرجعلكم كل سنه لان خفضتله لو اسلوبك لو شنو ؟ لبة الموضوع وين؟؟؟؟

عمي ضحك وكال ..
- الزم الشيخ من خناكه بعد لو سبع سنين يرجع يدك تلفون عليك
..
الشيخ هذا روحه وعقله بالبنات الشابات
الرشيقات حصرًا
هو جبير متزوج اربع نسوان وعنده احفاد
واحفاده صاعدين سيارات
بس اذا مو كل شهر يحصله كم يوم راحه ويه بنيه شابه بعمر حفيداته ما يرتاح
وهااا هو يعوف محافظته والعشيره كلهه
ويطلع لبغداد لو لاربيل يطلبهن خصوصي
ياخذهن اسبوع يشبع بيهن ويرجع لعشيرته

- هنااااا الحجييييي بالنسواااان
يعني انته دزيتله بنات ؟

- اي طبعاً كل فتره اذا لكطتلي صاكه
ورشيقه ادك عليه واكوله محضرلك هديه
هو يضحك ويكول حياهم وانته تصرف
يعني اني ادبرله المكان والموعد.

هيج الشيوخ .. شبعهم واستفاد
لو تشوفهم بمجالسهم شلونهم ياايابه
تكول بس هالناس وبس
وخلي تلاكيهم بسهره ..
المطرب شايف هذا المطرب شكد مهيلك يصير .. هم اثكل واعقل منهم

- عممممي كله غش بغشش
ما ضل صدك بعد
الناس كلهه شكلين

- ايي هي المبادئ من تغيرت بعد انتهى الانسان ..

هسه اني من وكت السقوط سمعت من واحد لواحد على فتوى لازم نقاتل المحتل وهذا جهاد
دفاع عن النفس والحرمات
ورحنا فدائيين مبدئنا نقاتل عدو اجنبي محتل
..
اساسنا جان مبدأ قتال ضد اجنبي
احنه اول مجموعه تجندت .. بعدين
من استولت امريكا على كل شي
احنه بقينا بس نحامي على الي نشوف راح ياذوهم لان امكانيتنا مو مثلهم بالعده والكثره
..
وره فتره صارت بيهه صك وحط بالبطه
واذبح وكسر راس بالبلوكه
هنااا احنه البقينا عايشين من اول مجموعه
ما رضينا عليهم .. تعاركنا وصارت مشاكل شكبرهه وكلمن يصيح ثار ابن عمي وثار اخوي وثار ابوي لان تكتلو بالانفجارات
ومنهم تذبحو ببيوتهم فصارت شغله ثار
تحت غطاء جيش المهدي
..
من صارت هيج بعد تغير المبدأ الاولي
وخربت القضيه .. انسحبنا منهم
لان احنه مبدأنا نرفع سلاح ضد اجنبي
بس سلاحي ماارفعه ضد عراقي
اني طالع ادافع لاخويه العراقي مااكتله
..
الجماعه طلابين ثار ما عجبهم هذا المبدأ
وضلو مصرين على نهجهم واحنه على نهجنا انسحبنا
..
ضلينه احنه الي قاتلنه اجنبي وهمه قاتلو عراقي وهذا الفرق بينا ضل لهذا اليوم
احنه عمرنا وهمه هدمو ..
فالمبدأ من يتغير بالانسان بعد شيسوى وجوده ؟

- اي والله عاش حلكك هي خربت من صارت بيهه ثارات وعشاير

- ايي فجبناها على الحلول والمشاكل بالعراق
هاي وحده منها العشاير والانحياز *

اما عندك المظاهرات بصوره عامه هي لعبه
الي بي خير يسحب نفسه منها

- لا مو لعبه شباب جاي تتكتل ويروح دمها لغايه واضحه وحره بعيده عن الاحزاب
والسياسه
ثوره تغيير هاي مو لعبه من احد

- لااا باشا هذا حجي اعلام
المظاهرات لعبه صارت

الإعلام يصورلك الشارع والقضيه حسب غاية الداعم للقناة مو حسب حقيقة الامر

- بس القناه تنقل الحدث مباشر وكلهه حاضره وتشوفه ما فبركو الاحداث كلشي جاي نشوفه بالعين  .. يعني نجذب عيونا !!!

