رواية ماء مغلي الفصل الثالث والخمسون 53 - بقلم Zoka 🌷

..♣️🩸 ماء مغلي 🩸♣️..
* adzzon *

ضليت وحدي كاعد بالسياره وحجايته تدك براسي ...
' نسل الساده من بطن الشوارع والملاهي '

انتبهت تلفون يدك ..
المتصل (راحتي &عافيتي)
اتعوذت من الشيطان وجاوبتها..

- ها حبيبي

- شبيك ابويه انته متكولي وين رحت وعفت الصايح والعايط وراك

- طلعت احسن مااضل كاعد واسويلي كارثة

-شصار ! وينك هسه مترجع ؟.

- شويه وارجع احجيلج

-زين اووكي بس تره ابو صماخ راح لبيته
ارجع هسه

-ماشي

سديت الخط وشغلت السياره ورجعت للبيت
ضليت كاعد ويه الاهل والي يحاجيني على سالفه حسنين اسكت ماجاوبه ...

لليل يلا راحو الخطار وكدرت اصعد لغرفتي
وشفت ريري .. واكفه تدهن بطنهه ..

- هاي ليش ادهنيهه ! ماليش هذا !

- دهن مانع تشققات مال حمل

- والله انتي انظف حامل شفتهه
اذكر اختي اول ماحبلت واجتي اسبوعين يمنه
نايمه وشاده راسهه فوك الحجاب وصله
وشادتهه صفح وشاده بطنهه بعلك اخضر
فوك الدشداشه
وعلي جنت اكللها ماخذيج تحوين بالزرع
شبيج محزمه ونايمه !

- هههههههههه خطيييه مو هاي تتعب
وتكره روحهه من لعبان النفس

- چا انتي لعابه ضليتي

- مو اني طبع بيه هذا ماااكدر عومري

بوست ركبتهه وهي ضحكت ..
- تدرين انه اشوفج احلى صرتي بهاي بطنج
حتى صاير احب احضنج اكثر من كبل
ومو تكليلي ماتحب تحضني جنت تقشمر عليه
تره جاي اكلج زايد يعني زااايد الحب

- هههههههههه ايييي اووكي فهمت
لا لتخاف مزاجي زين هسه كولش ريلاكس

- اي ياالله
چا خلي احجي براحتي
صدكي لو بيدي اخليج هيج تضلين بعد جسمج كله هيج .. بطن شحلاتهه تتمشين بيهه
يااابووويه انشده بيج وعلييي
شايفه من تفتحيلي كاميرا واكلج تمشي شويه اشوف بطنج
هااي هنا كبل يطلب عندي الحضن
واللللللللللل ..

ضحكت وعضيت خدهه وهي تضحك
وتتلمس بوجهي ..

كعدت وخليت راسي على رجلهه وابوس بطنهه كل شويه .. واكللها..
- شكد ارتاح يمج ياااربي دخيلك
هيج الراحه تصير بشر
هاي الغرفه وياج تصيرلي جنه ..احسها احلى مكان بالدنيا اكعد بي

- واني اضوج بيهه من انته ماكو
مااحبها بس وياك

- رور شكد تحبيني !

- هههه هااا صعدت عندك الهرمونات
مثلييي

- من الشروووط هاي ولج چا شحجينا !

- ايي صح صح
بس احبك هواي
يعني بس انته احبه بكل الدنيا .. بس انته اهلي
وحبيبي وصديقي المقرب
انته شكد تشوف احبك تره قليل لان بس هالواحد بحياتي انته شكد مانطيك حب احس ويه الايام اكو بعد اكثر لازم اخليك تحس اني احبك اكثر

- وانه احبج بكل روحي

مخلي ايدهه على شفتي وابوسهه وهي كلتلي..
-  تعرف الحامل حساسه كولش
واني احساسي هسه ديكولي بيك شي
حتى محبتك اليوم مختلفه
شبيك احجيلي؟

- ضوجني حسنين حجى حجايه شكت كلبي
سمع احمد يصيحلي ابو سند وهو تخبل
يكلي .. حرفت نسل الساده وخليته من بطن الشوارع والملاهي يطلع راسه ،خلي ابوك يشد رايته بسوايتك ..

ضلت هي ساكته وجرت ايدهه من ايدي
باوعتلهه وهي الدمعه بعينهه .. كلتلي..
- تندمت عليه ؟

- لااا هاي شبيج رور شايفتني شكل واحد متندم !
احبج انه شعليه باليحجي
انتي ام ابني بعد هالحجي عيب ينحجي
وانه ضربته بلحظتهه .. ضربت فجه وسكته

مسحت دمعتهه وكلتلي..
- مبين راح يبدا سرنا ينفضح حيداار

- ما خايف انه واذا هو طلعت منه حجايه علينه اعرف اسكته ماخلي شي ياخذ مني راحتي هاي تعبت يلا حصلتهه

- واذا اهلك عرفو بزواجنه شلون صار ؟
راح يكولون طلكهه
تطلكني ؟

- يا طلاك حبيبي شبيج !
اهلي اذا عرفو نكعد نحجيلهم كلشي
رضو خير على خير ما رضو اخذج ونطلع
من البيت
هو اول وتالي احنه راح نعيش وحدنا بغداد
بعد شكو خايفه !

- اخاف يحرموني منك بسوالف النسل والشرف والساده

-لااااا كافي لترحين زايد
انتي مرتي وبينا ولد بعد ياهو الي يفك حلكه عليج !

