رواية معتكف في محراب قلبي الفصل السابع والعشرون 27 - بقلم مي سيد

رواية معتكف في محراب قلبي الفصل السابع والعشرون

لسبب ما كلامها مستفزنيش ، يمكن عشان عارفه انها بتقول كده عشان تستفزني ، حتي لو كلامها حقيقي

ويمكن عشان انا ف مكاني دلوقتي انا ال مراته مش هي

ويمكن عشان زعقلها ف اداني القوه اني اتكلم

رديت وانا ببصلها بهدوء وببتسملها ببرود

_ بجد ؟ فكرتك هتقولي ملك من دلقتها عليه

ال حتي محترمتش ان مراته قاعده جمبه

اخدت بالي من الصدمه ال احتلت وجوههم كلهم ، بس عادي

الحقيقه كده انا مستبيعه ، ثم انا متبلتش عليها ، اذا كان اختها ال بيقولو كانت هتبقي مراته معملتش نص ال هي بتعمله او معملتش حاجه خالص الحقيقه

ال فاق من الصدمه اسرع واحد هو نوح ، يمكن متوقعتش انه هيزعقلي ع كلامي بس برضو متوقعتش انه يبتسم

اتكلمت ملك وهي بتقوم من مكانها بعنف

° انتي بتقولي اي ييتاعه انتي

= اسمي حوراء يحبيبتي ، معلش الاسم غريب شويه ع الجهله ال زيك بس هو سهل ، قولي ورايا كده ح و ر ا ء ، شوفتي سهل ازاي

كرريه كتير بقا عشان تحفظيه

عصبيتها زادت ، فزعقت وهي بتبص لنوح ، ال مازال مبتسملي بالمناسبه

° نوح انت هتسكت لمراتك

عصبيتها كانت ممزجاني ، اصل ال محدش يعرفه ان انا وليه قرشانه

= شوف ال بتتلزق ف الراجل برضو ، يحبيبتي ده جوزي انا بتكلميه لي دلوقتي

° ده ابن عمي انتي بتقولي اي

اتكلمت الاء وهي بتشدها عشان تهدي بحكم انها عارفه ان اختها بتحاول تلفت نظر نوح ، او كلنا عارفين الحقيقه

* خلاص ي ملك اقعدي مش عايزين مشاكل

= يحبيبتي هو انا بخطفه منك ، اقعدي كده وابردي شويه مش هيبصلك والله

أخيراً نوح اتكلم ، بس الحقيقه ياريته م اتكلم

_ هو الحقيقه ان مش هي بس ال مش هبصلها ، انما مش هبص لحد غيرك

رده عمل خلل طبيعي ف دقات قلبي ، بس ده مخلنيش اهدي من ناحيته ، او عصبيتي تقل ، او حزني يهدي

اوك هشيلّه جملته ف الذاكره عشان ابقي افتكر انه دافع عني ، بس قلبي مش هيهدي من ناحيته

اتصدمت ، كذلك اميرة ال كانت قاعده بتتابع كل ال بيحصل بتشفي ، او بصدمه بعد م استوعبت ردودي

ماما صفاء كانت قاعده بتحاول تخفي ابتسامتها من ال بيحصل ف ملك

اتكلمت وهي بتغمزلي بعينها

" خلاص بقا ي حورا ، عيب كده يحبيبتي

خدت بالي من حركتها ، ف ابتسمت عشان اوطي ابوس ايدها وانا بتكلم

_ حاضر يماما ، سكت

اتكلمت ملك وهي تقريباً ع وشك انها هتتشل

° حورا ؟ وعيب كده يحبيبتي ؟ هو ده بجد ال بتقوليهولها ي طنط

خلصت كلامها وهي بتوجه باقي كلامها لنوح وهي بتبكي بصعبانيه

° عجبك ال بيحصلنا من مراتك ده ي نوح

رديت انا عليها قبل م نوح يرد وانا ببصلها باستفزاز

_ شوف برضو البت ، يبنتي انتي مالك وماله الاه

اتكلم نوح وهي بيبصبلنا كلنا بحزم

= خلاص ، مش عايز اسمع صوت

ملك حوراء مكلمتكيش ، انتي ال بدأتي بحركاتك ال مش لطيفه ، وبما اني جوزها فطبيعي تتكلم + ثم انتي ف مكان تحترمي صاحبته

° كده ! تمام ي ابن عمي ، يلا بينا ي آلاء

ماما وققت وكذلك اميرة عشان تتكلم معاهم يقعدو

" خلاص ي ملك بقا ، اقعدي يبنتي احنا مسافرين والله اعلم هشوفكو تاني ولا لا

ردت آلاء بسرعه وهي بتتكلم بخضه

* متقوليش كده ي طنط ، ان شاء الله ترجعيلنا بالف سلامه

اسكت ! أكيد لا

قومت بسرعه وانا بمسك ايد ماما عشان اقعدها مكانها وانا ببص لملك باستفزاز

_ اقعدي يماما متتعبيش نفسك يحبيبتي ، اهم حاجه صحتك

اتكلمت من تحت اسنانها من غير م حد ياخد باله

" وانا ال كنت فكراكي غلبانه

اتكلمت بنفس الهمس وانا بوطي كاني ببوس دماغها

_ كنت بتمسكن لحد م اتمكن من ابنك

رد نوح وهو بيبص قدامه كانه مفيش حاجه

= سمعتك

" اها يعني كنتي بتضحكي عليا يبت ي حورا

رديت وانا بتجاهل كلمه نوح كاني مسمعتوش

_ وانا اقدر يعيون حورا ، ده انا اتجوزت ابنك عشان انتي امه

= برضو سمعتك

بصيتله بسماجه بدون م اتكلم وقعدت جمب ماما ، كل ده واميره بتهدي ملك والاء ال مش مشوفتش اهدي منها بصراحه