عمي كال لحيدار ...
- عندك جكاير ..اني مخلص باكيتي

حيدار اخذ الباكيت والجداحه وانطاهن اله
اخذ عمي الجكاره وصار يدخن ويحجي ...

- انته ياقناه تابع بالتلفزيون تاخذ باخبارهه اول باول ؟

- الشرقية ودجله وهنا بغداد

- تعرفهن المن تابعات ؟؟

- قصدك تمويل ؟

-اي تمويلهن منين !

- دجله من محمد الكربولي والشرقيه سعد البزاز وهنا بغداد هي تمويلها من الدوله يمكن مامتاكد عليها اذا تغيرت وملكها صار شخصي

- مو مهمه هنا بغداد هاي بسيطه
اعلامهه مو مؤثر
احجيلي على الشرقيه تعرف المن تابعه
هاي الفلوس كلهه منين تجي ؟ البزاز منين يحصلها ؟

- وارد القناه وبرامج الخيريه هي مساعدات

- زين فرضاً الناس تساعد بالسنه كول
وارد للمساعدات فد خمسه مليار
تعقتد هاي الخمسه مليار تكفي لكل هاي البرامج والكوادر خلال سنه ؟
..
يعني السنه هاي ناس بيهه خير وتبرعت
سنه الجايه شلون ؟ سامعلك واحد يتبرع كل سنه بكذا مليار بس لعيون العراقين الفقره ؟

- مادري والله همه شلون مدبرين حالهم

- شايف المذيع الي يشتغل بالقناه شنو شهابده وشكد يحصل راتب ! وامتيازات !!
تدري الكادر كله كفاءات عالميه
مو حي الله مذيع واعلامي يخلون

- اي صح همه كادر متمكن من كل النواحي
همه قناة قويه

- زين هسه انته صاحب قناة غايتك بس تعرض برامج واخبار واعلانات
تجي تجيب المذيع تكعده بلندن اقامه وراتب وامتيازات وتصرف صرف بالعالي على كل شبر بالقناة حتى تعرض برنامج درامي لو خيري ؟
ليش ما تخفض من هاي المصاريف وتوفر الباقي تساعد بي ناس اكثر اذا عندك برامج خيريه
موصح ؟؟
ليش داينصرف بدون وجع كلب عليهم
والمذيع اخذه استنكيه استنكي
ليش السبب وين ؟؟؟

- غير حتى يحصل على اعلى كفاءات الكوادر وتبقى القناة متميزه

- لاا .. بعالم الاعلام من ادفع فلس اريد احصل منتج ..او اوصل لهدف معين
يعني اعلامياً .. الي يدفع فلوس يريد مونتاج
ومونتاجه يجي على كد فلوسه
..
هسه يعني اريد اعرض برنامج خيري
اكدر استعين بأي اعلامي واخليه يقدمه
هو بس احجي ويه العائله واضحك وانطي الفلوس وعندك كادر يشتغلون للاثاث وغيره وغيره
ماكو داعي اصرف زايد لاعلامي هو نفس النتيجه ينطيني اذا اختاريت واحد عادي
هاي مسأله التوفير والتخصيص ضروريه
ماكو كلهم سواسيه بالاعلام
من ادفع هواي يعني ادفع للكل لاا ماعدهم هيج سياسه .. كلمن ياخذ حد مستوى شغله
..
بس ليش همه يضربون بالعالي بادنى التفاصيل ؟ مع العلم قناة ثانيه تقدم نفس البرنامج بكلفه اقل ..
والعالم الاقتصادي كله يسعى لاحسن عمل باقل كلفه
ليش همه كلفتهم عاليه وماااا مهتمين ؟!!!