كعدت وبوست خدهه وهي تباوع بعيني وتكلي ...
- حيداار ديربالك تنسى تره بس انته بحياتي
اني حبيت الدنيا والناس لان انته وياي

- وعيونج هذا اكثر شي انه احبه بيج
انه كلشي بحياتج .. انه احبج هيج ماعندج احد حتى تضلين بس الي انه احبج والحسين
كل روحي بيج

ضحكت وحضنتني .. كلتلي ..
- لازم اخذ لقاح واخاف ترجعلي الحساسيه

- نروح للعياده ونسألهم نحجيلهم على حساسيتج يلا تلقحين

-اووكي
حيداار حبيبي نام بحضني مثل قبل
ضجت بس تحضني من وره علمود بطني

- چا غير اخاف عليج يالحبيبه

عضت بطرف سنونهه لحيه بحنجي وضحكت ..

وكفت انزع ملابسي واجيت نمت بحضنهه
مثل اول ايام ..
اخلي راسي بركبتهه وايدي جوه جتفها ورجلي بين رجليها ...
وهي تضل كل شويه تبوس براسي وتتلمس
باطراف اصابعهه جتوفي وظهري ...

انه هيج بساع انام وهي مادري بيهه شوكت تنام بس اشوفهه تكعد كبلي ..

اخذتهه اليوم للعياده الشعبيه وسألنه على لقاح
كالو مابي تأثير حساسيه واخذت اللقاح
ورجعنه ...

للعصر انه كاعد بالشارع وهي دزتلي رساله ..
-  تعال داخذ رأيك بشغله ضروررري

طبيت جوه وهي واكفه باب الهول
شافتني وراحت جوه وانه وراهه
كعدنه بغرفه ابويه ...
هي كامشه تلفونهه وتحجيلي...

- هاي صاحبه عادل دنتراسل اني وياهه
و ع اساس صرنا مقربات وكذا
وجنت اشكيلهه .. قسمتي واكفه ومداتزوج
واهلي مو زينين وياي
نسوان اخوتي وكحات ولاعبات بينه لعب
واجيب واشكيلهه

وهي دتنصحني بوحده تكول عليهه توب شغلهه وتفتح القسمه والي بالج تجيبه الج
ايي رجال تريديه وعاجبج مواصفاته
تخلي يصير قسمتج وحدج وتزوجج باقرب وقت بس تريد فلووس وتروحين تنطيهه
صوغه

- صوغه شنو ؟

- هيج يعني هديه الهه شلون احنه نكول رشوه
لازم انطيهه فد صوغه ثكيله حتى تنطيني موعد فد يوم تخصصه بس الي وتكعد تسويلي جلسه تفك قسمتي

- هاااااا والله عمي عليهن حجز !

- ابو البرلمان مو مثلهن يتمضيك
هسه دكولي شردلهه ؟؟
دتريد مني انطيهه خبر اكيد حتى تخابرهه
ونحدد موعد نلتقي اني وياهه ونروحلهه
بس كون محضره الصوغه وياي
لهذاك اليوم

- لا بربج !! هم نرجع لبيوتهن !!!
لااا ريري لا تجازفين هيج بعد

- هسه شنو لااا دخلي نروح نشوف شكو ماكو
منو هاي راس البله الجديد

- رور نسيتي انتي حامل وين ترحين تدوسين مكان نكس يصيرلج شي انتي والولد انه شيفيدني ساعتهه!!!

- يبووو حيداااار موو بالكوه يلا وصلت وياهه لهيج سالفه بعد شيحصلهه هاي !!

- ادري هسه لو ما خايف عليكم جان كلتلج اي ونروح بس بعد اكو الولد يارور لازم تنتبهين عليه مو وين ماجان تمشين

- هسه دخلي نروح حباااب
بس اول مره اشوف منو هاي وين بيت اليشتغلن بي ؟ غير دنشوف حل لسالفه عادل
لعد هاي تضل تحوم عليه وترجع توكعه بيدهه وتجر العائله كلها وياهه

- الوووولد

- شكوو عليه هسه نايم بطني منو اليوصله !!اشكه شك 
ابني اليندك بي احركه بكاعه

- انه خايف عليج لا تدوسين شي
مكان كله شياطين وجن شيوديج عليه !!!

- ديلااا هسه مو سيد وخبصه دسويلي رُقيه شي اشيله وكلشي ميصيرلي
يلا بدال متضيعهه عليه هالفرصه
اكعد فكر بشي تحصين
يلاا مو دتنتظر مني جواب ماريد اطلع جذابه كدامهه وتكوم بعد متجاوبني

- هسه كليلهه اي والله كريم لوكتهه

دزتلهه وانه طلعت وضليت افكر بحل لهالسالفه.. وبالليل رجعت للبيت
كعدت وياهه وسألتهه ..
- شصار بعد شردتلج؟

- كلتلي من هسه راح تنطيهه خبر بس لازم ادبرلهه صوغه ثكيله حتى من نروح تعرفني
عليهه اول مره وبعدين انتظر خبر منها يايوم تتفرغلي واروحلهه مره الثانيه

- زين هاي شتاخذيلهه!!