_ م تقعدي بقا يملك ، مكانتش حقيقه قلتها دي ، اقعدي يلا متزعليش هبقي انافقك بعد كده

اتكلمت ماما وهي بتقرصني بالراحه

" يخرابي ع الحربقه ، يبت اسكتي انتي مصدقتي !

_ بصراحه اها ، ابنك مزعلني ومصدقت اطلع ف حد ال فيا

= والله العظيم يبنتي سامعك

اتكلمت بدون م ترد ع نوح كانها بتساندني ف زعلي منه

" هي ايوه تستاهل بس مش للدرجادي ، خلاص بقا ي حورا عشان خاطري

_ حاضر يماما

قومت مسكت الاء قعدتها بما اني مش قابله اختها

_ خلاص يجماعه اتفضلو ، انا هطلع اجهز الغذا

" تعالي يحورا اقعدي اميرة جهزته

_ خلاص هطلع اجهز السفره ع م تتكلمو مع بعض براحتكو

" خلاص يحبيبتي براحتك ، قوم ي نوح مع مراتك

طب لي كده يماما ، خليه بالله مش عايزاه ، انا هطلع اعيط مش عايزاه يشوفني

_ احم ، خليه يماما الموضوع مش مُتعب

قام وقف عشان يقرب عليا وهو حاطط ايده ف جيوب بنطلونه بكاريزما خلت عيون ملك هتطلع من مكانها

= بس انا عايز اجي معاكي

اتكلمت بهمس غاضب بعد م حجب عني اي حد بحكم فرق الطول ال بينا

_ احنا مش رايحين حضانه عشان تيجي معايا ، وبعد اذنك انا مش عايزه اتواجد ف مكان انت فيه

الكلام صدمه ، لدرجه انه اخد خطوه لورا ، ف استغليت الفرصه وسبتهم وخرجت

دخلت المطبخ عشان كل ال عملته قدامهم ينهار ، وكل ال حصل ف الفيديو يتعاد قدام عيني تاني

انا لسه قلبي بيوجعني ، ومش معني اني مش ظاهره ده لحد اني بقيت تمام ، انا لسه عايزه اعيط

انا لسه تعبانه وقلبي متفتت ، انا لسه خاطري مكسور ، انا لسه مش كويسه

انا لسه مش عارفه اتجاوز ال حصل ،

لسه مش قادره اتخطي الاتفاق ال حصل بينهم عليا

مسحت دموعي بسرعه لما حسيت بحد داخل المطبخ

بدون م التفت سمعت صوته وهو بيتكلم بهدوء بعد م اخد باله من دموعي تقريباً

_ انا جيت عشان كنت عارف انك مش هتعرفي حاجه ف المطبخ

رديت بجمود بدون التفتله وانا سانده بايدي حوض المطبخ

= متقلقش هعرف اتعامل ، اتفضل انت لو سمحت

_ ماما طلبت مني اساعدك

بدون م رد سبته وانا متوجه لباب المطبخ عشان اخرج

وقبل م ده يحصل كان هو مسك ايدي

_ راحه فين ؟

اتكلمت وانا مازلت مدياله ضهري

= وجودك ف مكان هيمنع وجودي ، فخلاص تمام خليك وانا هطلع فوق

اتكلم باسف حسيته ف صوته بسبب كلامي

_ هو بجد للدرجادي ؟

التفتله وانا ببصله بوجع بعد م الدموع اتكونت ف عيني تاني

= انت مجربتش فمش هتحس

_ بس انا حاسس ، ومش عارف اعمل اي عشان اهون وجعك

دموعي ال حاولت امسكها غفلتني و نزلت قدامه

= ابعد عني ، ابعد عني بس

مد ايده يمسح الدموع ال نزلت عشان ابعد وشي عنه بعنف

_ بس انا مش هبعد ي حورا ، مش هبعد ومش هسيبك

حورا انا ...