عمي اخذ الجكاره الثانيه وباوع لحيدار
الي مركز وياه ينتظر السبب .. كاله ..

- ميهتمون لان مو فلوسهم
هاي فلوس آل سعود
.
- سعوديه تمول الشرقيه قصدك!
.
- اي تمولهم والاعلام يتجه حسب مطالب السعوديه والخليج كله
..
اني كلتلك مشكله العراق ( خليجي /امريكي)
ايران منتهين منها حاقده حرب وماتصيرلهه كل جاره لان حقدهم نفس نوع حقدنا
دم بدم .. انقطع الانسجام بينهم من زمن الحرب وبعد مستحيل يرجع

بس هذوله الخليج وامريكا تأثيرهم اقوى بالف مره من ايران ..
ايران من انكسر اقتصادها انكسرت شوكتها بالعراق
بس هذولاك حاكمين العراق حكم
لابد الابدين ما يخلوه يجر نفس

الاعلام المؤثر والطاغي بالعراق هو اعلام الشرقيه .. يعني خليج وال سعود
يأثرون على المقابل بطريقه مايخلوك تحس
انته بفخ ..
.
مثلاً عندك هسه المظاهرات دتشوف كمية الدعم والاغاني والاحداث المباشره والمسانده والاهتمام الزايد بيهم عند الشرقيه !
يحصلون اخبار المتظاهر بنفسه بعده ما يلحك ينشرهه بالفيس
مو صح ؟
.
- اي صح مواكبين الحدث
.
- اي يعني امكانيه عدهم تواكب الحدث حتى قبل لحظه حصوله هم متواجدين
زين وكت داعش .. شفت نقل واهتمام مثل هذا للحشد ؟
طلعولك برامج تجسدلك معارك الحشد ضد داعش !
اغاني صارتلهم مثل الي صارت هسه
شهرين و٣ على المظاهرات بالخمسين اغنيه
سوولهم وكل وحده مشاهداتها بالملايين
بينما الحشد كم سنه ضلو يقاتلون
دعموهم مثل هذا الدعم والاعلام الزايد ؟
سوولهم اغاني مثل هاي ؟
لااا ما سووهه ..
الي ذكرو الحشد كلهم منشدين صغار بقنوات
الناس حتى ناسيه اسمها ومايدرون هي موجوده بالتلفزيون ..
والتجسيد للمعارك واستشهاد الابطال منهم
هم تصويره مسوي مجموعه شباب من جيبهم الخاص تبرعو ومثلوه ونشرو بقنواتهم باليوتيوب ماتوصل مشاهداتهم للالفين
..
ليش هذوله شنو فرقهم عن هذوله؟
الحشد صنعو تاريخ .. اكبر فتنه وكراهيه
وامكانيه اعلاميه ما تمحيه
بس الجماعه اشتغلو درب التجاهل بطريقه
متخليك تحس باهميه الموضوع بهذاك الوكت
بس هسه اذا تكعد تقارن تشوف الصوره جانت مظلومه ...

يعني قبل جانت الاخبار بوكت داعش
تنزل بهالترتيب ..
عدد القتلى هالكد
وعدد الجرحى هالكد من الجيش والحشد
بعدين يذكرولك عدد قتلى داعش
بعدين الخسائر والدمار الصار بالموقع
بعدين المواقع الي تم سيطره عليها
وبنهاية الجمله يذكرون اسم الحشد بحيث
يبين شي ذكرناه بس المشاهد ما يركز عليه
لييييش ؟؟
لانه تشبع بالاخبار المفجعه تخليه مشدوه
وخايف ومحروكه اعصابه ودمه ومقهور على القتلى والجرحى والدمار بالمحافظات
...
حتى لو اكو حدث انتصار راح ميأثر بالنفس مثل المتوقع اله
لان المقابل تلقى طاقه سلبيه واخبار تسد النفس بالبدايه
بعد حتى لو حدث زين ميأثر بي يمر على سمعه مرور الكرام ويبقى مترسخ بالبال
الاحداث الموزينه والخسائر
..
هاي سياسه اعلاميه مو عبث عدهم نشرة الاخبار
اذا تطرح هذا الكلام على اي مختص نفسي
راح يأكدلك انه ترتيب غلط و يأثر بشعور سلبي على المشاهد
..
يعني يخليك طول اليوم مخنوك وتعبانه اعصابك من الاخبار وبالاخص هذاك وكت حرب والناس مخليه ايدهه على كلوبهه
وهمه ديتلاعبون بالاعصاب والافكار بطريقه تخليك تفكر بس بالموزين تتعبك نفسياً..