- مادري بعدني افكر
بس تره كلتلهه لازم هاليومين نلتقي وتاخذني
عليهه لان ع اساس ماعندي بعد مجال اخواني يرجعون وماكدر اطلع
كلت علمود انته موجود وياي

- بس هاي انه شلون اخذج ! كبل تعرفني
وبطنج شلون ؟؟

- يبوو حيداااار انته ضل بعيد ورانه
وبطني شكو عليهه مو لابسه عبايه وهي مو كلش جبيره دتبين

- ريري اخاف تتعبين بالمشي
بصعده السياره ويصير شي للولد

- اهووو هسه قابل لازكينه بتفله وتخاف لايوكع !!

ماعليه شي هاي النسوان مو كلهه حبلت وجابت ..يروحن ويجن ويشتغلن موظفات ومعلمات ودكتورات هسه اني ع الخطوتين
يصير شي لابني !
تره بنص بطني هو كاعد ومستريح ماشايلته على راسي

-ههههههههههههههههههه
وعلييي هرموناتج مابيهه سستم
ضاله اوبين سايت

- هذا الموجود معاجبك !!

-لاااا بويه انعم الله ع الموجود

ضلت رافعه حواجبهه وتباوعلي ..
كرصت خدهه يلا ضحكت ..

جان عندي تصليح بالسياره واطلع من الصبح
مارجع للعصر مااحجي وياهه ولا ويه احد
كبل اكل وانام لليل يلا اكعد .. اشوفهه نايمه
فانزل اكعد بره بالشارع اخابر واحد من جماعتي ونكعد ع الرصيف نكرز حب
ونسولف ...

وبهالمره كاعدين و شفت عادل وحسنين
جايين يتمشون لبيتنا .. غلست عليهم وضليت
اكرز حب وهمه وكفو يمنه سلمو وردينالهم السلام ...

جان يدنك حسنين ويبوسني من راسي
كالي..
- والله يابن العم بمعزية روحي انته
وااانه اتعذر منك حجايتي غثتك وانه ماريد اغثك انته صويحبي واخوي وعايشين بالحلوه والمره سوه
خاطرك عزيز عندي وماريد نتخارب
احنه اهل وانتو خوالنه وعمامنه ماعدنا غيركم

ضليت انه ساكت واباوعله وصاحبي
ترخص وراح ..
عادل كمش ايدي وجرني كومني وضل يضرب على جتفي ويكلي...

- انتو اخوه واهل لا تغلط مثل غلطتي خويه
شستفادينا من الزعل و شيلة الخاطر !
صافو النفوس صافوهه يلا هذااا اخوك الجبير وجاي يريد يراضيك عيب ترده وتخجله
يلا تعوذ الشيطان وباوس ابن عمك يلاخويه

حسنين يضحك وتدنى هو حضني وباسني
وكالي..
-هاااي لخاطرك خويه اانه باجر اخلي الاهل يسوولك ذاك الغدا الزين وانته جيب الاهل
وتعال وعلى راسي كلكم اعزاز عليه

- ان شاء الله

ترخص وراح واحنه طبينه جوه..
صعدت لغرفتي ولكيت ريري كاعده وفاتحه  تلفون ... سدته وكلتلي..
- وين جنت ؟؟

-بالشارع كاعد ويه الولد

تمددت يمهه وحجيتلهه على حسنين كبل كلتلي..
-لا منروح حيداار اجلهه
باجر هاي البنيه مواعدتهه مو وكت عزايم

- شوكت واعدتيهه شو ماكلتي!!

- هو اني حاجيه وياك داكولك !!
بعدين اني مو كلت وصيتهه هاليومين علمود قبل مترجع لدوامك تاخذني  شكو بعد متفاجىء

- هسه يعني مابيها مجال بس باجر !

-انته مو عكبه عندك دوام شنو بعد هالسؤال شفايدته!

- زين زييين اخذج بس وين المكان والوكت

- كلتلي .. كيفج الوكت شوكت تكدرين تطلعين من بيتكم واني كلتلهه ارجعلج خبر وتتحضرين

- وهاي شتاخذيلهه صوغه ؟

- راح انطيهه سوارات اثنين ذهب  صار موديلهن قديم وعندي منهن سته
اشيل اثنين وانطيهه احسن هنه هيج نسوان يكيفن ع الذهب

- ذهبج  هذا ولج شلون تنطي لهالزبايل
مايستاهلون عود شخاط مو سواراتج

- اييي ادري بس انتو تستاهلون
اني احبكم والذهب والفلوس هذني رخاص كدام سلامتكم

صدكني هذا عادل محروك دمي عليه اكول خطيه رجال شحلاته طول وجسم وكلبه طيب
وماتهنى بعيشته من وره هجامات البيوت هذني كل وحده تكعد براسه تطلع خياساهه
خطيه خلي نخلصه من سوسه البله هايه
بلكت ينعدل ويه فضه ويرجع حنين على عائلته يشوف هالجهال شبيهم مابيهم
وهم جايه طفل خلي يتهنى بي ليش يضلع منثول بالسحوره ويضيع عائلته

- اييييي والله صدكتي
عادل من ساعه ماتزوج هذيج الحيه
الله لا يهنيها باخرتها هجمت حياته هجم
وسممت كل اهلنه بسحورته وحقدهه

- صدوووك ذكرتني
تعال اكولك هاي امك ليش مكاطعه بيت طنطول ؟

- من زماااان امي كاطعتهم
سالفه صارلهه سنين شجابج عليهه!

- مو اليوم جنت داسألهه على عائلتهه لطنطول شويه اخذ معلومات منا منا
بس شو هي تكولي كلشي مادري
هالمله لا واصلتها ولا ادري بيهه

- اي هاي من تزوج عادل هذيج المصخمه
امي وامها تعاركن ..
امي مو صاحبه لسان طويل مثل امها
فسكتت وعافتهه بعد ماتلاغت وياهه

- هي المشكله شنوووو !!