قبل م يكمل كلامه كانت ملك داخله علينا ، عشان يضمني ليه بسرعه عشان يخبي دموعي ف صدره

ضميته انا كمان وانا بخبي وشي ف حضنه اكتر ، عشان دموعي تنزل بشكل اكبر بدون صوت وهو بيتكلم مع ملك بدون م اخد بالي من كلامهم

هو لي بجد حنيته دي مكنتش بحب ، لي محبنيش

هو انا متحبش ؟ طب انا شكلي وحش عشان كده محبنيش

طب لي محبنيش ، انا كان نفسي يحبني ، انا بحبه لي محبنيش

كل م فكرة انه محبنيش كانت بتيجي ف بالي وانه اتجوزني غصب عنه ؛

كنت بزيد ف الدموع اكتر بدون م احاول اسيطر عليها بحكم اننا مش ف البيت

وان انا مش لوحدي ، انا معايا سبب وجعي

تقريباً ملك مشيت ، بعد م هو مشاها تقريباً ، مش عارفه

رجع بيا وهو مازال واخدني ف حضنه لحد م سند ع الجدار بتعب

اتكلم بهمس وهو بيدخلني ف حضنه اكتر

_ عيطي براحتك بس وانتي ف حضني ، انا مش هسيبك لدماغك ، انا مش هسيبك أصلاً

باس جبهتي وهو بيتاسف للمره ال معرفش عددها

_ انا اسف ، حقك ع قلبي ، انا اسف

شويه شويه مع كلامه وحضنه هديت ، بعدت عشان امسح دموعي بس هو سبقني

مسح دموعي وباس مكانها ، عشان اتصدم من حركته فابعد بسرعه لدرجه اني كنت هخبط ف الجدار ال ورايا

فشدني تاني عشان يضمني ليه تاني ، ف استغل انا الفرصه عشان اقدر اسيطر ع مشاعري ال بعثرها وع خجلي ال انتشر وبان ع خدودي

بعد شويه واحنا ساكتين احنا الاتنين ، انا مرتاحه واحنا كده ، حتي لو زعلانه منه حضنه مريح

اتكلم وانا حاسه بالابتسامه ف صوته

_ هو انا مرتاح ف الوضع ده جدا ، بس ملك لو دخلت تاني و احنا كده هتولع ف نفسها

بعدت عنه بسرعه وانا بعلِن لاول مره كُرهي الدفا والامان ال بحسهم ف حضنه

عشان ارجع اسأل نفسي تاني ، اذا كان بحس بكل ده وهو مش بيحبني ، اومال لما يحبني حضنه هيبقي عامل ازاي ؟

سبته عشان اروح للسفره لقيته شد ايدي تاني

عشان يتكلم بحنيه بعد م نزل لمستوي طولي

_ بقيتي أحسن ؟

للأسف ايوه ، للأسف حضنك خلاني بقيت احسن

هزيتله رأسي بسرعه وانا بخرج بدون م ارد او اتكلم ،

عشان يحصلني وهو ساند ع الجدار حاطط ايده ف جيوبه وهو مراقبني بابتسامه لمحتها ع وشه

حاولت اتجاهل مراقبته ليا عشان اقدر اتغلب ع توتري وانا برص الاكل ع السفره

بدأ يساعدني لحد م خلصنا ، دخلت ناديتلهم وجم عشان نقعد ناكل

عشان يقعد ماما ع راس السفره بعد م كان ده مكانه ، ويقعد وبسرعة يقعدني جمبه

عشان استوعب انه محبش يقعد بين ماما وبين حد من بنات عمه

بدأنا ناكل بهدوء وطبعا ملك عماله تنغزني بنظراتها من تحت لتحت بقرف ، عشان ابصلها باستفزاز وانا مبتسمه عادي

اتكلمت ماما وهي بتوجهلي الكلام

" رجعتو امتي امبارح ي رورو

_ رجعنا متاخر ي ماما ، الساعه 4 تقريباً

اتكلمت ملك وهي بتسال من طرف مناخيرها

° 4 العصر ؟

_ لا يحبيبتي 4 الفجر

° وازاي ترجعو متاخر كده

رديت باستفزاز بعد م اكتشفت ان استفزازها بيغسلني من جوا

_ والله يحبيبتي معايا جوزي ارجع وقت م احب ، يكش نبات برا محدش ليه دعوه غير ماما

اتكلم نوح وهو بيميل عليا عشان يهمس وهي بيغمزلي قدامهم

= حلوه كلمه جوزي دي

مردتش عليه بعد م سمعت ماما وهي بتسألني بسرعه عشان الدنيا متسخنش تاني

° طب اتعشيتو فين يحبيبتي ، اكيد مكنش فيه مطاعم فاتحه

رديت عليها بتلقائيه مش عارفه لي رسمت الصدمه ع وشوشهم

_ لا يماما كان فيه مطعم كبده روحنا كلنا فيه

اتكلمت وهي بتحاول تستوعب

" اكلتو فين يحبيبتي ؟

_ مطعب كبده يماما ، بس كان اكله تحفه

" مين دول ال اكلو ف مطعم كبده

رديت وانا مش مستوعبة لي الاسئله الكتير دي ع كبده ، اومال لو قولتلهم اني عايزه اكل ف مصمط

_ انا ونوح ي ماما ، ف اي ؟

ردت وهي بتبص لنوح بخبث ، وال كان بالمناسبه بيبصلي بابتسامه بدون م يهتم بصدمه حد من ال قاعد

" اصل نوح مش بياكل الكبده نهائي ، واضح ان تاثيرك عالي

................