- صحيح انه افهم اثر التعب النفسي على الانسان شلونه
يأثر حتى باكله وكعدته ويه اهله

-اي هاي خبره مو عبط نشر الحدث
المؤثرات الصوتيه تلكاهه تشد الانتباه
وطريقه عرض الحدث
كبر الخط  واللون والصور وكاريزما المذيع
بصوته وتعابير وجه كلها دراسه
واسأل اهل الاختصاص الاعلامي والمشتغلين بهذا المجال
شوف هاي الاشياء مو يدرسونهه الهم ويركزون عليهه ! وشكد يدرسوهم على كاريزما الحدث
..

هاي كلهااا حبكه مطلوبه ومدروسه
الهدف منها ماااتبقى انته مرتاح فكرياً
لان بس ترتاح فكرياً تبدا تصير نقطه خطر
لان تبدأ توعى  .. الوعي على حال المخفي بالغرض الاعلامي هو كارثه كبرى للخليج وامريكا
..

اسولفلك هاي السالفه على السجون الامريكيه
طلعوها تقرير بناشيونال جيوكرافيك ..
يكولك جان اكو اثنين من السجون بيهم اسرى من الحرب  العالميه الثانيه ..
صاحب السجن الاول يعذب المساجين
ومتعبهم بالاشغال ومجوعهم ومخلي اثار الضرب طابعه على جلودهم
..
اما صاحب السجن الثاني عايفهم على راحتهم
الاكل والاشغال والنوم كله بطريقه عاديه وانسانيه
..
السجن الاول دائما مشاكل وصوتهم طالع
من التعذيب والاهانه
بس مااااعدهم موتى الا بنسبه قليله
اما السجن الثاني بي نسبه موت للسجناء
اكثر بمرتين من السجن الاول
..
من راحو بحثو عن الاسباب جانو متوقعين
اكو تسمم متعمد الهم
بس النتيجه طلعت سليمه
والسبب بعد التحقيق ويه صاحب السجن
اعترف وكال
' اني ما اخليهم يفكرون الا بالامور المتعبه
مادزلهم من بره السجن اخبار الا الموزينه '
يعني عذبهم وقتلهم نفسياً ..
كلهم ماتو بضغط نفسي
لانهم سجناء اسرى وهو يهول الامور واوضاع البلاد والحروب الهم بره شلون صايره
خلاهم معدومين الراحه العقليه الى ان كثرت وفياتهم وامراضهم الجسميه
وهو كاعد على المستريح لا تعب نفسه بتعذيب ولا دوخ راسه بالمشاكل ..

- لا اله الا الله
حتى من الاعلام ما سلمنه !!!
زين شبيهم همه ليش هيج عداوتهم على شنو !!
هم نفط !! شو شابعين الخليج نفط وفلوس عايزين علينه !