- هااا سمعي هاي امي وامها يصيرن بنات عم بس مو اللح .. يعني جدهم يصير ابن عم
جدي ابو امي
يعني هي تصير لامي .. بنت ابن عم ابوهه

-اييي من عابت هالعمام

- ايي والله
هذوله اهل امي عدهم وكاله مال غذائيه
يوزعون الحصه بالمنطقه يعني

جدي من توفى صار واحد من خوالي هو متكفل بيهه .. عمامهم البقيه كلهم شياب وماتو
كبل جدي  .. بقى هذا ابن عمهم هم جبير
وصارت ملاغاة ومشاكل يردون ياخذون الوكاله الهم

يكولون احنه على كد حالنه ويردون يحولوهه باسم ابوهم حتى يورثهه ويحولهه لبناته من يموت لان هو عنده بنات هواي وبس ولد اثنين كلمن طالع بيت ومعتمد على نفسه بالعيشه وضالات بناته هنه مزوجات منهن
ضالات بس اثنين كبار بالعمر ومحد ياخذهن
ولزكو فد لزكه على خوالي يردون الوكاله
الهم ولازم يتنازلون عنها ويحولوهه لاسمهم

- يبووووو يالنفوس الطماعه

- فد نووب حاطين عينهم على بيت خوالي
ومن عينهم خسروهم الفوكهم والجواهم

خوالي كلهم واصلين دارسين وكلمن وظيفته
وسيارته وبيت جدي جبير تخيلي خوالي جانو كلهم بيت واحد وكلهم متزوجين
وجدي مسويلهم الطابق الفوك بس الهم
عدهم بي خمس غرف وحمامات وحولي
شكبره مخلين بي تلفزيون وقنفات
ومأثثين غرف للجهال والجوه هم غرف لجدي ولخالاتي جانن غرفهن وحدهن
والمطبخ وذاك المضيف شكبره
بيت رناان
وخوالي كل واحد طابك سيارته بالكراج
مسويهن سره وحده وره ثانيه

- ياااعينيي لاتكولي كل هذا راح

- راح طبعا راح هنه هذني خلن شي علينه
خوالي تخاربو بينهم من وره نسوان كل وحده صارت تريد شكل وكبل والله احن من هيج اخوه ماكو ... صار كل واحد يدور بيت وحده
وعاندو كلهم يردون يبيعون البيت
وياخذون حصصهم ويطلعون

جدي جان مريض وهو جبير باخر ايامه
كتب لكل واحد حصته وكاللهم بس اموت بيعو البيت ودبرو عيشتكم ..

من مات صارت عاد هوسه الوكاله
خوالي مارضو ينطوهه الهم لان همه لا يمهه ولا عليهه ولزكو الااا ياخذوهه
وصارت هذيج المشاكل كلمن يحيير شيحجي
النوب صار كل يوميه واحد منهم لو مريض لو سيارته مدعومه لو جهاله يصير بيهم شي
واحد من جهال خوالي انسحك ومات براس الفرع

- اوووووي خطيييييه

- اكلهه هجموو حالهم هجججم لحد ما واحد من الي جانو مدخلين بالعركه نصحو خالي الجبير يحوللهم الوكاله ويخلص من شرهم
لان كطعو عليهم العافيه .. هاي اذا ما مر عليهم يوم بقدر يكسر الظهر
يلكوهم واكفيلهم بالباب وااالف حيله طلعو بيهه
لو يرحون لفلان وفلان يتوسطون ويخلوه يخابر على خوالي وجيب ودي بالحجي والكعدات وصارت لعبان نفس

عاد امي هنا جانت ماخذه بنتهم لعادل
وماحجيتهه توصل حجي لاهلهه خلي يكفون مشاكل هاي وصيه ابوهه موصي لازم ولده
يديرون بالهم على الوكاله ويحفظون الامانه بالناس ومكمل معاملتهه ومسجلهه باسم ابنه الجبير يعني هي شغله بيهه حكومه مو بكيف الواحد ينطيهه لو ياخذهه

هذيج رايحه حاجيه لامها و امها راده حجي لامي مو خوش .. تكللهه ..
انتو عينكم وبطونكم متشبع من الفلوس
ولاغفين الاكو والماكو وكل واحد منكم
شابع فلووس لحد ما زايعهه ولان ابويه فقير ويريد يستر على خواتي هاي عزيوتهه علينه

امي انغثت من حجيهه تكول احنه مانخلي احد فقير ومحتاج ليش هيج تفكر بينه

ورايحه لبيتهه تتفاهم وياهه وهذيج لسان عراكه مجفصه بالحجي ويه امي
وامي طالعه زعلانه من بيتهم  ومحاجيه خوالي حتى ينطوهم الوكاله ويخلصون من لسانهم راح يشوهون سمعتهم بين الناس على همه طماعين وميديرون بال للفقير ومايساعدون احد وكاسرين خطيه البنات

ومناك هم واحد محاجي خالي كايله اكسر الشر واخلص منهم واذا تبقون ماتتوفقون بيهه
لان عليهه العين صارت شغله منفوسه

عاد خالي حولها الهم و باعو البيت وهجو من المنطقه كلهه ...
اشترو كل واحد بيت بنفس المنطقه
وخلصو منهم
وضلت امي من ذاك اليوم مكاطعتهم

- يبوووو شكددد نفسيه ونااس نكسيين
هيج كباحه مشايفه !!