- لااا
آل سعود عداوتهم النه لان احنه بلد مو وهابي مثلهم
عدنه سنه بس مو مثل سنتهم وهابيه داعشيه
السنه بالعراق ميهتمون بنفس اهتمامات ال سعود ويكرهون الشيعه مثلهم
همه بس سنه عاديين على الفطره
هم سمعتلك واحد من سنه بلدنا يمشي ويصيح بكل مكان ' اقتلو الشيعه كفره وجهادو في سبيل الله واقتلو عبده القبور '
ماااكو هذوله مو بالهم هالسوالف
سني ينطي لشيعي يتزوج بنته عادي صارت
يصيرله صاحب شيعي هم عادي
يروح ويزور ويدرس بمدارس شيعيه عادي
بس شنو تبقى مشاكلهم من يفتحون مواضيع
تاريخيه عن تاريخ فلان وفلان هنا كلمت يفزع لجماعته ويتعاركون
يعني منين ما تجيبهه عاااديه بمليار مره كدام سنه السعوديه
..
هذولاك الشيعي عدهم كافر ما تقبل نقطه نقاش
والسني مالتنه عدهم قليل معرفه ودين
لان مو مثل طبعهم
فتشوفهم دزولهم فكر داعشي سلطوه اول شي على المناطق السنيه حتى يكولك يتقبل مني الحجي لان هو مثلي سني راح يأيدني على نهجي يمشي ما يحس برهبه من الموضوع
..
ولا همه الدواعش تره مو صعبه عليهم اذا دخلو للجنوب او بغداد او كردستان بالبدايه
مثل ما هجمو هنا وصارو عيون دود ما يخلصون هناك هم نفس الشي
..
بس رادو دعم وسيطره على الجزء السني حتى يخلخلون وضع البلد وحسب توقعاتهم
الكل ينضم الهم ويبدا نشر الفكر الوهابي
ويقضي على كل شيعي وسني ويبقى الفكر بس وهاابي سعودي
وهااي شغله الف محلل ومحلل حجوهه
وبدراسات للموضوع وادله ..

- يعني هذااا كله لان مو مثلهم وبينا شيعي متعايش  ويه سني براحه !

- اي الوهابيه يعادون شكو شيعي باي بلد
والي مو مثلهم يضلون يزنون براسه ويحومون وراااه الى ان يخلوه يميل الهم
..
هو الي مسوي مسجد باسم يزيد  ومعاويه
وكاتب رضي الله عنهم بعد شتترجى منه!
..
هسه هنا بالعراق اذكر يزيد كدام شيعي او سني وكلهه تلعب نفسهه من اسمه
لان ملعون مجرم عينك عينك التاريخ كله شاهد عليه
بس عدهم لاااااا مبجل
لان هو رس اجدادهم

- الله يلعنهم صدك همه رس الطائفيه من هذاك الوكت لهذا الوكت

- اي هذا اول سبب لعداوتهم هو الفكر الديني العراقي المختلف عن فكرهم *
ثاني سبب والي اخر فتره سوه ضجه وصار الحجي بي خيط وخربط
' اتفاقيه الصين '