زين هاي امك المسعده شكو راحت اخذت حنفيش من نفس ملتهم !!!

-ااانه ادري ! مدري شلون قتنعت وراحت خطبتهه وخبصتنه تكعد ويه عمتهه ويضلن نسوان متصافيات بينهن واخوتكم يضلون كلب على كلب
تالي خوش عصابه سون

- هم فطيره امك خطيه
اوووف اوووف هذني مال حرك ولو اني مابقيت عليهم شي بس بعد بيهم رس نكس
يخوف

- والله شبعنااا ضيم ياابو ضيم من وره هالمِله الكشره .. ابتلينه وصرنا وياهم عمام مدري خوال شو منين مايندارون محسوبين علينه اهل

- ديلااا خلي يولون حبيبي اووي عفيه لتضوج نفسك بيهم
خليك شويه ريلاكس باجر ورانه
تشغيل عقل اووكيي

-الله اليستر

هي رجعت نامت وانه كمت توضيت وصليت
الليل حتى ادعيلهه واحصنهه من شر المكان والناس ..
كضيت الليل كله انه اقرا سوره البقره
على راسهه وللصبح كملتهه ونمت شويه وهي كعدت بدلت ونزلت وانه كملت نومتي

كعدت على صوت تلفون وشفت حسنين يخابر ..
ذكرني بالعزيمه وشفت ساعه عبرت الادعش
كمت بدلت ونزلت لكيت امي وفضه متحضرات وينتظرني ..

ريري وصيتهه تتحضر وبس اخلص غدا هناك ارجع عليهه اخذهه ونطلع ..

رحنه كلنه حتى الجهال اخذناهم وضلت بس ريري بالبيت .. ابويه بالسوك وعادل لكيناه منتظرنا بيت حسنين ..

كعدنا تغدينا وانه عيني ع الساعه كل شويه اريد امشي ويطلعولي سالفه .. صارت بالثنتين بعد طلعت  وعفتهم ..

ضليت بالسياره مانزلت طبكت باب بيتنه وخابرتهه .. اجتي صعدت وطلعنه حسب المكان متفقات عليه ...

نزلتهه راس شارع كبل المكان الموجوده بي البنيه وهي اخذت تكسي وراحتلهه وانه وراهم ...

شفتهه وكفت التكسي يم فرع والبنيه مبوشه
صعدت وياهه بالتكسي وطلعو لغير منطقه
هم منطقه خرابه ونفس الدرابين الضيكه
هناك نزلن ..

شويه واحاني اتصال ...
رقم غريب جاوبت ..
- نعم تفضل ؟

- اني صخر من طرف الست
وصلتني  رسالتهه وبيهه رقمك
كالت محتاج فزعه واحنه بالخدمه

- يا فزعه عمي ممحتاج شي

- لاا هسه ماصار خمس دقايق وصلتني رساله مكتوب انته محتاج فزعه وياك عندك طلابه
واحنه من البارحه بالنجف كاعدين بس دلينه مكانك  وين وجاييك احنه بالسياره طلعنه

حسيت اكو شي وره طلبهه وانطيتهم العنوان
وضليت وياهم كلساع بالتلفون ادليهم لحد ما وصلو يمي ... نزلت وكفت وياهم وهمه فتحو باب سيارتهم وصاحوني ..

طلعو سلاح وجهزوه وخلوه بايدي ..
ضليت فاك حلكي واباوعلهم ..جان يكلي ..
- احنه مانتفزع لسالفه ما نختمها  بالدم
الست طلبت يعني نحتاج سلاح
خلي سلاحك بايدك وكول ويامن  طلابتك

- ماعندي طلابه وعلي
بس هي كاعده ويه ناس غربه بهذا البيت
وانه هنا اراقب خاف يصيرلهه شي

- نعلى على شرف خواتهم المسكط
وبعدك واكف ومكابلني !!!
ماحجيت بالتلفون ماتفهم انته الست شتقصد !!! منين جابتك انته متكلي

بعدني مافكيت حلكي ورديت عليه وهو
فتح الجكمجه وطلع الكاتم وشيشه صغيره
مال ريحه
وصاح على صاحبه ..

-  جيب باقي الشواجير واللثام

كمشت ايده وكلتله...
- لك بويه مانهد عليهم لا ننفضح

- لك اسكت اسكت
انته ماتفهم الست مثلي
لك فزعت صخر تفهم شنو فزززعتني
هاي بورطه جوه كاعده وانته مطفي راس الفهم متعرفه واكف هنا شتنتظر يدزوهه الك مجفنه !
امشي وياي ولاكسر عرض امه اليندك بيهه

لبس اللثام وصاحبه اجه لثمني ومشينه
بس اشرتله ع البيت كبل وكف يدك الباب فلشهه بالدك .. بس فتحوهه كبل كمشه طك ركبته وسحله وياه جوه وصاح ..

- يلا كدامي امشو جوه

مشينه وانه داير وجهي اباوع للرجال مدد بالكاع وهو سد الباب وقفلهه من جوه
باوعت هذا صاحبه وكف دفر الباب الجوه
وهي حديد مانفتحت عاد كسر الجامه وفتح السركي وطب ...

واحنه وراه نباوع الهول فارغ وانه ركض جوه رحت كل واحد منا راح بجهه
صخر كبل صعد فوك ..

وانه دورت بالغرفه الجوه بكل مكان بيهه حتى بالكنتور دورت عليهن وماكو هنه
كلت لصاحبه يضل جوه وانه صعدت فوك وره صخر وهو يأشرلي اسكت ..

ضليت واكف بمكاني يم الدرج وهو يم باب الغرفه .. شويه وانفتحت باب الغرفه
بس شبر واحد وهو دفعهه كبل وطب وانه وراه

شفت ريري هنا خاتله بالزوايه هي وبنيه
وهذني نسوان ثنين كبار وسمان واكفات مقابيلنه وشايلات سجاجين ..

انه كبل ركضت جريت ريري وصخر باوعلهه وهي هزتله براسهه جان كبل يضرب طلقه برجل اول مره ..

والثانيه هجمت عليه بالسجين وتصرخ
وهو من راسه جرهه وركعهه بالباب
وهم ضربهه برجلهه ...

وهذيج خانسه بمكانهه .. رحت جريت تلفون من ايدهه وهي كامت تعيط ..
ضربتهه بحافه المسدس براسهه واخذت التلفون منهه .. كبل كسرته خليته مطشر بالكاع واخذت السيمكارت ضميته بجيبي ..

سمعنه جوه صوت هوسه وصخر كال
ضلو هنا وهو نزل ..

ضلت ريري  تشاورني تكلي ...
-  اكتلهن هذني عرفني جنتكم وحاصرني استجواب

-لاااا يربي لج ثوووله انتتي ليش ترفعين بوشيتج

- لك لحن عليه لحننن وردت اطلع ماخلني
هذني يريدني انام ويه ولد هنا عدهم خاتل ضل جوه

- كتلناه بره

- لاااا واحد ثاني بعده شاب جوه بس سمع الهوسه كبل طفر ختل مدري وين

- لعد هذا لزموه جوه
امشي ويايه

جريت ايدهه وطلعنه من الغرفه وكفنه يم الدرج وصحت على صخر وهو كبل صعد
وجار وياه الولد ..

جان نسمع صوت صياح البنيه من الغرفه
ركضت عليهه وشفتهه فاتحه الشباك وتصيح
للناس عصابه بيتنا الحكولنه ...

جريتهه وضربتهه على حلكهه ومطلتهه بالكاع وضليت دايس راسهه وهذنيج هم تصركعن ضلن يصيحن ..

صخر صاح ..
- ست الصمهن الج بقيت بيهن روح
خاف عندج حساب وياهن

- لااا اصبر حسابهن مو عندي

اجتي عليه كمشت ايدي وتكلي ..
- هذني تدري بيهن منو ! ركز بوجوهن زين

ضليت اباوعلهن وكلتلهه ..
-ماعرفهن نسوانه احنه مانشوفهن
منو هذن ؟ يابيت ؟

- هاي مرت ابوهه لاخت طنطل المصخمه
وهذا اخوهه من ابوهه

- عليج علييي !!!

- هي بنفسهه كلتلي هذا اخويه وهاي مرت ابويه متزوجها بالسر وميعرف بيها احد بس اني اسألهه بنفسك

- ماريد اسأل بس كليلي هاي الثالثه منو !

- هاي اختهه لمرت ابوهه يعني خاله الولد
لعلمك هذني اضربين من امهه جانت امهه
تشتري منهن شغلات الي تسوي بيهن شغلهه
ومتدري بيهه  رجلهه متزوجهه وهي تطب وتطلع عليهم

دفرت هاي الي جوه رجلي وصحت عليهن...
- شبيييييجن انت شبيجججججن
دخيلك ياااااربي صبرني

كعدت بالكاع وجريت راسهه كلتلهه..
- شعندج ويه عادل
شتردددددين منه

ما حجت وركعت راسهه بالكاع وصخر صاحلي ..
- خويي اساعدك

شفت ايدي واعصابي ترجف كلتله..
- تعال بعد اخوك

كبل اجه شالهه من ملابسهه وثبتهه ع الحايط
وضل خانكهه .. صارت ترافس جوه ايده
وانه جريتهه منه وضلت بالكاع ..
رجعت سألتهه...

- شتردين من عااااادل لاخر مره اسألج
احجييييييي شجااابح عليه

اشرت على النسوان وكالت ..
- هنه يريدنه وياهن

دفرتهه ورحت دفرت هذني النسوان وضليت اصيح ..
- شتررررردن من عااااادل شتردن منه

كلهن سكتن و صخر رجع جر راس البنيه
وضل طابكه لظهرهه وبس كاللهه..
- جاوبي شيسأل جاووووبيييي

هي كبل كالت ..
- هنه يريدنه وياهن يريدنه نفس شغلهن
انه معليه بيهن هنه دزني عليه يريدن
يعلمنه مثلهن ويصير ابو بيتهن
انه اخويه رادني يمهم اجي وعرفت ودزوني
ماعليه بشي والله همه دزوني عليه

عافهه وانه كعدت وكامش راسي والسلاح بالكاع .. كعدت يمي ريري وتكلي ...

- حيداار اكتلهم واخذ بثارك

- شكتل انتي الثانيه لا تبليني بيهن

- اكتلهم وخلي نخلص عيشتهم بعد صعبه
يلا بقو عليك

- ماااكتل ريري لا تحمليني ذنب كافي الصار وسويته لهسه كااافي تعبت انه مو هيج انه مو سفاح واكتل بالرايح والجاي كااافي دخيل ربج ماتحمل بعد دم بركبتي

- لتخبلني ولك ضلو بس هذوله ونخلص
لك كلهم عرفونه بعد شلون تعوووفهم !!