- اييييي هالاتفاقيه لعبت لعب بينا
كضوهه هوسه بهوسه ولا واحد فهم شسالفتهه

- احسن منها ماكو
اتفاقيه الصين مو المقصود بيها استعمار
ولا بوكة نفط
همه غايتهم يفتحون ' طريق الحرير '
لان متضررين من امريكا والخليج
بالقوانين الفارضيهه عليهم بالموانىء وعلى الباخرات
.
- طريق الحرير الي هو الصين والهند وايران وعراق وسوريا .. خط عدل واحد بري
.
- ايي هذا شكد راح يسهلها لو انفتح الطريق !
مثلا  الصين تنتج مواد ماتكدر تصدرها كلها بالباخرات لان وزن محدود و وقت  وضوابط
بالموانىء عدها وفلوس تدفع يلا تكدر تعبر بواخرها فمتكدر تزيد عدد وترسل كل المنتوج
هاي شغله مضررين منها .. اكو منتجات تبقى تحتاج طريقين يلا توصل وهذا هدر وقت ..
..
واكو عدهم فائض انتاج  كذا رقم من ماده معينه ويبقى عدهم فائض بنسبه ٢٥٪؜ سنوياً
فائض عن استخدامهم داخل الدوله
هذا هم لو طريق الحرير مفتوح يسهل توصيله النه وربحهم عليه
..
وبنفس الوكت همه على طول الطريق بكل الدول اكو مخططات حتى يشتغلون بنى تحتيه
للدول الي يمرون بيها ..
يسوون سكك حديد تربط من الشرق التوسط كله ..
..
هذا الي عنده عقل يروح يوقعله بايده ورجله
بالاخص بوضع مثل بلدنا ماعنده فائض ميزانيه للاعمار واحنه بلد طالع من حروب على مر السنين متراكمه اثارها على البنى التحتيه مالتنه
فشلون يكدر يعمرها وبنفس الوكت يمشي امور البلد وميخسر شي ؟
..
لازم يستعين بدول الجوار
زين انته عندك الخليج خانكيك من ركبتك
بسالفه الموانىء  ..
متخليك توافق على الاتفاقيه حتى لا تنضرب مصالحها وينزل اقتصادها
وبنفس الوكت هي متريد العراق يصير براسه خير
..
لا تخلي الصين تفلت من ايدها ولا تخلي العراق يتحرر بأمره
رابطتهم اثنينهم على الموانىء ومخليه امريكا بالوجه سداده ..
..
اليحجي ويعارض يكولك امريكا معاديه الصين واذا توكف ويه الصين تاذيك امريكا
وهمه اثنينهم امريكا والخليج لعبوهه لعب
حتى هاي الاتفاقيه تفشل
ويضلون يحفرون من جوه لجوه اذا اي دوله فكرت تحط ايدها بايد العراق
وتندك بمصالح الخليج
..
لان الخليج تدفع لامريكا مليارات الدولارات
والنفط وحاميه قواعدها كلها في سبيل
تضل امريكا محافظه على حدودها ومركزها بين الدول واقتصادها محد يندك بي

فهاي القضيه وما بيها ..
دعمو اعلامياً المظاهرات حتى تأجج المشاعر وتكبر وتستمر الهوسه بالبلد
وينسي موضوع الاتفاقيه لان بس ترتاح عقلياً وتكعد تفكر تشوفها لكطه وفرصه العمر
والخبراء الاقتصاديين بس يصيرلهم مجال ويعرضون دراستهم لهذا الموضوع راح يصير خطر عليهم
فلااازم اكو فد نقطه تخلي الوضع متخلخل الى ان تنسي السالفه وتنسد ..

واذا على تغيير الوزارء والرئاسه وغيرها
فراح يضل الوضع كما هو الى ان يجي
اسم واحد يخلي ايده بايد  امريكا يلا يصعد للحكم برضاة الشعب او غصباً عليه

- يعني بهالحال الشباب جاي تضيع هيج بالخالي بلاش
الوضع مقرر ومحسوم

- هو الوضع هيج مقسم وباقي
من حرب الكويت والى مالانهايه
هو من هذاك الوكت طلبو دعم امريكي الهم
وطلبو دمار عراقي من ايدهم وانتهى بعد
اندفعت الفلوس وتثبتت الخطط وانحسم الامر
اعلامياً دينياً سياسيًا.

عمي راح للمطبخ وحيدار كالي ..
- وانتي شنو رأيج ؟ فكرج للوطن شنو ؟

ضحكت شويه وكلتله..
- اني ماادور وطن
اني من راح ابويه راح مني الوطن

الوطن اهل مو وصلة كاع و وظيفه وكهرباء ومي ..
الي يرحون من ايده اهله بعد لو يسجلون العراق باسمه يضل ' ماعنده وطن '

- لاا ياروحي انه اهلج لا تضلين تحسين نفسج بلايه اهل

- انته حبيب الروح والعمر
بس الاب .. أب
من يوم الراح ابويه واني اصيح
' كانيوار ؟؟  '

- كانيور !