- عوفينه خلي نتواجه ويه اهلنه وكلمن يتصرف وين ناسه بعد لا تورطيني بكتل
كاف جاي هسه ملثم واهجم على البيوت واكتل بنسوان

- لك لااااتخليني اشك هدومي حيداار
لك ضلو بس هذوله الاربعه تريد تفضحنا بين اهلك !! ميكولون منين عرفتوهم و شوداكم  عليهم !

- مااكدر ريري اااانه موو هيج ماكدر اكتل نفس

- اني اكتل ميخالف ااااني اكتل زيين
كووم وياي حيداار هذوله اذا مانكتلهم همه يكتلونه

- مااكدر اغدر باهلي هييييج افهمييينننييييي
هذني نسوااان ومن اهلي ماريد ابتلي بذنبهن

- كوووووم عااااد كووووم
نسوان البله التصخمتو بيهن
تريدنا ننفضح !! كوووم خلصنه

وكفت هي وشالت سلاحي بايدهه وكالتلي ..
- حيداار تعال يلا
اني اكتل اثنين وانته اثنين يلاااا
لا تعوف كلشي عليه

وكفت يمهه وكمشت ايدهه ..
- ريري نسلمهم شرطه

-احنه الننسجن بدالهم يالذكي
حيداار تره تعبت وبطني مغصتني خلي نخلص واخذني ارتاح هذني شلن حالي ولعبن بيه لعب
وماااطلع منا اذا ما اتطلع روحهن

ضليت اباوع عليهم وصخر اجه اخذ السلاح من ريري وحطه بايدي .. وكال ...
- انته ابو الثار لو بايدك لو بايدنا
احنه الزلم مو هي

وكفت اباوع على اربعتهم وكلت لريري..
- منو الاذاج منهم !

- هاي البربوك رادت تنومني ويه اخوهه
وهاي المصخمه مرت ابوهه تريدني اذا مانمت ويه اخوهه انام ويه اختهه
عوووود اذااا اني استحي يعني

- وهذا الكواد ! طخج

- لاااا بس كاعد يتمضحك بوجهي ويتغزل بعيوني

كبل شلت السلاح عليه ومشيت خليته براسه
وكلت ..
- ربي انته ادرى بالحال وهذا اندك بعرضي
ماعليه حرج

كبل ضربته طلقه براسه وصخر ضربه الثانيه بصدره
وكالي..
- لازم اثنين ختم امان الك تعلم خويي

ايدي ترجف ووجهي يزخ عرك انداريت اباوع للنسوان .. و هنه يتباجن ويتعايطن
وريري تصيح وتفشر عليهن ..

الباب جوه تندك و رجال يصيح ..
صخر كبل دز صاحبه جوه وكالي ..
- خلصنه اكتل يلااا

باوعت عليهن وصارو بوجهي كل عمامي
وصار بوجهي عادل ..
انه وكفت يم البنيه وخليت السلاح عليهه وهي ضلت تكلي ..
-  عاادل اعوفه والله اعوفه مادخل بي بعد
لخااطر ابويه استر عليه وعوفني والله ماحجي شي ولا اجيبكم بالطاري

نزلت السلاح وريري اجتي يمي وكلتلي..
- هاي رس امهه واهلهه بيهه
اذا مافضحتنا تموتنه بسحورتهه ولتنسى وياهه وحده بالبيت بعد كلشي سهل عليهه
اكتلهه هي بكل احوالهه عار ونايمه ويه عادل الف مره
لتنسى شنعرف عليهه من بلاوي

ضليت اباوعلهه وصخر صاح ..
- فضهااااا عااااد راح ننلزم
اكتلهه هي كحبه هسه خايف عليهه اكتلهه خرا بشرفهن

ترددت اكتلهه وريري جرت السلاح من ايدي وكبل ضربتهه اربع طلقات ..
كلتلي ..
- اني مااثق بس بيك
سوالف النسوان هاي فخ للزمن تضل

جرت ايدي ومشينه لباب الغرفه وباوعت للنسوان هذني سابحات بدم رجلهن وصخر
هو ويمشي كل وحده ضرب بيهه طلقتين
وطلع وسد الباب عليهن ..

كال ..
- اصعدو للسطح واني ادبر الطريق واخابركم تنزلون

اخذت ريري ومشينه للسطح من شفناه كلتلهه اببببد مانخطي خطوه بي ..

السطح على عرضه محطوط خشب بشكل مثلث ومنثوره الكاع بس تراب واثار شمع

سديت الباب وضليت واكف حاضنهه واقرا قرآن .. اخاف يلوحنن شي من شياطين البيت
وصيتهه تضل تصلي على النبي منا لحد مانطلع من البيت ..

وضليت انه اقرا بالسور وهي تصلي على النبي وطولت وكفتنه هنا فوك الساعه
يلا خابر صخر .. وكال انزلو السياره بالباب
وماكو احد ..

كبل نزلنه وهي راحت اخذت جنطتهه
من الهول وطلعنه شفنه سياره ثانيه غير الي اجوي بيهه .. كبل صعدنا وطلعنه ...

كلبي يدك سريع وكل جسمي يرجف
شمر علينه بطلين ماي .. فتحته وايدي ترجف
شربت وتنكعت ملابسي ...

ريري كامشه ايدي وتهدي بيه وانه سألته على سيارتي مال اخذناهه ويه سيارتنه

ضل يكلي أمن ومحد يدري بشي
من طلعنه حجينالهم عركه نسوان وشجم واحد ما صدك من الجيران طلعنه عليهم السلاح
خنسو بعد وكلمن طب لبيته ...

ورايحين ماخذين السيارات وجايبين هاي ومحد متجرأ من الناس يطب للبيت خاف تصير عليه الجريمه ..

وصلونه للمكان الي بيه سيارتنه ..
نزلنه وريري كامشه ايدي وتكلي ..

- حيداار مغص قوووووي بطنني دتتكطع

-لااااا يالله
ولج شووووصيتج

- لك هذني اخذني جر جر لفوك وكل شويه وحده جايه ضاربتني وهنه بكبر الفيل

- دخيييلك ياربيييي
مشي اليوم بسلامه دخيل اسمك الهي

اخذتهه كبل للمستشفى وضليت كاعد بره وهي بردهه النسوان جوه ..
شويه ورحت اسأل عليهه كالو معلكيهه مغذي ومنطيهه مسكنات وتصير زينه فد شويه

رحت للحمام غسلت وشويه وضليت اتقيء لعبت نفسي من كل شي شفته .. ودخت حيل
بعد اريد اشوف دربي مابيه ..
كلشي صرت اشوفه اظلم عبالك هسه
راجع من مكان بي شمس كلشي ماشوف واميز ..

اكمش بالحايط وكعدت بالكاع .. لحد ما رجعلي شويه حيلي يلا كمت رحت اشتريت عصير شربته وضليت كاعد بره ..

لحد ماخابرتني ريري يلا طبيت جوه
وشفتهه واكفه باب الردهه ..
رحت كمشت ايدهه وهي تكلي...
- خلي نرجع للبيت هناك اريد ارتاح
هذني ديطلكن وخوفني

- خلص المغذي جاي تحسين احسن بطنج صارت

-اي ايي بس تعبانه خلي ارتاح وكلشي مابيه ارجع زينه

رجعنه للبيت وتلكتني امي من شافت ريري
بيدهه الكانونه .. كلتلهه خابرتني بطنهه تاذيهه وكبل. اخذتهه للمستشفى وهاي رجعتنه

صارت عذر يغطي على روحتنه ويبعدنا من الشبهه بس الحيل انتهى بعد ..

ذبينه روحنه على الفراش مابينه قطره دم ولا قطره حيل بعد ....
ضلينه ساكتين ماحجينه حرف واحد ..

لليل بقينه ماتحركنه من فراشنه ..
عبرت الصلاه وانه ماكدر اكوم اصلي
كل جسمي خاوي والافكار ذبحتني
والخوف من الجاي اكل كل حيلي ...

فزيت من هزت جسمي .. وانداريت عليهه
- حبيبي بالي يمك

-جاي اموت بالحسييين
ليش وصلتينه لهيج مواصيل ليش دزيتي ع الولد

- اكوووله عرفني مدري شلوون هاي البربوك لكطتني وتكولي انتي جنة بيت ابو عادل البغداديه
شتريدني اسوي مو زين لحكت ادز رساله

- شلون كدرتي تكتبين وهنه يمج!

- هي راحت تصيح اخوهه واني بالختله كتبت
هذنيج حايرات بدفاترهن ويقفلن بالبوفيه
واستغليتهه فرصه

- ماخابرتيني چا بس كبل تذكرتي صخر وانه مو بعينج

- صخر دزيتله حتى يجي يفهمك لان من احجيلك رادلي جريده اكتبهه ووكت ماعندي وانته شلون تدبرهه وحدك !!

تصرفي جان احسن شي سويته بحياتي

كعدت وضليت افرك بوجهي وهي ايدهه على ظهري..
- ريري شراح يطلعنه من هالجريمه
لج المنطقه كلهه عرفت عصابه طابه عليهم ومكتلتهم

- اي لتخاف همه شافو الولد احنه محد شافنه

- لجججج اربعه ريري اربعه بساعه وحده
كتلناهم !!
وين نروح من الله احنه بعد شيطلعنه من ورطتنه هاي
لج شلون بينه !!!

حضنتني وضلت تكلي..
- احنه سوينا الزين وكلشي اضطرينا عليه
هاي الناس ماترحم ولو عايفيهم صدك بس ندير ظهرنا يكتلونه

- كلشي صار بسرعه ماجاي اكدر استوعب اااانه شسووويت

- حيداار دتفهم انته لو لاا
داكولك هذني بلوه سوده
شفت بعينك بيتهم شلونه وسمعت البنيه شكالت
يريدن عادل وياهن يعني مشتغلاته حتى يفيدهن هاااي كلشي سواه عادل وصار بي
من وراهن 
هذني تنقهر عليهن !!! ثار اخوك هذا لاتنسى

- لج ادري ادررررري
انه مانقهر عليهن انه نفسي نفسسسي تغيرت
ريري انه مو هيج
انه رجال بسيط ومن اهل الله وين رحت وتورطت وييييين

- بعدك زين ماتغيرت بس هسه انته مصدوم وخايف
ارتاح وبعدين تشوف الزين هو السويناه
وديربااالك تحجي حرف واحد لاحد لحد متموت انته تضم سرك هذا بكلبك
لووو يكطعوك وصل لاتحجي شي
موت وانته ساكت

.
.
.
يتبع💕