- لا .. كانيواااار يعني ' أين الوطن ؟ ' بالايزيدي

- هااااا وانه اكووول هذا جلبج شمعنى اسمه !
طلعتي مسميته ايزيدي

- اي للسهوله باللفظ صرت اصيحله كانيور
وهم حتى محد يلكطه ويفهمني

-والله انتي وعمج عقل تراثي
ااانه على العجايب الحجاهه بهالساعات راد يوكف عقلي
عاد انتو شلووون جنتو هيج عايشين
مااادري والله
صدك صدددك فطرة الكلب والعقل نعمه
عمي راااحه بااال هاي انتو عايشين مشغلين عقولكم على ٢٤حبه تععععب عمي بالحسين تعب شيحملها  يااابويه

ضحكت وكلتله...
- هذا الحجاه عمي بس المواقف العابره
ديشوفك شكو غنى عند الناس بس هو ماحجالك نفوسهم ومصايبهم شلونها
ولا جابلك طاري اهل الملاهي بينهم شيسوون وشلون يتعاملون ..بنات او ولد
هذني السوالف انته يحتاجلك اسبوع نايم دتريح عقلك منهن

- لااا بالحسين كافي انه مو سهل تطلع الافكار من راسي
كافي لا تخلوني مثل هذولاك المساجين واطك اموت وحدي

-ههههههه لاا اسم الله عليك حبيبي

راح يغسل وبعدين رجع هو وعمي جايبين الي عصير والهم جاي ..
كعدنا نشرب سوه وبعدين حيدار ترخص وصعد ينام وضل عمي سهران ويايه ..

كلتله ..
- جنت اتوقعك ساعه الساعه واح تحجيله على ال ٢٠٠٥ شعجب عبرتها

- ليس كل ما يعرف يقال
تمام بابه !

-ههه تماام

- لاحظت بأذنج دم وانتبهتلج من تمسحيها
بس ماردت اكطع حوارنا حتى رجلج الكيكي يفهم شويه شداير مدايره وميضل بكل شي ينصبها مناحه

-عموووو لا تكول عليه كيكي حيدار مو هيج بس هو حساس وكلبه مو اله

- كيكي لو ما ال ' جا' الي بحلكه
ولا تناقشين
تعالي يمي داشوف اذنج شبيها

- ماااريد

ضجت من حجايته وغطيت راسي وهو اجاني شال الغطى وضل يشوف اذاني
وينظفها بالكلينس .. وفحص خشمي وعيوني
وكالي ...

- حالج معاجبني ليش اذنج تنزف !

- متعودت عليه يعني صار شكد النزيف بحلكي وخشمي

- بس اذنج لا . . لازم نطلع لغير مكان نشوف علاج زين
يمكن الطحال تضخمه زاد وتأخيرنا هم زاد

- مادري كيفكم
اني مابيه حيل افكر انتو شتسوون سوو

راح كعد ولزم تلفونه واني تغطيت ونمت
كعدني حيدار الصبح بوسني وحضني شويه
وطلع لدوامه وكالي ادعيلي دوامي ديصعب عليه ...

دعيتله وبالي يمه لحد مايرجع واكعد اسمع منه كل شي صار وياه يلا اطمئن ...

اسبوع وعمي كال .. حاجز بدكتور بمستشفى باربيل ولازم نروح ...
حيدار ماكدر ياخذ اجازه ...
بقى بالبيت واني وعمي  و ريتا رحنا لاربيل
والممرضه رجعت لاهلهه ..

هناك على الفحوصات صار من الضروري اسوي عمليه واشيل الطحال حتى اعالج
الكبد لان ديبدأ يكون اورام داخل التليف ..

جنت تعبانه الى حد ماتحمل عمليات بعد
وما رضيت اسويها ولا ردت اخذ بعد اي علاج .. طاقتي خلصت ..

بس حيدار اجاني لاربيل وماحجالي بس حجايه وحده خلتني اجيب الحيل من العدم ..
كالي ...

- تريدين اعيش وحيد ! تعوفيني ادك باب الموت وما ينفتحلي !

حجايته فززت كل وجع الوحده بيه
وقبلت اسوي العمليه واكمل العلاج علمود لااا يحس مثل الي جنت احسه ..
حتى مااعوفه ' وحيد '
.
.
يتبع  في البارت الاخير لقائنا  💕